Galcad (Caasimada Online) – Hay’adda Nabad-sugidda iyo Sirdoonka Qaranka ee (NISA) ayaa waxaa looga hadlay howlgal culus oo xalay ka dhacay duleedka degmada Galcad ee gobolka Galgaduud, kaas oo lagu beegsaday maleeshiyaad ka tirsanaa kooxda Al-Shabaab.

NISA ayaa shaaca ka qaaday in howlgalkaas lagu khaarijiyey ugu yaraan illaa 23 ka tirsanaa Khawaarijta oo ku sugnaa deegaanka Dharaarwey oo hoostaga magaalada Galcad.

Sidoo kale Hay’adda Nabad-sugidda ayaa tilmaamtay inay gubtay saddex gaari oo ay lahaayeen Al-Shabaab, kuwaas oo uu mid kamid ahaa baabuur Cabdi Bile ah.

“Ciidanka Hay’adda Sirdoonka iyo Nabad Sugidda Qaranka ee NISA ayaa xalay fuliyay howlgal lagu dilay in ka badan 23 Khawaarij ah, sidoo kalena lagu burburiyay gaadiid ay wateen, howlgalkaas ayaa ka dhacay deegaanka Dharaarweyn ee hoos taga magaalada Galcad ee gobolka Galgaduud” ayaa lagu yiri warsaxaafadeedk kasoo baxay NISA.

Hay’adda ayaa sidoo kale intaasi kusii dartay inay ku raad joogto xubno kale oo firxad ah, kana tirsan kooxda Al-Shabaab, si loo soo afjaro.

Xaaladda deegaanka uu howlgalka ka dhacay ayaa hadda deggan, waxaana ciidamada weerarka qaaday ay dib ugu soo laabteen degmada Galcad ee gobolka Galgaduud.

Gobollada dhexe ayaa waxaa weli ka socda howlgallo culus oo ka dhan ah maleeshiyaadka Al-Shabaab, waxaana badanaa ka dhaca dagaallo iyo duqeymo xoogan oo is barbar socda.

Riyaad (Caasimada Online) – Madaxweynaha Jamhuuriyadda Federaalka Soomaaliya Mudane Xasan Sheekh Maxamuud ayaa Khudbad ka jeediyay, Shir madaxeedka aan caadiga ahayn ee dowladaha Carabta iyo Ururka Iskaashiga Islaamka.

Shirkaan ayaa ka socda magaalada Riyaad ee dalka Sucuudiga, waxaana looga hadlayaa xaaladaha bini’aadannimo ee ay wajahayaan shacabka ree Falastiin iyo Lubnaan.

Madaxweyne Xasan Sheekh ayaa hadaljeedintiisa ku dul istaagay mugga khasaaraha gaaray shacabka biri mageydada ah ee reer Falastiin iyo Lubnaan, xasuuqa aan loo meel dayin iyo burburka kaabayaasha nolosha dadkaas.

Madaxweynaha ayaa soo bandhigay mowqifka dowladda Soomaaliya ee xalka Nabad waarta oo ka hanaqaada Bariga Dhexe.

“Qadiyadda Gaza, waa mid ka gun weyn siyaasad iyo afkaar intaba, waxayna salka ku haysaa xuquuqda aadanaha, karaamada iyo caddaaladda,” ayuu yiri Xasan Sheekh.

Madaxweynaha oo sii hadlayey ayaa yiri, “Xalka nabad waarta oo bariga dhexe ka dhalata, waxa uu ku imaan karaa oo kaliya in la sameeyo dowlad Falastiini ah oo leh xuduudaheedii 1967-kii, caasimadeeduna tahay Qudus.”

Madaxweynaha Jamhuuriyadda Soomaaliya ayaa ugu baaqay madaxda dowladaha Shirka ka qayb galaya iyo beesha caalamka in la qaado tallaabooyin wadajir ah oo gurmad degdeg ah lagu gaarsiinayo shacabka dhibaateysan.

Sidoo kale Madaxweynaha ayaa soo jeediyay in la dhaqan galiyo xabad joojin degdeg ah, isla markaana dib loogu laabto miiska wada hadallada.

