Muqdisho (Caasimada Online) – Wararka naga soo gaaraya Villa Somalia ayaa sheegaya in halkaa uu ka socdo kullamo kala duwan oo u dhexeeya Ra’isul wasaare Kheyre iyo Xildhibaano ka tirsan BFS.

Kullamada socda ayaa la soo warinayaa inay yihiin kuwo salka ku haya sida lagu kala badbaadin lahaa Golaha Wasiirada cusub iyo Xildhibaanada uu horboodaayo Guddoomiye Jawaari.

Kullamada caawa ka socda Villa Somalia ayaa sidoo kale la sheegayaa inay ka qeybqaadanayaan ilaa 47 Xildhibaan oo miisaan ku dhex leh Baarlamaanka Somalia.

Xildhibaanadaani iyo kuwo kale ayaa la safan Ra’isul wasaare Kheyre waxa ayna ku doodayaan in Masiirka Umadda Soomaaliyeed aanu u xanibmi doonin shaqsiyaad is biirsaday.

Kheyre iyo Xildhibaanada ku shirsan Villa Somalia ayaa kullankooda Caawa ku dajinaaya qorsho lagu badbaadin doono Golaha Wasiirada ee lagu soo xulay rabitaanka Beelaha iyo Karti.

Kullamada ka socda Villa Somalia ayaa waxaa sidoo kale ku biiraaya Xildhibaano hor leh kuwaa oo garab u ah Ra’isul wasaare Kheyre.

Guddoomiyaha baarlamaanka,Maxamed Cismaan Jawaari ayaa shalay qoraal uu u diray Ra’iisal wasaare Kheyre wuxuuna ugu baaqay in uu dib u eegis ku sameeyo gollihiisa wasiirada ka hor inta aan la hor keenin baarlamaanka.

Caasimada Online
Xafiiska Muqdisho
[email protected]

Muqdisho (Caasimadda Online) – Guddoomiyaha Baarlamaanka Soomaaliya Maxamed Cismaan jawaari ayaa wado ololihii ugu weynaa oo uu ku doonayo in lagu kansalo golaha wasiirada ee uu ku dhawaaqay Ra’isulwasaaraha Soomaaliya Xasan Cali Kheyre.

Jawaari ayaa abuuray Xildhibaano badan oo ku kacsan Ra’isulwasaaraha Soomaaliya kadib markii ay sheegeyn inuusan marin wadadii saxda aheyd ee lagu magacaabayey wasiirada isla markaasna waxay ku eedeeyeen inuusan u qeybin habka 4.5.

Haddaba Caasimada Online ayaa heshay xog xaqiiq ah oo muujineyso inuu Guddoomiyaha Baarlamaanka Soomaaliya Maxamed Cismaan jawaari ku qanci doono wasiirada Kheyre haddii loo sameeyo hal arrin.

Jawaari ayaa ka hor inta aan la magacaabo golaha wasiirada ka codsaday madaxweynaha Soomaaliya Maxamed Cabdullaahi Farmaajo iyo Kheyre inay liiska wasiirada ugu daraan hal shaqsi oo uu isaga wato balse midaas way iska indha tireyn iyagoo aan ku baraarugsaneyn awoodda uu Guddoomiyaha Baarlamaanka ku leeyahay Xildhibaanada dhexdooda midaas oo ay hadda arkayaan.

Jawaari ayaa ka codsaday labadaan Mas’uul inay Maxamed Aadan Fargeeti ku daraan golaha wasiirada isla markaasna la siiyo midkood wasaaradda Arrimaha dibadda iyo Wasaaradda Maaliyadda oo ah laba wasaaradood oo aad muhiim u ah.

Balse arrintaas waxaa diiday madaxweynaha iyo Kheyre wuxuuna shir gaar ah oo ay yeesheen kusoo dhamaaday guuldaro kadib markii jawaari loo sheegay inaan ninkaas lagu soo dari karin wasiirada.

Madaxweynaha iyo Ra’isulwasaaraha ayaa sidaas kusoo magacaabay wasiiro uusan ku jirin Fargeeti oo uu watay Guddoomiyaha Baarlamaanka, taasoo keentay inuu Jawaari bilaabo ololo aad u weyn oo uu ugasoo horjeedo in la ansixiyo wasiirada.

Jawaari ayaa 25 March 2017 Ra’isulwasaaraha Soomaaliya u diray waraaq digniin ah oo uu ugu sheegayo inuu ka fiirsado wasiirada cusub ama haddii kale uu guuldaro xanuun badan kala kulmi doono XIldhibaanada Soomaliya.

