Xudur (Caasimada Online) – Faah-faahinno dheeraad ah aya waxaa laga helayaa howlgal qorsheysan oo maanta ciidamada Xoogga dalka ay ka sameeyeen duleedka degmada Xudur, kaas oo lagu beegsaday horjooge sare oo ka tirsanaa maleeshiyaadka Al-Shabaab.

Howlalka oo si gaar ah uga dhacay deegaanka Abal ayaa waxaa lagu khaarijiyay horjooge Maxamed Cabdi Maxamed Nuur, oo magaciisa khawaarijta uu yahay “Goofoow” sida lagu sheegay qoraal kasoo baxay dowladda Soomaaliya oo lagu daabacay warbaahinta qaranka.

“Howlgalka oo ka dhacay deegaanka Abal, oo qiyaastii 21 kiiloomitir dhanka koonfur bari u jira magaalada Xudur, ayaa lagu beegsaday horjooge Maxamed Cabdi Maxamed Nuur, oo magaciisa khawaarijta uu yahay “Goofoow”. ayaa lagu yiri qoraal kasoo baxay dowladda.

Dowladda ayaa sheegtay in horjoogaha la dilay uu argagixisada u qaabilsanaa deegaanka Abal, uuna yahay maskaxda dambeysa weerarada ay halkaas kasoo abaabusho kooxda.

“Horjoogahan la dilay ayaa ahaa mas’uulka saldhigga kooxda ee deegaanka Abal, wuxuuna ka mid ahaa shaqsiyaadka qorsheeya weerarrada argagaxisada ee lagula kacayay shacabka gobolka Bakool.” ayaa mar kale lagu yiri warsaxaafadeedka.

Sidoo kale, inta uu socday howlgalka ciidamada ayaa ku soo furtay qoraygii iyo boorsadii uu watay horjoogaha la khaarijiyay, taas oo ay ku jireen dukumiintiyo iyo qalab kale oo muhiim ah.

Maalmihii u dambeeyay ciidamada ayaa xoojiyay howlgallada ka socday gobollada Baay iyo Bakool, waxaana ahayd dhawaan markii duleedka Baydhaba lau dilay laba horjooge iyo ilaaladooda oo lagu weeraray aagga deegaanka Deynuunaay oo ka tirsan gobolka Baay.

Howlgalkaas oo isna guuleystay ayaa waxaa lagu dilay horjoogihii dhanka maaliyadda Al-Shabaab ee aaga Daynuunaay oo magaciisa lagu soo gaabiyay Yaxye, afgarashadiisuna ay ahady Abuu Khaalid, sidoo kale waxaa lala dilay ku xigeenkiisii iyo rag kale oo ilaalo u ahaa, kadib markii ay dul tageen ciidamada huwanta ee weerarka qaaday.

Muqdisho (Caasimada Online) – Baarlamaanka Soomaaliya ayaa maanta qaaday tallaabo culus oo la xiriirta dhacdadii Isbitaalka Banaadir oo sababtay isbeddal degdeg ah lagu sameeyo maamulka Isbitaalka, taas oo ka dhalatay hooyadii la dayacay ee ku umushay laamiga, falkaas oo aad looga xumaaday, sidoo kalena dhaliyay caro xooggan

Gudoomiyaha Guddiga Horumarinta Adeegga Bulshada ee Golaha Shacabka Xildhibaan Nadra Saalax Cabdi oo ay wehliyaan Xoghayaha Guddiga Xildhibaan Maxamed Cabdiraxmaan Nadiif iyo Gudi-hoosaadka Caafimaadka ayaa maanta kormeer shaqo ku ragay Isbitaalka hooyada iyo dhallaanka ee Banaadir, waxaana halkaasi kusoo dhoweeyay wasiirka wasaaradda Caafimaadka iyo Daryeelka Bulshada Dr. Cali xaaji Aadan iyo Agaasimaha Guud ee wasaaradda, Dr Guuleed Cabdijaliil.

Ugu horreyn guddiga oo ka daba socda dhibka dhacay ayaa warbixin guud ka dhageystay wasiirka, isagoo aad ugu dheeraaday, dhacdadii dhawaan kad hacday irida hore ee isbitaalka oo hooyo Soomaaliyeed ku hor umushay dhacdadaas oo badashay quluubta umadda Soomaaliyeed, madaxda dalka iyo sidoo kale talaabada uu arinkaas ka qaaday isagoo caddeeyay in masuuliyaddaas isla xisaabtankeedu uu socddo.

Wasiir Cali Xaaji Aadan ayaa guddiga la wadaagay inuu Isbitaalka u diyaarsan yahay qeybaha kala duwan ee lagu Daryeelo Bukaanada, sida Hooyada iyo dhalaanka cudurada guud,qeybta gargaarka degdega ah, nafaqo darida caruurta, iyo qeybta la-tacaalida cudurada HIV iyo Cancer-ka, ayadoo uu qeyb walba oo kamid ah qeybahaasi ay leeyihiin dhaqaatiir si gaar ah ugu taqasustay.

Sidoo kale wuxuu sheegay in ay jiraan caqabado u baahan in la xaliyo oo ay ugu horreeyaan shaqaalaha oo yar iyo bukaanada loo shaqeeyo oo aad u badan sidaasina ay marmarka qaar bukaanaddu ay ku dheeraato shaqadda loo qabanaayo.

Intaasi kadib, Guddiga ayaa kormeeray qeybaha uu ka kooban yahay Isbitaalka iyagoo mid mid u wareystay bukaanada Isbitaalka ku jita.

Ugu dambeyn Gudoomiyaha Guddiga Horumarinta Adeegga Bulshada ee Golaha Shacabka Xildhibaan Nadra Saalax Cabdi ayaa u mahadcelisay kuna dhiiragelisay shaqada wanaagsan ee ay qaranka Soomaaliyeed uhayaan howlwadeenada kala duwan ee ka howlgala isbitaalka, sidoo kalena ay dowr wanaagsan ka qaadan doonaan sidii loo horumarin lahaa, loona dabooli lahaa, baahiyaha kajira Isbitaalka.

Tan iyo markii ay soo shaac baxday dhibaatada ku dhacday hooyada ku hor umushay Isbitaalka Banaadir oo la sheegay in loo diiday gurmad caafimaad oo deg-deg ah ayaa waxaa isa soo tarayay dhaleeceynta loo jeedinayay howlwadeennada Isbitaalka, iyada oo dowladda loogu baaqay inay ka qaado tallaabo deg-deg ah, lana baaro kiiska hooyadaas.

