Kismaayo (Caasimada Online) – Waxaa maanta degmada Dhoobley ee gobolka Jubbada Hoose lagu qabtay Xasan Ibraahim oo kamid ahaa shabakad saddex nin oo Janaayo 2023 gaari TOYOTA Hartop ah ah kala goostay wasaaradda tamarta iyo biyaha Jubbaland.

Raggan ayaa gaarigaasi sanadkii hore ula galay kooxda Al-Shabaab, balse dabagal dheer kadib Booliska Jubbaland ayaa maanta gacanta ku soo dhigay Xasan.

October 2023 ayey aheyd markii Ciidamada Nabad-sugidda Qaranka ee NISA ay sidan oo kale Muqdisho ugu qabteen Cabdifataax Nuur iyo Xasan Cabdullaahi oo ninkaan hadda lasoo qabtay la socday, kalana shaqeeyey inay gaarigaas la goostaan, si Al-Shabaab ay uga iibsadaan.

Cabdifataax iyo Xasan ayaa kooxda markaas kula heshiiyay in la siiyo lacag dhan 20-kun dollar, kadib marka ay u gacan galiyaan gaariga ay iska laheyd wasaaradda biyaha iyo tamarta Jubbaland, hase yeeshe taasi ma dhicin, sida ay hore u sheegtay NISA.

“Kahor inta aysan ka bixin magaalada Kismaayo waxa ay xiriirro kala duwan la sameeyeen koox ka tirsan Khawaarijta kuwaas oo ku hagayey halka iyo goobta ay ku wajah-naayeen, waxaana lagu ballamay in la siin doono lacag dhan 20,000$ balse ay wax walbo is bedeleen markii ay tageen degmada Jilib ee gobolka Jubada Dhexe,” ayaa lagu yiri qoraal kasoo baxay hay’adda.

“Waxay haysteen heshiis afka baarkiisa ah oo ay la galeen argagixisada kaas oo ahaa in ay heli doonaan lacag dhan 20,000$ iyo damaanad ah in ay xornimo ku mari doonaan dhulka ay ku dhuumaalaystaan Khawaarijta balse taasi waxba kama rumoobin oo waxa ay ahayd sheeko khadka taleefanka ku dhexmartay argagixisada iyo raggan khiyaanada Qaran ku kacay,” ayaa sidoo kale lagu yiri qoraalka.

Si kastaba, soo qabashada raggaan ayey dowladda ku sheegtay mid muujineysa “in kuwa dhagarta maleegaya aysan ka baxsa karin gacanta hey’adaha ammaanka Soomaaliya oo meel kasta lagu qaban karo.”

Muqdisho (Caasimada Online) – Taliyaha hey’adda nabad sugidda Mahad Maxamed Salaad ayaa caawa kormeer ku maray qeybo badan oo ka mid ah magaalada Muqdisho, isagoo la afuray ciidamada ammaanka.

Taliye Mahad Salaad waxaa caawa kormeerkiisa ku wehliyey Xildhibaan Cismaan Xaadoole oo ka tirsan golaha shacabka, isla markaana ah sarkaal sare oo militeri.

Taliyaha iyo Xildhibaanka ayaa ciidamada ku kormeeray baraha koontoroolada ee degmooyinka waqooyiga Muqdisho oo dadka iyo gaadiidka ay ku baarayeen.

Mahad Salaad ayaa caadi u dhex galay bulshada, isagoo shacabka si gacan qaad ah ugu salaamay maqaayadihii ay ku caweynayeen.

Degmooyinka Yaaqshiid, Heliwaa iyo Kaaraan ayey masuuliyiintaan soo mareen caawa, iyagoo lasoo afuray ciidamada amniga oo isugu jira NISA iyo Booliska.

Taliyaha NISA ee Gobolka Banaadir Muxudiin Warbac ayaa Mahad iyo Xaadoole ku wehliyey kormeerkaan ay ku mareen degmooyinka waqooyi ee caasimadda Muqdisho.

Xildhibaan Xaadoole oo la hadlay warbaahinta ayaa faahfaahin ka bixiyey kormeerkooda, isagoo sheegay inay caawa tageen goobihii ay difaacyada u ahaan jiray dowladihii tan Xasan Sheekh ka horeeyey.

