Gaalkacyo (Caasimada Online) – Magaalada Gaalkacyo ee xarunta gobolka Mudug ayaa waxaa maanta lagu qabtay dibadbax weyn oo ay dhigeen shacabka ku dhaqan koonfurta magaaladaasi.

Dibadbaxan ayaa waxaa lagu taageerayay ciidamada Xoogga dalka, gaar ahaan howlgallada ka socda gobollada Galgaduud iyo Mudug ee bartamaha Soomaaliya.

Waxaa mudaharaadkan soo qaban qaabiyay maamulka degmada, ayada oo ujeedku ahaa in reer Gaallacyo ay taageero ugu muujiyaan ciidamada dowladda iyo kuwa deegaanka ee haatan guullo ka gaaray howlgallada ka socda deegaanada maamulka Galmudug.

Dibadbaxayaasha ayaa isugu so baxay barxadda Five Star ee Gaalkacyo, iyaga oo ku qalinayay erayo ka dhan ah kooxda Al-Shabaab, waxayna sidoo kale siteen booray lagu soo xordhay erayo ay taageero ugu muujinayaam ciidamada huwanta ee gulufka ka waday gobollada dhexe ee dalka.

Waxgarad iyo abwaano ka hadlay mudaharaadka ayaa sidoo kale shacabka ku booriyay inay qaataan doorkooda, ayna garab istaagaan ciidamada ku sugan furimaha dagaalka.

Mid kamid saraakiisha laamaha ammaanka  oo goobta ka hadlay ayaa sheegay in ka go’an tahay la dagaallanka Al-Shabaab, balse ay u baahan yihiin taageerada shacabka.

“Annaga ciidamo amni ahaan Shabaab waxaa naga go’an inaan a dirirno dhiigeena inaan ku bixino gudaha iyo bannaanka, waxaana rabnaa inaad na taageertaan” ayuu yiri.

Dhankiisa Duqa Galgakacyo, Cabdiraxmaan Sheekh Xasan oo gabagabadii hadalka qaatay ayaa xusay in Gaalkacyo ay diyaar u tahay halgalka xoreynta ee ka socda Galmudug.

Isku soo baxan ayaa qayb ka noqonaya abaabulka culus ee hadda ka socda Galmudug, kaas oo qorshihiisu yahay in kooxda Al-Shabaab looga saaro guud ahaan Galmuudg.

Marka (Caasimada Online) – Warar kala duwan ayaa ka soo baxaya dagaal qaraar oo baqranimadii maanta ka dhacay gudaha magaallo xeebeedka Marka ee xarunta gobolka Shabeelaha Hoose, kaas oo saameyn weyn ku yeeshay shacabka ku dhaqan magaaladaas.

Dagaalka ayaa u dhexeeyay ciidamo ka wada tirsan dowladda, balse isku u abaabulan hab beeleed, kuwaas oo ku waday degmada Marka ee xarunta gobolka Shabeelaha Hoose.

Ilo deegaanka ah ayaa innoo sheegay in ciidamadan ay isku qabteen muran ka dhashay dhul ku yaalla halkaasi, kadibna uu sidaas ku qarxay iska hor imaadka.

Wuxuu dagaalka xoogiisa ka dhacay dhanka xiga xeebta, sida laga arki arko muqaallo iyo sawirro laga soo qaaday goobta dagaalka, kuwaas oo lagu baahiyay baraha bulshada.

Wararka ayaa sheegaya in dagaalka uu geystay khasaare kala duwan oo isugu jiro dhimasho iyo dhaawac, waxaana dadka ay waxyeelada soo gaartay ku jiro rayid.

Xaaladda ayaa weli kacsan, mana jiro wax hadal ah oo ka soo baxay maamulka degmada iyo saraakiisha ciidamada Xoogga dalka oo ku aadan dagaalka ka dhacay Marka.

Dhaq-dhaqaaqyo iska soo horjeedo ayaa lagu soo warramayaa in weli laga dareemayo magaalada, halkaas oo ay weli isku horfadhiyaan labada dhinac ee dagaalamay.

Marka oo ah magaallo xeebeedka, sidoo kale xarun u ah gobolka Shabeelaha Hoose ayaa daganeyd sanadihii dambe, waxayna kamid ah degmooyinka laga saaray kooxda Shabaab.

Si kastaba, ciidamada ayaa ku dagaalama inta badan Shabeelaha Hoose, waxaana u dambeeyay dagaalkii xooganaa ee dhowaan ka dhacay magaallo Baraawe ee gobolkaasi.

Dhuusamareeb (Caasimada Online) – Xildhibaan Yaasiin Cabdullaahi Maxamuud (Farey) oo kamid ah Golaha Shacabka Soomaaliya, isla-markaana ku sugan jiidda hore ee dagaalka ayaa ka hadlay howlgallada ka socda bariga gobolka Galgaduud ee bartamaha Soomaaliya.

