Beledxaawo ( Caasimada Online) – Ciidamada ammaanka ee degmada Beledxaawo ayaa ugu dambeyn gacanta kusoo dhigay Calaso Muxumed oo loo haysto dil la sheegay inay u geysatay haweeney kale oo ay daris ku ahaayeen degaanka Oodan ee gobolka Gedo.

Idiris Aadan Nuur oo madaxa baarista ee gobolka ayaa shaaca ka qaaday inay tageen goobta uu falku ka dhacay, isla-markaana ay soo xireen haweeneyda ee eedeysan oo loo haysto inay mindi ama toorey ay ku dishay Marxuumad Nasro Cabduqaadir Maxamed.

Dambi baaraha ayaa sheegay in labada gabdhood ay wada dagaalameen, kadibna eedeysanaha ay soo qaadatay toorey, kadibna ay halbowlaha ka gelisay marxuumadda oo isla goobta ku geeriyootay, kadina la aasay.

“Eedeysanihii dhibka geystay waan soo qabanay, falkana wuxuu ka dhacay Beledxaawo gaar ahaan tuulada Oodan, dilkaas wuxuu ahaa dil toorey ah” ayuu yiri Idiris Aadan Nuur.

Sidoo kale wuxuu tilmaamay in haatan ay wadaan baaris dheeraad ah oo ku aadan dhacdadaasi, isla-markaana sharciga ay la tiigsan doonaan haweeneyda lasoo xiray.

“Marxuumadda waxay mindida uga dhacday halbowlaha halkii ayayna ku dhimatay, waana lasoo aasay, gabadhii wax dishay way noo xiran tahay baaristana way socotaa, wixii kasoo baxana sharcigaan horgeyn doonaa, sidaa ayay wax u jiraay” ayuu mar kale yiri Idiris.

Waxaa kale oo uu raaciyay  “Waayahan kiisaska ragga wax dila uunbaan arki jirnay, laakiin beryahaan waa kiiskii noogu horreeyay ugu yaraan dhowr iyo toban sano kahor dumar, dumar dilay”.

Dhanka kale qaar kamid ah ehellada marxuumadda oo la hadlay warbaahinta ayaa soo dhaweeyay soo qabashada haweeneydan eedeysan, waxayna sidoo kale dalbadeen in si deg-deg ah cadaalada la horgeeyo, si looga qaado tallaabo adag oo sharciga waafaqsan.

Si kastaba, falkan argagaxa leh ayaa walaac ku abuuray dadka deegaanka oo aad uga naxay, waxaa sidoo kale dhacdadaan aad looga hadlay Beledxaawo iyo nawaaxigeeda.

Muqdisho (Caasimada Online) – Beesha uu kasoo jeedo Maxamed Aadan Koofi ayaa sheegtay in dano siyaasadeed laga leeyahay dacwadda musuq-maasuq ee lagu soo oogay agaasimihii hore ee hay’adda socdaalka iyo jinsiyadda dalka.

Koofi ayaa ka mid ah illaa 18 mas’uul oo xeer-ilaaliyaha qaranka Suleymaan Maxamed uu dacwad ka dhan ah u gudbiyey Maxkamadda gobolk Banaadir, ayada oo loo haysto eedo ay ka mid yihiin musuq-maasuq iyo xatooyo dadweyne.

Beesha uu kasoo jeedo Koofi, oo kulan ku qabatay magaalada Guriceel, ayaa sheegtay in qorshahan uu yahay mid ay ka dambeeyaan dad ay isku hayaan xilka madaxweynaha maamulka Galmudug, oo ay sheegeen in Koofi uu doonayo inuu isku sharxo. 

Beesha Maxamuud Aybakar ee Ceyr ayaa sheegtay in dadka ay is-hayaan Koofi ay kasoo wada jeedaan beesha Ceyr, balse ma aysan magacaabin shaqsiyaadka ay is-hayaan.