Wuxuu sheegay in ciidan badan iyo hub culus aysan wadan, isla markaana aysan dareemeyn wax cabsi ah, Xaadoole ayaa hey’adaha ammaanka ku amaanay shaqada muuqata ee Muqdisho ay ka hayaan.

Hoos ka daawo

Muqdisho (Caasimada Online) – Sheekh Maxamed Shaakir Cali Xasan ayaa caawa ku dhawaaqay inay berri soomayaan oo maalinta koowaad ee Ramadaan ay u tahay, xilli maanta laga soomanaa inta badan Soomaaliya.

Qeybo ka mid ah dalka, sida Galmudug, gaar ahaan Dhuusamareeb, Guriceel, Gaalkacyo iyo inta badan degmooyinka gobolka Gedo ayaan maanta laga soomin, waxayna dadkaasi ku doodeen inay aragti ku soomayaan, kuna afurayaan.

Sheekh Shaakir ayaa u hambalyeeyey dhamaan dadka Soomaaliyeed, isagoo dadka ku baraarujiyey inay Alle uga mahad-naqaan abaalmarintiisa bishaan qiimaha badan ee uu soo gaarsiiyey, kana faa’iideystaan fadliga bishaan Ramadaan.

“Waxaan hambalyada bisha ramaddaan u diraayaa ummadda muslimiinta ah gaar ahaan shacbiga soomaaliyeed , waxaana mahad oo dhan u sugnaatay Allaah Swt oo si nabad ah nagu gaarsiiyay bishaan barakeysan ee Ramaddaan,” ayuu yiri Sheekh Shaakir.

Shiiqa ayaa Alle ka baryey in fadliga bishaan uu Soomaaliya ku gaarsiiyo guulo badan, sidoo kale wuxuu ku taliyey in loo midoobo dagaalka Khawaarijta.

“Fadliga bisha barakeysan ee Ramaddaan Allaha Dalkeena ku siiyo Roob, barwaaqo,nabadgalyo iyo midnimo Insha’allaah, Waana in aan u midawno dagaalka lagula jiro khawaarijda si aan u helno xoriyad qiima badan,” ayuu yiri Sheekh Shaakir.

Sheekh Shaakir wuxuu ka mid ahaa culimada dariiqatu Suufia oo maanta aan soomin, inta badana dadka raacsan dariiqadaas kuma soomaan, kuna afuraan bil aysan arkin bilashadeeda.

Inta badan Soomaaliya ayaa maanta laga soomay kadib markii dowladda Soomaaliya ay ku dhawaaqday in Ramadaan ay dhalatay oo Telefishinka Qaranka, si toos ah lagu dhaariyey nin sheegay inuu arkay bishii, isagoo jooga degmada Awdheegle.

Muqdisho (Caasimada Online) – Waxaa maanta munaasabad ka dhacday magaalada Muqdisho lagu dhaariyay 300 askari oo ka tirsan ciidanka booliska Soomaaliyeed.

Ciidankan oo shalay tababar heer sare ah loogu soo xiray dugsiga tababarrada booliska ee Jeneraal Kaahiye ayaa maanta la dhaariyay, si ay u guda galaan waajibaadka shaqo ee horyaalla.

Taliyaha Ciidanka Booliska Soomaaliyeed Sarreeye Guuto Sulub Axmed Firin ayaa ka qeyb-galay munaasabaddan maanta lagu dhaariyay askartaan.

Sidoo kale Taliye ku-xigeenka Ciidanka Booliska Soomaaliya S/guuto Zakiye Xuseen Axmed iyo saraakiil kale oo ka tirsan Taliska Booliska ayaa Taliyaha kala qeyb-galay munaasabadaan.

Ciidankan cusub ayaa waxay ka qeyb qaadanayaan sugidda amniga muwaadiniinta Soomaaliyeed, xilli uu dalka ku jiro marxalad dagaal oo ka dhan ah argagixisada, gaar ahaan kooxda Al-Shabaab.

Maalmo kahor ayay aheyd markii dugsiga tababarrada ciidamada Gorgor ee TurkiSom loogu soo gaba-gabeeyay tababar urur cusub oo kamid noqonaya ciidanka Gorgor.

