Doha (Caasimada Online) – Dadka Carabta ayaa si weyn baraha bulshada uga falceliyay weerarkii Israa’iil ku qaaday magaalada Doha ee dalka Qatar, halkaas oo lagu bartilmaameedsaday hoggaamiyayaal sare oo ka tirsan Xamaas.

Tan ayaa dhalisay su’aalo badan oo ku saabsan dalalka xiga ee Israa’iil ku wajihi karto weerar kale. Qaar ka mid ah dadka falcelinayay waxay si toos ah u tilmaameen dalal ay ka mid yihiin Masar, Sacuudi Carabiya iyo Turkiga.

Dhanka kale, eedeymo ayaa loo jeediyay Mareykanka iyo Britain, iyadoo lagu sheegay inay si dadban uga dambeeyeen weerarka. Dad badan ayaa ugu baaqay waddamada Khaliijka iyo guud ahaan Carabta inay si mideysan uga jawaabaan tallaabooyinka Israa’iil.

September 10-keedii, baraha bulshada ee X ayaa lagu arkay hashtags Carabi ah sida “Doha,” “Saldhigyada Mareykanka,” iyo “Israa’iil,” kuwaas oo in ka badan 598,000 jeer la adeegsaday. Falcelintani waxay sare u qaaday doodda ku saabsan waxa ku xiga dhacdadii ka dhacday Qatar.

Dad badan ayaa rumeysan in weerarka lagu qaaday Doha uu fariin u ahaa dalalka kale ee Carabta, gaar ahaan Masar. Siyaasiyiin mucaarad ah oo Masar ka tirsan ayaa xusay in weerarro kale oo Israa’iil ka dhan ah dalalka gobolka ay u muuqdaan kuwo suuragal ah.

Hoggaamiyaha mucaaradka Taariq Xabiib ayaa sheegay in Israa’iil ay si fudud u beegsan karto Qaahira ama Riyaad, isagoo ku tilmaamay arrintaas khatar muuqata.

Saxafiyad Masri ah, Rania Badawi ayaa ku doodday in weerarku uu muujinayo in martigelinta hoggaamiyayaasha Xamaas aysan ahayn oo keliya arrin siyaasadeed balse ay khatar toos ah ku tahay amniga qaranka. Waxay ku boorisay shacabka inay fahmaan halista sii kordheysa.

Sidoo kale, qaar ka mid ah dadka ka falceliyay ayaa carabka ku adkeeyay in mashruuca Israa’iil iyo saaxiibbadeeda reer galbeedku aanu lahayn xad, isla markaana uu Bariga Dhexe ku sii fogeynayo qalalaase iyo dagaal.

Mid ka mid ah dadka reer Urdun ah ayaa sheegay in qof walba oo maanta dareema ammaan uu berri noqon karo bartilmaameed. Qoraallo kale oo baraha bulshada lagu baahiyay ayaa Turkiga lagu tilmaamay mid laga yaabo inuu noqdo bartilmaameedka xiga, inkastoo Masar loo arko meesha ugu nugul marka la eego xaaladaha siyaasadeed iyo dhaqaale ee uu wajahayo.

Falanqeeyayaasha gobolka qaarkood waxay ku baaqeen in dalalka xiriirka caadiyaystay la leh Israa’iil dib uga fiirsadaan mowqifyadooda, iyagoo ku adkeeyay in weerarradu yihiin qayb ka mid ah qorshe ballaaran oo lagu cabburinayo dunida Carabta.

Si kastaba, tan ayaa sare u qaadeysa doodda in wixii shalay ka dhacay Tunisia, maanta Doha ka dhacay, berri ay suurtagal tahay inuu ka dhaco dal kasta oo Carbeed.

Abu Dhabi (Caasimada Online) – Warbaahinta Dark Box ayaa xaqiijisay, iyadoo adeegsaneysa ilo sirdoon oo muhiim ah oo gobolka ku sugan, in Imaaraadka Carabta ay horey u ogaayeen weerarkii ay Israa’iil Talaadadii ku qaaday Qatar.

