Baydhabo (Caasimada Online) – Xubno ka tirsan Guddiga Doorashooyinka Qaranka iyo Soohdimaha ayaa maanta gaaray magaalada Baydhabo ee xarunta maamulka Koofur Galbeed.

Socdaalka xubnaha ayaa qeyb ka ah dadaallada dowladda federaalka iyo hay’adaha doorashooyinka ay ku dardar-gelinayaan howlaha doorashada dalka, taas oo haatan diiwaan-gelinta codbixiyeyaasha ka socoto caasimadda, lagana bilaabi doono maamullada.

Ujeedka socdaalkan ayaa ahaa in si rasmi ah loo bilaabo diiwaan-gelinta codbixiyayaasha ee deegaannada hoos yimaada Koofur Galbeed. Tallaabadan ayuu guddiga sheegay inay muhiim u tahay in dadweynaha ku nool gobolladaas ay helaan fursad ay kaga qeyb qaataan doorashooyinka deegaanka ee la qorsheeyay.

Diiwaan-gelinta codbixiyayaasha ee Baydhabo ayaa qeyb ka ah qorshe ballaaran oo heer qaran ah, kaasoo lagu doonayo in doorashooyin deegaan lagu qabto dhammaan maamul-goboleedyada dalka.

Maamullada Galmudug, Hirshabeelle iyo SSC-Khaatumo ayaa isna lagu wadaa in dhowaan laga bilaabo howsha doorashooyinka qof iyo cod, xilli weli aan laga gaarin heshiis wada-ogol.

Guddiga Doorashooyinka Qaranka iyo Soohdimaha ayaa door weyn ka qaadanaya hirgelinta nidaam doorasho oo hufan, iyadoo diiwaan-gelinta codbixiyeyaashu ay tahay marxalad asaasi ah oo lagu xaqiijinayo matalaad dhab ah oo shacabka Soomaaliyeed ay ku helaan codkooda.

Dhanka kale, isdiiwaan-galinta codbixiyayaasha Doorashooyinka Golaha Deegaanka ee Gobolka Banaadir ayaa maraysa heer gebogebo ah. Qorshahan oo ah mid ballaaran ayaa la rabaa in si guud looga hirgeliyo dalka..

Waxaa la filayaa in marka la dhammeeyo diiwaan-gelinta gobolka Banaadir, la guda galo wejiga xiga ee doorashooyinka, taas oo ay ka mid noqon doonaan diyaarinta liisaska codbixiyeyaasha iyo qorsheynta maalinta doorashada.

Muqdisho (Caasimada Online) – Ra’iisul Wasaaraha Xukuumadda Jamhuuriyadda Federaalka Soomaaliya, Xamza Cabdi Barre ayaa maanta magacaabay Guddi ka kooban Wasiirro iyo Maamulka Gobolka Banaadir.

Guddigan ayaa ka shaqeynaya xuska toddobaadka xorriyadda dalkeenna, sida lagu sheegay wareegto kasoo baxday xafiiska Ra’iisul Wasaaraha Soomaaliya.

Ra’iisuk Wasaare Xamza oo xoojinaya qaban-qaabada Maalmaha Xorriyadda Qaranka ayaa magacaabay guddigan, oo loo igmaday qaban-gaabada xuska Maalmaha Xorriyadda iyo Midnimada Qaranka ee Sanadguurada 65aad ee 26-da Juun iyo 1-da Luulyo.

Waxay si gaar ah uga shaqeyn doonaan guddiga inta lagu guda jiro munaasabadaha qaran xaqiijinta amniga iyo xiriirinta hey’adaha qaybta ku leh dabaal-degga Maalmaha Xorriyadda.

Guddigan ayaa ka kooban 10 xubnood oo ka tirsan Xukumadda Federaalka Soomaaliya iyo maamulka gobolka Banaadir, iyadoo guddoomiye looga dhigay Wasiirka Arrimaha Gudaha Soomaaliya, Cali Xoosh.

Guddiga la magacaabay ayaa waxaa la filayaa maalmaha soo aadan ay yeeshaan kulamo looga hadlayo sidii ay u qeybsan lahaayeen howlaha shaqo ee horyaalla, si ay si hufan ugu gutaan waajibaadka loo igmaday, una suurtagasho xus qaran oo heer sare ah.

