Muqdisho (Caasimada Online) – Ra’iisul Wasaaraha Soomaaliya Mudane Xamza Cabdi Barre ayaa maanta soo kormeeray xarunta hay’adda Socdaalka iyo Jinsiyadaha.

Ra’iisul Wasaaraha ayaa halkaasi waxa uu kulammo kula qaatay maamulka iyo howl-wadeennada hay’adda, xilli isbeddel lagu sameeyay hay’adda Socdaalka iyo Jinsiyadaha.

Mudane Xamza ayaa dul istaagay howlaha shaqo ee ka socda hay’adda, isaga oo qiimeynaya miro-dhalka isbeddelka hoggaanka hay’adda Socdaalka iyo Jinsiyadaha ee lagu dardar-gelinayo adeegyada ay u hayso shacabka iyo dowladda Soomaaliyeed.

Agaasimaha hay’adda socdaalka iyo jinsiyadaha ayaa ra’iisul wasaaraha uga warbixiyey qorshaha horumarineed ee hay’adda u hirgalay mudadi koobnayd ee uu xilka hayey.

Waxa uu la wadaagay ra’iisul wasaaraha in ka hoggaan ahaan ay asteeyeen maamul ka caaggan musuq-maasuq iyo ku-tagrifal awoodeed, xilli hay’adda noqotay xudunta musuq-maasuq dowladda federaalka Soomaaliya.

Ra’iisul Wasaaraha ayaa agaasimaha cusub u sheegay in looga fadhiyo inuu sii horumariyo hay’adda Socdaalka iyo Jinsiyadaha oo qaranka u ah waji, sumcad iyo karaamo.

Xamza ayaa sidoo kale ka dhawaajiyay muhiimada ay hay’adda u leedahay dalkeena, islamarkaana ay tahay halka isku xirta Soomaaliya iyo dunida inteeda kale, taasi oo lagama maarmaan ka dhigaysa in ay ilaashato sumcadda ay ku matalayso Soomaaliya iyo tartanka ay adduunka kula jirto.

8-dii bishaan ayay aheyd markii Wasiirka Amniga Xukuumadda Soomaaliya Maxamed Cali Doodishe uu agaasime ku-meel gaar ah u magacaabay hay’adda fadeexadda musuq-maasuq uu hareeyey ee Socdaalka iyo Jinsiyadaha.

Tallaabadan ayaa timid kadib markii agaasimihii hore ee hay’adda Cabdulqaadir Cilmi Cali (Cabdul) uu sheegay inuu xilkaas iska casilay, isaga oo dalka ka maqan kadib markii ay kusoo baxday fadeexad musuq-maasuq.

Cabdul ayaa ka mid ahaa 18 xubnood oo Xeer Ilaalinta Qaranka ay kusoo oogtay dacwad musuq-maasuq, lunsasho hanti iyo xatooyo xoolo dadweyne, inkasta oo eedahaas uu beeniyey markii uu soo saaray warqadda uu isku casilay.

Xubnaha 18-ka ah ee kiiska musuq-maasuq lagu soo oogay ayaa waxaa sidoo kale ku jira Maxamed Aadan Koofi, oo isna horey usoo noqday agaasimaha hay’adda ee ka horreeyey Cabdul, kaasi oo isna sidoo kale iska fogeeyey eedaha loo jeediyey kuna macneeyey kuwo dano kale laga leeyahay.

Si kastaba, hay’adda socdaalka ayaa xuddun u noqotay baaritaanka kiisaska musuq-maasuq ee ay waddo dowladda federaalka, ayada oo la rumeysan yahay in lacagta ugu badan ee dowladda federaalka, laga lunsaday ay ku maqan tahay shaqaalaha sare ee hay’addaas.

Hoos ka daawo muuqaalka

Jowhar (Caasimada Online) – Madaxweynaha Soomaaliya, Mudane Xasan Sheekh Maxamuud iyo wafdi uu hoggaaminayo ayaa maanta gaaray magaalada Jowhar ee caasimada dowlad goboleedka HirSHballe, halkaas oo si weyn loogu soo dhaweeyay.