Warbixintan ayaa lagu sheegay in Imaaraadka ay si toos ah u fududeeyeen arrimo muhiim ah oo ku saabsanaa weerarka. Iskaashigan qarsoon ayaa astaan u ah heer cusub oo khatar leh oo ku saabsan siyaasadda Bariga Dhexe, halkaas oo colaadaha soo jireenka ah loo adeegsanaayo magaca “caadiyeynta xiriirka.”

Habeenkii 30-kii Agoosto, unugyo diyaarado dagaal ah oo Israa’iil leedahay ayaa fuliyay weerar elektaroonig ah oo si gaar ah loola bartilmaameedsaday xarun isgaarsiineed oo ku taal waqooyiga magaalada Doha. Xaruntan oo Qatar u adeegsan jirtay fariimaha qarsoon ee gobolka, islamarkaana Israa’iil ku eedaysay in ay xiriir la leedahay Xamaas, ayaa lagu weeraray teknoolojiyadda EMP iyo hub casri ah oo si sax ah loogu hago bartilmaameedka.

Inkastoo aanay jirin dhaawac dadweyne oo si rasmi ah loo shaaciyey, xog laga helay dayax-gacmeedyo iyo fariimo la jabsaday ayaa xaqiijiyay in weerarku dhacay. Ilo sirdoon oo reer Yurub ah ayaa sheegay in weerarku si ula kac ah loogu talagalay in lagu carqaladeeyo balse aan lagu burburin.

Doorka Imaaraadka Carabta

Dark Box ayaa ka soo xigatay laba sarkaal oo sare oo sirdoon Carbeed ah in ka qaybgalka Imaaraadku uu ahaa mid go’aan leh. Shaqsiyaad ka howlgalayay Cyprus iyo Eritrea ayaa gudbiyay xogta isgaarsiinta isla markaana xakameeyay isku xirka muddadii uu weerarku socday.

Tahnoun bin Zayed, oo ah la-taliyaha ammaanka qaranka ee awoodda badan ee Abu Dhabi, ayaa la sheegay inuu si shakhsi ah u ansixiyay hawlgalkan, kaddib markii uu helay warbixin Mossad soo bandhigtay bartamihii Agoosto.

Waxaa kale oo la sheegay in Imaaraadku ka caawiyeen Israa’iil inay diyaaradohooda ku duulaan marinno sir ah oo ka baxsan raadaarada Masar iyo Urdun, halka nidaamyada kormeerka Israa’iil ee Negev ay xog waqtiga-dhabta ah la wadaageen falanqeeyayaasha Imaaraadka ee xarun ku taal Abu Dhabi.

Dhinaca Israa’iil, ujeeddadu ma ahayn burburinta kaabayaasha Qatar balse waxay ahayd farriin—mid muujinaysa carqaladeyn iyo ceebeyn. Dhinaca Imaaraadka, hawlgalku wuxuu ahaa digniin siyaasadeed oo si toos ah loogu jeediyay Doha.

Qatar oo diiday inay ku biirto heshiiska Abraham Accords, maalgelinteeda Gaza, iyo saamaynta weyn ee ay ku leedahay warbaahinta iyada oo loo marayo Al-Jazeera ayaa muddo dheer ka caraysiinaysay Abu Dhabi iyo Tel Aviv. Sidaa darteed weerarkan wadajirka ah wuxuu ka tarjumayay dhoolatus siyaasadeed oo la mid ah awood muujin ciidan.

Qatar kama aysan hadlin dhacdadan si shaacsan, balse ilo xog ogaal ah ayaa sheegay in kulan degdeg ah oo ka dhacay Amiri Diwan 1-dii Sebteembar uu sababay in si degdeg ah dib loogu habeeyo amniga iyo hababka sir-gelinta.

Sidoo kale Doha ayaa si hoose u billowday dib-u-eegis ku saabsan siyaasaddeeda diblomaasiyadeed ee dariskeeda Khaliijka iyo xitaa xiriirka ay la leedahay Israa’iil. Labada dhinac ee Israa’iil iyo Imaaraadka ayaa iska diiday inay ka hadlaan, iyaga oo doortay aamusnaan ay la socdaan daadadka sirta soo daadanaya.

