Ankara (Caasimada Online) – Dowladda Turkey ayaa sheegtay in Soomaaliya iyo Itoobiya ay isku raaceen in ay wsii wadaan wada-hadallada shalay ka dhacay Ankara ee aysan wax natiijo la taaban karo ah ka soo bixin.

Wada-hadallada ayaa si aan toos aheyn u dhex-maray wasiirada arrimaha dibedda labada dal Axmed Macallin iyo Taye Atske Selassie.

Dowladda Soomaaliya ayaa bayaan ay soo saartay ku tiri “Wadahadalka ayaa si weyn loogu kala aragti duwanaa, gaar ahaan Dowladda Soomaaliya oo mawqifkeedii hore ee ahaa in dawladda Ethiopia ay ka noqoto MoU-gii sharcidarrada ahaa ku adkaysatay iyo in aan wax gorgortan laga galeyn ilaalinta madaxbanaanida dhuleed ee dalkeenna oo u ah dowladda Soomaaliya lama taabtaan.”

Wasiirka arrimaha dibedda Turkey Hakan Fidan ayaa sheegay in wada-hadallada aysan aheyn fool ka fool balse labada dhinac ay si kala gooni gooni ah u fadhiyeen oo loo kala dab qaadayey.

“Wasiirradu, iyada oo loo marayo fududaynta Turkiga, waxay awood u yeesheen inay si gooni gooni ah u yeeshaan wada-hadal daacadnimo, niyad sami iyo aragti fog oo ku saabsan khilaafaadkooda iyo sahaminta aragtiyo ku wajahan sidii wax looga qaban lahaa hab la wada aqbali karo,” ayuu yiri wasiirka arrimaha dibedda Hakan Fidan.

“Wasiirrada Soomaaliya iyo Itoobiya ayaa ku celceliyay inay ka go’an tahay in si nabad ah lagu dhammeeyo khilaafaadka, waxayna sheegeen inay ku faraxsan yihiin inay Turkiga fududeeyaan.”

Fidan ayaa sidoo kale sheegay in wasiirrada ay isla garteen in la sii wado wada-hadallada socda si loo xalliyo arrimahooda, loona xaqiijiyo xasilloonida gobolka.

Wasiirada ayaa isku raacay in ay ku kulmaan Ankara 2-da September 2024 si ay u yeeshaan wareeg labaad oo wadahadal ah, sida uu sheegay Fidan.

“Labada dhinacba waxay dadaalkan uga mahad-celiyeen Mudane Recep Tayyip Erdoğan, Madaxweynaha Jamhuuriyadda Turkiga,” ayaa lagu yiri bayaanka.

Inkasta oo Soomaaliya iyo Turkey ay bayaano kasoo saareen wada-hadallada, haddan waxaan weli ka hadal Itoobiya.

Muqdisho (Caasimada Online) – Madaxweynaha Soomaaliya Xasan Sheekh Maxamuud oo caawa khudbad ka jeediyey munaasabad lagu soo gunaanaday dabaal-degyadii toddobaadka xoriyadda ayaa ka hadlay waxa ka jira wadahadaladii la sheegay in dowladda Soomaaliya ay la fureyso Khawaarijta Al-Shabaab.

Madaxweyne Xasan Sheekh ayaa sheegay in aysan jirin habayaraatee wax ay dowladdu kala hadli karto Al-Shabaab, isagoo hoosta ka xariiqay in uusan jirin xal aan aheyn in kooxdaasi ay hubka dhigto oo dowladda isku dhiibto.

“Maalmahaan waxaa baraha bulshada qabsatay dowladdu waxay wadahadal la fureysaa Al-Shabaab, waxaan idiin cadeynaa Shabaab iyo anaga wax naga dhaxeeya ma jiraan,” ayuu yiri Madaxweyne Xasan Sheekh.

Maxaxweynaha Soomaaliya ayaa sheegay in kooxdaas aan la toosi karin, dowladuna aysan u baahneyn, “Hadii ay jiri lahaayeen waxyaabo aan dhihi karno sidaan ayaan rabnaa iyo waxaan ayaan idinka qaldan waa la hadli laheyn, waana hor fariisa laheyn,” ayuu yiri madaxweynuhu.

