Addis Ababa (Caasimada Online) – Magaalada Addis Ababa ee caasimada dalka Itoobiya waxaa maanta si rasmi ah uga bilowday wada-hadallo xasaasi ah oo u dhexeeyo dowladaha Soomaaliya iyo Itoobiya, si loo dhameystiro heshiiska ay ku gaareen magaalada Ankara.

Wada-hadalladan ayaa waxaa maanta yeeshay wasiiru dowlaha wasaaradda arrimaha dibadda Soomaaliya Cali Maxamed Cumar (Cali Balcad) iyo dhiggiisa wasiiru dowlaha wasaaradda arrimaha dibadda toobiya, Amb. Mesganu Arega, iyaga oo yeeshay wada-hadallo laba geesood ah.

Kulankan ayaa looga hadlay sii amba qaadisa heshiiskii Ankara iyo sida ay labada dowladood u xoojin lahaayeen xiriirkooda, waxaana warsaxaafadeed kasoo baxay dowladda Soomaaliya lagu sheegay in la’isku raacay arrimo ay kamid ah ilaalinta madax banaanida.

Sidoo kale waxaa wada-hadalladan lagu soo qaaday arrinta Jubbaland, iyada oo wasiir Cali Balcad uu Itoobiya u gudbiyay cabashada Soomaaliya ee ku aadan in dagaalkii shalay ka dhacay degmada Doolow ay ka qayb qaateen ciidamadooda, waxaana Itoobiya dhankeeda ay sheegtay inay sameyneyso baaris ku aadan dhacdadaasi iyo haddii ay ku lug leeyihiin ciidankooda.

Hoos ka akhriso qoraalka;

War saxaafadeed 24ka Diseembar 2024 – Addis Ababa,

Wasiiru Dowlaha Arrimaha Dibadda & Iskaashiga Caalamiga ah ee Jamhuuriyadda Federaalka Soomaaliya, Mudane Cali Maxamed Cumar (Cali Balcad), ayaa maanta wada-hadallo laba geesood ah la yeeshay dhigiisa Wasiiru Dowlaha Arrimaha Dibadda ee Jamhuuriyadda Federaalka Dimuqraadiga Itoobiya, Mudane Amb. Mesganu Arega.

Intii kulanku socday, labada dhinac ayaa xaqiijiyey sida ay uga go’an tahay xoojinta wada-hadallada iyo kor u qaadidda xiriirka shaqo ee labada dal, iyagoo sidoo kale dib u xaqiijiyey in ay ixtiraamayaan midnimada, madaxbannaanida, iyo wadajirka dhuleed ee labada dal.

Wada-hadalladan ayaa daba socday Baaqa Ankara ee December 11, 2024, waxaana lagu qabtay qaab-dhismeedka lagu hirgelinayo qodobadiisa.

Wasiiru Dowlaha Soomaaliya ayaa sheegay cabashada iyo cambaaraynta Soomaaliya ee ku saabsan ficilada ciidamada Itoobiya ee Doolow, Soomaaliya. Dhigiisa ayaa muujiyey u diyaar ahaanshaha dowladda Itoobiya ee ku aaddan in baaritaan degdeg ah lagu sameeyo arrintaasi, isagoo ballan qaaday in ay wada shaqayn la yeelan doonaan Dowladda Federaalka Soomaaliya si looga hortago dhacdooyinka noocan oo kale ah.

Qodobada kale ee wada-hadalladu diiradda saareen waxaa ka mid ahaa ilaalinta nabadda iyo amniga gobolka iyada oo lala dagaallamayo argagixisada, iyo sidoo kale xoojinta xiriirka laba geesoodka ah si loo mideeyo dadaallada lagu hirgelinayo Baaqa Ankara, taas oo ah tallaabo muhiim ah oo lagu xallinayo khilaafaadka u dhexeeyey labada dal tan iyo Janaayo 2024.

Kismaayo (Caasimada Online) – Dowladda Federaalka Soomaaliya ayaa lagu soo warramayaa in maanta ay hakisay duulimaadyadii tegi jiray magaalada Kismaayo ee xarunta gobolka Jubbada Hoose iyo deegaanno kale oo kamid ah gobolka Gedo.

