Guriceel (Caasimada Online) – Wararka laga helayo gobolka Gobolka Galgaduud ayaa sheegaya in maanta dagaal beeleed lagu hoobtay uu ka dhacay bariga gobolkaasi, kaas oo u dhexeeyay maleeshiyaad ku sugan halkaasi, waxaana ka dhashay kasaare kala duwan.

Dagaalka ayaa ka qarxay deegaanka Ceel-barafaange oo dhaca duleedka Dhuusamareeb, waxaana uu qaatay muddo ka badan saacad, sida ay innoo sheegeen dadka deegaanka.

Inta la xaqiijiyay waxaa dagaalkan ku dhintay ugu yaraan illaa 5 qof, halka ay ku dhaawacmeen 10 kale, kuwaas oo kamid ah maleeshiyaadka labada dhinac ee dagaalamay.

Dhaawacyada lagu soo warramayaa in la kala geeyay magaalooyinka Guriceel iyo Dhuusamareeb, halkaas oo lagu dabiibayo xaaladdooda.

Wararka ayaa sheegaya in dagaalka oo xooganaa qayb ka ahayd kooxda Al-Shabaab oo lagu eedeeyay inay sii hurineyso colaadda ka taagan halkaasi.

Xaaladda ayaa haatan ah mid aad u kacsan, waxaana lasoo wariyay in labada dhinac ay heleen gurmad saacadihii ugu dambeeyay gaaray deegaanka lagu dagaalamayo.

Ma jiro wax hadal ah oo kasoo baxay Galmudug, kuna aadan dagaalkaas khasaaraha dhaliyay ee ka dhacay deegaanka Ceel-barafaange ee bariga gobolka Galgaduud.

Gobollada dhexe ayaa waxaa haatan ka taagan colaad beeleedyo saameyn ku yeeshay shacabka, waxaana sidoo kale ka socda howlgallo ka dhan ah kooxda Al-Shababaab.

Muqdisho (Caasimada Online) – Maxkamadda Gobolka Banaadir ayaa maanta oo Sabti ah go’aan rasmi ah ka gaartay kiiska dacwadii musuq maasuqa ee loo heystay mas’uuliyiin ay ku jiraan agaasimayashii hore ee Hey’adda Socdaalka iyo Jinsiyadaha iyo Agaasimihii hore ee Canshuraha Bariga iy qaar kamid Shaqaalaha Wasaarada Maaliyada iyo Hey’adda Socdaalka.

Maxkamadda ayaa ku dhowaaqday in wax dambe ah lagu waayay agaasimeyaashii hore ee hay’adda Socdaalka Jinsiyadda Mudane Cabdulqaadir Cilmi Cali (Cabdul) iyo Mudane Maxamed Aadan Jimcaale (Koofi) oo haatan maqane ah.

Sidoo kale waxaa isna dambi lagu waayay Muxudiin Xasan Jurus (Saabey) oo ahaa Agaasimihii hore ee Canshuraha Bariga oo isna maqane ah, sida ay ku dhawaaqday maxkamadda darajada koowaad ee gobolka Banaadir.

Saddexdan mas’uul oo dhammaantood dalka isaga baxay kadib eedeyntaan musuq ee loo jeediyay ayaa la fasaxay maanta, sida uu ku dhowaaqay guddoomiyaha maxkamadda, maadaama lagu waayay dhammaan eedeymihii cuslaa ee loo soo jeediyay.

Guddoomiyaha maxkamadda gobolka Saalax Dabaan ayaa sidoo kale faray hay’adaha ay ka tirsan yihiin mas’uuliyiintan inay usoo celiyaan xuquuqdooda sharci, maadaama dambi lagu waayay.

“Waxay maxkamaddu fareysa dhammaan hay’adaha ay ka tirsan yihiin eedeysanayaasha ay maxkamadda dambiga ku waysay in xuquuqdooda sharci ay usoo celiyaan” ayuu yiri.

Xukunka ay maanta shaacisay maxkamadda ayaa ahaa mid la sugayay, maadaama muddo dhowr bilood ah ay soo socotay maxkamadeynta mas’uuliyiinta maanta la fasaxay.