Xasan Sheekh ayaa waxaa garoonka diyaaradaha ee Maxamed Dheere uga hortegay madaxweynaha HirShabelle, Cali Guudllaawe iyo labada gole ee maamulkaasi.

Ujeedka safarka madaxweynaha ayaa la xiriira dardar-gelinta dagaalka ka dhanka ah kooxda Al-Shabaab ee ka socda gobollada Hiiraan iyo Shabeelaha Dhxexe.

Sidoo kale wuxuu mas’uuiyiinta HirShabelle kala hadli doonaa xallinta khilaafka ka jira maamulkaasi, gaar ahaan arrimo ku aadan xiisadda kala dhalatay xilka qaadistii dhawaan lagu sameeyay guddoomiyihii hore ee maamulka gobolka Hiiraan, Cali Jayte Cismaan.

Madaxweynaha ayaa sidoo kale lagu wadaa inuu booqdo furimaha hore ee dagaalka, si uu u dhiiro-geliyo ciiidamada Xoogga iyo kuwa Macawiisleyda ee la dagaalamaya Al-Shabaab.

Ilo wareedyo lagu kalsoonyahay ayaa innoo sheegay in madaxweyne Xasan iyo wafdigiisa ay kadib usii gudbi doonaan dhanka Galmudug, isaga oo tegi doono furinta dagaalka.

Wararka ayaa sheegaya in ciidamo badan oo sugayo amniga ay dowladda Soomaaliya geysay halkaasi, sidoo kale waxaa ku sugan taliyaha ciidamada dhulka ee Xoogga dalka Soomaaliyeed, Jeneraal Axmed Aadan Cali oo isna shalay gaaray magaalada Galcad.

Madaxweynaha Soomaaliya ayaa horay u booqday jiida hore ee dagaalka, isaga oo tegay furimaha hore ee HirShabelle iyo Galmudug oo uu mar kale hadda soo booqanayo.

Si kastaba, dowladda Soomaaliya ayaa haatan qorsheyneysa bilaabidda wajiga labaad ee dagaalka ka dhanka ah Al-Shabaab, kaas oo ay wax ka galayaan dalalka dariska ah.

Muqdisho (Caasimada Online) – Xildhibaan Maxamed Abuukar oo ka tirsan golaha shacabka ayaa banaanka hore ee xarunta Villa Hargeysa kula hadlay warbaahinta, isagoo sheegay inay wadaan mooshin ka dhan ah guddoonka golaha.

Xildhibaanka ayaa sheegay in guddoonka ay la xisaabtamayaan, maadaama ay is tuseen in baarlamaanka uusan sidaaan ku sii soca karin, wuxuu sheegay in kulamada golaha oo maalmahaan hakad ku jiray ay maanta u xigtay kulankii oo lagu soo xiray si deg deg ah.

“Mooshin isla xisaabtan ah ayaan ka wadnaa Gudoonka Golaha, sidaan kuma sii shaqeyn karno, waxaa loo baahan yahay isla xisaabtan, waxaan hadda u shaqeynaa sidii baarlamaan waqtigiisu gabagabo yahay,” ayuu yiri Xildhibaan Maxamed Abuukar.

Xildhibaanada golaha shacabka ayaa kulankoodii shalay loogu qeybiyey ku noqoshada miisaaniyadda dowladda ee 2023-ka, kadibna guddoomiye ku xogeenka labaad ee golaha oo shir guddoomineysay ayaa ku war gelisay in kulanka lasoo xiray.

“Guddoonku maalin kasta wuxuu fasaxaa ugu yaraan 100 xildhibaan, sharciguna ugu badnaan 30 xildhibaan ayuu u ogolyahay inuu fasaxo, marka isla xisaabtan kama jiro meeshaan,” ayuu yiri Xildhibaanku.

Sidoo kale xildhibaanka ayaa ka hadlay cunaqabateynta ay kooxda Al-Shabaab ku soo rogtay magaalada Baydhaba, wuxuuna ka mid yahay xildhibaanada laga soo doorto magaaladaas.