Hoos ka daawo

Muqdisho (Caasimada Online) – Xildhibaannada kasoo jeeda Jubbaland ayaa goordhoweyd qaadacay shuruucda la xiriirta doorashooyinka ee baarlamaanka la horgeeyay, kuwaasi oo maanta la ansixiyey habraaca fadhiyadooda.

Illaa 35 Xildhibaan oo ka tirsan baarlamaanka labada aqal ee ka soo jeeda Jubbaland ayaa sidoo kale qaadacay tallaabadii guddiga kumeel-gaarka loogu saaray diyaarinta xeerarka doorashooyinka, taas oo ah mid baalmarsan dastuurka.

“Xildhibaanada waxay si adag uga soo horjeedaan, una cambaareynayaan in xeerarka doorashooyinka, xisbiyada, guddiga doorashooyinka la horkeeno labada aqal ee baarlamaanka, maadaama aan lasoo marin habraacii sharciga ahaa ee goleyaasha lagu horgeyn lahaa,” ayey Xildhibaannada Jubbaland ku metela baarlamaanka ay ku yiraahdeen war-murtiyeed ay soo saareen maanta.

Xildhibaannada ayaa taageero weyn u muujiyay doorashada uu maamulka Jubbaland galayo, taasi oo ay ku tilmaameen inuu yahay mid waafaqsan sharciga iyo dastuurka dowladda Federaalka iyo kan Jubbaland.

“Waxaa nasiib darro iyo lama filaan ah in anagoo weli ku hawlan xal u helida iyo isuo soo dhaweynta kala aragti duwanaanta iyo xalinta khilaafka u dhexeeya Jubbaland iyo Federaalka in xukuumadda DFS iyo guddoonka labada aqal ee sharci-dejinta ay qaadaan tallaabooyin shrci darro ah oo sii hurinaya khilaafka, iyadoo ay waajib ku aheyd inay xalka qeyb ka noqdaan kana warsugaan natiijada wadatashiga aan ku jirno,” ayaa sidoo kale lagu yiri qoraalka.

Xildhibaannada ayaa tilmaamay in ficiladan ay calaamad muuqata u yihiin in dowladda federaalku iska indho tireyso xaqiiqada iyo in aanay jirin cid ay ixtiraam u hayso, kuna sifoowday oraahdeedii aheyd “loo joojin maayo”.

Xildhibaannada ayaa sidoo kale waxay war-murtiyeedkan kusoo saareen qodobo dhowr ah oo ku saabsan dhinacyada; siyaasadda iyo amniga iyo weliba baaq ku socda dowladda federaalka Soomaaliya.

Hoos ka aqriso qodobadda war-murtiyeedka

Muqdisho (Caasimada Online) – Mudaneyaasha labada Aqal ee BJFS oo maanta yeeshay kulan wadajir ah ayaa ansixiyay habraaca fadhiyadda wadajirka ah ee ansixinta saddex hindise sharciyeed oo la xiriira qorshaha doorasho qof iyo cod ah.

Saddexdan hindise sharciyeed ayaa waxaa ku shaqeyn doono guddiga kumeel-gaarka ah ee labada aqal ee baarlamaanka dalka ee u xil-saaran diyaarinta xeerarka doorashooyinka, ururrada iyo xisbiyadda iyo sharciga dhismaha guddiga doorashooyinka, soohdimaha iyo sidoo kale qorshe howleedka guddiga.

170-Xildhibaan ayaa u codeysay maanta, mana jirin xildhibaan diiday ama ka aamusay, waxaana sidaas ansax ku noqday habraaca fadhiyada wadajirka ah ee ansixinta saddexda hindise-sharciyeed, sida uu sheegay guddoonka baarlamaanka Soomaaliya.

Wasiirka arrimaha gudaha xukuumadda federaalka Soomaaliya Cali Yuusuf Cali (Xoosh) ayaa labada gole ka hor akhriyay ahmiyadda ay shurucdaan u leeyihiin dalka iyo dadka, isagoo sheegay in seddexda hindisa sharciyeed ee golaha horyaal dib u babeen iyo wax kabadal lagu sameeyay.

Xildhibaan Mahdi Guuleed oo ah guddoomiyaha guddiga KMG ah ee labada gole u qaabilsan diyaarinta xeerarka doorashooyinka ayaa golaha ka hor akhriyay habraaca fadhiyadda wadajirka ah ee ansixinta seddaxda hindise shharciyeed ee uu ku shaqeyn doono guddiga kumeel-gaarka ah.

