Muqdisho (Caasimada Online) – Ciidamo cusub ayaa maanta tababar heer sare ah loogu soo xiray magaalada Muqdisho, kaasi oo ay ku qaateen dugsiga tababarrada Ciidanka Booliska Soomaaliyeed ee Jeneraal Kaahiye.

Ciidamadan ayaa waxaa tababarka usoo xiray sii-hayaha wasiirka amniga gudaha ahna wasiiru-dowlaha wasaaradda amniga Maxamed Cali Xagaa iyo Taliyaha ciidanka booliska Soomaaliyeed S/Guuto Sulub Axmed Firin.

Ciidamadaan ayaa kamid noqon doona booliska Soomaaliyeed, waxayna ka qeyb qaadan doonaan dadaalada lagu xakameynayo dhagarta kooxaha argagixisada ay bulshada Soomaaliyeed u soo maleegaan.

Sareeye Guuto Sulub Axmed Firin oo la hadlay ciidankan tababarka loo soo xiray ayaa kula dar-daarmay in ay la dagaalamaan argagixisada iyo waxyaabaha maanka-dooriya, bulshadana ay si wanaagsan ula dhaqmaan, maadaama ay ka soo dhex baxeen bulshada.

Sidoo kale, Wasiir Xagaa ayaa dhankiisa uga mahad-celiyay taliska ciidanka booliska Soomaaliyeed dadaalka ay galiyeen dhismaha ciidanka dhalinyarada ah ee ku soo biiray ciidanka booliska.

Maalmo kahor ayay aheyd markii dugsiga tababarrada ciidamada Gorgor ee TurkiSom loogu soo gaba-gabeeyay tababar urur cusub oo kamid noqonaya ciidanka Gorgor.

Ciidamada Soomaaliya oo kaashanaya kuwa deegaanka ayaa xilligaan dagaal kula jira kooxda Al-Shabaab, ayada oo madaxweyne Xasan Sheekh uu sheegay in istiraatiijiyadda dowladda ay tahay in muddo kooban lagu soo afjaro kooxda, xilli guulo badan laga gaaray dagaalka.

London (Caasimada Online) – Jaaliyadda Somaliland ee UK ku nool ayaa Sabtidii isugu soo baxday dibadbax ay ka hordhigeen aqalka baarlamaanka UK, kaasi oo ay ku kala qeybsanaayeen dadweynihii isugu yimid.

Dibadbaxa oo ahaa mid lagu taageerayay heshiiska is afgaradka ee Somaliland la gaartay Itoobiya oo lagu siiyay dekad iyo saldhig ciidan ayaa waxaa dhinaca kale dibadbaxa taageerada barbar socday mid lagu diidanaa xad-gudubka Itoobiya oo ay dhigayeen jaaliyadda Somaliland oo laba u kala qeybsan.

Dibad-baxayaasha Somaliland ee taageerayay heshiiska Somaliland iyo Itoobiya oo sitay calamada Itoobiya iyo Somaliland ayaa dowladda UK ugu baaqayay inay aqoonsi siiyaan Somaliland oo 31 sano ka badan aqoonsi ka raadineysay dunida.

Dhinaca kale, dibad-baxyada ayaa waxaa jahwareer ku riday dibad-baxyo kale oo kasoo horjeeday xad’gudubka Itoobiya oo ku tilmaamay mid dhul doon iyo bad doon ah.

Garabkan ayaa waxay dowladda UK ka dalbadeen in ay ilaaliyaan midnimadda iyo qaranimada Soomaaliya oo Ingiriiska uu horseeday xornamadii ka hor inta aysan is raacin gobolada Waqooyi iyo Koonfur.

Dibad-baxaan ayaa waxaa la sheegay inay soo abaabushay xukuumadda maamulka Somaliland oo dadaal ugu jirto in ay ka go’do Soomaaliya inteeda kale xilli ay taagan tahay xiisad ka dhalatay heshiis uu madaxweynaha Somaliland u saxiixay Itoobiya inay ku qaadato dekad iyo dhul 20KM ah.

Kismaayo (Caasimada Online) – Waxaa maanta xukun dil ah lagu fuliyay danbiile Xasan Cabdullaahi oo hooyadiis Xaliimo Maxamed Cumar ku dilay magaalada Kismaayo Juun 11, 2023 oo ku siman muddo 9 bil kahor.

Maxkamadda Darajada 1-aad ee magaalada Kismaayo ayaa maanta xukunka dhaqan-galka ah ee ku fulisay Xasan Cabdullaahi.

“Si waafaqsan aayadda Qur’aanka ah ee Suratu Baqrah 178-aad ee Ilaahay ku yidhi ‘Rabi wuxuu farad ka dhigay dadka dadka laaya in iyagana la qisaaso oo qisaas lagu fuliyo’ taas inaga oo cuskanayna waxaa halkaan u taaganahay in qisaasta laga oogo Xasan.”

Ninkan ayaa maxkamadeyntiisa soo socotay billo, ayada oo la horgeeyey maxkamadda darajada koowaad ee magaalada Kismaayo isaga oo qiranaya inuu si ku tala-gal ah u dilay hooyadiis, taasi oo fajaciso noqotay.

