Muqdisho (Caasimada Online) – Dowladda Federaalka Soomaaliya ayaa weli sii wadda howlgalka hub ka dhigista ee lagu beegsanayo xaafadaha ay joogaan ciidanka mucaaradka oo dhawaan dagaalka la galay ciidamada ammaanka Soomaaliya.

Taliyaha Qaybta Guud Ee Booliska Gobolka Banaadir, Macallin Mahdi oo qoraal soo saaray shaaca ka qaaday in weli ay sii wadaan howlgallada, isla markaana ujeedkooda uu yahay uruurinta hubka sharci darrada ah.

Sidoo kale, wuxuu ugu baaqay shacabka inay la shaqeeyaan laamaha amniga, ayna soo sheegaan xogta haddii ay arkaan hub sharci darro ah, si ay dowladda ula wareegto.

“Hay’addaha amaanka wali waxa ay wadaan Howlgalkii sareynta sharciga iyo xakameyta hubka sharcidarada ah, muwaadin hadii aad xog ku soo gaarto la soo wadaag nambarada gaaban 991 amma 199,” ayuu yiri Macallin Mahdi.

Wararka ayaa sheegaya in howlgalka uu gaaray degmooyin horleh oo ka tirsan Gobolka Banaadir iyo duleedka, gaar ahaan dhanka deegaanka Jaziira, halkaas oo laga dareemay dhaq-dhaqaaq ciidan.

Horay ciidamada ayaa howlgal hub lagu soo qabtay uga sameeyay degmooyinka Howlwadaag iyo Cabdicasiis oo kamid ah meelihii ay joogeen mucaaradka, kadibna howlgalka waxa uu u wareegay dhanka Degmada Gubadley oo la sheegay inay tageen ciidamo Macawiisley ah oo daacad ah wasiirkii hore amniga Cabdullahi Maxamed Nuur, kuwaas oo ugu dambeyn u baxsaday dhanka Gobolka Shabeellaha Dhexe oomarkii horeba lagu aas aasay.

Si kastaba, xaaladda guud ee magaalada Muqdisho ayaa hadda deggan, waxaana soconayo shirar siyaasadeed iyo dadaallo lagu dhex dhexaadinayo mucaaradka iyo dowladda, kuwaas oo ay qayb ka tahay dowladda Turkiga, si la’isugu soo dhaweeyo labada dhinac.

Lama oga sida ay wax noqon doonaan waxaase laga war sugayaa natiijada kasoo baxda dadaallada haatan socda oo diiradda lagu saarayo sidii xal looga gaari lahaa khilaafka siyaasadeed ee ka taagan dalka, kana dhashay hannaanka doorashooyinka iyo wax ka beddelka dastuurka kumeel gaarka ah.

Muqdisho (Caasimada Online) – Madaxweynihii hore ee Soomaaliya, Mudane Maxamed Cabdullahi Maxamed (Farmaajo) oo maanta isaga iyo Sheekh Shariif ay la hadleen wariyeyaasha ayaa weerar culus ku qaaday Madaxweyne Xasan Sheekh Maxamuud, isaga oo u jeediyay eedeymo culus.

Farmaajo ayaa marka hore ku faanay inuu dhanka wax qabadka uga fiican yahay Madaxweyne Xasan, isla markaana uu kaga wanaagsanaa arrimaha siyaasadda.

“Xasan Sheekh nalama tartami karo iskumana kalsoona waan uga fiicanahy maareynta arrimaha siyaasadda ee  hala yimaado wax uu sheegto,” ayuu yiri Farmaajo.

Waxaa kale oo uu inyaas ku daray “Dhaqaalaha maxaa ku kordhisay, maxaase ummadda u qabatay aaway dhalinyarada shaqo abuur ma u sameysay?”.

Dhanka kale, Farmaajo oo si weyn u dhaliilay tallaabooyinkii u dambeeyay ee dowladda uu hoggaamiyo madaxweyne Xasan Sheekh Maxamuud ayaa ku dhawaaqay inuu gogol wada-hadal dhigayo gurigiisa magaalada Muqdisho.

“Marka hore waxaa rabaa in Madaxweyne Shariif ka tacsiyadeeyo falkii xumaa ee tacadiga ahaa ee lagu bahdilay ee lagu sameeyay dorraad markii heshiis lagu galay xabad-joojin,” ayuu yiri Madaxweynihii hore ee dalka, Maxamed Cabdullaahi Farmaajo.

Madaxweynihii hore ayaa martiqaad u diray Madaxweyne Xasan Sheekh Maxamuud, si gurigiisa uu berri uga qabsoomo kulan wada-hadal ah oo u dhaxeeya madaxweynaaha iyo hoggaamiyeyaasha mucaaradka.

“Haddii uu diido ama uusan imaan. Saaxiibada Soomaaliyeed ee u heelan inay arrintan soo dhex galaan waa soo dhaweynayna. Dowladnimada yarta ah yeysan gacanteena u burburin qofkii Iaahay u qoray ayaa madaxweyne noqonayee,” ayuu mar kale yiri Madaxweynihii hore Maxamed Farmaajo.

Baydhaba (Caasimada Online) – Musharrixiinta xilka madaxweynaha Koonfur Galbeed ee la loolamayo Sheekh Aadan Madoobe ayaa maanta soo saaray bayaan culus oo ay walaac uga muujiyeen hannaanka doorashada oo lagu wado in 10-ka bishan ay ka dhacdo magaalada Baydhaba ee xarunta gobolka Baay.

Warsaxaafadeed ay soo saareen musharixiinta kala ah Shariif Xasan Sheekh Aadan iyo Cabdicasiis Maxamed Sheekh Cismaan Jawaari ayaa marka hore farriin loogu diray wakiilada beesha caalamka iyo dadka Soomaaliyeed oo laga dalbaday inay si dhow ula socdaan hufnaanta doorashadaas oo isha lagu hayo.

Sidoo kale, waxay ay tilmaameen in ka qaybgalka doorashada ee Sheekh Aadan Madoobe oo aan weli iska casilin xilka Guddoomiyaha Golaha Shacabka, ay ka hor imaaneyso hannaanka iyo habsami u socodka doorashooyinka dalka.

