Baarlamanka Soomaaliya ayaa maanta Ansixiyay Golaha Wasiirada ee uu soo xushay Ra’iisul Wasaaraha Soomaaliya Cabdi Faarax Shirdoon.
Xildhibaanada ayaa cod aqlabiyad leh ku ansixiyay xukuumadda cusub ee ka kooban tobanka wasiir. Haddaba halkan ka daawo sawirrada kullankii lagu ansixiyay wasiirada.
Qaar kamid ah shacabka kunool Gobalka Shabeelaha Hoose ayaa sheegay inay ka cabanayaan ciidamada Dowladda Soomaaliya ee ku sugan Gobalka Shabeelaha Hoose.
Maxamed Sheekh Xuseen ayaa shaaca ka qaaday in arintani ay ka dhacday inta udhaxeysa Warmaxan Iyo Wanlaweyne ee Gobalka Shabeelaha Hoose ayna sameeyeen ciidamada Dowladda Soomaaliya.
Waxgaradkaan ayaa sidoo kale ugu baaqay Madaxda Dowladda Soomaaliya inay wax ka qabtaan dhibaatada ciidamada Dowladda Soomaaliya ay ku hayaan shacabka Gobalka Shabeelaha Dhexe.
Ciidamada Dowladda Soomaaliya ayaa dhibaatooyin kala duwan ka geesta Gobalka Shabeelaha Hoose iyadoo maamulka Gobalka Shabeelaha Hoose aysan jirin cid ka hadashay arintani.
Golaha Baarlamaanka Soomaaliya ayaa cod aqlabiyad ah ku ansixiyay xukuumadda cusub ee Soomaaliya.
Aqalka baarlamaanka ayaa waxa ku sugnaa 225 mudane oo ka tirsan xubnaha baarlamaanka, 219 Mudane ayaa codkooda siiyay xukuumadda cusub ee Raiisul Wasaare Cabdi Faarax Shirdoon, 3 Mudane ayaa diiday, halka 3 ay ka aamustay.
Madaxweynaha Soomaaliya, Xasan Sheekh Maxamuud ayaa hor yimid baarlamaanka oo la hadlay, iyadoo ay goob joog ahaayeen Raiisul Wasaaraha, Cabdi Faarax Shirdoon iyo xubnaha cusub ee golihiisa wasiiradda.
Ansixinta xukuumadda cusub ee Soomaaliya ayaa lagu waday inay dhacdo maalintii Sabtida, oo dib u dhac uu ku yimid.
Golaha wasiirada cusub ee dowladda Soomaaliya ayaa ah kuwii ugu tirada yaraa, waxaana ay ka kooban yihiin toban wasiir oo laba ka mid ah ay yihiin haween.
Kulan albaabada u xiranyahay ayaa waxaa uu Xarunta Golaha Shacabka ee Magaalada Muqdisho ugu soconayaa Madaxwaynaha Soomaaliya iyo Gudoomiyaha Baarlamanka.
Goordhow ayaa lasoo Warinayaa in Madaxwayne Xasan Sheekh iyo Ra’iisul Wasaare Shirdoon ay gaareen Xarunta Golaha Shacabka waxaana ay la shirayaan Proff.Jawaari oo ah gudoomiyaha Baarlamanka.
Sadaxda Masuul ee dalka ugu saraysa ayaa kaligood waxaa ay ku shirayaan Xarunta Golaha Shacabka waxaana ay kulankooda ugu hadleen sida wararka aynu ku helayn in la ansixiyo Golaha Wasiirada Cusub ee Ra’iisul Wasaare Shirdoon.
Saxaafada oo kulanka kaqayb gali lahayd ayaa banaanka loo saaray waxaana la filayaa in la ansixiyo golaha Wasiirada
Sida aan lawada socono Arbacadii lasoo dhaafay oo taariikhdu ku beegneyd 7/11/2012 ayaa magaalada Kismaayo waxaa gaaray wafdi katagay magaalada Muqdisho kana koobnaa 7 xubnood oo ahaa gudi Dowlada federaalka Soomaaliya u xilsaartay samaynta maamulka Jubooyinka gaar ahaan Kismaayo, sidokle wafdigaan waxyaabaha ay usocdeen waxaa kamid ahaa arinta dhuxusha ku xayiran dekeda Kismaayo.
Hadabo wafdigaas iyo qaar kamid ah saxaafada Muqdisho, ayaa markii ay gaareen garoonka diyaaradaha Kismaayo waxaa lagu wargaliyay ineeysan gudaha ugali Karin magaalada laguna war galiyay inaan la damaanad qaadi Karin amaankooda.
Farriintaasi waxaa wafdiga u sheegay sarkaal ciidamada Kenyan ee garoonka ka masuulka ah hogaamiya, kaasoo sheegay in isaga lagu soo wargeliyey in “wafdiga ka yimid Muqdisho uu la kulmi karo masuuliyiinta joogta Kismaayo haddii ay la socdaan [wafdiga] dad ka socda Urur Goboleedka IGAD”.
Hadaba celinta wafdigaas laga soo celiyay Kismaayo waxaa kadhashay muran badan iyo dood Dowlada dhaxdeeda ah, iyadoo gudoomiyaha Baarlamaanka uu uyeeray madaxweynaha iyo RW si ay uga jawaabaan sababta wafdigaas loo soo celiyay, sidokale qaar katirsan baarlamaanka kana soo jeeda Gobolada Jubooyinka ayaa kahadlay arinta Kismaayo waxa ayna Dowlada Kenya ku eedeeyen ineey iyada masuul katahay arintaas islamarkaasna ay qas kawado Soomaaliya.
Xiisada Kismaayo ayaa labadii todobaad ugu danbeysay ahayd (Xarig lama sitaan) waayo meel waxaa kasocday muranka waxa laga yeelayo dhuxul aad ufarabadan oo daadsaneyd dekada Kismaayo, inkastoo QM Iyo Dowladaba ay kasoo saareen qaraaro hadana mafulin, oo waxaa lasoo mwarinayaa in dowlada Kenya iyo Shiikh Axmed Madoobe in ay dhagaha ka fureysteen, Meelkalena waxaa lagu karinayay sidii maamul logu sameyn lahaa Gobolada Jubooyinka.
Sida loo sahmiyo xaalada Kismaayo Dowlada Soomaaliyana umuujiso saameynteeda ku aadan Gobolada Jubooyinka waxay markii ugu horeesay udireen wafdi saraakiil ciidan ah oo uu hogaaminayo wasiirkii hore ee Gaashaandhiga Xuseen Carab Ciise, gudigaas ayaa sifiican loo soo dhoweeyay loona soo sagootiyay, balse xaalku waxa uu xumaaday markii markale loo diray gudi maamul usamayn ah oo uu madaxweynaha magacaabay halkaasina ay kala soo kulmeen wajigabax.