Xasan ayaa markaas waxa uu maxkamadda ka hor caddeeyey inuu miyir qabay oo wax xanuun ah uusan dareemeyn, markii uu Hooyadiis kula kacay falkaas.

Xasan ayaa la sheegay in Hooyadiis AUN ay dalka ku soo celisay kadib markii uu qurbaha ku dhaqan doorsoomay, wuxuuna ugu dambeyn ku dilay magaalada Kismaayo oo dhaqan celin ay u keentay.

Si kastaba, Kiiskaan oo ahaa mid argagax ku abuuray dadka reer Kismaayo ayaa ugu dambeyn maanta lasoo gaba-gabeeyay, maadaama maanta xadkii qisaasta laga oofiyay Xasan Cabdullaahi.

Hargeysa (Caasimada Online) – Madaxweynaha Somaliland, Muuse Biixi Cabdi ayaa maanta soo saaray wareegto uu ku sameeyay isku shaandheyn, taasi oo xilalkii kaga qaaday mas’uuliyiin ka tirsanaa xukuumadiisa.

Madaxweynaha ayaa sidoo kale waxa uu wareegtadan ku magacaabay xubno cusub oo kamid noqonaya xukuumadda, halka uu isku beddel ku sameeyay wasaaradaha qaarkood.

Muuse Biixi ayaa ugu horayn xilkii ka qaaday wasiirkii wasaarada gaadiidka iyo horumarinta jidadka Saleebaan Cawad Cali Bukhaari, waxayna xil ka qaadista wasiirka imaneysa iyada oo aan weli la horgayn golaha wakiilada, si loo ansixiyo kadib markii dhawaan la magacaabay.

Sidoo kale waxa uu wasiirka cusub ee wasaaradda kalluumaysiga iyo horumarinta xeebaha u magacaabay Raabbi Cabdi Maxamed Maxamuud. Halka uu Cabdinaasir Caydiid Maxamed Faarax u magacaabay wasiir ku-xigeenka wasaaradda horumarinta beeraha Somaliland.

Hoos ka aqriso wareegtada oo u dhigneyd sidan;

Madaxweynaha Jamhuuriyadda Somaliland, Mudane Muuse Biixi Cabdi waxa uu maanta oo ay taariikhdu tahay 10/03/2024 uu wareegtooyin Madaxweyne uu xilka qaadis, magacaabid iyo isku bedel ku sameeyey qaar ka mida xubnaha Golaha Wasiirrada Jamhuuriyadda Somaliland.

Ujeeddo: Xil Ka-qaadis

Saleebaan Cawad Cali Bukhaari;
Wasiirkii Wasaaradda Gaadiidka iyo Horumarinta Jidadka

Sida aad la socoto, xilka Qaranka ayey dabcigiisa tahay in uu meerto noqdo, oo hadba loo igmado ciddii hanan karta. Sidaa darteed, waxaan gartay in laga bilaabo taariikhda maanta aan kaa qaado xilkii aad hore u haysay. Waxaan kaaga mahad-celinayaa muddadii aad haysay xilka Qaranka.

Ujeeddo: Magacaabid.

Markaan Arkay: Dastuurka Jamhuuriyadda Somaliland, Qodobka 90aad;
Markaan Arkay: Aqoontooda, Kartidooda iyo Waaya-aragnimadooda;
Markaan ku Qancay: In ay Hanan Karaan Masuuliyadda ka Dhalanaysa Xilkan;
Markaan Sameeyey: La-tashi;

Waxaan Go’aamiyey;

1.  In Raabbi Cabdi Maxamed Maxamuud laga bilaabo taariikhda maanta uu ahaado Wasiirka Wasaaradda Gaadiidka iyo Horumarinta Jidadka Jamhuuriyadda Somaliland.
2. In Maxamuud Warsame Jaamac Cali laga bilaabo taariikhda maanta uu ahaado Wasiirka Wasaaradda Kalluumaysiga iyo Horumarinta Xeebaha Jamhuuriyadda Somaliland.
3. In Cabdinaasir Caydiid Maxamed Faarax laga bilaabo taariikhda maanta uu ahaado Wasiir Ku-xigeenka Wasaaradda Horumarinta Beeraha Jamhuuriyadda Somaliland.
4. In Faysal Maxamuud Siciid Cabdulle laga bilaabo taariikhda maanta uu ahaado Wasiir Ku-xigeenka Wasaaradda Ganacsiga iyo Dalxiiska Jamhuuriyadda Somaliland.
5. In Muuse Ibraahim Yuusuf Salaf laga bilaabo taariikhda maanta uu ahaado Wasiir Ku-xigeenka Wasaaradda Gaadiidka iyo Horumarinta Jidadka Jamhuuriyadda Somaliland.

ALLAA MAHAD LEH
Muuse Biixi Cabdi
Madaxweynaha Jamhuuriyadda Somaliland

Muqdisho (CaasimadaOnline) – Faah-faahino dheeri ah iyo macluumaad cusub ayaa waxaa laga helayaa dabkii xooganaa ee maanta ka kacay suuqa Bakaaraha ee magaalada Muqdisho.