Tallaabada uu maanta qaaday Ra’iisul Wasaaraha ayaa muujinaysa sida ay dowladda uga go’an tahay xoojinta wacyiga shacabka, xuska maalmaha qaran, iyo kor u qaadidda midnimada iyo wadajirka ummadda Soomaaliyeed.

Muqdisho (Caasimada Online) – Ra’iisul Wasaaraha Xukuumadda Jamhuuriyadda Federaalka Soomaaliya, Xamza Cabdi Barre ayaa maanta kormeer ku tagay Wasaaradda Awqaafta iyo Arrimaha Islaamka.

Ra’iisul Wasaaraha ayaa sheegay in Wasaaraddani ay tusaale u tahay isku tashiga shacabka iyo dowladda Soomaaliyeed ee dib-u-dhiska iyo horumarinta xarumaha dowladda.

Sidoo kale wuxuu ku bogaadiyey Madaxda Wasaaradda Awqaafta iyo Arrimaha Islaamka, hoggaaminta wax-ku-ool ka ah ee ay ka sameeyeen dhanka horumarinta adeegyada bulshada iyo dib-u-habeynta kaabeyaasha shaqo ee wasaaradda.

Mudane Xamza ayaa tilmaamay in shaqadan ay ku timid dadaalka xukuuumadda ee ku aaddan dowlad wanaagga iyo hufnaanta adeegga bulshada loo hayo, iyada oo la xoojinayo hey’adaha dowladda, si ay u helaan xarumo shaqo oo u qalma.

Kormeerka Ra’iisul Wasaaraha ayaa ka tarjumaya dardar-gelinta habsami u socodka howlaha shaqo ee hey’adaha dowladda, isla xisaabtanka.

Sidoo kale wuxuu kormeerkan qeyb ka yahay kor joogteynta hanaanka kor u qaadista adeegyada dowladdu ay u hayso bulshada Soomaaliyeed, si loo xaqiijiyo ballan-qaadyadii Xukuumadda Dan-Qaran ee xoojinta dowlad-dhiska.

Hoos ka daawo muuqaalka

Muqdisho (Caasimada Online) – Xiisadda siyaasadeed ee ka taagan gudaha magaalada Muqdisho ayaa haatan kasii dareyso, taas oo u dhexeyso dowladda federaalka iyo xubnaha mucaaradka oo intooda badan soo laabtay, si loo wajaho arrimaha doorashooyinka dalka.

Xiisadda ayaa saameyn ku yeelatay kulankii maanta ee baarlamaanka Soomaaliya, kadib markii uu u baaqday kooram la’aan, sida auu shaaciyay guddoonka golaha shacabka.

Guddoomiye Sheekh Aadan Madoobe oo soo xiray kulanka ayaa qaylo dhaan soo saaray, wuxuuna tilmaamay inay joogto noqotay in xildhibaannadu iska maqnaadaan, ayna saameysay howlihii shaqo ee baarlamaanka federaalka Soomaaliya.

“Xildhibaannada imaatinkooda ciriiri ayuu iska noqday afar saac markii la gaaray waxaa lagu daray hal saac markii lagu darayne waxaan rabnay xildhibaannadii inay yimaadaan mana imaan” ayuu yiri Sheekh Aadan Madoobe oo kulanka usoo xiray kooram la’aan.

Sidoo kale wuxuu qiray in xildhibaannada iyaga oo joogo Muqdisho aysan soo xaadirin kulanka maanta, taas oo muujineyso inay ku milmeen siyaasadaha is diidan ee dalka.

Xildhibaannada ayaa kuwooda mucaaraadka ah waxay haatan qayb ka yihiin abaabulka culus ee socda iyo kulamada ka dhanka ah qorshaha Villa Somalia ee qof iyo codka ah.

“Dad kooramka buuxiyo magaaladaan waa joogaan laakiin waa laga fiican yahay in mar kasta kooramka uu baryo noqdo oo la’isku rafaado aad ayaan uga xumahay” ayuu raaciyay.

Sheekh Aadan Madoobe ayaa farriin culus u diray guud ahaan xildhibaannada, wuxuuna ka codsaday inay soo xaadiraan kulanka Arbcada, maadaama la galayo fasaxa ciidda, xajna la aadayo.