“Waxaa nasiib darro ah in dadka Koofi ku dulminaya shaarka dowladeed ay yihiin dad aan nahay dhaqan wadaag, dhiig wadaag iyo dhalyo wadaag, oo cid qabataa aysan jirin ilaa hadda ama u caqli calisaa,” ayaa lagu yiri war-saxaafadeed kasoo baxay shirka.

“Madaxweyne Xasan Sheekh waxaan leenahay, maanta waxay maraysaa meeshii aad ka tiri ‘Farxaanow dhiiqaa laguha laguu geliyoohaayaa’, annaguna waxana leenahay, madaxweyne, dadku waxbay gartaan ee yaan dhiiqo lugaha laguu gelin.”

Odayaasha ka hadlay shirka ayaa ugu baaqay beesha Ayaanle Ceyr inay is ceshtaan oo ay is-qabtaan, islamarkaana ilaaliyaan walaalnimada.

Baaqa loo diray beesha Ayaanle Ceyr ayaa laga fahmin karaa in qofka aysan odayaasha magacaabin balse ay is-hayaan Koofi loola jeedo agaasimaha hay’adda NISA Mahad Salaad, oo kasoo jeeda beesha Ayaanle, islamarkaana la rumeysan yahay in loo wado xilka madaxweynaha maamulka Galmudug.

Warka kasoo baxay beesha Koofi ayaa imanaya ayada oo shalay Maxkamadda Gobolka Banaadir ay si rasmi ah ugu yeertay 7 masuul oo Koofi uu ka mid yahay. Koofi ayaa dalka ka maqan.

Baafin rasmi ah oo kasoo baxday maxkamadda gobolka ayaa waxaa kasoo dhex muuqday agaasimihii waaxda canshuuraha bariga ee wasaaradda Maaliyadda Muxiyadiin Saabey, agaasimihii hore ee hay’adda Socdaalka iyo Jinsiyadda Maxamed Aadan Jimcaale (Koofi) iyo agaasimihii dhawaan is-casilay ee hay’adda socdaalka Cabdul, iyo xubno kale.

Muqdisho (Caasimada Online) – Ra’iisul wasaaraha Soomaaliya, Mudane Xamza Cabdi Barre oo xalay ka qaybgalay munaasabad ka dhacday magaalada Muqdisho ayaa ka hadlay xiisadaha qaar ee ka taagan dalka, gaar ahaan Gedo, Hiiraan, Puntland iyo Laascaanood.

“Meelaha khilaafaadka ka jiraan waxaan rabnaa in lasoo gabagabeeyo, khilaafaadkaas inay sii socdaan wax loo dul qaadan karo ma’aha xilligeedana ma joogno dadka Soomaaliyeedna ma mudna khilaaf dambe oo siyaasi dan leh kiciyay” ayuu yiri ra’iisul wasaare Xamza.

Sidoo kale wuxuu sii raaciyay “Waxaan rabnaa midnimo, waxaan rabaa kala dambeyn iyo walaalnimo”.

GEDO

Ra’iisul wasaare Xamza Cabdi Barre wuxuu farriin nabadeed u diray reer Gedo, isaga oo ugu baaqay in wixii tabasho ah ay ku dhameeyaan deganaan iyo sidoo kale wada-hadal.

“Gobolka Gedo ayaa kow ka ah waxaan ugu yeereynaa midnimo wada-hadal wax alla wixii khilaaf ah oo jiro lagu dhammeeyo” ayuu yiri ra’iisul wasaaruhu.

HIIRAAN

Xamza Cabdi Barre ayaa sidoo kale soo hadal qaaday xiisadda ka dhalatay xilka qaadista guddoomiyihii hore ee gobolka Hiiraan Cali Jayte Cismaan, wuxuuna sheegay in loo baahan yahay in la ilaaliyo ehelnimada & walaalnimo, sidoo kalena la dajiyo xaaladda Beledweyne.

“Hiiraan iyadana waxaan rabnaa oo sidoo kale ugu yeereynaa ehelnimo, walaalnimo deganaasho, isfaham iyo wax alla wixii siyaasad ah in miiska dushiisa lagu dhammeeyo” ayuu yiri ra’iisul wasaaruhu isaga oo ka hadlay xiisadda siyaasadeed ee ka taagan Hiiraan.

