Paris (Caasimada Online) –Hoggaamiyeyaasha Yurub ayaa Isniintii isku dayay inay khilaafaadka ka dhaxeeya uga heshiiyaan shir deg-deg ah oo ka dhacay Paris, si ay uga jawaabaan isbeddelka lama filaanka ah ee siyaasadda Mareykanka ee ku aaddan dagaalka Ukraine, taasoo ay keentay xukuumadda cusub ee Donald Trump.

Jarmalka ayaa si adag uga horyimid soo jeedinta ah in ciidamo la geeyo. Iyadoo siyaasiyiinta Yurub weli la daalaa-dhacayaan weerarkii afka ahaa ee Madaxweyne Ku-xigeenka Mareykanka JD Vance uu ku qaaday Midowga Yurub intii lagu guda jiray Shirka Ammaanka ee Munich, hoggaamiyeyaasha ugu waaweyn Yurub ayaa isugu yimid shir uu  si deg-deg ah u iclaamiyay Madaxweyne Emmanuel Macron, kaasoo ka dhacay madaxtooyada Elysee Palace.

Astaanta ugu muuqata ee isbeddelka siyaasadda Mareykanka ayaa soo shaac baxday Talaadadii, markii la shaaciyey in diblomaasiyiinta ugu sarreeya ee Washington iyo Moscow ay yeelan doonaan kulan fool ka fool ah—kii ugu horreeyay tan iyo markii Ruushku weeraray Ukraine bishii Febraayo 2022—taasoo muujinaysa in Trump uu doonayo inuu dib u soo celiyo xiriirka uu la leeyahay Madaxweyne Vladimir Putin.

Hoggaamiyeyaasha Yurub, oo wajahaya mid ka mid ah caqabadihii ugu waaweynaa ee sannadihii u dambeeyay, ayaa ka walaacsan in Trump uu damacsan yahay inuu heshiis nabadeed la galo Ruushka, iyadoo aan Kyiv iyo Midowga Yurub midna la tixgelin.

Hadda waxa ay qiimeynayaan tallaabooyin ay ka mid yihiin kordhinta miisaaniyadda difaaca si loo yareeyo ku tiirsanaanta Mareykanka iyo suurtagalnimada dirista ciidamo nabad ilaalin ah oo Ukraine loo diro marka xabbad-joojin la gaaro.

Macron ayaa khadka telefoonka kula hadlay Trump ka hor inta uusan shirku bilaaban, sida ay sheegtay madaxtooyada Faransiiska. Ma jiro bayaan wadajir ah oo ka soo baxay kulanka, mana jiraan go’aanno waaweyn oo la shaaciyey, iyadoo la tilmaamay in arrimahaas ay tahay in laga wada xaajoodo goleyaasha sida Midowga Yurub ama NATO.

‘Xiriirka Yurub iyo Mareykanka oo galay marxalad cusub’

Ra’iisul Wasaaraha Poland Donald Tusk ayaa yiri: “Dhammaan dadka shirka joogay waxay garowsan yihiin in xiriirka labada dhinac ee Badweynta Atlantik, isbahaysiga NATO, iyo saaxiibtinimada Mareykanka uu galay marxalad cusub. Waa xaqiiqo aynu dhammaanteen dareemayno.”

Madaxweynaha Komishanka Yurub Ursula von der Leyen ayaa tiri: “Ukraine waxay u baahan tahay nabad lagu sugo awood, taasoo xushmeyneysa madax-bannaanideeda, qarannimadeeda, iyo xuduudaheeda, iyadoo la siinayo dammaanad amni oo xooggan.”

Xoghayaha Guud ee NATO Mark Rutte ayaa kulanka kadib yiri: “Yurub waa diyaar. Faahfaahinta wali waa in la go’aamiyaa, laakiin ballanqaadka wuu cad yahay.”

Ra’iisul Wasaaraha UK Keir Starmer, oo doonaya in London ay muujiso sida ay uga go’an tahay amniga Yurub xilli ay ka baxday Midowga Yurub (Brexit), ayaa sheegay inuu “diyaar u yahay inuu tixgeliyo dirista ciidamo Ingiriis ah oo dhulka ku sugan, haddii la gaaro heshiis nabadeed oo waara.”