Madaxweynaha ayaa balanqaaday hadii Soomaali ay wadahadal la fureyso Al-Shabaab oo wax la isla ogyahay kala hadli doonto dowladdu.

“Hadii la helo wax aan isla qirno waan la hadleynaa, laakiin maanta wadahadalna ma jiro wax naga dhexeeyana ma jiraan weli,” ayuu hadalkiisa ku sii daray madaxweyne Xasan Sheekh.

Ugu dambeyntii madaxweynaha ayaa dadka Soomaaliyeed ka codsaday in shakigaas ay ka baxaan, isagoo u cadeeyey in dowladdu aysan kaligeed qaada doonin go’aan hadii ay noqoto in wadahadal lala furo Khawaarijta.

Muqdisho (Caasimada Online) – Dowladdaha Qatar, Imaaraadka Carabta, Sacuudi Carabiya, Kuwait, Yemen iyo Cummaan ayaa dhambaal hambalyo ah soo gaarsiiyay shacabka iyo dowladda Soomaaliya.

Soomaaliya ayaa u dabaal-degaysa xuska munaasabadda 1-da Luulyo oo ku beegan sannad-guuradii 64-aad ee kasoo wareegtay markii gobollada Koonfureed ee dalka ka xoroobeen gumeystihii Talyaaniga, sidoo kalena ay la midoobeen gobollada Waqooyi.

Amiirka dalka Qatar Sheekh Tamim bin Hamad Al Thani ayaa hambalyo ku aadan sanad-guurada xorriyadda dalka usoo diray madaxweyne Xasan Sheekh Maxamuud, isaga oo u rajeeyay dadka Soomaaliyeed nabad iyo barwaaqo.

Sidoo kale, dhambaal kasoo baxay Boqortooyada Bahrain ayaa lagu sheegay in Boqor Xamad Bin Ciisa Al Khaliifa uu la wadaagay madaxweyne Xasan hambalyada munaasabadda 1-da Luulyo ee xornimada gobollada Koonfreed iyo midnimada labada gobol ee Waqooyi iyo Koonfur.

Boqorka ayaa sidoo kale wuxuu u rajeeyay shacabka Soomaaliyeed nabad, barwaaqo iyo xasillooni.

Suldaanka Cummaan, Haitham bin Tariq oo isna kamid ah madaxda carbeed ee maalmaha xoriyadda la qaybsanaya madaxda iyo shacabka Somaaliyeed ayaa dhambaal hambalyo ah usoo diray.

Sidoo kale, madaxweynaha Imaaraadka Carabta Sheekh Maxamed bin Zayed iyo labadiisa ku-xigeen ee Maxamed bin Raashid iyo Sheekh Mansuur bin Zayed ayaa ugu hambalyeeyay umadda Soomaaliya munaasabadda kowada Luulyo iyo sannad guuradii 64-aad ee kasoo wareegtay markii Soomaalidu yeelatay dowlad madax-banaan.

Bayaan kasoo baxay dowladda Yemen oo lagu faafiyay wakaaladda wararka dalkaas ayaa isna waxaa lagu yiri; “ Madaxa Golaha Sare isagoo ku hadlaya magaciisa, kan xubnaha golaha, xukuumadda iyo shacbiga Yemen, waxa uu hambalyo kal iyo laab ah u diraya madaxweyne Xasan, wuxuuna u rajeynaya shacabka Soomaaliya amni, xasilooni iyo barwaaqo.”

Amiirka dalka Kuwait, Sheekh Mishcal Al-Axmed ayaa sidoo kale usoo diray madaxda iyo shacabka Soomaaliyeed fariin hambalyo ah, oo ku aaddan munaasabadda kowada Luulyo.

War-saxaafadeed kasoo baxay Boqortooyada Sacuudi Carabiya ayaa isna waxaa lagu sheegay in Boqor Salmaan bin Cabdicasiis iyo Dhaxal-sugaha dalkaas Maxamed bin Salmaan ay dhambaal hambalyo ah usoo direen madaxweynaha iyo shacabka Soomaaliyeed, kaasi oo lagu muujiiyay in hoggaanka Boqortooyada Sacuudiga ay la qaybsanayaan dadka Soomaaliyeed munaasabadda iyo dabaal-degga maalinta kowda Luulyo.