Afhayeenka Booliska Soomaaliya Qaasim Axmed Rooble ayaa sheegay in dabka uu ka dhashay qarax la dhigay goob qashin ah oo ku taalla suuqa kadibna uu sidaas ugu sii fiday goobo kale, taas oo sababtay gubashada.

Ugu yaraan hal qof ayaa ku dhintay qaraxa dhacay kahor inta uusan kicin dabka, waxaana jira dhaawacyo kale, sida uu xaqiijiyay afhayeenku.

Sidoo kale waxaa jira khasaare baaxad leh oo uu gaystay dabka saaka qabsaday qayb kamid ah suuqa Bakaaraha ee magaalada Muqdisho.

“Goobaha ganacsiga ee gubtay waa 12 boos, waana wax roon iyo wax toos u gubtay” ayuu yiri mid kamid ah ganacsatada suuqa weyn ee Bakaaraha.

Dhaq-dhaqaaqa suuqa ayaa sidoo kale hakad galay, waxaana saameyn guud ku yeeshay dabka maanta ka kacay halkaasi.

Xaaladda ayaa haatan ah mid aad u kacsan, waxaana suuqa gaaray mas’uuliyiin ka tirsan maamulka Gobolka Banaadir oo ka warbixiyay xaaladda guud ee suuqa.

Gubashada suuqa Bakaaraha ayaa marar badan soo laa-laabatay, dowladduna ma baarto sababta keenta dabka sanad kasta ugu yaraan hal mar ka kaca suuqa Bakaaraha.

Muqdisho (Caasimada Online) – Wasiirka arrimaha gudaha Soomaaliya, Axmed Macallin Fiqi oo xalay ka hadlay munaasabad ka dhacday Muqdisho ayaa ka hadlay qaddiyadda Somaliland, isaga oo sheegay in 30 sano kadib calanka Soomaaliya la geyn doono Hargeysa.

Fiqi ayaa shaaca ka qaaday in dowladda federaalka ay  soo afjari doonto wux uu ugu yeeray ruwaayadda 30 sano jirsatay ee uu kala jeedo gooni isku taagga Somaliland.

Sidoo kale waxa uu tilmaamay in haatan dowladda Soomaaliya ay  ka go’an tahay in lasoo celiyo midnimada Soomaaliya, Somaliland-na ay qeyb ka noqoto dowladnimada dalka.

Hadalkan ayaa wasiirku waxa uu ka sheegay bandhigga buuqa Hadhiwaa oo uu qoray Maxamed Haldoor oo ka yimid magaalada Hargeysa, isaga oo sheegay in Haldoor inta uu jiro caafimaadka dalka dibaddiisa calanka buluugga ah la gayn doono Somaliland.

“Waxaan arkayay Maxamed oo calankii Soomaaliyeed oo dusha laga saaaray oo xooggaa yar yax yaxaya. Haka yax yaxin, intaad caafimaad ku maqan tahay, ayaa calanka Hargeysaa la gaynayaa. cid ku taabanaysa ma jirto.” ayuu khudbaddiisa yiri wasiir Fiqi.

Wasiir Fiqi ayaa sidoo kale horay uga jawaabay hadal kaftan u muuqda oo guddoomiyaha xisbiga UCID ee Somaliland Feysal Cali Waraabe uu ka qoray masuuliyiin uu ku jiro Fiqi.

Guddoomiye Feysal ayaa bartiisa Twitterka ku qoray in Axmed Macalin Fiqi, Cabdiraxmaan Cabdishakuur iyo Cabdiraxmaan Odawaa ay soo xirteen dhar  ay ‘bililiqeysteen sanadkii 1991-kii markii ay burburtay dowladnimada Soomaaliya.

Fiqi ayaa isna ku jawaabay “Balse Fiqi wuxuu sheegay in ayaguna ay ku mashquulsan yihiin sidii ay ugu cadeyn lahaayeen masuuliyiinta Somaliland “beenta ay bulshada u sheegayeen muddo 30 sano ah.”

Si kastaba, hadalkan ayaa kusoo aadayo, ayada oo dhowaan wada-hadallo u dhexeeyay dowladda dhexe iyo Somaliland ay ka billowdeen dalka Jabuuti, kuwaas oo uu qayb ka ahaan wasiirka arrimaha gudaha Axmed Macallin oo qayb ka ahaan wafdigii Xasan Sheekh.

Muqdisho (Caasimada Online) – Ciidamada ammaanka ee dowladda Soomaaliya, gaar ahaan kuwa Booliska ayaa maanta jawaab ka bixiyay weerarkii loo adeegsaday hoobiyeyaasha ee xalay lagu garaacay xaafado ka tirsan magaalada gudaha Muqdisho.

Hoobiyeyaasha ayaa laga soo tuuray dhinaca degmada Yaaqshiid, sida ay shaaciyeen saraakiisha laamaha amniga Soomaaliya.

Saddex ka mid ah waxaa la xaqiijiyey inay ku kala dhaxeen degmooyinka Boondheere iyo Cabdicasiis, waxaana la soo weriyey khasaare aan badneyn.

Ugu yaraan hal askari ayaa ku dhaawacmay hoobiyihii koowaad oo ku dhacay gudaha xerada gaadiidka ciidanka booliska Soomaaliyeed oo ku taalla degmada Cabdicasiis.

