Muqdisho (Caasimada Online) – Xogo aan la wadaagnay Xildhibaano ka tirsan Baarlamaanka Somalia ayaa sheegaya in Guddoomiyaha Baarlamaanka Somalia Maxamed Sheekh Cusmaan Jawaari uusan ku calool fiyooben Magacaabida Golaha Wasiirada Xukuumada Somalia.

Xogta ayaa tibaaxeysa in Siyaasiyiinta uu Jawaari la doonaayay kamid noqoshada Golaha Wasiirada qaarkood lagu bedelay Shaqsiyaad uu watay Hogaamiyaha Koonfur Galbeed Shariif Xasan Sheekh Aadan.

Xildhibaanada aan xogta la wadaagnay ayaa sheegay in Guddoomiye Jawaari uu magaalada Muqdisho ka wado kullamo gaar gaara oo looga soo horjeedo meelmarinta Golaha Wasiirada Xukuumada Somalia.

Jawaari ayaa magaalada Muqdisho ku uruurinaaya Xildhibaano uu cadadkooda aad u sareeyo kuwaa oo uu qorshuhu yahay inay is hortaagan Golaha Wasiirada ee la filaayo in Baarlamaanka Somalia la horgeeyo 25/03/2017 oo ku beegan maalinta sabtida ah.

Warar kaa ka duwan ayaa sheegaya in wadahadal uu qabyo u yahay Madaxweynaha Somalia Maxamed C/llahi Farmaajo, Ra’isul wasaare Kheyre iyo Guddoomiyaha Baarlamaanka waxaana suuragal ah in mowqifka Jawaari uu isbedelo haddii uu ku qanco wixii kasoo baxa kullanka qabyada u ah Seddexda Mas’uul.

Magaalada ayaa waxaa ka socda kullamo u dhexeeya Xildhibaanada Baarlamaanka kuwaa oo isku uruursanaaya Hoteelada magaalada Muqdisho, iyadoo uu qorshahoodu yahay inay meelmarin Golaha Wasiirada Xukuumada Somalia.

Caasimada Online
Xafiiska Muqdisho
[email protected]

Nairobi (Caasimadda Online) – Waxaa maanta kulan xasaasi ahaa oo lagu heshiiyey qodobo badan yeeshay Madaxweynaha Soomaaliya Maxamed Cabdullaahi Farmaajo iyo dhigiisa Kenya Uhuru Keyatta/

Madaxweynaha Kenya, Uhuru Kenyatta ayaa sheegay in laba isbuuc gudahood dib loo billaabi doono duulimaadyada tooska ee Muqdisho iyo Nairobi, iyadoo meesha laga saari doono in lagu sii hakado garoonka ku yaalla magaalada Wajeer ee gobalka Waqooyi bari Kenya.

Hadalkan ayuu ka sheegay shir jaraa’id oo ay si wada jir ah u qabteen madaxweynaha Soomaaliya Maxamed cabdullaahi Farmaajo oo booqasho rasmi ah ku joogo Kenya.

“Waxaan amar ku siinay mas’uuliyiinta ammaanka ee labadeena dal inay si deg deg ah u kulmaan kuna heshiiyaan qaabkii ay u dib ugu billaabi lahaayeen duulimaadyada tooska ah ee Muqdisho iyo Nairobi iyadoo duulimaadka ugu horreeyana aan fileyno laba isbuuc gudahood”, ayuu yiri Kenyatta.

Dowladda Kenya ayaa horay u ballan qaaday inay xayiraada duulimaadyada tooska ah qaadi doonto wixii ka billowdo bishii Desember ee sanadkii hore, balse taa ma dhicin, mana jirin wax sharraxaad ah oo laga bixiyay.

Wasiirka arrimaha dibedda Kenya Aamina Maxamed ayaa bishii September ee sanadkii hore warfidiyeenada u sheegtay in la qaadi doono xayiraadaasi mar ay Muqdisho uga qeybgeleysay shirka IGAD.

Haddaba waxaa soo baxay durba warar sheegayo in kooxdiisa baaritaanka u qaabilsanaa dowladda Kenya baaritaanka diyaaradaha ka imaaday Soomaaliya ee fadhiyey Wajeer looso wareejin doono gudaha garoonka Muqdisho ay halkaas uga qabtaan shaqadii ay ka qaban jireyn Wajeer.