Ciidamada Soomaaliya oo kaashanaya kuwa deegaanka ayaa xilligaan dagaal kula jira kooxda Al-Shabaab, ayada oo madaxweyne Xasan Sheekh uu sheegay in istiraatiijiyadda dowladda ay tahay in muddo kooban lagu soo afjaro kooxda, xilli guulo badan laga gaaray dagaalka, wallow uu gaabis ku yimid bilihii lasoo dhaafay.

Muqdisho (Caasimada Online) – Marwo Faadumo Cabdi Cali oo aheyd Ku-xigeenkii Xoghayaha Joogtada ee Xafiiska Ra’iisul Wasaaraha Soomaaliya, uuna dhawaan xilka qaaday ra’iisul wasaare Xamza ayaa maanta soo saartay qoraal.

Ra’iisul Wasaare Xamza Cabdi Barre ayaa dhawaan waxa uu Cabdirisaaq Cali Ibraahim u magacaabay inuu noqdo ku-xigeenka xoghayaha joogtada ee xafiiska ra’iisul wasaaraha.

Marwo Faadumo ayaa muddo saddex sano iyo bar ah ka shaqeynaysay xafiiska ra’iisul wasaaraha, ayada oo lasoo shaqeysay ra’iisul wasaarayaashii kala dambeeyay.

“Waxaan si mug iyo miisaan leh ugu mahad-celinayaa mas’uuliyiinta aan sida kalsoonida leh usoo wadashaqaynay ee uu ugu horreeyo ra’iisul wasaaraha xukuumadda JFS Mudane Xamza Cabdi Barre iyo ra’iisul wasaarihii hore Mudane Maxamed Xuseen Rooble,” ayey ku tiri qoraalka ay soo saartay ku-xigeenkii hore ee xoghayaha joogtada ee xafiiska ra’iisul wasaaraha.

Sidoo kale waxay ku boorisay dowladda federaalka ee uu hoggaamiyo madaxweyne Xasan Sheekh in ay gabdhuhu qayb lixaad leh ka noqdaan heerarka maamulka dhexe iyo sare ee xafiisyada dowladda.

Hoos ka aqriso qoraalka

Waxaa sharaf ii ahayd in aan saddex sano iyo bar u helay fursad aan ugu adeego qaranka gaar ahaan Xafiiska Ra’iisul Wasaaraha (OPM Somalia).

Marxalado, Madax qaran iyo Xukuumado kala duwan, mas’uuliyaddu waa hirgalinta ahdaafta Xukuumadda iyo u adeegista ummadda.

Waxaan si mug iyo miisaan leh ugu mahadcelinayaa mas’uuliyiinta aan sida kalsoonida leh usoo wadashaqaynay ee uu ugu horreeyo RW Xukuumadda JFS Mudane Hamza Abdi Barre, Ra’iisul Wasaarihii hore Mudane Mohamed Hussein Roble, Ra’iisul Wasaare Ku Xigeenada Mudane Salah Jama iyo Mudane Mahdi M. Gulaid, Wasiir Dowlayaasha Mudane Hirsi Gani iyo Mudane Abdihakim Ashkir, Dhammaan Xoghayayaashii hore iyo Xoghayaha hadda jooga, Agaasimayaasha, La-taliyayaasha, Saraakiisha iyo Ciidamada XRW, dhammaan shaqaalaha iyo hawlwadeenada kala duwan ee XRW iyo guud ahaan Xukuumadda.

Waxaan si gaar ah ugu mahad-celinayaa gabdhaha Xafiiska RW oo si hagar la’aan iyo hoggaamin leh iila shaqeeyay. Waxaan u rajeenayaa in gabdhuhu qayb lixaad leh ka noqdaan heerarka maamulka dhexe iyo sare ee Xafiisyada Dowladda.

Guul ayaan u rajeenayaa Xafiiska Ra’iisul Wasaaraha, Hoggaaminta RW Hamza Abdi Barre iyo guud ahaan Xukuumadda Dan Qaran.