Afhayeenka booliska Qaasim Axmed Rooble oo maanta shr jaraa’id ku qabtay degmada Dayniile ayaa soo bandhigay hoobiyeyaal iyo hub kale oo tiro badan oo lagu soo qabtay howlgallo.

Hubkan ayaa oo la tusay Wariyeyaasha iyo shacabka Soomaaliyeed ayaa waxaa lagu soo qabtay howlgallo culus oo ay ciidamadu ka sameeyeen guryo ku yaalla caasimada.

Qaasim Axmed Rooble ayaa sheegay in illaa 140 xabo oo hoobiye ah gacanta lagu soo dhigay, wuxuuna shacabka ugu baaqay inay kala shaqeeyaan ammaanka caasimadda.

Muddooyinkii u dambeeyay ammaanka magaalada Muqdisho ayaa soo hagaagay, waxaana socda dadaallo badan oo hey’adaha amniga ee dowladda Soomaaliya ay wadaan, si amni buuxa ay u helaan dadka ku nool caasimadda.

Muqdisho (Caasimada Online) – Tiro hoobiyeyaal ah ayaa xalay lagu garaacay magaalada Muqdisho, kuwaas faahfaahin hordhac ah laga helayo khasaaraha ay geysteen iyo goobaha ay ku dhaceen.

Sida aan ka soo xiganay saraakiil amni afar Hoobiye ayaa laga soo tuuray aagga degmada Yaaqshiid ee gobolka Banaadir.

Saddex ka mid ah waxaa la xaqiijiyey inay ku kala dhaxeen degmooyinka Boondheere iyo Cabdicasiis, waxaana la soo weriyey khasaare aan badneyn.

Ugu yaraan hal askari ayaa ku dhaawacmay hoobiyihii koowaad oo ku dhacay gudaha xerada gaadiidka ciidanka booliska Soomaaliyeed oo ku taalla degmada Cabdicasiis.

Kan labaad waxaa la sheegay inuu ku dhacay aagga xarunta NISA ee Habar-Khadiijo oo aan ka fogeyn xero Gaadiid, isla dehmada Cabdicasiis, faahfaahina lagama helin khasaaraha uu geystay.

Midka saddexaad ee la ogaaday halka uu ku dhacay ayaa la xaqiijiyey inuu ku soo dhacay degmada Boondheere, gaar ahaan meel banaan ah, wax khasaare ahna ma geysan.

Lama helin halka uu ku dhacay hoobiyihii afaraad ee xalay jugtiisa la maqlay, waxayna dadka Muqdisho dareemeen cabsi badan.

Ciidamada ammaanka ayaa deg deg ugu baxay goobihii loo maleynayey in laga soo tuuray hoobiyeyaasha, waxayna ku guuleysteen inay 4-taas ku ekaadaan, in kastoo aan weli lagu guuleysan soo qabashada raggii weerarkaas geystay.

Ammaanka magaalada Muqdisho ayaa soo hagaagay muddooyinkii dambe, waxaana socda dadaallo badan oo hey’adaha amniga ee dowladda Soomaaliya ay wadaan, si amni buuxa ay u helaan dadka ku nool caasimadda.

Muqdisho ( Caasimada Online) – Maxamed Haldoor oo ah wiil dhalinyaro ah, kana yimid magaalada Hargeysa aya xalay buuggiisa Hadhiwaa kusoo bandhigay gudaha magaalada Muqdisho, kaas oo uu uga hadlayo dhibaatooyinkii uu soo maray iyo xaaladdiisa caafimaad.

Waxaa bandhiggga buuggiisa ka qayb-galay wasiiro, xildhibaano, duqa Muqdisho iyo dadweyne fara badan oo u kacay garab istaagga Maxamed oo ah wiil firfircoon.

Hadal dareen leh oo uu ka jeediyay munaasabadda ayaa waxa cod dheer baaq ugu diray Soomaali weyn, isaga oo sheegay in xaaladdiisa caafimaad ay wax ka qaban karaan.

Haldoor ayaa dalbaday in aan cid kale lagu halleyn ee loo diro caafimaad dalka dibaddiisa, maadaama buu yiri ay dowladda federaalka tahay dowlad sharci ah oo la aqoonsan yahay.

“Aniga cidna yaan la igu halleyn xaaladeyda Soomaaliya oo dowlad Sharci ah oo caalamku aqoonsanyahay ay ka jirto ayaan doonayaa inay wax ka qabato” ayuu yiri Haldoor.

Intaas kadib waxaa farriinta Maxamed Haldoor ka jawaabay duqa Muqdisho, Yuusuf Xuseen Jimcaale (Madaale) oo kafaala qaaday caafimaadikisa isagoo ku hadlayay codka caasimada.

“Hargeysa buugaag ayaa looga soo gatay, Garoowe buugaag ayaa looga soo gatay Muqdisho sow caasimadii Ummadda Soomaaliya maaha? magaciina aniga oo ku hadlaayo caafimaadkiisa annagaa kafaala qaadnay” ayuu yiri duqa magaalada Muqdisho.

Sidoo kale wuxuu intaasi ku daray in Maxamed uu yahay nin hami sare ka leh nolosha, isaga u rajeeyay guul iyo caafimaad buuxa.