Muqdisho (Caasimada Online) – Madaxtooyada Soomaaliyeed oo qoraal kooban soo saartay ayaa dhambaal hambalyo ah u dirtay dowladda iyo shacabka Eritrea oo maanta u dabaaldagaya sanad guuradooda 33-aad ee kasoo wareegtay markii ay xornimada qaateen.

Bayaan ay soo saartay Villa Soomaaliya oo lasoo dhigay barta Twitter-ka ayaa lagu sheegay in Soomaaliya ay farxadda la qaybsaneyso Eritrea oo xuseyso sanad guurada 33-aad.

“Madaxweyne Xasan Sheekh ayaa salaan kal iyo laab ah u diray dowladda iyo Eritrea, munaasabadda sanad guurada 33-aad ee kasoo wareegtay markii ay xornimada qaateen” ayaa lagu yiri bayaan kasoo baxay Villa Soomaaliya.

Sidoo kale xafiiska madaxweynaha ayaa sheegay in dadka Soomaaliyeed ay farxadda la qaybsanayaan shacabka Eritrea oo uu sheegay inay ka dhexeyso taariikh dheer iyo xiriir soo jireen ah.

“Dadka Soomaaliyeed waxa ay si wadajir ah uga qayb-qaadanayaan xuska safarkii dheeraa ee Eritrea usoo gashay madax-banaanida, ayada oo lasii aqoonsanayo taariikhada wadaagga ah iyo xiriirka waara ee ka dhexeeya labadeenna dal” ayaa la raaciyay qoraalka.

Eritrea oo kamid ah dalalka dhaca Geeska Afrika ayaa xiriir wanaagsan laleh Soomaaliya, kaas oo sii xoogeystay 7 sano ee u dambeysay oo ay laba dhinac yeesheen iskaashi buuxa.

Siidoo kale Eritrea ayaa ciidamo u tababarta dowladda federaalka, kuwaas oo ka qayb-qaata dagaalka adag ee lagula jiro kooxda Al-Shabaab ee ka dagaalanta Soomaaliya.

Muqdisho (Caasimada Online) – Dowladda Federaalka Soomaaliya ayaa soo dhaweysay go’aan kasoo baxay Golaha Ammaanka ee Qaramada Midoobay oo mar kale liiska dadka lagu soo rogay cuna-qabateynta ku daray saddex hoggaamiye oo ka tirsan Al-Shabaab.

Dowladda Soomaaliya ayaa sheegtay inay boggaaineyso go’aankaasi, waxaa sidaas sheegay wasiirka warfaafinta xukuumadda Soomaaliya, Daa’uud Aweys Jaamac.

“Dowladda Federaalka ah ee Soomaaliya waxay boggaadinaysaa go’aankii Golaha Ammaanka ee Qaramada Midoobay uu ku cunaqabateeyey saddex ka mid ah hoggaamiyeyaasha Al-Shabaab codsigeenna” ayuu yiri wasiirka warfaafinta.

Daa’uud Aweys ayaa sheegay in saddexda hoggaamiye ay wejihi doonaan xaalad adag, isla markaana ay kamid ah tahay xayiraad dhaqaale oo ay la socoto mamnuucid.

Shakhsiyaadkan hadda waxay ku jiraan liiska cunaqabataynta ee hoos timaada Qaraarka 2713, iyagoo wajahaya xayiraad dhaqaale iyo mamnuucid socdaal,“ayuu sii raaciyay.

Saddexda hoggaamiye oo kala ah Cabdiqaadir Maxamed Cabdiqaadir, Maxamed Cumar Maxamed iyo Maxamed Maxamuud Mire ayaa lagu eedeeyay inay ka qayb qaateen maal-gelinta, qorsheynta, fududaynta, iyo diyaarinta dhaq-dhaqaaqyada Al-Shabaab.

“Al-Shabaab waa argagixiso rabshado badan oo mas’uul ka ah dhimashada rayidka, hawl-wadeennada, shaqaalaha gargaarka iyo suxufiyiinta, waa in lala xisaabtamo,” ayaa  lagu yiri bayaanka Golaha Ammaanka QM.