Mahadsanidiin

Hargeysa (Caasimada Online) – Wasaaradda arrimaha dibadda Somaliland ayaa mar kale war cusub kasoo saartay heshiiska muranka dhaliyay ee ay la gashay Itoobiya, kaas oo uu Muuse Biixi ugu saxiixay Abiy Axmed 20 kiilo mitir oo kamid ah badda Soomaaliya.

Warsaxaafadeed ay soo saartay wasaaradda arrimaha dibadda ee maamulka fadhigiisu yahay Hargeysa ayaa waxaa digniin loogu diray waddamada kasoo horjeedo heshiiska.

Sidoo kale waxaa qoraalkan oo lagu baahiyay bogga wasaaradda arrimaha dibadda lagu sheegay in Somaliland aanay marnaba aqbali doonin waxkasta oo ka hor imaanaya danteeda iyo doonisteed madax bannaanida.

“Somaliland waxay si aan ka leex leexad lahayn u diidaysa muquuninta noockasta oo ay noqoto, gaar ahaan wixii kasoo horjeeda danteeda qaranka, ama doonisteeda madaxbannaanida” ayaa lagu yiri warsaxaafadeedka.

Somaliland ayaa ku dooday in heshiiska ay la gashay dowladda Itoobiya uu yahay  mid keenaya iskaashi iyo ka wada faa’iidaysi laba geesood ah, oo dan u ah labada dhinac.

Dhanka kale Somaliland ayaa u digtay waddamo ay sheegtay inay doonayaan inay soo farogeliyaan heshiiskan iyo ururo waa weyn, balse aysan carab baabin magacyadooda.

“Somaliland si wayn ayay u fahansantahay waddankasta ama ururkasta oo doonaya in uu faraha lasoo galo hawshan, isaga oo ku dhexdhuumanaya arrinta beenta ah ee ah ilaalinta madaxbannaanida Soomaaliya, si ay u gaadhaan danaha qaramadooda” ayaa lasii raaiyay.

Waxaa kale oo uu qoraalka intaasi kusii darayaa in Somaliland ay ka go’antahay ilaalinta nabada guud ee gobolka iyo caalamka, ayna ku foogaantahay ilaalinta biyaha Badda Cas.

Hadalkan ayaa kusoo aadayo, ayada oo weli halkeedii ay tahay xiisadda badda, isla markaana si wayn looga dareemay gobolka, maadaama la’isla aaday fagaaraha caalamka.

Si kastaba, dhowaan dowladda Soomaaliya ayaa dhankeeda heshiis difaac la gashay Turkiga, kaas oo ciidamo iyo maraakiib dagaal geynayo xeebaha dalka, si ay u ilaaliyaan.

Garoowe (Caasimada Online) – Deegaanada Puntland ayaa maanta laga Soomin, kadib markii maamulka uu ku dhowaaqay in xalay deegaanadooda aan laga arkin bilashasa bisha Barakeysan ee Ramadaan, go’aankaas oo ka duwan midka dowladda dhexe, maadaama xalay Muqdisho looga dhawaaqay in maanta ay tahay maalinta 1-aad ee bisha Ramadaan.

Wasiirka Cadaalada Puntland, Maxamed Cabdiwahaab oo ay hareero taagan yihiin qaar kamid ah culimada Garoowe ayaa ku dhawaaqay in aan Puntland laga arag bishii Ramadaan isla markaana ay maanta tahay maalinta 30 aad ee bisha Shacbaan.

Wasaaradda cadaaladda iyo culimada ayaa isku raacay in maanta la dhameystiro bisha Shacbaan, berina la Soomo maalinta koowaad ee Ramadaan.

“Bishii ma sugnaan sidaas daraadeed waxaan isla qaadanay annaga oo ah culimada iyo wasaaradda cadaaladda inay beri tahay Shacbaan, sodonkeedana aan buuxineyno” ayuu yiri mid kamid culimada Puntland.

Go’aanka Puntland ayaa kusoo aaday, ayada oo xalay dowladda federaalka Soomaaliya ay xaqiijisay in maanta ay tahay maalinta koowaad ee bisha Ramadaan, kadib markii culimada wasaaradda awqaafta iyo arrimaha diinta XFS ay Studiyaha Telefishinta Qaranka Soomaaliyeed ku dhaariyeen Jamaal Axmed Mayow oo sheegay in bilashada bisha Ramadaan uu ka arkay degmada Awdheegle ee gobolka Shabeellada Hoose.