“Annagoo kala ah labada Musharax ee Hogaamiyaha Dowlad Goboleedka KGS Mudane Shariif Xasan Sheekh Aadan iyo Dr Cabdicaziiz Maxamed Sh Cismaan Jawaari, waxaan ummadda Soomaaliyeed guud ahaan gaar ahaan dadka ku dhagan deegannada Dawlad Goboleedka Koonfur Galbeed Soomaaliya iyo beesha caalamka ugu baaqaynaa in ay si dhow ula socdaan doorashada Hoggaamiyaha Koonfur Galbeed ee la filayo in ay qabsoonto 10-ka Juun 2026, taas oo ay hareeyeen walaacyo isa soo taraya oo ku saabsan hufnaanta, caddaaladda iyo madaxbannaanida geeddi-socodka doorashada,” ayaa lagu yiri warsaxaafadeedka.

Labada musharax ayaa sidoo kale xusay in uu jiro qorshe lagu beddelayo nidaamka qarsoodiga ah ee codbixinta, isla markaana cadaadis iyo cabsi gelin lagu hayo xubnaha baarlamaanka ee soo dooranayo madaxweynaha cusub.

“Waxaa muuqata dadaal lagu doonayo in lagu cabburiyo xorriyadda codbixinta, laguna beddelo nidaamka qarsoodiga ah ee codbixinta hannaan ku saleysan cabsi gelin, cadaadis iyo dabagal,” ayaa mar kale lagu yiri bayaanka.

Waxaa kale oo lasii raaciyay “Waa arrin aan hore loogu arag doorasho dastuuri ah in musharrax u taagan xilka ugu sarreeya ee Dawlad Goboleed uu si cad uga horyimaado mabda’a codbixinta qarsoodiga ah ee uu dastuurku dammaanad qaaday. Hadallada iyo dhaq-dhaqaaqyada soo baxaya waxay muujinayaan faham siyaasadeed oo khatar ku ah dimugraadiyadda, isla markaana dhaawacaya xorriyadda xildhibaanka.

Doorashada Koonfur Galbeed oo kusoo aaday xilli xasaasi ah ayaa si weyn isha loogu hayaa, waxaana saameyn xoogan ku leh dowladda Soomaaliya oo horay meesha uga saartay maamulkii uu horkacayay Cabdicasiis Lafta-gareen.

Muqdisho (Caasimad Online) – Xildhibaanno ka tirsan Baarlamaanka Soomaaliya oo galabta shir jaraa’id ku qabtay Muqdisho ayaa si kulul hadlay dhibaatooyin ay sheegeen in sanadkan loo gaystay Xujeyda Soomaaliyeed, iyaga oo eedeyn culus u jeediyay Wasiirka Wasaaradda Awqaafta iyo Arrimaha Islaamka Xukuumadda Federaalka Sheekh Mukhtaar Roobow Cali (Abuu Mansuur).

Xildhibaan Gobsan Muxamad oo ka mid ah Xildhibaannada sanadkan tegay Xajka ayaa eedeymo musuq-maasuq u jeedisay wasiirka iyo walaalkiis, iyada oo shaacisay lacag ka badan hal milyan oo dollar ay lunsadeen, sida ay hadalka u dhigtay.

“Dowladaha la siinaayo Xajka waxaa jirto wax la yiraahdo Biciso oo loogu talagalay in dadka ay adeeg u qabtaan oo u qitmeeyaan Bicisooyinkii waa la iibiyay waxaa laga soo iibiyay dad Mareykan ka yimid 115 Biciso ayaa la bixiyaa qofkii waxaa laga qadaa 10 kun oo dollar halkaa waxaa la faa’iday hal milyan iyo dheeraad,” ayay tiri Xildhibaan Gobsan Muxumad.

Sidoo kale, waxay soo bandhigtay dhibaatooyin kale oo loo gaystay Xujeyda Soomaaliyeed, oo dhawaan ku banaanbaxay magaalada Makkah, iyaga oo ka cabanayay Gaajo iyo in la geeyay meelo aad u fog-fog oo an Bas lahayn.

“Waligeed ma aysan dhicin in laga mudaharaado Makkah dhexdeeda oo ay dadka ka mudaharaadaan gaajo iyo deegaan fog oo la dajiyay,” ayay raacisay.

Xildhibaan Gobsan oo hadalkeeda sii wadata ayaa carrabka ku dhufatay in arrintan ay kula xisaabtami doonaan wasiirka, ayna gayn doonaan Baarlamaanka Soomaaliya, si wax looga waydiiyo musuqa iyo dhibaatooyinka kale ee ay sheegtay in loo gaystay Xujeyda Soomaaliyeed.

“Wasiir Mukhtaar Roobow iyo wiilka yar ee walaalkiis ah ee uu inta itaalka biday gacanta u geliyay wasaaradda lagu dhibaateeyay dadka, ayna isku haystaan kaligii fariid kaligii sanka taage halkaan ayaan farriin uga dirayaa Wasiir Mukhtaar waxaan kula tiigsan doonaa golaha sharci dajinta ah oo 322 xildhibaan ay kuugu warsan doonaan,” ayay mar kale tiri Xildhibaanaddu.

Dhankiisa Xildhibaan Buraale oo ka hadlay dhacdooyinkii sanadkan ee Xaja ayaa farriin toos ah u diray Ra’iisul wasaare Xamza Cabdi Bare. “Xamsow jannada waxey agtaalaa Mukhtaar Rooboow oo hore dad badan u soo laayay si uu janno ugu galo haddana xujeyda Soomaaliyeed dhibaato ku haaya”.

Muqdisho (Caasimada Online) – Dowladda Soomaaliya ayaa go’aan culus kasoo saartay xaaladda degmada Cabdicasiis oo dhawaan ku dagaalameen ciidamada dowladda iyo kuwa kale oo taabacsan mucaaradka, iyada oo ku dhawaaqday in haatan dib loo soo celiyay xasiloonida degmada iyo kala dambeyntii caadiga ahayd.

Taliyaha Qaybta Guud ee Booliska Gobolka Banaadir Macallin Mahdi oo qoraal soo saaray ayaa sheegay in howlgallo saacado badan qaatay kadib lagu guuleystay in la xasiliyo xaafadda Mirinaayo, isla markaana gebi ahaanba lasoo afjaray raggii ka dagaalamay ciidamada mucaaradka ee ku sugna halkaas.

Macallin Mahdi ayaa sidoo kale shacabka ugu baaqay inay kusoo noqdaan guryahooda, sidoo kalena ganacsatada ay furaan karaan goobahooda.

“Hay’adaha Amniga Caasimadda waxay bulshada Soomaaliyeed, gaar ahaan shacabka ku nool Degmada Cabdicasiis iyo xaafadda Marinaayo, ku wargelinayaan in xaaladda amni ee deegaanka si buuxda loo xasiliyey, isla markaana dib loogu soo celiyey deganaanshihii iyo kala dambeyntii caadiga ahayd, kadib howlgal ay fuliyeen oo lagu soo afjaray falal hubeysan oo lid ku ahaa amniga iyo xasilloonida,” ayuu yiri Taliye Macallin Mahdi.