Ugu horeyn xildhibaanka oo horay usoo noqday taliyaha Hay’adda Nabad-Sugidda ayaa beeniyay in ciidamada dowladda iyo kuwa deegaanka ay isaga soo baxeen magaalada Ceel-dheer ee gobolka Galgaduud, kadib markii wararkaasi lagu baahiyay baraha bulshada.

Yaasiin Farey ayaa waxba kama jiraan ku tilmaamay wararkaasi, wuxuuna sheegay inuu hadda ku sugan yahay magaalada Ceel-dheer, ayna gacanta ku hayaan ciidamada huwanta.

“Aniga waxaan ku suganahay dhinaca degmada Ceel-dheer waxaas waa maqlaayay waxna kama jiraan, aniga kula hadlaayo ayaa ku sugan Ceel-dheer waxaan rabaa inaan u sheego guud ahaan dadka Soomaaliyeed in aysan jirin wararka la sheegaayo ee ah in ciidamada Xoogga dalka Soomaaliyeed ay kasoo baxeen furimaha dhanka aan aniga hadda ku suganahay, marka warkaan waan maqlay, laakiin waxba kama jiraan” ayuu yiri Yaasiin.

Sidoo kale wuxuu hoosta ka xariiqay in ciidamada jooga Ceel-dheer ay u filan yihiin amniga iyo difaaca magaaladaasi oo dhowaan laga saaray kooxda Al-Shabaab.

“Magaalada ciidan Xoogga dalka Soomaaliyeed ayaa jooga, ciidan waxaa jooga deegaanka ah oo ku fican difaaca degmada anigu marka gudaha magaalada ayaan daganahay wax dhib ah ama culeys oo aan dareemaayo haba yaraatee ma jiro” ayuu hadalksa sii raaciyay.

Dhinaca kale wuxuu soo hadal qaaday weerarkii xooganaa ee ay maalin kahor Al-Shabaab ku qaadeen deegaanka Cowswaye, isaga oo qiray inuu jiro khasaare soo gaaray ciidamada dowladda iyo kuwa Macawiisleyda, balse uu tilmaamay in dagaal sidiisu dhaliyo khasaare.

Xildhibaan Yaasiin Farey oo hadalkiisa sii wata ayaa intaasi kusii daray in weerarkaas uusan saameyn doonaan gulufka dagaal ee haatan ka socda bariga gobolka Galgaduud.

“Dagaal haddii uu dhaco natiijadiisa waa dhimasho iyo dhaawac marka meeshaas dagaal ka dhacay mana noqon doono dagaalkaas mid howlgallada socda ama hanka ay leeyihiin guud ahaan dadka Soomaaliyeed, gaar ahaan ciidamada qaranka dib u dhiga” ayuu yiri Farey.

Gobollada dhexe ee dalka ayaa waxaa haatan ka socda dagaal xoogan oo ka dhan ah Al-Shabaab, kaas oo uu hoggaamintiisa Dhuusamareeb u tegay madaxweyne Xasan Sheekh.

Dhuusamareeb (Caasimada Online) – Madaxweynaha dowlad goboleedka Jubbaland, Axmed Maxamed Islaam (Axmed Madoobe) oo khudbad ka jeediyay xirtaanka shirka Golaha Wadatashiga Qaranka ee xalay lagu soo gabagabeeyay magaalada Dhuusamareeb ayaa ka hadlay arrimo xasaasi ah oo ku aadan dagaalka adag ee lagu jiro kooxda Shabaab.

Axmed Madoobe ayaa marka hore boggaadiyay doorka madaxweyne Xasan Sheekh ee ku aadan hoggaaminta dagaalka Al-Shabaab ee uu haatan u joogo Galmudug.

Madaxweynaha Jubbaland ayaa ku dheeraaday ka hadalka dagaalka Al-Shabaab, isaga oo saadaaliyay waxa dhici kara, haddii laga adkaan waayo kooxdaa.

Waxa uu tilmaamay in haatan hubka la wato ay u diiwaangashan yihiin dowladda, haddii uu dhab noqon waayana dagaalka uu meesha ka baxayo hubkaasi, kadibna ay fursad weyn heli doonto kooxda, isaga oo ku baaqay in loo midoobay sifeynta xoogaga Al-Shabaab.

“Haddii dagaalka Al-Shabaab sida uu yahay dhab u noqon waayo qoriga sumadda leh sidaa uma sii heysan doontaan qoriga dowladda ayaa leh wey qaadan doontaa qabiilna qori ma lahan marka ogaada dowladnimada ayaa fiican” ayuu yiri madaxweyne Axmed Madoobe.