Haddaba dadka ku lugta leh siyaasadda Soomaaliya ayaa aaminsan in haddii Jawaari loo sameeyo codsigiisa isla markaasna wasiir laga digo Fargeeto ay midaas keeni karto inuu Guddoomiyaha Baarlamaanka joojiyo mucaaradnimda uu hadda wado sidaas ay macquul ku noqon karto in wasiirada la ansixiyo maadaama uu isaga awood buuxda ku leh leeyahay Baarlamaanka.

Caasimada Online
Xafiiska Muqdisho
[email protected]

Muqdisho (Caasimadda Online) – Iyadoo ay meel xun mareyso xaaladda wasiirada cusub ee lasoo magacaabay ayuu Ra’isul wasaaraha Soomaaliya Xasan Cali Kheyre bilaabay ololo cusub oo waji kale leh si uu codka Kalsoonida ugu helo Golaha Wasiirada ee uu dhawaan magacaabay.

Ra’isulwasaaraha Soomaaliya ayaa bilaabay inuu wadahadal la furo madaxda Maamul Goboleedyada dalka Soomaaliya si uu ugala hadlo arrimo ku aadan wasiirada cusub iyo qaabkii uu uga gudbi lahaa caqabadaha hor taagan.

Caasimadda Online ayaa ogaatay inuu Ra;isulwasaaraha Soomaaliya wadahadal la furay ilaa hadda madaxweynaha Puntland Cabdiweli Gaas, iyo Madaxweynaha Koonfur Galbeed Shariif Xasan Shiikh.

Kheyre ayaa labadaan Mas’uul kala hadlay sidii ay uga caawin lahaayeen kalsooni u helidda goalaha wasiirada oo ay mucaaraden inta badan xubnaha Baarlamaanka Soomaaliya kuwaas oo ka dhawaajiyey inaysan ansixin doono wasiiradaan.

Wuxuu labadaan Mas’uul ka dalbaday inay si weyn uga shaqeeyaan sidii Xildhibaanada u matala Puntland iyo Koonfur Galbeed looga dhaadhacsiin lahaa inay taageeraan wasiirada, iyadoo la ogyahay inay yihiin kuwa ugu badan ee kasoo horjeedo wasiirada.

Ilaa hadda lama xaqiijin haddii ay labada madaxweyne aqbaleyn codsiga uu usoo jeediyey Ra’isulwasaaraha Soomaaliya Xasan Cali Kheyre oo dhexda ka galay siyaasad muran badan ka dhalatay kadib markii ay beelaha Soomaaliyeed iyo qaar kamid ah Siyaasiyiinta xisbiyada ku jiro ku qanci waayeen.

Sidoo kale Ra’isulwasaaraha Soomaaliya ayaa qorsheenayo inuu xiriiro noocaan camal ah la sameeyo madaxwenaha Jubbland Axmed Madoobe, Madaxweynaha Hirshabelle Cosoble iyo madax ka tirsan Galmudug si uu iyagana uga codsado inay garabkiisa istaagaan.

Ugu dambeyntii Guddoomiyaha Baarlamaanka Soomaaliya Maxamed Cismaan Jawaari ayaa waraaq u diray Ra’isulwasaaraha Soomaaliya isagoo u sheegay inuu ka fiirsado wasiirada uu soo magacaabay maadaama ay jiraan Xildibaano badan oo ka hor yimaaday.

Caasimada Online
Xafiiska Muqdisho
[email protected]

Muqdisho (Caasimada Online) – Gaadiid dagaal oo ay la socdeen Ciidamada AMISOM ayaa maanta jiiray laba neef, xili ay marayeen agagaarka Dekadda weyn ee magaalada Muqdisho.

Ciidamadaani ayaa la sheegay inay ka tirsanaayen AMISOM, gaar ahaan kuwa kasoo jeeda Dalka Nigeria.

Ciidamadaani ayaa la socday laba Gaari nooca dagaalka ah, waxaana falka kadib qabtay Ciidamada Booliska qeybta Gaafmeet 5 oo ka tirsan Booliska Qaranka oo xiligaa ku sugnaa goobta.

Taliyaha Hogaanka Nabadgalyada Waddooyinka S/Guuto Cabdinaasir Macalin Maxamed, ayaa sheegay in la xiray Ciidamada falka geystay iyo labada gaari oo ay wateen waxa uuna sheegay in falka noocaani ah uu yahay mid soo laalaabtay.

Taliyaha ayaa sheegay in Saldhiga ay soo gaaren qoyskii lahaa labada neef ee Ari-ga ahaa waxa uuna tilmaamay inay dalbadeen in lasiiyo dhaqaalaha labada neef.