Muqdisho (Caasimada Online) – Saraakiil sare oo ka tirsan Waaxda Difaaca ee dalka Mareykanka ayaa sheegay in kooxda Al-Shabaab ee Soomaaliya ay xiriir iskaashi la billaabeen kooxda Xuutiyiinta Yemen, si ay isugu dayaan in awoodooda ay ku ballaariyaan Soomaaliya.

Sarkaal sare oo ka tirsan ciidamada difaaca Mareykanka oo codsaday in aanan la magacaabin ayaa sheegay in Al-Shabaab ay la shaqeeyaan Xuutiyiinta, isagoo ku tilmaamay wax la yaab leh oo laga walaaco.

Falanqeeyayaasha ayaa sheegay in Xuutiyiinta, oo ah koox gacan ka hesha dowladda Iran ay doonayso in ay abuurto jiho cusub oo badweynta Hindiya ah oo Al-Shabaab ay ka heli karaan gantaalada casriga ah iyo diyaaradaha aan duuliyaha lahayn.

Haddaba xiriirka iyo iskaashiga la sheegayo inay xuutiyiinta oo shiico ah doonayaan inay la yeeshaan kooxda suniga sheegata ee Al-Shabaab, muxuu uga dhigan yahay Soomaaliya iyo guud ahaan gobolka Geeska Afrika?

Axmed Kaboole oo falanqeeya arrimaha ammaanka ayaa arrintaan uga waramay VOA, isagoo ku sugan dalka Sweden ayuu sheegay in xiriirka Shabaab iyo Xuutiyiinta uu sii kordhinayo weerarada iyo beegsiga ay Shabaab ka wadaan gobolka.

“Al-Shabaab waxay u baahantahay hub casri ah, Xuutiyiinta waa heystaan, sida diyaarado iyo gantaalo halis ah oo Iran iyo saaxiibadooda kale ay ka heleen, hubka ay Xuutiyiintu heli karaan hadii uu gacanta Shabaab galo, caqabad weyn ayey dowladda Soomaaliya ku noqon doontaa,” ayuu yiri.

Sidoo kale falanqeeye Axmed Kaboole ayaa sheegay in Shabaab ay xuudadaha dalka ka gudbi doonaan, hadii ay helaan awood intaan ka badan, “waxaa halis loogu jiraa inay helaan hub casri ah oo ka fiican midka dowladdu heysato, mar kasta oo ay awood teeshaan culeys weyn ayaa soo kordhaya,” ayuu hadalkiisa ku sii daray Axmed Kaboole.

Inkastoo kooxahaan ay kala yihiin Shiico iyo Suni, waxaa xiriirkooda loo sababeynayaa in Shabaab ay aad u rabaan hub casri ah, halka Xuutiyiintu ay daneynayaan inay awood u yeeshaan maamulka Badweynta Hindiya.

Falanqeeye Axmed Kaboole ayaa dowladda Soomaaliya u soo jeediyey inay ka fikirto sidii ay uga hortegi laheyd in xiriirka Shabaab iyo Xutiyiinta uu dhaqan galo, iyadoo kaashaneysa caalamka, sidoo kale wuxuu ku taliyey in badaha Soomaaliya laga difaaco Al-Shabaab, si aysan hub ula soo degin.

 Hoos ka dhageyso wareysiga.

Beledweyne (Caasimada Online) – Waxaa isisoo tareysa murugada uu reebay qaraxii Axadii ka dhacay magaalada Beledweyne ee gobolka Hiiraan, dadkii ku dhintay qaraxaas waxaa ka mid noqday qoys ka koobnaa Hooyo, Aabe iyo Gabadhooda.

Qaraxaas ayaa goor galab ah ka dhacay xaafadda Howlwadaag ee galbeedka magaalada Beledweyne, waxay masuuliyadiisa sheegatay Khawarijta Al-Shabaab, bartilmaameedku wuxuu ahaa xero ay ka guurayeen ciidanka Jabuuti ee Hiil-walaal, balse waxaa fashiliyey oo meel fog uga hortegay ciidanka Ilaalo Qaran ee xoogga dalka oo xeradaas kala wareegay ATMIS.

Aabe Xasan Cabdi Aadan iyo xaaskiisii Muslimo Maxamed waxaa la geeriyootay gabadhooda oo 7 sano jirtay, markii uu qaraxu haleelay waxay ka yimaadeen beer ay ku lahaayeen duleedka magaalada, sida ay Caasimada Online u sheegeen ehellada reerka.

