Jabuuti (Caasimada Online)- Wararka aan ka helayno magaalada Caasimada u ah dalka Jabuuti ayaa sheegaya in halkaasi ay gaareen wafdi uu hogaaminayo madaxweynaha maamulka Puntland C/welli Maxamed Cali.
Wafdiga madaxweyne Gaas oo ay kamid yihiin wasiiro ka tirsan xukuumada Puntland iyo xildhibaano baarlamaanka ah ayaa waxaa ay u tageen magaalada Jabuuti ka qeyb galka xaflada caleemo saarka madaxweynaha Jabuuti oo dhawaan dib loo doortay.
Madaxweyne Gaas oo warbaahinta kula hadlay magaalada Boosaaso ka hor inta uusan ka duulin ayaa sheegay iney kulamo gaar ah la qaadan doonaan madaxda dalka Jabuuti, iyaga oo kala hadlaya arimaha Puntland.
Dhinaca kale waxaa dalka Jabuuti ku sugan Sheikh Shariif Sheikh Axmed madaxweynihii hore ee Soomaaliya oo isna la sheegay inuu ka qeyb gali doono xaflada caleemo saarka madaxweynaha Jabuuti.
Ismaaciil Cumar Geele ayaa lagu caleemo saarayaa dalkaasi Jabuuti, maadaama markale shacabka ay dib usoo doorteen, wallow xubnaha mucaaradka ay diideen qaabka doorashada u dhacday.
Caasimada Online
Xafiiska Jabuuti
[email protected]