PUNTALND

Ra’iisul wasaaraha wuxuu sheegay inuu xiriir la sameeyay Isimada Dhaqanka Puntland, isla-markaana uu ka hadlay xiisadda ka taagan Garoowe, wuxuuna markale ugu baaqay inay shir isugu yimaadaan, isla-markaana ay xal u keenaay khilaafka ka taagan Puntland.

“Puntland waxaan ugu baaqayaa oo Isimada ka rajeynayaa inay isku yimaadaan oo fariistaan, isla-markaana arrintaas ay soo gabagabeeyaan” ayuu farriintiisa ku yiri.

LAASCAANOOD

Ugu dambeyn wuxuu ka hadlay dagaalka weli ka socda magaalada Laascaanood, isaga oo si adag uga hadlay xiisadda daba dheeraatay ee ka taagan gudaha magaaladaasi.

Ra’iisul wasaare Xamza ayaa ka dalbaday Somaliland in ay ciidamdeeda kala baxdo aagga lagu dagaalamayo ee magaalada Laascaanood, kadibna loo wadahadlo si Soomaalinimo ah.

“In ciidamada meesha jooga ay Somaliland qaado oo ay fursad siiso in xabadjoojin la sameeyo oo wixii khilaaf ah oo jira markaas yadoo Soomaali la wada yahay wadahadal lagu dhameeyo” ayuu iyadana ka yiri arrinta magaalada Laascaanood ee xarunta gobolka Sool.

Gaarisa (Caasimada Online) – Wararka helayo gobolka Waqooyi Bari ee kenya ayaa sheegaya in mar kale Al-Shabaab ayaa maanta weerar culus ka fuliyeen gobolkaasi.

Weerarkan oo ku billowday qarax xoogan ayaa waxaa xigay dagaal toos ah oo u dhexeeyay ciidamada Kenya iyo ragga weerarka oo ku dagaalamay duleedka magaalada Gaarisa, gaar ahaan inta u dhexeysa  deegaanada Calin Jugur iyo Weel maree oo hoostaga degmadaasi.

Ilo deegaanka ah ayaa sidoo kale innoo sheegay in weerar jidgal ah lagu qaaday kolonyo gaadiid ah oo ay la socdeen ciidamada Kenya, kadib la’isku fara saaray halkaasi.

Ma cadda khasaaraha rasmiga ah ee ka dhashay weerarkan iyo dagaalka xigay, waxaana lagu soo warramayaa in weli xaalad kacsanaan ah laga dareemayo Waqooyi Bari.

Dhanka kale qoraal kooban oo kasoo baxay kooxda Al-Shabaab ayaa looga hadlay weerarka, waxayna kooxdu sheegtay inay gubtay laba gaari oo ay lahaayeen ciidanka Kenya, kuwaas oo kala ah Cabdi Bille iyo Booyad ay biyo ku wateen ciidanka la qarxiyay.

Saraakiisha ammaanka Kenya weli kama hadlin dagaalka ka dhacay gudaha dalkaasi, gaar ahaan agagaarka magaalada Gaarisa ee gobolka Waqooyi Bari oo xuduud laleh Soomaaliya.

Weerarkan ayaa qayb ka noqonaya isku dayada hubeysan ee ay Al-Shabaab ka wado gudaha dalka Kenya, kuwaas oo ay ku beegsaneyso ciidanka Kenya iyo safareyda.

Si kastaba, weeraradan ayaa kordhay todobaadyadii u dambeeyay, waxaana dhowr qarax iyo weeraro toos ah ay ka dhaceen deegaano u dhow xadka ay wadaagaan labada dal.

Kenya ayaa qayb ka ah dalalka ay ciidamada ka joogaan Soomaaliya, isla-markaana la dagaalama kooxda Al-Shabaab, iyaga oo ku sugan gobollada Jubbooyinka iyo Gedo.