Sidoo kale wuxuu tilmaamay in shacabka Soomaaliyeed looga baahan yahay inay iska dul qaadaan Al-Shabaab, si aysan ugu sii jirin gumeysi kale, sida uu hadalka u dhigay.

“Inta waligaa lagu gumeysan lahaa waxaan qabaa in dadku inay dagaalamaan, aan ka dhabeyno oo aan garano ciidankaas dagaalka ku jiraahi waxa ay u baahan yihiin waa shacabka sideedaba shacab ayaa dagaalama” ayuu mar kale hadalkiisa sii raaciyay.

Axmed Madoobe ayaa sidoo kale xusay in Al-Shabaab ay hadda sii dhammaanayaan, sidaas daraadeedna uu ku talinayo in qof kasta uu ka qayb qaato dagaalka haatan socda.

“Waxay u baahan yihiin maanta nimankaan Khawaarijta ah kacdoon shacab oo la is wada daba galo” ayuu mar kale khudbaddiisa ku yiri madaxweynaha maamulka Jubbaland.

Hadalkan ayaa ku soo aadayo, ayada oo uu haatan meel wanaagsan marayo dagaalka ka dhanka ah Al-Shabaab, kaas oo ay dowladda Soomaaliya ka gaartay guul aad u weyn, marka la eego maamullada HirShabelle iyo Galmudug oo kooxda laga saaray dhul balaaran.

Muqdisho (Caasimada Online) – Wasiirkii hore ee amniga Soomaaliya, ahna xildhibaan haatan ka tirsan Golaha Shacabka Soomaaliya, Maxamed Abuukar Islow (Ducaale) oo war qoraal ah soo saaray ayaa ka hadlay arrimo ku aadan dagaalka ka dhanka ah Al-Shabaab, isaga oo ku taageeray dowladda federaalka ee uu hoggaamiyo Xasan Sheekh Maxamuud.

Ducaale ayaa shaaca ka qaaday in dalka uu jiro xaalad dagaal oo ay ka wada qayb-qaadanayaan dowladda federaalka iyo shacabka, si meesha looga saaro Al-Shabaab.

“Dalku dagaal ayuu ku jiraa, dowladu dagaal ayey ku jirtaa, dadkuna dagaal ayey ku jiraan. Caddowga lala dagaalamayo waa Khawaarijta dhibaatadeeda nagu qaan gaartay oo hortaagan nolosha dadkeena, jiritaankeena iyo dowladnimadeeda” ayuu yiri Ducaale.

Sidoo kale wuxuu tilmaamay in loo baahan yahay in taageero weyn loo muujiyo ciidamada Xoogga dalka ee ku sugan furimaha dagaalka, si loogu muujiyo hiil, hoo iyo ducaba.

“Maanta waxaa noo muuqata dowlad iyo shacab dagaalka ku wada jira. Haddii faltan dhaco waa sunaha dagaalka in Geesiyaal badan lagu waayo, qaar dhawacmaan, hantina ku burburto. xilliga dagaalku socdo inta aan furinta ku jirin waxaa laga rabaa hiil, hoo iyo duco” ayuu mar kale qoraalkiisa sii raaciyay xildhibaan Maxamed Abuukar Islow (Ducaale).

Dhanka kale, xildhibaanka oo u jawaabay siyaasiyiinta duraya dowladda, kadib weerarkii Cowswayne ayaa digay in siyaasad laga dhex raadiyo guul darrada soo gaartay ciidamada Xoogga dalka, ayada oo laga raadinayo dhibco siyaasadeed, sida uu hadalka u dhigay.

Waxa uu intaasi kusii daray in muhiimadda koowaad ay tahay in garab istaag loo muujiyo ciidamada huwanta ee u dagaalamay xoreynta dalka.

“Xaaladdaan oo kale  dhibco siyaasadeed lagama raadiyo, tashwiish laguma furo difaacayaasha dadka iyo dalka.  Waxaa kaliya noo furan inaan u istaagno sidii aan ciidamadeena Geesiyaasha Qaran ah u taageeri lahayn, u dhiirigelin lahayn, una dareensiin lahayn inay leeyihiin mas’uuliyiin iyo Dadweyne istaahila naf-hurnimadooda” ayuu sii yiri.

Hadalkan ayaa kusoo aadayo, ayada falcelin xoogan ay ka dhalatay weerarkii ay maalin kahor kooxda Al-Shabaab ku qaaday saldhigyo ku yaalla deegaanka Cowswayne, kaas oo khasaate lixaad leh lagu gaarsiiyay ciidamada huwanta, laguna dhaliilay dowladda dhexe.

Dhuusamareeb (Caasimada Online) – Golaha Wadatashiga Qaranka oo soo gabagabeeyey shir laba maalmood uga socday Dhuusamareeb ayaa bayaankooda ku soo daray qodobo ay kaga hadleen colaada ka taagan gobolka Sool ee u dhaxeysa Somaliland iyo SSC-Khaatumo.