Xildhibaan Maxamed Abuukar ayaa madaxweyne Laftagareen oo laga rabay in arrintaan uu wax ka qabto wuxuu ku eedeeyey inuu ku mashquulsan yahay muddo kororsi.

“Nasiib darro Laftagareen wuxuu ku mashquulay muddo kororsi, xisaabtana uguma jirto inuu qaado tallaabo uu ku badbaadinayo dadkiisa, mana garanayo cano uu u yeelan karo kursi kaligiis ah oo lagu go’doomiyey,” ayuu hadalkiisa ku sii daray.

Ugu dambeyntii Xildhibaan Maxamed Abuukar ayaa sheegay in hadii ay yihiin xildhibaanada federaalka ee K/Galbeed ka soo jeeda ay arrintaan kula xisaabtamayaan dowladda federaalka oo ay ka tirsan yihiin, isla markaana ay doonayaan in deg deg dadkooda looga dul qaado cunaqabateynta.

Hoos ka daawo

Muqdisho (Caasimada Online) – Ra’iisul Wasaaraha Xukuumadda Jamhuuriyadda Federaalka Soomaaliya Mudane Xamza Cabdi Barre iyo Wasiirka Wasaaradda Caafimaadka Dr. Cali Xaaji Aadam ayaa maanta xarigga ka jaray Xarunta Dhexe ee Qaranka ee Keydka Daawada Soomaaliya.

Munaasabadda heerkeedu sareeyey ee xarig jarka ayaa waxaa goobjoog ka ahaa Wasiiro ka tirsan xukuumadda, Xildhibaano ka tirsan labada Aqal ee BF, Wakiilka hay’adda WFP ee Soomaaliya, madax ka socotay hay’adda WHO, wakiilo ka socday UNFPA, agaasimayaal, xubno ka socday xafiisyada kale ee dowladda, agaasima waaxeedyada iyo shaqaalaha wasaaradda caafimaadka iyo daryeelka bulshada xukuumadda federaalka Soomaaliya.

Xaruntaan ayaa loogu tala-galey in lagu keydiyo dhamaan dawooyinka soo gala dalka, islamarkaana laga maamulo dhamaan daawada lageynayo maamullada iyo guud ahaan gobolada dalka, waxaana la sheegay inay qeyb ka tahay gaaritaanka yoolka horumarinta caafimaadka guud ee dalka,

Xaruntaan ayaa sidoo kale la filayaa inay daboosho baahida ay dadweynaha Soomaaliyeed u qabaan daawo tayo leh oo la hubiyey badqabkeeda.

Ra’iisul Wasaaraha oo halkaasi ka hadlay ayaa waxa uu tilmaamay in hirgelinta xaruntani ay ka tarjumeyso halbeeg muhiim ah oo la xaqiijiyey, loogana gudbaayo dhibaatooyinkii soddonkii sanno ee la soo dhaafay ay dadkeenna ku sababeen daawooyinka bilaa tayada ah ee dalka la keenayay.

Mudane Xamza ayaa sidoo kale wuxuu umahad-celiyey dhammaan dhinacyadii ka qeyb qaatay hirgelinta xaruntani maanta xariga laga jaray.

Waxa uu faray wsaaradda caafimaadka iyo daryeelka bulshada in si hufan looga faa’deysto xaruntan, islamarkaana laga hirgeliyo xarumo lamid ah dowlad goboleedyada dalka.

Mashruucan muhiimka ah ee dhismaha keydka daawada Soomaaliya ayaa waxaa maal-galiyey dowladdaha Japan iyo Jarmalka, iyada oo lasoo marsiiyey hay’adda cuntada Aduunka ee WFP.

Si kastaba, dhismaha bakhaarka keydka daawada ayaa ah tallaabo aad u wayn oo loo qaaday dhinaca horumarinta adeegyada caafimaadka guud ahaan, waana tallaabo horay loogu qaaday xaqiijinta yoolalka ay hiigsanyso xukuumadda Soomaaliya ee ku qeexan qorshaha qaranka.