Tallaabbadan ayaa la sheegay inay timid kaddib markii ay dowladda federaalka Soomaaliya ay arrintan ka dalbatay Golaha Ammaanka ee Qaramada Midoobay.

Soomaaliya ayaa haatan ku jirto marxalad dagaal oo ka dhan ah kooxda Al-Shabaab, waxaana qeybo kamid ah dalka ka socda howl-gallo ka dhan ah kooxda oo ay iska kaashanayaan ciidamada dowladda iyo kuwa deegaanka ee hubeysan, ayada oo dhawaan lagu wado inuu bilowdo wejiga labaad ee dagaalka.

Gaarisa (Caasimada Online) – Warar kala duwan ayaa kasoo baxaya khasaaraha ka dhashay weerar iyo dagaal toos ah oo dhex-maray ciidamada Kenya iyo dagaalyahano ka tirsan kooxda Al-Shabaab oo maanta ka dhacay qaybo kamid ah gobolka Waqooyi Bari.

Dagaalka ayaa yimid, kadib markii ay maleeshiyaad ka tirsan Al-Shabaab ay weerar dhabagal ah ku qaadeen kolonyo ka tirsan ciidamada Kenya oo mararay duleedka magaalada Gaarisa, gaar ahaan deegaanka Ijaara, waxaana kadib xigay dagaal toos ah.

Ilo dadka deegaanka ah ayaa inoo sheegay in dagaalka uu qaatay saacado badan, isla markaana uu jiro khasaare soo kala gaaray labada dhinac ee dagaalamay.

Saraaakiil u hadashay dowladda Kenya ayaa shaaca ka qaaday inay iska difaaceen weerarka uga yimid Al-Shabaab, ayna khasaare gaarsiiyeen xubnaha Al-Shabaab.

Sidoo kale, Al-Shabaab ayaa dhankeedda guul ka sheegtay dagaalka, waxayna shaacisay inay gubtay mid kamid ah kolonyada ciidanka Kenya, ayna dishay askar, sida ay hadalka u dhigtay.

Xaaladda ayaa haatan ah mid aad u kacsan, waxaana weli dhaq-dhaqaaqyo laga dareemayaa nawaaxiga magaalada Gaarisa oo ah halka lagu dagaalamay.

Kenya oo ciidamo ay ka joogaan gudaha Soomaaliya ayaa weeraro kala kulanta kooxda Al-Shabaab oo badana beegsata deegaanada dhaca xadka labada waddan.

Muddooyinkii u dambeeyay weerarada ayaa sii kordhayay, waxaana sidoo kale gobolka ciidamo badan oo milatari ah kusoo daabushay Kenya, si ay u xaqiijiyaan amniga guud.

Muqdisho (Caasimada Online) – Maxkamadda Gobolka Banaadir ayaa maanta oo Sabti ah go’aan rasmi ah ka gaari doonta kiiska dacwadii musuq maasuqa ee loo heystay mas’uuliyiin ay ku jiraan agaasimayashii hore ee Hey’adda Socdaalka iyo Jinsiyadaha iyo Agaasimihii hore ee Canshuraha Bariga iy qaar kamid Shaqaalaha Wasaarada Maaliyada iyo Hey’adda Socdaalka.

Maxkamadda Gobolka Banaadir ayaa 14-kii May shaacisay inay soo gabagabeysay dhageysiga kiiskan, iyadoo xiligaas ballan-qaaday inay go’aan ka soo saari doonto.

Mar kale qoraalka ka soo baxay maxkamadda ayaa lagu mudeeyey in maanta lagu dhawaaqayo go’aanka, si loola wadaago shacabka Soomaaliyeed.

Mas’uuliyiintan oo ka soo shaqeysay hey’adaha dowladda ee musuq-maasuqa loo heysto ayaa gaareysa illaa 12 agaasime oo ka kala tirsan hey’adda socdaalka, wasaaradda maaliyadda, bangiga dhexe iyo wasaaradda shaqada iyo arrimaha bulshada.

Sidoo kale masuuliyiintaan ayaa loo heystaa xatooyo xoolo dadweyne, waxayna maxkamadeyntoodu socotay dhowr bilood, iyadoo lagu soo oogay kiisas musuq xasaasi ah.

