Muqdisho (Caasimadda Online) – Dowladda Soomaaliya ayaa dhammaan barihii Koontaroolada Muqdisho oo ay fadhin jireen ciidamada Xasilinta Maanta ku wareejisay Ciidamada 14 October ee la sameeyey Qarixii Zoobe ka dib.
Ciidamadaan ayaa lagu arkayaa iyagoo baaritan ku sameenayo Gawaarida ku dhex socdo gudaha Magaalada Muqdisho iyagoo feejigan isla markaasna si adag ku baarayo Baabuurta.
Durba dadka reer Muqdisho ayaa falanqeyn iyo sifooyin ka bixiyey ciidamada 14 October ee lasoo dhigay jidadka Muqdisho waxaana soo baxay laba tilmaam oo ay uga duwan yihiin ciidamadii Xasilinta Muqdisho ee fadhin jiray meelahaas.
Labadaas tilmaam ayaa kala ah:
1) Balwad La’aan: Ciidamada 14 October ee lasoo dhigay Baraha baaritaanka ee Muqdisho ayaa arkayey iyagoo aan isticmaaleyn Balwad.
Ciidamadaan ayaa intooda badan ka siman inaysan balwad laheyn, halka kuwa balwadda leh ee ku jirana aan loo ogoleyn inay Balwada Isticmaalaan inta ay ku jiraan shaqada taasoo noqotay wax ku cusub Dadweynaha Muqdisho gaar ahaan kuwooda ku dhex wato Gawaarida raaxada iyo kuwa dadweynaha.
Taas badalkeeda Ciidamadii Xasilinta ee jidadkaas baaritaanada ka sameyn jiray ayaa habeen iyo maalin si joogta ah balwada u isticmaali jiray, waxayna arrintaas keentay in mararka qaar ay jidadka iska xirtaan iyagoo dhibsanayo inay Gawaarida baaraan iyo inay Lacago ku helaan qaabkaas waxaana uga fududtaay inay jidadka ku Xiraan Biro iyo Caagag ayna dadka u sheegaan inay xiran yihiin oo ay tahay (Kala Wareeg).
Xiritaanka jidadka ayaa mararka qaar gaar u ahaan jirtay Ciidamada halkaas fadhiyo iyagoo aysan ka warqabin taliyaasha ugu sareeyo ciidamadaas.
2) Laaluush La’aan: Ciidamada 14 October ayaa durba lagu arkay inay joojiyeen Laaluushkii ay ciidamada Xasilinta ka qaadan jireyn Xarumaha lagu baaro gaawaarida.
Ciidamadii Xasilinta ee Xarunta Xisbiga lagu xareeyey ayaa looga bartay inay Laaluush ka qaadaan Baabuurta isticmaasho waddooyinka Muqdisho gaar ahaa kuwa Alaabaha wado ee kasoo qaado Suuqa Bakaaraha isla markaasna geeyo qeybaha kala duwan ee Muqdisho.
Dabeecadda Ciidamada Xasilinta ayaa ahaan jirtay markii ay arkaan Baabuur alaab ama raashin wado inay qoryaha ku taagaan isla markaasna ay ku amraan inuu meesha isaga laabto iyadoo ujeedkooda yahay sidii ay ku heli lahaayeen Lacago Laaluush ah.
Darawalka Gaariga ayaa markaas ku qasban inuu ka laabto oo uu baabuurkiisa dhigto meel u dhow si uuu la hadlo ciidamada waxaana loo sheegaa markaas inuu bixiyo lacag haddii uu rabo inuu jidka maro ama uu dib isaga laabto.
Darawada ayaa ku qasbanaan jiray inay lacagtaas bixiyaan maadaama jid kasta ay ciidamadaas joogeen isla markaas uu laaluushka ahaa nashqad ay isla ogyihiin dhammaan ciidamadaas ku sugan jidadka kala duwan.
Midda ugu daran ayaa ah inaan la baareyn gaariga Xamuulka wado haddii uu lacag dhiibo waxaana laga yaabaa in mararka qaar ay fasaxaan Baabuur qarax wado oo Luush badan bixinayo.
Ciidamada Cusub ee hadda lasoo dhigay jidadka ayaa Maanta la arkayey iyagoo si siman u baarayo Baabuurta Raaxada iyo kuwa Xamuulka sida iyagoo aan wax shuruud ah ku xireyn haddii ay ahaan laheyd lacago laaluush ah iyo Arrinta cusub ee Muqdisho laga bartay ee ah (Kala Wareeg).
Qubarada ku takhasusay dhinaca ciidamada ayaa tilmaamay in ujeedka ugu weyn ee keenta Laaluush iyo shaqo xumada ciidamada ay tahay Cunista Balwadda qeybaheeda kala duwan taasoo ciidamada ka dhigto kuwa aan kasoo bixin masuuliyaddii la saaray iyo sugidda Amniga.
Caasimada Online
Xafiiska Muqdisho
[email protected]