Wararkaas ayaa ah kuwa been abuur ah oo laga sameeyey hadalkii Wasiirka Arrimaha Dibadda Kenya Aamina Maxamed ee ahaa “Waa in meesha laga saaro joojinta diyaaradaha Muqdisho ka baxa ee Nairobi u socda kuwaasoo lagu hakiyo Wajeer balse waa in laga shaqeeyo ammaanka labada garoon Muqdisho iyo Jomo Kenyatta, ka hor inta aan arrintaasi la hirgelinin” .

Caasimadda Online ayaa la xiriirtay dad ku dhaw dhaw Madaxweynaha Soomaaliya Maxamed Cabdulaahi Farmaajo, waxayna noo xaqiijiyeen inuusan warkaas wax ka jiro oo uu hadalka Aamino ahaa in dowladda Soomaaliya ay sugto amniga garoonka Muqdisho isla markaasna ay si fiican usoo baarto diyaaradaha kasoo kacayo ee soo aadayo Nairobi, sidoo kalana si fiican loogu hubiyo garoonka Jomo Kenyatta.

Haddi arintaas ay dhacdo oo saraakiil ka socdo Kenya la geeyo garoonka Muqdisho si ay u baaraan diyaaradaha aadayo Nairobi, midaas waxay dhaawac weyn ku noqon doontaa jiritaanka iyo sumcadda Soomaaliya, sidoo kalana waxay muujineysaa inaysan Kenya kalsooni buuxda ku qabin dowladda Soomaaliya.

Marka laga hadlayo garoonka Aadan Cadde ee Magaalada Muqdisho waxaa muuqato in si weyn uu u adag yahay amaankiisa isla markaasna qof kasta oo soo gaalayo lagu sameeyo ilaa 5 baaritaan, mana u baahno in la keeno saraakiil ka socoto dowladda Kenya.

Caasimada Online
Xafiiska Muqdisho
[email protected]

Nairobi (Caasimada Online) – Waxaa lagu wadaa in Magaalada Nairobi ee xarunta dalka Kenya ay ku kulmaan Wasiirada arimaha dibeda Urur goboleedka IGAD.

Shirka Madaxdaani ayaa la filayaa in diirada lagu saari doono arrimaha khuseeya Soomaalida sida Abaaraha iyo Qaxootiga.

Dowladaha qeybta ka ah IGAD ayaa gabi ahaan ka qeybgali doona shirka waxaana lagu falanqeynayaa musiibooyinka heysta Soomaalida sida Qaxootiga iyo Abaarta sii daba dheeraatay.

Dowlada Somalia ayaa waxaa shirka maanta u matali doona Mas’uuliyiin ka tirsan Wasaarada Arrimaha Dibadda.

Shirkaani ayaa hordhac u ah shir la filaayo in maalinta beri ah uu dhexmari doono Madaxda IGAD, waxaana la filayaa in Madaxweynaha Somalia uu Khudbad ka jeedin doono halkaasi.

Dhinaca kale, Madaxda Dowladaha ka tirsan IGAD, ayaa la filayaa inay go’aan ka gaaran Abaaraha kusii faafaaya Somalia iyo Qaxootiga ku dayacan Kenya.

Caasimada Online
Xafiiska Nairobi
[email protected]

Glasgow (Caasimada Online) – Marka uu cunuga labaad kusoo biiro reer kasta, dareen ahaan waa ay adag tahay in la qoro wax walba oo maankooda ku meereysanaya hooyada iyo aabaha dhalay.

Si kastaba ha ahaatee, daraasad la sameeyey ayaa lagu ogaaday inuu markasta ama inta badan curadka reerku ka qurxoon yahay caruurta ka yar oo dhan.

Xitaa jaamacadda University of Edinburgh ee dalka Scotland ayaa daaha ka qaaday in curadku uusan ka qurux badneyn caruurta ka yar ee reerka oo dhan, balse uu sidoo kale ka faham badan yahay caruurta kale ee reerka (Higher IQ Test Score) marka uu hal sanno gaaro ayeyna xisaabtaani bilaabaneysaa.

Baareyaasha sameeyey daraasaddaan ayaa daaha ka qaaday in cunuga koowaad ee reerku uu inta badan ka faham sarreeyo caruurta kale ee isla reerkaas sidoo kalena uu xirfadaha fikirka uga wanaagsan yahay, waxaana ugu wacan daryeelka uu ka helo labadiisa waalid maadaama ay ku jiraan xilli hore oo noloshooda farxadda ku dhisan ah.