Dowladda federaalka Soomaaliya ayaa sheegtay in ay diiradda saareyso qorshaha iyo dadaallada lagu gaarayo doorasho qof iyo cod ah, xilli uu dhawaan golaha wadatashiga uu gaaray heshiis ay ka maqan yihiin Puntland iyo Jubbaland.

Si kastaba, tallaabada uu maanta qaaday baarlamaanka ayaa imaneysa kadib markii uu aqbalay codsi uga yimid madaxweyne Xasan Sheekh Maxamuud si looga shaqeeyo arrimaha doorashooyinka iyo xeerarka kale ee muhiimka ah.

Dhuusamareeb (Caasimada Online) –  Wararka naga soo gaaraya gudaha magaalada Dhuusamareeb ee caasimada Galmudug ayaa sheegaya in saaka xaalad kacsanaan ah ay ka taagan tahay magaaladaasi, taas oo u dhexeyso laba ciidan oo ka wada tirsan dowladda.

Xiisadda ayaa salka ku heyso muran xoogan oo ka dhashay dhul ku yaalla halkaasi oo u dhexeeyo ganacsade dagan magaalada iyo maamulka Galmudug, sida ay innoo xaqiijiyeen ilo wareedyo xilkas ah.

Galmudug ayaa lasoo wariyay in ganacsadaha ay ku amartay inay ka guuro dhulkaasi oo ay leedahay dowladda Soomaaliya, balse uu ka biyo diiday, waxaana kadib sidaas ku qaraxday xiisadda u dhexeysa labada dhinac.

Wararka ayaa intaasi kusii daraya in ganacsadaha uu wato ciidamo taabacsan oo ka tirsan kuwa milatariga oo kasoo baxay furimaha hore ee dagaalka, si ay u garab istaagaan waxayna soo galeen magaalada oo saaka laga dareemay dhaq-dhaqaaq xoogan.

Sidoo kale dadka deegaanka ayaa cabsi xoogleh ka muujinayo suurtagalnimada dagaal ka qarxa caasimada Galmudug ee Dhuusamareeb.

Ma jiro wax hadal ah oo kasoo baxay madaxda Galmudug, kuna aadan xiisadda dagaal ee saaka taagan maagalada Dhuusamareeb ee xarunta maamulka Galmudug.

Si kastaba, xiisadda taagan ayaa saameyn ku yeelatay dhaq-dhaqaaqa guud ee ganacsiga magaalada oo saaka xiran, sida ay innoo sheegeen qaar kamid ah dadka deegaanka.

Addis-Ababa (Caasimada Online) – Midowga Afrika ayaa go’aan ku gaaray in ciidamada ka qeyb galaya howlgalka nabad ilaalinta ee soo socda ee Soomaaliya (AUSSOM) ay ka imaanayaan oo kaliya waddamada ixtiraamaya madax banaanida iyo qarannimada Soomaaliya.

Arrintan ayaa caqabad ku ah Itoobiya, oo dowladda Soomaaliya ay horey ugu eedeysay inay ku xadgudubtay madax-banaanida Soomaaliya kadib markii ay heshiis la saxiixatay maamulka Somaliland ee waqooyiga Somaliland.

Guddiga Midowga Afrika oo fulinaya go’aannada iyo hawl-maalmeedka Midowga Afrika, ayaa la-tashiyo la sameynaya dalalka Afrikaanka ah ee muujiyay inay diyaar u yihiin inay ciidammo ku biiriyaan Hawlgalka Taageerada iyo Xasilinta ee Midowga Afrika ee Soomaaliya (AUSSOM) ee loo diro Soomaaliya, sida lagu sheegay war-saxaafadeed ka soo baxay Golaha Nabadda iyo Ammaanka ee Ururka Midowga.

Golaha Nabadda iyo Ammaanka ee Midowga Afrika ayaa ka hadlay go’aanna ka soo saaray arrimaha la xiriira taageerada iyo xasilinta Midowga Afrika ee Soomaaliya (AUSSOM), kaasoo bedeli doona ATMIS. Waxa kale oo uu soo saaray bayaan uu ku faahfaahiyey nuxurka shirka iyo go’aamadii ka soo baxay golaha ammaanka.