Axmed Madoobe ayaa wafdigan ugu danbeeyay sicad ugu sheegay in aaneey diyaar u ahayn ineey lakulmaan.
Dabcan go’aankan lagu soo eryay gudigaas ma ahayn mid gaar u ahaa madaxda Raaskambooni ee waa mid la ogayd lana wadaagtay Dowlada Kenya oo awalba shaki weyn laga qabay howlgalkeeda Milatari ee ay kawaday gudaha Soomaaliya.
Hada lama joogo maalmihii Kumeel gaarka ee waxaan dooranay Dowlad awood siyaasadeed leh lana xisaabtami karta dariskeeda iyo caalamka, siyaasada kasocoto Kismaayo-na ma ahan mid sahlan oo laga war wareegi karayo sidaa daraadeed waxaa madaxdeena loga fadhiyaa jawaabta ay kabixin lahaayeen su’aasha ah(Kismaayo ma laqabtay mise waa la qabsaday)?.
W/Q: Farxaan Xasan Gaabane
Oslo, Norway
Afeef: Aragtida qoraalkan waxa ay ku gaar tahay qoraaga ku saxiixan.
Arsene Wenger ayaa mar kale u jiheysan doona inuu lasoo wareego xidiga da’yarka ah ee weerarka uga ciyaara kooxda Real Madrid Alvaro Morata. Sida uu qoray wargeyska Daily Mirror.
Tababaraha Arsenal Wenger ayaa ku daalay inuu lasoo saxiixdo da’yarkaan isagoo doonayey inuu si amaah ah uga soo qaato Akadeemiga kooxda Real horaantii sanadkaan, mar kale ayuuna u jeestay sababtoo ah ciyaaryahanku weli boos joogta ah kama heysto Bernabeu.
Morata, oo hadda 20 jir ah, ayaa dhaliyey goolkiisii ugu horeeyey ee Real dhamaadkii isbuuca markii ay Los Blancos 2-1 ugu awood sheegatay Levante, laakiin Wegner ayaa weli heysta fursad uu kula soo saxiixdo xidigaan bisha Janaayo iyadoo ciyaaryahanku uu labo sano usoo dul qaatay booska keydka ah ee Madrid.
W/Q: Ahmed jaangoan
E-mail: [email protected]
Caasimada — Somalia.
Manchester United ayaa axada saraakiil daawata u diri doona markii Todobaad ee xilli ciyaareedkaan ciyaaryahanka garabka uga ciyaara FC Porto James Rodriguez.
United ayaa wakiilo usoo arkeen 21 jirkaan reer Colombia, xilli uu gool ka dhaliyey Academica de Coimbra. Porto ayaana daaha ka qaaday inaysan dooneyn inay iibiyaan waxaana qandaraaskiisa lagu burburin karaa 24 milyan oo ginni.
Waxaan la rumeysan yahay inay isha ugu hayaan bedelka ciyaaryahanka reer Portugal ee garabka ka ciyaara Nani oo ku socda wadadii uu kaga tegi lahaa Old Trafford ka dib markii uu hakad geliyey wadahadalo uu qandaraaska ugu kordhin lahaa kooxda.
W/Q: Ahmed jaangoan
E-mail: [email protected]
Caasimada — Somalia.
Magaalada Muqdisho ee Caasimada Soomaaliya ayaa waxaa hadba maalinba maalinta ka dambaysa waxaa ay kasoo kabanaysaa bur burkii horay ugu soo gaaray dagaalada xoogaana ee ka dhacay.
Marka aad ku dhex soconayso waxaad dib u soo xasuusataa waayo waayo,dadkana waxaa ay ku kala mashquuleen ganacsigooda maalin laha.
Waxaa jira meelo Hoteelo xilyada galbihii oo kale loo nasi tago,Amaankana waa uu fiicanyahay habeen iyo Maalina dadka waa ay wada socdaan.
dad badan oo u barakacay duleedka Muqdisho iyo Gobolada Dalka ayaa dib ugu soo noqday Muqdisho.
waa Isgoyska Sanca,qof waliba tiisaa haysata
Waa goobta qaadka laga iibiyo ee Sanca
Halkaani waa siisi
Halkaan waa Hotel lafweyn
Isgoyska Fagax
Hotel Kaah
Hotel Ramadaan
Weeraryahanka kooxda Arsenal Olivier Giroud ayaa qirtay inuu hada gudaayo 12 milyan oo ginni oo ah lacagtii ay kula soo wareegtay Arsenal wuxuuna rajo ka qabaa inuu Barclays Premier League ka dhaliyo 15 gool.
Giroud, oo 26 jir ah, ayaa Gunners uga soo biiray kooxda Faransiiska ka dhisan ee Montpellier, wuxuuna laba mar shabaqa soo taabtay kulankii barbaraha 3-3 ah ay Arsenal la dhaafi weysay Fulham isagoo dhaliyey goolkiisii lixaad ee tartamada oo dhan,
“Waxaan kusoo bilowdaa kulamada inta badan iyadoo aanan qabin wax shaki ah waxaana dareemayaa inaan fiicanahay,” ayuu yiri Giroud.
“Waan ku farxi lahaa hadii aan xilli ciyaareedkaan dhaliyo goolal u dhexeeya 12 ilaa 15 gool oo horyaalka ah.”
W/Q: Ahmed jaangoan
E-mail: [email protected]
Caasimada — Somalia.
Tababaraha kooxda Santos Muricy Ramalho ayaa daaha ka qaaday in kooxdiisu wadahadal kula jirto weeraryahanka kooxda Milan Robinho.
28 jirkaan ayaa dhibaatooyin dhaawac ah la tacaalaayey inta badan taasoo keentay inuu keliya hal kulan oo horyaalka ah kusoo bilowdo, tababaraha Peixe ayaana qirtay in kooxda ka dhisan Brazil ay dib ula soo saxiixaneyso weeraryahanka.
“Waa socdaan wadahadaladii aan la laheyn Robinho,” ayuu u sheegay saxaafada Brazil.
“Isaga uma ahan waqti fiican, taasna waa mid inaga noo wanaagsan.
“Fursado badan ma uusan ka helin kooxda Massimiliano Allegri, sidaas darteed rajo fiican ayaan ka leenahay.”
Robinho ayaa Milan 18 milyan oo euro uga soo qaadatay Manchester City, 91 kulan ayuuna u saftay Diavolo, isagoo u dhaliyey 25 gool.