Maqaalkaan oo lagu daabacay majaladda Journal of Human Resources ayaana daaha ka qaadeysa in waalidiinta intooda badan aysan waxba ka bedeli karin arrintaan oo si dabiici ah u dhacda, xitaa haddii ay helaan mushaar badan iyo waxbarasho heer sarre ah goordambe oo noloshooda ah.

Kooxda baaritaankaan sameysay ayaa waxay kaashanayeen koox loogu magac daray Analysis Group iyo jaamacadda University of Sydney, halka ay sidoo kale macluumaad ka heleen US Children of the National Longitudinal Survey of Youth iyo US Bureau of Labour Statistics.

Daraasaddaan ayaa cabir wadareed ka qaaday in ka badan SHAN KUN oo caruur ah kuwaasoo curad u ah waalidkood isla markaana aan gaarin dhallinta 14aad, waxaana la ogaaday inay ka qurxoon yihiin, ka faham iyo fikir badan yihiin caruurta la dhalatay. Waxyaabaha lagu tijaabiyey waxaa ka mid ah akhriska iyo micneynta sawirka.

Caasimada Online
Xafiiska Minneapolis
[email protected]

London (Caasimada Online) – Booliska dalka Britain ayaa wali ku guda jira baaritaanka weerarkii lagu qaaday baarlamaanka dalkaasi oo ku yaal bartamaha magaalada London.

Booliska ayaa baaritaankii labadaa kusoo bandhigay magaca shaqsigii ka danbeeyay weerarka oo magaciisa lagu sheegay Khalid Masood.

Booliska ayaa sheegay in Khalid Masood uu yahay 52 jir isla markaana dhashay 25/12/1964, waxaana uu ku dhashay magaalada Kent.

Booliska ayaa sheegay in Khalid Masood uu waayadii u dambeysay degganaa West Midlands.

Booliska ayaa sidoo kale sheegay in Khalid Masood uu fal-danbiyeedkii ugu horeeyay galay bishii November ee sanadka 1983.

Sidoo kale, Booliska gacanta ku haya baaritaanka ayaa sheegay in Khalid Masood sanadii 2003 lagu qabtay mindiyo uu u adeegsan lahaa weerar la fashiliyay.

Baaritaanka ayaa lagu sheegay in Khalid Masood uusan horay ugu raad laheyn wax fal argagixiso ah, markii laga soo tago weerarkii shalay ka dhacay afafka hore ee Xarunta Baarlamaanka.

Dhanka kale warbaahinta ugu afka dheer ee dalka Britain oo xiganeysa Saraakiil ka tirsan Booliska ayaa saaka baahiyay in weerarkaasi uu ku lug lahaa wadaadka lagu magacaabo Abu Izzadeen.

Abu Izzadeen, ayaa noqonaaya shaqsigii ugu horeeyay ee dusha laga saaray Tuhunka weerarkii ka dhacay afafka hore ee baarlamaanka Britain.

Booliska ayaa Wadaadkaasi ku khalday shaqsiga weerarka fuliyay ee lagu magacaabo Khalid Masood, kadib markii ay iska shabaheen muuqaalka iyo Garka oo ay u jartaan si isku mid ah.

Wadaadka ay Booliska ku khaldameen Sheekh Abu Izzadeen

Madaxweynaha Soomaaliya Maxamed Cabdullahi Farmaajo ayaa maanta dhiggiisa Kenya Uhuru Kenyatta kula kulmay xarunta madaxtooyada Kenya, iyaga oo ka wada hadlay xiriirka labada dal iyo iskaashi dhex-mara labada dhinac.

Madaxaweyne Maxamed Cabdullahi waxaa loo soo dhaweeyay si heer sare ah, waxaa la siiyay salaan sharaf, waxaa la tumay salaanta calanka labada dal, waxaa la riday 21 madfac oo lagu soo dhaweynayo, intaa waxaa dheeraa madaxweynaha Kenya ka sokow waxaa goobta joogay oo Rais Farmaajo soo dhaweeyay Madaxweyne ku-xigeenka Kenya Ruto, wasiirka arrimaha dibadda Amina Maxamed, , Joseph Nkaissery, Raychelle Omamo, James Macharia, Cleopa Mailu, Willy Bett, Mwangi Kiunjuri iyo Dan Kazungu

Shir Jaraa’id oo labada madaxweyne qabteen kulanka kadib, waxaa ay sheegeen sida labada dal muhiim ugu tahay in ay iska kaashaadaan arrimo badan oo ay ku jirto danta labada dal.

“Soomaaliya haddii ay hor-umarto Kenyana waa ay hor u mareysaa, Soomaaliya haddii ay nabad noqoto, Kenyana waa noqon, sidaa waxaa sheegay madaxweynaha Soomaaliya.