Dhacdadan ayaa muujinaysa isbeddel qoto dheer oo ku yimid dheellitirka awoodda Bariga Dhexe. Imaaraadka oo hore ugu caan ahaa dhaleeceynta gardarrada Israa’iil ayaa hadda muuqda inay ka gudbeen heerkii xiriir qarsoodi ah una dhaqaaqeen iskaashi hawlgal oo toos ah—xitaa ka dhan ah dalal Carbeed. Dagaalka hoos ka socday ee muddo dheer la hadal hayay ayaa hadda muuqda inuusan sii qarsooneyn.

Brasília  (Caasimada Online) – Maxkamadda Sare ee Brazil ayaa Khamiistii ku xukuntay madaxweynihii hore ee xagjirka ahaa Jair Bolsonaro 27 sano oo xarig ah, kadib dacwad taariikhi ah oo dalka kala qaybisay isla markaana caro ka dhalisay Maraykanka.

Xukunkaas ayaa ka dhigan in hoggaamiyahan 70 jirka ah ee midigta fog uu inta ka dhiman noloshiisa ku qaadan karo xabsi.

Garsoorayaal ayaa cod 4–1 ugu codeeyay in Bolsonaro lagu helo qorshe uu ku doonayay in uu xukunka uga tuuro Luiz Inacio Lula da Silva kadib guuldarradii uu kala kulmay doorashadii bishii Oktoobar 2022.

Dacwad-oogayaasha ayaa sheegay in qorshuhu fashilmay kaliya sababo la xiriira in aan taageero laga helin madaxda sare ee ciidamada.

Bolsonaro wuxuu xaq u leeyahay inuu rafcaan ka qaato xukunka, iyadoo maxkamaddu markaas oo dhan ay dib uga doodi karto.

Jawaabta Washington

Mareykanka ayaa si dhaqso ah uga falceliyay xukunka, iyadoo lagu tilmaamay Bolsonaro “Trump-ka kaymaha kulaylaha” tan iyo doorashadiisii 2019.

Xoghayaha Arrimaha Dibadda Marco Rubio ayaa sheegay in Maraykanku uu “tallaabo qaadi doono” isagoo xukunka ku sifeeyay “ugaarsi siyaasadeed.”

Wasaaradda Arrimaha Dibadda ee Brazil ayaa jawaab adag bixisay, waxayna ku adkaysatay in aysan cabsi gelin doonin “hanjabaadaha Rubio.”

Donald Trump, oo horey canshuuro sare ugu soo rogay Brazil isagoo uga aar-goosanaya dacwadda Bolsonaro, ayaa ku tilmaamay xukunka “mid yaab leh.”

Wuxuu ku ammaanay Bolsonaro inuu ahaa “madaxweyne wanaagsan” iyo “nin wanaagsan,” isagoo ku eedeeyay dacwadaha loo haysto “inay aad ugu egyihiin waxa la igu sameeyay aniga.”

In kasta oo Maxkamadda Sare ay mar hore heshay aqlabiyaddii saddexda cod ee looga baahnaa xukunkiisa markii codka afraad la dhiibtay, haddana go’aanku wuxuu noqday mid kama dambays ah kaddib markii garsoorihii shanaad uu go’aankiisa riday.

“Waxaa la sameeyay urur dembiilayaal ah oo hubeysan oo ay hoggaaminayeen eedaysanayaasha, kuwaas oo ay waajib tahay in lagu xukumo iyadoo lagu saleynayo xaqiiqooyinka aan u arko inay caddahay,” ayuu yiri garsoorihii shanaad, Cristiano Zanin, oo ahaan jiray qareenkii Lula.

Toddobada qof ee kale ee la eedaysnaa Bolsonaro, oo ay ku jiraan wasiiro hore iyo taliyeyaal ciidan, ayaa sidoo kale la xukumay.

Kabtankii hore ee ciidanka, oo hal xilli oo kaliya xilka hayay intii u dhaxaysay 2019 iyo 2022, ayaa ku andacoonaya inuu yahay dhibbane cadaadis siyaasadeed.

Isagoo ka hadlayay bannaanka guriga aabbihiis ee Brasilia, wiilka Bolsonaro ee xildhibaanka ah, Flavio Bolsonaro, ayaa sheegay in siyaasigu “uu madaxiisu sareeyo isagoo wajahaya cadaadiskan, sababtoo ah taariikhdu waxay muujin doontaa inaan dhinaca saxda ah taaganahay.”