Warsaxaafadeed kasoo baxay hay’adda duulista rayidka hawada Soomaaliyeed ayaa lagu sheegay in la joojiyay duulimaadyadii tegi jiray deegaanada Jubbaland oo ay ugu horreyso magaalada Kismaayo.

Hay’adda ayaa shaaca ka qaaday in sababta ay la xiriirto kadib markii shalay ay sheegtay in Kismaayo lagu afduubtay diyaarad ka degtay oo kadib mas’uuliyiin lagu geeyay Doolow.

Hay’adda ayaa sidoo akle tilmaamtay in diyaaraduhu ay cabsi ka muujiyeen tagista Kismaayo, maadaama ay soo korortay xaalad amni darro.

Maamulka Shirkadda Halla Airlines oo war soo saaray ayaa horay dowlad goboleedka Jubbaland ugu eedeeyay in shalay ay afduubteen mid kamid ah diyaaradaha shirkadaas oo si xoog ah ciidan ka tirsan Jubbaland ku geysay degmada Doolow ee gobolka Gedo.

Sidoo kale wuxuu maamulka diyaaradda sheegay in maamulka Jubbaland uu ku xad-gudbay nidaamkooda, isla markaana uu xoog ciidankooda ku saaray diyaaradoodii shalay rakaabka geystay Kismaayo, iyadoo si qasab ah looga dejiyey degmada Doolow.

Si kastaba, xiisadda u dhexeyso dowladda federaalka iyo Jubbaland oo u weecatay Gedo ayaa kasii dareysa, waxaana shalay labada dhinac ay ku dagaalameen degmada Doolow.

Dhuusamareeb (Caasimada Online) – Ciidamada ammaanka Galmudug ayaa maanta gacanta kusoo dhigay nin loo heysto inuu xalay dilay Laba Xidigle Xasan Cabdi Maxamed oo loo yaqaanay Xasan Quuri.

Allaha u naxariistee Xasan Quuri ayaa ahaa sarkaal ka tirsan ciidanka booliska Soomaaliya, gaar ahaan qeybta Galmudug.

Dilka sarkaalkan ayaa xalay ka dhacay magaalada Dhuusamareeb, waxaana howl-gal ay fuliyeen ciidamada amniga lagu soo qabtay ninkaan, waxaana hadda ku socda baaritaan, sida ay inoo xaqiijiyeen saraakiisha booliska Dhuusamareeb.

Ninka loo soo qabtay dilka sarkaalka ayaa ah askari ka tirsan ciidanka xoogga dalka, waxaana laga dhursugayaa natiijada baaritaanka oo laamaha amniga sheegeen inay bulshada lasoo wadaagi doonaan.

Dilkan ayaa xalay ka dhacay meel aanan sidaas uga fogeyn isbitaalka magaalada Dhuusamareeb, waxaana sarkaalkan lagu dhex dilay gaari uu watay oo lagu rasaaseeyay.

Wararka ayaa intaasi ku daraya in xiliga sarkaalkaan lagu dhex rasaaseynayay gaarigiisa ay la saarneyd haweeney, taas oo rasaasta ay kasoo gaartay dhaawac fudud.

Dilka sarkaalka ayaa lasoo warinaya inuu la xiriiro arrimo jaceyl, islamarkaana dilkiisa uu geystay nin la sheegay inuu jeclaa gabadha la joogtay sarkaalka xiliga la dilayay, balse weli lama oga xaqiiqda, waxaana socda baaritaanka kiiska.

Muqdisho (Caasimada Online) – Maamulka Shirkadda Halla Airlines ayaa dowlad goboleedka Jubbaland ku eedeeyey in shalay ay afduubteen mid kamid ah diyaaradaha shirkadaas oo si xoog ah ciidan ka tirsan Jubbaland ku geysay degmada Doolow ee gobolka Gedo.