Sidoo kale wuxuu intaas kusii dara “Sidaa awgeed, waxaa lagu wargelinayaa shacabka hore u deganaa xaafadda Marinaayo iyo agagaarkeeda, iyo ganacsatada halkaas ku lahaa ganacsigooda, inay si nabad ah ugu soo laaban karaan deegaanka, maadaama xaaladdu ay si buuxda u deggan tahay”.

Waxaa kale oo uu ugu baaqay shacabka inay la shaqeeyaan ciidamada amniga, isla markaana ay ka feejignaadaan wararka aan la hubin.

Dhanka kale, dagaalka ayaa haatan u wareegay duleedka Muqdisho, kadib markii xalay degmada Gubadley iyo deegaanno kale oo dhaca gobolka Shabeellaha laga dareemay iska hor imaad hubeysan iyo dhaq-dhaqaaq ciidan.

Si kastaba, Hadalkan ayaa kusoo aadayo, iyada oo isla maanta xeebta Liido uu ka bilowday dhaq-dhaqaaqii caadiga ahaa, ayna u damaashaad tageen dadweyne kala duwan, sida ay muujinayaan muuqaalo lagu baahiyay baraha bulshada.

Muqdisho (Caasimada Online) – Madaxweynaha Jamhuuriyadda Federaalka Soomaaliya, Dr. Xasan Sheekh Maxamuud ayaa maanta Danjire Salaad Cali Jeelle u magacaabay La-taliyaha Sare ee Madaxweynaha.

Madaxtooyada Soomaaliya ayaa sheegtay in xilkan uu Madaxweynaha Jamhuuriyadda u magacaabay Salaad, isagoo mudnaan gaar ah siinaya xoojinta howlaha talo-bixinta, qorsheynta, isku-dubbaridka iyo horumarinta dowladnimada.

Danjire Salaad Cali Jeelle ayaa horey dalka uga soo qabtay xilal kala duwan, isagoo muddo dheer ka soo shaqeynayay arrimaha diblomaasiyadda iyo dowlad-dhiska Soomaaliya.

Sidoo kale, waxaa lagu tilmaamaa masuul leh waayo-aragnimo iyo aqoon durugsan oo la xiriirta siyaasadda, diblomaasiyadda iyo maamulka dowladeed.

Madaxweynaha ayaa si gaar ah u ammaanay khibradda, dadaalka iyo doorkii uu Danjire Salaad Cali Jeelle ka soo qaatay u adeegidda dalka iyo dowladnimada Soomaaliya.

Sidoo kale, Madaxweyne Xasan Sheekh Maxamuud ayaa muujiyay kalsooni ah in La-taliyaha cusub uu si hufan uga soo bixi doono waajibaadka culus ee loo igmaday.

Ugu dambeyn, Madaxweynaha Jamhuuriyadda Federaalka Soomaaliya ayaa Alle uga baryay Danjire Salaad Cali Jeelle in uu u fududeeyo gudashada waajibaadka qaran ee horyaalla, isagoo kula dardaarmay in uu qaranka ugu adeego daacadnimo, hufnaan iyo karti.

Muqdisho (Caasimada Online) – Madaxweynihii hore ee Soomaaliya, Maxamed Cabdullaahi Farmaajo oo shir jaraa’id la qabtay Madaxweyne hore Shariif Sheekh Axmed ayaa si adag uga hadlay xaaladda siyaasadeed ee dalka, oo haatan mareysa meel xasaasi ah.

Farmaajo oo si weyn u dhaliilay tallaabooyinkii u dambeeyay ee dowladda uu hoggaamiyo madaxweyne Xasan Sheekh ayaa ku dhawaaqay inuu gogol wada-hadal dhigayo gurigiisa magaalada Muqdisho.

“Marka hore waxaa rabaa in Madaxweyne Shariif ka tacsiyadeeyo falkii xumaa ee tacadiga ahaa ee lagu bahdilay ee lagu sameeyay dorraad markii heshiis lagu galay xabad-joojin,” ayuu yiri Madaxweynihii hore ee dalka, Maxamed Cabdullaahi Farmaajo.

Madaxweynihii hore ayaa martiqaad u diray Madaxweyne Xasan Sheekh Maxamuud, si gurigiisa uu berri uga qabsoomo kulan wada-hadal ah oo u dhaxeeya madaxweynaaha iyo hoggaamiyeyaasha mucaaradka.

“Haddii uu diido ama uusan imaan. Saaxiibada Soomaaliyeed ee u heelan inay arrintan soo dhex galaan waa soo dhaweynayna. Dowladnimada yarta ah yeysan gacanteena u burburin qofkii Iaahay u qoray ayaa madaxweyne noqonayee,” ayuu yiri.

Dhinaca kale, Farmaajo ayaa sheegay in Sheekh Shariif loola dagaalamay sidii cadowga oo kale, ayna dowladda dooneysay inay khaarajiso, balse Alle ka badbaadiyay  sida uu hadalka u dhigay.

“Aniga iyo Shariif oo wada shaqeynayna ayaa magaaladan ka xoreynay Shabaab, oo ka xoreynay Shabeellada Dhexe iyo Shabeellada Hoose. Si nabad ah ayaa Xasan Sheekh loogu wareejiyay xilka oo loo nadiifiyay magaalada,” ayuu yiri Farmaajo.

Waxa uu intaas kusii daray “Ma istaahila in madaxweynihii (Shariif) intaas sameeyay in naftiisa khatar la geliyo, oo lagu weeraro gurigiisa.”

Hoos ka daawo muuqaalka

Muqdisho (Caasimada Online) – Dowladda Federaalka Soomaaliya ayaa sheegtay in dagaalladii maalmihii dambe ka dhacay magaalada Muqdisho uu ku dhintay hal qof oo keliya, iyadoo beenisay warbixintii hay’adda Qaramada Midoobay ee UNHCR ka baahisay khasaaraha dagaalladaas.

Hay’adda QM u qaabilsan qaxootiga ee UNHCR ayaa sheegtay in 13 qof lagu dilay iska hor-imaadyadii magaalada Muqdisho ku dhexmaray ciidamada dowladda iyo kuwa mucaaradka, halka 189 kalena ay ku dhaawacmeen.