Galcad (Caasimada Online) – Ciidanka kumaandooska xoogga dalka ee Gor Gor ayaa howlgal qorsheysan ku burburiyey fariisimo ay Al-Shabaab ku lahayeen deegaano hoos taga degmada Galcad ee gobolka Galgaduud.

Ciidanka ayaa howlgalka ka fuliyey degaanada Baraag Sheekh Caamir, Ceel-dhigtaar, Ceel-ciid iyo deegaano kale, Taliyaha ururka 9-aad ee Gor Gor Dhamme Cabdiwali Axmed Xuseen oo howlgalka hoggaaminayey ayaa warbaahinta la hadlay.

Taliye Cabdiwali ayaa sheegay in u jeedka howlgalka uu ahaa baacsiga haraadiga kooxda Al-Shabaab iyo burburinta goobaha ay ku dhuumaaleystaan.

Taliyaha ayaa sheegay in wada shaqeyn buuxda ay kala dhaxeyso shacabka ku nool deegaanadaas oo lasoo wadaaga xogta Al-Shabaab-ka dhuumaaleysiga ah.

Sidoo kale saraakiisha hoggaamineysa ciidankaan waxay u kuur-galeen xaaladda nololeed ee bulshada deegaanadaas.

Ciidanka xoogga dalka ayaa howlgallo joogto ah ka fuliya deegaanada ay sida dhuumaaleysiga ah ku yimaadaan Al-Shabaab, waxayna howlgalkaas kadib inta badan ciidanku dib ugu laabtaan fariisimahooda.

Dowladda Soomaaliya ayaa hadda qorsheyneysa inay laba jibaarto howlgallada ka dhanka ah kooxda Al-Shabaab, waxaana maalmihii lasoo dhaafay furimaha loo diray ciidankii ugu badnaa.

Howlgalkaan laga fuliyey aagga Galcad wuxuu ku soo aadayaa xilli shalay howlgal kale oo ciidanku ay ka fuliyeen koonfurta gobolka Mudug ay ku dileen laba xubnood oo Shabaab ah.

Sidoo kale waxaa nolosha lagu qabtay sarkaal sare oo hoggaaminayey kooxda Shabaab-ka ah oo lagu beegsaday degaanka Baraag-Ciise ee koonfurta gobolka Mudug, xubnaha Shabaab-ka ah ayaa xoolo ka uruursanayey dadka reer miyiga ah ee deegaankaas ku nool.

Dublin (Caasimada Online) – Soomaalida ku dhaqan waddanka Jamhuuriyadda Ireland ayaa soo dhaweysay adeegga dowladda Soomaaliya ay soo gaarsiisay ee baasaboorada iyo waraaqaha aqoonsiga. 

Guddoomiyaha Jaaliyadda Soomaaliyeed ee Ireland Xaaji Axmed Gadaf ayaa Dowladda Soomaaliya, Wasaaradda Arrimaha Dibadda iyo Safaaradda Soomaaliya ee Belgium uga mahad celiyay sida wanaagsan ee adeega baasaboorka ay usoo gaarsiiyeen Soomaalida ku dhaqan Ireland oo baahi aad u daran u qabay inay helaan baasaboor Soomaaliga, waraaqda dhalashada iyo dhammaan dokumentiyada Soomaaliya. 

Gudoomiyaha ayaa sheegay in marar badan ay qeylo dhaan u direen dowladda Soomaaliya, maadaama dadka ku dhaqan Ireland ay aad ugu baahnaayeen helidda waraaqaha aqoonsiga, wuxuuna u mahad celiyay wasaaradda arrimaha dibadda iyo safaaradda Soomaaliya ee waddanka Belgium. 

“Waxaan aad ugu mahad celineynaa safiir Yoonis Yaasiin Xaashi (Oogacadde) sida Soomaalinimada leh, walaaltinimada leh ee dadkii ku dhibaateysnaa Ireland uu usoo gaarsiiyay adeegga baasaboorka iyo waraaqaha aqoonsiga,” ayuu yiri Xaaji Axmed Gadaf oo sheegay In muddadii uu joogay Yoonis uu wax badan u qabtay dad baahi u qabay helidda aqoonsiga Soomaaliga

Sidoo kale, Sheekh Cabdirisaaq Daahir oo ah Imaamka Masaajidka weyn ee Dublin Mosque ayaa u mahad celiyay safiir Yoonis wuxuuna sheegay in adeegan ay dad badan ka faa’iideysan doonaan. 