Wasiirka awqaafta iyo arrimaha diinta Mukhtaar Roobow Cali (Abuu Mansuur), ku xigeenkiisa iyo guddoomiyaha hey’adda culimada Soomaaliyeed oo kulanka dhaarinta goobjoog ahaa ayaa ku dhawaaqay in berri ay tahay maalinta koowaad ee Soon-qaad.

Dhinaca kale, Sacuudiga ayaa isna goor sii horeysay oo xalay ah xaqiijiyay in maanta ay tahay maalinta koowaad ee bisha Ramadaan, ayada oo meelo kala duwan oo Sacuudiga ah laga arkay bisha.

Kadib warka kasoo baxay maamulka Xarameynka ayaa waxaa si rasmi ah taraawiixda looga bilaabay Xaramka, kadib salaaddii Cishaha.

“Bisha Ramadaan 1445/2024 ayaa laga arkay dalka Sacuudiga!. Ramadaan 1445/2024 wuxuu bilaabmayaa berri, 11 March 2024. Salaada Taraawiixda ayaa ka bilaaban doonta Labada Masjid ee Barakeysan Salaada Cishaha kadib,” ayaa lagu qoraal kasoo baxay Xarameynka.

Muqdisho (Caasimada Online) – Sii-hayaha wasiirka amniga Soomaaliya, ahna wasiiru dowlaha wasaaraddaas Maxamed Cali Xagaa ayaa qabtay shir jaraa’id, isagoo wakiil ka ah xildhibaanada iyo masuuliyiinta dowladda federaalka ee ka soo jeeda gobollada waqooyi, gaar ahaan gobolka Awdal.

Wasiir Xagaa ayaa si adag uga hadlay dhaqdhaqaaq siyaasadeed oo sida uu sheegay Muuse Biixi uu ka bilaabay gobolka Awdal, sidoo kale wasiirka ayaa farriin adag u diray taliyaha ciidamada Itoobiya, isagoo ka jawaabay hadal ka soo yeeray.

Wasiirka ayaa sheegay in maamulka Muuse Biixi uu bilaabay inuu caburiyo oo xirxiro odayaasha, saxafiyiinta iyo qof kasta oo reer Awdal ah oo lagu tuhmay inuu ka soo hor jeeda qorshaha halista ah ee Muuse Biixi uu badda ku siinayo Itoobiya.

“Xalay magaalada Ceelsheekh waxaa laga soo qabtay cuqaashii diiday inay halkaas tagaan guddi uu Muuse u xil-saartay inay fuliyaan heshiis ku sheegii uu badda ku siiyey Itoobiya,” ayuu yiri Wasiir Xagaa.

Sidoo kale wasiirka ayaa sheegay in dadkii ku noolaa deegaanada ay metelaan ay dareemayaan caburintii ugu weyneed, kadib markii ay diideen qorshaha ciidamada Itoobiya loogu wareejinayo badda, sidoo kale wuxuu sheegay in ciidamada Itoobiya ay aaggaas gaaf wareegayaan.

“Muusow wixii aad ka dagaalantay dadka haku sameynin, waad la socotaa wixii kaa raacay Goojacadde iyo Laascaanood, Muusow wax aad walaalnimo ku weysay xoog ku gaari meysid ee ka jog waxaad faleysid,” ayuu hadalkiisa ku sii daray wasiir Xagaa.

Wuxuu ugu baaqay shacabka Somaliland inay iska dulqaadaan gumeysiga Muuse Biixi, isagoo u balan qaaday in dowladda Soomaaliya ay garab taagnaa doonto oo si dhow ay ula socon doonto dhaqdhaqaaqooda, garabna ay siin doonto.

Sidoo kale wasiirka amniga Soomaaliya wuxuu sheegay in Taliyaha ciidamada Itoobiya uu ku andacooday in hadii ciidamada Itoobiya ay ka baxaan Soomaaliya ay dowladnimadu burbureyso, wuxuuna u diray farriin adag.