“Waa nin hami leh waa nin maskaxdiisa sarreyso, waa nin Haldoorka uu la baxay nin u qalma inuu yahay, guuleyos caafimaad taam ah allaha ku siiyo” ayuu mar kale.

Haldoor ayaa horay buuggiisa oo aad loo jecel yahay kusoo bandhigay magaalooyinka Hargeysa iyo Garoowe, ayada oo ay ka iibsadeen dad badan, si ay u dhiirageliyaan.

Muqdisho (Caasimada Online) – Warar kala duwan ayaa kasoo baxaya khasaaraha ka dhashay dab xoogan oo saaka aroortii hore ka kacay gudaha Suuqa Bakaaraha ee magaalada Muqdisho, kaas oo illaa iyo hadda lagu howlan yahay damintiisa.

Dabka ayaa waxaa lagu soo warramayaa inuu si gaar ah uga kacay qaybta Cabdalla Shideeye ee suuqa, wuxuuna kusii fiday goobo kale oo horleh.

Qaar kamid ah ganacsatada suuqa oo la hadlay warbaahinta gudaha ayaa sheegay in dabka uu yahay mid xoogan, isla markaana uu gaystay khasaare baaxad leh.

Sidoo kale waxaa haatan soconaya gurmad ay wadaan gaadiidka dab damiska dowladda hoose ee Xamar iyo kuwa shirkadda Hormuud oo ku sugan suuqa weyn ee Bakaaraha.

Ma cadda waxaa dhaliyay dabkan, oo saameyn aad u ballaaran ku yeeshay dhaq-dhaqaaqa suuqan oo ah kan ugu weyn guud ahaan Soomaaliya.

Mid kamid ah ganacsatada Suuqa oo la hadlay Wariyeyaasha ayaa sheegay inay gubteen 10 dukaan oo ay lahaayeen ganacsato Soomaaliyeed.

“Goobaha ganacsiga ee gubtay waa 12 boos, waana wax roon iyo wax toos u gubtay” ayuu yiri mid kamid ah ganacsatada suuqa weyn ee Bakaaraha.

Xaaladda ayaa haatan ah mid aad u kacsan, waxaana suuqa gaaray ciidamo ka tirsan kuwa ammaanka oo sugaya amniga, si looga hortago boob loo gaysto ganacsiga suuqa.

Gubashada suuqa Bakaaraha ayaa marar badan soo laa laabatay, dowladduna ma baarto sababta keenta dabka sanad kasta ugu yaraan hal mar ka kaca suuqa Bakaaraha.

Garoowe (Caasimada Online) – Madaxweynaha Puntland Siciid Cabdullaahi Deni ayaa xalay shaaciyey liiska wasiir ku-xigeenada iyo wasiiru-dowlayaasha ee ka mid noqonaya xukuumaddiisa cusub, maalmo kadib markii uu magacaabay wasiirada. Hoos ka akhriso:

Magacyada wasiir ku-xigeenada cusub

1. Maryan Cismaan Axmed Fangase ayaa loo magacaabay Wasiir ku xigeenka Wasaaradda Caddaaladda iyo Arrimaha Diinta.

2. Axmed Maxamed Axmed (Qixiye) ayaa loo magacaabay Wasiir ku xigeenka Wasaaradda Amniga iyo DDR-ta.

3. Cabdiraxmaan Khaliif Faarax ayaa loo magacaabay Wasiir ku xigeenka Wasaaradda Arrimaha Gudaha Federaalka iyo Dimuqoraaddiyadda.

