Muqdisho (Caasimada Online) – Ikraan Tahliil Faarax oo ah gabar 23 sano jir ah, kana howl-gali jirtay Hay’adda NISA oo muddo ka badan labo toddobaad ah aan nolol iyo geeri midna lagu hayn ayaa waxaa loo haysta NISA.

Taliye ku-xigeenkii hore ee Hay’adda NISA, Cabdisalaan Guuleed oo wareysi siiyey idaacada VOA-da oo ka hadlay kiiska Ikraan ayaa sii xoojiyey shakiga laga qabo in Ikraan ay ku maqan tahay hay’adda NISA.

“Dowladdii Soomaaliya wey aamusan tahay, meeshii ay aheyd in dowladda ay qeylo dhaamiso oo Nabad-sugida ay warqad soo saarto oo ay dhahdo qofkaas ayaa naga maqan, sababtaas waxay keenaysa shakiga u weyn ee la qabi karo in Nabad-sugida ay gacanteeda ku maqan tahay, ha noolaato ama ha dhimato,” ayuu yiri.

Sidoo kale waxa uu sheegay inuu jiro tuhun ah in Ikraan loo qafaashay inay kamid aheyd shaqsiyaad hayey xogta dhalinyaradii loo qaaday dalka Eritrea, taasi oo muddooyinkii dambe xiisad hor leh ka taagneyd, islamarkaana ay cadaadis xoog leh ku wajaheysa dowladda iyo NISA.

“Haddey dadkii file-shaas hayey ay kamid aheyd waxaa soo baxeysa sabab aad u weyn oo ah in dowladda ay dooneyso inay baabi’iso raadkas, qof kasta oo ku lug lahaana (wax ka ogaa) uu ka baxo hawada.”

Sidoo kale, Taliyihii hore ee Nabad-sugida, Cabdullaahi Maxamed Cali (Sanbaloolshe) oo wareysi siiyey idaacada VOA-da ayaa sheegay in gabadhan laga yaabo inay halis u gashay kiiska dhallinyarada la geeyey Eritrea.

“Dowladda ayaa la rabaa inay gabadhan nolol iyo geeri ku sheegto.. waxaa jira tuhun fara badan oo in Kiiskan Hey’adda Nabadsugida ku lug leeyihiin iyo dareen xooggan ah ayaa jira. Arrimo xasaasi ama xog xasaasi ah, waxaa laga yaabaa wax ay ogtahay inay dhibanne u tahay.. Database ciidamada Eritrea loo qaaday ayey heysay.. Waxaas oo dhan baaritaannada ayey kasoo bixi doontaa,” ayuu yiri Sanbaloolshe oo farta ku fiiqay Hay’adda NISA.

Hooyo Qaali Maxamuud Guhaad ayaa kal hore sheegtay in gabadheeda Ikraan Dr. Tahliil Faarax muddo la la’yahay ayna ku tuhemyso hay’adda nabad-sugidda iyo sirdoonka qaranka Soomaaliya ee NISA.

Hooyo Qaali oo maalmo ka hor warbaahinta kula hadashay Muqdisho, ayaa sheegtay in gabadheeda ay kal hore ka shaqeyneysay xafiiskii allaha ha u naxariistee Injineer Yariisow, islamarkaana ay xilli habeen ah raacday gaari u diiwaan-gashan dowladda oo la yaqaan, gaar ahaan hay’adda NISA.

Baabuurka gabadha qaaday ayey sheegtay inuu xilli habeen ah, abaare 8-dii, 26-kii June uu ugu yimid gurigeeda, kadibna Ikraan ay qaadatay Laptop ay ku shaqeyneysay.

“Baabuurka wuxuu kasoo galay KM0 iyo Hotel Global dhexdooda, oo ah halka aan degannahay. Intaas dhexdeeda baabuur soo galay waa baabuur la yaqaan, waa baabuur amni ah, waa baabuur gacanka uu soo daayey,” ayey tiri hooyo Qaali.

Waxaa si weyn isu-soo taraya cabsida laga qabo in Ikraan Dr. Tahliil Faarax la dilay, isla habeenkii ay raacday baabuurka ka diiwaan-gashan NISA oo xiligaas la rumeysan yahay in looga yeeray xarunta.

Hoos ka dhageyso warbixin ay VOA ka diyaarisay arrinta Ikraan.

Muqdisho (Caasimada Online) – Madaxweynaha muddo xileedkiisa dhamaaday ee Maxamed Cabdullaahi Farmaajo ayaa dhambaal hambalyo ah u diray madaxweynaha dalka Turkiga, Recep Tayyip Erdoğan iyo shacab weynaha dalkaas.

Farmaajo ayaa Erdogan iyo Shacabkiisa ugu hambalyeeyey xuska maalinta qaran ee Midnimada iyo Dimuqraadiyadda Turkiga, taasi oo ku aadan maanta oo ku taariikheysan 15-ka bisha July.