W/Q: Ahmed jaangoan
E-mail: [email protected]
Caasimada — Somalia.
Tababaraha kooxda Barcelona Tito Vilanova ayaa qaboojiyey wararka xanta ah ee sheegaya inuu Alexis Sanchez bisha Janaayo u dhaqaaqi karo kooxda ka dhisan Talyaaniga ee Juventus.
Wararka ayaa soo jeedinaayey inay macquul tahay heshiis u dhexeeya kooxda Antonio Conte iyo Barcelona oo ku aadan weeraryahanka reer Chile, laakiin 44 jirkaan ayaa gaashaanka ku dhuftay wararkaas wuxuuna sheegay inuu rajo ka qabo inuu waqti dheer lasii shaqeeyo ciyaaryahankii hore ee Udinese.
“Waa wiil wanaagsan wuxuuna weli kooxda kula jiraa qandaraas waqti dheer ah,” ayuu u sheegay ESPN Espana.
“Waxaan rajo ka qabaa inuu waqti dheer halkaan kasii ciyaaro.”
Sanchez ayaa 2011kii Blaugrana kula biiray aduun lacageed gaaraya 26 milyan oo euro, wuxuuna u saftay 56 kulan isagoo u dhaliyey 16 gool.
W/Q: Ahmed jaangoan
E-mail: [email protected]
Caasimada — Somalia.
Kabtnaka kooxda Chelsea John Terry ayaan Qatar u gelin sidii la filaayey maadaama loo maleynaayey inuu qabo dhaawac aad u weyn oo jab ama tarar ah laakiin ma uusan noqon wuxuuna garoomada ka maqnaan doonaa muddo isbuucyo ah.
Daafaca halbowlaha dhexe ayaa ku dhaawamay kulankii ay kooxdiisu barbaraha 1-1 ah la dhaafi weysay Liverpool ka dib markii ay si kama ah isugu dheceen Luis Suarez waxaana soo gaaray dhaawac u muuqday inuu yahay mid halis ah.
Laakiin Terry ayaan wax bilo ah garoomada seegi doonin ka dib baaritaano dheeri ah oo lagu sameeyey, wuxuuna garoomada ka maqnaan doonaa laba ilaa lix isbuuc, iyadoo waqtiga rasmiga ah la sheegi doono marka uu bararku ka dego dhaawiciisa.
Chelsea ayaa website-keeda rasmiga ah ku xaqiijisay: “Wuxuu garoomada ka maqnaan doonaa isbuucyo halkii la filaayey inuu bilo ka maqnaado.”
W/Q: Ahmed jaangoan
E-mail: [email protected]
Caasimada — Somalia.
Tababaraha Real Madrid Jose Mourinho ayaa isha ku haaya kuna dhow inuu daawado ciyaaryahanka loo diiwaan geliyey xulka England Wilfried Zaha.
Tababarihii hore ee Chelsea Mourinho ayaa wakiiilo daawada u diray weeraryahanka Crystal Palace oo xilli ciyaareedkan 20 jirsaday. Siina wata waayihiisa mucjisada ah.
Special One ayaa hada ka hadlaaya xiisaha uu u qabo Zaha, muhiimadiisuna waa inuu hubiyo sida uu ugu ciyaaro xulka Roy Hodgson ee arbacada kulan saaxiibtinimo la dheelaya Sweden.
Zaha ayaa sidoo kale waxaa wakiilo daawada u diray kooxo dhowr ah oo ay ka mid yihiin Arsenal, Tottenham, Manchester City iyo Chelsea ka dib markii uu kusoo baxay mid ka mid ah ciyaartoyda da’yarka ah ee ugu wanaagsan England.
W/Q: Ahmed jaangoan
E-mail: [email protected]
Caasimada — Somalia.
Wararka ka imaanaya magaalada Boosaasaa ayaa waxaa ay sheegayaan in kooxo hubaysan ay labo ruux ku dileen halkaas oo midkoodna uu ahaa nabadoon.
Dilla Nabadoonka iyo ruuxa kale ayaa waxaa la sheegayaa inay ka dambeeyeen kooxo hubaysan oo aan lagaranaynin inay u socdeen aanooyiin aargoosi qabiil iyo in kale.
Nabadoonka ayaa waxaa ay kooxaha hubaysan dileen markii uu kasoo baxay goob lagu shaaha oo ku taal magaalada Boosaaso intaa kadibna waxaa ay ku dareen dilka qofkale oo deegaanka ah.
Kooxaha hubaysan ayaa goobta ka baxsaday markii ay dilka fuliyeen mana jirto cid ay u soo qabteen Ciidanka amaanka dilka labadan ruux oo xalay lagu dilay Boosaaso.
Masuuliyiinta Maamulka Banaadir u qaabilsan dhinaca amaanka ayaa qorshaynaya sidii Muqdisho ay ugu samayn lahaayeen howlgalo gur guri ah kaas oo Amaanka Caasimada lagu adkaynayo.
Gudoomiye ku xigeenka dhinaca Amaanka maamulka Gobolka Banaadir Warsame maxamad Xasan(Warsame joodax oo warbaahita la hadlay ayaa sheegaya in baaritaanadan ay ka qabsoomayaan Muqdisho oo dhan guryaha ku yaala.
Waxaa uu ku micneeyay Gudoomiyahaha howlgalkaan mid qashin saar ah taas oo uu kala jeedo kooxaha gabaadka ka dhiganaya Guryaha kana Mid ah kuwa amaandarida ka gaysanaya Caasimada.
Warsme joodax ayaa carabka ku dhuftay kooxaha qaraxyada iyo dilka ka gaysanaya Muqdisho inay ku jiraan degmooyinka 17-ka ah ee Dowlada ay maamusho.
Hadalka Maamulka Banaadir ayaa waxaa uu yimid iyadoo Xaalada amaan ee Muqdisho maalinba si ay tahay.
Aqrsite, waxaan halkan kuugu soo gudbineynaa dhambaal ka yimid aqriste kale oo idinka doonaya talo, waa barnaamijkeeni cusbaa ee aan ugu magac darnay ILA TALI AQRISTE: Ujeedka ayaa ah qofkii talo raba inuu soo weydiisto aqristayaasha aan u fududeyno, maadamaa uu heli karo fikrado badan oo kal duwan, mark a la isku geeyana noqon kara wax ku ool.