4. Cabdullaahi Ismaaciil Maxamed ayaa loo magacaabay Wasiir ku xigeenka Maamulka ee Wasaaradda Maaliyadda.

5. Axmed Maxamed Bulxan ayaa loo magacaabay Wasiir ku xigeenka Dakhliga ee Wasaaradda Maaliyadda.

6. Maxamed Xasan Ibraahim ayaa loo magacaabay Wasiir ku xigeenka Wasaaradda Qorshaynta iyo Iskaashiga Caalamiga ah.

7. Maxamed Diiriye Gama’-diid ayaa loo magacaabay Wasiir ku xigeenka Wasaaradda Waxbarashada iyo Tacliinta Sare.

8. Cabdirashiid Xaaji Jaamac ayaa loo magacaabay Wasiir ku xigeenka Wasaaradda Caafimaadka.

9. Cabdulqaadir Maxamed Geyllan ayaa loo magacaabay Wasiir ku xigeenka Wasaaradda Hawlaha Guud Gaadiidka iyo Guriyaynta.

10. Faarax Cali Cabdi ayaa loo magacaabay Wasiir ku xigeenka Wasaaradda Dekedaha iyo Gaadiidka Badda.

11. Cabdirashiid Shiikh Cali Dhega-Sayn ayaa loo magacaabay Wasiir ku xigeenka Wasaaradda Duulista Hawada iyo Garoomada.

12. Siciido Xuseen Cali ayaa loo magacaabay Wasiir ku xigeenka Wasaaradda Haweenka iyo Horumarinta Qoyska.

13. Yacquub Maxamed Cabdalle ayaa loo magacaabay Wasiir ku xigeenka Wasaaradda Warfaafinta, Isgaarsiinta iyo Dalxiiska.

14. Cabdikariin Maxamed Xasan ayaa loo magacaabay Wasiir ku xigeenka Wasaaradda Ganacsiga, Warshadaha iyo Maalgeshiga.

15. Axmed Cartan Maxamed ayaa loo magacaabay Wasiir ku xigeenka Wasaaradda Xannaanada Xoolaha.

16. Ayuub Cali Axmed ayaa loo magacaabay Wasiir ku xigeenka Wasaaradda Degaanka, Daaqa iyo Isbeddelka Cimilada.

17. Maxamuud Maxamed Cali Gabax ayaa loo magacaabay Wasiir ku xigeenka Wasaaradda Kalluumeysiga iyo Khayraadka Badda.

18. Faarax Jaamac Boos ayaa loo magacaabay Wasiir ku xigeenka Wasaaradda Shaqada, Shaqaalaha iyo Arrimaha Bulshada.

19. Siciid Salaad Maxamed ayaa loo magacaabay Wasiir ku xigeenka Wasaaradda Tamarta, Macdanta iyo Biyaha.

20. Maxamed Siciid Qolombi ayaa loo magacaabay Wasiir ku xigeenka Wasaaradda Gargaarka iyo Maareynta Musiibooyinka.

21. Faa’isa Cali Ismaaciil ayaa loo magacaabay Wasiir ku xigeenka Wasaaradda Beeraha iyo Waraabka.

22. Siciid Saalax Seed ayaa loo magacaabay Wasiir ku xigeenka Wasaaradda Dhalinyarada iyo Ciyaaraha.

Magacyada wasiiru dowlayaasha

1. Cabdul Cali Warsame ayaa loo magacaabay Wasiiru Dawlaha Wasaaradda Caddaaladda iyo Arrimaha Diinta.

2. Keyse Cabdi Yuusuf ayaa loo magacaabay Wasiiru Dawlaha Wasaaradda Amniga iyo DDR-ta.

3. Yuusuf Maxamed Waceys Dhedo ayaa loo magacaabay Wasiiru Dawlaha Wasaaradda Arrimaha Gudaha Federaalka iyo Dimuqoraaaddiyada.

4. Maxamuud Shiikh Ciid Muuse loo magacaabay Wasiiru Dawlaha Wasaaradda Maaliyadda.

5. Faarax Maxamuud Aw Cismaan ayaa loo magacaabay Wasiiru Dawlaha Wasaaradda Qorshaynta, Horumarinta Dhaqaalaha iyo Iskaashiga Caalamiga ah.

6. Cabdisalaan Cali Faarax ayaa loo magacaabay Wasiiru Dawlaha Wasaaradda Waxbarashada iyo Tacliinta Sare.

7. Axmed Shiikh Faarax Maxamed ayaa loo magacaabay Wasiiru Dawlaha Wasaaradda Caafimaadka.

8. Maxamed Siciid Xasan ayaa loo magacaabay Wasiiru Dawlaha Wasaaradda Dekedaha iyo Gaadiidka Badda.

9. Siciid Maxamed Warsame Awaare ayaa loo magacaabay Wasiiru Dawlaha Wasaaradda Duulista Hawada iyo Garoomada.

10. Cabdinaasir Aadan Axmed ayaa loo magacaabay Wasiiru Dawlaha Wasaaradda Xannaanada Xoolaha.

11. Siciid Maxamed Raage ayaa loo magacaabay Wasiiru Dawlaha Wasaaradda Kalluumeysiga iyo Khayraadka Badda.

12. Cabdiraxmaan Axmed Ismaaciil ayaa loo magacaabay Wasiiru Dawlaha Wasaaradda Tamarta, Macdanta iyo Biyaha.

13. Cabdiqaadir Jaamac Cali Afrax ayaa loo magacaabay Wasiiru Dawlaha Wasaaradda Beeraha iyo Waraabka.

14. Cabdifitaax Maxamed Cabdinuur ayaa loo magacaabay Wasiiru Dawlaha Madaxtooyada.

Muqdisho (Caasimada Online) –  Ra’iisul Wasaaraha Xukuumadd Federaalka Soomaaliya Mudane Xamsa Cabdi Barre, ayaa maanta booqday degmooyinka Dharkenley iyo Kaxda, isaga xarigga ka jaray dhismaha waddada laamiga ah ee isku xirta Xoosh ilaa Ex Kontorool Afgooye, taas oo sii marta illaa saddex degmo oo ka tirsan gobolka Banaadir.

Waxaa ra’iisul wasaaraha booqashadan iyo xarig jarka ku wehlinayay duqa magaalada Muqdisho Yuusuf Xuseen Jimcaale (Madaale) oo uu maamukiisu dhisay waddadaasi.

Xamza oo munaasabadda ka hadlay ayaa sheegay horumarka ay ku tallaabsatay caasimaddu in aan la xaqiijiyeen haddii aan amniga wax laga qaban.

Sidoo kale waxaa uu tilmaamay in horumarka iyo amnigu ay yihiin labo isku xiran oo haddii mid la waayo kan kalana uu meesha ka baxayo.