Garoowe (Caasimada Online) – Madaxweyne Ku-xigeenka Dowlad-goboleedka Puntland, ahna haatan ku simaha Madaxweynaha Ilyaas Cismaan Lugatoor oo ay weheliyaan xubo ka tirsan Golaha Wasiirrada ayaa maanta soo saaray qayladhaan culus, kadib xaalad bani’aadanimo oo kasoo korortay maamulkaasi.

Lugatoor ayaa shaaca ka qaaday in Puntland ay soo foodsaartay xaalad abaareed, taasi oo saamaysay ku dhowaad hal milyanoo qof oo ku nool dhammaan gobollada Puntland.

“Mudanayaal iyo Murwooyin, anigoo ah kus-simaha Madaxweynaha ahna Madaxweyne ku-xigeenka Dowladda Puntland Mudane Ilyaas Cismaan Lugatoor, waxaan halkaan ka dirayaa maanta oo ay taariikhu tahay Sabti, 8-da, November, 2025 Qaylo-dhaan ku saabsan in Puntland ay soo food saartay xaalad Abaareed oo aad u darran oo saameysay ku dhawaad hal milyan oo qof, kuwaas oo ku nool qaybo ka mid ah Gobollada ee Mudug, Nugaal, Sool, Cayn, Sanaag, Haylaan, Bari, Karkaar iyo Raasicasayr” ayuu yiri Madaxweyne ku xigeenku.

Puntland ayaa banaanka ah soo saartay ku sheegtay in abaartan ay sabab u tahay isbeddelka cimilada iyo roobabkii oo ku yimid hakad afar xilli oo xiriir ah, taas oo keentay in dhulka intiisa badan uusan helin roob ku filan muddo labo sano ah.

“Abaartan oo aan horay loo arag ayaa ka dhalatay Isbeddellada Cimilada oo sababay in ay yaraadeen roobabkii la filaayey afartii xilli-roobaad ee la soo dhaafay, taas oo ka dhigan in aysan deegaannada Puntland helin roobab ku filan labadiisano ee u danbaysey, sida ku cad saadaasha ay sameeyeen Xarunta Maareynta Khayraadka Biyaha iyo Dhulka Puntland (IMC), Xarunta Maareynta Macluumaadka Biyaha iyo Dhulka Soomaaliya (SWALIM) iyo Xarunta Saadaasha iyo Isbedelka Cimilada IGAD (ICPAC) isla markaana laga soo xigtay Wasaarada Deegaanka iyo isbeddelka Cimilada Puntland ayaa tilmaamaysa in xaddiga roobabka ka da’aya deegaanada Puntland ay ka hoosayndoonaan Min-qiyaaskii caadiga ahaa ee la filaayey xilli-roobaadka Gu’ga iyo Dayrta” ayaa mar kale lagu yiri war-saxaafadeedka.

Sidaa daraadeed, Waxaa xaalad hubanti la’aan cunto iyo biyo soo food-saartay 940,000 oo qof, halka ay ku jiraan iminka 130,000 oo qof xaalad daran oo deg deg ah una baahan in lagaga jawaabo si dhakhso ah. Sida ay muujinayso Xogta la ururiyey in ka badan 310,770 caruur ah oo da’doodu ka yartahay shan (5) sano ayaa la ildaran xaalad nafaqadarro ah, kuwaas oo ku sugan Gobollada Puntland. Sidoo kale, 360,000 oo ka mid ah Barakacayaasha Gudaha oo ku firirsan dhammaan Gobolladda Puntland oo 70% ku tiirsanaa miyiga ayaa wajahaya xaaladda adag, halka 50,000 oo hor leh ay ka soo xeroodeen miyiga, si ay u helaan biyo iyo cunto.

Sidoo kale, waxaa lasii raaciyey “Haddaba, si aan uga jawaabo xaaladda abaarta, waxaan halkaan kaga dhawaaqayaa in ay dhammaan Wasaaradaha, Hay’adaha Caalamig ah iyo kuwa maxaliga ahi ee ay khusayso xaaladda abaartu isugu yimaaddaan shir maalinta Isniinta ah oo ay taariikhdu ku began tahay 10ka November, 2025, subaxdii saddex saac (9:00AM),goobtuna waa hoolka shirarka ee Madaxtooyada.”

Hargeysa (Caasimada Online) – Madaxweynaha Somaliland, Mudane Cabdiraxmaan Maxamed Cabdilaahi (Cirro), oo maanta qaaday tallaabo culus ayaa kormeer shaqo ku tagay xarunta Wasaaradda Duulista Hawada iyo Horumarinta Madaaradaha JSL, halkaasi oo uu kula kulmay Wasiirka iyo Masuuliyiinta sare ee Wasaaradda, isaga oo kala hadlay arrimo xasaasi ah oo ku aadan adeegga e-Visa ee ay soo kordhisay Dowladda Federaalka, waxaana shirka laga soo saaray go’aanno culus oo la xiriira maamulka hawada.

Somaliland ayaa si cad uga cad hortimid qorshaha dowladda Soomaaliya ee ku aadan adeegga eVisa, waxayna ku dooday in iyadu ay maamusho hawadeeda, isla markaana go’aannada kasoo baxa Muqdisho aysan ka shaqeyn doonin magaalada Hargeysa.

Wasiir Fu’aad Axmed Nuux ayaa ugu horreyn Madaxweynaha warbixin faahfaahsan ka siiyey hab-sami-u-socodka hawlaha shaqo ee ka socda Madaarka Egal International Airport iyo tan Wasaaraddaba iyo horumarka lagu sameeyey adeegyada Duulimaadyada iyo bulshada ee Madaarka Caasimadda Hargeysa.

Sidoo kale, Madaxwaynaha waxa uu kormeeray Xarunta Maamulka Hawada Sare (FIC) oo lagu soo xoojiyay qalab cusub oo suurto-galinaya Maamulka Hawada Sare iyo Hagida Diyaaradaha isticmaala marin-haweedka Jamhuuriyadda Somaliland.

Intii uu kormeerka ku guda jiray, Madaxweynaha waxa uu bogaadiyey Wasiirka, Wasiir-ku-xigeenka, Agaasimaha Guud iyo shaqaalaha Wasaaradda Duulista dedaalka ay ku bixiyeen hagaajinta nidaamka hawada dalka, casriyeynta madaarrada iyo tayeynta adeegyada duulimaadyada, isaga oo xusay in Duulista Hawadu tahay mid ka mid ah laf-dhabarta isku xidhka dalka iyo sumcadda Qaranka ee caalamka.