Jowhar (Caasimada Online) – Wararka naga soo gaaraya gobolka Shabeelaha Dhexe ayaa sheegaya in haatan kooxda Al-Shabaab ay xubnihii ugu badnaa soo dhoobtay agagaarka magaalada Jowhar ee xarunta dowlad goboleedka HirShabelle.

Ilo deegaanka ah ayaa innoo sheegay in xubnaha AlShabaab ay soo buux dhaafiyeen tuulooyinka u dhow magaaladaasi, iyaga oo halkaas ka bilaabay dhaq-dhaqaaqyo culus.

Ujeedka Al-Shabaab ayaa ah inay go’doon geliyaan magaalada caasimada ah ee Jowhar, sida aanu kasoo xiganay saraakiil dhanka amniga ah.

Sidoo kale Shabaab ayaa la sheegay inay qorsheyneyo inay xayiraad saarto magaalada, si ay u hor istaagto in gudaha loo galo ama laga soo baxo, sidaas oo ay horay ugu sameysay magaalada Baydhaba ee xarunta gobolka Baay.

Xubnaha kooxda Al-Shabaab ayaa lagu arkay deegaano muhiim u ah isku socodka HirShabelle, gaar ahaan waddada xiriirisa magaalooyinka Muqdisho iyo Jowhar.

Dhanka kale ma jiro wax hadal ah oo kasoo baxay madaxda HirShabelle iyo saraakiisha ciidamada dowladda ee ku aadan dhaq-dhaqaaqa Al-Shabaab ee magaalada Jowhar.

Xaaladda ayaa ah mid aad u kacsan, waxaana sidoo kale arrintaan walaac ka muujinaya dadka deegaanka iyo ganacsatada, maadaama ay saameyn xoogan ku yeelan karto.

Al-Shabaab ayaa u muuqata inay billowdo beegsiga magaalooiyinka waa weyn, si ay ugu soo rogto xayiraad, maadaama ay culeys kala kulantay dagaallada haatan ku socdo.

Dhibaatada ugu adag ayaa hadda ka taagan magaalada Baydhaba ee xarunta KMG ah ee Koonfur Galbeed oo ay kooxdu go’doomisay, taas oo keentay in sicir barar laga dareemo magaaladaasi, taas oo ay sidoo kale qaylo dhaan kasoo saareen xildhibaanada Soomaaliya.

Si kastaba, dhaq-dhaqaaqyadan ayaa kusoo aadayo, xilli haatan la filayo inuu dalka ka billowdo wajiga labaad ee dagaalka ka dhanka ah Al-Shabaab ee ka socda goblllada dalka.

Muqdisho (Caasimada Online) – Ra’iisul Wasaaraha Soomaaliya Mudane Xamza Cabdi Barre ayaa maanta guddoomiyey kulan looga hadlayey horumarinta Caddaaladda iyo Garsoorka dalka.

Kulankaan oo ahaa mid xasaasi ah ayaa waxaa kasoo qeyb-galay hay’adaha kala duwan ee ka shaqeeya arrimaha garsoorka.

Masuuliyiinta qeybta ka ahaa kulankaan ayaa waxaa kamid ahaa; Guddoomiyaha Maxkamadda Sare ee dalka, Wasiirka Caddaaladda iyo Arrimaha Dastuurka, Wasiirka Amniga Gudaha, Xeer Ilaaliyaha Guud ee Qaran, Taliyaha Booliska, Maamulka Gobolka Banaadir iyo masuuliyiin kale.

Intii uu socday kulankaan ayaa waxaa lagu fallan-qeeyay muhiimadda ay leedahay fulinta go’aamada ka soo baxa Maxkamadaha dalka oo ay fuliyaan Booliska iyo sidii ay dhinacyadu si dhow ugu wada shaqeyn lahaayeen.

Sidoo kale, kulanka ayaa lagu lafa-guray ahmiyadda ay leedahay in dib-u-habeyn lagu sameeyo shuruucda caddaaladda dalka, si loo waafajiyo hannaanka federaalka ee uu dalka qaatay.