Masuul u hadlay shirkadda ayaa sheegay in maamulka Axmed Madoobe uu ku xad-gudbay nidaamkooda, isla markaana uu xoog ciidankooda ku saaray diyaaradoodii shalay rakaabka geystay Kismaayo, iyadoo si qasab ah looga dejiyey degmada Doolow.

Waxaa soo baxaya warar sheegaya in hay’adda duulista rayidka ee dowladda federaalka ay gaxaanday shirkadda diyaaradaha ee Halla Airlines, maadaama ay qabatay howl laga mamnuucay diyaaradaha ka shaqeeya Soomaaliya.

DF Soomaaliya ayaa diyaaradaha ku amartay in shaqo aan la ogeyn aysan ka qaba karin Jubbaland iyo in labo magaalo oo Jubbaland ku taalla aysan u kala duuli karin, iyagoo aan soo marin Muqdisho, si loo hubiyo waxa ay sidaan.

Diyaaradda ay shalay afduubatay Jubbaland ayaa Kismaayo ka qaaday ciidan gurmad ah iyo masuuliyiin ka tirsan Jubbaland, waxayna ka dejisay Doolow oo dagaal ka socday.

Diyaaradii ayaa dib ugu laabatay Kismaayo, waxayna Muqdisho ka soo dejisay rakaab muddo ku xayirnaa garoonka Kismaayo, dowladda federaalka oo sugeysay ayaa la sheegay in ganaaxooda ay farta ka saartay maamulka shirkadaas, in kastoo aan weli saxaafadda loo soo bandhigin ganaaxsaas iyo waxa uu yahay oo wadahadal uu socdo.

Dowladda federaalka ayaa dhankeeda ka hadashay wixii maanta ka dhacay Doolow, ayaa ciidamada Itoobiya ku eedeysay inay u bareereen inay la dagaalamaan oo laayaan ciidankii qaranka Soomaaliyeed ee saldhigyada ku lahaa Doolow.

Ugu yaraan 3 askari ayaa shalay ciidanka dowladda looga dilay Doolow, ilaa 7 kale ayaa dhaawacooda la dhigay isbitaalka, halka ciidan kale ay isku dhiibeen ciidamo taabacsan Jubbaland iyo kuwii Itoobiya ee is garabsanayey.

Sarkaalkii hoggaaminayey Ciidanka NISA ee Doolow u jooga DF oo magaciisa lagu sheegay Shiiqaalow oo wata ciidan xoogleh ayaa weli dhinac ka jooga Doolow, kuwaas oo dagaalamaya, balse goobjoogayaal ku sugan Doolow ayaa Caasimada Online u xaqiijiyey in la go’doomiyey ciidankaas.

Ciidan kale oo gurmad ah oo ka tirsan dowladda federaalka oo ka baxay Beledxaawo oo 40 KM u jirta Doolow oo watay ugu yaraan labo gaari oo nooca dagaalka ah ayaa lagu laayey jidka dhexe, waxaana la garan waayey waxa loo adeegsaday in kastoo Jubbaland ay sheegtay in Shabaab miino u dhigeen, hadana waxaa la aaminsan yahay in ciidamada Itoobiya ay madaafiic la beegsadeen.

Muqdisho (Caasimada Online) – Dowladda federaalka ayaa soo saartay qoraal dheer oo xiisadda Jubbaland ay uga hadashay oo ciwaan looga dhigay “Eedaysane Axmed Madoobe waa lagula xisaabtamayaa weerarada uu ku hayo Shacabka Jubbaland.”

War-saxaafadeedkaan oo ka soo baxay wasaaradda amniga Soomaaliya ayaa looga warbixiyey dhibaatooyin culus oo la sheegay in Axmed Madoobe uu ka geystay, isla markaana uu weli ka wado deegaanada Jubbaland, gaar ahaan gobolka Jubbada Hoose, sida Magaalooyinka Kismaayo, Raaskambooni, Dhoobley iyo Afmadow.