Dhanka kale, Cabdiraxmaan Cirro ayaa sheegay in Xukuumaddiisu ay mudnaan gaar ah siinayso ilaalinta Madaxbannaanida Hawada Dalka iyo in la dhiso awood farsamo iyo mid maamul oo buuxda, si Somaliland ay si rasmi ah ugu maamusho hawadeeda.

Kormeerka kadib, Madaxweynuhu waxa uu Shir-guddoomiyey Shirka Heer Qaran ee Maamulka Hawada Jamhuuriyadda Somaliland (𝗦𝗼𝗺𝗮𝗹𝗶𝗹𝗮𝗻𝗱 𝗔𝗶𝗿𝘀𝗽𝗮𝗰𝗲 𝗠𝗮𝗻𝗮𝗴𝗲𝗺𝗲𝗻𝘁 𝗛𝗶𝗴𝗵-𝗟𝗲𝘃𝗲𝗹 𝗖𝗼𝗼𝗿𝗱𝗶𝗻𝗮𝘁𝗶𝗼𝗻 𝗠𝗲𝗲𝘁𝗶𝗻𝗴), kaasi oo lagaga arrin-sanayey arrimo muhiim ah oo la xidhiidha Maamulka iyo Madax-bannaanida Hawada Somaliland, amniga Duulimaadyada, iyo arrinta e-Visa-ha iyo qaabka ugu habboon ee loo horumarin karo nidaamka isgaadhsiinta hawada iyo maamulka Duulimaadyada Caalamiga ah.

Maamulka, maaraynta iyo ka soo talo bixinta arrinta Hawada Sare ee Jamhuuriyadda Somaliland Madaxweynuhu waxa uu u xil saaray Guddi ka kooban WASIIRADDA Duulista Hawada sare iyo Horumarinta Madaaradda, Arrimaha Gudaha iyo Amniga Qaranka, Madaxtooyada, Gaashaan-Dhigga iyo Difaaca Qaranka, iyo Garyaqaanka Madaxweynaha.

Shirkaasi waxa laga soo saaray BAYAAN ama WAR MURTIYEED adag oo lagu xaqiijinayo Maamulka Hawada Sare ee Somaliland. Qodobbada Bayaankana waxa ka mid ahaa:

1. Xukuumadda Jamhuuriyadda Somaliland waxa ay bulshada Caalamka u caddaynaysaa in Maamulka, Madax-bannaanida iyo Bad-qabka Hawada (Airspace Sovereignty and Safety) ay Somaliland leedahay Hawada Cirka, Dhulka iyo Badda, oggolaanshaha isticmaalkeedana laga qaadan karo oo kaliya Wasaaradda Duulista Hawada iyo Horumarinta Madaaradda ee Somaliland, si waafaqsan Shuruucda Qaranka JSL iyo kuwa Caalamiga ah.

2. Jamhuuriyadda Somaliland waxa ay cadaynaysaa in dal-ku-galka ay dhawaan soo saartay Somaliya ee loo yaqaano e-Visa aanu haba yaraatee khusaynin Jamhuuriyadda Somaliland, isla markaana aan dalkeeda lagu soo gali karin (Disapproval of Somalia’s unlawful eVisa).

3. Laga bilaabo November 10th, 2025, dhammaan Diyaaradaha isticmaala Hawada Sare ee JSL waa in ay haystaan oggolaanshaha isticmaalka Hawada Somaliland, kaasi oo laga qaadanayo Wasaaradda Duulista Hawada iyo Horumarinta Madaaradda JSL

4. Jamhuuriyadda Somaliland waxa ay Beesha Caalamka, (International Appeal) Hay’addaha Caalamiga ah (International Aviation Authorities), Wadaagayaasha Adeegyada Diyaaradaha iyo Duulimaadyada (ICAO, IATA), Qaramada Midoobay ugu baaqaysaa in ay ku baraarugaan dhibaatada ka soo socota Hawada Somaliland iyo Somalia, iyo tallaabooyinka khaldan ee ay qaaday Xukuumadda Somalia, taasi oo ay ku khal-khal gelinayso Maamulka Hawada Sare ee Somaliland, taasoo khatar weyn ku ah Duulimaadyada Ray’idka ah.

Ugu dambayntii, Madaxweynaha Jamhuuriyadda Somaliland ayaa si cad u sheegay in Somaliland aanay cidna u daba fadhiisanayn Maamulka iyo Maaraynta Hawadeeda Sare, isaga oo hoosta ka xarriiqay in maamulka Hawada Somaliland ay tahay qadiyad Qaran iyo Astaanta Madaxbannaanida Somaliland.

Ankara (Caasimada Online) – Akadeemiyadda Sirdoonka Qaranka ee Türkiye (MIA) ayaa soo saaray warbixin dhammaystiran oo falanqeynaysa iskaashiga kobcaya ee dalkaas kala dhexeeyey Soomaaliya 15-kii sano ee la soo dhaafay, iyadoo ku tilmaantay “hab iskaashi oo dhinacyo badan leh.”

Warbixintan oo ka kooban 111 bog, ciwaankeeduna yahay “Xiriirka Türkiye iyo Soomaaliya: Hab Iskaashi oo Dhinacyo Badan Leh,” ayaa ku billaabanaysa hordhac uu qoray madaxa MIA, Talha Köse, waxayna xambaarsan tahay falanqeyn ballaaran oo lagu kabay jaantusyo, garaafyo iyo sawirro.

Daraasaddan, oo u qaybsan siddeed cutub iyo gebagebo, ayaa lagu eegayaa xaaladaha siyaasadeed iyo kuwa dhaqaale ee Soomaaliya, aasaaska taariikhiga ah ee xiriirka labada dal oo salka ku haya dhaxalkii Cusmaaniyiinta, iyo heerar muhiim ah oo laga soo maray is-dhexgalka diblomaasiyadeed.

Sida ay warbixintu xustay, ka qaybqaadashada ballaaran ee Türkiye waxay ku bilaabatay booqashadii taariikhiga ahayd ee Madaxweyne Recep Tayyip Erdoğan uu Muqdisho ku tagay sanadkii 2011, taasoo xiriirka ka wareejisay gargaar bini’aadannimo una beddeshay iskaashi istiraatiiji ah oo dhinacyo kala duwan leh, oo ay ku jiraan difaaca, tamarta, caafimaadka iyo waxbarashada.

Saldhigga Tababarka Millateriga ee TÜRKSOM, oo tababarro bixinayay tan iyo 2017, waxaa lagu tababaray kumanaan askari oo Soomaali ah si ay gacan uga geystaan amniga iyo xasilloonida dalka. Taageerada la-talinta millateri ee Türkiye, is-dhaafsiga sirdoonka, iyo kaalmada dhanka qalabka ayaa si toos ah u xoojiyay madax-bannaanida Soomaaliya.