“Dowladda Soomaaliya waa isku filan tahay, ciidankeeda ayaa u dagaalamaya oo cadowga ka xoreynaya dalka, taliyahaas waxaan leeyahay taada maarey, ciidamada shisheeye dalka waa ka baxayaan sanadkaan dhamaadkiisa, ciidanka Soomaaliyeedna waa u diyaarsan yahay inuu la wareego amniga qaranka,” ayuu yiri wasiiru dowlaha, ahna sii-hayaha xilka wasiirka amniga Soomaaliya.

Hoos ka daawo

Muqdisho (Caasimada Online) – Kamaaludiin Daahir Guutaale oo dhowaan loo magacaabay Xoghayaha Joogtada ah ee Xafiiska Ra’iisul Wasaaraha Soomaaliya ayaa sameeyay ballan qaadkii ugu horreeyay, kadib markii uu Axaddii la wareegay xilkan cusub ee loo magacaabay.

Khudbad uu jeediyay Guutaale ayaa waxa uu ku ballan qaaday in uu la imaan doono hufnaan shaqo, isla markaana uu dardargelin doonno howlaha uu Qaranka Soomaaliyeed u hayo xafiiska.

Sidoo kale waxa uu codsaday in si dhow loogala shaqeeyo mas’uuliyadda culus ee loo igmaday, maadaama ay tahay howl ballaaran oo loo haayo Qaranka Soomaaliyeed.

Dhankiisa Xoghayihii hore ee xilka wareejiyey Maxamed Abuukar Zubeer ayaa isagana sheegay inuu la shaqeyn doono Kamaaludiin Daahir Guutaale, uuna ku garab istaagi doono shaqada, si ay halkeeda uga sii socoto.

Waxaa kale oo uu u rajeeyey in uu Alle u fududeeyo howsha baaxadda leh ee hortaalla Xoghayaha joogtada ah ee xafiiska ra’iisul wasaaraha xukuumadda Soomaaliya.

Munaasabadda waxaa sidoo.kale oo goobjoog ka ahaa Wasiiru dowlaha Xafiiska Ra’iisul Wasaaraha Mudane Xirsi Gaani, Agaasimeyaasha, la-taliyeyaasha iyo howlwadeennada xafiiska ra’iisul wasaaraha.

Xamza Cabdi Barre ayaa shantii bishaan Kamaaludiin Daahir Guutaale u magacaabay inuu nuqdo xoghayaha xafiiskiisa, kaas oo sidoo kale horay uga mid ahaa la-taliyeyaashiisa gaarka ah.

Guutaale ayaa sidoo kale horay uga soo shaqeeyay madaxtooyada, isaga oo kasoo qabtay xilal kala duwan, marna waxa uu ka tirsanaa xisbiga Wadajir ee uu hoggaamiyo Cabdiraxmaan Cabdishakuur, walow uu mar dambe isaga baxay.

Muqdisho (Caasimada Online) – War qoraal ah oo kasoo baxay xafiiska Madaxweynaha Jamhuuriyadda Federaalka Soomaaliya ayaa waxaa looga hadlay bilashada bisha barakeysan ee Ramadaan oo maanta kow ah, maadaama laga sooman yahay waddamada Islaamka oo ay ka mid tahay Soomaaliya.

Ugu horreyn Madaxweyne Xasan Sheekh ayaa hambalyo u diray guud ahaan dadka Soomaaliyeed, isaga oo la wadaagay hambalyada munaasabadda bisha Ramadaan.

“Dhammaan shacabka Soomaaliyeed iyo guud ahaan caalamka Islaamka waxaan idiin ku hambalyeynayaa munaasabadda barakaysan ee bilashada bisha Ramadaan” ayuu Xasan Sheekh Maxamuud.

Madaxweynaha ayaa sidoo kale shacabka Soomaaliyeed ka dalbaday laba arrin oo muhiim ah, wuxuuna ka dalbaday inay caawiyaan dadka danta yar iyo inay u duceeyaan dalka, si looga gudbo xaaladaha adag.

