R/W CC oo magacaabay afhayeenka cusub ee DF

By Asad Cabdullahi Mataan

Muqdisho (Caasimada Online) – Wararka naga soo gaarayo Xafiiska Ra’isul wasaaraha Somalia Cumar C/rashiid Cali Sharmaarke ayaa sheegaya in Ra’isul wasaaraha uu magacaabay Afhayeen cusub oo lagu bedeli doono Ridwaan Xaaji C/weli oo isagu xilkaasi iska casilay.

Afhayeenka Cusub ayaa waxaa loo magacaabay C/Salaam Axmed Caato oo kamid ahaa Weriyayaasha ka howlgali jiray warbaahinta Somalia, waxa uuna iminka noqon doono Afhayeenka Xukuumada Somalia.

C/Salaam Axmed Caato, ayaa waxaa xilkaasi la gaclooday Ra’isul wasaare Cumar, oo la sheegay inay ka dhexeysay aqoon hore.

Afhayeenkaani ayaa si gaar ah uga soo shaqeeyay Tv-ga Universal, waxa ayna digreetadiisa iminka taala Xafiiska Ra’isul wasaaraha sida ay xogtu ku heshay Caasimada Online.

Howlwadeenada Xafiiska Ra’isul wasaaraha ayaa lagu wadaa in saacadaha soo socda faafiyaan digreetada lagu magacaabay C/Salaam Axmed Caato.

Caasimada Online
Xafiiska Muqdisho
Caasimada@live.com