Dhanka kale, laga soo bilaabo 2012 iyadoo la raacayo heshiisyo iskaashi oo laba geesood ah iyo kuwo amni, Akadeemiyadda Booliska ee Türkiye iyo Akadeemiyadda Jandarimariga iyo Ilaalada Xeebaha ayaa sidoo kale aqbalay arday ka socota Soomaaliya oo dhigata heerarka koowaad iyo labaad ee waxbarashada sare.

Sanadkii 2024, heshiis qaab-dhismeed cusub, Shirkadda Shidaalka ee Turkish Petroleum Corporation (TPAO) waxay sahminta shidaalka iyo gaaska ka bilowday saddex xirmo oo badda ku yaal.

Sidoo kale, waxaa la horumarinayaa mashaariic koronto oo isku-dhaf ah (cadceed iyo naafto) iyadoo la helayo taageero farsamo oo Turkiga ah si loo xoojiyo sugnaanta tamarta Soomaaliya. Is-afgarad la kala saxiixday 2018 ayaa sidoo kale siiyay maraakiibta Turkiga xuquuq sharci ah oo ay kaga kalluumaystaan biyaha Soomaaliya, taasoo dhanka badaha u beddeshay goob iskaashi oo “dhaqaale buluug ah”.

Hay’adaha horumarinta, oo ay ku jiraan Hay’adda Iskaashiga iyo Isku-dubbaridka Turkiga (TIKA), Maamulka Masiibooyinka iyo Gurmadka Degdegga ah (AFAD), Bisha Cas ee Turkiga (Kızılay), Madaxtooyada Dadka Turkida ah ee Dibadda iyo Jaaliyadaha la Xiriira (YTB), Machadka Yunus Emre (YEE) iyo Mu’asasada Maarif ee Türkiye, ayaa isku dubariday dadaallo dhinacyada daryeelka caafimaadka, waxbarashada iyo kaabayaasha.

Waxaa arrimahaas ka mid ah Cisbitaalka Waxbarashada iyo Cilmi-baarista ee Erdoğan iyo dib-u-dhiska garoonka diyaaradaha Muqdisho iyo dhismaha Baarlamaanka.

Warbixinta ayaa sidoo kale ku ammaanaysa dadaallada diblomaasiyadeed ee Türkiye, gaar ahaan “Baaqa Ankara,” inuu xalliyay xiisaddii Ethiopia iyo Soomaaliya ee horraantii sanadkan, taasoo adkeynaysa doorka Ankara ee ah xasiilye goboleed.

Baaqa Ankara wuxuu ka dhashay wadahadallo ay dhex-dhexaadisay Türkiye oo uu hoggaaminayay Madaxweyne Recep Tayyip Erdoğan.

Xiriirka u dhexeeya Ethiopia iyo Soomaaliya ayaa sii xumaaday tan iyo markii ay Ethiopia heshiis la gashay gobolka gooni-u-goosadka ah ee Somaliland bishii Janaayo 2024. Si kastaba ha ahaatee, doorka Türkiye ee xoojinta wada-hadalka labada dal ee Afrikaanka ah ayaa abuuray jawi horseedi kara is-faham, waxaana ka dhashay nabad waarta oo gobolka ka hirgasha.

Hargeysa (Caasimada Online)  – Xukuumadda Somaliland ayaa maanta soo saartay warbixinta todobaadlaha ee looga hadlo xaaladda guud ee maamulkaasi, gaar ahaan dhacdooyinkii ugu dambeeyay.

Warbixinta oo ka kooban 18 qodob ayaa waxaa looga hadlay waxqabadka xukuumadda ee todobaadkii lasoo dhaafay, taas oo ay mar kasta shaaciso wasaaradda warfaafinta Somaliland.

Halkan hoose ka akhriso qodobada:-

1, Fadhigii 40-aad ee Shirka Golaha Wasiirrada Jammhuuriyadda Somaliland oo uu Shir-gudoominayey Madaxweynaha Jamhuuriyadda Somaliland Mudane Cabdiraxmaan Maxamed Cabdilaahi (Cirro), isla markaana uu wehelinayey Madaxweyne ku-xigeenka Jamhuuriyadda Somaliland Mudane Maxamed Cali Aw Cabdi ayaa ka qabsoomay Qasriga Madaxtooyada Somaliland kaas oo lagaga hadlay 11 qodob oo muhiim ah.

2, Madaxweynaha Jamhuuriyadda Somaliland, Mudane Cabdiraxmaan Maxamed Cabdilaahi (Cirro), ayaa ka qayb galay Shirweynaha Maalgashiga Somaliland, oo lagu qabtay Hotel Sarovar Premier Caasimadda Hargeysa, kaas oo socon doona muddo laba cisho ah, waxaana la isu keenay maalgashadayaal ka kala yimid 23 dal dal oo ay igu mudan yihiin Waddammada Geeska Afrika.

3,Madaxweynaha Jamhuuriyadda Somaliland, Mudane Cabdiraxmaan Maxamed Cabdilaahi (Cirro) ayaa Qasriga Madaxtooyada ku qaabilay Qunsulka Guud (Consul General) ee Dawladda Turkiga u qaabilsan Somaliland, Mudane Ozan PEKIN iyo ku-xigeenkiisa, Mudane Anil Koray KOCAMAN.

4,Madaxweynaha Jamhuuriyadda Somaliland,Mudane Cabdiraxmaan Maxamed Cabdilaahi (Cirro), ayaa ka qayb-galay Xuska Sannad-guurada 32-aad ee Aasaaska Ciidanka Booliska Somaliland, Munaasibaddan oo lagu qabtay Hoolka weyn ee Ciidanka Booliska ee magaalada Hargeysa.

5,Madaxweynaha Jamhuuriyadda Somaliland, Mudane Cabdiraxmaan Maxamed Cabdilaahi (Cirro) ayaa guddoonsiiyey Abaalmarinta Qaranka ee Hal-abuurka Teknoolajiyadda ICT-ga ardaydii tartamayaasha ahaa ee ku guulaystay sannadka 2025-ka, kuwaasi oo soo bandhigay fikrado iyo hal-abuur cusub oo la xidhiidha aqoonta casriga ah ee ICT-ga.

6,Wasiirka Ganacsiga iyo Dalxiiska JSL Md Cabdirahman Nuur ayaa Xafiiskiisa ku qaabilay wefti ka socday Hay’adda Expertise France.