“Bisha naxariista iyo dambi dhaafka awgeed, waxaan dadka Soomaaliyeed ku baraarujinayaa in ay u istaagaan taakuleeynta dadkeenna danyarta ah, oo ay badiyaan Rabbi-bariga bishan barakaysan oo dalka iyo dadkaba ugu duceeyaan amni iyo barwaaqo” ayuu mar kale yiri madaxweynuhu.

Waxaa kale oo uu sii raaciyay “Alle ha inaga aqbalo acmaasha wanaagsan, Ramadaan kariim”.

Dhankiisa ra’iisul wasaare Xamza ayaa hambalyo u diray shacabka “Waxaan hambalyo ku aadan curashada bisha barakeysan ee Ramadaan u dirayaa dhammaan Ummadda Muslimiinta ah, gaar ahaan shacabka Soomaaliyeed.

Sidoo kale wuxuu kusii daray “Waxaan Allaah (SWT) waydiisaneynaa inuu na waafajiyo cibaadada bisha Soon, sidoo kalena uu naga aqbalo”.

Marka (Caasimada Online) – Warar kala duwan ayaa kasoo baxaya khasaaraha ka dhashay howlgal culus oo gelinkii dambe ee shalay ciidamada Xoogga dalka Soomaaliyeed iyo saaxibada caalamiga ah ay ka sameeyeen qaybo kamid ah gobolka Shabeelaha Hoose, kaas oo lagu beegsaday Al-Shabaab.l.

War kooban oo kasoo baxay dowladda federaalka ayaa lagu sheegay in howlgalkan lagu beegsaday koox ka tirsan Al-Shabaab oo isku uruursaneysay goobta la weeraray, lagana hortegay qorshe culus oo ay damacsaneyd.

“Howlgal qorsheysan oo ay iska kaashadeen Ciidanka Qaranka iyo saaxiibada Mareykanka ayaa lagu bartimaameedsaday koox ka tirsan khawaarijta oo isku abaabulayay gobolka Shabeellada Hoose,” ayaa lagu yiri qoraalka.

Ma shaacin dowladdu goobta uu sida gaarka ah uga dhacay howlgalkan, marka laga soo tego inuu ka dhacay gobolka Shabeelaha Hoose.

Dhanka kale, dowladda Soomaaliya ayaa shaaca ka qaaday in weerarkan lagu dilay ugu yaraan saddex ka tirsanaa Al-Shabaab, sidoo kale lagu burburiyay dhagar ay soo maleegeysay kooxda, sida lagu sheegay warsaxaafadeedka.

“Howlgalka waxaa lagu dilay saddex ka tirsan maleeshiyaadka khawaarijta ah, waxaana goobta lagu burburiyay dhagartii ay maleegayeen” ayaa mar kale lasii raaciyay.

Ma jiro wax hadal ah oo kasoo baxay dhinaca Al-Shabaab oo ku aadan howlgalkaasi ee ay guusha ka sheegatay dowladda federaalka Soomaaliya.

Muddooyinkii dambe ciidamada Soomaaliya oo kaashanaya saaxibada caalamiga ah ayaa howlgallo culus ka waday gobollada dalka, kuwaas oo khasaare lagu gaarsiisay Al-Shabaab, loogana xoreeyay dhul balllaaran.

Muqdisho (Caasimada Online) – Dowladda Federaalka Soomaaliya ayaa xaqiijisay in berri ay tahay maalinta koowaad ee bisha Ramadaan, kadib markii culimada wasaaradda awqaafta iyo arrimaha diinta XFS ay Studiyaha Telefishinta Qaranka Soomaaliyeed ku dhaariyeen Jamaal Axmed Mayow oo sheegay in bilashada bisha Ramadaan uu ka arkay degmada Awdheegle ee gobolka Shabeellada Hoose.

Wasiirka awqaafta iyo arrimaha diinta, ku xigeenkiisa iyo guddoomiyaha hey’adda culimada Soomaaliyeed oo kulanka dhaarinta goobjoog ahaa ayaa ku dhawaaqay in berri ay tahay maalinta koowaad ee Soon-qaad.