Hoos ka akhriso warkaan ka soo baxay DF ee lagu eedeynayo Axmed Madoobe:

Muqdisho – 23, Descembar – 2024: Wasaaradda Amniga Gudaha ee Dawladda Federaalka Soomaaliya, waxa ay si dhow ula socotaa tacadiyada tiro beelka ah ee Eedaysane Axmed Maxamed Islaam uu kula kacayo Shacabka Soomaaliyeed ee ku nool Deegaanada Jubbaland.

Tacadiyadiisa oo ahaa kuwa muddaba soo tixnaa waxaa u danbeeyay mid uu saakay ku qaaday Shacabka ku nool deegaanka Kulbiyoow ee Gobalka Jubbada Hoose, kuwaas oo ahaa dad isku abaabulay in ay Khawaarijta iska caabiyaan, balse nasiib-darro uu Axmed Madoobe iyagii weeraray, isla markaana u gaystay dil, dhaawac, jir dil iyo dhac intaba.

Falkaan waxa uu daba socdaa falal noocaan oo kale ah, kuwaas oo uu ka gaystay Magaalooyinka Kismaayo, Raaskambooni, Dhoobleey iyo Afmadoow.

Sidoo kale, waxa uu Eedaysane Axmed Madoobe ku hawlanyahay in uu iska horkeeno shacabka u diyaarsan in ay Khawaarijta ka difaacdaan deegaanadooda, iyada oo la ogyahay in uu duulaanadiisa u kaalmaysto Khawaarijta oo markasta marin u ah gacanna ku siya wax yeelaynta Shacabka reer Jubbaland ee xorta ka ah Khawaarijta.

Falalkiisu waa kuwa loo diin-waan galiyay, waana lagula xisaabtamayaa mana noqon doonaan kuwa la iska hilmaamo.

Shacabka Jubaland waxaan ugu yeeraynaa midnimo, adkaysi iyo wadajir.

Waxaan halkaan tacsi uga diraynaa Shacabkii uu Eedaysane Madoobe ku laayay, kuwii uu dhaawacay iyo kuwa u afduuban ee ku dhaqan deeganada kala duwan ee Jubbaland.

Dawladda Soomaaliya waxaa ka go’an in la suuliyo dhaqamada noocaan ah, isla markaana sharciga lasoo taago kuwa ka danbeeya ee dhiig miratada ah.

–DHAMAAD–

Muqdisho (Caasimada Online) – Wasiirka Amniga Gudaha Jubbaland Yuusuf Xuseen Cusman (Dhuumaal) oo ku sugan degmada Doolow ayaa qabtay Shir jaraa’id oo dagaalkii maanta dhacay iyo sababtii uu ku bilowday uu faahfaahin uga bixiyey.

Wasiir Dhuumaal ayaa sheegay in dhaqdhaqaaqa ay bilaabeen ciidmada dowladda federaalka ee ku sugan degmada Doolow, isagoo dowladda federaalka ku eedeeyey in qorshaheeda uu ahaa in gacanta Jubbaland laga saaro Doolow, balse ay iska difaaceen.

Wuxuu sheegay in ciidanka dowladda federaalka uu saakay daandaansi cad ka bilaabay Doolow, balse hub ka dhigis ay ku sameeyeen dhamaan ciidamadii DF ee joogay degmada Doolow.

Sidoo kale Wasiir Dhuumaal ayaa sheegay in ciidan kale oo dowladda federaalka ay ka dirtay Beledxaawo, si ay ugu gurmadaan ciidankii ka dagaalamayey Doolow ay dhex miino kula kacday, isagoo sheegay in miinadaas ay Shabaab u dhigeen gaadiidkii iyo ciidankii xoogga dalka ee watay.

Wasiirka Amniga Jubbaland ayaa Madaxweyne Xasan Sheekh ku eedeeyey waxa ka dhacaya Jubbaland, wuxuu sheegay in dalka oo nabad ah uu Xasan la wareegay xukunka, balse hadda meel kasta uu dagaal ka socdo, ciidankii qarankana siyaasad loo adeegsaday.

Dowladda federaalka ayaa dhankeeda ka hadashay wixii maanta ka dhacay Doolow, waxayna ciidamada Itoobiya ku eedeysay inay u bareereen inay la dagaalamaan oo laayaan ciidankii qaranka Soomaaliyeed ee saldhigyada ku lahaa Doolow.