Ra’iisyl wasaaraha Soomaaliya ayaa sidoo kale uga mahadceliyey Maamulka Gobolka Banaadir iyo Hey’adaha amniga sida ay uga go’an tahay nadiifinta magaalada, si dib loogu soo celiyo bilicdii iyo amnigii ay ku suntanayd Caasimaddu.

“Nabaddu waa tilmaanta quruxda iyo bilicda, marka meel kasta laami la saaro, waxaa kor u kaca nabadda, dhaqaalaha iyo bilicda, dhismaha Jidadku waxa ay muwaadinka u sahlayaan isu socodka”. ayuu khudbaddiisa ku yiri Ra’iisul wasaare Xamza.

Ugu dambeyn wuxuu ugu baaqay muwaadiniinta Soomaaliyeed in canshuurta ay bixiyaan si loogu hormariyo dib u dhaska dalka, isagoo faray dadka deggan  xarumaha danta guud ah in ay banneeyaan, si bulshada loogu adeego, dibna loogu dhiso.

Horay ra’iisul wasaaraha ayaa sidaan oo kale xarigga uga jaray waddada Taleex ee magaalada Muqdisho, taas oo iyana lagu sameeyay dib u dhis ballaaran.

Riyadh (Caasimada Online) – Sacuudiga ayaa goordhoweyd xaqiijiyay in maalinta berri ah ay tahay maalinta koowaad ee bisha Ramadaan, ayada oo meelo kala duwan oo Sacuudiga ah laga arkay bisha.

Kadib warka kasoo baxay maamulka Xarameynka ayaa waxa caawa si rasmi ah taraawiixda looga bilaabaya Xaramka, bacda salaada Cishaa’i.

“Bisha Ramadaan 1445/2024 ayaa laga arkay dalka Sacuudiga!. Ramadaan 1445/2024 wuxuu bilaabmayaa berri, 11 March 2024. Salaada Taraawiixda ayaa ka bilaaban doonta Labada Masjid ee Barakeysan Salaada Cishaha kadib,” ayaa lagu qoraal kasoo baxay Xarameynka.

Labada masjid ee barakeysan ayey salaaddaha Taraawiixdu ka bilaaban doonaan caawa salaadda Cishaa’i kadib.

Dalal uu kamid yahay Sacuudiga ayaa bilaabay galabtii raadinta dhalashada bisha Ramadaan ee sanadkan 1445 Hijriyadda, iyada oo xiligaas ay dalbadeen in la baadi goobo bisha, taasi oo goordhoweyd si rasmi ah loo xaqiijiyay.

Dhamaan bahda Caasimada Online waxay curashada bisha barakeysan ee Ramadaan ugu hambalyeynaysa dhamaan umadda Muslimka ah, gaar ahaan bulshada Soomaaliyeed meelkasta oo ay joogan.

Muqdisho (Caasimada Online) – Wasiirka arrimaha gudaha Soomaaliya Axmed Macalin Fiqi ayaa ka jawaabay hadal kaftan u muuqda oo guddoomiyaha xisbiga UCID ee Somaliland Feysal Cali Waraabe uu ka qoray masuuliyiin uu ku jiro Fiqi.

Guddoomiye Feysal ayaa bartiisa Twitterka ku qoray in Axmed Macalin Fiqi, Cabdiraxmaan Cabdishakuur iyo Cabdiraxmaan Odawaa ay soo xirteen dhar  ay ‘bililiqeysteen sanadkii 1991-kii markii ay burburtay dowladnimada Soomaaliya.

Feysal ayaa soo qaatay sawir ay maasuuliyiintaan galeen sagaashameeyadii, isagoo yiri “Dharakii Daroodku ka Carareen  markii Siyaad Barre ka baxay Mogadishu 1991 Yaye gaashadeen. Kuwaa maanta leh waanu talininan. Waa yeeydi oo Siyaad Barre shiigay. Tuulo ma maamuli karaan.”

Wasiir Axmed Macalin Fiqi oo ka jawaabay hadalka guddoomiye Feysal Cali Waraabe ayaa sheegay in masuuliyiinta Somaliland ay ku mashquulsan yihiin dharka masuuliyiinta dowladda federaalka Soomaaliya.

Balse Fiqi wuxuu sheegay in ayaguna ay ku mashquulsan yihiin sidii ay ugu cadeyn lahaayeen masuuliyiinta Somaliland “beenta ay bulshada u sheegayeen muddo 30 sano ah.”

“Dheriga waxaa kulaylka ka keena waa karka. Faysal Waraabe adna waxaad ku mashquulsan tahay dharkayaga annaguna sidii beentaad sheegaysay 33 sano meesha looga saari lahaa.  Weli la isma gaadhin huuno!” Ayuu yiri Fiqi.

Fiqi ayaa ka mid ah masuuliyiinta ay madaxda Somaliland aad u hadal hayaan markii ay ka hadlayaan arrimaha Soomaaliya, maadaama uu xubin firfircoon ka ahaa masuuliyiintii dowladda federaalka u qaabilsaneed wadahadalada Somaliland.

Wadahadaladii Somaliland iyo dowladda federaalka Soomaaliya ayaa fashilmay markii uu Muuse Biixi badda u saxiixay Itoobiya.