Madaxweyne Maxamed Cabdullahi Farmaajo waxaa uu codsaday in caqabada laga hor wareejiyo ganacasiga labada dhinac si loo gaaro hor-umar dhaqaale.

Dhankiisa Madaxweynaha Kenya waxaa uu carabka ku dhuftay in loo baahan yahay kalsooni dhex marta labada dal.

“Cid keligeed istaagi karta ma jirto, waa in aan wada kacno ama cid kasta ay keligii gooni u dhibtoodo, ” sidaa waxaa shirka jaraa’id ka sheegay Kenyatta isaga oo inta araaciyay in hor u mar iyo nabadgalyo  laga gaarayo haddii labada dal ay is taageeraan.

Kenyatta waxaa uu sidoo kale ballan-qaaday in dalkiisa uu sii wadi doono la dagaalanka kooxaha dowladda ka soo horjeeda iyo in labada dal dhinacyo badan iska kaashadaan.

Shirka jaraa’id ee labada madaxweyne, waxaa ka horreeyay kulan ay wada qaateen wafti heer wasiirro ah oo ka socday labada dal.

Labada dhinac waxaa ay ka wada hadleen arrimo ay ku jiraan nabad-galyada, ganacsiga, maalgeshiga, duulimaadka, beeraha, hor-u-marka, dalxiiska, kaluumeysiga, shaqada, isu socodka iyo qodobo kale.

Sida uu sheegay agaasimaha warfafainta Villa Somalia Cabdinuur Maxamed Axmed, labada dhinac waxaa ay ku heshiiyeen:

1. In Duulimaadka lagu baarayo Wajer la joojiyo, oo diyaaradaha Muqdisho ka baxa ay toos u tagaan Nairobi. labo todobaad gudahood.
2. In la furo isu socodka iyo ganacsiga xadka, gaar ahaan Dhoobley iyo Buulo-xaawo.
3. In diblomaasiyiinta labad dhinac aan laga qaadin wax fiiso ah.
4. In la howlgeliyo Joint Commission of Cooperation (JCC)kaas oo dhigaya xiriir toos ah labada dhinac ah oo ku saabsan Dhaqaalaha, Maalgeshiga iyo Nabad-galyada.
5. Kenyaanka waxaa ay tababari doonaan 200 macalin, 200 kalkaaliye iyo 100 qof oo ka mid ah shaqaalaha dowladda.
6. Inta heshiiska aanu dhaqangelin, weliba labo todobaad gudahood, waxaa laga doonayaa mas’uuliyiinta labada dal ain ay hubiyaan ammaanka garoomada.

Heshiiska Kenya Iyo Soomaaliya September 2016:

September 4, 2016-kii,  labada madaxweyne Xasan Sheekh iyo Uhuru Kenyatta waxaa ay saxiixeen heshiis ay labada dal horay u galeen February 2016-ka. kaas oo saxiixa labada mas’uul ka dib la sheegay in uu shaqeyn doono, 7 bil kadib shirkaas, maanta ayaa lagu celiyay wixii maalintaas la sheegaty.

Sooyaalka Heshiisyada Soomaaliya iyo Kenya:

Bilowga Heshiiska:

Heshiiskan waxaa uu bilowday July 2015kii, wasiirka arrimaha dibadda ee Soomaaliya iyo dhiggiisa Kenya Amina Mohamed ayaa February 1, 2016-kii waxaa ay Adis Ababa ku saxiixeen heshiis loogu magacdaray Joint Commission of Cooperation (JCC) kaas oo dhigaya xiriir toos ah labada dhinac ah oo ku saabsan Dhaqaalaha, Maalgeshiga iyo Nabad-galyada.

Isla sanadkaasi bisha September 2016-kii, shir IGAD isugu timid Muqdisho, waxaa mar kale gooni u baxay Kenya iyo Soomaaliya, maalintaas waxaa la cosbooneysiiyay heshiiskii iyo Joint Commission of Cooperation (JCC) .

Heshiiskii September 2016-kii:

Qodobadda Heshiiskaas waxaa ugu muhiimsanaa:

In la fududeeyo Fiiasayaasha labada dal.

In Duulimaadyo toos ah loo sameeyo Muqdisho iyo Nairobi oo Wajer meesha laga saaro.

In KBC ama Kenya Commercial Bank Limited uu barach ka furto Muqdisho.

In la fududeeyo ganacsiga iyo isu gudubka xadka labada dal.