Agaasimayaashii hore ee hey’adda socdaalka iyo jinsiyadda Korneyl Koofi, Cabdul iyo agaasimihii canshuuraha beriga ee wasaaradda maaliyadda Muxudiin Saabey iyo qaar kamid Shaqaalaha Wasaarada Maaliyada iyo Hey’adda Socdaalka ayaa ku jira ragga kiiskooda go’aanka laga gaarayo.

Natiijada maxkamadda ayaa ah mid isha lagu wadayo, maadaama aad loo xiiseynayo waxa dhici kara oo saameynaya rag waa wayn oo aad loo hadal hayo.

Maxkamadda Gobolka Banaadir ayaa horay sidaan oo kale go’aan uga gaartay kiiska mas’uuliyiin lagu helay masuq iyo kuwa kale oo lagu waayay dambi, balse waxaa la’isla aaday Maxkamadda Racfaanka oo la filayo inay go’aan kasoo saarto kiiska saraakiishaasi.

Washington (Caasimada Online) – Madaxweynaha maamulka kumeel gaarka ah ee SSC Khaatumo Cabdulqaadir Firdhiye oo kulan la yeeshay Soomaalida ku nool dalka Mareykanka ayaa uga warbixiyey xaaladda deegaanka, isagoo sheegay in Muuse Biixi uu qorsheynayo dagaal kale.

Firdhiye ayaa sheegay in dadka ku nool gobollada Sool iyo Sanaag ay ku faa’iideeyn dagaalkii ay la galeen maamulka Somaliland, isla markaana ay ku guuleysteen inay la midoobaan Jamhuuriyadda Soomaaliya.

Wuxuu sheegay in Muuse Biixi uu hadda qorsheynayo dagaal kale, balse uu ku jebi doono, isagoo ka digay in mar kale Somaliland ay dib u soo celiso daadinta dhiigii sokeeye, kaas oo aan ku joogsan heshiis ama xabad joogin, balse iskiis u istaagay.

Firdhiye ayaa ku faanay in ciidamada Somaliland ay dagaalka uga awood bateen oo ciidamada SCC ay gudaha u galeen xuduuda Somaliland, balse markii ay xoreysteen dhulkooda ay go’aansadeen inay ka soo laabtaan dhulka uu ka taliyo maamulka Muuse Biixi ee Somaliland.

“Shacabka gobollada waqooyi waxaan leeyahay ka fogaada dulmiga Muuse Biixi uu wado, si ilaahey raali idinkaga noqdo, cid kale inaad dulmisaan yaan lagu fekerin,” ayuu yiri Firdhiye oo ka digay in colaadii Laascaanood ay mar kale soo noqoto.

Sidoo kale hoggaamiye Firdhiye ayaa sheegay in shacabka uu hoggaamiyo ee SSC ay tirsanaa in la dulmiyey oo gardarro lagu laayey, balse ay muhiimada siinayaan nabadda, wada noolaashaha iyo walaalnimada.

“In xadka aanaan dhaafin waa muhiim, maanta SSC waxay ku jirtaa xiligeedii ugu quruxda badnaa, rajo iyo yadadiilo aanaan heysan sanado ka hor ayaan maanta heysanaa, maamulka aan hoggaamiyo oo ku yimid rabitaanka shacabka waxaa ka go’an inuu xaqiijiyo rajada shacabka SSC Khaatumo oo halgan dheer soo galay,” ayuu yiri hoggaamiye Cabdulqaadir Firdhiye.

Ugu dambeyntii hoggaamiye Firdhiye wuxuu sheegay in maamulkiisa uu ka shaqeeyey dejinta shuruucdii lagu maamuli lahaa deegaanka, isla markaana ay ka go’antahay in doorashada oo waqtigeeda ku dhaceysa ka hor uu baasgareeyo dhamaan shuruucdii lagu shaqeyn lahaa.

Hoos ka daawo

Muqdisho (Caasimada Online) – Taliyaha ciidanka booliska Soomaaliya Sulub Axmed Firin oo qabtay shir jaraa’id ayaa ka hadlay xarigga iyo tallaabooyin ay ka qaadeen dadkii baraha bulshada ka caayi jiray bulshada, kuwaas oo xabsiga loo taxaabay maalmihii lasoo dhaafay.