Warbixinta UNHCR ayaa sidoo kale lagu shregay in ku dhowaad 12,500 qoys ay ka barakaceen guryahooda, kuwaas oo ay ku jiraan haween iyo carruur, kadib rabshadihii saameeyay qaybo ka mid ah caasimadda.

Wasaaradda Caafimaadka Soomaaliya oo maanta soo saartay war-saxaafadeed ayaa sheegtay in xogta rasmiga ah ee dhaawacyada iyo dhimashada dagaalladaasi ay tahay; 1 qof oo dhimasho ah iyo 55 qof oo dhaawac ah.

“Iyadoo lagu salaynayo xogta laga helay isbitaallada iyo xarumaha caafimaadka ee ku lug lahaa gurmadka iyo daaweynta dadka waxyeelladu gaartay, tirada guud ee la diiwaan-geliyey ayaa ah: 55 qof oo dhaawacyo iyo dhimasho 1 qof ah,” ayaa lagu yiri warbixinta wasaaradda caafimaadka Soomaaliya.

Wasaaradda ayaa ku boorisay dhammaan hay’adaha, warbaahinta iyo daneeyayaasha kale inay muujiyaan mas’uuliyad iyo taxaddar dheeri ah marka la faafinayo xogaha la xiriira dhimashada, dhaawacyada iyo xaaladaha degdegga ah, si loo hubiyo in xogta la baahinayo ay tahay mid xaqiiqo ku dhisan, la hubiyey, kana tarjumaysa xaaladda dhabta ah ee jirta.

“Wasaaraddu waxay tacsi tiiraanyo leh u diraysaa ehelada iyo qaraabada qofka ku geeriyooday dhacdooyinkan, waxayna caafimaad degdeg ah u rajaynaysaa dhammaan dadka dhaawacyadu soo gaareen,” ayaa lagu yiri warbixinta wasaaradda caafimaadka.

Hoos ka aqriso war-saxaafadeedka oo dhameystiran:

Xogta rasmiga ah ee dhaawacyada iyo dhimashada ka dhashay dhacdooyinkii amni ee ka dhacay magaalada Muqdisho 3–4 Juun 2026

Wasaaradda Caafimaadka iyo Daryeelka Bulshada Xukuumada Federaalka Soomaaliya waxay bulshada Soomaaliyeed iyo bahwadaagta la wadaagaysaa xogta hordhaca ah ee laga soo ururiyey isbitaalada iyo xarumaha caafimaadka ee magaalada Muqdisho ee qaabilay bukaanadii ay waxyeeladu kasoo gaartay dhacdooyinkii amni ee ka dhacay magaalada Muqdisho intii u dhexeysay 3 iyo 4 Juun 2026.

Iyadoo lagu salaynayo xogta laga helay isbitaallada iyo xarumaha caafimaadka ee ku lug lahaa gurmadka iyo daaweynta dadka waxyeelladu gaartay, tirada guud ee la diiwaangeliyey ayaa ah:

• Dhaawacyo: 55 qof
• Dhimasho: 1 qof

Wasaaraddu waxay tacsi tiiraanyo leh u diraysaa ehelada iyo qaraabada qofka ku geeriyooday dhacdooyinkan, waxayna caafimaad degdeg ah u rajaynaysaa dhammaan dadka dhaawacyadu soo gaareen.

Wasaaraddu waxay uga mahadcelinaysaa dhammaan shaqaalaha caafimaadka, adeegyada gurmadka degdegga ah, iyo xarumaha caafimaadka dadaalkii ay muujiyeen si loo badbaadiyo nolosha dadka ay waxyeelladu gaartay.

Wasaaradda Caafimaadka iyo Daryeelka Bulshada waxay xaqiijinaysaa sida ay uga go’an tahay ururinta, xaqiijinta iyo baahinta xog sax ah oo lagu kalsoonaan karo, gaar ahaan xilliyada xaaladaha degdegga ah iyo dhacdooyinka saameynta ku leh caafimaadka bulshada.

Wasaaraddu waxay ku boorrinaysaa dhammaan hay’adaha, warbaahinta iyo daneeyayaasha kale inay muujiyaan masuuliyad iyo taxaddar dheeri ah marka la faafinayo xogaha la xiriira dhimashada, dhaawacyada iyo xaaladaha degdegga ah, si loo hubiyo in xogta la baahinayo ay tahay mid xaqiiqo ku dhisan, la hubiyey, kana tarjumaysa xaaladda dhabta ah ee jirta.

-DHAMMAAD-

Muqdisho (Caasimada Online) – Ciidanka Xoogga Dalka ayaa xalay dagaal la galay ciidamo taabacsan Wasiirkii hore ee Amniga Soomaaliya, Cabdullaahi Maxamed Nuur, kuwaas oo ka ambabaxay magaalada Muqdisho kuna wajahnaa deegaanno ka tirsan gobolka Shabeellaha Dhexe.

Wararka la helayo ayaa sheegaya in ciidamada lala xiriirinayo Cabdullaahi Maxamed Nuur ay wateen illaa sideed gaari oo dagaal, isla markaana ay ka dhaqaaqeen degmada Gubadley ee gobolka Banaadir.

Dhaq-dhaqaaqan ayaa yimid kadib markii ay ka war heleen in ciidamo ka tirsan Booliska Gaarka ah ee Haramcad ay ku soo wajahan yihiin si ay hub ka dhigis ugu sameeyaan.

Ciidanka xoogga dalka ee ka hawlgala koonfurta gobolka Shabeellaha Dhexe ayaa lagu wargeliyay dhaq-dhaqaaqa ciidamadaas, waxaana la sheegay inay xireen waddooyinka mara deegaannada Ceel-Bashaqle iyo Qorilow oo hoos taga degmada Warsheekh.

Wararka ayaa tilmaamaya in ciidamada taabacsan Cabdullaahi Maxamed Nuur ay markii dambe ku dhaceen jidgooyo loogu diyaariyay aagga Bashaqle.

Intaas kadib ayaa la sheegay in dagaal kooban uu halkaas ku dhex maray labada ciidan, inkastoo aan si rasmi ah loo xaqiijin karin khasaaraha ka dhashay iska horimaadkaasi.

Sidoo kale, weli ma cadda halka uu ku dambeeyay masiirka guud ee ciidamadii hubka la baxay, iyadoo wararka arrintaasi la xiriira ay kala duwan yihiin.

Warar aan la xaqiijin ayaa sheegaya in qayb ka mid ah ciidamadaasi ay gaareen degmada Cadale, halka warar kale ay sheegayaan inay gaareen degmada Raage Ceelle.