Si kastaba ha ahaatee, wuxuu hoosta ka xarriiqay in Washington ay tahay inay si buuxda uga qayb qaadato dadaallada, isagoo yiri: “Waa in ay jirtaa dammaanad amni oo Mareykanka bixiyo, maxaa yeelay taasi waa habka kaliya ee si wax ku ool ah looga hortagi karo in Ruushku mar kale weeraro Ukraine.”

Hase yeeshee, Ra’iisul Wasaaraha Jarmalka Olaf Scholz ayaa sheegay in hadal-heynta la xiriirta suurtagalnimada dirista ciidamo nabad ilaalin ah oo Ukraine loo diro ay tahay “mid aad uga horreysa waqtigeeda,” isagoo intaa ku daray in ay tahay “mid aan munaasib ahayn inta dagaalku weli socdo.”

Scholz ayaa si cad u muujiyey dareenkiisa, isagoo yiri: “Waan la yaabay doodda waqtigan xaadirka ah, maxaa yeelay waa arrin laga hadlayo goor aan habboonayn iyo mowduuc aan sax ahayn.”

Ra’iisul Wasaaraha Denmark Mette Frederiksen ayaa sheegtay in dowladdeeda “ay u furan tahay” arrinta ciidamadu, balse waxay xustay in su’aasha ugu weyn ay tahay haddii Mareykanku “dib uga gurto Yurub” haddii la geeyo ciidamo nabad ilaalin ah.

Waxay intaa ku dartay: “Ruushka hadda wuxuu khatar ku yahay Yurub oo dhan,” iyadoo uga digtay Mareykanka inuusan qaadin tallaabo deg-deg ah oo horseedi karta “in Ruushku dib isu abaabulo, markale weeraro Ukraine, ama xitaa waddan kale oo Yurub ah.”

‘Kala qaybinta amniga Yurub iyo Mareykanka lama aqbali karo’

Macron ayaa horay u sheegay in dib u soo laabashada Trump ee Aqalka Cad ay tahay “dhacdo gilgishay”, balse wuxuu sidoo kale ka digay heshiis kasta oo nabadeed oo u muuqan kara “is-dhiibid.”

Wargeyska Faransiiska Le Monde ayaa ku tilmaamay kala duwanaanta Yurub iyo Mareykanka inay tahay “mid taariikhi ah,” balse wuxuu xusay in Yurub ay tahay in ay muujiso awooddeeda ay iskugu filnaato difaaceeda.

“Indha la’aantii Yurub waxay ku dhamaatay Munich. Wixii hadda ka dambeeya, amniga qaaradda wuxuu si buuxda ugu tiirsanaanayaa Yurubiyaanka laftooda, iyo awooddooda ay ku ilaalin karaan midnimadooda,” ayuu qoray wargeysku.

Kulanka Paris ayaa yimid xilli Washington ay sheegtay in Xoghayaha Arrimaha Dibadda Marco Rubio, La-taliyaha Amniga Qaranka Mike Waltz, iyo Ergayga Gaarka ah Steve Witkoff ay Talaadada la kulmi doonaan wafdi Ruush ah oo uu hoggaaminayo Wasiirka Arrimaha Dibadda Sergei Lavrov, shir ka dhici doona Riyadh, kahor kulan mustaqbalka ah oo Trump iyo Putin ku yeelan doonaan caasimadda Sacuudiga.

Scholz ayaa Paris ku sheegay: “Qeybinta mas’uuliyadda amniga Yurub iyo Mareykanka lama oggolaan karo.”

“NATO waxay ku dhisan tahay inaan mar walba si wadajir ah u dhaqaaqno, isla markaana aan wadaagno halista, taasoo dammaanad qaadaysa amnigeenna. Aragtidan lama shaki gelin karo.”

Kampala (Caasimada Online) – Taliyaha ciidamada difaaca Uganda, Jenaraal Muhoozi Kainerugaba, ayaa sheegay in ciidamadiisu ay weerari doonaan magaalada Bunia ee bariga dalka ay jaarka yihiin ee Jamhuuriyadda Dimoqraadiga ah ee Congo, haddii dhammaan kooxaha hubeysan ee halkaas ku sugan aysan hubka dhigin 24 saac gudahood. Warkan ayuu ku shaaciyey bartiisa X.

Kainerugaba, oo horey loogu yaqaannay hadallo muran dhaliya oo la xiriira siyaasadda dibadda, ayaa sheegay inuu arrintan u haysto oggolaanshaha madaxweynaha Uganda, Yoweri Museveni, oo ah aabbihii. Afhayeenka militariga Uganda ayaa ka gaabsaday inuu wax faallo ah ka bixiyo warkan.