Wuxuu intaas ku daray in xulafada aabbihiis ay “awooddooda oo dhan” u adeegsan doonaan sidii ay u heli lahaayeen taageerada baarlamaanka ee sharci cafis ah.

‘Kiis siyaasadeysan’

Xukunka Bolsonaro wuxuu yimid kaddib mid ka mid ah dacwadihii ugu waaweynaa uguna muranka badnaa taariikhda dhow ee Brazil, taasoo ku dhammaatay codbixin aad la isugu dhowaa oo socotay muddo afar maalmood ah.

Marka laga soo tago inuu hoggaaminayay “urur dambiilayaal ah,” senatorkii hore waxaa lagu eedeeyay inuu ogaa qorshe lagu dili lahaa Lula, madaxweyne ku xigeenkiisa Geraldo Alckmin, iyo garsooraha Maxkamadda Sare Alexandre Moraes.

Sidoo kale, Bolsonaro waxaa lagu helay dambiga ah inuu kiciyay weerarkii rabshadaha watay ee 2023-kii ay boqollaal ka mid ah taageerayaashiisu ku qaadeen Maxkamadda Sare, madaxtooyada, iyo baarlamaanka ee Brasilia, toddobaad kaddib markii Lula loo caleema saaray inuu noqdo beddelkiisa.

Isagu kama uusan qaybgelin dhegeysiga xukunka ee caasimadda Brasilia, balse wuxuu geeddi-socodka kala socday gurigiisa, halkaas oo uu ku jiro xabsi guri.

Guud ahaan dalka, dadka reer Brazil ayaa si weyn ugu dhegganaayeen daawashada maxkamadeynta ee telefishinnada iyo baraha bulshada.

Mid ka mid ah baararka Brasilia, dadkii daawanayay maxkamadeynta oo shaashad weyn laga saaray ayaa sacab iyo farxad isku daray kaddib markii la xukumay.

“Sugitaan dheer kaddib, shakhsigan karaahiyada ah ayaa xabsi loo dirayaa,” ayuu yiri Virgilio Soares, oo ah turjumaan 46 jir ah.

Laakiin Germano Cavalcante, oo ah injineer madani ah oo 60 jir ah, ayaa maxkamadeynta ku tilmaamay “mid aan caddaalad ahayn.”

Dal kala qaybsan

Kiiskan wuxuu khilaaf qoto dheer dhex dhigay bulshada Brazil, oo u kala qaybsantay kuwa u badan garabka bidix ee u arkayay inay tahay imtixaan muhiim u ah dimoqraadiyadda dalka, iyo kuwa u badan garabka midig ee u arkayay inay tahay maxkamadeyn siyaasadeed oo iska-yeel-yeel ah.

Sidoo kale, waxay horseedday xiisad aan hore loo arag oo ku timaadda xiriirka u dhexeeya Mareykanka iyo Brazil oo saaxiibbo soo ahaa muddo dheer.

Marka laga reebo ciqaabta canshuuraha, Washington waxay sidoo kale cunaqabatayn saartay Moraes iyo garsoorayaal kale oo ka tirsan Maxkamadda Sare.

Bolsonaro waa madaxweynihii afraad ee hore ee Brazil ee la xukumo tan iyo markii dimoqraadiyaddu dib ugu soo laabatay 1985-kii kaddib labaatan sano oo xukun milatari ah.

Lula wuxuu 19 bilood ku qaatay xabsi sannadihii 2018-2019 isagoo lagu eedeeyay musuq-maasuq, eedeymahaas oo markii dambe la laalay.

Siyaasigan ruug-caddaaga ah ee 79-jirka ah, oo caannimadiisu hoos u dhacday ka hor maxkamadeynta Bolsonaro, ayaa waxaa kor u qaaday iska-hor-imaadka kala dhexeeya Mareykanka.

Wuxuu isu muujiyay inuu yahay ilaaliyaha madax-bannaanida Brazil isagoo wajahaya waxa loogu yeeray faragelinta Mareykanka ee arrimaha gudaha ee dalkiisa, wuxuuna tilmaamay inuu mar kale u tartami doono doorashada sannadka soo socda.

