Tehran (Caasimada Online) – Hoggaamiyaha sare ee Iran, Mojtaba Khamenei, ayaa Mareykanka ugu hanjabay inuu la kulmi doono “casharro aan la illoobi doonin”, isaga oo Washington ku eedeeyay inay si isdaba joog ah u jebisay heshiiskii ku-meel-gaarka ahaa ee ay labada dal gaareen bishii hore.
Bayaan qoraal ah oo loo nisbeeyay Khamenei, lagana akhriyay telefishinka dowladda Iran Sabtidii, ayaa lagu sheegay in tallaabooyinka Mareykanka ay caddeeyeen inaan lagu kalsoonaan karin ballanqaadyada madaxweyne Donald Trump.
“Jebinta soo noqnoqotay ee heshiiska waxay mar kale qof walba u caddeysay in saxiixa madaxweynaha Mareykanka uu yahay mid aan wax qiimo iyo kalsooni ah lahayn,” ayaa lagu yiri bayaanka.
Khamenei ayaa Mareykanka ku eedeeyay “xoog sheegasho, kelitalisnimo iyo arxan-darro”, isaga oo sheegay in dhaqamadaas ay yihiin kuwo aan laga sooci karin siyaasadda Washington.
“Cadawga Mareykanka waa inuu ogaadaa in shacabka qaaliga ah ee Iran iyo Jabhadda Iska-caabintu ay u hayaan casharro aan la illoobi doonin,” ayuu yiri hoggaamiyaha sare ee Iran.
Hadalkan ayaa kusoo beegmaya xilli uu mar kale sii xoogeysanayo dagaalka u dhexeeya Mareykanka iyo Iran, kaddib markii uu burburay heshiis xabbad-joojin ah oo muddo kooban hakiyay dagaallada.
Mareykanka ayaa maalmihii lasoo dhaafay kordhiyay duqeymaha uu ka fulinayo gudaha Iran, isaga oo sheegay inuu beegsanayo xarumo la xiriira ciidamada, gantaallada iyo saadka militariga.
Hase yeeshee, warbaahinta Iran ayaa sheegtay in weerarrada qaarkood ay waxyeelleeyeen kaabayaal rayid ah, oo ay ku jiraan buundooyin, waddooyin, saldhig tareen iyo garoon diyaaradeed oo ku yaalla koonfurta dalka.
Ugu yaraan shan buundo ayaa lagu warramay in lagu dhuftay weerarrada Mareykanka, halka toddobo qof lagu dilay duqeyn ka dhacday magaalada dekedda leh ee Bandar Khamir. Qaramada Midoobay ayaa muujisay walaac ku saabsan weerarrada lagu beegsanayo kaabayaasha rayidka ee Iran iyo dalalka kale ee gobolka.
Iran ayaa dhankeeda qaaday weerarro gantaallo iyo diyaarado aan duuliye lahayn ah oo ka dhan ah dalalka Khaliijka ee martigeliya saldhigyada ciidamada Mareykanka.
Mas’uuliyiinta Kuwait ayaa sheegay in weerar Iran lala xiriiriyay uu haleelay xarun lagu dhaliyo korontada laguna sifeeyo biyaha badda, taas oo sababtay dab iyo inay hawlgabka noqdaan tiro ka mid ah qeybihii korontada dhalinayay.
Kuwait waxay inta badan biyaha ay cabbaan dadkeedu ka heshaa xarumaha biyaha badda looga saaro cusbada, taas oo weerarka ka dhigtay mid muujinaya halista ay dagaalladu ku hayaan adeegyada aasaasiga ah ee dalalka Khaliijka.
Xiisadda cusub ayaa timid kaddib markii uu burburay heshiiskii is-afgaradka ahaa ee ay Iran iyo Mareykanka bishii June ku gaareen dhexdhexaadin ay sameeyeen Qatar iyo Pakistan.
Heshiiskaas ayaa dhigayay xabbad-joojin socota 60 maalmood, dib-u-furidda marin-biyoodka Hormuz iyo in la bilaabo wada-hadallo lagu doonayo heshiis rasmi ah oo soo afjara dagaalka, isla markaana xal looga gaaro barnaamijka Nukliyeerka Iran.
Tehran iyo Washington ayaa markii dambe midba kan kale ku eedeeyay inuu jebiyay qodobbadii heshiiska, waxaana labada dhinac ay ku dhawaaqeen inuu is-afgaradku burburay.
Khamenei ayaa sheegay in Mareykanku uu hadda muujiyay “wajigiisa dhabta ah”, isaga oo Washington ku tilmaamay dowlad aan la isku halleyn karin.
Waxa uu shacabka Iran ugu baaqay inay ku kalsoonaadaan hoggaanka dalka, isla markaana ay muujiyaan feejignaan iyo firfircooni inta uu socdo dagaalka uu ku tilmaamay mid lagu difaacayo jiritaanka iyo madax-bannaanida Iran.
Waxaa sidoo kale isa soo taraya walaaca laga qabo in xulafada Iran ee gobolka ay dagaalka si toos ah ugu biiraan. Warar ayaa sheegaya in kooxda Xuutiyiinta Yemen ay ku hanjabayaan inay carqaladeyn karaan marin-biyoodka Bab al-Mandab, oo isku xira Badda Cas iyo Gacanka Cadmeed.
Tallaabo noocaas ah waxay khalkhal gelin kartaa isu-socodka maraakiibta, ganacsiga caalamka iyo suuqyada tamarta, xilli weerarrada cusub ay durba hoos u dhigeen suuqyada saamiyada Khaliijka, isla markaana sare u qaadeen qiimaha shidaalka.