Maalintii Sabtida, Kainerugaba wuxuu sidoo kale sheegay—iyadoo uusan bixin wax caddeyn ah— in dad ka tirsan qowmiyadda Bahima lagu dilayo gudaha Jamhuuriyadda Dimoqraadiga ah ee Congo.

“Qoomiyaddeena, Bahima, waa la beegsanayaa. Taasi waa xaalad aad u khatar badan oo halis gelinaysa kuwa weerarka soo qaaday. Qofna ma dili karo dadkeena isaga oo aan cawaaqib la kulmin!” ayuu yiri.

“Bunia waxay dhowaan gacanta u geli doontaa UPDF,” ayuu ku qoray fariin kale, isagoo tixraacaya Ciidanka Difaaca Dadka Uganda (UPDF).

Ra’iisul wasaaraha Congo, Judith Suminwa, ayaa u sheegtay Reuters intii lagu guda jiray shir-madaxeedka Midowga Afrika Sabtidii, in dowladdeedu aysan wax faallo ah ka bixin doonin hadallada Kainerugaba.

Cabsi laga qabo in dagaalku sii xumaado

Hanjabaadda ka timid sarkaalka ugu sarreeya militariga Uganda, oo si weyn loo aaminsan yahay inuu yahay dhaxal-sugaha Museveni, ayaa sare u qaadday walaaca laga qabo in dagaalka u dhexeeya ciidamada Congo iyo fallaagada M23 oo ay taageerto Rwanda uu isu rogo colaado goboleed oo ballaaran.

Jimcihii, hoggaamiye ka tirsan M23 ayaa sheegay in fallaagadu ay gudaha u galeen magaalada Bukavu, oo ah magaalada labaad ee ugu weyn bariga Congo, kadib markii ay bishii hore la wareegeen Goma, oo ah magaalada ugu weyn gobolkaas.

Bishii Febraayo, Reuters oo soo xiganaysa ilo ka tirsan Qaramada Midoobay ayaa sheegtay in Uganda ay u dirtay bariga Congo in ka badan 1,000 askari oo dheeraad ah, iyagoo qeyb ka ah hawlgal lagula dagaallamayo mintidiinta Islaamiga ah ee halkaas ku sugan.

Si kastaba ha ahaatee, khubarrada Qaramada Midoobay ayaa sheegaya in Uganda ay sidoo kale taageerto fallaagada M23 oo ay hoggaamiyaan xubno ka tirsan qowmiyadda Tutsi.

‘Fariin la dirayo’

Kainerugaba ayaa si shaacsan u taageeray madaxweynaha Rwanda, Paul Kagame, kaasoo beeniyay in ciidamadiisa ay garab siinayaan M23.

Sanadkii 2022, Kainerugaba wuxuu M23 ku tilmaamay “walaalaheen” kuwaasoo u dagaallamaya xuquuqda qowmiyadda Tutsi ee Congo.

Falanqeeyayaal siyaasadeed ayaa sheegay in hadallada Kainerugaba ay u muuqdaan kuwo xambaarsan fariin la xiriirta danaha dhaqaale iyo istaraatiijiyadeed ee Uganda ee gobolka Ituri ee Congo, oo Bunia ay tahay caasimaddiisa.

“Uganda waxay u muuqataa inay dirayso farriin muujineysa in ay sheeganayso ‘dhulkeeda’,” ayuu yiri Kristof Titeca, oo ah bare ka tirsan Jaamacadda Antwerp, mar uu la hadlay Reuters.

“Wax walba waxay si daran ugu eg yihiin wixii dhacay sanadkii 1998-kii iyo dagaalkii labaad ee Congo, markaasoo dhulka Congo si isku mid ah loogu qeybsaday Uganda iyo Rwanda,” ayuu sii raaciyay.

Kainerugaba ayaa si joogto ah u dhiga qoraallo muran dhaliya oo baraha bulshada ah, oo ay ku jiraan hanjabaad uu 2022 ku sheegay inuu doonayo inuu qabsado Kenya oo daris la ah Uganda.

Bishii hore, wuxuu sheegay inuu doonayo inuu madaxa ka gooyo hoggaamiyaha mucaaradka Uganda, Bobi Wine, inkastoo uu mar dambe raalligelin bixiyay. Mararka qaar, wuxuu sheegaa in hadalladiisa qaarkood ay yihiin kuwo laga dhadhansan karo kaftan.