Xogo kale ayaa iyaguna sheegaya in saddex gaari laga qabsaday ciidamadaasi, iyadoo aan la ogeyn halka ay aadeen gaadiidkii iyo ciidamadii kale.

Saraakiisha Ciidanka Xoogga Dalka iyo Taliska Booliska Gobolka Banaadir ayaan weli wax war ah ka soo saarin isku daygan ugu dambeeyay ee lagu doonayay in hubka looga ururiyo xoogag ka amar qaata Cabdullaahi Maxamed Nuur, oo sidoo kale ah milkiilaha Hotel Elite ee xeebta Liido.

Dhanka kale, ciidamada amniga ayaa Sabtidii gudaha u galay Hotel Elite iyagoo fulinayay hawlgal hub ururin ah.

Sidoo kale, Taliska Booliska Muqdisho ayaa shalay sheegay in ciidamadii taabacsanaa Sheekh Shariif Sheekh Axmed ee ku dagaallamay degmada Cabdicasiis ay hub ku qariyeen goobo kala duwan oo degmadaas ah, isla markaana uu weli socdo hawlgal lagu soo ururinayo hubkaas.

Xiisadda siyaasadeed ee dowladda iyo mucaaradka ayaa isku rogtay gacan ka hadal kadib markii dowladda ay si adag uga hortimid in mucaaradka uu isku hubeeyo gudaha magaalada Muqdisho.

Khilaafka ka dhashay doorashooyinka, wax-ka-beddelka dastuurka iyo muddada xilka hay’adaha federaalka ayaa sii xoogaystay kadib markii wada-hadallo u dhexeeyey Dowladda Federaalka iyo xubnaha mucaaradka ay kusoo dhammaadeen natiijo la’aan 15-kii May.

Mucaaradka ayaa ku doodaya in muddo xileedka Madaxweyne Xasan Sheekh Maxamuud uu ku ekaa 15-kii May, isla markaana aan lagu sii shaqeyn karin hannaan aan lagu wada heshiin.

Dowladda Federaalka ayaa dhankeeda ku adkeysaneysa in dalka loo wado doorasho qof iyo cod ah, taas oo ay ku tilmaantay isbeddel muhiim ah oo Soomaaliya ka saaraya hannaan doorasho dadban oo muddo dheer ku dhisnaa awood-qeybsi iyo xulasho beeleed.

Muqdisho (Caasimada Online) – Ciidamada ammaanka ee Dowladda Federaalka Soomaaliya ayaa howl-gallo lagu xoojinayo amniga ka wada deegaanno ka tirsan gobolka Shabeellaha Dhexe ee dowlad-goboleedka HirShabeelle.

Howl-galladan ayay saraakiisha ciidanku sheegeen in lagu baadi-goobayo kooxo hubeysan oo la sheegay inay ku sugan yihiin gobolkaas. Waxay sidoo kale daba socdaan dhaq-dhaqaaqyo amni oo maalmihii lasoo dhaafay ka socday magaalada Muqdisho, kuwaas oo la xiriiray xaalado amni oo ka dhashay iska horimaadyo u dhexeeya dowladda iyo mucaaradka oo dhowaan ka dhacay caasimadda.

Ilo kala duwan ayaa xaqiijiyay in ciidamada dowladda ay howl-gallada ka bilaabeen waqooyiga Muqdisho, ugana sii gudbeen deegaanno ku yaalla gobolka Shabeellaha Dhexe, kuwaas oo ku dhow xuduudda gobolka Banaadir.

Wararka ayaa sheegaya in ciidamada ay raadinayaan xubno hubeysan oo la tuhunsan yahay inay u gudbeen deegaannadaas kadib dhaq-dhaqaaqyo amni oo ka dhacay Muqdisho toddobaadkan.

Sidoo kale, ciidamada ammaanka ayaa saacadihii lasoo dhaafay howl-gallo baaritaanno iyo hub ka dhigis ah ka sameeyay degmooyinka Cabdicasiis, Kaaraan iyo deegaanka Gubadley, iyo sidoo kale qaybo ka mid ah gobolka Shabeellaha Dhexe.

Dhinaca kale, Taliska Ciidanka Booliska Soomaaliyeed ayaa hore ugu dhawaaqay howlgal lagu uruurinayo hubka sharci-darrada ah, kaas oo la bilaabay kadib iska horimaadkii 3-dii bishan ka dhacay caasimadda.

Howl-galkaas ayaa yimid kadib iska horimaad dhex maray ciidamada dowladda iyo ciidamo ilaalo u ahaa madaxweynihii hore ee Soomaaliya, Sheekh Shariif Sheekh Axmed, iyo ra’iisul wasaarihii hore, Xasan Cali Kheyre, inkastoo markii dambe dowladda ay sheegtay in la soo afjaray howl-galladii la xiriiray mucaaradka.

Si kastaba, khilaafka ka dhashay doorashooyinka, wax-ka-beddelka dastuurka iyo muddada xilka hay’adaha federaalka ayaa sii xoogaystay kadib markii wada-hadallo u dhexeeyey Dowladda Federaalka iyo xubnaha mucaaradka ay kusoo dhammaadeen natiijo la’aan 15-kii May.

Wada-hadalladaas ayaa diiradda lagu saarayey hannaanka doorashada, muranka dastuurka iyo mustaqbalka siyaasadeed ee hay’adaha federaalka. Mucaaradka ayaa ku doodaya in muddo xileedka Madaxweyne Xasan Sheekh Maxamuud uu ku ekaa 15-kii May, isla markaana aan lagu sii shaqeyn karin hannaan aan lagu wada heshiin.

Dowladda Federaalka ayaa dhankeeda ku adkeysaneysa in dalka loo wado doorasho qof iyo cod ah, taas oo ay ku tilmaantay isbeddel muhiim ah oo Soomaaliya ka saaraya hannaan doorasho dadban oo muddo dheer ku dhisnaa awood-qeybsi iyo xulasho beeleed.

Soomaaliya ayaa markii ugu dambeysay doorasho guud oo toos ah qabatay sanadkii 1969-kii, ka hor afgambigii militariga ee Maxamed Siyaad Barre. Tan iyo burburkii dowladdii dhexe, doorashooyinka heer federaal ayaa inta badan ku dhacay hannaan dadban, waxaana madaxweynaha dooran jiray baarlamaanka.

Hase yeeshee, qorshaha dowladda ee doorasho qof iyo cod ah ayaa wajahaya mucaaradad xooggan, iyadoo kooxaha mucaaradka iyo qaar ka mid ah maamul-goboleedyada ay ku doodayaan in hannaan kasta oo doorasho lagu geli karo uu u baahan yahay heshiis siyaasadeed oo ballaaran.