Waxaan idin ka codsaneynaa inaad aqrisaan farriintan, kadibna wixii talo ah oo wanaagsan oo aad si daacad iyo qalbi furnaan ah ugudarsataan, adinka oo hab qoraalkiina ka ilaalinaya qaladadaaka ama Tape error-ka, si qofka talada ku socoto uu fahamkiisa ugu fududaado. Waxaad taladaada ku qori kartaa qeybta comments-ka.
Fadlan si anshax iyo wanaag leh ula tali walaalkaaga ama walaashaada dhiban. Adigana haddii aad talo doon tahay noogu soo dir arrintaada [email protected]. Caasimada Online mar walba inay bulshada caawiso, una sahasho isticmaalka bogga ayay ballan qaadeysa
Talo doonkeena maanta waa gabar magaceeda kusoo koobtay Sucaad, oo aan inoo sheegin halka ay joogto.
Waxayna qoraalkeeda ku billwoday sidan:-
“Magacayga Waa Sucaad
Walaalayaal talo waa tii ilaah laakin tallo ayaan idinka rabaa.
Waxaan ahay inan Soomaaliyeed waxaan guursaday nin iga weyn. Markii aan baranayey waxaan ku arkay inuu yahay muqayil yacni sigaar iyo jaad ayuu isticmaalaa. Waa nin shaqaysta, maalintii ilaa 2:30pm wuxuu ku maqan yahay shaqo markuu guriga yimaado wuu qadeeyaa, isla markii uu qadeeyo wuxuu aadaa magaalada iyo jaad. Habeenkii wuxuu yimaadaa 10:30 pm markuu soo galo wuxuu qaataa computer-kiisa fadhiga ayuu fariistaa ilaa 02:00am midnight, markaas ayuu haddana laptopkiisa qaataa oo jiifka soo galaa oo seexdaa.
Sbaxdii markuu kaco shaqaduu aadaa, yacni sidaas ayaa uu noloshiisii ka dhigay, anigana ma is aragno habeenkii anoo hurduu tagaa, maalintii anoo shaqada ku maqan ayuu baxaa, dhowr jeer ayaan kale taliyey, waaniyey, labada family (qoys) micnaha reerkeyga iyo kiisa ayaan dhibkayga u sheegtay, mar kasta wuxuu dhahaa waan iska joojinayaa, haddana meeshiisa ayuu kaga miisaa.
Dhowr jeer “ifur” ayaan iri, wuu iga diiday. Noloshayda mugdigaas ayey ku jirtaa meesha ay asaagay ay farxada kaga jiraan. Fadlan idinkoo mahadsan ila soo taliya ma ka tagaa oo waraaqdayda maka qaataa mise …..idinkaan idinka warsugayaa….Saddex jeer ayaa labada famil ka wada fariisteen, markii la iga furi lahaa ayaa waxaa la iyiri fursad sii markii ugu danbaysay weeyay’e. Fursaddii hadii aan siiyey, ninkii wax is badal ahkamahayo waa sidiisii, Markaan hadii aan is dhahana familkii ku noqo oo usheeg inuusan ninkaan wax isbadal ah lahayn fursadii ugu danbaysayna wuu qaata. Mana ahan nin yar oo aad dhihi kartid yaraan baa ugeenaysa waa 40 sano jir iyo ka badan, ana waxaan jiraa 23sano. Marka walaal taladiina ayaan u baahanahay inaad igu caawisaan.
Mahadsanidin waa walaashiin Dhiban”
Qoraaladii hore ee ILA TALI AQRISTE:
“Tan oo kale hore ayey iigu dhacday”
“Markii aan ku dhowaado wuu iga durqaa, markii aan ka quustana hami buu i galiyaa”
Iyada oo ay jirto burburkii nidaamka daryeelka caafimaadka kadib sanado badan oo khilaaf ah, ayaa tiro yar oo xarumo caafimaad ah oo Muqdisho ku yaala sida isbitaalada Banaadir, Madina iyo Keysaney, ay sii wadaan in wali shaqaynayaan, caafimaad bilaash ahna siinayaan dadka maxaliaga ah.
Luul Maxamed, oo ah madaxa qaybta caruurta iyo dhamlada ee Isbitaalka Banaadir, oo ah mid ka mid ah isbitaalada ugu waawayn Muqdisho, ayaa sheegtay in isbitaalku uu bixiyo adeegyo caafimaad oo bilaash ah, siiyana kumanaan haween iyo caruur ah oo ay hayso nafaqo dari.
“Maalin walba, waxaan qabanaa boqolaal dad oo xanuunsan, intooda badana ay yihiin caruur ay hayso xanuuno kala duwan, sida shuban, jadeeco iyo nafqo dari, waxaanan siinaa adeegyo caafimaad oo bilaasha ah,” ayay tiri.
“Iyada oo la fiirinayo macluumaadka ay hayso Hay’ada Caafimaadka Aduunka, ayaa xadka nafaqo darida caruurta iyo ku dhinta dhalmada ee Soomaaliya ay aad u saraysaa,” Mohamud ayaa sidaas sheegtay. “Tobankii haweenba, mid ayay soo food saartaa dhimasho wakhtiga uurka ama dhalida, sidoo kale, shantii caruurba oo ka yar da’da 5 ayaa mid ka mid ah ay haysaa nafaqo dari aad u daran.”
Muqdisho iyo agagaarkeeda, boqolaal kun oo dadka wadanka gudihiisa ku barakay (IDPs) ayaa ku nool xerooyin tan dhaafay, taas oo keenaysa xaalado ay ku faafi karaan cudurada la is qaadsiiyo.
“Jadeecada iyo shuban biyoodka ayaa ku badan xeryaha IDP ee Muqdisho sababta oo ay ugu wacan tahay yaraanta biyo cabitaan oo nadiif ah iyo xaaladaha musqulaha oo xun,” Maxamuud ayaa sidaas tiri.
Maxamuud Cabdi, oo ah xirfadle dhakhtar oo guud, kana shaqeeya Isbitaalka Banaadir, ayaa sheegay in cuduro badan oo la daawayn karo sida malaariyada ay ku badan yihiin wadanka. “Soomaalida ayaa u dhimanaya sababo la xidriira cuduro si sahal ah loo daawayn karo, sida shubanka, malaariyada iyo jadeecada, sababata oo ah ogaanshaha nooca cudurka oo hoosaysa taas oo ka imaanaysa la’aanta qalab wax lagu baadho ama dhakhaatiir aan tayo lahayn oo ku shaqaynaya,” Cabdi ayaa sidaas sheegay.
Axmed Xasan, oo ah maamulaha Isbitaalka Zamzam ee ay Masaaridu gacanta ku hayso, ayaa sheegay in xarumaha caafimaad ee Muqdisho ay haysato daawo yari iyo qalabka aasaasiga ah.