Iyadoo dowladda Soomaaliya ay qaabili doonto isla markaana ay martigelin doonto howlgalka xiga ee nabad ilaalinta ayaa golaha ammaanka waxa uu ku dhawaaqay in guddoomiyaha guddiga Midowga Afrika uu la kulmayo dowladda federaalka Soomaaliya si uu wadatashi ugala sameeyo qaabka ay noqon doonaan ciidamada howlgalka ku jira iyo dalalka ay ka imaanayaan.

Dhinaca kale, Golaha Nabadda iyo Ammaanka ee Ururka Midowga Afrika ayaa ka hadlay oo go’aan ka soo saaray khilaafkii u dhexeeyay Itoobiya iyo Soomaaliya, iyadoo go’aankaas uu Guddoomiyaha Midowga Afrika ku sheegay inay si dhow ula shaqeeyaan dhinacyada dhaqaalaha ee Qaaradda Afrika, hay’adaha gobolka iyo kuwa kale ee ay khusayso si khilaafka labada dal si degdeg ah loo xalliyo.

Si loo xaliyo khilaafka labada dal, guddiga Midowga Afrika ayaa faray in la isticmaalo dhammaan kanaalada  diblomaasiyadeed ee ay awoodaan.

Sidoo kale, wuxuu sheegay in dadaallada lagu xallinayo khilaafka labada dal lagu saleeyo qodobka 4-aad ee Axdiga Midowga Afrika, Hab-maamuuska dhismaha Golaha Nabadda iyo Ammaanka ee Midowga Afrika, Axdiga Qaramada Midoobay, iyo sidoo kale mabaadi’da deris wanaaga ee Midowga Afrika iyo shuruucda caalamiga ah.

Isha: HOL

Muqdisho (Caasimada Online) – Sarreeye Gaas Odowaa Yuusuf Raage ayaa mar kale kusoo laatay hoggaaminta ciidanka Xoogga dalka Soomaaliyeed, kadib markii ay xalay golaha wasiirada ansixiyeensoo jeedinta Wasaaradda Gaashaandhigga ee magacaabistiisa.

Sababta loo soo celiyay Odowaa ayaa ah si loo dardargeliyo difaaca dalka iyo ciribtirka kooxda Al-Shabaab oo dagaal ay ku jirto dowladda federaalka Soomaaliya.

Jeneraal Odawaa ayaa lagu amaanaa xoreyntii wadanka mudadii uu Taliyaha Xoogga ahaa, waxaana muuqata in shaqadii looga maarmi waayey, waxaana xalay mar kale loo magacaabay Taliyaha ciidanka Xoogga dalka Soomaaliyeed,

Tallaabadan ayaa sidoo kale abuurtay rajo cusub, waxaana si weyn ugu farxay shacabka oo intooda badan soo dhaweeyay magacaabista taliye Odowaa Yuusuf Raage.

Cabdirashiid Muxumed Cali “Hambalyo S/Gaas Odowaa ciidanka waa kuu baahnaa gadaashaana waa liicay”.

Axmed Naaji Cabdalla “Nin wayn baa ku soo laabtay hogaanka ciidanka Xoogga dalka, hambalyo Taliye”.

Axmed Gaashaan “Allaha kula qaado masuuliyadda Culus Moralka ciidanka xooga ayaa dib usoo noqday. Gen. Odowaa Yuusuf Raage, hambalyo Taliye”.

Cabdulqaadir Beddal “Qofka in shaqadii shalay laga qaaday looga maarmi waayo ee mar kale lagu soo celiyo qiimo ayay u samayneysaa!”.

Maxamed Geeddi “Libaax labo ma ahan waxaa tahay halyay ay tabeen Umadda Soomaaliyed iyo CXDS soo dhawoow mudane”.

Maxamuud Cabdisalaan “Odowaa waa mudanyahay inuu hoggaamiyo ciidanka qaranka mar labaad i kastoo wakhtigii uu mudnaa xilka lag qaaday,”.

Macruuf Mataan “Waa howlkar laga maarmi waayay guul ayaan u rajayn dhammaan ciidanka Xoogga dalka Soomaaliyeed”.