Taliyaha waxa uu sheegay in labada Ari midkood uu ahaa Irmaan, waxa uuna cadeeyay in qoyska ay ku adkeysteen in Ciidamada AMISOM looga qaado lacag mag ah.

Waxa uu tilmaamay in qiimaha labada neef ay qoyskii lahaa ku sheegen inay tahay $200 oo dollar, isagoo intaa ku daray inay bixiyeen lacagtaasi kadib markii Ciidamada falka geystay ay dhameystiri waayen lacagtii looga baahnaa.

Sidoo kale, Taliyaha waxa uu xaqiijiyay in Ciidamada AMISOM ay keeneen $150 dollar, isagana uu ku daray $50 dollar ee harsanaa.

”AMISOM waxa ay caadeysatay falalka lagu jiiraayo dadka, xoolaha iyo Gaadiidka shacabka, waxaan ku baaqeynaa in gacanta lagu dhigo gaadiidka AMISOM ee falkaasi geysta”

Geesta kale, falkaani ayaa kusoo beegmaaya xili Ciidamada AMISOM ay xasuuq u geysteen boqolaal shacab iyo gaadiid aad u farabadan oo dusha sare ay ka mareen.

Caasimada Online
Xafiiska Muqdisho
[email protected]

Muqdisho (Caasimada Online) – Iyadoo ay faraha kasii baxeyso Colaad Siyaasadeedka u dhexeeya Ra’isul wasaare Kheyre iyo Guddoomiyaha Baarlamaanka Somalia, ayaa waxaa arrinkaasi lagu cabiray Sawir gacmeed ka turjumaaya xaallada dhabta ah.

Sawir gacmeedkaani ayaa waxaa lagu cabiray Guddoomiyaha Baarlamaanka Maxamed Sheekh Cusmaan Jawaari oo isbaaro u dhigtay Gaadiid lagu soo raray Wasiirada Xukuumada cusub ee Somalia.

Sawir gacmeedka ayaa waxaa lagu dul hardhay erayo kooban oo micno leh waxaana kamid ahaa ”Waxba igama galin xaalada ay ku jiraan dadka waxaan wataa laba Wasiir haddii aan waayo gaw iyo gash ma leh”

Waxaa sidoo kale lagu soo qaatay Sawirka Ra’isul wasaare Kheyre oo hogaaminaaya Golaha Wasiirada si loo meelmariyo.

Kheyre ayaa isna Sawirkiisa lagu hardhay erayo ah ”Mudane dadka aan bad baadino xaalad xun ayay ku jiraan iska daay qabyaalada”.

Sawirkaani xikmadeysan waxa uu ka turjumayaa Colaad Siyaasadeedka u dhexeeya Kheyre iyo Jawaari.

Muqdisho (Caasimadda Online) – Waxaa weli magaalada Muqdisho ka socdo ololaha codka ansixinta iyo mid diidamada loogu raadinayo golaha wasiirada cusub iyadoo koox kasta ay kulamo gaar gaar ah la yeelaneyso kooxda ay howsha isla wadaan.

Haddaba waxaa markaan arintan ku aadan Khilaafka golaha wasiirada soo faragleiyey aqalka sare ee Soomaaliya oo ka hadlay sida looga gudbi karo xaaladda hadda geysato Ra’isulwasaaraha Soomaaliya Xasan Cali Kheyre.

Gudoomiyaha Golaha Aqalka Sare Cabdi Xaashi Cabdullaahi ayaa jeediyey in xal waaro laga gaaro ansixinta golaha wasiirada, isagll dalbaday in la damiyo khilaafka iyo koox kooxeysiga lana fiiriyo danta umadda Soomaaliya

Wuxuu ku baaqay in xukuumadda cusub la siiyo fursad ay ku shaqeyso markaas kadib lala xisaabtamo haddii ay wax soo kordhin weysana markaas xilka laga qaado maadaama uu hadda dalku marayo xaalad adag oo bini’aadanimo.

Cabdi Xaashi ayaa tilmaamay in ay tahay wax laga fiican yahay diidmada laga horkeenayo xukuumadda la magacaabay iyadoo aan la arag wax qabadkeeda, loona baahan yahay in waqti iyo ansixin la siiyo wasiirada.

Hadalkaan ayaa kusoo aadayo xilli ay wasiirada cusub ka taagan tahay xaalad halis ah oo ku socoto in wasiirada cusub lala noqdo amar loo diido codka kalsoonida, waxaana arrintaan inteeda badan wado Guddoomiyaha Baarlamaanka Soomaaliya Maxamed Cismaan Jawaari.