Gaza (Caasimada Online) – Xamaas ayaa si rasmi ah u shaacisay dilka mid ka mid ah hoggaamiyayaasheeda caanka ah oo la yirahdo Muxammad Ibrahim Shahin.

Ninkan oo loo yaqaannay Abu al-Baraa. Xamaas ayaa sheegtay in Shahin la dilay Isniintii shalay intii lagu guda jiray weerar ay diyaaradaha Israa’iil ka fuliyeen magaalada Sidon ee koonfurta Lubnaan.

Muxammad oo walaalo ahaayeen Qassam Xamza Shaheen oo isna horey u shahiiday ayaa qabtay dhowr jagooyin jihaad ah oo horumarsan, sida lagu sheegay bayaan kasoo baxay Xamaas.

Duqeymo dhanka cirka ah oo ay fuliyeen ciidamada Israel ayaa lala beegsaday gaari marayey magaalada Sidon ee koonfurta Lubnaan habeen ka hor waqtigii loo qabtay fulinta heshiiskii xabad joojinta ahaa ee u dhaxeeyay Xisbullah iyo Israel.

Wakaaladda wararka qaranka Lubnaan ayaa ku warantay in diyaaradaha aan duuliyaha lahayn ay beegsadeen baabuur ku socdaalayay jidka badda ee woqooyiga laga galo Siidoon kuna sii jeeday Beyruut.

Si kastaba, Ciidamada Israa’iil ayaa bilaabay ka bixitaanka qaar ka mid ah tuulooyinka xadka, saacado yar ka hor xilliga kama dambaysta ah ee xabbad-joojinta. Israa’iil ayaa hore u shaacisay inay weli joogto shan “meelood oo istiraatiiji ah.”

Lubnaan ayaa horey uga digtay in Israa’iil ay seegi karto muddadii kama dambaysta ah ee Talaadada, iyadoo dalalka caalamka ugu baaqay inay cadaadis saaraan si Israa’iil ay u ixtiraamto heshiiska.

Beirut (Caasimada Online) – Sarkaal Lubnaani ah ayaa sheegay in ciidamada Israa’iil ay Isniintii bilaabeen ka bixitaanka qaar ka mid ah tuulooyinka xadka, saacado yar ka hor xilliga kama dambaysta ah ee xabbad-joojinta. Israa’iil ayaa hore u shaacisay inay weli joogto shan “meelood oo istiraatiiji ah.”

Madaxweynaha Lubnaan ayaa horey uga digay in Israa’iil ay seegi karto muddadii kama dambaysta ah ee Talaadada, wuxuuna dalalka caalamka ugu baaqay inay cadaadis saaraan si Israa’iil ay u ixtiraamto heshiiska.

“Ciidamada Israa’iil waxay bilaabeen ka bixitaanka tuulooyinka xadka, oo ay ka mid yihiin Mais al-Jabal iyo Blida, iyadoo ciidanka Lubnaan uu horey u sii socdo,” ayuu AFP u sheegay sarkaal dhanka amniga ah, isagoo codsaday in aan la magacaabin sababo la xiriira xasaasiyadda arrinta.

Afhayeenka militariga Israa’iil, Gaashaanle Nadav Shoshani, ayaa horey u sheegay in “iyadoo la eegayo xaaladda hadda jirta, aan si kumeel-gaar ah ciidamo yar ugu sii daahino shan meelood oo istiraatiiji ah oo xadka Lubnaan ah.”

Wuxuu intaa ku daray in go’aankan la qaatay si “aan u sii wadno difaaca muwaadiniinteena, una hubinno in aysan jirin khatar degdeg ah.”

Israa’iil waxaa lagu waday inay si buuxda uga baxdo Lubnaan ugu dambeyn 18-ka Febraayo, kadib markii ay horey u seegtay waqti loo qabtay bishii Janaayo.

Cabsi harsay bixitaanka Israa’iil

“Waxaan ka cabsi qabnaa in ka bixitaanka buuxa uusan dhici doonin berri,” ayuu yiri Madaxweynaha Lubnaan, Joseph Aoun, ka hor intii aysan Israa’iil shaacin qorshaheeda militariga.

Xabbad-joojinta Israa’iil iyo Xisbullah waxay dhaqan-gashay 27-kii November, kadib dagaal socday in ka badan hal sano oo ay Israa’iil ka fulisay howlgallo dhulka Lubnaan ah.