Amsterdam (Caasimada Online) – Xarunta Warbaahinta iyo Wadahadalka ee Center for Media and Dialogue (CMD) ayaa abaal marin gudoonsiisay orodyahanka Soomaaliyeed ee heer caalami ee Cabdi Nageeye oo asbuucii la soo dhaafay ku guulaysaty orodka dheer ee New York Marathon. 

Gudoomiyaha CMD Cabdullaahi Maxamed Xuseen Taajirow, oo ay wehliyaan xubano ka tirsan CMD, ayaa gudoonsiiyey Cabdi Nageeye abaal-marin dhiiri galin ah oo ay ugu talogashay Center for Media and Dialogue. 

Taajirow ayaa sheegay in Negeeye oo sare u qaaday magaca umadda Soomaaliyeed, islamarkaana uu soo hooyey guul ay ku faanaan. 

Abaal-marintan oo ka dhacaday Grand Hotel ee magaalada Amsterdam ayuu Mr Nageeya ka mahad-celiyey abaalmarinta ay siiyeen CMD, isaga oo xusay in uu ku farxay sida sharafta leh ee loo maamuusay.

Center For Media and Dialogue ayaa qabata abaalmarin la siiyo dadka Soomaalida ah ee gaaray guulo lataaban karo oo micno iyo milgo u samaynaya sumacadda Soomaaliya, islamarkaana ku dhiiri-galinaya bulshada inay hiigsadaan yoolalka ay gaareen dadka iskood u dadaalay ee magaca soo hooyey.

Hargeysa (Caasimada Online) – Madaxweyne ku-igeenka maamulka Somaliland, Cabdiraxmaan Saylici oo xalay shir jaraa’id ku qabtay magaalada Hargeysa, isagoo uu garab taagan musharaxa madaxweyne ee Xisbiga Mucaaridka ah ee Wadani, Cabdiraxmaan Cirro, ayaa ku dhowaaqay inuu taageersan yahay Cirro, doorashada dhaceysa Arbacada. 

Saylici ayaa si adag uga hadlay xaaladda Somaliland, wuxuuna si gaar ah u eedeeyey madaxweynihiisa Muuse Biixi oo sheegay inuu ka baxay wixii lagu dhaariyey, dastuurkiina jabiyey. 

“Muuse Biixi dalka laguma sii aamini karo, anigaa dad ugu dhawaaa wixii na lagu dhaariyey, Muuse Biixi wuu ka baxay,” ayuu yiri Cabdiraxmaan Saylici. 

Saylici oo muddo ka badan 14 sanno ahaa madaxweyne ku xigeen ayaa sidoo kale si cad u sheegay inuu dhisayo musharax Cirro, waxayna talaabadani dhabar-jab ku tahay madaxweynaha xilka ka dagaya ee Somaliland Muuse Biixi.

“Waxaan ummadda reer Somaliland ugu baaqayaa inay taageeraan isbaddalka socda uu hoggaaminayo xisbiga Waddani oo uu hoggaaminayo musharax Madaxweyne Cabdiraxmaan Cirro” ayuu yiri madaxweyne ku-xigeenka Somaliland Saylici. 

Si la mid ah dhawaqii ka soo yeeray maalmo ka hor, waxa uu taageero u muujiyay ururka Barwaaqo oo kasoo jeeda bogolka Awdal, isaga oo kasoo horjeestay ururka Hilaac oo xaga xisbiga Kulmiye u janjeedha.

Musharax Cabdiraxmaan Maxamed Cabdillaahi Cirro, ayaa isaguna soo dhaweeyay taageerada Saylici, isaga oo bulshada ugu baaqay in ay taageeraan xisbiga Waddani iyo ururada kale ee bahwadaagta la ah.

Musharax Cirro ayaa taageero is daba joog ah ka helaya siyaasiyiinta, ganacsatada iyo dadka magaca ku leh Somaliland, waxaana raja wayn laga qaba in uu ku guulaysto doorashada 13 November.

Baydhabo (Caasimada Online) – Wararka ka imaanaya gobolka Baay ayaa sheegaya in maanta ciidanka daraawiishta maamulka Koonfur Galbeed ay howlgallo culus oo ka dhan ah maleeshiyaadka Al-Shabaab ka sameeyeen aagga degmada Qansaxdheere ee gobolkaasi.