Arrinta qaadka ayaa aheyd mid cusub, taas oo aan la dhihi Karin waxaa ay ku jirtaa ama qeyb ka aheyd heshiiskii February.

Gunaanad:

Sida aad ka aragteen heshiiska labada dalka ma aha mid cusub, February 2016-kii waxaa la sheegay in la fulinayo, September isla sanadkaas waxaa la sheegay in labo bil gudahooda uu shaqeyn doono.

Heshiikan waxaa uu jiraa labo sano ugu yaraan, weli ma dhaqan-gelin, waxaana la isweydiinayaa sababta keeni karta in ay labada dal arrinkaas daacad ka noqdaan oo la fuliyo?

W/Q: Cabdi Caziz Gurbiye

Nairobi (Caasimada Online) – Madaxweynaha dalka Kenya Uhuru Kenyatta ayaa wadahadal ka dhex bilaabay Madaxweynaha Somalia Maxamed C/llahi Farmaajo iyo Ra’isul wasaaraha Ethiopia Hailemariam Desalegn.

Sida ilo wareedyo ay u sheegeen Caasimada Online, Madaxweynaha Kenya Uhurro Kenyatta ayaa Madaxweynaha Somalia kala hadlay wanaajinta xiriirka kala dhexeeya Ethiopia waxa uuna u sheegay in Kenya ay dooneyso inay wada kulmiso isaga iyo Hailemariam Desalegn si loo dhameystiro Siyaasadaha is diidan ee labada dal ka dhexeysa.

Uhurro Kenyatta ayaa Madaxweynaha Somalia ka codsaday inaanu sabab u noqon Mugdi soo kala dhexgala labada dal waxa uuna dhanka kale u xaqiijiyay in Ethiopia ay diyaar u tahay wada xaajood ay la gasho Somalia.

Kenyatta waxa uu tilmaamay in Somalia ay ku sugan yihiin Ciidamada Ethiopia oo qeyb ka ah howlgalada AMISOM, isla markaana ay muhiim tahay in lasii wado xiriirka Somalia kala dhexeeya Ethiopia.

Kenyatta ayaa Farmaajo u sheegay in xiriir yarida ka dhexeysa labada dal ay sabab u noqonkarto in Ethiopia ay qafiifiso howlgalada ay kawaday Somalia, wuxuuna soo jeediyay in laga wada xaajoodo Tashwiishka u dhexeeya labada dal.

Siyaasiyiin la socta Madaxweynaha ayaa sheegaya in Madaxweyne Farmaajo uu soo dhaweeyay codsiga Uhuru Keny, balse uu dhankiisa ka sheegay inaanu jirin arrin gaara oo ay ku kala fogaaden Ethiopia maadaama ay Dowladiisu tahay mid maalmo jirta.

Dowlada Ethiopia ayaa colaad u qaatay Dowlada Somalia tan iyo markii laga guuleystay Madaxweynihii hore ee Somalia, waxaana la rumeysan yahay in colaadaani ay soo ifbaxday kadib markii Madaxweynaha uu ka gaabsaday Casuumaad uga imaaday Ethiopia.

Madaxweyne Farmaajo iyo Ra’isul wasaaraha Ethiopia Hailemariam Desalegn, ayaa maalinta Sabtida kuna beegan 25/03/2017 lagu wadaa inay isku arkaan magaalada Nairobi si ay xal uga gaaran mad madowga soo kala dhexgalay labada mas’uul.

Caasimada Online
Xafiiska Nairobi
[email protected]

Nairobi (Caasimada Online) – Duulimaadyadii tooska ahaa ee magaalooyinka Muqdisho iyo Nairobi ayaa si toos ah loo bilaabi doonaa, sid auu shaaca ka qaaday madaxweynaha Soomaaliya Maxamed Cabdullahi Farmaajo oo ay arrintaas isku raaceen madaxweynaha Kenya Uhuru Kenyatta.

Farmaajo iyo Kenyatta oo maanta shir jaraa’id ku qabtay Nairobi, ayaa isla gartay in diyaaradaha ka tagaya Muqdisho laga joojiyo inay sii maraan magaalada Wajeer ee dalka Kenya, taas beddelkeedna ay toos u gaaraan Nairobi.

Arrintan ayaa ku dhici doonta laba toddobaad gudahood, sida uu sheegay madaxweynaha Kenya Uhuru Kenyatta.