Ugu yaraan 3 askari ayaa maanta ciidanka dowladda looga dilay Doolow, ilaa 7 kale ayaa dhaawacooda la dhigay isbitaalka, halka ciidan kale ay isku dhiibeen Jubbaland iyo Itoobiya oo wada socda.

Sarkaalkii hoggaaminayey ciidamada dowladda federaalka ee Doolow ku sugan oo ah nin mayal adag iyo ciidan xoogleh oo uu wato ayaa weli gees ka jooga Doolow, kuwaas oo dagaalamaya, balse goobjoogayaal ku sugan Doolow ayaa Caasimada Online u xaqiijiyey in la go’doomiyey ciidankaas.

Ciidan kale oo gurmad ah oo ka tirsan dowladda federaalka oo ka baxay Beledxaawo oo 40 KM u jirta Doolow oo watay ugu yaraan labo gaari oo nooca dagaalka ah ayey dhex miino kula kacday, waxaana gaaray khasare lixaad leh.

Hoos ka daawo Dhuumaal

Qaahira (Caasimada Online) – Wasiirka Arrimaha Dibadda Soomaaliya, Danjire Axmed Macalin Fiqi oo shalay gaaray magaalada Qaahira ee caasimadda dalka Masar, ayaa wada-hadallo rasmi ah halkaas kula yeeshay dhiggiisa dalka Masar, Mudane Badar Cabdilati.

Wada-hadalladan ayaa diiradda lagu saaray xoojinta xiriirka taariikhiga ah ee ka dhaxeeya labada dal, sida lagu cadeeyey war-saxaafadeed ka soo baxay Wasaaradda Arrimaha Dibadda Soomaaliya.

“Waxaa wadahadalladaas xoogga lagu saaray horumarinta iskaashiga dhinacyada muhiimka ah, sida amniga, siyaasadda, waxbarashada, iyo dhaqaalaha,” ayaa lagu yiri qoraalka Wasaaradda Arrimaha Dibadda Soomaaliya.

Qoraalka ayaa intaas ku sii daray, “Cilaaqaadka soo jireenka ah ee Soomaaliya iyo Masar ayaa ku saleysan walaaltinimo iyo iskaashi waxtar leh, kaas oo qayb ka qaadanaya horumarinta labada dal.”

Sidoo kale, waxaa laga wadahadlay dadaallada la dagaallanka argagixisada, iskaashiga militariga, amniga, iyo howlgalka cusub ee Soomaaliya ka bilaabanaya AUSSOM.

Intii uu socday kulanka labada wasiir, ayuu Axmed Macalin Fiqi warbixin ka siiyay Badar heshiiskii Ankara ee dhawaan dhex maray Soomaaliya iyo Itoobiya, kaas oo dan u ah nabadda gobolka, sida ay u dhigtay Soomaaliya.

Wasiirka Arrimaha Dibadda Soomaaliya ayaa dhiggiisa Masar u sheegay in heshiiskaas uu buuxinayo dhammaan dalabaadka Soomaaliya ee ah in la ixtiraamo madax-bannaanida, midnimada iyo wadajirka dhuleed ee Jamhuuriyadda Federaalka Soomaaliya.

Warar soo baxay markii uu heshiiskaas ka dhacay Ankara ayaa sheegayay in Masar ay ka carootay heshiiska ay Soomaaliya la gashay Itoobiya oo ah dal cadowga koowaad u ah labada dal ee Masar iyo Somalia, balse Masar ayaan weli ka hadlin heshiiskii Ankara.

Masar oo qeyb ka noqon doonta howlgalka ciidan ee ATMIS bedelaya ee Soomaaliya ka bilaabanaya 2025-ka ayaa si weyn ula dagaashan Itoobiya, waxayna gobolka Geeska Afrika si rasmi ah u soo jaleecday bilowgii sanadkaan, markaas oo Itoobiya ay daan-daansi ku bilowday Soomaaliya.