War-murtiyeedkii golaha qeybta ku saabsan colaada Sool waxaa lagu bilaabay “Goluhu wuxuu adkaynayaa midnimada iyo wadajirka dadka iyo dalka Soomaaliyeed.”

Sidoo kale golaha ayaa walaac ka muujiyey colaada sii dheeraaneysa, xilli maalin ka hor ciidamada Somaliland dagaal looga qabsaday saldhiggii ugu weynaa ee Goojacadde.

“Goluhu wuxuu si weyn uga walaacsan yahay colaadda ka taagan Sool, wuxuuna ugu baqayaa labada dhinac in ay isxakameeyaan, kana fogaadaan talaabooyin sii dheereyn kara colaadda,” ayaa lagu yiri bayaanka.

Sidoo kale golaha wadatashiga qaranka ayaa ku baaqay in la ilaaliyo badqabka maxaabiista lagu kala qabsaday dagaalka.

“Goluhu wuxuu ugu baaqayaa labada dhinacba inay ilaaliyaan xuquuqda maxaabiista,” ayaa lagu yiri bayaanka.

Golaha Wadatashiga Qaranka ayaa sidoo kale ku baaqay in la fududeeyo gargaarka bini’aadanimo ee dadka ku barakacay colaada.

“Goluhu wuxuu sidoo kale ku baaqayaa in si degdeg ah loogu gurmado dadka ku barakacay dagaallada Sool,” ayaa lagu yiri nuqulka bayaankii shirka Dhuusamareeb ee looga hadlay colaada u dhaxeysa Somaliland iyo Khaatumo.

Melville (Caasimada Online) – Diyaarad ay leeyihiin ciidamada Marines-ka Mareykanka ayaa maanta ku burburtay Jasiirad ku taalla waqooyiga dalka Australia.

Shilkaas waxaa ku dhintay saddex ka mid ah ciidamada badda, 20 kalena ay ku dhaawacmeen.

Shilkaas ayaa dhacay xilli uu socday dhoolatus tababar ah oo ay dhowr dal ka qeyb galayeen, sida ay saraakiishu sheegeen.

Saddex ka mid ah askarta ayaa la xaqiijiyey in ay ku dhinteen Jasiiradda Melville oo dhoolatuskaasi uu ka socday.

Shan ka mid ah 23-kii askari ee diyaaradda saarnaa waxaa iyagoo qaba dhaawacyo daran loo duuliyey isbitaal 80 kiiloomitir u jira magaalada Darwin ee dalka Australia, si halkaas loogu daweeyo.

Diyaaradda Bell Boeing V-22 Osprey tiltrotor ayaa burburtay abaaro 9:30 AM waqtiga maxaliga ah ee dalkaasi, sida lagu yiri bayaan ka soo baxay Marines-ka.

Bayaanka ayaa intaas ku daray in sababta burburka keentay baaritaan uu ku socdo.

Ra’iisul wasaaraha Australia Anthony Albanese ayaa sheegay in kaliya askar Mareykanka ah ay ku dhaawacmeen tababarkan ay sida wadajir ah uga wada qeybgalayeen ciidamada dalalka Mareykanka, Australia, Indonesia, Filibiin iyo East Timor.

Jowhar (Caasimada Online) – Warar dheeraad ah ayaa kasoo baxaya khasaaraha ka dhashay dab xoogan oo xalay ka kacay suuq ku yaalla xaafadda Hantiwadaag ee magaalada Jowhar ee xarunta HirShabelle, kaas oo dhaliyay khasaare aad u xoogan.

Dabkan oo soo bilowday xalay, soona gaaray illaa saaka ayaa saameeyay goobo ganacsi oo ku yaalla halkaasi, waxaana uu ka dhashay koronto, sida ay sheegeen dadka deegaanka.

Illaa dhowr goobood oo ganacsi ayaa ku basbeelay dabkan, balse ma geysan wax khasaare nafeed ah, sida ay sheegayaan wararka ka imaanaya gobolka Shabeelaha Dhexe.

Mid kamid ah ganacsatada suuqa oo la hadlay Warbaahinta ayaa faah-faahin ka bixiyay dabkaasi, wuxuuna sheegay in bubur xoogan uu soo gaaray goobahooda ganacsi.

“Waxaan kamid ah ganacsatada suuqa waxaa ka dhacay dab xalay, illaa saaka socday waa musiibo rabbaani ah oo Ilaahey SWT awooddiisa ah meeshaan aad arkeysaan ee uu dabka ka kacay dad badan oo hantidoodii ku waayay ayaa jiraa” ayuu yiri mid kamid ah ganacsatada.

Sidoo kale wuxuu tilmaamay in dabka uu billowday xilli saq-dhexe ah, isla-markaana ay ka maqnaayeen goobahooda, taasina ay keentay in dabka uu sii fido.