Arrintaan ayaa kusoo aaday iyadoo dhawaan waddanka Ireland ay soo gaareen safiirka Soomaaliya u fadhiyo Belgium Yoonis Yaasiin Xaashi (Oogacadde) iyo qaar ka mid ah shaqaalaha safaaradda, islamarkaana ay balan qaadeen in haatan wixii ka dambeeya Soomaalida Ireland baasaboorka loogu sameyn doono magaalada Dublin.

Beledweyne (Caasimada Online) – Guddoomiyaha cusub ee gobolka Hiiraan Cabdullahi Sufurow ayaa ka hadlay qorshaha inta hartay ee gobolkaas looga xoreynayo kooxda Al-Shabaab, isagoo sheegay inuu jiro aag ay mar kasta ka soo gudubto kooxdaas.

Guddoomiye Sufurow oo saxaafadda kula hadlay Beledweyne ayaa sheegay in mar kasta ay Al-Shabaab ka soo gudbaan inta u dhaxeysa Beledweyne iyo Buuloburde, isagoo wacad ku maray in taas uu wax ka qaban doono.

“Gaabis ayaa ka jira inta u dhaxeysa Beledweyne iyo Buuloburde, mar kasta waxay ka soo gudbaan wabiga markii la aadana dib ayey u laabtaan, caqabadaas siima jiri doonto,” ayuu yiri Sufurow.

Guddoomiyaha ayaa sheegay in sababta ay mar kasta wabiga uga soo gudbaan ay tahay in dadka la dagaalamaya kooxda ay yihiin reer miyi xoolo dhaqato ama beeraley ah, kuwaas oo mar kasta aan ku jiri Karin difaac.

“Waxaan balan qaadayaa in mar dambe aysan ka soo gudbin wabiga, waan aqaan halka ay ku dhuuntaan, waan uga daba geleynaa, si kale looga nabad gelimaayo Khawaarijta,” ayuu yiri guddoomiyahaan lagu bedelay Cali Jeyte oo dagaalkaan hoggaami jiray.

Sidoo kale Cabdullahi Sufurow wuxuu sheegay in howlgalka bilaabanaya ee wajiga labaad uu noqon doono mid bariga iyo koonfurta Hiiraan ka wada bilowda hal mar, sida ay qorsheeyeen.

“Inta wabiga laga gudbiyo oo nagu soo kaabtaan mar dambe ma dhici doonto inay carruurta iyo haweenka miino nooga laayaan, “Khawaarijtu haku talagasho in qiyaanadii ay nagu hayeen ay soo dhamaatay,” ayuu yiri.

Guddoomiyaha cusub ee gobolka Hiiraan ayaa sheegay in saacadihii lasoo dhaafay ay kooxda Al-Shabaab miino ku dileen hooyo iyo seddax carruur ah oo ay dhashay iyo Aabe iyo seddax carruur ah oo uu dhalay.

Dadkaan ayaa la qarxiyey xilli ay la socdeen mooto nooca beeraha ka shaqeeya ah, kadib markii ay la kacday miino ay dhulka ku aastay kooxda Al-Shabaab, waxayna miinooyinkaan welwel badan ku abuureen shacabka.

Hoos ka daawo

Hobyo (Caasimada Online) – Dowladda federaalka Soomaaliya ayaa shaacisay inuu usoo gacan galay Xaashi Garaad Cali kadib howl-gal ka dhacay deegaan hoostaga degmada Hobyo ee gobolka Mudug.

Ciidanka dowladda iyo kuwa dadka deegaanka oo howl-galkaan si wada-jir ah uga fuliyay deegaanka Baraag Ciise oo hoostaga Hobyo, ayaa waxaa lagu dilay laba ka tirsan Khawaarijta Al-Shabaab.