Muqdisho (Caasimada Online) – Madaxweynaha Jamhuuriyadda Federaalka Soomaaliya Dr. Xasan Sheekh Maxamuud ayaa maanta Madaxtooyada Qaranka ku qaabilay Safiirka Talyaaniga ee Soomaaliya Amb. Pier Mario Daccò Coppi.

Madaxweynaha iyo Safiirka ayaa ka wada-hadlay xoojinta xiriirka saaxiibtinimo ee labada dal, horumarinta iskaashiga dhinacyada dhaqaalaha, adeegyada bulshada, taageerada amniga iyo barnaamijyada dib-u-dhiska ee ka socda dalka.

Madaxweynaha ayaa uga mahad-celiyey dowladda Talyaaniga doorkeeda muhiimka ah ee ku aaddan taageerada Soomaaliya, isagoo ku boorriyey sii wadista mashaariicda lagu horumarinayo nolosha shacabka Soomaaliyeed.

Safiirka Talyaaniga Amb. Pier Mario Daccò Coppi ayaa xaqiijiyey in dowladda Talyaaniga ay ka go’an tahay taageeridda dowladda Soomaaliya iyo shacabkeeda.

Sidoo kale wuxuu bogaadiyey safiirka dadaalka dowladda federaalka ee ku aaddan horumarinta dalka iyo dib-u-dhiska hay’adaha dowladeed.

Dowladaha Soomaaliya iyo Talyaaniga ayaa waxaa ka dhexeeya xiriir qoto dheer oo iskaashi dhinacyo kala duwan leh, islamarkaana ku dhisan wax wada-qabsi.

Muqdisho (Caasimada Online) – Ra’iisul Wasaaraha Xukuumadda Jamhuuriyadda Federaalka Soomaaliya Xamza Cabdi Barre ayaa maanta kulan kula qaatay guddiga madaxa-bannaan ee doorashooyinka iyo soohdimaha qaranka.

Ra’iisul Wasaaraha ayaa warbixin ka dhageystay guddigan oo shaqadooda lagu muran yahay, kadib markii madaxdii hore iyo siyaasiyiinta mucaaradka diideen sida wax u socdaan.

Xamza ayaa guddiga la wadaagay sida ay dowladda Soomaaliyeed uga go’an tahay in dalka laga hirgaliyo doorasho qof iyo cod ah, iyadoo awoodda loo celinayo shacabka si ay codkooda ugu soo doortaan madaxda hoggaamineysa.

Sidoo kale wuxuu ra’iisul wasaaruhu guddiga kula dardaarmay in uu sida ugu dhaqsiyaha badan uga howl-galo hirgalinta doorashooyinka dalka si hufan oo caddaalad ku saleysan maadaama uu baarlamaanka dhawaan u dhammeystiray dhammaan shuruucdii fududeyneysay.

Guddigan ayaa horey u shaaciyay in doorashooyinka ugu horreeyay dalka laga qaban doono muddo toddoba bilood gudahood ah, gaar ahaan bisha June ee 2025.

Qorshaha jadwalka doorashada ayaa ah in bisha Juun ay doorashada golayaasha deegaanka ka qabtaan dalka oo dhan, halka bisha November ay qaban doonaa tan baarlamaanada maamul goboleedyada iyo madaxdooda, taas oo ku dhaceysa qof iyo cod.

Arrimahan ayaa imanaya xilli ay jirto dooda siyaasiyiinta qaarkood ee ku aadan in xaaladda dalku ku sugan yahay aan laga qaban karin doorasho qof iyo cod ah, iyada oo xiriirka ka dhaxeeya maamulada qaar sida Puntland iyo Jubaland iyo dowladda federaalka aanu wanaagsaneyn.

Wajeer (Caasimada Online) – Warar kala duwan ayaa kasoo baxaya qaraxa culus oo maanta ciidamo ka tirsan kuwa dowladda Kenya lagula eegtay agagaarka xadka ay wadaagaan dalalka Soomaaliya iyo Kenya, kaas oo ay u dhigeen xubno ka tirsan Al-Shabaab.