“Xilliga uu dabka kacayay annaga ma joogin oo saq-dhexe ayey aheyd dhibaato aad u balaaran ayaa meesha ka dhacday hadane waxaa soo daahay gurmad” ayuu raaciyay.

Waxaa kale oo uu intaasi kusii daray in Jowhar ay leedahay hal baabuur oo dab damis ah, isagiina uu kasoo daahay, soona gaaray saacad kadib markii uu dabka kaacay.

Maalmo ka hor ayay aheyd markii uu sidaan oo kale dab xoogan uga kacay suuqa Darwiish oo ku yaalla magaalada Beledweyne ee gobolka Hiiraan, kaas oo geystay khasaare xoogan.

Dhuusamareeb (Caasimada Online) –Madaxweynaha Soomaaliya Xasan Sheekh Maxamuud oo caawa khudbad ka jeediyey gabagabada shirka golaha wadatashiga qaranka ee Dhuusamareeb lagu qabtay ayaa si qota dheer uga hadlay dagaalka Khawaarijta Al-Shabaab.

Madaxweynaha ayaa khudbadiisa ku bilaabay oraahdii aheyd “Dhulka iyo Xaaqinka waxaa dhamaada Xaaqinka” isagoo Al-Shabaab ku tilmaamay Xaaqin sii dhamaanaya.

Sidoo kale Madaxweynaha ayaa balan qaaday in qof Soomaali ah oo dhulkiisa jooga aan lagu fiirsa doonin Shabaab gumeysanaya, “Dagaalka aan ku jirno mid haka doona maaha, waana naga dhab,” ayuu yiri Xasan Sheekh.

Madaxweynaha ayaa sheegay in dadka uu halganku dhabta ka yahay ay dowladu qorsheyneyso inay abaalmariso, “waxaan amaaneynaa geesiyaasha qaranka, waana u duceyneynaa,” ayuu yiri Madaxweynuhu.

“Ganacsatada iyo hantiileyaasha Soomaaliyeed waxaan leeyahay doorkiinii weli waa dhiman yahay, soo arka dhibaatooyinka heysta dadka laga dul qaaday Khawaarij ee garab istaaga,” ayuu yiri Madaxweyne Xasan.

Madaxweynaha ayaa dadka Soomaaliyeed mar kale ugu baaqay inay iska ilaaliyaan Garanwaaga “Yuusan ugu soo gelin Qabiil ama qaraabeysi, ninka adiga iyo dadka kaleba aadnaa ka nabad geli doonin hasoo dhaweysan, walaal haka dhigan ee dowladda u dhiib si loo dhaqan celiyo,” ayuu madaxweynuhu kula dardaarmay dadka Soomaaliyeed.

Madaxweynaha ayaa baaq u diray dhalinyarada ka tirsan Khawaarijta Al-Shabaab, isagoo ka balan qaaday inay helayaan cafis aan gorgortan laga gelineyn.

“Wiilasheena la qalday waxaan leenahay gabalku yuusan idinkugu dhicin meesha, waa la isku soo socdaa ee naftiina badbaadsada, odayaasha hoggaamiya ama ka tirsan waxaan leenahay weli towbadaa idiin furan,” ayuu yiri Madaxweynuhu.

Dhuusamareeb (Caasimada Online) – Shirka 7-aad ee Golaha Wada-tashiga Qaran ee uu shir guddoomiyey Madaxweynaha Jamhuuriyadda Federaalka Soomaaliya Dr. Xasan Sheekh Maxamuud ayaa ku qabsoomey Caasimadda Dowladda Galmudug ee Dhuusamareeb, 26 – 27 Agoosto 2023.

Golaha Wada-tashiga Qaran ayaa kulankoodii 7-aad diiradda ku saaray seddax qodob oo kala ah:

1 – Dhameystirka howlgallada dib-u-xoreynta deegaannada kooban ee weli ku harsan gacanta cadawga iyo dardargelinta wajiga labaad ee dagaalka ka dhanka ah khawaarijta.

2 – Xasilinta deegaannada laga xoreeyay khawaarijta iyo degaannada lagu xorayn doono howlgallada wajiga 2-aad.

3 – Dib-u-heshiisiinta bulshada ku nool deegaannada laga xoreeyay khawaarijta.

Bogaadin: Goluhu wuxuu Bogaadinayaa guulaha waaweyn ee ciidamada qalabka sida oo kaashanaya shacabka deegaannada ay ka gaareen dagaalladii u danbeeyay ee khawaarijta looga xoreeyay degaanno badan oo muhiim ah ee dhaca Gobolka Galguduud ee Dowladda Galmudug.