Deegaanka Baraag Ciise ayay ciidamadu ku weerareen goob ay si dhuumaalaysi ah isugu dayayeen inay dadka lacago uga qaadaan, sida ay baahisay warbaahinta dowladda.

Ciidamada huwanta ayaa sidoo kale gacanta ku dhigay Xaashi Garaad Cali oo ahaa Horjeege si wayn looga yaqaanay deegaanka.

Xaashi Garaad ayaa la sheegay inuu ku caan-baxay baadda iyo dhaca xoolaha dadka reer miyiga ah, uuna shaqadaas u qaabilsanaa kooxda Al-Shabaab.

Howl-galkan ayaa imanaya, iyada oo ay shalay howl-gal culus iyo duqeymo iyo ka dhaceen duleedka degmada Afmadow ee gobolka Jubbasa Hoose.

Dowladda Soomaaliya oo ka hadashay weerarkaas ayaa shaaca ka qaaday inay ku beegsatay deegaano ay ku sugnaayeen Al-Shabaab oo ku yaalla agagaarka magaaladaas, islamarkaana lagu gaarsiiyay khasaare lixaad leh.

Howl-gallada oo dhacay saddex jeer ayay dowladdu sheegtay in mid kamid ah ay ciidanka xoogga dalka, ciidanka dowlad-goboleedka Jubbaland oo ay taageerayaan saaxiibada caalamiga ah habeen hore ilaa shalay subaxdii uu ka dhacay deegaan hoostaga degmada Afmadow.

Si kastaba, dowladda ayaa maalmihii dambe dardar-gelinaysay howl-gallada ka dhanka ah kooxda Al-Shabaab, xilli bishii hore uu hakad ku yimid, waxaana dhawaan si rasmi ah u bilaaban doona wejiga labaad ee dagaalka oo qeyb ka noqonayaan ciidamo ka socda dalalka deriska.

Muqdisho (Caasimada Online) – Wasiirka Arrimaha Gudaha iyo dib-u-heshiisiinta dowladda federaalka Soomaaliya Mudane Axmed Macalim Fiqi ayaa shaaciyay in ciidamadii Gorgor ay bedeleen kuwa kale oo la yiraahdo Khaalid Bin-Waliid.

Wasiir Fiqi ayaa sheegay in ciidamada Khaalid Bin-Waliid la yiraahdo oo shalay ka baxay magaalada Muqdisho ay door muhiim ah ka qaadanayaan sidii dalkaan looga xoreyn lahaa kooxda Al-Shabaab.

Guutada Khaalid Bin-Waliid ayuu wasiirka sheegay inay kusii jeedeen goobaha dagaalka ee ciidamada dowladda iyo Al-Shabaab isku hor fadhiyaan.

“Ciidamadeen haddii Gorgor iyo Haramcad la dhihi jiray shalay waxaa baxday guuto la yidhaahdo Khaalid Bin-Waliid, oo inay soo afjarto kooxahaan u baxday meelaha yar-yarka ah ee gobollada dhexe,” ayuu yiri Wasiir Axmed Macalim Fiqi.

Waxa uu intaas sii raaciyay “Waxaa naga go’an in aan kooxahaas dalka ka qabano, waana hadafka koowaad. Ciidankii weynaa ee la filayay ee howl-galkii Libaaxa Madow la dhihi jiray isaguna goordhow ayuu bilaabanayaa.”

Saxaabiga Khaalid bin Waliid (Allah ha ka raali noqdee), oo kamid ahaa geesiyadii saxaabada ee diinta usoo dagaalamay, ayaa la rumeysan yahay inuu yahay Jeneraalkii ugu wanaagsan ee militari ee dunida soo maara, ayada oo abid aan looga guuleysan dagaal uu galay.

Xogta la helay ayaa sheegeysa in ciidamadan loogu magac daray Khaalid bin Waliid ay yihiin kuwo dhawaan uun tababar dibadda ah kasoo laabtay, kana yimid dalka Masar, iyagoo 3,000 askari oo kamid ah dalka Masar lagu soo tababaray, oo ay taageereyso dowladda Imaaraadka Carabta.