Ra’iisul Wasaare Xamza oo hadal ka jeediyay kulankaas ayaa sheegay in xukuumadda Dan-Qaran ay ahmiyad weyn siineyso horumarinta caddaaladda dalka oo udub-dhexaad u ah horumarka la hiigsanayo iyo wadajirka bulshada.

Kulankaan ayaa qeyb ka ah dadaallada ay dowladda Xasan Sheekh ugu jirto sidii dadka Soomaaliyeed ay u heli lahaayeen garsoor madax-bannaan oo hufan, sida lagu shaaciyay bayaan kasoo baxay xafiiska ra’iisul wasaaraha.

Luuq (Caasimada Online) – Madaxweyne ku xigeenka koowaad ee Jubbaland, Maxamuud Sayid Aadan iyo wafdi uu hoggaaminayo ayaa maanta gaaray degmada Luuq ee gobolka Gedo.

Maxamuud Sayid Aadan oo kasoo kicitamay magaalada Kismaayo ayaa waxaa halkaas kusoo dhaweeyay mas’uuliyiin ka tirsan gobolka, kana degmada iyo bulshada rayidka ah.

Safarkan ayaa waxaa sidoo kale qayb ka ah wasiirka amniga dowlad goboleedka Jubbaland,mas’uuliyiin kale iyo saraakiil ka tirsan maamulkaasi.

Ammaanka ayaa aad loo adkeeyay, ayada oo ciidamo dheeraad ah la dhigay agagaarka garoonka iyo qaybo kale oo kamid ah degmadaasi.

Luuq ayaa kamid ah meelaha haatan laga taageeray maamulka cusub ee uu Axmed Madoobe u magacabay Gedo, kaas oo uu hoggaamiyo Cabdullaahi Shimbir.

Madaxweyne ku xigeenka Jubbaland ayaa sidoo kale la filayaa inuu kulamo ka bilaabo halkaasi, kuwaas oo looga hadli doono amniga iyo xoojinta wada shaqeynta labada dhinac.

Wararka ayaa intaasi kusii daraya in Sayid Aadan uu usii gudbi doono degmooyinka kale, sida magaalada Baardheere halkaas oo uu booqan doono madaxweyne ku xigeenku.

Arrintaan ayaa ku timid, kadib markii ay dhowaan Jubbaland isku ballaarisay gobolka Gedo, oo muddo laga diidanaa, waxaana ay mugacowday maamul cusub.

Si kastaba, saddexdii sano ee lasoo dhaafay gobolka Gedo cagtooda ma dhigin wasiirrada, xildhibaanada iyo madaxda sare ee maamulka Jubbaland, haseyeeshee dadaal dheer kadib hadda wax badan ayaa iska bedelay nidaamkii maamul ee ka jiray gobolkaas.

Geneva (Caasimada Online) – La-taliyaha gaarka ah ee madaxweynaha Golaha Maxkamadda Danbiyada ee ICC Mahad Ahmed Hajji ayaa xafiiskiisa kulan kula aatay mas’uulka ugu sareeya hay’adda xuquuqul insaanka Qaramada Midoobay ee loo soo gaabiyo OHCHR mudane Turk Volker.

Labada mas’uul ayaa kawada hadlay horumarinta iyo wax ka abashada isla xisaabtanka danbiyada sababa dagaalka iyo sidii loola xisaabtami lahaa kuwa ka dambeeya oo cadaaladda loo hor keeni lahaa.

Mudane Turk Volker ayaa Ambassador Mahad Xaaji la wadaagay sida ay muhiim ugu tahay Qaramada Midoobay iney baarto tacadiyadda ka dhacay Soomaaliya oo qaarkood dhawaan ay dhaceyn iyo sidii loo soo qaban lahaa shaqsiyaadka ka dambeeya.

Ambassador Mahad ayaa u sheegay madaxda hay’adda xuquuqul Insaanka Qaramada Midoobay in Soomaaliya ay ka dhacaan tacadiyo kala duwan oo la isla xisaabtamin wuxuuna tusaale u soo qaatay kiiskii Ikraan Tahliil oo wali rag iyo ruux aan lagu heynin.