21-kii Bishaan ayaa lasoo magacaabaa 68 Wasiir kuwaasi oo la sheegay in durba ay wajaheen Culeys Siyaasadeed oo lagu diidan yahay ah.

Beelaha qaar ayaa waxa la sheegay inay iyaguna ka hor yimaadeen hab qeybsiga Qabaa’ilada loo siiyey Wasaaradaha Xukuumada ayna ku qancin sida Xasan Cali Kheyre wax ku bixiyey.

Caasimada Online
Xafiiska Muqdisho
[email protected]

Baydhaba (Caasimada Online) – Madaxweynaha maamulka Koonfur Galbeed Shariif Xasan Sheekh Aadan ayaa ku baaqay in deg deg loo ansixiyo golaha wasiirada cusub ee Soomaaliya oo xildhibaano badan ay kasoo horjeesteen.

Shariif Xasan ayaa hadalkan maanta ka sheegay kulan dadweyne oo dadweynaha maamulka Koonfur Galbeed ay kula xisaabtamayeen dowladda, kaasi oo ka dhacay magaalada Baydhaba.

Waxa uu sheegay in Soomaaliya ay ka jirto abaar xooggan oo dad iyo duunyaba laysay, loona baahan yahay dowlad wax ka qabata, sidaa darteedna aysan macquul ahayn in iminka la mucaarado dowladda cusub.

“Waxaan ku baaqayaa in si deg deg ah loo ansixiyo golaha wasiirada” ayuu yiri Shariif Xasan Sheekh Aadan.

Golaha wasiirada cusub ayaa waxaa kasoo horjeeda xildhibaano kor u dhaafaya boqol, oo uu hormuud u yahay guddoomiyaha baarlamanka Maxamed Cismaan Jawaari.

Jawaari ayaa la rumeysan yahay inuu ka carreysan yahay in saaxiibadiisa aysan wasiiro helin, ayada oo wasiirada Digil iyo Mirifle badankood ay yihiin kuwo ku xiran Shariif Xasan Sheekh Aadan, waxaana muuqda loolan siyaasadeed oo u dhaxeeya labada nin.

Shariif Xasan ayaa la sheegay in iminka uu wado olole uu xildhibaanada beeshiisa ee raacsan Jawaari ku kala furfurayo, si ay codka kalsoonida u siiyaan xukuumadda.

Goor si horeysay ayey Caasimada Online qortay in ra’iisul wasaaraha Soomaaliya Xasan Cali Kheyre uu la xiriiray Shariif Xasan, kana codsaday inuu xildhibaanada maamulkiisa la hadlo.

halkaan dhageyso codka Shariif Xasan

Caasimada Online
Xafiiska Muqdisho
[email protected]

Muqdisho (Caasimada Online) – Wararka naga soo gaaraya Hooyga uu Villa Somalia ka degan yahay Guddoomiyaha Golaha Shacabka Baarlamaanka Somalia Maxamed Sheekh Cusmaan Jawaari, ayaa sheegaya in halkaasi ay iminka ku sugan yihiin Xildhibaano ka tirsan BFS.

Xildhibaanada ku sugan Hooyga Jawaari ayaa la sheegay in halkaasi uu ku balamiyay Gud. Jawaari, waxaana lagala hadli doonaa arrinta ku xeeran Mooshinka ka dhanka ah Wasiirada.

Jawaari ayaa xildhibaanada kala hadli doona 2 arrin oo la sheegay inay kala yihiin:

1-Inaan lagu raali noqon Wasiirada lagu soo dhisay waxa uu ugu yeeray hoos iska taabatka, isagoo ku sifeeyay inay yihiin kuwo aan sharci ahaan waxba ka jirin.

2-In isbedel lagu sameeyo 4 Wasaaradood oo uu sheegay in lagu qanciyay reero gaara oo aan u laheyn xuquuq.

Jawaari ayaa Xildhibaanadaani u ballamiyay in maanta ay mowqif cad ka qaatan Wasiirada la sheegay inaan la waafajin waxa uu qabo sharciga dalka.

Jawaari ayaa kulminta Xildhibaanada u kala qeybiyay laba garab, waxaana garabka labaad uu la kulmi doonaa Caawa.

Sidoo kale, kullanka Jawaari iyo Xildhibaanada ayaa waxaa barbar socda diiwaan galinta Xildhibaano hor leh oo aan kamid aheyn Liiska Xildhibaanada uu soo gudbiyay Jawaari.

Dhinaca kale, Jawaari ayaa wada ololihiisa ugu danbeeyay waxaana suuragal ah in gudaha Asbuucaani mar kale lasoo bandhigo liiska iyo saxiixa Mooshin wadayaasha.