Beesha caalamka ayaa dhankeeda muujineysa cabsi laga qabo in khilaafka siyaasadeed uu u gudbo marxalad ka adag midda hadda taagan, gaar ahaan iyadoo Soomaaliya ay weli wajahayso weerarro ka imanaya Al-Shabaab, xaalad amni oo jilicsan iyo baahiyo bini’aadantinimo oo soo noqnoqda.

Waxaa sidoo kale weli xusuusta ku jirta xiisaddii siyaasadeed ee sanadkii 2021, markii muran ka dhashay muddo-kordhin uu sababay isku dhacyo hubeysan oo ka dhacay Muqdisho, ka hor inta aysan dhinacyadii siyaasadeed dib ugu laaban wada-hadal.

Beesha caalamka ayaa hadda u muuqata inay doonayso in laga hortago in xaaladda siyaasadeed ee maanta taagan ay gaarto heerkaas oo kale.

Hargeysa (Caasimada Online) – Aqoonsiga ay Israa’iil siisay maamulka Somaliland wuxuu xambaarsan yahay dhowr arrimood, waxaana loo arkaa qayb ka mid ah qaab-dhismeed istiraatiiji ah oo ka soo ifbaxaya xulafada Imaaraadka, Israa’iil iyo Itoobiya. Isbahaysigan waxaa horseeday dareen guud oo ku aaddan khataraha ka imanaya Xuutiyiinta, saamaynta Iiraan, iyo joogitaanka sii kordhaya ee Turkiga ku leeyahay Afrika, gaar ahaan Soomaaliya.

Aqoonsiga Israa’iil ay siisay Somaliland waxaa loo arkaa tallaabo ka hortageysa khatarahaas, wuxuuna si weyn u xoojin karaa booska istiraatiijiyadeed ee Itoobiya ku leedahay Geeska Afrika, gaar ahaan qorshaheeda ku aaddan helitaanka marin-biyood.

Itoobiya waa dalka ugu dadka badan adduunka ee aan bad lahayn, waxayna muddo dheer raadinaysay beddel ka duwan ku tiirsanaanta dekedda Jabuuti.

Qorshuhu wuxuu yahay in marka uu hirgalo aqoonsiga maqaamka caalamiga ah ee Somaliland, Israa’iil ay si dadban u xoojiso wada-hadallada u dhexeeya Addis Ababa iyo Hargeysa, iyadoo Itoobiya siinaysa awood dheeraad ah oo ay ku xaqiijisan karto heshiisyo dekedeed oo muddodheer, marin u helidda kaabayaasha, iyo taageerada saadka ee xeebaha Somaliland.

Itoobiya waxay hore Somaliland ula saxiixatay is-afgarad sanadkii 2024, kaas oo siinaya marin-biyood muddodheer, balse waxaa ka horyimid oo diiday dowladda dhexe ee Soomaaliya. Hase ahaatee, aqoonsiga Israa’iil wuxuu miisaan siyaasadeed ku kordhinayaa hanka Itoobiya ee bad-helidda.

Israa’iil waxay kor u qaadaysaa raadkeeda gobolka, iyadoo xoojinaysa awooddeeda ay ugu hortageyso saamaynta Iiraan.

Hay’adda sirdoonka Israa’iil ee Mossad iyo Hay’adda Sirdoonka iyo Amniga Qaranka Itoobiya ayaa sanadkii 2020 ku heshiiyay inay iska kaashadaan dhinacyada sirdoonka iyo amniga. Sanad kadib, waxay galeen heshiis milatari oo ay ku jiraan tababar iyo waxbarasho milatari. Sanadkii 2025, labada dhinac waxay sidoo kale saxiixdeen heshiis difaac oo lagu xoojinayo ciidamada booliska Itoobiya, wadaagga sirdoonka, la-dagaallanka dambiyada xuduudaha ka gudba, iyo tababarka amniga.

Walaaca Masar ee isbahaysigan

Masar dhankeeda, waxay isbahaysiga Israa’iil, Imaaraadka, Somaliland iyo Itoobiya u aragtaa mid keeni kara go’doomin istiraatiiji ah. Kanaalka Suweys ma aha oo keliya il dakhli, balse Masar waxay u aragtaa arrin la xiriirta badbaadada qaranka.

Inkasta oo aqoonsiga Israa’iil ee Somaliland uusan keligiis ka dhignayn khatar toos ah oo ku wajahan amniga Masar, Qaahira waxay ka cabsi qabtaa in Israa’iil ay Somaliland u isticmaasho marin ay ku ballaariso saamaynteeda Geeska Afrika, isla markaana ay caqabad ku noqoto booska istiraatiijiyadeed ee Masar.

Madaxweynaha Masar Abdel Fattah al-Sisi ayaa la kulmay dhiggiisa Soomaaliya 8 February 2026, wuxuuna caddeeyey in Masar ay had iyo jeer ahaan doonto saaxiib daacad ah iyo taageere adag oo Soomaaliya ah. Kulanka kadib, Qaahira waxay ku dhawaad 1,000 askari oo dheeraad ah u dirtay Muqdisho, iyadoo arrintaas si cad loo shaaciyay. Ciidamadaas ayaa qayb ka ah Hawlgalka Midowga Afrika ee Taageerada iyo Xasilinta Soomaaliya ee AUSSOM. Masar waxay sidoo kale Soomaaliya ku caawisay qalab milatari.

Maadaama ay suurtogal tahay in Israa’iil ay ballaariso xiriirkeeda diblomaasiyadeed iyo joogitaankeeda rasmiga ah ee dhulka kadib aqoonsiga, waxaa sidoo kale kordhi kara khatarta tartanka gobolka iyo xiisadda kala dhexeysa Masar. Si kastaba ha ahaatee, waxaa muhiim ah in la fahmo in Israa’iil ay leedahay dhiirigelin xooggan oo ay ku ilaaliso xiriir iskaashi oo ay la leedahay Qaahira, marka la eego doorka Masar ee maaraynta xaaladda Qaza iyo, si ka ballaaran, dadaalka lagu xakameynayo saamaynta Turkiga iyo Qadar ee arrinta Falastiin.

Ugu dambeyntii, aqoonsiga Somaliland wuxuu ka yar yahay arrinta madaxbannaanida Somaliland lafteeda, balse wuxuu ka weyn yahay ujeeddo istiraatiiji ah oo Israa’iil ku dooneyso inay door ku yeelato qaabeynta nidaamka mustaqbalka ee marinka Badda Cas. Gobolku wuxuu gelayaa waji cusub, halkaas oo dhulalka durugsan ay yeelanayaan miisaan istiraatiiji ah oo ka weyn baaxaddooda, gaar ahaan marka loo eego xafiiltanka quwadaha waaweyn iyo tartanka gobolka.