“Madaxweynaha Jamhuuriyadda Federaalka Soomaaliya Mudane Maxamed Farmaajo ayaa ugu hambalyeeyey Dhiggiisa Dalka Turkiga Mudane Recep Tayyip Erdoğan, Shacabka iyo Xukuumadda Dalkaas Xuska Maalinta Qaran ee Midnimada iyo Dimuqraadiyadda Turkiga oo ku beegan 15-ka Luuliyo,” ayaa lagu yiri qoraal lagu daabacay barta twitter-ka ee Villa Somalia.

Farmaajo ayaa ku bogaadiyey shacabka aan walaalaha nahay ee Turkiga sida naf-hurnimada leh ee ay uga hor-tageen isku daygii lagu majaxaabin  lahaa hannaanka dimuqraadiyadeed ee dalkaas, waxa uuna tilmaamay in shacabka iyo dowladda Soomaaliya ay mar walba garab taagan yihiin xasilloonida iyo horumarka walaalahooda Jamhuuriyadda Turkiga.

“Dowladda iyo shacabka aan walaaha nahay ee Turkiga waxa aan idiinku hambalyeynayaa Xuska Maalinta Qaran ee Midnimadada iyo Dimuqraadiyadda oo ah maalin ku suntan midnimo, wadajir iyo naf hur, taasoo aad iska difaacdeen  in talada Qarankiinna la idinka faramaroojiyo.”

Farmaajo oo muujiyey sida ay uga go’an tahay dowladda iyo shacabka Soomaaliya xoojinta iskaashiga iyo Xiriirka miro-dhalka ah ee ka dhexeeya labada dal ayaa u rajeeyey Dowladda iyo Shacabka aan walaalaha nahay ee Turkiga nabad, xasillooni iyo horumar waara.

Maanta oo kale, July 15-keeda, waxaa 5-sano laga jooga afgambigii dhicisoobey ee Turkiga, kolkaas oo koox ka tirsan askarta dalkaaasi ay isku dayeen afgambi dhicisoobay, kaasi oo ahaa afgambigii 7-aad ee ka dhaca dalkaasi.

Afgambiga dhicisoobey oo ay ka dambeeyeen sida la sheegay saraakiil daacad u ahaa dhaq-dhaqaaqa Gülen oo 2014-kii lagu daray liiska argigixisada, ayaa waxa xiligaas ku dhintay 250 qof, halka ay ku dhaawacmeen in ka badan 2,000.

Dadweynaha Turkiga ayaa si weyn uga horyimid afgambigaas, midaasi oo dalka ka bad-baadisay shirqool halis ahaa, waxayna maalintaas noqotay mid taariikhi ah oo ay xusaan dowladda iyo shacabka Turkiga.

Muqdisho (Caasimada Online) – Guddoomiyaha Maxkamadda Sare ee Soomaaliya, Baashe Yuusuf Axmed ayaa markii u horeysay shaaciyey in Maxkamadda Sare ay tahay marjaca u dambeeya ee ka go’aan gaari kara doorashada.

Baashe oo hadal ka jeedinayey shirka Madasha Garsooreyaasha oo ah madal saddex biloodle ah oo ay Garsooreyaashu ku kulmaan, ayaa si cad u sheegay in cabasho kasta oo ka timaada doorashooyinka dalka ay dacwadeeda qaadeyso Maxkamadda Sare ee dalka.

Waxa uu sheegay in go’aan kasta oo ay gaaran Gudiyada doorashooyinka uu yahay mid maamul, oo aan lagu qasbaneyn in la raaco, islamarkaana aysan ka garnaqi karin cabasho kasta oo ka timaada doorashooyinka, taasi oo marjaceedu yahay Maxkmadda Sare, sida uu sheegay.

“Maxkamadda Sare waxa ay diyaar u tahay inay ka garnaqdo cabasho kasta oo ka dhalata go’an kasta oo ay gaaran gudiyada doorashooyinka heerkasta ay yihiin, marka waxaan rabaa in qofkasta uu arrintaasi ku baraarugsanaado,” ayuu yiri Guddoomiye Baashe.

Sidoo kale waxa uu xusay in cid kasta oo uu saameeyo go’aanada ay gaaran guddiyada doorashada aysan u arkin in waajib sharci ah uu yahay go’aankooda, hase yeeshe waxa asalka uu yahay dastuurka dalka, sida uu hadalka u dhigay.

Hadalka Guddoomiyaha Maxkamadda Sarre ayaa imanaya xili dhawaan la filayo in dalka ka bilowdaan doorashooyinka Xildhibaanada labada aqal, islamarkaana ay jiraan cabashooyin laga muujinayo hanaanka doorashooyinkaas.

Beledweyne (Caasimada Online) – Taliska Booliska Beledweyne ayaa faah faahin dheeraad ah ka bixiyey falkii xalay lagu sumeeyey Allaha u naxariistee marxuum Cumar Macalin Maxamud oo ahaa Macalin dhiga dugsi lagu barto Qur’aanka Kariimka.