Caasimada Online
Xafiiska Muqdisho
[email protected]

Garoowe (Caasimada Online) – Maamulka Puntland ayaa Dowlada Ethiopia u horseedaya faragalinta ay ku heyso arrimaha Somalia, kadib kulan khaas ah oo magaalada Addis Ababa ku dhexmaray Ra’isul wasaaraha Ethiopia Hailemariam Desalegn iyo Hogaamiyaha Puntland C/wali Gaas.

Safarkii ugu danbeeyay ee Hogaamiyaha maamulka Puntland C/wali Gaas ku gaaray magaalada Addis Ababa ayaa la xaqiijiyay inuu ahaa mid salka ku haya Faragalin toos oo lagu sameeyo Arrimaha Somalia.

Ra’isul wasaaraha Ethiopia Hailemariam Desalegn , ayaa Puntland ku qanciyay Hub, Agab milliteri iyo in loo sameyn doono Mashaariic loo arko in waxtar ay u leedahay Puntland, waxa uuna Heshiiskaani iyo qancinta C/wali Gaas qeyb ka yahay fududeynta fargalainta Ethiopia.

Heshiiska ayaa waxaan waxba ka ogeyn dowladda federaalka ee Soomaaliya, waana qeyb ka mid ah dadaalka Ethiopia ee ku aadan inay qaska Soomaaliya u adeegsato maamul goboleedyada hoos-taga.

Gaas waxaa sidoo kale lagu abaalmariyay Dhaqaale xoogan oo lagu dhiiri galinaayo, iyadoo ay xusid mudan tahay in Ethiopia ay ka danbeysay Heshiiska Dowlada Imaaraadka loogu wareejinaayo Dekadda Boosaaso.

Dowlada Ethiopia oo uu Hogaaminaayo Ra’isul wasaare Hailemariam Desalegn, ayaa Gabaad ka dhigan doonta Puntland waxa uuna qorshuhu yahay in Ethiopia ay si toosa u maamulato Deegaanada hoostaga Puntland, iyadoo halkaa ku leh Sirdoon ka diiwaan gishan maamulka Puntland.

Dadaalada ay Ethiopia ugu jirto kasbashada Puntland ayaa waxaa kamid ah in gudaha Puntland ay ka hirgaliso laba mashruuc oo hirgali doona bisha May ee sanadkan.

Mashruuca koowaad ayaa ah in Puntland loo dhisaayo Garoonka diyaaradaha magaalada Gaalkacyo, halka Mashruuca labaad uu yahay in la dhisaayo waddo laami ah oo isku xireysa Garoowe iyo Eyl, waana mashaariicdii ugu horeysay oo Ethiopia ay ka fuliso gudaha Somalia, waxaana laga damacsan yahay Mashaariicdaasi sida Ethiopia iyo Puntland ay u cuuryaamin lahaayen DFS.

Puntland ayaa dhinacyada Siyaasada iyo Sirdoonkaba kala shaqeysa Dowlada Ethiopia oo la rumeysan yahay inay tahay Dowlada koowaad oo cadow ku ah Hanaqaadka Somalia, waxa ayna tani xoojineysaa faragalinta ay Dowladaasi shisheeye ku heyso Somalia.

Si kastaba ha ahaatee, Dowlada Somalia ee uu Hogaaminaayo Madaxweyne Farmaajo ayaan ku baraarug saneyn is kaashiga cusub ee ka dhex curtay Dowlada Ethiopia iyo Maamulka Puntland oo fududeynaaya dhabar jabinta Dowlada Somalia.

Caasimada Online
Xafiiska Garoowe
[email protected]

Muqdisho (Caasimada Online) – Xildhibaanada ka tirsan BFS ayaa ku kala jabay taageerida Golaha Wasiirada Xukuumada Somalia ee uu dhawaan magacaabay Ra’isul wasaare Kheyre.

Xildhibaan Abdishakuur Cali Mire oo kamid ah Golaha BFS ayaa sheegay inaanu jirin Xukuumad u dhigmeysa tan uu magacaabay Ra’isul wasaare Kheyre.

Xil. Abdishakuur Mire, waxa uu sheegay inaanu waxba tareynin mucaaradka Xukuumada cusub waxa uuna cadeeyay in Xildhibaanada ay ku kala aragti duwan yihiin magacaabida.

Waxa uu sheegay in aragti ahaan uu qabo in xukuumadan hada la dhisay ay tahay midii ugu saxneyd ee la dhiso marka dhinac walba loo firiyo, waxa uuna carab dhabay in dhammaan beelaha laga simay dhanka awood qeybsiga.