Ciidamadan ayaa ku hubeysanaa hub iyo gaadiid cusub, waxaana laga dareemayay inay qabaan tababar ka duwan ciidamada kale, iyadq oo muddooyinkan aysan dowladd Masar ciidamo tiradaas ah u soo tababarin Soomaaliya.

Muqdisho (Caasimada Online) – Fal-celin xooggan ayaa ka dhalatay xukun ay maanta maxkamadda darajada koowaad ee ciidamada qalabka sida ku ridday nin lagu helay kamid ahaanshiyaha kooxda Al-Shabaab, sidoo kalena weerar loo adeegsaday qarax ka fuliyey magaalada caasimada ee Muqdisho.

Nikan oo lagu magacaabo Yuusuf Duqow Xuseen Dhicisow ayaa waxa ay Maxkamadda Ciidamada Qalabka Sida ku xukuntay 15 sano oo xabsi ciidan ah.

Maxkamadda ayaa sheegtay in Yuusuf Duqow Xuseen uu Al-Shabaab kaga biiray Buur-Eylo oo hoostagta degmada  Buur-Hakaba, uuna mushaar ahaan u qaadan jiray biishiiba $70.

Kadib waxa ay Maxkamaddu sheegtay inuu usoo wareegay magaalada Muqdisho, si uu uga fuliyo dilal qorsheysan iyo qaraxyo.

Maxkamadda ayaa sidoo kale sheegtay in ninkan uu ka dambeeyay qarax bam-gacmeed ah oo lagu weeraray waaxda labaad ee degmada Hodan ee gobolka Banaadir.

Haddaba, Sidee looga fal-celiyay arrintaan?

Suleymaan A. Axmed: “Sabab ayaa xabsi loogu xukumay ninba la ogyahay dil iyo qaraxyo inuu geeysan jiray, maxaa tiirka loo taagin?.”

“Run ahaantii qofka markuu is dhiibo xukun xabsi waa lagu ridi karaa laakiin nin asagoo bam tuuraayo dilna gaysanaayo lasoo qabtay sidee xabsi loogu xukumi karaa waa iga su’aale. Maa dil lagu xukumo,” ayuu yiri qof kale oo isaguna ka fal-celiyay arrintaan.

Caraale Yaasin Maxamed ayaa isna yiri “Ragan daawadoodu waa toogasho ee hala dilo waxba jeel ku dawoobi maayo waa waraabe imaanka Alle ha ka qaado Shabaab.”

Nasra Raabi: “In la xidho maba ahayn al-qushaash hala dhadhansiiyo xanuunku u gaystay shacabka Soomaaliyeed waa in la aaso isagoo nool nacaladi haku dhacdee.”

“Ragan dawadoodu waa toogasho ee hala dilo waxba jeel ku dawoobi maayo waa waraabe imaanka alle haka qaado Shabaab,” ayuu yiri Caraale Yaasiin Maxamed.

Kaamil Magan ayaa isna yiri: “In la toogto ayay ahayd waxaan maxaa laga xiraya.”

Maahir Zayed: “Dowlada maxa ka qaldan dadkan iyagaba raba iney dhintaane ma loo fududeeyo waa maxay xabsiga?.”

“In latoogto ayey ahayd kuwo kale ayaa ku quus qaadan lahaa. Doofaar ma daahiro,” ayuu yiri Saciid Cabdi Faarax.

Jamaal Cabdiraxmaan: “Dowladda waa in qof Al-Shabaab xataa ku riyooday, oo ka mid noqdo waa in ay dishaa, xabsi in la geeyo qof bambo tuuri rabay oo dad dilo wa qalad.”

Muqdisho (Caasimada Online) – Magaalada Muqdisho ee caasimada Soomaaliya ayaa waxaa haatan ka socda dhaq-dhaqaaq siyaasadeed oo ka dhashay xiisadda xoogan ee hareysay Baarlamaanka Soomaaliya oo Sabtidii ku kula qaybsamay ajendaha kulankooda.