2. QODOBADA SHIRKA KA SOO BAXAY: Golaha Wada-tashiga Qaran ayaa falanqeyn dheer kadib ku heshiiyay qodobada hoos ku xusan:
3. HOWLGALLADA DIB-U-XOREYNTA• Goluhu wuxuu adkeynayaa in dowladda federaalka, dowladdaha xubnaha ka ah iyo shacabka Soomaaliyeed ay si wadajir iyo isku tashi leh u xaqiijiyaan amniga una xajistaan amniga deegaanada la xoreeyay.

• Goluhu wuxuu isku raacey in howlgallada la waafajiyo istraatiijiyadda qaran ee la dagaalanka khawaarijta, la iskuna dubbarido dadaallada kala duwan ee hey’addaha dalka.
• Goluhu waxuu adkeynayaa in dalku uu ku jiro xaalad dagaal ayna waajib tahay in aan loo kala harin dadaallada dib-u-xoraynta dalka.
• Goluhu wuxuu go’aamiyay in la mideeyo qorshaha iyo hoggaanka hawlgallada lagu cirib tirayo khawaarijta, lana ballaariyo howlgallada dib-u-xoraynta.

2. XASILINTA DEEGAANADA LAGA XOREEYAY KHAWAARIJTA▪ Goluhu wuxuu adkeynayaa ahamiyadda ay leedahay hanashada guulaha qiimaha weyn ugu fadhiya ummadda Soomaaliyeed ee laga gaaray dagaalka lagula jiro khawaarijta.

▪ Goluhu wuxuu farayaa hay’adaha heerarka kala duwan ee dowladda in ay mideeyaan qorsheyaasha mashaariicda iyo adeegyada bulshada sida maamul-sameynta, amniga, caafimaadka, cadaaladda, waxbarashada ee ay sida deg dega ah ugu baahanyihiin degaanada la xoreeyay.

▪ Goluhu wuxuu ka codsanayaa ganacsatada, hantileyda Soomaaliyeed iyo kuwa kheyrka jecel in ay ka qeybqaataan dadaalada dib u soo kabashada deegaannada la xoreeyay.

▪ Goluhu wuxuu ka codsanayaa saaxiibada caalamka ee Soomaaliya in ay kaalmo wax ku ool ah ka geystaan degaanada laga xoreeyay khawaarijta si waafaqsan qorshaha xasilinta dowladda.

3. U DIYAARGAROWGA WAJIGA LABAAD EE HOWLAGALLADA▪ Golohu wuxuu isla qaatay in si wadajir ah loo dardargaliyo diyaargarowga DFS iyo DXDF ay ugu jiraan wajiga 2-aad ee dagaalka lagu xoreynayo deegannada wali ku jira gacanta khawaarijta ee Jubalaand, Koonfur Galbeed, iyo Hirshabeelle (Galbeedka Wabi Shabeelle).

▪ Golohu wuxuu ku boorinayaa dhallinyarada iyo horjoogayaasha khawaarijta in ay isku soo dhiibaan dowladda, iyagoo ka faa’iidaysataan fursadda xeerka cafiska, kana tanaasulaan fekerka xagjirnimada.

3. DIB-U-HESHIISIIN IYO NABADAYN BULSHO• Goluhu wuxuu go’aamiyay u diyaar-garowga dib-u-heshiisiinta shacabka Soomaaliyeed si colaadaha ay khawaarijtu dhex dhigeen xal- waara looga gaaro.

• Goluhu wuxuu farayaa hay’adaha heerarka kala duwan ee dowladda in ay dardar galiyaan fulinta istaraatiijiyada iyo qorshaha Qaran ee dib-u-heshiisinta, nabadaynta bulshada iyo ciribtirka xagjirnimada.

4. QODOBBO KALE▪ Goluhu wuxuu adkaynayaa midnimada iyo wadajirka dadka iyo dalka Soomaaliyeed.

▪ Goluhu wuxuu si weyn uga walaacsan yahay colaadda ka taagan Sool, wuxuuna ugu baqayaa labada dhinac in ay isxakameeyaan, kana fogaadaan talaabooyin sii dheereyn kara colaadda.

▪ Goluhu wuxuu ugu baaqayaa labada dhinacba inay ilaaliyaan xuquuqda maxaabiista.

▪ Goluhu wuxuu sidoo kale ku baaqayaa in si degdeg ah loogu gurmado dadka ku barakacay dagaallada Sool.

5. MAHADCELIN▪ Goluhu wuxuu mahadcelin ballaaran u jeedinayaa Dowladda iyo shacabka Galmudug oo si buuxda u martigeliyay shirka 7-aad ee Golaha Wada-tashiga Qaran.

–DHAMMAAD–

Muqdisho (Caasimada Online) – Beesha Caalamka ayaa war ka soo saartay tallaabadii ciidamada SSC-Khaatumo ay ku qabsadeen saldhiggii Goojacadde ee ciidamada Somaliland, iyadoo cambaareysay dagaalka ku sii baahaya gobolka Sool ee sababay in la iskala baxo magaalada Laascaanood oo colaadu ay ka bilaabatay.