Feylow Cabdi Aadan oo ay walaalo ahaayeen Aabaha reerkii lagu laayey qaraxaas ayaa warbaahinta u sheegay in reerkaas oo ka yimid beertooda oo mararka qaar ay aadi jireen uu haleelay qaraxa ka dhacay xaafadda Howlwadaag ee magaalada Beledweyne.

“Waxa aan tagnay meeshii ay dhibaatadu ka dhacday, runtii waxa ay ahayd wax aan la qiyaasi karin hilbihii ehelkeenna oo googo’ay ayaan Meesha kasoo aruursannay”, ayuu Feylow Cabdi oo BBC uga waramay dhacdadaan xanuunka badan.

Xasan iyo Muslimo waxa ay ifka kaga tageen 7 carruur ah oo kale oo hadda ku sugan magaalada Beledweyne, sida laga soo xigtay walaalkiis Feylow Cabdi oo aad uga walaacsan nolosha carruurta uu adeerka u yahay ee la dilay Aabahood, Hooyadood iyo walaashood.

Beledweyne ayaa lagu tilmaamaa magaalada labaad ee Soomaaliya ugu qaraxyada badan, marar badan oo Shabaab ay qaraxyo ka geysteen magaaladaas, waxay ku xasuuqeen boqolaal qof, kuwaas oo mar kasta loola soo cararo caasimada Muqdisho, maadaama isbitaal weyn oo dadka dhaawacma daryeeli kara uusan ku oolin magaaladaas.

Qaraxii maalin ka hor ka dhacay magaalada waxaa lagu sooratay gaafi Home ama Caasi ah, kaas oo nin naftiisa haligay uu waday, wuxuuna ka dhacay afaafka hore ee xerada ciidamada Jabuuti ku lahaayeen Xaafada Howlwadaag, iyadoo askartii ugu dambeysay ee ciidanka Jabuuti isaga guureen xerada ayuu qaraxu dhacay, waxaana ka hortegay oo fashiliyey ciidanka qaranka Soomaaliya oo u diyaarsanaa inay la wareegaan amniga xeradaas.

Dhuusamareeb (Caasimada Online) – Madaxweynaha Dowlad-goboleedka Galmudug Axmed Cabdi Kaariye(Qoor-Qoor) ayaa maanta la kulmay odayaasha iyo waxgaradka labada beel ee kasoo kala jeeda Xeraale iyo Cabudwaaq ee dhawaan dagaalamay.

Qoor-Qoor ayaa labada dhinac ku bogaadiyay heshiiska horudhaca ah ee ay gaareen, isaggoo kula dardaarmay in si buuxda loo dhammeystiro qaybaha haray heshiiska.

Sidoo kale waxaa goobjoog ka ahaa kulanka xubno ka tirsan baarlamaanka dowladda federaalka, mudanayaal ka tirsan goloyaasha dowlad-goboleedka Galmudug iyo odayaashada labada beel iyo culimaddii garwadeenka ka aheyd heshiiska.

Kulankan ayaa qeyb ka ah bilowga shirka dib u heshiisiin ah oo ay Galmudug u qabaneyso beelaha diriray, si xal kama dambeys ah looga gaaro colaadda.

Qoor-Qoor ayaa dhawaan shaaciyay in la hayo xogta dadkii ka dambeeyay hurinta dagaalka, isaggoo caddeeyay in uusan iska dhicin dagaalka labada beelood ee uu ahaa mid ay ka dambeeyeen siyaasiyiin ka dhex raadinayay dano siyaasadeed, islamarkaana ay hay’addaha ammaanka hayaan caddeymaha dadkii ka shaqeeyay arrinkaasi, lana soo bandhigi doono.

Waxa uu markaas sheegay in waqtiga ku habboon lasoo bandhigi doono dadka uu sheegay inay ka dambeeyeen hurinta colaadda ay ku baxeen dadka badan.

Si kastaba, Dagaal beeleedka gobolka Galgaduud ayaa noqday midkii ugu khasaaraha badanaa, waxaana hal maalin ay beelahaan ay iska dileen in ka badan illaa 50 qof, halka ay iska dhaawaceen ku dhowaad 100 kale, kadib dagaallo ka dhacay waqooyiga Galgaduud.