Xildhibaanada qaarkood ayaa ka horyimid in kulankaas uu ka qayb-galo wasiirka amniga gudaha Maxamed Sheekh Cali Doodishe, taas oo keentay inuu buuq xoogan hareeyay kulankii Golaha oo ugu dambeyn guddoonku iska soo xiray, markii la kala bixi waayay.

Sidoo kale waxaa maanta baaqday kulan kale oo ay xildhibaanadu ku lahaayeen xarunta Villa Hargeysa, kadib markii ay faragelin ku sameysay madaxtooyada qaranka.

Wararka ayaa sheegaya in Villa Soomaaliya ay ku qancisay gudoomiyaha Golaha Shacabka inuu baajiyo kulankan illaa inta laga gaarayo Arbacda, si xal loogu helo doodda taagan.

Sida ay ogaatay Caasimada Online, madaxweyne Xasan Sheekh iyo ra’iisul wasaare Xamza ayaa tuhun weyn ka qaba kulanka baarlamaanka, maadaama uu soo baxay guux weyn oo ku aadan in xildhibaanadu ay wadaan mooshin culus oo ka dhan xukuumadda Dan-Qaran.

Madaxweynaha iyo ra’iisul wasaaraha oo ka hortegaya qorshahaasi ayaa hadda kala fur furis ku bilaabay xubnaha Barlamaanka, si xiisadda loo qaboojiyo.

Madaxweyne Xasan Sheekh Maxamuud ayaa sidoo kale xalay kulmay qaar kamid ah xildhibaanada Baarlamaanka, oo uu kala hadlay xiisadda taagan, waxaana qaarkood la sheegay in loo ballan qaaday xilal, sida wasiir, safiir, shaqaaleysiin iyo sidoo kale dhaqaale.

Lama oga sida ay wax noqon doonaan, waxaana arrintan xoogeeda si weyn oooga dareemayaa magaalooyinka Muqdisho iyo Nairobi oo ay xildhibaanadu ka wadeen dhaq-dhaqaaq siyaasadeed, kaas oo si weyn loo dareemay kadib kulankii dhacay Sabtidii.

Si kastaba, waxaana kulankaasi soo baxday awoodda xubnaha mucaaradka ay dhexe ku leeyihiin Baarlamaanka, kadib markii ay hor-istaageen ajendihii ay wadatay xukuumadda.

Belexaawo (Caasimada Online) – Wararka laga helayo gobolka Gedo ayaa sheegaya in dhacdo argagax leh ay maanta ka dhacday duleedka degmada Belexaawo ee gobolkaasi.

Dhacdadan ayaa timid, kadib markii haweeney ku hubeysneyd mindi ama toorey ay haweeney kale ku dishay deegaanka Oodan oo hoostaga magaaladaasi.

Marxuumadda la dilay ayaa waxaa lagu magacaabi jiray Nasro Cabduqaadir Maxamed, ayada oo haatan maydkeeda la geeyay isbitaalka Kaliil ee degmada Beledxaawo.

Wararka ayaa intaasi kusii daraya in dilka ka hor uu laba haween oo daris ahaa uu dhex-maray muran, kadibna haweeneyda dilka geysatay ay toorey soo qaadatay, kadibna sidaaas ay ku dishay marxuum Nasro Cabduqaadir Maxamed.

Haweeneyda eedeysanaha ah oo lagu magacaabo Calaso Muxumed ayaa sidoo kale goobta isaga baxsaday, sida ay Caasimada Online u sheegeen ilo dadka deegaanka ah.

Sidoo kale waxaa goobta gaaray ciidamo ka tirsan kuwa dowladda Soomaaliya oo haatan baadi goob ugu jira haweeneyda dilka geysatay, si gacanta loogu soo dhigo.

Dhanka kale qaar kamid ah ehellada marxuumadda oo la hadlay warbaahinta ayaa si adag uga hadlay dhacdadan waxayna dalbadeen in cadaalada la horkeeno haweeneyda baxsatay.