Muqdisho ayaa haatan marti-gelineyso siyaasiyiintii ugu badnaa oo mucaarad ah, kuwaas oo ku kacsan madaxweyne Xasan waxaana socda dhaq-dhaqaaq siyaasadeed oo xoogleh.

Xubnaha mucaaradka ayaa Jimcihii lasoo dhaafay isugu tegay Mowlaca Macalin Nuur oo ay ku yeesheen shir siyaasadeed ay ku muujiyeen cududooda, kadibna waxay kulamo gaar gaar ah la bilaabeen wakiilada beesha caalamka oo ay kala hadlayaan xaaladda dalka.

Waxaa kale oo la filayaa inuu bilowdo wada-hadal u dhexeeyo saamileyda siyaasadda iyo Villa Soomaaliya, kaas oo uu aqbalay madaxweyne Xasan Sheekh oo haatan sii bilaabay la kulanka xubnaha mucaaradka, wuxuuna xalay qaabilay Ra’iisul wasaarihii hore ee dalka, Mudane Cumar Cabdirashiid Cali Sharmaarke oo dhowaan kusoo laabtay Muqdisho.

Soomaaliya ayaa haatan ku jirto marxalad adag oo siyaasadeed, waxaana la’isku fahmi la’yahay doorashada, iyada oo arrintaas ay sii dheer tahay dagaalka Al-Shabaab ee sii xoogeysanaya, maadaama gobollada Shabeellooyinka ay culeys soo saartay kooxda.

Jowhar (Caasimada Online) – Faah-faahinno kala duwan ayaa kasoo baxaya qaraxyo xooggan oo maanta siyaabo kala duwan uga dhacay deegaanno ka tirsan gobolka Shabeellaha Dhexe oo ay haatan ka socdaan howlgallo culus oo ka dhan ah Al-Shabaab.

Qaraxa koowaad oo ahaa miino ayaa waxaa la geliyay guri uu deegaanka Xawaadley ka dagan yahay sarkaal sare oo ka tirsan ciidamada Macawiisleyda, kaas oo lagu magacaabo Jeylaani Faroole, waxaana ka dhashay khasaare isugu jiro dhimasho iyo dhaawac.

Ugu yaraan hal askari oo kamid ahaa ilaaladiisa ayaa ku dhintay qaraxa, halka ay ku dhaawacmeen 4 kale, sida ay innoo sheegeen ilo dadka deegaanka ah.

Sarkaalka la weeraray ayaa lasoo wariyay inuu ka bad-badaaday qaraxa, waana hogaamiyaha ciidamada deegaanka ee la baxay Afjar ee ka howlgala Xawaadley.

Sidoo kale, Qaraxa labaad ayaa ka dhacay deegaanka Buurane oo hoostaga degmada Mahadaay, waxaana lala beegsaday ciidamo ka tirsan kuwa Burundi oo ku socdaalayay halkaasi.

Wararka ayaa intaasi kusii daraya in qaraxa uu haleeyay mid kamid ah kolonyada ciidamada waxaana jira khasaare gaaray, inkastoo aan la caddeyn karin inta uu gaarsiisan yahay.

Xaaladda ayaa hadda deggan, waxaana ciidamadu ay qaraxa kadib sii wateen socdaalkooda, sida ay innoo sheegeen dadka deegaanka ee ku sugan Buurane.

Ma jiro wax hadal ah oo kasoo baxay ciidamada la qarxiyay ee Burunti iyo sarkaalka kale ee lagu weeraray gurigiisa.

Weeraradan qaraxyada ah ee ka dhacay Shabeellaha Dhexe ayaa kusoo aadaya, xilli haatan gobolkaasi ay ka socdaan dagaallo culus oo ka dhan ah Al-Shabaab oo dhowaan dib u qabsatay deegaanno horay looga xoreeya oo dhaca maamul-goboleedka HirShabelle.

Muqdisho (Caasimada Online) – Wasiirka Gaashaandhigga Dowladda Federaalka Soomaaliya, Axmed Macallin Fiqi ayaa khadka taleefoonka kula hadlay Wasiirka Difaaca ee Jamhuuriyadda Masar, Sarreeye Gaas Cabdilmajiid Saqar.

Wada-hadalkan dhexmaray wasiirrada difaaca labada dal ayaa ku salaysnaa muhiimadda ay leedahay iskaashi dhow oo u dhexeeya labada dhinac, gaar ahaan dhinaca amniga iyo difaaca.