“Waxaan madaxweyne kaga mahad-celinayaa ogolaanshahaaga in duulimaadyada Muqdisho iyo Nairobi ee tooska ah lagu billaabi laba toddobaad gudahood” ayuu yiri madaxweyne Farmaajo.

Arrintan ayaa waxaa horey isugu raacay madaxweynihii hore ee Soomaaliya Xasan Sheekh Maxamuud iyo Kenyatta markii uu Muqdisho yimid bishii September ee sanadkii tagay, hase yeeshee waqtigii saddexda bil ee arrintaas loo qabtay kuma aysan dhicin, waxaana hadda kasoo wareegtay lix bilood.

Kenya ayaa sidoo kale ballan qaaday in dhammaan dadka hayska baasaboorka Soomaaliga ee diblomaasiga ee Kenya imanaya aan looga baahnaan doonin wax Visa ah.

Madaxweyne Kenya Uhuru Kenyatta ayaa sidoo kale sheegay in la furi doono xuduudda Soomaaliya iyo Kenya ee dhinaac Dhoobley oo muddo xiran.

Caasimada Online
Xafiiska Nairobi
[email protected]

Maanta oo khamiis ah waxaa la shegeayaa in Cimilo ahaan Kuleel ka badan kuwii hore laga soo sheegayo Deegaanada Qaar Gobollada Soomaaliya.

Waxaa warbixin laga diyaariyey  Heer Kululka iyo Meesha uu gaaray taasi oo marwaxado dadka inay isticmaalaan iyo Mukeef ay ku qasbanaadeen.

HALKAAN HOOSE KA AKHRISO WARBIXINTA

Bu’aale oo ka tirsan Jubada Dhexe ayaa nqotay meesha ugu kulul Soomaaliya waana kuleel gaaray 39°C

Magaalada Cadaado Ee Gobolka Gal gaduud ayaa iyana ah 38°C

Magaalada Beled weyne Ee Gobolka Hiiraan ayaa Kuleel daran isna ka jiraa 38°C

Gaalkacyo oo ahaan jirtay meelaha ugu kulul Soomaaliya ayaa waxa maanta kululeelku gaaray 37°C

Boosaaso oo ah Magaalo Xeebeed ayaa iyaduna ah 36°C

Magaalada Baydhaba oo Darajo ahaan Temperature-ka gaaray 36°C

Magaalada Garowe ayaa iyaduna la mid ah Baydhabo 36°C

Caasimada Maamulka Hirshabelle Ee Jowhar Kuleelku waa 36°C

Magaalada Kismaayo waxa kuleelku maanta oo khamiis ah yahay 33°C

Muqdisho oo Caasimada Soomaaliya ah waxa kuleelku maanta yahay 31°C

Magaalada Marka Cadeey Ee Gobolka Sh/Hoose Kuleelku  waa 32°C

Hargeysa oo ah Caasimada Labaad Ee Soomaaliya Kuleelku waa 31°C

Magaalada Jig jiga Ee Dawlad deegaanka Soomaalida Itoobiya waa 29°C

Xaalka iyo Meesha uu Google ku qiimeeyey Dabeysha,Kuleelka iyo Warbixin uu diyaariyey

Muqdisho (Caasimada Online) – Xog gaar ah oo ay heshay Caasimada Online ayaa sheegeysa inay sii kordhayaan tirada xildhibaanada baarlamanka Soomaaliya ee diidan golaha wasiirada cusub ee uu soo dhisay ra’iisul wasaare Xasan Cali Kheyre.

Qaar ka mid ah xildhibaanada ayaa Caasimada Online u sheegay in ku dhowaad 100 xildhibaan ay saxiixeen liis lagu ururinayo xildhibaanada aan codkooda siin doonin golaha wasiirada oo ansixin ugu baahan baarlamanka.

Xildhibaanada diidan dowladda ayaa isugu jira saddex koox oo dano siyaasadeedyo kala duwan leh, balse isku biirsaday in dowladda aysan ka gudbin baarlamanka.

Koox ka mid ah xildhibaanada ayaa u mucaaradsan xukuumadda inaan wasiir laga dhigin, halka kooxda labaad ay dhaliilsan yihiin wasiirada la siiyey beeshooda ama aan beeshooda wasiirba la siin.

Waxaa sidoo kale ku jira koox xildhibaano ah ay gadaal ka riixayaan musharaxiinta isbeddel doonka oo dareemaya in madaxweyne Maxamed Cabdullahi Farmaajo uu ballamo uga baxay, ayaga oo aan wax xilal ah laga siin dowladda.