7,Agaasimaha Wacyigalinta Komishanka xakameynta HIV/Aids-ka Barkhad Geeddi ayaa sheegay in bulshadu u baahan tahay wacyigalin joogto ah iyo in dadka la nool xanuunka HIV/AIDs-ka la siiyo daryeel gooni ah.

8,Agaasimaha Guud ee Wasaaradda Horumarinta Caafimaadka Jamhuuriyadda Somaliland, Dr. Axmed Maxamuud Jaamac, ayaa kulan muhiim ah la qaatay madaxda tallaalka heer gobol ee Wasaaradda.

9,Xukuumadda Jamhuuriyadda Somaliland ayaa ku dhawaaqday go’aanno waaweyn oo qayb ka ah dadaallada lagu yareynayo qiimaha shidaalka korontada, wakaaladaha biyaha iyo warshadaha wax-soo-saarka, taasi oo la sheegay inay tahay tallaabo taariikhi ah oo lagu dhaqan gelinayo ballan-qaadkii Madaxweynaha ee xilligii ololaha doorashada.

10,Xukuumadda Somaliland ayaa qasriga madaxtooyadda ee dalka looga taliyi kulan balaadhan kula yeelatay qeybaha bahda suugaanta iyo fanka ee dalka Somaliland .

11,Agaasimha Guud Ee Wasaaradda Kaluumaysiga iyo Khayraadka Badda JSL ,Mudane,Liibaan Maxamuud Diiriye ayaa xafiiskiisa ku qaabilay madax ka socotay hay’adda UNDP.

12,Agaasimaha Guud ee Wasaaradda Qorshaynta iyo Horumarinta Qaranka Md Maxamed Siciid Maxamuud ayaa xafiiskiisa ku qaabilay wefti ka socday Hay’adda UNDP oo ay hoggaaminaysay Ms. Luna Nagatomo.

13,Wasiirka Wasaaradda Dawladaha Hoose iyo Horuumarinta Magaalooyinka JSL Mudane Xasan Axmed Ducaale (Macalin), ayaa Casuumad ku maamuusay qaar ka mid ah hal doorka Haweenka Xisbiga Talada haya ee Wadani.

14,Wasiirka wasaaradda Warfaafinta dhaqanka iyo wacyigalinta ahna af hayeenka xukuumadda Axmed Yasin Sheikh Cali Ayaanle ayaa qado-sharaf ku casuumay shaqaalaha wasaaradda ee sanadkan soo baxay Jaamacadaha dalka.

15,Wasaaradda Tamarta iyo Macdanta Somaliland waxay soo saartay wareegto cusub oo lagu dhimayo qiimaha korontadda dalka laga bilaabo December 2025.

16,Wasaaradda Qorshaynta iyo Horumarinta Qaranka ayaa magaalada Hargeysa ku qabatay kulan muhiim ah oo lagu soo bandhigay natiijooyinka ka soo baxay qiimayn iyo dib-u-eegis lagu sameeyey kala badhka (Mid-Term Review) ee Qorshaha Horumarinta Qaranka Saddexaad (NDP III), gaar ahaan Wadaagaha Maamul-wanaaga.

17,Agaasimaha Fullinta Sanduuqa Horrumarinta Dhallinyaradda Somaliland Muddane Cabdiqaadir ismail Ahmed Jaylaani ayaa booqday Qatar Fund for Development (QFFD) iyo Qatar Charity, isagoo matalaya Somaliland Youth Development Fund (SLYDF). Ujeeddada kulanka ayaa ahayd in laga wada hadlo fursadaha iskaashi ee lagu horumarin karo dhalinyarada Somaliland, gaar ahaan dhinacyada maalgelinta, xirfadaha, iyo kobcinta ganacsiyada yaryar ee ay dhalinyaradu hayaan.

18,Xukuumadda Somaliland ayaa isu soo bax lagu taageerayo nabada gobolka Sanaag ku qabtay fagaaraha kheyridda magaaladda Hargeysa taas oo ay kazoo qeyb galeen kumanaan kun oo ka mida dhalinayarada ku nool caasimadda Hargeysa iyo kuwo goboladda dalka uga yimi isu soo baxaasi.

𝐖𝐚𝐱𝐚 𝐬𝐨𝐨 𝐮𝐫𝐮𝐫𝐢𝐲𝐚𝐲 𝐱𝐚𝐟𝐢𝐢𝐬𝐤𝐚 𝐥𝐚 𝐬𝐨𝐜𝐨𝐝𝐤𝐚 𝐰𝐚𝐫𝐚𝐫𝐤𝐚 𝐞𝐞 𝐰𝐚𝐤𝐚𝐚𝐥𝐚𝐝𝐝𝐚 𝐰𝐚𝐫𝐚𝐫𝐤𝐚 𝐞𝐞 𝐒𝐎𝐋𝐍𝐀

Muqdisho (Caasimada Online) – Ciidamo ka tirsan howlgalka la dagaallanka burcad-badeedda ee Midowga Yurub ayaa gaaray markabka shidaalka qaada ee Hellas Aphrodite, ee sitay calanka Malta, kaasoo ay burcad-badeed ka qabsadeen meel ka baxsan xeebaha Soomaaliya Khamiistii, sida uu sheegay howlgalka badda ee Midowga Yurub ee Operation Atalanta.

Howlgalka Operation Atalanta ayaa bayaan uu soo saaray Jimcihii ku sheegay in dhammaan 24-kii qof ee shaqaalaha ahaa ay badqabaan, isla markaana aan la soo sheegin wax dhaawac ah.

Howlgalka ayaa sheegay in “awood muujin degdeg ah” oo uu sameeyay markabka ESPS Victoria ay ku dhiirrigelisay burcad-badeeddii inay ka cararaan markabka, iyadoo aan faahfaahin dheeraad ah laga bixin. Howlgalka waxaa ka qayb qaatay diyaarad helicopter ah, diyaarad drone ah, iyo diyaarad kale oo la socotay markabka dagaalka (frigate).

“Qiimaynta khatarta ee aagga ku xeeran dhacdadu waxay weli tahay mid culus,” ayuu ka digay Operation Atalanta.

“Markabkii hooyada ahaa iyo burcad-badeeddii weli waxay ku sugan yihiin aagga. Waxaa socda howlgal wadajir ah oo la isku dubariday oo lagu doonayo in lagu hor-istaago doonnida (dhow) ee weerarkan loo adeegsaday.”