“Waxaa jira baaba’ ka jira xarumaha caafimaadka ee Muqdisho,” Xasan ayaa sidaas yiri. “Tirada isbitaalada dawlada iyo kuwa khaaska ah ee magaalada ka hawl gala, halkaas oo ay ku nool yihiin in ka badan 2.5 milyan, kama badna 13 isbitaal, intooda badana ay haysato yaraan xaga daawada muhiimka ah si loogu daawaayo dadka xanuunsan iyo kuwa dhaawaca ah kuwaas oo isbitaaladu ay helayaan iyaga oo tiro badan.”
Xasan ayaa sheegay in Isbitaalka Zamzam ee Masaarida ee ku yaala xaafada Madiina ee Muqdisho ay bixiso daawayn bilaasha ah iyo adeego caafimaad oo naf joojin ah ayna siiso in ka badan 200 oo qof maalin walba.
Wuxuu sheegay in tirada xirfadlayaasha caafimaad ee tayada leh ee wadanka joogta aya aad u yar tahay sababta oo ah dhakhaatiir badan ayaa wadanka ka tagay kadib markii ay dawladii dhaxe burburtay sanadkii 1991.
“Wakhtigan hada lagu jiro, qiyaastii waxaa Soomaaliya jooga 250 dhakhtar oo tayo fiican leh, waxaa kale oo jooga 860 kalkaaliyayaal caafimaad iyo 116 umuliso oo kaliya,” ayuu yiri.
“Wadan ay haysato adeegyada caafimaadka oo hooseeya, tababarka shaqaalaha caafimaadku waa lama huraan,” ayuu yiri. “In badan oo shaqaalaha caafimaadka ah oo wadanka jooga waxay u baahan yihiin tababar si ay u hormariyaan xirfadahooda kadibna ay naf u badbaadiyaan.”
Ururka Dhakhaatiirta Carabta ayaa u soo diray koox dhakhtaro ah Soomaaliya sanadkii hore, si ay isbitaalada iyo xarumaha caafimaadka ee wadanka uga shaqeeyaan, ayna u tababaraan dhakhaatiirta Soomaaliya, Xasan ayaa yiri. “Tababarka iyo horumarinta xirfadaha kuwa ka shaqeeya caafimaadka ayaa ah waxyaabaha daruuriga ah ee Soomaaliya looga baahan yahay,” ayuu yiri.
“Duniya Cali Axmed, oo madaxa ka ah adeegyada caafimaad ee Isbitaalka Madiina ee Muqdisho, kaas oo qaabila bukhaan socodka aadka u dhaawacan, ayna taageerto Hay’adda Caalamiga ah ee Laan Qayrta Cas (ICRC) ayaa sheegtay in tirada bukaan socdka uu isbitaalku qabanayo ay mar marka qaarkood ka badan tahay awoodiisa.
“Dhawrkii sano ee la soo dhaafay, markii ay dhibaatadu kor u soctay, Isbitaalka Madiina ayaa qaabilayay tiro badan oo bukaan socod ah maalin walba,” ayay yiri. “In kasta oo ay dhibaatadii hoos u dhacday Muqdisho, ayaa Isbitaalka Madiina uu wali qabanayaa labaatameeyo dad ah oo dhaawac ka soo gaadhay qaraxyo, xabado, shilal baabuur iyo xaalado kale.”
Waxay sheegtay in ICRC ay ugu deeqday alaabo caafimaad iyo qalab qaliin isbitaalka, tababaraana shaqaalaha caafimaadka iyo farsamayaqaanadoodaba, bixiyaana mushaharkooda.
Isha: Sabahi
Qormadani waa mid kamid ah silsiladdii taxanaha ahayd ee raddinta shubbahaatka lagu marin habaabiyey umaddeenna caamada ahi ee aanan diinba aqoon mid Islaam iyo mid kale toona, waxayna daba taal qormooyin raddin shubaha ahaa oo aanu ku raddineynay nin magaciisa kusheegay Hassan Colhaye.
Hassan Colhaye wuxuu kaga duwan yahay ragga asaaggiisa ahi ee la duufsaday isagu wuxuu soo bandhigay jahligiisii, weliba qoraallo cajiiba oo aanan mudneyn inaan ka hadla ama aan soo copyeyo ayuu inoo soo direy. Kama hagran doonna innagu haddaynu nahay walaalahiis inaanu u hiilinno oo aan xaqa u iftiiminno si uu uga badbaado cadaabta Alle, waayo waxaa inoo muuqata inaanu aqoonba agtiisu la marinin, oo weligii dhigaal aanu marin dhawaq mooyee.
Intaa haddaan uga gudbo, qormadan waxaynu maanta ku raddin doonnaa shubbaha aad la wada yaabi doontaan haddii aad maqashaan. Waa waxaydaan weligiin horey u maqal, kutub Islaamna aanan ku oollin.
Waxaa iman doonto su’aal ah halkee buu waxani ka keenay Colhaye? Mise muxuu u weydiin waayay kuwii usheegay beentan halka ay kaga taal Islaamka si uu kula dooda Islamka iyo dadkiisa? Intaba wuu ku kadsoomay innaguna sidii la inooga bartay, xaqaan u iftiimineynaa innagoo kaashanaya Allaha Raxmaanka ah, saa hadduu hanuun la doono wuu hanuunin, haddii kalena xaabada Jahannamuu noqon doonaa!!.
Wuxuu inoosoo qorey qormadani aanan illaa hadda fahamsaneen meeluu ka keenay:
Tan koowaad ee diinta ku saabsan, waa sidan: Ma ogtahay in Maxamad iyo Allah ay hal shaqsi wada yihiin? Waxaan annagu ogeyn, Soomaali haddaan nahay, Maxamad waa nabi, Ilaahay baana soo dirsaday. Waa been taasi, waxbana kama jiraan. Maxamad iyo Allaah waa isku halka nin ee Maxamad oo magiciisa runta ah oo uu ahaa Qutham. Maxamad wuxuu ku yimid magac beddelasho, micneheeduna waa “the Praised One” kii suubbanaa ama ammaannaa! Magiciisa runta Qutham, micnihiisu waa “Kii dilnaa ama yasnaa, ama liidanaa!” Qutham waa cagsiga ama beddelka Maxamad, kii dulleysnaa vs. kii ammaannaa.