Cambaareyn kadib, caalamku wuxuu ku baaqay in la joojiyo colaada sii baaheysa, in dhinacyadu ogolaadaan wadahadal, in la fasaxo gargaarka bini’aadanimo shuruud la’aan iyo in laga fogaado is dhaafsiga hadallada xanafta leh.

Hoos ka aqriso bayaanka beesha caalamka oo dhameystiran:

Saaxiibada beesha caalamka waxay si adag u cambaareynayaan sii hurinta colaadda Laascaanood, oo ay ka mid yihiin wararka sheegaya in dagaalku ku fiday bannaanka magaalada.

Waxaan ku boorineynaa dhammaan dhinacyada inay ku heshiiyaan xabbad joojin degdeg ah oo shuruud la’aan ah.

Waxaan ku baaqaynaa in la joojiyo abaabulka dagaalyahannada, iyo saadka iyo hubka la siinayo.

Waxaan aad uga walaacsanahay warbixinnada sheegaya inay jiraan tiro badan oo maxaabiis ah.

Waxaan filaynaa kuwa ku lugta leh inay u hoggaansamaan sharciga xuquuqda aadanaha iyo sharciga caalamiga ah ee bani’aadamnimada, gaar ahaan ilaalinta rayidka iyo kaabayaasha rayidka.

Waxaan ku celinaynaa muhiimada ay leedahay in la xaqiijiyo helidda gargaar bini’aadantinimo oo aan la carqaladayn iyo gargaarka la gaarsiiyo dadka u baahan.

Waxaan ku boorinaynaa dhammaan dhinacyada in ay ka fogaadaan hadalada xanafta leh ee wax kala qaybiya, dhammaan cabashooyinka iyo xiisadaha waa in lagu xalliyaa si nabad ah oo wadahadal ah.

Bayaankaan waxaa wadajir u soo saaray dalalka iyo ururrada kala ah: Hawlgalka Kalaguurka Midowga Afrika ee Soomaaliya (ATMIS), Belgium, Canada, Jabuuti, Wafdiga Midowga Yurub, Itoobiya, Finland, Faransiiska, Jarmalka, Urur-Goboleedka (IGAD), Ireland, Talyaaniga, Kenya, Boqortooyada Sacuudi Carabiya, Ururka Jaamacadda Carabta (LAS), Holand, Norway, Ururka Iskaashiga Dalalka Islaamka (OIC), Qadar, Ruushka, Suudaan, Iswiidhan, Iswisarland, Turkiga, Uganda, Boqortooyada Midowday ee Britain, Dowladda Maraykanka iyo Qaramada Midoobay.

Dhuusamareeb (Caasimada Online) – Shirka golaha wadatashiga qaranka oo Dhuusamareeb ka socday laba maalmood ayaa la soo gabagabeeyey caawa, sida ay ogaatay Caasimada Online, waxaana laga soo saarayaa war-murtiyeed rasmi ah.

Madaxtooyada Qaranka ayaa qorsheyneysa in caawa fiidka hore ay baahiso bayaanka shirka, kadibna waxay madaxdu yeelaneysaa kulan casho sharaf ah oo madaxtooyada Galmudug ay u sameyneyso martida shirka.

Shirkaan waxay madaxdu diiradda ku saartay xoreynta dalka iyo xasilinta dhulka laga xoreeyey Khawaarijta Al-Shabaab.

Madaxda ayaa aad u gorfeysay istaraatiijiyadda dowladda dhexe ay masuulka ka tahay ee la doonayo in mudo kooban dalka looga xoreeyo Al-Shabaab.

Xogta ay shirkaan ka heyso Caasimada Online waxay sheegeysaa in markii laga soo tago amniga ay war-murtiyeedka ku jiraan qodobo uu ka mid yahay dagaalka u dhaxeeya Somaliland iyo SSC Khaatumo.

Madaxda ayaa diri doonta baaq ka dhan ah colaada sii xoogeysatay ee Sool ka taagan, waxayna bayaankaan ku bixi doonaan tilmaamo lagu xalin karo colaada Somaliland iyo SSC.

Inta badan bayaanka soo bixi doona caawa waxaa diiradda lagu saari doonaa amniga dalka, maadaama ay hadda dadka iyo dowladda Soomaaliyeed muhiimadda koowaad wada siinayaan dagaalka Al-Shabaab.

Madaxda isugu timid shirkaan ayaa berri ka dhoofi doona Dhuusamareeb, markii laga reebo Madaxweyne Xasan Sheekh iyo Madaxweyne Qoor Qoor oo horay u deganaa Dhuusamareeb.