Abdishakuur Mire oo ka jawaabayay qoraalki Jawaari u diray Ra´isal wasaare Kheyre ayaa sheegay in Jawaari uu wato aragti isaga uu leeyahay balse aysan aheyn sharci sida uu hadalka u yiri xildhibaanka .

Xildhibaanka oo ka mid ah xildhibaanada ka horyimid talo soo jeedinta iyo in lagu laabto dhismaha golaha ayaa sheegay in isaga iyo Xildhibaano kallo badan ay ka soo horjeedaan, isla markaana ay meelmarin doonaan Xukuumada cusub.

Xildhibaan Idiris Cabdi Takhtar oo ka mid ah Xildhibaanada BFS ee sida ba’an kaga soo horjeeda Xukuumada cusub ayaa sheegay in ay muhiim tahay in xukuumadda dib loogu laabto dhismaheeda.

Xildhibaan Idiris Cabdi Takhtar, waxa uu cadeeyay inaan la aqbali doonin inay shaqeyso Xukuumada cusub, waxa uuna ku tilmaamay mid aan xaq aheyn.

Xildhibaanada ayaa ku doodaya in Ra’iisul wasaaraha Soomaaliya uu soo magacaabay Wasiiro hareermarsan Awood qeybsiga beelaha Soomaaliyeed.

Mudanayaasha kasoo horjeeda Wasiirada cusub badankood waxa ay kasoo jeedaan Koonfur Galbeed.

Caasimada Online
Xafiiska Muqdisho
[email protected]

Muqdisho (Caasimada Online) – War goordhow nasoo gaaray ayaa sheegaya in Mas’uuliyiin ka tirsan DFS ay wadaan abaabulka Banaanbaxyo looga soo horjeedo Guddoomiyaha BFS Maxamed Sheekh Cusmaan Jawaari iyo Xildhibaanada Mooshin wadayaasha ee dacwada ka keenay Xukuumada cusub.

Abaabulka Banaanbaxa ayaa waxaa qeyb ka ah Maamulka Gobolka Banaadir, waxaana lasoo sheegayaa in lagu diidan yahay faragalinta Gud. Jawaari uu ku hayo Golaha Wasiirada Xukuumada cusub.

Banaanbaxa ayaa waxaa loo diyaarinayaa shacab aad u farabadan oo kamid ah Taageerayaasha Madaxweyne Farmaajo kuwaa oo muujin doona diidmadooda ku aadan faragalinta lagu hayo Xukuumada Kheyre.

Xildhibaan Idiris Cabdi Dhaqtar oo ka mid ah xubanaha baarlamaanka ee wada Mooshinka ka dhanka ah xukumada cusub ayaa sheegay in la abaabulayo banaanbaxyo la’isaga horkeenayo shacabka iyo baarlamaanka.

Xil. Dhaqtar waxaa uu shegay in 105 Xildhibaan oo ka tirsan BFS ay ka mideysan yihiin arinta Mooshinka ka dhanka ah xukuumada cusub, oo uu tilmaamay in loo soo magacaabay xukuumada qaab aan waafaqsaneen aragtida awood qeybsiga.

Geesta kale, waxa uu Xildhibaanka ka digay in DFS ay isticmaasho awooda Shacabka, waxa uuna ku baaqay in la dadajiyo isbedel ku sameynta Wasiirada.

Caasimada Online
Xafiiska Muqdisho
[email protected]

Muqdisho (Caasimada Online) – Madaxweynaha JFS Maxamed C/llahi Farmaajo ayaa xil ka qaadis ku sameeyay Taliyihii Ilaalada Madaxtooyada Jen. Ibraahim Sheekh Muxiyadiin.

Taliyaha Ilaalada Madaxtooyada ayaa waxaa loo magacaabay Col. Axmed Maxamed Afcadey oo horay u ahaa Taliyihii Madaxtooyada, xilligii Madaxweyne Sheekh Shariif.

Ilaalada Villa Somalia ayaa ka tirsan Ciidamada Milliteriga, gaar ahaan kuwa loo yaqaan Koofi casta, ee sida gaarka ah u ilaaliya Madaxweynaha, Ra’isul wasaaraha, Guddoomiyaha BFS iyo Xarunta Villa Somalia.

Ibraahim Sheekh Muxiyadiin oo ah Taliyaha xilka laga qaaday ayaa mar sii horeysay soo noqday Madaxa Paratocol-ka Madaxweynihii hore, waa nin ay aad isugu dhowaayeen Xasan Sheekh.