Haddana, aqoonsiga Somaliland wuxuu weli ahaan doonaa mid aan la hubin. Itoobiya waxay noqon kartaa dalka ugu dhow ee ka faa’iideysta, marka loo eego baahideeda degdegga ah ee marin-biyood, balse waa inay si taxaddar leh u miisaantaa guulaha istiraatiijiyadeed iyo khatarta sii kordheysa ee iska horimaad kala dhex mara Muqdisho iyo xasillooni-darrada gobolka.

Brussels (Caasimada Online) – Wasiirrada arrimaha gudaha ee Midowga Yurub ayaa ka fiirsanaya in la adkeeyo shuruudaha fiisaha ee muwaadiniinta Soomaaliyeed, iyagoo ku eedeeyay dowladda Soomaaliya inay si liidata ula shaqeyso dalalka Yurub marka la doonayo in dib loogu celiyo Soomaalida aan xaqa u lahayn inay sii joogaan dalalka Midowga Yurub.

Golaha Midowga Yurub ayaa sheegay in tirada Soomaalida sida sharci darrada ah ku gashay dalalka Midowga Yurub ay ka badan laba jibbaarantay intii u dhaxeysay 2024 iyo 2025, taas oo Brussels ay ku sheegtay inay qayb weyn ka qaateen shabakado dadka tahriibiya.

Kulankii wasiirrada arrimaha gudaha iyo cadaaladda ee Khamiistii ka dhacay Luxembourg ayaa Soomaaliya si gaar ah looga hadlay, iyadoo dalalka xubnaha ka ah Midowga Yurub ay sheegeen in wada-shaqeynta Muqdisho ee ku saabsan dib-u-celinta muwaadiniinteeda ay tahay mid aan ku filneyn.

Wasiirrada ayaa sidoo kale ka dooday sida Midowga Yurub u xoojin karo la-dagaallanka shabakadaha tahriibinta dadka, gudaha Soomaaliya iyo dalalka ay Soomaalidu sii maraan ka hor inta aysan gaarin Yurub.

Golaha Midowga Yurub ma shaacin go’aan kama dambeys ah, mana faahfaahin tallaabooyinka cusub ee si rasmi ah loo qaadi doono. Hase yeeshee, doodda hadda socota ayaa dhiseysa qorshe hore oo Guddiga Midowga Yurub uu soo bandhigay, kaas oo lagu adkeynayo codsiyada fiisaha ee muwaadiniinta Soomaaliyeed.

Qorshahaas ayaa dhigayay in waqtiga looga baaraandego codsiyada fiisaha Soomaalida laga dhigo 45 maalmood, halkii uu markii hore ka ahaa 15 maalmood. Waxa kale oo uu dhigayay in codsadayaasha Soomaaliyeed laga dalbado dokumentiyo buuxa mar kasta oo ay codsi gudbinayaan, isla markaana inta badan la siiyo fiiso hal mar oo keliya lagu geli karo dalalka Schengen.

Waxaa sidoo kale meesha laga saari karaa fududeynta qaar ee la xiriirta fiisaha diblomaasiyiinta iyo shaqaalaha dowladda Soomaaliya ee heysta baasaboorrada adeegga.

Cadaadis cusub oo la saarayo Muqdisho

Nicholas Ioannides, oo ah wasiir ku-xigeenka socdaalka iyo ilaalinta caalamiga ah ee Cyprus, ayaa sheegay in Midowga Yurub uu doonayo “hab dhameystiran” oo lagu wajahayo wadashaqeynta dalalka saddexaad.

Laakiin wuxuu sidoo kale sheegay in marka dal uu ka gaabiyo ama diido inuu ka jawaabo arrimaha la xiriira dib-u-celinta iyo aqbalidda muwaadiniintiisa, ay khasab tahay in la adeegsado “dhammaan qalabka la hayo, oo ay ku jiraan tallaabooyin xaddidaya fiisaha”.

Hadalkan ayaa muujinaya in Midowga Yurub uu sii adkeynayo siyaasaddiisa socdaalka, gaar ahaan dalalka uu ku eedeynayo inay ka gaabiyeen inay dib u qaataan muwaadiniintooda.

Midowga Yurub ayaa sanadkan bilaabay istaraatiijiyad cusub oo fiiso, taas oo Brussels siinaysa awood dheeraad ah oo ay siyaasadda fiisaha ugu adeegsan karto cadaadis diblomaasiyadeed iyo mid amni.

Dowladda Soomaaliya weli si rasmi ah ugama jawaabin doodda cusub ee ka soo baxday kulanka wasiirrada Midowga Yurub.

Balse arrintan ayaa imaaneysa xilli Muqdisho iyo Brussels ay dhawaan ku heshiiyeen in la sii wado wada-hadallo farsamo oo ku saabsan socdaalka, dib-u-celinta iyo aqbalidda muwaadiniinta Soomaaliyeed ee aan sharci ku joogin Yurub.

Wada-hadalladaas ayaa ka mid ahaa kulankii ugu horreeyay ee iskaashiga Soomaaliya iyo Midowga Yurub ee lagu qabtay Muqdisho, kaas oo looga hadlay amniga, socdaalka, cadaaladda, dhaqaalaha iyo horumarinta.

Soomaaliya oo weli ku jirta xaalad adag

Go’aanka ay ka fiirsanayaan dalalka Yurub ayaa kusoo aadaya xilli Soomaaliya ay weli la daalaa-dhaceyso dagaal, amni-darro, abaaro, barakac iyo xaalad bani’aadannimo oo daran.

Soomaaliya ayaa muddo ku dhow labaatan sano la dagaallameysa kooxda Al-Shabaab, halka isbeddelka cimilada, abaaraha soo noqnoqday, fatahaadaha iyo cudurrada faafa ay si joogto ah u saameeyaan nolosha malaayiin qof.

Hay’adaha Qaramada Midoobay ayaa sheegay in malaayiin Soomaali ah ay weli u baahan yihiin gargaar bani’aadannimo, iyadoo barakaca gudaha dalka uu gaaray heerar aad u sarreeya. Waxaa sidoo kale jira boqollaal kun oo Soomaali ah oo qaxooti ahaan ugu nool dalal kale.