Qaraxa oo ahaa miino ayaa si gaar ah uga dhacay deegaanka Khorof Haraar oo ka tirsan degmada Wajeer, una dhow xadka labada dal, xilli ay socdaal ku jireen ciidamada.

Ilo dadka deegaanka ah ayaa inoo sheegay in qaraxa uu haleeyay mid kamid kolonyada ay wateen ciidamada, waxaana ka dhashay khasaare kala duwan oo baaxad leh.

Ugu yaraan illaa 8 askari ayaa lasoo wariyay inay ku dhaawacmeen qaraxa, sidoo kalena uu jiro burbur soo gaaray baabuurka uu qaraxu haleelay.

Weerarkan ayaa ku soo aaday y xilli ay ciidamada Kenya ay wadeen roondo amni oo ka dhan ah dhaq-dhaqaaqyada ay wadaan maleeshiyaadka kooxda Al-Shabaab.

Xaaladda goobta uu qaraxu ka dhacay ayaa hadda deggan, waxaana ciidamada Kenya ay horay usii wateen socdaalkooda, sida laga soo xigtay dadka deegaanka.

Inta badan kooxda Al-Shabaab ayaa weeraro ku dhufo oo ka dhaqaaq ah ka fulisa gobolka Waqooyi Bari, gaar ahaan  deegaanada u dhow xad u dhow Soomaaliya.

Kismaayo (Caasimada Online) – Ciidamada ammaanka ee Jubbaland, gaar ahaan kuwa nabad-sugidda maamulkaas oo xalay howlgal ka sameeyay magaalo xeebeedka Kismaayo ayaa ka hortegay weerar qarax ah oo ay soo abaabuleen maleeshiyada kooxda Al-Shabaab.

Qaraxa oo miino ahaa ayaa lagu diyaariyay xaafadda Farjanno, balse waxaa fashiliyay ciidanka amniga, sida lagu sheegay qoraal kooban oo kasoo baxay Jubaland.

“Ciidanka Hay’ada Nabad sugida iyo sirdoonka Jubbaland ayaa ku guuleystey fashilinta miino nooca dhajiska ah oo ay khawaarijtu rabtey inay ku bartilmaameed-sadaan shacabka reer Kismaayo” ayaa lagu yiri qoraal kasoo baxay hay’adaha amniga Jubbaland.

Sidoo kale waxaa qoraalka lagu sheegay in fashilinta qaraxa ay ka qayb qaateen dadka deegaanka, kadib markii ay soo wargeliyeen hay’adaha amniga oo sameeyay howlgal.

“Miinadan sawirkeedu hoos idiinka muuqdo ayay ciidanku ku qabteen xaafada Farjanno ee magaalada Kismaayo kadib markey shacabka xaafadaasi ku wargeliyeen laamaha amniga.” ayaa mar kale lagu yiri warsaxaafadeedka.

Kismaayo ayaa waxaa badanaa howlgallo ka sameeyay ciidamada amniga Jubbaland oo horay sidaan oo kale u fashliyay weeraro ay soo abaabuleen maleeshiyada Al-Shabaab.

Dhowaan ayay ahayd markii Kismaayo lagu qabtay nin hubeysan oo weerar bam-gacmeed ah ka gaystay gudaha magaaladaasi, kaas oo ay soo bandhigeen laamaha amniga.

Muqdisho (Caasimada Online) – Khilaafka haatan u dhexeeyo dowladda federaalka iyo Jubbaland ayaa gaaray meeshii ugu xumeyd, kadib markii ay kala tageen Villa Soomaaliya iyo Axmed Madoobe oo isku qabtay arrimaha siyaasadda, gaar ahaan doorashooyinka.

khilaafka ayaa isku beddalay gacan ka hadal, ka gadaal markii labada dhinac ay dhowaan ku dagaalameen deegaanka Raaskambooni ee gobolka Jubbada Hoose, halkaas oo ay isku fara saareen ciidamada dowladda oo laga adkaaday iyo kuwa daraawiishta Jubbaland.