Intii uu socday wada-hadalku, labada wasiir waxay si qoto dheer uga wada-hadleen sidii loo xoojin lahaa iskaashiga milatari ee u dhexeeya Soomaaliya iyo Masar.

Waxa ay sidoo kale diiradda saareen sidii loo sii kobcin lahaa kaalinta ciidamada Masar ee qaybta ka ah hawlgalka AUSSOM, si ay u taageeraan nabad ilaalinta iyo xasilloonida Soomaaliya.

Sidoo kale, wasiirradu waxay isla qaabeeyeen hindisayaal wadajir ah oo lagu horumarinayo tayada iyo xirfadda ciidamada qalabka sida ee Soomaaliya, taas oo muujinaysa in labada dhinac ay u arkaan tababarka iyo tayeynta ciidamada mid muhiim u ah sugidda amniga gudaha ee Soomaaliya.

Labada wasiir waxa ay si gaar ah u xuseen xiriirka walaaltinimo ee taariikhiga ah ee ka dhexeeya Soomaaliya iyo Masar. Waxa ay muujiyeen in xiriirkaas qoto dheer uu yahay saldhig u ah dhammaan iskaashiga labada dhinac, si gaar ah marka ay timaaddo dhinacyada difaaca iyo nabadgelyada.

Wasiirka Difaaca Masar ayaa ballan-qaaday in dalkiisu sii wadi doono taageerada uu siiyo Soomaaliya, isagoo muujiyay in Masar ay diyaar u tahay in ay xoojiso doorka ay ku leedahay dib u dhiska ciidamada Soomaaliyeed. Waxayna noqonaysaa tallaabo kale oo muhiim ah oo lagu taageerayo dadaallada Dowladda Federaalka Soomaaliya ee dib-u-habaynta hay’adaha amniga.

Wada-hadalkan ayaa lagu tilmaami karaa mid miro-dhal ah oo muujinaya isfahamka iyo ka go’naanta labada dal ee ku aaddan horumarinta iskaashiga milatari iyo guud ahaan xiriirka laba geesoodka ah. Wuxuu sidoo kale ka tarjumayaa dadaalka dowladda Soomaaliya ee ku aaddan helidda taageero caalami ah si loo xaqiijiyo nabad waarta iyo horumar ballaaran.

Jowhar (Caasimada Online) – Wasaaradda Gargaarka Bani’aadannimo iyo Maareynta Masiibooyinka ee HirShabeelle ayaa si rasmi ah u shaacisay inay hakisay dhammaan wada-shaqeyntii ay la lahayd Hay’adda Maareynta Masiibooyinka Qaranka (SODMA), iyadoo ku eedeysay in hay’addu ay si isdaba joog ah ugu guuldarreysatay gaarsiinta gargaarka iyo inay ka maqan tahay daahfurnaan ku filan.

Qoraal ay wasaaraddu soo saartay Axaddii ayay ku sheegtay in SODMA si khaldan u maamushay agabkii gargaarka, iyadoo tusaale ahaan u soo qaadatay dhacdo ka dhacday degmada Moqokori, halkaas oo la geeyay oo keliya kartoonno yar-yar oo dawo ah, inkasta oo hawlgalkaasi loogu talagalay inuu noqdo gargaar bani’aadannimo oo muhiim ah.

“Go’aankan waxa uu salka ku hayaa is-faham la’aan joogto ah, maamul-xumo ku saabsan gargaarka loogu talagalay shacabka HirShabeelle, iyo daahfurnaan la’aan ka jirta hannaanka maareynta gargaarka,” ayaa lagu yiri bayaanka wasaaradda.

Tallaabadan ayaa daba socota dhaleeceyn kulul oo uu horay u jeediyay guddoomiyaha gobolka Hiiraan, Muuse Salaad Wehliye, kaas oo hay’adda SODMA ku eedeeyay inay si liidata oo ceeb ah u gaarsiisay gargaar ciidamada xoogga dalka iyo maleeshiyada deegaanka ee Macawiisley ee dagaalka kula jira Al-Shabaab.

Guddoomiye Muuse ayaa horraantii ku dhaliilay SODMA inay u dirtay “dhowr kartoon oo raashin ah” laba diyaaradood oo gaaray furimaha dagaalka — arrin uu ku tilmaamay mid meel-ka-dhac ku ah naf-hurnimada iyo dadaalka ciidamada deegaanka.