Gobollada dhexe ee dalka ayaa waxaa muddo dheer ka taagan colaad beeleedyo saameyn ku yeeshay nolosha shacabka, waxaana usii dheer dilal ay isku gaysanayaan beelaha.

Muqdisho (Caasimada Online) – Dowladda federaalka Soomaaliya ayaa dib u dhigtay go’aan ay ku mamnuucday ka ganacsiga iyo isticmaalka bacaha halka mar la isticmaalo.

Wasaaradda deegaanka iyo isbeddelka cimilada Soomaaliya ayaa shaacisay inay muddo saddex bilood dib u dhigtay dhaqan-galka go’aankaasi kadib codsi uga yimid ganacsatada Soomaaliyeed.

Wasaaradda ayaa sheegtay in iyada oo tix-gelinayso codsiga ganacsatada ay qaadatay go’aankan cusub, islamarkaana uu go’aanka mamnuucista bacaha laga dhigay bisha September ee sanadkaan 2024.

“Ganacsatadu waxa ay wasaaradda ka codsadeen in loo kordhiyo wakhtiga maadaam ay heshiisyo ganacsi (contracts) ay horay u galeen, kuwaas oo dhaqaale kaga maqan yahay islamarkaana ay u suurto gali wayday in wakhtiga loo qabtay (30-ka Juun 2024) ay kusoo dhameystaan hawlahaasi,” ayaa lagu yiri war-saxaafadeed kasoo baxay wasaradda deegaanka iyo isbeddelka cimilada Soomaaliya.

Sidoo kale waxay fartay cid kasta oo ay khusayso arrimaha la xiriira bacaha halka mar la isticmaalo inay u hogaansamaan ku dhaqanka wareegtada, ayada oo sheegtay in aan wax ka beddel lagu sameyn qodobaddii horey ugu soo baxday wareegtadi mamnuucista bacaha.

“Wixii ka dambeeya 30 bisha September 2024 waxaa la joojiyay soo dejinta, dhoofinta, soo saaridda, ka ganacsiga iyo isticmaalka bacaha fudud ee halka mar la isticmaalo. Wareegtadu waxa ay si buuxda u dhaqan-galeys 1-da bisha Octoobar 2024.”

Wasaaradda ayaa adkeysay in kadib taariikhda cusub ee ay mudeysan aan laga ganacsan karin bacahaasi, oo guud ahaan la mamnuucay. kahor ay tahay in ganacsatu suuqa uga saaran.

Muqdisho (Caasimada Online) –
Madaxweynaha Soomaaliya Dr. Xasan Sheekh Maxamuud ayaa maanta ka qeyb-galay munaasabadda xuska sannad guurada 64-aad ee xornimada iyo Midnimada dalkeenna.

Madaxweyne Xasan ayaa waxa uu shacabka Soomaaliyeed ugu baaqay in ay xoojiyaan wada-jirkooda, islamarkaana ay xajistaan dhaxalka awooweyaashood.

Madaxweynaha ayaa salaan sharaf kaga qaatay Taalada Daljirka Daahsoon cutubyo ka tirsan ciidamada qalabka sida oo gaardis kusoo maray qaar kamid ah waddooyinka magaalada Muqdisho.

Sidoo kale waxa uu madaxweynaha ubax dhigay Taalada Daljirka, si loo maamuuso halyeeyadii Soomaaliyeed ee naftooda iyo maalkoodaba u huray gobanimada Soomaaliya.

Dabbaal-degga munaasabaddan oo si heer sare ah loo soo agaasimay ayaa waxaa ka qeyb galay diyaaradaha qumaatika u kaco ee ciidamada Cirka.

Waxaa sidoo kale qeyb ka ahaa dabaabadaha iyo gaadiidka dagaalka ee ciidanka xoogga dalka iyo booliska, kuwaas oo soo bandhigay sida ciidamada qalabka sida ee dalkeennu ay ugu diyaarsan yahay difaaca qarankeenna, ilaalinta amniga, midnimada iyo gobanimada dalkeenna.