Heshiiska xabbad-joojinta ayaa dhigayay in ciidamada Lubnaan ay la wareegaan koonfurta dalka, iyagoo la shaqeynaya ciidamada nabad-ilaalinta Qaramada Midoobay, halka ciidamada Israa’iil ay si tartiib ah uga baxayaan muddo 60 maalmood ah, taasoo markii dambe dib loogu dhigay 18-ka Febraayo.

Dhanka kale, Xisbullah waxaa looga baahnaa inay dib ugu gurtaan waqooyiga webiga Litani, islamarkaana ay burburiyaan xarumahooda militari ee ay ku lahaayeen koonfurta Lubnaan.

Ciidamada Lubnaan oo ‘diyaar ah’

Madaxweyne Aoun ayaa sheegay in ciidamada Lubnaan ay diyaar u yihiin “inay la wareegaan magaalooyinka iyo tuulooyinka ay Israa’iil ka baxayso” si ay u sugaan amniga xadka.

Wuxuu intaa ku daray in Lubnaan ay si diblomaasiyadeed ugu dadaalayso “fulinta ka bixitaanka buuxa ee Israa’iil.”

Tan iyo markii xabbad-joojintu dhaqan-gashay, Israa’iil waxay sii waday duqeymaha ay ka fulinayso gudaha Lubnaan, iyadoo Isniintii sheegtay inay dishay sarkaal sare oo ka tirsanaa ururka Xamaas.

Hoggaamiyaha Xizbullah, Naim Qassem, ayaa Axaddii sheegay in ay masuuliyadda dowladda tahay in la hubiyo in Israa’iil si buuxda uga baxdo ka hor muddada kama dambaysta ah ee Talaadada.

Mareykanka oo taageeraya Lubnaan

Diblomaasiga ugu sarreeya Mareykanka, Marco Rubio, ayaa Axaddii sheegay, intii uu shir jaraa’id la lahaa Ra’iisul Wasaaraha Israa’iil Benjamin Netanyahu, in “xagga Lubnaan, yoolkeenu waa mid mideysan… Waxaan rabnaa dawlad Lubnaani ah oo awood u leh inay la dagaallanto oo hubka ka dhigto Xizbullah.”

Netanyahu ayaa isna xusay in “Xizbullah ay tahay in hubka laga dhigo. Israa’iil waxay jeclaan lahayd in ciidanka Lubnaan ay qabtaan shaqadaas, balse qofna yaanu ka shakin in Israa’iil ay qaadayso tallaabo kasta oo lagama maarmaan ah si loo fuliyo heshiiska xabbad-joojinta iyo difaaca amnigeeda.”

Madaxweyne Aoun ayaa Isniintii xusay in “arrinta ugu muhiimsan ay tahay in Israa’iil laga saaro Lubnaan, halka arrinta hubka Xisbullah ay qeyb ka tahay xalal ay dadka Lubnaan ku heshiiyaan.”

Dowladda Lubnaan waxay horey u caddeysay in ay tahay hay’adda kaliya ee sharciyan hubeysan, waxayna ballan-qaadday inay xoreyso “dhul kasta oo Lubnaan ah.”

Xisbullah waa ururka kaliya ee Lubnaan ah oo diiday inuu hubka dhigo kadib dagaalkii sokeeye ee dalkaas ka dhacay intii u dhaxaysay 1975-1990.

Xizbullah oo daciiftay

Ayada oo aheyd urur ciidan xoog leh, Xizbullah waxaa si weyn u wiiqay dagaalkii ugu dambeeyay ee ay la galeen Israa’iil, kaasoo sababay dilka saraakiil sare oo badan iyo xitaa hoggaamiyahoodii muddada dheer, Xasan Nasrallah.

Inkasta oo la gaaray xabbad-joojin, Qaramada Midoobay ayaa sheegtay in in ka badan 100,000 qof ay weli ku barakaceen gudaha Lubnaan. Dhanka kale, mas’uuliyiinta dalka waxay ku qiyaaseen in dib u dhiska dalka uu ku kici karo illaa $11 bilyan.

Ramzi Kaiss, oo ka tirsan Human Rights Watch, ayaa Isniintii sheegay in “burburka ula kaca ah ee Israa’iil ay u geysatay guryaha rayidka iyo kaabayaasha dhaqaalaha” uu caqabad ku noqday in dad badan ay dib ugu laabtaan guryahooda.