Howlgalka oo ahaa mid qorsheysan, laguna dilay xubno ka tirsanaa Khawaarijta ayaa si gaar ah uga dhacay tuulada Weel-manaas oo 15 kiilo miitir u jirta degmada Qansaxdheere, waxaana lagu dilay horjoogayaal iyo maleeshiyaad ilaalo u ahaa, sida ay sheegeen saraakiisha hoggaamineysay howlgalka.

Ugu yaraan illaa 6 xubnood oo ka tirsanaa Al-Shabaab iyo horjoogayaashooda ayaa lagu dilay goobta ay weerareen ciidanka Koonfur Galbeed, waxaana kamid ah saraakiisha la khaarijiyay Nuur Keerow Xaydar iyo Sheegow Aadan Macalin.

Labada horjooge ayaa kooxda u qaabilsanaa cunaqabeteynta degmada Qansaxdheere iyo lacagaha baadda ah ee sida qasabka ah looga qaado shacabka ku dhaqan degmadaasi.

Sidoo kale waxaa howlgalkan ay ciidamada kusoo furteen mooto Fekon ah iyo saanad ciidan oo ay lahaayeen xubnaha Al-Shabaab ee lagu dilay duleedka Qansaxdheere.

Xaaladda ayaa weli kacsan, waxaana ciidanka Koonfur Galbeed ay weli howlgallo kasii wadaan qaybo badan oo kamid ah gobolka Baay, kuwaas oo lagu beegsanayo Shabaab.

Dhanka kale, ma jiro wax hadal ah oo kasoo baxay dhinaca Khawaarijta ee ku aadan howlgalkaasi khasaaraha lagu gaarsiiyay ee ay guulaha ka sheegatay Koonfur Galbeed.

Gobollada Baay iyo Bakool ayaa waxaa si aad ah ugu xoogan dagaalyahannada Al-Shabaab, waxayna go’doon geliyeen dhammaan degmooyinka muhiimka ah ee gobolladaasi oo ay xittaa ku jirto magaalada Baydhabo oo hadda xarun KMG u ah maamulka Koonfur Galbeed.

Riyadh (Caasimada Online) – Madaxweynaha Jamhuuriyadda Federaalka Soomaaliya Mudane Xasan Sheekh Maxamuud iyo wafdi uu hoggaaminayo ayaa caawa gaaray magaalada Riyaad ee Boqortooyada Sucuudiga.

Wafdiga Madaxweynaha ayaa halkaas uga qeyb galaya shirar degdeg ah oo ay yeelanayaan madaxda dalalka Islaamka iyo Carabta.

Madaxda ayaa ka wadahadlaya colaadda iyo gumaadka ka dhanka ah dadka Falastiin iyo Lubnaan, gaar ahaan joojinta xasuuqa iyo sidii gurmad degdeg ah ay u heli lahaayeen dadka reer Qasa ee dhibaataysan.

Shirarkaas oo ah kuwo xasaasi ah waxaa ka soo qeyb galaya madax iyo wufuud ka socota dowladaha xubnaha ka ah Ururka Iskaashiga Islaamka.

Inta lagu guda jiro shirarkaas ayay Madaxweyne Xasan Sheekh iyo wafdigiisa waxay kulamo doceedyo la qaadan doona Madaxda, Boqorrada, Amiirrada iyo Hoggaamiyeyaasha Islaamka ee shirka ka soo qeyb-galaya.

Dowladda Soomaaliya ayaa muhiimad gaar ah siineysa xoojinta xiriirka dalkeennu uu la leeyahay Caalamka Islaamka iyo Carabta.

Sidoo kale Jamhuuriyadda Soomaaliya ayaa aad u difaacda qadiyadda dadka reer Falastiin, waxayna Soomaalidu ugu horeysaa muslimiinta u hiilisa dadkaas islaamka ah ee Israa’iil ay xasuuqeyso.

Muqdisho (Caasimada Online) – Shirkii Golaha Wasiirrada Soomaaliya oo caawa lagu magacaabay Taliyaha Ciidanka Xoogga dalka Soomaaliyeed S/Gaas Odowaa Yusuf Raage, si loo dardargeliyo difaaca dalka iyo ciribtirka kooxaha Khawaarijta ayaa sidoo kale lagu ansixiyey heshiis cusub.