Midowga Yurub laftiisa ayaa Soomaaliya siiya gargaar bani’aadannimo iyo taageero amni, balse isla waqtigaas wuxuu kordhinayaa cadaadiska la xiriira socdaalka iyo dib-u-celinta dadka.

Mas’uuliyiinta Yurub ayaa ku doodaya in dal kasta uu waajib ka saaran yahay inuu dib u aqbalo muwaadiniintiisa marka aysan sharci ku lahayn dalalka kale. Waxay sidoo kale sheegayaan in tahriibka sharci darrada ah uu dadka u geliyo khataro badan, oo ay ka mid yihiin shabakadaha dadka tahriibiya, xadgudubyo iyo safarro halis ah.

Dhinaca kale, dadka u dooda xuquuqda muhaajiriinta ayaa ku doodaya in xayiraadaha fiisaha ay inta badan saameeyaan ardayda, ganacsatada, qoysaska iyo dadka safarrada caadiga ah u baahan, halkii ay si toos ah cadaadis ugu saari lahaayeen dowladaha.

Soomaalida ayaa horeyba u wajahaysay caqabado badan marka ay dalbanayaan fiisaha Schengen, maadaama dalal badan oo Midowga Yurub ka tirsan aysan Soomaaliya ku lahayn xarumo toos ah oo lagu bixiyo fiisooyinka. Taas ayaa keenta in codsadayaal badan ay u safraan dalal kale si ay codsi u gudbiyaan.

Haddii tallaabooyinka cusub la meel mariyo, codsiga fiisaha ee muwaadiniinta Soomaaliyeed wuxuu noqon karaa mid ka gaabis badan, ka qaalisan, kana adag sidii hore.

Arrintan ayaa mar kale muujineysa sida xiriirka Soomaaliya iyo Midowga Yurub uu ugu dhex jiro laba waddo oo is barbar socda: iskaashi dhinacyada amniga iyo horumarinta ah, iyo cadaadis sii kordhaya oo la xiriira socdaalka iyo dib-u-celinta muwaadiniinta Soomaaliyeed.

Muqdisho (Caasimada Online) – Madaxweynihii hore ee Maamul-goboleedka HirShabelle, Cali Cabdullahi Cosoble oo ka hadlayay dagaalkii magaalada Muqdisho ku dhex-maray dowladda iyo mucaaradka ayaa soo jeediyay talo yaableh, isaga oo ku baaqay in hoggaamiyeyaasha mucaaradka loo soo xiro, sida madaxweynihii Venezuela, Nicolás Maduro oo uu qabtay Mareykanka.

Cosoble ayaa si gaar ah u tilmaamay ragggii dagaalka la galay ciidamada dowladda ee Shariif iyo Khayre oo hadda dib ugu laabtay guryahoodii.

“Ragga qoryaha qaatay ee yiri dalka dowlad kama jirto waxaa haboon in sawirradooda ayagoo sida Maduro, madaxweynihii Venezuela gacmaha ka katiineysan laba askarina ay midkiiba wado la tuso shacabka Soomaaliyeed, si ay kuwa luuqyada ku jira u quustaan,” ayuu yiri Cali Cabdullahi Cosoble.

Sidoo kae, wuxuu kusii daray “Waddanka wuxuu leeyahay hal Madaxweyne, hal dowlad iyo hal ciidan. Ciddaan sidaa ogeyn dantaa macallin u noqoneysa. Guushu waa sey u bilaabay sixirkiina saakuu buray. SOOMAALIYA GUUL IYO GOBANIMO”.

Horay Cali Cosoble ayaa uga hadlay doorka Senator Cabdiraxmaan Faroole ee dagaalka Muqdisho iyo sida Sheekh Shariif Sheekh Axmed iyo Cabdiraxmaan Cabdishakuur Warsame u fulinayaan qorshihiisa, sida uu hadalka u dhigay.

Hadalkan ayaa imaanaya xilli ay weli Muqdisho ka socdaan dhaq-dhaqaaqyo siyaasadeed oo ay wadaan hoggaamiyayaasha mucaaradka, kuwaas oo diidan qorshaha dowladda ee doorashooyinka iyo wax ka beddelka dastuurka.

Si kastaba, ha’ahaatee mucaaradka ayaa dhowaan kordhiyay cadaadiska ay saarayaan Dowladda Federaalka, iyagoo ku eedeynaya inay ku fashilantay heshiis siyaasadeed oo laga gaaro doorashooyinka, dastuurka iyo hannaanka awood-qeybsiga.

Muqdisho (Caasimada Online) – Taliska Ciidamada Booliska Soomaaliya ayaa goordhow gaadiid dagaal iyo hub culus kusoo bandhigay aagga Mirinaayo, gaar ahaan gurigii uu ka daganaa Madaxweynihii hore ee dalka Sheekh Shariif Sheekh Axmed oo maalin ka hor dagaal la galay dowladda.

Illaa 6 gawaari ayay dowladdu kusoo bandhigtay goobta, sidoo kale waxaa jira hub culus oo lagu soo qab-qabtay howgalkii maanta ee degmada Cabdicasiis.

Taliyaha Qaybta Guud ee Booliska Gobolka Banaadir, Macallin Mahdi ayaa la hadlay Wariyeyaasha ayaa sheegay in hub badan oo sharci darro ah ay gacanta kusoo dhigeen, kuwaas oo ay ku jiraan qoryaha waa wayn ee BKM, RBG iyo Dhashiike o halis ku ah amniga guud ee caasimada.

Sidoo kale, wuxuu intaas ku daray in dhibkii ka dhacay Mirinaayo lagula xisaatami doono madaxdii hore ee ka dambeysay, sida uu hadalka u dhigay. Macallinka ayaa hanjabaad iyo digniin u diray mucaaradka, isaga oo sheegay in weli uu socdo howlgalka, dibna ay ka faah-faahin doonaan natiijada.

Sheekh Shariif ayaa shalay ka guuray guriga ay maanta tageen ciidamada dowladda, kadib wada-hadal dhex-maray isaga iyo Villa Somalia, kuwaas oo ay ka qayb ka qaateen wakiilo caalami ah iyo qaar kamid ah dhaqanka Soomaaliyeed.

Sidan oo kale ayay dowladda dhawaan hub laga qabsaday Ra’iisul wasaarihii hore Xasan Cali Khayre waxa ay kusoo bandhigtay degmada Howlwadaag, halkaas oo sidoo kale ay ku dagaaleen dowladda iyo mucaaradka.

Arrintan ayaa uga sii dareysa xiisada siyaasadeed iyo mida ciidan ee ka taagan caasimada, maadaama labada dhinac ay qaadeen tallaabooyin dheeraad ah.