Xogta lagula socday dhaqdhaqaaqa markabka ayaa muujisay inuu xeebaha Soomaaliya u jiray in ka badan 1,000km (620 mayl), sida ay sheegtay wakaaladda wararka ee The Associated Press.

Shirkadda amniga ee gaarka loo leeyahay ee Ambrey ayaa sheegtay in weerarkii Khamiista ay u muuqatay in ay fuliyeen isla kooxdii burcad-badeedda Soomaalida ahayd ee dhowaan qabsatay doon kalluumeysi oo Iraani ah, taasoo ay markii dambe u adeegsanayeen saldhig ay ka fuliyaan howlgalladooda.

Xilli ay ciidamada badda ee Midowga Yurub u dhowaanayeen Hellas Aphrodite Jimcihii, ayay xarunta Hawlgallada Ganacsiga Badda ee militariga Britain (UK Maritime Trade Operations centre – UKMTO) sheegtay in markab kale ay si guul-darraysatay u beegsadeen burcad-badeed isla Jimcihii.

Digniin lagu daabacay barta X, ayay UKMTO, oo ku boorrisay maraakiibta aagga inay “si taxaddar leh u maraan”, waxay sheegtay in kabtanka markab sida gaaska dabiiciga ah ee dareeraha ah uu soo sheegay in doon ay ka soo dhowaatay dhinaciisa dambe, isagoo jooga meel 528 mayl-badeed (oo u dhiganta qiyaastii 980km) koonfur-bari ka xigta Eyl, Soomaaliya.

“Doonta yar waxay markabka ku soo ridday hub fudud iyo qoryaha garabka laga tuuro (RPGs),” ayay tiri UKMTO, oo xustay in markabka weyn uu ku baxsaday kaddib markii uu xawaaraha kordhiyay.

Kaddib markii ay burcad-badeedda ka baxsan xeebaha Soomaaliya gaartay meeshii ugu sarraysay sannadkii 2011, oo la diiwaangeliyay 237 weerar, ayay khatartu hoos u dhacday taasoo ay sabab u ahayd kormeerka maraakiibta caalamiga ah iyo xoojinta dowladda Soomaaliya.

Si kastaba ha ahaatee, waxaa jiray tiro dhacdooyin burcad-badeednimo ah oo gobolka ka dhacay sannadkii la soo dhaafay.

Sannadkii 2024, waxaa jiray toddobo dhacdo oo laga soo sheegay xeebaha Soomaaliya, sida uu sheegay Xafiiska Caalamiga ah ee Badaha (International Maritime Bureau). Sannadkan gudihiisa, burcad-badeed Soomaali ah ayaa qabsatay doonyo kalluumeysi oo dhowr ah.

Markabka Hellas Aphrodite ayaa noqonaya markabkii ganacsi ee ugu horreeyay ee ay burcad-badeed ka qafaashaan xeebaha Soomaaliya tan iyo bishii May 2024.

Belem (Caasimada Online) – Ra’iisul Wasaare ku xigeenka xukuumadda Soomaaliya, Mudane Saalax Axmed Jaamac iyo wafdi uu hoggaaminayo ayaa maanta ka qeyb-galay shirka COP30 ee isbeddelka cimilada oo ka dhacay magaalada Belem ee dalka Brazil.

Wafdiga Soomaaliya oo ka kooban madaxda dowladda, bulshada rayidka, dhalinyarada, haweenka iyo khubarada Isbeddalka Cimillada, ayaa matalaya codka iyo aragtida Soomaaliya ee ku aaddan la-tacaalidda isbeddelka cimilada iyo xoojinta adkeysiga bulshooyinka ee ay saameeyeen abaaraha iyo nabaadguurka.

Saalax oo khudbad ka jeediyay madasha ayaa adkeeyay baahida loo qabo in tallaabo degdeg ah oo caalami ah la qaado si loo yareeyo saameynta isbeddelka cimilada.

Sidoo kale wuxuu sheegay  in Soomaaliya ay ka mid tahay dalalka ugu nugul isbeddelka cimilada, islamarkaana ay abaaro soo laab-laabtay ka dhaceen, iyada oo aan qeyb ka ahayn wasakhowga hawada.

Ra’iisul wasaare ku xigeenka dalka oo hadalkiisa sii wata ayaa carrabaabay qorshaha Soomaaliya ee NDC iyo Qorshaha La-qabsiga Cimilada, oo qayb ka ah Qorshaha Isbeddelka Qaranka (NTP 2025–2029), kaas oo diiradda saaraya afar qodob: la-qabsiga, maalgelinta cimilada, khasaaraha iyo magdhowga, iyo isbeddelka tamarta nadiifta ah.

Wadaa kale oo uu la wadaagay shirka sida ay muhiim u tahay in la iska kaashado la tacaalidda iyo wax ka qabashada khasaaraha isbeddelka cimilada.

Dhankooda, madaxda kala duwan ee ka qayb-galay shirka COP30 ayaa soo jeediyay in la qaado tallaabo degdeg ah oo caalami ah, si loo yareeyo saameynta isbeddelka cimilada ee adduunka.

Si kastaba, Ka qaybgalka Soomaaliya ee COP30 wuxuu muujinayaa sida dalka ugu heellan yahay Wax-ka qabashada Isbeddalka Cimillada, ka qaybgalka doodaha caalamiga ah, iyo raadinta xalal waara oo wax ka qabta caqabadaha cimilada.

Addis Ababa (Caasimada Online) – Doodda muddada dheer ka taagnayd lahaanshaha magaalada Diridhabe ayaa mar kale soo cusboonaatay kaddib hadal uu dhawaan jeediyay Ra’iisul Wasaaraha Itoobiya, Abiy Axmed.

Abiy oo dhawaan khudbad ka jeediyay fadhiga baarlamaanka Itoobiya ayaa sheegay in “sida ku cad dastuurka,” magaalada Diridhabe ay ka tirsanayd gobolka Oromada.

Hadalkaas ayaa sababay fal-celin weyn, iyadoo bulshada Soomaalida iyo Oromada ay si xooggan ugu kala aragti duwanaadeen arrintaas.

Muuqaallo iyo qoraallo badan oo baraha bulshada lagu faafiyay ayaa muujiyay dareen adag iyo dood hor leh oo ka dhalatay hadalka ra’iisul wasaaraha.

Doodda lahaanshaha magaalada ee u dhaxeysa qowmiyadaha Oromada iyo Soomaalida, oo marar kala duwan soo noq-noqotay ayaa haatan markale sii xoogeystay.

Halkee ayuu salka ku haya murankan?