Wasiir Mukhtaar Roobow ayaa shacabka Soomaaliyeed u xaqiijiyey in Isniinta berri ee 11-ka Maarso ay tahay maalinta koowaad ee bisha Ramadaan, kadib markii meel kala duwan dad jooga ay sheegeen inay arkeen bilashada bisha, halka Jamaal Axmed Mayow oo jooga degmada Awdheegle uu ku dhaartay inuu arkay bishii oo galabta dhalatay.

Sacuudiga ayaa goor sii horeysay oo caawa ah xaqiijiyay in maalinta berri ah ay tahay maalinta koowaad ee bisha Ramadaan, ayada oo meelo kala duwan oo Sacuudiga ah laga arkay bisha.

Kadib warka kasoo baxay maamulka Xarameynka ayaa waxa caawa si rasmi ah taraawiixda looga bilaabaya Xaramka, bacda salaada Cishaha.

“Bisha Ramadaan 1445/2024 ayaa laga arkay dalka Sacuudiga!. Ramadaan 1445/2024 wuxuu bilaabmayaa berri, 11 March 2024. Salaada Taraawiixda ayaa ka bilaaban doonta Labada Masjid ee Barakeysan Salaada Cishaha kadib,” ayaa lagu qoraal kasoo baxay Xarameynka.

Labada masjid ee barakeysan ayey salaaddaha Taraawiixdu ka bilaabatay caawa salaaddii Cishaaha kadib.

Dalal uu kamid yahay Sacuudiga ayaa bilaabay galabta raadinta dhalashada bisha Ramadaan ee sanadkan 1445 Hijriyadda, iyada oo xiligaas ay dalbadeen in la baadi goobo bisha, taasi oo ugu dambeyntii si rasmi ah loo xaqiijiyay inay dhalatay.

Muqdisho (Caasimada Online) –Guddoomiyaha gobolka Banaadir oo shir jaraa’id qabtay ayaa soo saaray amaro ku socda shacabka Soomaaliyeed, kuwaas oo ku aadan bisha Ramadaan iyo hab-dhaqanka bulshada.

Guddoomiye Madaale ayaa amar ku bixiyey in maqaayadaha ku yaalla Muqdisho aan la furi karin maalintii inta lagu guda jiro bisha Ramadaan, isagoo ciidamada booliska faray inay si adag ula dagaalamaan masoomeyaasha.

Sidoo kale wuxuu ka hadlay xafladaha iyo aroosyada, wuxuuna sheegay in habeenkii wixii ka dambeeya 12:00 am aysan sii furaa karin hoteelada lagu dhigo aroosyada.

“Laga bilaabo maanta, hoteellada lagu dhigo arrosyada inay sii furaadaan 12:00 am wixii ka dambeeya waa mamnuuc, amarkaasi wuxuu sii jirayaa ilaa inta aan joogno,” ayuu yiri guddoomiye Madaale.

Sidoo kale wuxuu ka hadlay xoolaha lagu soo dhex daayo magaalada, isagoo digniin kama dambeys ah u diray dadka iska leh xoolaha dhex jooga caasimadda.

“Muwaadin xoolahaaga ama meel ku xareyso ama baadiyo geyso, laakiin maanta kadib ma ogolaa karno inay laamiyada noo jiiftaan, hadii aad cesha weysaan u dul qaata hadhow go’aanka aan ka gaari doono,” ayuu hadalkiisa ku sii daray guddoomiye Madaale.

Sidoo kale guddoomiyaha ayaa ka hadlay maan-dooriyaha isagoo sheegay in tukaankii lagu dhex arko daroogo uu burburi doono maamulka gobolka Banaadir.

“Daroogada iyo kalaabyada lagu tunto inay magaaladaan ka sii jiraan aad ayaan u diidanahay,” ayuu yiri duqa Muqdisho oo ka sheekeeyey waxyaabo uu soo arkay habeen uu tegay hoteelada lagu tunto ee Muqdisho ku yaalla.

“Habeen ayaa Hotelka Boosh ugu galay qof qaawan oo wax dhar ah aan waday, wiilashii ila socday ayaa damcay inay sawiraan, waan ka celiyey oo lama sawirin, masuulkii inta meel soo istaaga dadkaas difaaca, muxuu ku difaacayaa, ma ogyahay horta waxa meesha ka socda?” Ayuu yiri guddoomiye Madaale.

Hoos ka daawo