Taliyaha ayaa sheegay in qof dambe aysan ka ogolaa doonin in baraha bulshada uu dadka ka aflagaadeeyo, isagoo cadeeyey in qof kasta hadii uu sheego cadeyntiisa la weydii doono.

Taliye Firin ayaa sheegay in shaqada booliska ay tahay ilaalinta sharciga iyo sharafka bulshada, isagoo hoosta ka xariiqay in waajibka saaran ay guda doonaan.

“Baraha bulshada waa ku soo badatay dhalinyaro si qaldan u isticmaasha oo aflagaadeysa dadka kale, ciidanka booliska masuuliyad ayaa ka saaran ilaalinta sharafta dadka laga caayo baraha bulshada,” ayuu yiri Taliyaha guud ee booliska Soomaaliya.

Sidoo kale Taliyaha ayaa sheegay inay ka shaqeynayaan sidii qof kasta oo muwaadin ah uu dalkiisa ugu heysan lahaa xorriyad iyo sharaf, intaas lagu cayaarana aysan qofna ka yeeli doonin ciidanka booliska Soomaaliyeed.

“Dalku wuxuu leeyahay shuruuc iyo kala dambeyn, wixii ka baxsan wixii qofka sharcigu u ogolyahay, waxaa naga go’an inaan ku qabsano, maadaama waajibka na saaran uu yahay ilaalinta sharciga, qof kasta oo xadkiisa soo dhaafa waxaa la weydii doonaa cadeynta waxyaabaha uu ka hadlay,” ayuu yiri Jeneraal Sulub.

Taliyaha oo sii hadlaayey ayaa sheegay inay ka hortegayaa in qofka wax aflagaadeeyey iyo qofka la aflagaadeeyey inta aysan is gaarin ay boolisku ku soo bixi doonaan wixii dhacay, taas oo fududey doonta in qofkii qalad gala sharciga lala tiigsado.

“Qofkii lasoo xiro, waxaan weydii doonaa wixii uu ku hadlay cadeymaha uu u haayo, cid aan dhibaato u geysa doono ma jirto, qof kasta waxaan ka rabnaa in xaqa muwaadinka kale uu ilaaliyo,” ayuu yiri taliyaha ee farriin u diray guud ahaan dadka Soomaaliyeed.

Maalmihii lasoo dhaafay waxaa cabsiga lagu guray dhalinyaro u badan reer Muqdisho, odayaal iyo haween ka soo muuqday baraha bulshada, iyagoo aflagaadeynaya dad kale, qaarkood ayaa lagu heystaa hadalo ka dhan ah dowladda iyo qabiillada qaar.

Hoos ka daawo

Marka (Caasimada Online) – Magaalada Marka ee gobolka Shabeellada Hoose waxay maanta baddu qaaday 7 carruur ah, sida ay Caasimada Online masuuliyiin ka tirsan maamulka degmadaas iyo qaar ka mid ah ehellada carruurta baddu qaaday.

Sida aan xogta ku helnay laba ka mid ah carruurta ayaa la sheegay in lasoo badbaadiyay maanta, halka mid kalana maykiisa laga soo saaray badda.

Hadda waxaa maqan 4 ka mid ah carruurtii baddu qaaday, waxaana lagu guul-dareystay dadaallo la sameeyey maanta oo lagu soo badbaadinayey carruurta.

Labada wiil ee laga soo badbaadiyey badda ayaa ku jira xaalad caafimaad oo liidata, waxaana lagu dabiibayaa isbitaal ku yaalla magaalada Marka ee gobolka Sh/Hoose.

Maamulka degmada, dhalinyarada iyo kalluumeysatada magaalada Marka ayaa ilaa hadda wada dadaallo ay ku baadi goobayaan carruurta 4-ta ah ee weli ku maqan badda.

Jimcihii maanta oo carruurtu ay fasaxa ka aheyd goobaha waxbarashada ayay adeen badda, sida ay ehellada carruurtaasi u sheegeen Caasimada Online, kadibna waxaa qabsatay xaalad adag, kadib markii mowjado duufaan ah ay kaceen.