Inkasta oo cabashooyinku isa soo tarayaan, haddana SODMA weli si rasmi ah ugama aysan jawaabin hadallada kasoo yeeray guddoomiyaha Hiiraan iyo go’aanka wasaaradda Hirshabeelle.

Hakinta wada-shaqeynta ayaa iminka dhalisay su’aalo hor leh oo ku saabsan sida ay iskula jaanqaadayaan hay’adaha masiibooyinka ee heer federaal iyo heer gobol, xilli ciidamada deegaanka ay sii wadaan dagaalka ka dhanka ah Al-Shabaab ee ka socda gobollada Hiiraan iyo Shabeellaha Dhexe.

Muqdisho (Caasimada Online) – Ciidanka Booliska Soomaaliyeed ayaa Saldhigga Booliska degmada Hodan ee gobolka Banaadir ku soo xiray, Shariif Maxamed Axmed oo ku eedeysan inuu dilay Marxuum Cabdifitaax Cabdi Cismaan oo ahaa ciyaaryahan horay kubadda Qaranka ugu soo cayaaray.

Dilkaas ayaa ka dhacay degmada Hodan, gaar ahaan aagga isgoyska Soobe, ninka dilay ayaa waardiye ka ahaa Hotel ku yaalla aaggaas.

Marxuum Cabdifitaax oo watay Mooto FEKON ayaa la sheegay in ninkaan oo Hotel waardiye ka ahaa ay ku murmeen isticmaalka wado hormarta.

Muran kadib, ninkaan odaga ah ayaa xabad ka daba riday Mootada Ciyaaryahan Cabdifitaax Carab oo sii gudbeysa, sidaas ayuuna ku dhintay.

Taliyaha qeybta guud ee Booliska Gobolka Banaadir Korneyl Mahdi Cumar Muumin oo shaaciyey soo qabashada eedeysana ayaa balan-qaaday in la horgeyn doono Maxakamadda awooda u leh.

Ehellada Marxuumka ayaa maanta diiday in la aaso Meydka oo caawa ku hoyanaya qaboojiyaha.

Mar hadii lasoo qabtay eedeysanaha waxaa lagu wadaa in berri Muqdisho lagu aaso meydka ciyaaryahan hore Cabdifitaax Carab.

Marxuumka oo ahaa wiil dhalinyar ayaa la sheegay in ifka uu kaga tegay shan gabdhood, waxaana maanta dilkiisa aad uga damqaday oo warbaahinta la hadlay bahda ciyaaraha iyo ehellada marxuumka.

Muqdisho (Caasimada Online) – Ergayga Gaarka ah ee Xoghayaha Guud ee Qaramada Midoobay u qaabilsan Soomaaliya ahna Madaxa howl-galka kala guurka ee kaalmaynta QM ee Soomaaliya ayaa maanta kulan muhiim ah la qaatay Wasiirka Arrimaha Dibadda iyo Iskaashiga Caalamiga ah, Cabdisalaan Cabdi Cali.

Kulankan oo ka dhacay Xarunta Wasaaradda Arrimaha Dibadda Soomaaliya ayaa waxaa looga hadlay xoojinta xiriirka iskaashi ee ka dhexeeya Dowladda Federaalka Soomaaliya iyo Qaramada Midoobay.

Danjire Swan ayaa ugu horrayn Wasiirka ugu hambalyeeyay xilka cusub ee dhowaan loo magacaabay, isagoo muujiyay taageerrada iyo kalsoonida Qaramada Midoobay ee ku aaddan wada-shaqeynta labada dhinac.

Intaas kaddib, wuxuu Wasiirka la wadaagay qorshayaasha xilliga kala guurka ee xafiiska Qaramada Midoobay ee Soomaaliya, kuwaas oo diiradda saaraya horumarinta dowlad wanaagga, doorashooyinka iyo ilaalinta xuquuqda aadanaha.

Dhankiisa, Wasiir Cabdisalaan ayaa uga mahad-celiyey Danjire Swan taageerrada iyo wada-shaqeynta joogtada ah ee Qaramada Midoobay la leedahay Dowladda Federaalka Soomaaliya, isagoo xusay muhiimadda ay leedahay sii xoojinta iskaashiga labada dhinac.