Ambassador Mahad ayaa bartiisa Twitter-ka ku soo qoray  in cadaalada iyo isla xisaabtanka ay tahey mid Muhiimad gaarka ah u leh ka hor tagga dambiyo dagaal oo dhaca.

Muqdisho (Caasimada Online) – Madaxweynaha Soomaaliya, Xasan Sheekh Maxamuud iyo wafdi uu hoggaaminayo ayaa lagu wadaa in mar kale ay booqasho ku tegaan jiidda hore ee deegaanada lagula dirirayo Shabaab, sida ay innoo xaqiinjiyeen ilo wareedyo xilkas ah.

Madaxweynaha ayaa tegi doono HirShabelle iyo Galmudug oo kamid ah meelaha uu hadda ka socdo gulufka ka dhanka ah Al-Shabaab.

Meelaha uu tegayo madaxweynaha waxaa ka mid ah Jowhar iyo Dhuusamareeb, wuxuuna uga sii gudbi doonaan magaalooyinka la xoreeyay, sida Galcad oo ay joogaan ciidanka Xoogga.

Wararka ayaa sheegaya in ciidamo badan oo sugayo amniga ay dowladda Soomaaliya geysay halkaasi, sidoo kale waxaa ku sugan taliyaha ciidamada dhulka ee Xoogga dalka Soomaaliyeed, Jeneraal Axmed Aadan Cali oo isna shalay gaaray magaalada Galcad.

Ujeedka ayaa ah in madaxweyne Xasan Sheekh uu kormeero xarumaha ciidamada, isla-markaana uu dhiiro-geliyo askarta Soomaaliyeed ee ku sugan jiida hore ee dagaalka.

Dhanka kale, guddoomiye ku xigeenka amniga iyo siyaasadda gobolka Banaadir, Maxamed Axmed Diiriye (Yabooh) oo la hadlay warbaahinta ayaa xaqiijiyay safarka Xasan Sheekh.

“Madaxweyniheynii maalmo kadib inuu safro oo dalka meelo gobollada ah inuu tego inuu halkaas fariisto uu ku hoydo uu ku harsado oo waqti ku qaato madaxdii halkaas tegaan iyadoo ay tahay qorshaha ay wadaan sidii loo soo afjari lahaa fikirka Khawaarijta” ayuu yiri.

Sidoo kale wuxuu ugu baaqay guud ahaan dadka Soomaaliyeed inay qaataan doorkooda, isla-markaana ay ku biiraan dagaalka lagula jiro kooxda Al-Shabaab.

“Khawaarijta haloo soo jeesto, ha lala dagaallo, hana la’iska ilaaliyo” ayuu hadalkiisa sii raaciyay guddoomiye ku xigeenka amniga iyo siyaasadda ee gobolka Banaadir.

Si kastaba, madaxweynaha Soomaaliya ayaa horay u booqday jiida hore ee dagaalka, isaga oo tegay furimaha hore ee HirShabelle iyo Galmudug oo uu mar kale hadda soo booqanayo.

Muqdisho (Caasimada Online) – Askar ka tirsan ciidamada dowladda federaalka Soomaaliya ayaa magaalada Muqdisho ku dishay xaaskii Agaasime Muxiyadiin Xasan Saabeey oo baxsad ka ah dowladda, kadib markii lagu soo eedeeyey musuq maasuq.

Ehellada gabadha la dilay ayaa maanta warbaahinta la hadlay waxayna sheegeen in gabadha oo suuqa adeeg u soo doonatay ay dardareen laba Cabdibile oo ciidanka dowladda ah.

Intaas kadib waxay sheegeen inay isku dayeen inay raadiyaan taliska ay ka tirsan yihiin ciidanka dilay gabadha, balse ay taas ku guul-dareysteen, waxayna farriin u direen dowladda.