Diridhabe waxaa la rumeysan yahay in la aas-aasay qiyaastii sannadkii 1902, xilligii Boqor Minilik uu dhisay tareenka isku xira Addis Ababa iyo Jabuuti.

Magaaladaas oo markii hore loo bixiyay magaca Hararta Cusub ayaa si dhakhso ah u kortay, una noqotay xarun ganacsi oo muhiim ah oo ay degaan qowmiyado kala duwan, oo ay ku jiraan Itoobiyaan, Carab, Faransiis iyo Giriig.

Markii uu dhismaha tareenka dhammaaday, Diridhabe waxay noqotay meel isku xirta ganacsiga gudaha iyo dibadda dalka, taasoo ka dhigtay magaalo dhaqaale ahaan muhiim ah.

Su’aasha ah cidda ay magaaladu ka tirsan tahay ayaa la sheegay inay soo bilaabatay xilligii dowladdii Dimuqraadiga ee Kacaanka Ummadda Itoobiya, iyadoo dooddu salka ku hayso macnaha magaca “Diridhabe” iyo cidda asal ahaan deganeyd.

Cilmi-baaris uu sameeyay Dr. Darajjee Fayyisaa sannadkii 2018-kii ayaa tilmaantay in intii u dhaxeysay 1991 ilaa 1993, Diridhabe ay ka tirsaneyd Oromiya, isla markaana ay maamulayeen xubno ka tirsan Ururka Dimuqraadiga ee Dadka Oromo.

Hase yeeshee, xisbigii Soomaalida ee u halgamayay xuquuqda qowmiyadaha Ciise iyo Gurgure ayaa si cad uga hor yimid sheegashadaas.

Cilmi-baaristu waxay muujisay in markii la dhisay Dawlad-Deegaanka Soomaalida sannadkii 1993, Diridhabe loo aqoonsaday inay tahay caasimadda deegaankaas, balse arrintaas aysan meel cad ka gaarin dowladda dhexe.

Si looga fogaado muranka joogtada ah ee labada dhinac, dowladda federaalka ayaa go’aamisay in magaalada si ku-meel-gaadh ah u hoos tagto maamulka dhexe.

Sannadkii 2004-tii ayaa la ansixiyay Dastuurka Maamulka Magaalada Diridhabe (Xeer Lambar 416/2004), kaas oo dhigaya in magaalada ay si iskeed isku maamuli karto ilaa xal rasmi ah laga gaarayo arrintaan.

Sida uu xeerku dhigay, maamulka magaalada waxaa wada maamula golaha deegaanka iyo dowladda federaalka, iyadoo xilka duqa magaalada la isku wareejiyo shantii sanoba mar si ay labada dhinac u helaan matalaad siman.

Sidoo kale, cilmi-baaris uu 2017-kii qoray Balaw Warquu ayaa tilmaantay in nidaamka awood-qaybsiga ee Diridhabe uu yareeyay tartankii siyaasadeed, balse uu abuuray xaalad siyaasadeed oo aan si buuxda loo xallin.

Nidaamka maamulka magaalada lagu dhisay ayaa qareennada qaar ay qabaan in uusan si buuxda ula jaanqaadayn dastuurka dalka, taas oo keentay su’aalo iyo muran joogto ah oo ku saabsan sharciyadda maamulka Diridhabe.

Boosaaso (Caasimada Online) – Koox Soomaali ah oo shalay qabsatay markabka Hellas Aphrodite ayaa hadda la xaqiijiyay inay isaga degeen markabka.

Kooxda ayaa ka degtay markabka kadib markii ay ku guul-darreysteen inay furaan albaabada ay isku xireen 24 shaqaale ah oo markabka la socday, kuwaas oo isku soo xiray qolal amni ah.

Warar maxalli ah ayaa sheegaya in mid ka mid ah kooxdan uu ku dhaawacmay rasaas ay isku dayayeen inay ku furaan albaabada qolalka ay isku xireen shaqaalaha, taas oo dib ugu soo laabatay dhankooda.

Howl-galka ATALANTA ee ka hortagga weerarrada burcad-badeedda ayaa sidoo kale xaqiijiyay in kooxda markabka qabsatay ay isaga degeen si iskood ah, ayna badqabaan dhammaan shaqaalaha markabka Hellas Aphrodite.

Si kastaba, howl-galka ayaa ka digay in kooxdan ay adeegsanayaan doonyo awood u leh inay gaaraan meelo ka baxsan biyaha caalamiga ah, taas oo suuragal ka dhigaysa inay weerarro kale fuliyaan.

Markabka ay kooxdu isaga degtay, oo ku safrayay calanka jasiiradda Malta ayaa siday shidaal uu ka soo qaaday Hindiya, wuxuuna u waday dalka Koonfur Afrika.

Weerarka ayaa dhacay xilli uu markabku marayay meel qiyaastii 1,000KM u jirta xeebaha Soomaaliya. Goobtan ayaa hore loogu diiwaangelin weerarro noocan oo kale ah, maadaama ay aad uga fog tahay biyaha Soomaaliya oo la tixgeliyo inay khatar yihiin.

Dhacdadii ugu dambeysay ee la barbar dhigi karo ee markab la koray oo gobolka ka dhacday waxay ahayd bishii May 2024, markaasoo burcad-badeed la tuhunsan yahay ay koreen markabka Basilisk ee sita calanka Liberia, oo joogay meel qiyaastii 380 mayl-badeed bari ka xigta Muqdisho.

Ciidanka badda ee Midowga Yurub ayaa markii dambe soo badbaadiyay 17-kii xubnood ee shaqaalaha ka dib markii ay xarig ugu degeen markabkaas.

Maalintii Isniinta, dhacdadii ugu horreysay ee lala xiriiriyo burcad-badeed Soomaali ah oo nooceeda ah tan iyo 2024, ayaa dabley hubeysan waxay weerareen booyad ganacsi oo ku sugnayd meel ka baxsan xeebta u dhow caasimadda Muqdisho, iyagoo rasaas ku furay markabka kaddib markii ay isku dayeen inay koraan, sida ay sheegeen ilo dhinaca badda ah.

Ilo ku xeel dheer amniga badda ayaa sheegay in burcad-badeeddu ay toddobaadkan sidoo kale la wareegeen doon kalluumeysi oo Iiraan ay leedahay si ay ugu isticmaalaan ‘hooyo-markab’ (mothership) ay ka soo qaadaan weerarrada.

Afduubkii ugu dambeeyay wuxuu dhacay bishii Diseembar 2023, markaasoo markabka Ruen ee sitay calanka Malta ay dabley qabsadeen kuna kaxaysteen xeebaha Soomaaliya, ka hor inta aysan ciidamada badda ee Hindiya xoreyn shaqaalihii isla markaana aysan xirin kooxdii weerarka geysatay.