Kathmandu (Caasimada Online) – Ra’iisul Wasaaraha Nepal, KP Sharma Oli ayaa ku dhawaaqay inuu xilka iska casilay, kaddib kacsanaan xooggan oo ka dhalatay dilka 22 qof oo lagu helay iska horimaadyo dhexmaray booliska iyo dibadbaxayaal kasoo horjeeday musuq-maasuqa.

War kasoo baxay xafiiskiisa ayaa lagu sheegay in go’aankiisu uu salka ku hayo rabitaanka ah in xal sharciyeed oo waara loo helo bannaanbaxyada ballaaran ee ka socda dalka, kuwaas oo inta badan ay hormuud u yihiin dhallinyarada ka cabanaysa eedeymo musuq-maasuq.

Bannaanbaxyadaas ayaa ku soo baxay markii la soo rogay xayiraad ku saabsan baraha bulshada, taas oo markii dambe dib loo laalay.

Mudaaharaadyada ayaa si degdeg ah u noqday rabshado ballaaran, iyadoo kumannaan qof oo intooda badan dhalinyaro sheeganaya inay ka tirsan yihiin jiilka Gen Z ay isugu soo baxeen waddooyinka caasimadda Kathmandu.

Waxay wateen boodhadh iyo boorar muujinaya cadhadooda, halkaas oo ay ku muujinayeen baaqyo ka dhan ah musuqmaasuqa.

Isku dhacyada ayaa sababay dhaawacyada ku dhowaad 200 qof, kadib markii booliska ay adeegsadeen rasaas nool, biyo cadaadis ah iyo sunta dadka ka ilmeysiisa.

Dibadbaxayaasha qaar ayaa fuulay darbiyada baarlamaanka iyo xarumo kale oo dowladda ay leedahay, taas oo sii hurisay xiisadda taagneyd.

Dad badan oo dhaawacyo kala duwan ka soo gaaray rabshadihii dhacay ayaa la gaarsiiyey isbitaallada ku yaalla deegaanka, halkaas oo ay ku soo qulqulayeen dadweyne badan oo u damqaday.

Inkastoo Ra’iisul Wasaaruhu xilka iska casilay, haddana weli lama caddeyn cidda booskiisa buuxin doonta iyo jihada siyaasadeed ee xigta, iyadoo xaaladdu u muuqato mid aan hoggaan rasmi ah lahayn.

Warar soo baxay ayaa tilmaamaya in qaar ka mid ah madaxda dowladda, oo ay ku jiraan wasiirro, ay difaac ka raadsadeen ciidamada ammaanka. Dhanka kale, shacabka dibadbaxaya ayaa si adag uga horyimid bandow aan waqti cayiman lahayn oo lagu soo rogay caasimadda Kathmandu iyo gobollo kale.

Bannaanbaxayaasha ayaa ku adkaysanaya baahida loo qabo isla xisaabtan dhab ah iyo dib-u-habeyn ballaaran oo lagu sameeyo hannaanka maamulka.

Hase yeeshee, khubarada amniga ayaa ka digaya in rabshaduhu sii fidaan haddii dowladdu ku guuldareysato inay tallaabooyin wax ku ool ah qaaddo, gaar ahaan maadaama ardayda iyo ururrada bulshada rayidka ah ay hadda ku biireen kacdoonka.

Salt Lake City (Caasimada Online) – Waxaa weli socda howlgal ballaaran oo lagu baadigoobayo ciddii ka dambeysay dilka ninkii u dhaq-dhaqaaqi jiray siyaasadda garabka midig ee Mareykanka, Charlie Kirk, kaasoo lagu toogtay jaamacad ku taalla gobolka Utah, dil kiciyay cabsi laga qabo in ay sii xumaadaan rabshadaha siyaasadeed ee ka jira dalka Mareykanka.