Odayaasha u hadlay ehelka gabadha ay dileen ciidamada waxay sheegeen inay dareemayaan in shaatiga dowladnimada lagu dul-minayo, iyadoo Saabey Muqdisho laga eryaday, hadana xaaskiisii la dilay, sida ay hadalka u dhigeen.

“Waxaan cabasho ka nahay dowladda, hadana ayada ayaan u cabaneynaa, dowladaan Alle ayaa nasiiyey aad ayaan u taageersanahay, shalay laba Cabdibile ayaa laamiga ku jiirtay gabar ilmo u heysay Muxiyadiin Xasan Jurus, waana ka dhaqaaqeen,” ayuu yiri mid ka mid ah odayaashii warbaahinta la hadlay.

Wuxuu sheegay in aagga ay gabadha ku dileen ciidankaas ay ku xiran yihiin Kaamirooyinka dowladda, balse ay waayeen cid uga jawaabta cabashadooda.

“Dowladdu gaadiidkii gabadha dilay ayadaa leh, anaguna waxaan nahay dadkeeda, dhib awal ayuu na heystay oo dowladdu waxay nooga dhegtay Muxiydiin Xasan, hadana gabadhii ilmaha u heysay ayay dowladdu dishay,” ayuu odagaan hadalkiisa ku sii daray.

Waxay sheegeen inay yihiin qabiil dhan oo cabanaya, isla markaana ay dowladda ka codsanayaan in dib loo fiiriyo arrintooda, “Dowladda waxaan ka rabnaa inay dib u aragto hagarta shaatigeeda oo nalaku dilaayo,” ayuu hadalkiisa ku sii daray odaga u hadlay reerka.

Hoos ka daawo

Muqdisho (Caasimada Online) – Xildhibaan Xaawo Sokor oo ka tirsan golaha shacabka ayaa ka hadashay go’doonka ay kooxda Al-Shabaab gelisay magaalada Baydhaba ee gobolka Bay oo ayada laga soo doortay.

Xildhibaan Xaawo ayaa farriin u dirtay madaxweynaha K/Galbeed Cabdicasiis Laftagareen, iyadoo ka codsatay in tallaabo deg deg ah uu qaado inta xaaladaan aysan sababin macaluul ama xaalado kale oo bini’aadanimo.

Xaawo Sokor ayaa ka tirsan guddiga xuquuqul insaanka ee golaha shacabka, waxayna faahfaahin ka bixisay waxa ay kala socoto arrinta ka soo korortay magaalada Baydhaba.

“Sida aad la socotaanba Baydhaba muddo toddobaad ah waxay ku jirtaa go’doon ay Al-Shabaab geliyeen, kiilada Sonkorta ah waa la gadaa 2 dollar, marka waxaan farriin u dirayaa dowladda dhexe iyo Koonfur Galbeed, waa jiraan ciidamo xoreyn kara dalka, marka deg deg halooga howlgallo arrintaan,”ayey tiri xildhibaan Xaawo.

Waxay sheegtay in reer Baydhaba ay markii horaba wajahayeen xaalado adag, kadib markii ay iska soo daba noqdeen abaaro daran, sidoo kalena kooxda Al-Shabaab ay dadka u diiday inay beerahooda tacbadaan.

“Shabaabka wax go’doominaya waa tiro aad u yar, waxayna go’doominayaan malaayiin ama kumanaan qof, kaliya waxay rabaan in lala dagaalo, dowladeenu maalin kasta waxay sheegtaa in la qaadayo wajiga labaad ee dagaalka Al-Shabaab, marka madaxda waxaan ka codsaneynaa in shacabka Baydhaba deg deg dhibaatada looga dul qaado,” ayey yiri.

Xildhibaan Xaawo Sokor ayaa sidoo kale ka hadashay dhibaato ka jirta xeebaha dalka, taas oo sababtay in baddu ay disho dad badan maalmihii ugu dambeeyey.

Waxay sheegtay in lix qof ay xeebaha Muqdisho ku dhinteen todobaadkaan, iyadoo dowladda ka codsatay in dadka loo sheego in bad-xiran la galay oo biyaha ay ka fogaadaan.

Hoos ka daawo