Xasan Sheekh ayaa Dhuusamareeb ka hoggaaminaya dagaalka Al-Shabaab, taasi waxay sahashay in ciidamada qaranka ay guulo waaweyn ka soo hooyaan furimaha, iyadoo shalay kooxda laga xoreeyey magaaladii ugu weyneed ee gobollada dhexe ay ka joogeen waa Ceelbuur.

Muqdisho (Caasimada Online) – Wasiirka Wasaaradda Qorsheynta, Maalgashiga iyo Horumarinta Dhaqaalaha iyo Wasiir Dowlaha Wasaaradda Shaqada iyo Arrimaha Bulshada ayaa maanta hortegay guddiyada Baarlamaanka Federaalka Soomaaliya.

Guddoomiyaha Guddiga Miisaaniyadda, Maaliyadda, Qorsheynta, Iskaashiga Caalmiga iyo La-xisaabtanka Hay’adaha Dawladda Xil. Maxamed Faarax Nuux ayaa maanta shir-guddoomiyey kulanka guddiga.

Kulankan ayaa ahaa mid Wasiirka Wasaaradda Qorsheynta, Maalgashiga iyo Horumarinta Dhaqaalaha loogu yeeray kulan shaqo taariikhdu markay ahayd Agoosto 20, 2023, sida lagu sheegay bayaan kasoo baxay Baarlamaanka.

Kulankaan zyaa ujeedkiisu ahaa: (1) Warbixin Guud ee Wasaaradda oo dhammeystiran; (2) Warbixin Mashaariicda dalka ka socda kuwa Miisaaniyadda ku jira iyo kuwa aan ku jirin; (3) Warbixin Hay’adda Tira-koobka (Statistics) Qaranka.

Wasiirka iyo howl-wadeennadii la socday oo kala ahaa Agaasimaha Guud ee Wasaaradda; Agaasimaha Guud ee Hay’adda Tira-koobka (Statistics) Qaranka; Agaasimaha Waaxda Horumarinta Dhaqaalaha; Agaasimaha Waaxda Kormeerka iyo Qiimeynta iyo Xalka Waara; Ku-simaha Agaasimaha Waaxda Qorsheynta; Madaxa Mashruucda Barwaaqo; iyo Madaxa Mashruuca SCRP. ayaa mid mid uga warbixiyey shaqooyinka ay Qaran u haayaan.

Ugu dambeyntiina guddoomiyaha guddiga Xil. Maxamed Faarax Nuux ayaa soo xiray Kulanka, ayadoo loo ballamay in Wasaaradda loogu yeeri doono kulan kale oo shaqo iyo Su’aalo weydiin insha Allah.

Dhinaca kale, Guddiga Horumarinta Adeegga Bulshada ee Golaha Shacabka BJFS ayaa maanta yeeshay kulankl muhiim ah, kaasi oo ay shir-guddoominaysay Guddoomiyaha Guddiga Xil. Nadra Saalax Cabdi oo ay wehlinayeen, Guddoomiye Ku-xigeenka Xil. Maxamed Cusmaan Cumar (Naastaro) iyo Xoghayaha Xil.Maxamed Cabdoraxmaan Naddiif.

Ajendaha kulanka ayaa ahaa diyaarinta warbixinta Akhrinta 3aad ee Hindise Sharciyeedka Howlgabka iyo Liiltirka Shaqaalaha Rayidka ee Dowladda.

Ugu horeeyn Wasiir Dowlaha Wasaaradda Shaqada iyo Arrimaha Bulshada Mudane
Yusuf Mohamed Adan oo goobjoog ahaa faah-faahin ka bixiyay qodobo kamid ah hindisahan oo ay xildhibaanada dood ka keeneen akhrintii 2-aad asigoona dul-istaagay dhammaan qodobadaas sharaxaad dheerna ka bixiyay.

Intaa kadib, waxaa la guda galay diyaarinta warbixinta akhrinta 3aad ee Hindise-sharciyeedkan, waxaana qodob qodob loo akhriyay, dhammaan Cutubyada uu ka kooban yahay Hindise-sharciyeedka.

Xildhibaanada Guddiga, ayaa dood dheer iyo ka yeeshay, wax-ka-bedel qodobada qaar, ayagoona doodii Xildhinaanada ee akhrinta 2aad ay ka yeesheen talooyin iyo turxaan bixin ku saabsan sharcigaana ay ku soo biiriyeen si waafaqsan Dastuurka KMG iyo Xeer-hoosaadka Golaha Shacabka BJFS.

Guddoomiyaha Guddiga Xil. Nadra ayaa ugu dambeyntiina ka dhawaajisay inuu hindisahan muhiimad weyn u uleeyahay Shaqaalaha Rayidka ee Dowladda, ayna lagama maar-maan tahay, dardargelintiisa iyo ansixintiisaba.