‘’Waxaa ii yimid dhalinyaro afka soo duubatay oo i faray inaan xoog uga qeybgalo shirka Kismaayo’’ Sidaa waxaa yiri..

By Asad Cabdullahi Mataan

Muqdisho (Caasimada Online)-Odayaal kasoo jeeda Beelaha Dega Magaalada Kismaayo oo wareysi siiyaya Idaacadda KNN ee Magaalada Muqdisho, ayaa sheegay inay ka baxsan la’ yihiin Maleeshiyaadka Daacada u ah Hoggaamiyaha Raaskanbooni ee Magaalada Kismaayo.

Waxa ay sheegen in dhalin yaro afka soo duubatay ay Guryahooda ugu imaaden islamarkaana ay ku wargaliyeen inay si qasab ah uga soo qeybgalaan Shirka maanta ka furmaayo Magaalada Kismaayo ee la sheegay in lagu wada heshiisiinaayo Beelaha dega Kismaayo.

Mid kamid ah Odayaashasi oo la hadlaayay Idaacada KNN ee Magaalada Muqdisho kana gaabsaday Magaciisa Amni daro awgeed ayaa yiri ‘’Adeerow dhalinyaro wajiga soo xirtay ayaa iigu imaaday gurigeyga waxa ay igu amreen inaan kasoo qeybgalo shirka dib u heshiisiinta haddii aan ka baaqdana ay ii sheegeen inay guriga ay iigu imaan doonaan islamarkaana ay gacan bir igu qaban doonaan’’

Sidoo kale waxa uu yiri ‘’Anagu waxan naloo sheegay in Beeshayadu si gaar ah ay ula kulmi doonaan Axmed Madoobe iyo Ururka IGAD, inta aan taas la gaarin waxaa naloo keenay Hanjabaado, waxan DF ka codsaneynaa inay naga qabato qolyahaan Axmed Madoobe, diyaar uma nihin inaan ka qeybgalno qasab iyo goodin ayaa nalooga qeybgalinayaa taasi natiijo kama dhalaneyso’’

Odayaashaani oo Idaacadaasi u waramaayay ayaa waxa ay sidoo kale Beesha caalamka ugu baaqeen in wax laga qabto Awoodaha shirka Kismaayo leysaga qeybgalinaayo, waxa ayna Tilmaameen in la dilaayo haddii ay ka baaqdaan shirkaasi.

Dhanka kale, Haddalka Odayaashaani ayaa waxa uu barbar socdaa mid uu maalin ka hor shaaciyay Col. Barre Hiiraale oo ahaa in shirka uu maraayo xaalad dib u dhac ah, taasi oo sababtay in Odayaasha xoog looga soo kaxeeyo Aqaladooda sidaan looga qeybgaliyo shirka oo aan weli loo helin Odayaal ku filan.

DF ayaan weli ka hadal dhibaatooyinka ay Odayaashaasi ka cabanayaan, mana jirto cid DF ka tirsan oo dhex dhexaad ka ah shirkaasi.

Caasimada Online

Xafiiska Muqdisho

Caasimada@live.com