Xukuumadda cusub ayaa waxaa ku jira 42 xildhibaan oo isugu jira wasiiro, wasiir ku xigeenno iyo wasiiru dowlayaal, kuwaasi oo la rumeysan yahay in dowladda loogu soo daray inay ka caawiyaan inay baralamanka ka gududbto.

Si kastaba, waxaa hadda muuqata in go’aankaas uu ahaa mid aan la mahdin una abuuray dowladda mucaaraddada xildhibaano ka badan kuwa la qanciyey.

Caasimada Online
Xafiiska Muqdisho
[email protected]

London (Caasimada Online) – Sida aan warkeena ugu danbeynay ku sheegnay Booliska dalka Britain ayaa macluumaad hordhac ah ka bixiyay weerarkii shalay lala beegsaday xarunta baarlamaanka dalkaasi ee magaalada London.

Booliska waxa uu sheegay in weerarka ay ku dhimatay ilaa 5ruux, halka ilaa 40 kalana ay ku dhaawacmeen, dadka dhintay ayaa waxaa ka mid ah nin boolis ah oo lagu magacaabo Keith Palmer ”48-jir”

Wargeysyada dalka Britain waxa ay sheegen in Gaariga si ula kac ah loo jiirsiiyay ugu yaraan 12 ruux oo marayay buundada Westminster ee agagaarka dhismaha baarlamaanka UK oo gebi ahaantiisba hadda la xiray, waxaana dhaawac ka dhashay weerarka gaariga ku dhintay haweenay uu markii hore soo gaaray dhaawac.

Waxa ay intaa ku dareen Wargeysyada in qof ka soo dagay gaarigaaasi uu tooreey ku weeraray askari Booliis ah oo taagnaa dibedda dhismaha baarlamaanka.

Booliska Britain ayaa goordhow shaaciyay magaca Ruuxii ka danbeeyay weerarka oo ahaa wadaadka lagu magacaabo Abu Izzadeen.

Wadaadka lagu eedeeyay weerarka ee lagu magacaabo Abu Izzadeen, ayaa iminka ku jira Xabsi ku yaalla magaalada London, waxaana la xaqiijiyay in weerarkaasi ay fuliyeen shaqsiyaad si gaara isaga ugu adeega.

Abu Izzadeen ayaa iminka u xiran tuhun la xiriira Argagixisanimo, waxaana la xaqiijiyay in weerarkaani uu sii xoojiyay tuhunka wadaadka Abu Izzadeen.

Warbaahinta qaar ayaa sheegeysa in wadaadka Abu Izzadeen ay ciidamada ku khaldeen sawirkan hoose oo ah ninka weerarka ka dambeeyay oo dhaawac ah islamarkaana u muuqaal eg “wadaadka” xabsiga ku jira, ee Abu Izzadeen.

Muqdisho (Caasimada Online) – War goordhow nasoo gaaray ayaa sheegaya in xubnaha Xukuumada cusub ee Somalia ay la dhaqaaqi la’ yihiin gaadiid la’aan kasoo foodsaartay dhanka DFS.

Wasiirada cusub qaarkooda ayaa la sheegay inaanu heysan wax gaadiid ah, halka qaarna ay magaalada Muqdisho ku sugan yihiin dhowr maalin, kadib markii ay dhowrkii sano ee lasoo dhaafay ahaayen kuw ku noolaa dalka dibadiisa.

Seddex meelood labada meel iyo bar Wasiirada Xukuumada Kheyre ayaa deegaan ku ah Hoteelka Jazeera ee magaalada Muqdisho, waxaana lasoo sheegayaa inaanu wali ka dhex bixin hoteelka tan iyo markii lagu dhawaaqay Golaha Wasiirada Xukuumada Somalia.

Gaadiidka loogu tallo galay Wasiirada ayaa waxaa wali heysta Wasiiradii hore ee aan xilka wareejin, halka gaadiidka kale ay yihiin kuwo xareysan oo aan wali la isticmaalin.

Ra’isul wasaaraha Xukuumada Xasan Kheyre ayaa inta badan Wasiirada kula kulma Hoteelka Jazeera oo ay ka degan yihiin magaalada Muqdisho bacdamaa aysan heysan wax gaadiid ah.

Dalka Somalia ayaa waxaa daashaday sharci darro waana dalka keliya ee Mas’uuliyiin loo magacaabo xilal iyagoo aan loo dajin qorsho ka hor inta aysan xilalka la wareegin.