Ugu horreyn hadalka ah Ilaahay iyo Muxammad (NNKH) waa isku mid.. Adeer caqiiqadaasi Islamku maqabo, nebi Muxammadna (NNKH) wixii uu dadka kala dagaallay ayay ahayd in Alle cid kale lala wadaajiya, wuxuuna ina baray in Alle keli yahay, aanu waxba dhalin, lalana dhalan, isaguna la dhalin. Haddii aad doonta aqri suuradda gaaban ee sha’niga weyn leh ee Al Ikhlaas.
Caqiidada Thaaluuthka ah ee masiixiyadda weeye midda aaminsan Allaah iyo Ruuxul Quddus iyo wiilka (Nebi Ciise). Taasoo runtii ay fahmi la yahiin masiixiyiinta caqliga lihi oo ay ku wareeraan markay maqlaan waxaas oo kale. Saddex shaqsi oo hal ah oo haddana aanan hal qof ahayn waa midda keentay in carruurta yar yar lagaga ilaaliya aqrinta Baybalka.
Meelo badan oo Quraanka kamid ah buu Ilaahay ku fadeexeeyey Yahuudda iyo Masiixiyiinta asagoo Ilaahay Yahuudda ku dhalleeceynaya dhagartooda iyo madax adeygooda kuna lacnaday sababtaasi, Masiixiyiintuna wuxuu ku dhaleeceeyey inay la wadaajiyeen nebigiisa Ciise oo ay uga dhigeen inay isla yahiin Ilaahyo oo misna mar kale uu yahay wiilkii Ilaahay (wuu ka hufan yahay Alle waxa ay kusheegeene).
Sidaa daraaddeed waxaan ku oranayaa halmeelna kama soo heleysid diinta Islaamka meel ay ku amarto in Alle nebi ama ma’aalik lala wadaajiyo, iskaba daaye in Muxammad (NNKH) yahay!!.
Sidaa daraaddeed waa wax lagu qosla waxa aad tiri, oo aad loola yaabo, meel ay ku qoran tahay koonkanna ma jirta, xataa masiixiyadda aad sheeganaysa ayaanay ku qorneyn in Muxammad (NNKH) iyo Alle hal yahiin. Diin kasta iyo cid kasta ayaana ka marqaati ah in nebi Muxammad (NNKH) wixii uu la dagaallamay ay ahayd waxa aad adigu immika kusheegeysa.
Waxaa marka is weydiin mudan, waxani halka aad ka keentay? Haddii laguusoo aqriyey maxaad u weydiin weysay maraajiicda laga soo min guuriyey waxani? Way ku dulleeyeen runtii kuwii waxaasi kuu soo aqriyey, aakhirana ahal kuuma noqon doonaan, oo jid xun bay kuu horseedeen haddaadan ka toobad keenin oo aadan xaqa Islaamka usoo noqonin. Waxa waliba oo Islaamku lagaaga sheegay waa caksigeeda, sidaad horey ugu aragtay raddintii shubbahaadka ee ciwaannadii hore.
Wax waliba oo aad Islaamka ku sheegtay oo aad isleedahay ku liid, ama ku dur nebinnimada nebi Muxammad (NNKH) waa wax aanan ku qorneyn Islaamka, bal’ee Baybalka ku dhigan, oo Masiixiyiinta iyo Yahuuddu fasho.
Maantana waxaad keentay caqiidadii Thaaluuthka ahayd ee Masiixiyadda aaminsanayd inaad Islaamka ku durta, ama aad ku tilmaanta nebi Muxammad (NNKH) wixii aad Ciise ku tilmaamaysay.
Martabadda Ciise uu Islaamku gaarsiiyey Baybalku ma gaarsiinin, halka hooyadii Maryama Baybalka lagu caayay, ama looga shakiyey Yuusuf An Najaar inuu ka sineystay, Quraanku wuxuu ku tilmaamayaa Catraa Al Batuul, suurad dhan ayuuna Ilaahay ku sharfayaa magaceeda.
Baybalka Axdigii hore 17 mar oo qura ayaa laga helayaa magaca Maryam, halka Axdiga cusub laga helaya 1 mar oo qura. Ma taqaan inta mar ee magaca Maryam laga helaya kitaabka Quraanka? Waa 38 mar. Labo jibbaar tirada Baybalka lagu xusay magaca Maryam.
Kitaabka Quraanka waa hal, Maryamana waxaa lagu xusay 38 mar, Baybalkuna waa dhowr iyo toddobaatan kutub, Maryamana waxaa lagu xusey 18 mar.
Diintaas weeye midduu inoo keenay nebi Muxammad (NNKH) ee ay ku liidday Yahuuddu markay iska dhex arki waysay ama ay ka heli weysay wixii ay rabtay. Alle baa og halka uu risaaladiisa dhigaya iyo cidduu u dhiibaya. Haddii aad adigu nacayb aad u qabto Carab uga baxday diinta Islaamka, Alle wuxuu risaaladii ugu dambeysay diimaha ku sharfay Carab. Quraankuna waa Carabi.
Haddaan intaa ka gudbo, caqiiqada thaaluuthka ee aad la timidayna aan dib kuugu celiya, bal aan markanna ka hadla qodobka xiga ee aad leedahay Muxammad (NNKH) waxaa la oran jirey Quthum magacana isagaa baddashay.
Ma xumo!!.
Laakiin aan mid kuweydiiyee!! halkee baad tanna kasoo heshay? Waa runtii war ullaaban qofkastoo Muslim ah amaba aan dhahee Masiixi ah, waayo waa wax aanan lagu xusin kitaabka Quraanka iyo xadiis tooni waxa aad lasoo shirtagaysa, cid si cad ugu tuhuntayna majirta walaa Muslim, walaa Masiixi. Waxaan ku tusayaa maantay inay ku heleen dad cadaw kuu ah oo kusoo indha tiray.
Haddii wax laguu sheego, oo waxaasi ay noqdaan been aanan sal iyo raad toona lahayn, oo habayaraatee meel ay ku dhigan tahay aanay jirin, waxaad ogaataa markaasi dadkii kuu sheegey waxaasi inay yahiin cadawgaada.
Bal ka warran magaca Muxammad wuxuu ahaa magac dhowrsoon oo Ilaahay ka dhowray cid kale nebigiisa hortii in loo bixiya. Mataqaan yaa ubixiyey magaca Muxammad? Siirada haddii aad aqirada waad ogaan lahayd. Aan kuusheegee waxaa u bixiyey awoowgiis Cabdil mudallib. Haddii aad ku laabato kutubbada siirada oo dhan waad soo heleysaa xaqiiqada warkayga.
Qof maalintuu dhashay loo bixiyey Muxammad, siduu markuu weynaado u qaadanayaa magaca Muxammad, oo magac aanan jirin aad dusha ugu saartay? Maalinna kol ay ku tahay looguma yeerin magaca Quthum iskaba daa in loo yaqaannaye.