Carruurta weli ku maqan badda labo ka mid ah ayaa walaalo ah, dadka ka shaqeeya badaha, gaar ahaan xeebaha koonfureed ee Soomaaliya, ayaa sheegay in marka la gaaro bishaan 5-aad ee sanad kasta ay baddku kacdo, isla markaana aan lagu dhiiran in la galo badda.

Toddobaadkii dhamaaday hay’adda Musiibooyinka Qaranka Soomaaliya ayaa shaacisay in laga cabsi qabo in magaalooyinka koonfurta dalka ee saaran xeebta ay ku soo fool-leedahay duufaan xoogan oo lagu magacaabo Laly, taas oo ku dhufatay qaar ka mid ah xeebaha dalalka Bariga Afrika.

Muqdisho (Caasimada Online) – Booliska Soomaaliya ayaa goordhaweyd gacanta kusoo dhigay Cadaawe Cabdi Cali (Cadaawe Jiib) oo dhawaan warbaahinta ka hanjabay.

Ninkan oo ah askari ka tirsan ciidanka dowladda ayaa waxaa soo xiray ciidanka booliska gobolka Banaadir, gaar ahaan kan saldhigga booliska ee degmada Deyniile, waxa uuna kal hore kasoo muuqday warbaahinta isaga oo ku goodinaya dagaal iyo in uusan aqbaleyn amar burburin dhul oo ka fulay gudaha caasimada.

“Eedeysanaha oo ah askari katirsan ciidamada qalabka sida ayaa ku eedeysan is hor istaag amar Maxkammadeed iyo ku lug lahaasho kicin bulsho, wxaana la horgeyn doonaa Maxkamadda Ciidamada ee ku shaqada leh howlahaan,” ayaa lagu yiri qoraal kasoo baxay taliska ciidanka booliska Soomaaliya oo baahiyay xariga ninkaan.

Laba maalin kahor ayay aheyd markii uu booliska soo xiray Mascuud Cabdullaahi Afrax (Garweyne) oo ahaa nin oday ah, islamarkaana marar badan kasoo muuqday warbaahinta.

Booliska ayaa ninkaas ku eedeeyay inuu u gefay garsoorka dalka, islamarkaana uu waxba kama jiraan ku tilmaamay xukunno ay rideen maxkamadaha dalka. Wuxuuna booliska sheegay in la horgeyn doono maxkamadda, si looga qaado tallaabo sharciga waafaqsan.

Isla maalin kasii hor booliska ayaa soo xiray illaa 15 qof oo ka qayb qaatay dibad-bax rabshada watay oo ka dhacay Daaru-Salaam, kaasi oo looga soo horjeeday awood qaybsiga maamulka degmadaasi.

Waxaa kasii horreeyay oo lasoo xiray Liiban Khaliif Abtidoon oo isna ka qayb-galay dibad-bax ay dhigeen ehellada Sayid Cali Macallin Daa’uud, isaga oo ku goodiyay inay “afgembi sameynayaan”, sidoo kale waxaa xabsiga ku jira gabdhihii uu ka dhex qarxay dagaalka qabiilka ee caanka ka ahaa baraha bulshada ee Internet-ka, gaar ahaan barta TikTok-ga.

Isku soo wada duubo arrimahaan ayaa keenay in dowladda ay tallaabo qaado, ayada oo lasoo xiray maalmo gudahood dadkii ugu badnaa, kuwaas oo loo haysto kicin bulsho iyo is-hortaag amar maxkamadeed, waxaana haatan lagu wadaa in lasoo taago maxkamad.

Manchester (Caasimada Online) – Magaalada Manchester ee boqortooyada Ingiriiska oo Soomaalida badan ay ku nool yihiin ayaa lagu amaanay inay kamid yihiin bulshooyinka ka shaqeeya nabadda iyo ka hortaga dambiyada ay ka midka yihiin dilalka iyo daroogada.

Marka la barbar dhigo magaalooyinka kale ee Ingiriiska sida London iyo magaalooyinka kale, Soomaalida ku nool Manchester aad ayey ugu yar yihiin dhalinyaradooda isu geysta ama dadka kale u geysta dilalka iyo daroogada.