Caasimada Online
Xafiiska Muqdisho
[email protected]

Muqdisho (Caasimada Online)-Xildhibaan Idiris Dhakhtar oo kamid ah Xildhibaanada BFS ayaa mar kale ka hadlay magacaabida Golaha Wasiirada Xukuumada Somalia.

Xildhibaan Idiris ayaa sheegay inaan Golaha Wasiirada lagu soo xulin Cadaalad, Sinaan, Aqoon iyo Karti, waxa uuna cod dheer ku sheegay in Ra’isul wasaare Kheyre ay kusoo celin doonaan Golaha uu magacaabay.

Xildhibaanka ayaa tilmaamay in Golahaasi aysan Xildhibaanada meelmarin doonin, waxa uuna ballanqaaday inay ku noqon doonaan caqabad lama gudbaan ah.

”Waan usii sheegayaa Ra’isul wasaaraha in Golihiisa aysan meelmarin doonin anagu Wasiiro uma naqaan kuwo lagu soo xulay karti la’aan, aqoon la’aan iyo Khibrad la’aan”

”Dadka uu ahmiyada siiyay Kheyre iyaga ha meelmariyaan Wasiirada anagu wey naga go’an tahay inaan dib ugu celino Wasiirada la horkeeni doono Xildhibaanada”

Xildhibaan Idiris Dhakhtar, ayaa sidoo kale sheegay in Xildhibaanada BFS ay laba jibaari doonaan la xisaabtanka Golaha Wasiirada waxa uuna mar kale ku celiyay in Wasiirada cusub aysan gudbi doonin.

Dhinaca kale, Xildhibaanka ayaa Ra’isul wasaaraha Xukuumada Somalia Xasan Kheyre ugu baaqay inuu la imaado shax ay aqbali karaan Xildhibaanada.

Caasimada Online

Xafiiska Muqdisho

[email protected]

Muqdisho (Caasimada Online) – Waxaa magaalada Muqdisho ee caasimada Somalia ka socda tartan u dhexeeya Taliyayaal hore oo doonaaya in mar kale ay dib u qabtaan Hay’adaha amaanka Somalia.

Hay’adaha amaanka DFS Sida NISA, Booliska iyo Milliteriga ayaa waxaa loolanka ugu jira beelaha kala ah Murusade, Habar Gidir iyo Abgaal, waxaana shaqsiyaadka xilalkaasi doonaaya ku jira kuwo ku fashilmay Amniga Somalia, gaar ahaan kan magaalada Muqdisho.

Taliyaha Ciidamada Booliska Somalia ayaa waxaa loolan ugu jira 3 Taliyayaal khibrad leh, waxaana kamid ah Sargaal Hore oo lagu magacaabo General Cali Xaashi Baraale oo Dawladii Siyaad Barre Xilal ciidan kasoo qabtay.

Gen. Cali Xaashi ayaa dhowrkii sano ee lasoo dhaafay ku noolaa dalka dibadiisa, waxaana la saadaalin karin waxqabadkiisa maadaama uusan shaqeyn dhowrkaani sano.

Taliyaha Hay’adda Sirdoonka iyo Nabadsugida Qaranka ayaa waxaa ku loolameysa Laba beel oo kala ah Daarood iyo Abgaal, waxayna u badan tahay in la siiyo beesha Abgaal, gaar ahaan Wacbuudhan.

Sidoo kale Taliyaha Milliteriga ayaa waxaa u taagan Yuusuf Maxamed Siyaad ”Indha Cade” oo kasoo jeeda Beesha Habar Gidir, waxa uuna xusul duub ugu jiraa qabashada xilkaasi.

Indha Cadde ayaa dhowrkii sano ee ugu danbeysay ahaa mid howlgab ah, waxaana xil uu qabto ugu danbeysay Dowladihii hore ee KMG ahaa.

Indha Cadde, ayaa waxaa wata Sheekh Shariif Sheekh Axmed waxaana suuragal ah inuu kasoo dhexmuuqdo Taliyayaasha Hay’adaha amaanka, walow Indha Cadde laga aaminsan yahay muuqaalo kale.

Xil ka qaadista iyo Magacaabida Taliyayaasha Hay’adaha amaanka ayaa dhaqan gali doonta dib usoo laabashada Madaxweynaha kadib, waxaana iminka socda diyaar garow kii ugu danbeeyay.

Dhinaca kale, Madaxweyne Farmaajo iyo Kheyre ayaa ka feejigan in xilalkaasi ay u magacaaban Taliyayaal horay usoo fashilmay.

Caasimada Online
Xafiiska Muqdisho
[email protected]