Nebi Muxammad (NNKH) wuxuu inoo sheegey inuu leeyahay magacya badan, magaca keliya ee markuu dhashay loo bixiyeyna waa Muxammad. Magacyada uu inoo sheegey waxaa kamid ah ”Al Mukhtaar (mid la doortay), Maaxi (mid xaqa ku tira baadilka), Daahaa, Axmed, Mustafaa, Al amiin, iwm”.
Magacyada wanwanaagsan ee nebiga (NNKH) marna kama soo dhex saareysid wax la yiraahda Quthum. Magaca saxda ah ee nebi Muxammad (NNKH) awoowgiisa u bixiyey waa midka Ilaahay uu inoo sheegey in kutubbadii hore (Towraadda, Zabuurta iyo Injiisha) lagu dhigey ee nebiyadii hore dadkoodii ugu bishaareeyeen, iyagoo xusaya magaciisa.
Illaa maantadan Ilaahay ma diidin inkastoo ay ku falaadeen Baybalka oo ay tirtireen magacii Muxammad inta badan haddana in laga helo waa ogalaaday. Haddaad eegto kitaabka la yiraahda
Song of Salamon/Gabaygii Sulayman cutubka 5d faqrada 16d. Waxay oranaysaa sidan
16. Afkiisu aad iyo aad buu u macaan yahay, oo isaga dhammaantiis waa mid aad loo jecel yahay. Gabdhaha reer Yeruusaalemow,
Tani waa turjumada caanka ah ee dunida ee loo yaqaan King Jemes, waana qeybta tootoosinka ee kama dambeysta Baybalka ah. Luuqadda engriiska ayaa laga soo turjumay. Xitaa ta Carabiga sidan ayay u qoran tahay.
Laakiin haddaad eegto kan luuqadda Hebrew-ga (Cibriga), waxaad arkaysaa in meesha immika turjamada King Jemes lagu baddalay oraahda ah ”waa mid aad loo jecel yahay”, in sideedii uu ugu yaala magacii xaqiiqda ahaa ee halkaasi ku dhignaa markii hore, kaasuna waa magaca Muxammad.
Waa tan xaqiiqada ayadoo Cibri ah
“Cheeko mame tah kim, vechulo Mohamad-im. Zeh doudi, Me zehre he, beyna Jeruzalem”
(Songs of solomon 5:16)
Waa kan naskii oo sida cibriga asalka u qoran
Haddii aad rabto gal webkan, uu ku daabacan yahay Baybalka oo cibri iyo english ah. Waa kan hoose
http://www.mechon-mamre.org/p/pt/pt3005.htm
Xasuusnoow nasku waa Songs of Solomon 5: 16d. Isagoo english ah ayuu ku hor dhigan, laakiin sidii aan horey kuugu sheegey luuqadda englishka marka lagu macneynaya naskaasi kalmadda si sax ah looma macneyn, balse waxay ku macneeyeen ”beloved”, mid la jecel yahay iyagoo ka tiray xaqiiqdii magaca Muhammad. Waa kan sida ay ugu macneeyeen u fiirso!!
16 His mouth is most sweet; yea, he is altogether lovely. This is my beloved, and this is my friend, O daughters of Jerusalem.’
Si aad u hubiso qiyaanada luuqadda englishka ahi, gal google translate, kadib kadooro luuqadda cibriga oo lagu turjumaya luuqadda aad rabto. Waxaa kuusoo baxaya magaca Muhammad oo aanan la turjumin oo sidiisa ah. Haddii ay ku macneyn lahaayeen oraah ah ”mid la mahadiya”, way noqon lahayd magacii Muxammad oo la macneeyey, laakiin Beloved ayay ku macneeyeen!!.
Calaayatakulli xaal, waxaa laga yaabaa inaad is weydiineyso Muhammad-IM. Garannay Muhammad-, ee IM maxay ka dhigan tahay?
IM- waa kalmad yar oo cibri ah, badanaana ma samayso macno in wax lagu dara mooyaane, waa sida kalmadda Carbeed ee yaa oo kale. Haddii yaa!! aad tiraahda macno ma samayn karta, laakiin haddaad ku darta Allaah, waxay noqoneysaa Yaa Allaah!!. Ereyga IM, sidoo kale wuxuu tilmaamaa sharaf, marka ay magacyada wanwanaagsan ay isugu wacayaan ayayna aad u isticmaalaan.
Matalan Yahuuddu Ilaahay waxay tiraahdaa ILOH, laakiin marka ay baryayaan waxay ku baryaan ILOHIM. Waxay ku daraan ereyga IM, oo macna qurxoon iyo sharfid ay ula jeedaan.
Sidaa daraaddeed bay marka aayaddan aqrinayaan ay aad ugu khushuucaan iyagoo Muhammad-im oranaya.. Macnaha Muxammadoow!! oo kale.
Intaa haddaynu ka gudubno, magaca Muxammad, Quraanka kariimka ahi waxaa lagu sheegey 4 mar, suuradda Aali Cimraan mar, suuradda Al Axzaab mar, suuradda Muxammad mar, suuradda Al Fatxina mar. Mar kalena waxaa lagu sheegay magaca Axmed suuradda Al Saf.
Marka shanaad ee lagu sheegey suuradda Al Saf, waa marka uu Alle ka warramaya in Ciise uu qoomkiisa ugu bishaareeyey nebi isaga bacdigiisa iman doona oo la yiraahda Axmed. Sabab Axmed? Muxuu u oran waayay Muxammad?
Tani waxay ku tusineysaa mucjisada Quraanka, iyo inuu ka yimid xagga Allihii joogay waqtigii Ciise iyo waqti kasii horreeyayba. Waqtigii Ciise, wuxuu ahaa waqti ka horreeyay waqtiga nebi Muxammad (NNKH).
Macnaha Muxammad waa mid la mahadiyay!!. La mahadiyey!! ogow waa ficil tegey, laakiin Axmed macnaheedu muxuu yahay? Axmed waa mahadin iyana laakiin waxay tilmaamaysaa ficil soo socda, ama iman doono, Soomaali ahaanna wuxuu noqonayaa macnaha Axmed mid la mahadin doono
Axmed= mid la mahadin doono!!.. Macnaha waa wax iman doono.
Muxammad= mid la mahadiyey!! macnaha waa ficil tegey waala mahadiyey.
Macnaha ahaan waa marka aynu macneyna labada magac ee Carbeed, waa ficil soo socda, iyo ficil tegey.