Madaxweyne Donald Trump ayaa si kulul u dhaleeceeyay waxa uu ugu magac daray “garabka bidix ee xagjirka ah” ka dib toogashada Kirk, oo ahaa cod saameyn leh oo ka dhex jiray siyaasadda muxaafidka ee Mareykanka isagoo da’diisu ahayd 31 sano oo keliya. Wuxuu ku gooddiyay in tallaabo adag laga qaadi doono kuwa mas’uulka ka ahaa falkan oo uu ku sifeeyay “daqiiqad madow oo soo martay Ameerika.”

“Sannado badan, kuwa ka tirsan garabka bidix ee xagjirka ah waxay dadka wanaagsan ee Maraykanka ah, sida Charlie, ku metelayeen Naasiyiinta iyo dembiilayaasha adduunka ugu waxuushnimada badan,” ayuu yiri Trump oo ay wajigiisa murugo ka muuqatay, isagoo farriin muuqaal ah ka soo diray Xafiiska Oval-ka saacado yar ka dib geerida Kirk.

“Hadallada caynkan ah ayaa si toos ah mas’uul uga ah argagixisanimada aan maanta dalkeenna ku aragno.”

“Maamulkayga wuxuu soo qaban doonaa mid kasta oo ka mid ah kuwii gacan ka gaystay falkan foosha xun, iyo rabshadaha kale ee siyaasadeed, oo ay ku jiraan ururrada maalgeliyay iyo kuwa garabka siiyayba.”

Kirk ayaa Arbacadii qoorta laga toogtay xilli uu ka hadlayay munaasabad ka socotay Jaamacadda Utah Valley University. Muuqaal laga duubay goobta ayaa muujinayay isaga oo la hadlaya dadweyne faro badan markii la maqlay gariirka hal xabad oo rasaas ah.

Ninkan oo ahaa aabbe laba carruur ah dhalay, ayaa u muuqday inuu kursigiisii ku damay ka hor inta aysan kaamiradu si degdeg ah u weecan, waxaana goobta is qabsaday sawaxan iyo argagax.

Waaxda Amniga Guud ee Utah (Utah Department of Public Safety) ayaa sheegtay in ninka toogashada geystay, oo ku labisnaa dhar madow, uu rasaasta ka soo riday saqafka dhismo u dhowaa, tallaabadaas oo ay saraakiishu ku qeexeen “weerar si gaar ah loola dan lahaa.”

Ardayda jaamacadda ayaa falkan ku tilmaamay mid “waalli ah” oo “laga argagaxo.”

“Waxay igu dhalinaysaa inaan aad uga digtoonaado soo bandhigidda aragtidayda siyaasadeed,” ayuu yiri Samuel Kimball, oo ah arday baranayay injineeriyadda software-ka, oo la hadlay wakaaladda wararka AFP.

“Haddii aan ahaan lahaa qof ka fekeraya inaan siyaasadda ku biiro, waxaan ka welweli lahaa in la i toogto.”

Warar iska hor imanaya

Gacan-ku-dhiiglihii ayaa weli baxsad ah inkastoo ay baaritaanno guri-guri ah wadeen ciidamada heer federaal, heer gobol iyo kuwa maxalliga ah.

Duqa magaalada Orem, David Young, ayaa sheegay in hay’ado kala duwan oo sharci fulinta ah ay baaritaanka wadaan, balse wuxuu xaqiijiyay in eedeysanaha aan weli gacanta lagu soo dhigin.

Hay’adda Dambi Baarista Federaalka (FBI) ayaa furtay khad dhijitaal ah oo dadweynuhu ay ku soo gudbin karaan wixii xog ah.

Howlgalka baadigoobka ayaa markii hore waxaa hareeyay warar is khilaafsan, ka dib markii Agaasimaha FBI-da, Kash Patel, uu bartiisa X ku shaaciyay in “qofkii la tuhunsanaa” la soo xiray, ka hor inta uusan warkaas beenin saacad ka dib.

Madaxweyne Trump ayaa amray in calamada ka taagan dhismayaasha dowladda—oo uu ku jiro Aqalka Cad—hoos loo dhigo ilaa maalinta Axadda, taasoo calaamad u ah muhiimadda uu Kirk u lahaa siyaasadda Jamhuuriga 79-jirka ah.

Guddoomiyaha Utah, Spencer Cox, oo Jamhuuri ah, ayaa dilka ku macneeyay “khaarijin siyaasadeed,” wuxuuna fariin hanjabaad ah u diray dembiilaha mar uu qabanayay shir jaraa’id isaga oo qiiraysan.