Swan ayaa muddooyinkii dambe ku hawlanaa sidii la isugu keeni lahaa saamileyda siyaasadda, inkasta oo dadaalladan aysan weli kasoo bixin wax natiijo ah, haddana waxaa muuqata in beesha caalamka ay cadaadis horleh ku saareyso madaxweynaha Soomaaliya inuu la fariisto siyaasiyiinta mucaaradka.

Khilaafka doorashooyinka oo inta badan aysan heshiis rasmi ah ka gaarin siyaasiyiinta Soomaalida ayaa waxaa awood socodsiin ku leh beesha caalamka oo ayadu dhaqaale badan uga baxo dowladnimada Soomaaliya.

Muqdisho (Caasimada Online) – Guddiga doorashooyinka qaranka ayaa lagu eedeeyay in ay si xoog ah qeybo kamid ah bulshada ugu qasbayaan inay isdiiwaan-geliyaan, si loo hirgeliyo doorasho qof iyo cod ah.

Xildhibaan Cabdiraxmaan Cabdishakuur ayaa eedeyntan u jeediyay guddiga doorashada, isagoo sheegay in diiwaan-gelinta lagu qasbayo Ardeyda iyo Macalimiinta Jaamacadaha, taasoo yaab leh maadaama aan muwaadinka lagu qasbi karin, ayna tahay ikhtiyaari, xitaa haddii mid sharci ah ay tahay isdiiwaan-gelinta.

“Waxaan canbaaraynaynaa falka gurracan ee uu guddiga halka dhinac ah ee doorashooyinka ku cadaadinayo Jaamacadaha Caasimada in ay qasab ku diiwaan geliyaan ardayda, macalimiinta iyo shaqaalaha Jaamacadda,” ayuu yiri Xildhibaan Cabdiraxmaan Cabdishakuur Warsame.

Waxa uu intaas kusii daray “Guddigu wuxuu ugu hanjabay jaamacaddii ka biya diidda go’aankooda in ay tillaab ka qaadi doonaan iyagoo adeegsanaya ciidanka ammaankana. Isdiiwan-gelinta, codaynta iyo ka qaybqaadashada doorashooyinka waa xaq dastuuri ah oo ikhtiyaari ah ee ma aha jajuub iyo qasab.”

Hoos ka aqriso qoraalka oo dhameystiran;

Waxaan canbaaraynaynaa falka gurracan ee uu guddiga halka dhinac ah ee doorashooyinka ku cadaadinayo Jaamacadaha Caasimada in ay qasab ku diiwaan geliyaan ardayda, macalimiinta iyo shaqaalaha Jaamacadda.

Guddigu wuxuu ugu hanjabay jaamacaddii ka biya diidda go’aankooda in ay tillaab ka qaadi doonaan iyagoo adeegsanaya ciidanka ammaankana.

Is diiwan gelinta, codaynta iyo ka qaybqaadashada doorashooyinka waa xaq dastuuri ah oo ikhtiyaari ah ee ma aha jajuub iyo qasab.

Ma jirto wax ay shacabka Soomaaliyeed maanta ka jeclaan lahaayeen in ay xaqooda dastuuriga ah adeegsadaan oo ay doortaan dadkii meteli lahaa, waxaase lagu hodi karin doorasho hal dhinac wato oo qasab iyo jajuub lagu meelmarinayo, taasoo natiijadeedu tahay qalalaase iyo xasilooni-darro siyaasadeed.

Waxaan ugu baaqaynaa maamulka jaamacadaha in ay ku adkaystaan mowqifkooda, shacabkana la wadaagaan falfal xumida Guddiga, iyagoo adeegsanaya isku soo baxyo nabadeed iyo warbaahinta baraha bulshada ee fududaynaysa is abaabulka dijitaalka ah (Digital Activism).

Beledweyne (Caasimada Online) – Warar dheeraad ah ayaa laga helayaa dagaal culus oo maanta ka dhacay tuulada Galcad oo ka mid ah deegaanada hoos yimaada degmada Halgan ee gobolka Hiiraan.

Dagaalkan ayaa dhexmaray ciidamada deegaanka ee loo yaqaan Macawiisleyda iyo kooxda Al-Shabaab. Iska horimaadkan ayaa ka dhashay kadib markii ciidanka Macawiisleyda ay weerar ku qaadeen xubno ka tirsan Al-Shabaab oo dad shacab ah afduub ahaan ugu haystay gudaha tuulada Galcad.