Waa bandhigii ugu horreeyay ee noociisa oo kale ah oo magaalada Muqdisho lagu qabto tan iyo burburkii dowladdii dhexe kadib, waxayna muujineysa horumarka wayn ee gaartay Soomaaliya.

Hoos ka daawo

Kismaayo (Caasimada Online) – Madaxweynaha Jubbaland Axmed Maxamed Islaam (Axmed Madoobe) oo xalay khudbad ka jeediyay magaalada Kismaayo ee xarunta gobolka Jubbada Hoose ayaa ka hadlay arrimo ku aadan qorshaha bixitaanka ciidamada ATMIS.

Axmed Madoobe ayaa soo dhaweeyay bixista ciidamada howlgalka ATMIS, wuxuuna sheegay inay ku baxayaan jadwal qorsheysan oo ay tahay in loo diyaar garoobo.

“Waxaan ku talinayaa ciidamada ATMIS oo horay loo oran jiray AMISOM oo ku baxaya jadwal qorsheysan inay tijaabo u tahay ciidanka Soomaaliyeed iyo dowladda Soomaaliyeed oo aan u diyaar garowno ATMIS dhulka ay ajendaha iyo jadwalka kaga baxayso inaan la wareegno” ayuu yiri madaxweynaha dowlad goboleedka Jubbaland.

Madaxweyne Axmed Madoobe ayaa dhinaca kale saluug ka muujiyay diyaar garow la’aan uu sheegay inuu jiro, haddii ay baxaan ciidamada ATMIS, wuxuuna sheegay in bixitaankooda uu yahay tijaabo lagu sameynayo dowladda iyo ciidanka Soomaaliyeed.

“Arrintan waa jadwaleysan tahay waa qorshe waxna laga waydiin maayo waa baxayaan jadwal ayayna ku socdaan, annaga diyaar garowgeena wuu liitaa, waana tijaabo oo ay way baxayaan fashilka ka yimaadaa waa mid xukuumadda taabanaya & ciidanka” ayuu raaciyay.

Dhinaca kale waxa uu ka hadlay dagaalka adag ee ka dhanka ah kooxda Al-Shabaab, isaga oo uu ugu baaqay shacabka inay ka qayb-qaataan howlgallada xoreynta ee haatan socda.

“Waxaan rabaa inaan baaq u diro dada ku nool meelaha ay haystaan Al-Shabaab inay u diyaar garoobaan oo ay ka qayb qaataan ololaha Shabaabka lagaga xoreynayo deegaanada ay ku nool yihiin” ayuu mar kale khudbaddiisa ku yiri madaxweynaha maamulka Jubbaland.

Hadalka Axmed Madoobe ayaa imaanaya, ayada oo shalay ciidamada ATMIS ay wareejiyeen saldhig ay ku lahaayeen deegaanka Cabdale Biroole, kaas oo lagu wareejiyay ciidamada daraawiishta Jubbaland iyo kuwa Xoogga dalka Soomaaliyeeda.

Xarunta ay wareejiyeen ciidamada ATMIS ayaa ah tii afaraad, inta uu billowdey wajiga seddexaad ee dhimista Ciidamada ATMIS ee Midowga Afrika.

ATMIS ayaa horay u wareejisay dhowr saldhig oo ku kala yaalla HirShabelle, Koonfur Galbeed iyo Jubbaland, waxaana haatan ka howlgala ciidamada Xoogga dalka.

Muqdisho (Caasimada Online) – Dowladda Federaalka Soomaaliya ayaa markii ugu horreysay maanta diyaarado dagaal oo ay leedahay kusoo bandhigtay magaalada Muqdisho ee caasimada Soomaaliy-, kuwaas oo lagu arkay iyaga oo socda hawada sare ee degmooyinka gobolka Banaadir.

Diyaaradahan ayaa ka qayb-qaadanayo dabaal-degga xuska maalinta kowda Luulyo oo ah markii ay xornimada qaateen Gobollada Koonfureed iyo midowga labadii gobol ee Waqooyi iyo Koonfur ee Jamhuuriyadda Soomaaliya oo maanta ku beegan.

Guddoomiye ku xigeenka amniga iyo siyaasadda gobolka Banaadir, Maxamed Axmed Diiriye (Yabooh) oo warbaahinta kula hadlay fagaaraha uu ka socda badhiga ayaa sheegay in diyaaradaha ay soo iibsatay Soomaaliya ay tahay guul wayn oo ay gaaray dowladda dhexe.