Kooxaha burcad-badeedda Soomaalida ayaa ahaa kuwo aan si weyn u firfircoonayn sannadihii la soo dhaafay, kaddib markii ay hore khatar weyn ugu hayeen agagaarka Gacanka Cadmeed iyo Badweynta Hindiya.

Maleeshiyada Xuutiyiinta Yemen ee gacan saarka la leh Iiraan ayaa khatar ka weyn ku hayay maraakiibta maraya Badda Cas, oo ku shubanta Gacanka Cadmeed, tan iyo markii ay kooxdu bilowday weerarrada ka dhanka ah maraakiibta ganacsiga bishii Nofeembar 2023, iyagoo taageero u muujinayay Falastiiniyiinta ku aaddan dagaalka Israel ee Gaza.

Inkasta oo Xuutiyiintu ay oggolaadeen heshiis ay ku joojinayaan beegsiga maraakiibta xiriirka la leh Mareykanka, haddana shirkado badan oo maraakiibta ah ayaa weli ka walaacsan inay dib u bilaabaan safarradii ay ku mari jireen biyahaas.

Garoowe (Caasimada Online) – Maamulka Puntland ayaa meesha ka saaray inay jiraan ciidan federaal oo ay aqoonsan tahay oo ku sugan deegaannadeeda, xilli ay dhawaan Dowladda Federaalka shaacisay in ciidamo ka tirsanaa maamulkaasi ay ku biireen Federaalka.

Wasaaradda Arrimaha Gudaha Puntland oo arrintaan ka hadashay ayaa sidoo kale sheegtay in uusan jirin heshiis amni oo ka dhaxeeya maamulka Puntland iyo Dowladda Federaalka.

“Dowladda Puntland waxay caddaynaynaa in aysan jirn wax ciidan ah oo ka baxsan kuwa dastuuriga ah ee Puntland oo ay u aqoonsan tahay in ay joogaan gudaheeda, mana jiro heshiis amni (Securety architect) oo ka dhaxeeya labada dhinac,” ayaa lagu yiri war-saxaafadeed ka soo baxay Wasaaradda Arrimaha Gudaha Puntland.

Wasaaradda ayaa sidoo kale sheegtay in haddii ciidamo uusan ogayn maamulka laga qoro deegaannadeeda in wixii dhib ah oo arrintaas ka yimaada ay mas’uuliyadeeda qaadayso Dowladda Federaalka Soomaaliya.

“Sidaa awgeed wixii dhib ah oo ka yimaadana maleeshiyada ay xukuumadda Xamar qiratay in ay ka qoronaysa Puntland masuuliyadeeda iyada ayaa qaadaysa,” ayaa lagu yiri qoraalka kasoo baxay wasaaradda.

Puntland ayaa ugu dambeyntiina waxay u mahad-celisay saaxiibadeeda caalamiga ah ee ka caawiya dagaalka ay Puntland ka waddo buuraha Cal-miskaad ee gobolka Bari ee ay ka mid yihiin USA, UAE, UK, Ethiopia iyo Kenya.

” Dowladda Puntland waxay u mahadcelinaysa shacabka reer Puntland gudo iyo dibadba oo markasta garab taagan dawladooda, la aantoodna aysan suuto-gal ahaateen in cadawga argagixisada ah laga guulaysto.”

Wasaaradda Gaashaandhigga Soomaaliya ayaa maalmo ka hor sheegtay in ciidamada PSF ee Puntland oo hore Mareykanku u taageeri jiray ay si sharci ah ugu biireen ciidamada qaranka.

Dhamaadkii October ayey aheyd markii Dowladda Federaalka ay mushaar u dirtay in ka badan 2,500 askari oo ku kala sugan magaalooyinka Garoowe, Boosaaso iyo Gaalkacyo, kuwaas oo helay lacag dhan $200 midkiiba.

Sida ay hore u baahisay Caasimada Online, lacagtan oo qeyb ka aheyd mushaarka ay bixiso dowladda dhexe ayaa lagu wareejiyay hab bangi ah, iyadoo fariimaha lacag dirista ee la arkay ay muujinayaan in askartan ay ka tirsan yihiin Ciidanka Xoogga Dalka Soomaaliyeed (SNA).

Ciidamada lacagta la siiyay ayaa waxay u badan yihiin qaybaha PSF ee Boosaaso ku sugan iyo cutubyada Danab ee uu hoggaamiyo Jeneraal Jimcaale, kuwaas oo fariisimo ku leh magaalada Garoowe.

Ciidamadaas ayaa la sheegay in Madaxweyne Saciid Deni oo aragti ahaan is-hayaan uu ka jartay mushaharkii ay qaadan jireen, taas oo sababtay caro iyo cabasho ciidan xoog leh. Sidoo kale, ilo kale ayaa xaqiijiyay in ciidamada dowladda federaalka Soomaaliya ee jooga magaalada Gaalkacyo ay iyaguna heleen lacagtaas.

Bixinta lacagahaas ayaa kusoo aaday xilli uu Madaxweyne Xasan Sheekh Maxamuud dhawaan sheegay in ciidamo federaal ah ay ku sugan yihiin gudaha Puntland.

Ciidamadan oo Madaxweynuhu sheegay in ay joogaan meelo kamid ah maamulka Puntland, ayuu tilmaamay inay geli karaan dagaalka ka socda Calmiskaad, balse aysan illaa iyo hadda codsi ka helin dhanka Puntland.

Madaxweynaha ayaa markaas xusay in dagaalkan uu yahay mid ballaaran, ayna qayb ka yihiin saaxibada caalamiga ah oo ay ka wada shaqeeyaan howlgallada ka dhacaya dalka.

“Puntland waxay naga codsatay ma jirto haddiise loo baahdo Puntland waxaa jooga ciidamo federaalka ka amar qaata oo daqiiqad kastaa dagaalka geli kara si weyn ayaan u garab taaganahay Puntland, dagaalka Daacish-na caalamka waa nagu kaalmeynayaa,” ayuu yiri Madaxweyne Xasan Sheekh.

Arrimahan ayaa kusoo aadaya, iyadoo bilihii lasoo dhaafay si weyn loo hadal-hayay inay jiraan ciidamo ay dowladda federaalka Soomaaliya ka qoratay deegaannada Puntland, taas oo abuurtay xiisad xooggan, maadaama haatan khilaaf xooggan uu ka dhexeeyo labada dhinac.