Sidaa darteed baa Ciise wuxuu dadkiisii usheegayaa inuu iman doono gadaashiis nebi la mahadin doono. Alle oo waqtigaasi la joogay, kahorna joogay baa inooga qisoonaya wixii Ciise uu kula hadlayay saaxiibadiisii xawaariyiinta, oo inoo sheegaya wixii uu Ciise yiri si toos ah, taasoo muujineysa in Quraankani uu ka yimid xagga Allaha jiri jirey ee weli jira ee misna jiri doono.
Dhanka Quthum, magacyada nebiga kama mid ahayn magacaasi, xitaa kunyadiisu ma ahayn Quthum sida aanu horey usoo tilmaannay. Laakiin waxaa jirey wiil uu dhalay nebiga adeerkiis oo la oran jirey Quthum. Waxaa dhalay Al Cabbaas bin Cabdel mudallib.
Sida aad soo qortay waa Quthum, macnaha qaaf godan marka loo eego Carabi ahaan, sida aad ku macnaysayna maahan, xaqiiqada macnahiisa.
Qaamuuska Carbeed ee la yiraahda Al macaani wuxuu qorayaa Quthum, oo ah qaaf godan in loola jeeda qofka maalka badan bixiya, wuu sii macneynayaa oo wuxuu oranaya Quthum waxaa loola jeedaa deeqsi. Sidoo kale wuxuu oranayaa waa qofka inta cunta jarjara (muufo iyo wax lamida) u qeybiya dadka.
Dhanka kale waxaa jira Qitham, oo ah qaaf hoos dhaban, mana u baxsadaan badanaa Carabta magacaan, waxaana uu ku macneynayaa qaamuuska Al macaani qof socod gaaban yacni tartiib socde.
Si kastaba intaan ka dib waxaan rajaynayaa in wax badan aad ka ogaatay xaqiiqada magaca Quthum iyo magaca Muxammad (NNKH). Sidoo kale waxaan fili inaad ogaaday sida laguu soo qalday. Arigtada xaqa ka dibna majirta wax aanan ahayn raacid ama baadi noqosha, waxaana Ilaahay kaaga baryayaa inuu qalbigaada ifiya oo aad dareenta gefka ay cadawgaasi kaa galeen iyo sida ay kuu lumiyeen jahli dartiisa, waxaa kaloo iga talo ah inaad dib ugu laabato aqrinta diinta islaamka, waayo uma muuqatid nin habo yaraatee aqriyey diinta Islaamka, maxaa yeelay waxaad soo min guurineysaa wixii Baybalka ku yaallay oo aad dabeeta ku dureysaa Islaamka iyo nebigeenna suubban (NNKH).
Towfiiqdana Allaa iskaleh.
WQ: Mohammed Tahir Abdi
Email: [email protected]
______________________________
Afeef: Qormadani waxay u gaar tahay qoraha iyo webka caasimada.net, lama daabacan kara idan la’aan.
Qaar kamid ah haweenka Soomaaliyeed ee ku dhaqan Gobolka Banaadir, ayaa gudoomiyaha Gobolka Maxamuud Axmed Nuur Tarsan waxay ku eedeeyeen inuu faragalin kuhaayo oo uu kala geynayo haweenka qaranka Soomaaliyeed.
Xaawo C/laahi Qayaad, oo horay uga tirsaneed xilibaanadii KMG ahaa ee dalka soo maray ayaa sheegtay in maalmahaan haweenka qaranka ay ahaayeen kuwo is qilaafsan islamarkaasna qolo qolo ushirayay, Xaawo ayaa gudoomiye Tarsan ku eedeeysay inuu qaar katirsan haweenka uu maalmahaan si gaar ah ula shirayay.
“Gobolka Banaadir, horta waa goboleena, waa garbaheena laakiin beryahaan waxaan aragnay gaar gaar usocod, haweenka Soomaaliyeed lakala faquiuqo, degmooyinka loo soo bixiyo la’amro, haweenka Soomaaliyeed waa laba gabdhood oo sinan, waxa weeyaan Aqligu inuu shaqeeyo ayaa lo baahanyahay, waxaa loo baahanyahay in la dhexdhexaadiyo, maahan in qof lala safto gudoomiyaha waxaan leenahay noqo qoortii labada dhinac udhaxeeysay, haweenka Soomaaliyeedna ha’ukala eexan” ayay tiri Xaawo C/laahi Qayaad.
Haweenka qaranka Soomaaliyeed ayaa maalmihii ugu danbeeyay waxaa soo baxayay qilaaf aad uxoogan oo kadhex jiray, haweenka ayaa kala doortay labo gudoomiye, mid walbana waxay ku doodeeysaa in iyada ay tahay gudoomiyaha xaqa ah islamarkaasna ladoortay.
Sida muuqata haweenka Soomaliyeed ayaa hada u muuqda kuwo lamid noqday siyaasiyiinta Soomaaliyeed ee looga bartay is qabqabsi siyaasadeed iyo in xil laysku qabsado.
Madaxwaynaha Dowlada Jabuuti Cismaaciil Cumar geele ayaa deeq waxaa uu soo gaarsiiyay Haweenay Soomaaliyeed oo ku nool Muqdisho dhashayna Afar Caruur ah.
Safiirka Jabuuti u fadhiya Soomaaliya Dayib dubad Rooble ayaa warbaahinta u sheegay lacagtaan loo soo marsiiyay haweenaydan dhashay Afarta caruur Safaarada Jabuuti ee Soomaaliya.
Waxaa uu sheegay Dayib in lacagtan ay soo dhiibtay Marwada koowaad ee Madaxwaynaha Jabuuti Khadro Maxamuud Xeyle isagoo cadadka lacagahaas ku tilmaamay 5,000$.
Marwada Madaxwaynaha ayaa sheegtay in lacagtan ay ugu tala gashay Xaliimo Maxamad Cabdi oo muqdisho ku dhashay Afar caruur ah midna waa uu ka dhintay.
Waa ay ugu Mahad celisay Xaliimo Maxamad gar gaarka ugu yimid Madaxtooyada Jabuuti.
Caasimada Online is a reputable and reliable source of news and information on Somalia. As the largest Somali news site, we are dedicated to providing our readers with accurate and up-to-date coverage of the country's politics, society, and culture. Founded in 2009 by a Somali-American journalist, Caasimada Online is owned by Caasimada Media Group and headquartered in Mogadishu. In addition to keeping our readers informed, we strive to promote democracy in Somalia. If you have any questions or comments, please don't hesitate to contact us at [email protected]
Important Links
Trending
Social Media
© Caasimada Online 2012 | All Rights Reserved