Sidoo kale wuxuu tilmaamay in tani ay tahay farriin cad oo ay direyso Soomaaliya, maadaama ay sameyneyso soo kabasho aad u wayn oo dhanka milatariga ah.

“Markii ugu horeysay diyaarado dagaal oo dalka leeyahay ayaa maanta lagu soo bandhigayaa Taalada Daljirka,f ariin cad ayeyna dirayaan, rumeysta ama ha rumeysanina” ayuu yiri guddoomiye Yabooh.

Waxaa kale oo uu intaasu kusii daray “Kowdii Luulyo ee lasoo dhaafay ma jirin waxa maanta lasoo bandhigaayo dabcan tan soo socotana way ka fiicnaan doontaa”.

Yabooh oo hadalkiisa sii wata ayaa xusay in ay xoogeysaneyso awoodda dowladda Soomaaliyeed, sidoo kalena la dhisay ciidamada Soomaaliyeed oo tayo leh.

“Badhigga diyaaradahan waxa na tuseysaaa awoodda dowladnimada sidoo kalena kor u kacday, ciidamadii qalabka sida oo dhismahoodii uu xoog u socdo” ayuu sii raaciyay.

Bandhigga socda waxaa sidoo kale qayb ka ah gaadiid dagaal oo ay ku jiraan kuwa gaashaman iyo ciidamada sameynayo dhuulatus aad u wayn.

Waa bandhigii ugu horreeyay ee noociisa oo kale ah oo Muqdisho lagu qabto tan iyo burburkii dowladdii dhexe ee kadib, waxayna muujineyaa horumar wayn oo la gaaray

Muqdisho (Caasimada Online) – Magaalada Muqdisho ee caasimada Soomaaliya waxaa maanta ka socda dabaal-deg wayn oo aan caadi ahayn, kaas oo lagu xusayo maalinta kowda Luulyo oo ah markii ay xornimada qaateen Gobollada Koonfureed iyo midowga labadii gobol ee Waqooyi iyo Koonfur ee Jamhuuriyadda Soomaaliya.

Munaasabad lagu xusayo sanad guurada 64-aad ee maalintan qaran ayaa haatan ka socota magaalada Muqdisho, taas oo si heer sare ah loo soo agaasimay.

Sidoo kale waxaa la xiray waddooyinka halbowlaha ah ee caasimada oo lagu soo daadiyay ciidamo fara badan oo ka tirsan kuwa dowladda, kuwaas oo hakad-geliyay dhaq-dhaqaaqa.

Ciidamada ayaa gaadiidka iyo dadka ka celinaya waddooyinka muhiimka ah, si ay u sugaan amniga inta uu socdo dabaal-degga xuska kowda Luulyo.

Waxaa kale oo ay ciidamadu sameynayaan bandhig cajiib ah oo lagu muujinayo qiimaha maalinta xoriyadda dalka, kaas oo ka socda taalada Daljirka Daahsoon ee Muqdisho, waxaana halkaasi lagu arkayaa gaadiidka dagaalka iyo ciidamo oo dhuulatus sameynaya.

Dhinaca kale madaxweynaha  Soomaaliya Mudane Xasan Sheekh Maxamuud ayaa xalay ka qeyb galay Munaasabadda Calan-saarka habeenka 1-da Luuliyo oo ku astaysan 64 sano guurada xornimada Gobollada Koonfureed iyo midowga Labadii Gobol ee Waqooyi iyo Koonfur ee Jamhuuriyadda Soomaaliya.

“Hambalyo Dadka Soomaaliyeed munaasabadda Calan-saarka sannad guurada 64-aad ee ka soo wareegtay markii ay xoroobeen gobollada koonfureed ee dalka iyo midnimadii labada Gobol ee Waqooyi iyo Koonfur, habeenkii xornimada iyo midnimada ee 1-da Luulyo 1960-kii.” ayuu yiri taliyaha Xoogga oo qayb ka ahaa calan saarka xalay ee kowda Luulyo

Munaasabadan waxaa ka horreysay midda 26 June oo iyana horay loogu qabtay magaalada Muqdisho, waxaana sanadkan ay dowladda u diyaar garowday si ka duwan sanadihii hore.