“Waxaan rabaa inaan hadda si cad oo aan gabasho lahayn ugu sheego cid kasta oo falkan ka dambaysay: waan idin soo helaynaa, maxkamad ayaan idin soo taagaynaa, waxaana idinku qaadi doonnaa ciqaabta sharcigu oggol yahay tan ugu sarreysa,” ayuu yiri Cox.

“Waxaan rabaa inaan dadka xusuusiyo in gobolka Utah uu weli ka jiro xukunka dilka ah.”

Xildhibaankii hore ee Utah, Jason Chaffetz, oo isna goobta joogay, ayaa u sheegay Fox News in toogashadu dhacday xilli Kirk uu su’aalo ka qabanayay dadweynihii isugu yimid.

“Su’aashii hore waxay ku saabsanayd diinta. Wuxuu ka hadlayay 15 ilaa 20 daqiiqo. Su’aashii labaad, oo cajiib ahayd, waxay ku saabsanayd toogashooyinka ay geystaan dadka jinsigooda beddelay, waxaana isla xilligaas la maqlay dhawaqa rasaasta,” ayuu Chaffetz, oo argagaxsan, u sheegay taleefishinka.

“Isla markii ay rasaastu dhacday, dib ayuu u dhacay,” ayuu yiri. “Qof walba dhulka ayuu isku tuuray… dad badan ayaa qeyliyay, ka dibna qof walba wuu iska cararay.”

Turning Point USA

Kirk wuxuu ku lahaa saameyn aan caadi ahayn siyaasadda Mareykanka, isagoo ahaa cududda ka dambaysay taageerada baaxadda leh ee uu Trump ka helay cod-bixiyayaasha da’da yar — arrintaas oo fure u ahayd dib ugu soo laabashadiisii awoodda sannadkii hore.

Sannadkii 2012, wuxuu ka mid ahaa aasaasayaashii ururka Turning Point USA oo ujeeddadiisu ahayd in aragtiyaha garabka midig lagu dhex faafiyo dhalinyarada. Hibadiisa dabiiciga ah ee hadal-jeedinta ayaa ka dhigtay afhayeen caan ah oo ay taleefishinnadu u tartamaan.

Kirk wuxuu adeegsaday malaayiinta qof ee ku xiran boggagiisa Instagram iyo YouTube si uu taageero ugu raadiyo siyaasadaha ka dhanka ah soo-galootiga, Masiixiyadda aan gabashada lahayn, iyo lahaanshaha hubka, iyo sidoo kale si uu u faafiyo muuqaallo si xirfadeysan loo soo habeeyay oo laga soo jaray doodihii uu ka galay kulamo badan oo jaamacadeed.

Warka dilkan ayaa naxdin iyo argagax ku abuuray dhammaan dhinacyada siyaasadda.

“Rabbiyow, u naxariiso oo nasasho weligeed ah sii,” ayuu madaxweyne ku-xigeenka Mareykanka JD Vance ku soo qoray baraha bulshada.

Sidoo kale, shakhsiyaadka garabka bidix ayaa cambaareeyay weerarka, kuna baaqay deggenaansho.

“Dalkeenna meel uma bannaana rabshadaha noocan ah. Waa in arrintan degdeg loo soo afjaraa,” ayuu madaxweynihii hore Joe Biden ku qoray barta X.

Guddoomiyaha California, Gavin Newsom – oo si weyn u dhaliila shakhsiyaadka midigta fog sida Kirk – ayaa weerarka ku tilmaamay “fal laga argagaxo, oo bahalnimo ah, isla markaana la cambaareynayo.”

Xildhibaanaddii hore ee Congress-ka, Gabrielle Giffords – oo Dimoqraadi ah isla markaana ka badbaadday isku day dil – ayaa sheegtay inay “aad uga argagaxday” weerarka.

Dilka Kirk ayaa ku soo aaday saddex bilood ka dib markii nin reer Minnesota ah uu gurigooda ku dhex toogtay xildhibaanad gobol oo ka tirsanayd xisbiga Dimoqraadiga iyo ninkeeda.