Golaha Wasiirrada ayaa caawa shirkooda deg degga ah ku ansixiyey Xeer-nidaamiyaha Diiwaangalinta Mulkiilaha shirkadaha iyo Heshiis is-afgarad ah oo u dhexeeya dalalka Soomaaliya iyo Sacuudiga, kaas oo ku saabsan horumarinta arrimaha dhallinyarada iyo isboortiga.

Ra’iisul Wasaare Xamsa Cabdi Barre ayaa kulanka shir guddoomiyey, waxaana looga hadlay xaaladda amni ee dalka iyo dardargalinta howlaha Xukuumadda, sida lagu shaaciyey qoraal laga soo saaray shirkaas.

Magacaabidda Jeneraal Odawaa Yuusuf Raage waxay ka dhigan tahay in Xasan Sheekh uu soo wajahay culeys sababay inuu dib u raadiyo sarkaal uu horay xilka uga qaaday, taasi oo muujineysa inuu ku qasaaray xulashadiisii Taliyaha hadda laga bedelay hoggaaminta ciidanka xoogga.

Jeneraal Odawaa ayaa lagu amaanaa xoreyntii wadanka mudadii uu Taliyaha xoogga ahaa, waxaana muuqata in shaqadii looga maarmi waayey, waxaana caawa mar kale loo magacaabay Taliyaha ciidanka xoogga dalka.

Madaxweyne Xasan Sheekh ayaa dhowr mar oo hore la xaqiijiyey in Jeneraal Odawaa uu ka codsaday inuu aqbalo in mar kale oo noqdo Taliyaha ciidanka xoogga dalka, balse waxaa jiray shuruudo uu la yimid, in kastoo aan hadda la shaacin waxa iska bedelay iyo waxa laga aqbalay shuruudahaas.

Toddobaad ka hor ayay aheyd markii Taliyaha ciidanka dhulka loo magacaabay Jeneraal Sahal Cabdullaahi Cumar oo loo yaqaano Khaalid, kaasi oo mar soo noqday Taliyaha Sirdoonka Jubbaland, isla markaana ah sarkaal dhalinyaro ah oo kaalin ka qaadan kara howlgalka la qorsheynayo in mar kale dib boorka looga jafo ee dalka looga xoreynayo Khawaarijta.

Muqdisho (Caasimada Online) – Golaha Wasiirrada Xukuumadda JFS, oo caawa yeeshay kulan degdeg ah ayaa ansixiyey soo jeedinta Wasaaradda Gaashaandhigga ee magacaabista Taliyaha Ciidanka Xoogga dalka Soomaaliyeed oo loo magacaabay S/Gaas Odowaa Yusuf Raage, si loo dardargeliyo difaaca dalka iyo ciribtirka kooxaha Khawaarijta ah.

Magacaabidda Jeneraal Odawaa Yuusuf Raage waxay ka dhigan tahay in Xasan Sheekh uu soo wajahay culeys sababay inuu dib u raadiyo sarkaal uu horay xilka uga qaaday, taasi oo muujineysa inuu ku qasaaray xulashadiisii Taliyaha hadda laga bedelay hoggaaminta ciidanka xoogga.

Jeneraal Odawaa ayaa lagu amaanaa xoreyntii wadanka mudadii uu Taliyaha xoogga ahaa, waxaana muuqata in shaqadii looga maarmi waayey, waxaana caawa mar kale loo magacaabay Taliyaha ciidanka xoogga dalka.

Madaxweyne Xasan Sheekh ayaa dhowr mar oo hore la xaqiijiyey in Jeneraal Odawaa uu ka codsaday inuu aqbalo in mar kale oo noqdo Taliyaha ciidanka xoogga dalka, balse waxaa jiray shuruudo uu la yimid, in kastoo aan hadda la shaacin waxa iska bedelay iyo waxa laga aqbalay shuruudahaas.

Toddobaad ka hor ayay aheyd markii Taliyaha ciidanka dhulka loo magacaabay Jeneraal Sahal Cabdullaahi Cumar oo loo yaqaano Khaalid, kaasi oo mar soo noqday Taliyaha Sirdoonka Jubbaland, isla markaana ah sarkaal dhalinyaro ah oo kaalin ka qaadan kara howlgalka la qorsheynayo in mar kale dib boorka looga jafo ee dalka looga xoreynayo Khawaarijta.