Muqdisho (Caasimada Online) – Xildhibaan Cabdiraxmaan Cabdishakuur Warsame oo qoraal kooban soo saaray ayaa si adag uga hadlay dhacdadii garoonka Aadan Cadde ee ka dhalatay dhibaatada loogu gaystay shacab todobaadkii hore ka dhoofayay gudaha garoonka wuxuuna sheegay in haatan laga laabtay u yeertis wasiirka gaadiidka Fardowso Cismaan Cigaal.

Fardowso ayaa saaka looga yeeray baarlamaanka, si wax looga weydiiyo dhibaatadaas, gaar ahaan lacago 9 dollar ah oo lagu soo rogay dadka ka dhoofaya garoonka.

“U yeerid iyo hor imaasho Golaha guud ee Wasiirka Wasaaradda Gaadiidka iyo Duulista Hawada Xukuumadda JFS iyo jawaabidda su’aallo ordaaheedyo sida uu qabo qodobka 69/2 ee dastuurka KMG iyo qodobada Xeer hoosaadka 53/1, 63.” ayaa lagu yiri qoraalka.

Cabdiraxmaan Cabdishakuur ayaa shaaca ka qaaday in haatan la baajiyay u yeerista wasiiradda, taas oo uu ku tilmaamay in dhaawac iyo sumcad xumo ku tahay Golaha.

“In Golaha Shacabka uu si rasmi ah kulan ugu yeero wasiir Xukuumadda ka tirsan si su’aalo looga waydiiyo dhibkii shacabka ay maalmo ka hor kala kulmeen garoonka diyaaradaha iyo lacagihii dulsaarka ahaa, haddana la baajiyo sabab la’aan waxay dhaawac ku tahay sumcadda guddoonka iyo Golaha” ayuu qoraalkiisa ku yiri xildhibaanka.

Sidoo kale waxa uu tilmaamay in si cad loo jebiyay dastuurka iyo xeer hoosaadka u yaalla baraalamaanka ee ku aadan la xisaabtanka Golaha Wasiirada.

“Waxaa si cad loo jebiyey Qodobka 69aad ee Dastuurka iyo 59aad ee xeerhoosaadka Golaha shacabka ee la xisaabtanka Xukuumadda” ayuu mar kale yiri.

Warsame ayaa intaasi kusii daray “Qof dastuurka magansaday,Sharcigana dabiib biday, Oon xeer difaacayn, Awoodaha dulsaarka ah ,Maxaa uga damiin noqon, Mar- hadii rag doobshaa,Guddun daabka haystaan, Jarta meehsay doonaan!”

Arrintaan ayaa kusoo aadeysa, ayada  saameyn xoogan ay duulimaadyada gudaha (Local) ee garoonkaAadan Cadde ku yeesheen lacagaha cusub ee lasoo rogay, iyada oo shacab fara badan ku xanibmeen garoonka qeybta Local-ka.

Muranka ugu weyn ayaa u dhaxeeyay wasaaradda gaadiidka iyo shirkaddaha diyaaradaha oo ku saabsan in lacagaha xogta rakaabka lagu kordhiyo qiimaha Ticket-ka iyo in aan lagu kordhin, ayada oo xogta dadka dhoofaya loo dhiibayo shirkad gaar ah, taasi oo iyaduna aad uga soo horjeeda nidaamka amniga iyo kalsoonida dadka dhoofaya.

Jowhar (Caasimada Online) – Faah-faahino kala duwan ayaa kasoo baxaya khasaaraha ka dhashay shil diyaaradeed oo goordhoweyd ka dhacay garoonka diyaaradaha magaalada Jowhar ee caasimada maamulka HirShabelle

Wararka ayaa sheegaya in garoonka ay ku dhacday diyaarad nuuca xamuulka qaada, una rarnayd ciidanka ATMIS ee ka howlgalka magaaladaasi.

Ilo wareedyo lagu kalsoon yahay ayaa Caasimada Online u sheegay in shilka diyaaradda uu yimid kadib markii ay ka baxday dhabaha ay ku ordaan diyaaradaha.

Wararka ayaa intaasi kusii daraya in dadkii saarnaa diyaaradda la badbaadiyay, isla markaana uusan jirin khasaare soo gaaray, marka laga tego burburka diyaaradda.

Sidoo kale waxaa lasoo wariyay in dyaaradda uu dab qabsaday, inkasta oo markii dambe lagu guulaystay in la damiyo dabka.

HirShabelle oo faahfaahin ka bixisay shilkan ayaa sheegtay inay diyaaradda ku timid cilad, kadibna ay ku dhacday garoonka, sidoo kaleena diyaaradda ay wadday saanad ciidan, taas oo kasoo duushay dalka Uganda, sida uu Shabelle TV u sheegay mareeyaha garoonka.

“Diyaaraddaas waxa ay kasoo duushay magaalada Kampala ee caasimada dalka Uganda waxay saanad iyo macallimiin tababar u waday ciidamo dagan garoonka Maxamed Dheere ee magaalada Jowhar” ayuu yiri maareeyaha guud garoonka magaalada Jowhar.

Xaaladda ayaa hadda dagan, waxaana diyaaradda soo dhacday gurmad u sameeyay madaxda gobolka iyo ciidamada ATMIS ee ku sugan halkaasi.