Ciidamada ayaa weerarka u qaaday si ay u soo furtaan dadka shacabka ah ee ay afduubtay kooxda, iyadoo la haystayaasha lagu guuleystay in ay dib u helaan xorriyadooda.

Sarkaal ka tirsan Macawiisleyda oo hadlay ayaa sheegay in dadka shacabka ah lagu helay xaalad adag, balse ay ku guuleysteen inay si nabad ah kusoo furtaan. Wuxuu intaas ku daray in kooxda Al-Shabaab ay la kulantay jab xooggan intii uu socday howl-galkaasi.

“Waxaan helnay xogta in kooxdu ay afduub u haysteen dadka shacabka ah oo baadi u raadsaday deegaanka. Alle mahaddii, waan kusoo furanay dadkii ay haysteen iyadoo aan wax khasaare ah noo soo gaarin. Hadda tuulada Galcad annaga ayaa gacanta ku hayna,” ayuu yiri sarkaalkaasi oo la hadlay warbaahinta.

Sarkaalka ayaa sidoo kale tilmaamay in dagaalka ay ku dileen xubno badan oo ka tirsan kooxda, islamarkaana ay weli wadaan howl-gallo baacsiga firxadka kooxdaas ee deegaanka ku dhuumaaleysanaya.

Dagaalka maanta dhacay ayaa kusoo beegmaya xilli toddobaadkii lasoo dhaafay ay dagaallo culus ka dhaceen deegaanno ku yaalla xadka u dhexeeya gobollada Hiiraan iyo Sh/Dhexe, kuwaas oo ay ka qeyb qaateen ciidamada deegaanka iyo kuwa dowladda.

Muqdisho (Caasimada Online) – Shir ballaaran oo u dhaxeeya ururrada siyaasadda ee diiwaan-gashan iyo xukuumadda federaalka Soomaaliya ayaa maanta si rasmi ah uga furmay magaalada Muqdisho.

Shirweynahan ayaa waxaa ka qeyb-galay madax sare oo ka socoto hay’adaha kala duwan ee dowladda oo ay ugu horeeyaan Wasiirka Cadaaladda, Wasiiru-dowlaha Xafiiska Ra’iisul Wasaaraha, Wasiiru-dowlaha Wasaaradda Arrimaha Dibadda iyo masuuliyiin kale.

Shirka ayaa waxaa soo qaban-qaabiyay guddiga isku dabaridka gogosha qaran, ee uu guddoomiyaha u yahay Wasiirka Wasaaradda Cadaaladda iyo Arrimaha Dastuurka, Xassan Macallin Maxamuud.

Shirkan ayaa diiradda lagu saarayaa arrimaha amniga, dastuurka iyo doorashooyinka, waxaana uu gogol xaar u yahay shirweynaha uu Madaxweynaha JFS, Dr Xasan Sheekh Maxamuud ku baaqay si loo helo isfaham siyaasadeed oo qaran.

Wasiirka Cadaaladda, Xasan Macallin Maxamuud oo furay kulanka wadatashiga ayaa sheegay in muddo dheer dalku tabayay nidaamka ururrada siyaasadda, balse xukuumadda Dan-Qaran ay si dhab ah ugu hawlan tahay dib u soo celinta nidaamkaas, iyadoo tallaabada ugu horreysa ka dhigatay dib-u-eegista dastuurka.

“Xukuumadda Dan-Qaran ee hadda jirta waxay si daacad ah ugu hawlan tahay sidii dib loogu soo celin lahaa nidaamka ku saleysan ururrada siyaasadeed. Maanta waxaan kusoo laabannay waddadii saxda ahayd oo muddo dheer aan ka maqneen.” ayuu yiri Wasiir Xasan Macallin.

Prof. Cabdullahi Daacad oo isna ku hadlayay afka ururrada xisbiyada siyaasadeed ayaa si weyn u soo dhaweeyay kulanka wadashiga ee xukuumadda iyo ururrada siyaasadda.

Sidoo kale waxa uu sheegay in ay taageersan yihiin gogosha qaran ee madaxweyne Xasan Sheekh ku baaqay, taasoo uu ku tilmaamay tallaabo masiiri ah oo xoojinaysa midnimada iyo wada-tashiga siyaasadeed ee dalka.