Farmaajo ayaa xil ka qaadis iyo magacaabid bilaabay tan iyo markii uu la wareegay xilka, waxaana wali socda isbedelka.

Caasimada Online
Xafiiska Muqdisho
[email protected]

Muqdisho (Caasimada Online) – Wasiiru dowlihii Madaxtooyada Xil. Mahad Maxamed Salaad ayaa si adag uga hadlay go’aanka Guddoomiyaha BFS Maxamed Sheekh Cusmaan Jawaari iyo qaar kamid ah Xildhibaanada BFS ay ku qaadaceen meelmarinta Golaha Wasiirada Xukuumada cusub.

Mahad Salaad oo kamid ah Garabka Xildhibaanada taabacsan Xasan Sheekh ee ka garab dheelaaya Farmaajo iyo Kheyre ayaa sheegay inaan loo dulqaadan doonin in shaqsiyaad dartooda loo caqabadeeyo Wasiirada cusub.

Mahad waxa uu sheegay in Guddoonka BF iyo Xildhibaanada ay dusha saaran doonaan mas’uuliyada wixii ka dhacay is hortaaga Wasiirada.

Xil. Mahad Salaad waxa uu Guddoonka iyo Xildhibaanada BFS ugu baaqay inaanu degdegin oo ay ka fiirsadaan talaabooyinka ay qaadayaan, waxa uuna ku taliyay in marka hore fursad lasiiyo Wasiirada.

Waxa uu sheegay in Xildhibaanada laga doonaayo inaanu sabab u noqon dhibaato ku imaada dalka, isla markaana looga baahan yahay inay meelmariyaan Golaha.

Isagoo arrintaani ka hadlaayay ayuu yiri ”BFS waxaa ka codsanayaa inuu meel mariyo Xukuumaddan, oo uusan noqon mid diida, hadii ay taas dhacdo waxaa uu Baarlamanaka dusha saaranayaa fashilka ku yimaada dowladdaan”

”Waxaan kamid ahay Xildhibaanada aaminsan in la meelmariyo Wasiirada, waayo maba garanaayo sabab aan kaga soo horjeesto waayo ma aanan arag howshooda”

Dhinaca kale, Xildhibaanada BFS ayaa waxaa ololo lagu ansixinaayo Golaha Wasiirada ka dhex wada Xildhibaanada uu soo saaray Xasan Sheekh oo gaaraya 90 Xildhibaan kuwaa oo Heshiis la galay Farmaajo iyo Kheyre.

Caasimada Online
Xafiiska Muqdisho
[email protected]

Muqdisho (Caasimada Online) – Waxaa magaalada Muqdisho ka dhacay kulan khaasa oo ay isugu yimaadeen Hoggaamiyeyaasha Xisbiyada Siyaasaddeed ee Somalia oo ay ku mideysan yihiin Musharaxiintii u tartantay xilka Madaxweynaha.

Kulanka ayaa waxaa looga hadlay arrimo dhowr ah oo ku kooban xasarada ka dhalatay magacaabida Golaha Wasiirada Xukuumada Somalia.

Dhinacyada kullanka isugu yimaaday ayaa soo jeediyay in Ra’isul wasaaraha Xukuumada Somalia Xasan Kheyre uu dib ugu laabto magacaabida Golaha Wasiirada.

Waxa ay sheegen in Wasiirada la magacaabay aysan aheyn kuwii ay sugayeen shacabka.

Waxa ay sheegen in dhismaha Golaha Wasiirada aan lagu jaangoyn hanaanka saami qeybsiga beelaha, isla markaana aanay Xukuumaddan ku imaan talo wadaag iyo tixgelin rabitaanka shacabka.

HOOS KA AKHRISO

Muqdisho (Caasimada Online) – Waxaa Magaalada Muqdisho ka socdo ololihii ugu weynaa ee looga soo horjeedo ansixinta Golaha wasiirada ee uu ku dhawaaqay Ra’isulwasaaraha Soomaaliya Xasan Cali Kheyre, waxayna hadda xaaladda mareysaa meel aad u xun oo laga yaabo in dib loogu laabto wasiirada.

Haddaba waxaa ilaa hadda la hubaai nay 135 Xildhibaan si rasmi ah uga soo horjeesteen wasiirada la magacaabay, waxaana idiin heynaa xildhibaanada ugu badan ee kasoo horjeedo maamul Goboleedka ay kasoo jeedaan.

Sida xogta aan ku heleyno Maamulka Koonfur Galbeed ayey kasoo jeedaan Xldhibaanada ugu badan ee kasoo horjeedo ansixinta golaha wasiirada cusub, waxaana la sheegayaa inuu arrintaas ka dambeeyo Guddoomiyaha Baarlamaanka Soomaaliya Maxamed Cismaan Jawaari.