Ugaas Cali Cabddulle Qaanso oo ka mid ah waxgaradka magaalada Manchester ayaa aaminsan in taasi ay ku timid dadaalka iyo wacyagelinta ay sameeyeen iyo in dhalinyarada Soomaalida loogu yeero farida wanaaga iyo diinta Alle.  

Mas’uuliyiin ka tirsan golaha deegaanka magaalada Manchester ee Boqortooyada UK ayaa abaal marin iyo soo dhoweyn lagu weyneynayo dhaqanka Soomaalida ay u sameeyeen Cali Cabdulle Qaanso (Ugaas Cali) oo mudo 20 sano ah usoo khidmeynayay Soomaalida Manchester.

Nabaddoon Ugaas Cali ayaa hoyga golaha looga arrimiyo Manchester loogu qabtay xaflad, halkaasi oo lagu guddoon siiyay haddiyado ay ka mid yihiin dharka Hiddaha iyo Dhaqanka Soomaalida caanka ku tahay iyo abaal marino kale.

Waxaana loogu mahad celiyay sida uu mudada 20-ka sano ugu shaqeynayay isku xirka bulshada Soomaaliyeed iyo maamulka deegaanka iyo weliba bulshooyinka kale ee Manchester ku nool.

Dhinaca kale, waxaa bisha July guud ahaan UK ka qabsoomi doonta doorashada Ra’iisul wasaaraha iyadoo xisbiyada Conservative-ka iyo Lebour Party ay ku dagaalamayaan sidii ay usoo jiidan lahaayeen bulshada Soomaaliyeed.

Ugaas Cali ayaa ugu baaqay Soomaalida in ay codkooda ka taxadiran ciddii ay siin lahaayeen kana fiirsadaan cidda u roon iyo kan u daran.

Garoowe (Caasimada Online) – Madaxweynaha Puntland Siciid Cabdulaahi Deni oo dhowaan ka hadlay magaalada Garoowe ayaa weerar afka ah ku qaaday madaxda kale ee maamul goboleedyada dalka ooh adda la rumeysan yahay inuu khilaaf kala dhaxeyeo.

Saciid Deni ayaa saaxiibadiisii hore ku eedeeyey madaxda dawlad goboleedyada koonfurta in ay doonayaan waqti kororsi ay xafiiska ku sii joogaan, kaas oo ay kala shaqaynayso dawladda federaalka Soomaaliya.

“State hebel markaan doorasho ma galayee hal sano ayaan siiyey, labo sano ayaan siiyey, saan ayaan yeellayaa, waxay la micno tahay, sharciyadda oo burburtay oo dadkiina iska daawanayaan,” ayuu yiri madaxweyne Deni.

Madaxweyne Deni ayaa mar uu ka hadlayey arimaha siyaasadda Soomaaliya waxaa uu sheegay inaan xoog laysku muquunin karin taas badalkeeda Puntland ay diyaar u tahay garnaqsi iyo in ay cadayso waxa ay diidan tahay.

“La isma muquunin karo, la ismana dardari karo, dalkaan meesha uu aadayo ha laga wada hadlo, Puntland waxay diyaar u tahay garnaqsi,” ayuu madaxweynaha ku sheegay khudbad dhinacyo badan taabanaysa oo uu ka jeediyey xiritaankii shirka jiheynta xukuumadda fowladda Puntland.

“Soomaalinimada cidna uga cararimayno, cidda khaldan baan qabanaynaa hadii Alle idmo, garab istaaga dadkeenna Soomaaliyeedna hore ayeenu usii wadaynaa,“ ayuu hadalkiisa sii raaciyey madaxweynaha Puntland.

Puntland ayaa ka qaybgalin shirarka golaha wadatashiga qaran, waxayna sheegtay inay diidan tahay wax ka badelka dastuurka iyo siyaasadda dawladda federaalka Soomaaliya, iyadoo madaxda dawladda federaalka ay ku celcelinayaan inaan loo joojinayn taas oo sii xoojisay khilaafka labada dhinac.

Hoos ka daawo muuqaalka