Arrinta ayaa hadda u weecatay dhinaca gobolka Gedo oo ay dhaq-dhaqaaq culus ka waddo dowladda federaalka, si ay ula wareegto guud ahaan gacan ku haynta gobolkaasi oo ay u dirtay wafdi wasiiro ah iyo xildhibaanno oo hadda qorshe ka wada degmada Garbahaarey.

Haddaba maxay tahay fursadda hortaallo reer GEDO kadib kala tegga Axmed Madoobe iyo DF?

Wasiir ku xigeenka wasaaradda shaqada iyo arrimaha bulshada Xildhibaan Cismaan Libaax oo kamid ah wasiirrada dhaq-dhaqaaqa ka wada Garbahaarey ayaa isaga oo la hadlayay odayaasha Gedo wuxuu sheegay inay hortaallo fursad muhiim ah oo kala dhalatay kala tagista Axmed Madoobe iyo dowladda dhexe, wuxuuna usoo jeediyay inay ka faa’iidestaan.

Cismaan Libaax ayaa shaaca ka qaaday in wixii loo talagalay Jubbaland la geyn doono Gedo, maadaama Axmed Madoobe iyo Xasan Sheekh ay ku kala tageen siyaasadda.

“Axmed Madoobe, haddii uu dowladda la heshiin lahaa annaga taas ayaa noo darneyd fursad ma heli lahayn hadda fursad ayaan leenahay Axmed Madoobe iyo dowladda waa kala tageen wixii Jubbaland loo wado inta ayaa la keenayaa” ayuu yiri Cismaan Libaax.

Sidoo kale wuxuu sii raaciyay “Annaga iskama aanan imaanin wixii mashaariic ah halkan ayaa la keenayaa, marka waa inaan fursaddan ka faa’iideysanaa”.

Hadalkan ayaa kusoo aadayo, iyada oo haatan dowladda federaalka ay isku dayeyso inay isku ballaariso gobolka Gedo oo dhan, halkaas oo ay joogaan qaar kamid ah ciidamdeeda.

Garbahaarey (Caasimada Online) – Wasiirka amniga gudaha Soomaaliya Mudane Cabdullaahi Sheekh Ismaaciil (Fartaag) oo haatan ku sugan gobolka Gedo ayaa ka hadlay arrimo xasaasi ah oo ku aadan xiisadda u dhexeyso dowladda federaalka iyo Jubbaland.

Fartaag ayaa soo hadal qaaday dagaalkii ka dhacay Raaskambooni oo jab xooggan uu kasoo gaaray ciidamadii ay dowladda ku daabushay deegaankaasi.

Wasiirka ayaa sheegay in madaxweynaha iyo ra’iisul wasaaraha ay bixiyeen amarkii ay dib ugu baxeen ciidamada, ayna ku wargeliyeen in aysan dagaalami karin, taas oo keentay in Jubbaland ay si buuxda ula wareegto magaalada Raaskambooni ee gobolka Jubbada Hoose.

“Madaxweynaha iyo ra’iisul wasaaraha ayaa amray inay ciidamada dowladda iskaaga baxaan Raaskambooni, amarna uma haysan inay dagaalamaan ” ayuu yiri Fartaag oo la hadlayay odayaasha degmada Garbahaarey.

Sidoo kale wuxuu eedeeyn kulul u jeediyay Axmed Madoobe oo uu tilmaamay in mudadii uu Madaxweynaha ka ahaa Jubbaland inuusan wax dagaal a ku qaadin Al-Shabaab, gaar ahaan inuu ka xoreeyo degmada Jamaame.

Cabdullaahi Sheekh Ismaaciil (Fartaag) ayaa sidoo kale farriin u diray waxgaradka Gedo wuxuuna ugu baaqay inay garab istaagaan dowladdooda, ayna xor u noqdaan codkoda.

Fartaaq ayaa hadda jooga Garbahaarey halkaas oo uu ka wado qorshe iyo abaabul ka dhan ah Jubbaland, iyada oo ujeedka uu yahay in maamulka Axmed Madoobe la saaro gobolka.