Jawaari ayaa la sheegay inay madaxwyenaha iyo Ra’isulwasaaraha u diideyn in liiska wasiirada loogu daro Fargeeto oo uu la doonayey in laga dhigo wasiirka Maaliyadda ama Wsiirka Arrimaha Dibadda.

Sidoo kale waxaa kusoo xigo Xildhibaanada kasoo jeedo Maamulka Puntland oo ah xildhibaano dhawr ah, waxaana ka go’an sidii loo ridi lahaa wasiirada cusub haddii la horkeeno Baarlamaanka.

Dadka Falanqeeyo siyaasadda ayaxa aamin in gadoodkaan ay sameeyeen Xildhibaanada Maamul Goboleedyada Koonfur Galbeed iyo Puntland ay ugu wacan tahay maadama ay qaadan waayeen in Beesha Hawiye la siiyo ilaa 6 Xildhibaan halka beelaha kale la siiyey 5 wasiir.

Waxay tilmaameyn inaan fasiraad dhab ah loo heyn sababta keentay in Beesha Hawiye la siiyo wasiir dheeri, taasina aysan macquul aheyn, waxayna ku baaqeyn xildhibaanadaas in wasiirada la waafajiyo habka 4.5 oo ay Soomaalida wax ku qeybsato hadda.

Ra’isulwasaaraha Soomaaliya ayaa looga fadhiyaa go’aan cad oo ku aadan wasiirada uu soo magacaabay maadaama uu Guddoomiyaha Baarlamaanka Prof. Jawaari ugu baaqay inuu isbadal ku sameeyo, isagoo xusay inay soo gaareyn cabasho aad u badan oo ka timaaday Xildhibaanada Baarlamaanka.

Madaxweynaha Soomaaliya ayaa hadda ku maqan Safar xagga Nairobi ah isagoo ka qeybgalayo shirka Nairobi uga furmay madaxda IGAD kaasoo looga hadlayo arrimaha xaqootiga, waxaana la filayaa inu si deg deg ah kusoo gaaro Muqdisho maadaama uu dhamaaday shirkaas.

Madaxweynaha ayaa la filayaa inuu soo farageliyo arrintaas isla markaasna uu kulan la qaato Ra’isulwasaaraha Iyo Guddoomiyaha Baarlamaanka si looga wadahadlo sidii looga gdubi lahaa xaalad adag ee soo wajahday wasiirada la magacaabay.

Caasimada Online
Xafiiska Muqdisho
[email protected]

Muqdisho (Caasimada Online) – Guddoomiyaha Golaha Shacabka Baarlamaanka Somalia Maxamed Sheekh Cusmaan Jawaari ayaa si xooli ah Magaalada Muqdisho uga dhex wada ololo looga soo horjeedo Golaha Wasiirada Xukuumada Somalia ee uu dhawaan magacaabay R/W Kheyre.

Jawaari ayaa kullamo joogta ah hooygiisa kula qaadanaaya Xildhibaano ka tirsan BFS, kuwaa oo laga dhaadhicinaayo inay ka hor imaadan Golaha Wasiirada Xukuumada Somalia, ee la doonaayo in gudaha Asbuucaani la horgeeyo Baarlamaanka.

Jawaari ayaa Xildhibaanada u ifinaayo dhibaatada ay leedahay in Wasaaradaha ugu muhiimsan lasiiyo Beelo gaar ah, waxa uuna ku cadaadinayaa inay garab kusiiyan is hortaaga Wasiirada.

Warar hoose ayaa sheegaya in Jawaari uu iminka gacanta ku hayo Xildhibaano 135 oo loo diyaariyay diidmada meelmarinta Golaha Wasiirada.

Xildhibaanadaani ayaa la xaqiijiyay in Guddoomiye Jawaari ay u saxiixen Warqad dheer oo lagu muujinaayo tirada Xildhibaanada kasoo horjeeda Golaha Wasiirada cusub.

Siyaasada Jawaari ayaa u muuqaneysa mid lagu cuuryaaminaayo Xukuumada Cusub ee Somalia, waxaana soo baxaaya warar sheegaya in laga diiday laba ruux oo uu la doonaayay Wasaarado muhiim ah.

Si kastaba ha ahaatee waxaan la saadaalin karin sida uu xaalku noqon doono marba haddii uu Khilaaf ka dhextaagan yahay Madaxda ugu sareysa dalka iyo Xildhibaanada BFS.

Caasimada Online
Xafiiska Muqdisho
[email protected]