Taliyaha saldhigga Booliska magaalada Beledweyne, Laba Xidigle Maxamed Maxamuud Rooble Qorsheel oo shir jaraa’id ku qabtay xafiiskiisa ayaa sheegay in dhacdadan ay ka dambeysay xaaska marxuumka, isla-markaana ay socdaan baaritaano dheeraad ah.

Sidoo kale waxa uu tilmaamay in ciidamadu ay qaadeen howl-gal, kadib falkaasi waxaana uu sheegay inay gacanta ku soo dhigeen wiilal yar yar oo uu sheegay in haweeneyda ay u adeegsatay dhacdada sumeynta ee lagu dilay Macalin Cumar.

Qorsheel ayaa sidoo kale xusay in cadaaladsa la horkeeni cid kasta oo ka dambeysay dilka marxuumka, isla-markaana ay natiijada baarista dib ka shaacin doonaan.

Ugu dambeyn waxa uu digniin adag u diray ganacsatada, isaga oo sheegay in aan la iibin karin sunta dadka disha, iyada oo aan fasax looga heysan laamaha amniga.

Sida ay Caasimada Online u sheegeen xubno ka tirsan ehellada marxuumka ayaa dhowaan guursaday haweeneyda Sumeysay, lamana oga sababta ku kaliftay.

Dhacdadan ayey aad uga argagaxeen dadka ku nool Xaawo-taako ee Beledweyne, maadaama uu ahaa Macalin Dugsi Qur’aan oo aad looga yaqaanay xaafaddaasi.

Allaha u naxariistee Macalin Cumar Macalin Maxamud ayaa maanta lagu aasay gudaha magaaladaasi, waxaana aaskiisa ka qeyb-galay mas’uuliyiin & dadweyne fara badan.

Muqdisho (Caasimada Online) – Madaxweynaha maamulka HirShabeelle, Cali Guudlaawe Xuseen ayaa maanta magaalada Muqdisho kula kulmay madaxweynihii hore ee dalka, Shariif Sheekh Axmed oo sidoo kale ah Guddoomiyaha Midowga Musharixiinta.

Kulanka Sheekh Shariif iyo Guudlaawe oo ka qabsoomay Hotel Airport ee ku yaala xayndaabka Xalane ayaa waxaa looga hadlay xaalada dalka, arrimaha doorashooyinka iyo xiisadaha kasoo cusboonanaya deegaano ka tirsan maamulka HirShabeelle.

Inta uu socday kulanka ayaa waxa uu madaxweynihii hore ee dalka uga mahad-celiyey Guudlaawe doorkii uu ka qaatay heshiiskii doorashada ee kal hore lagu gaaray magaalada Muqdisho.

Waxa uu ku amaanay kaalinta uu ka ciyaaray heshiiska doorashada, taasi oo dalka u jiheysay dhankaa iyo doorasho, islamarkaana ka bad-baadisay jahwareer siyaasadeed iyo mid amni.

Si kastaba, Kulanka maanta uu Guudlaawe la qaatay madaxweynihii hore ee dalka, Sheekh Shariif ayaa imanaya xili uu maalmihii dambe ee uu magaalada Muqdisho ka waday kulamo la xiriira arrimaha doorashooyinka iyo xal ka gaarista tabashada reer Hiiraan.

Muqdisho (Caasimada Online) – Ra’iisul wasaaraha xukuumadda federaaalka Soomaaliya, Mudane Maxamed Xuseen Rooble ayaa ugu dambeyn isu keenay wasiirada gargaarka iyo ciyaaraha Xamza Saciid Xamza & Khadiijo Maxamed Diiriye oo uu dagaal afka ah dhex-maray.

Kulanka oo ka dhacay hoyga ra’iisul wasaaraha ayaa waxaa lagu dhammeeyey khilaafka soo kala dhex-galay labada wasiir oo horey loogu kala bedalay wasaaradaha, kuwaas oo hadallo kulul isku mariyey warbaahinta iyo sidoo kale baraha bulshada ee Internet-ka.

Wasiir Xamza oo faah faahiyey kulankan saddex geesoodka ah ayaa ugu horreyn shaaca ka qaaday inay si wadajir ah uga heshiiyeen wixii dhacay isaga iyo Khadiija Diiriye.

“Waxaan hoyga ra’iisul wasaaraha kula kulmay walaashey wasiir Khadiijo M. Diiriye oo aan is cafinay, si wadajr ahna aan uga heshiinay wixii horey u dhacay,” ayuu yiri Xamza.

Dhankeeda wasiirka dhalinyarada iyo ciyaaraha xukuumadda Soomaaliya ayaa ka hadashay kulankan oo uu qaban qaabadiisa lahaa ra’iisul wasaare Roobe, waxaana ay sheegtay inay qaadatay raalli-gelin, isla-markaana ay cafisay wasiir Xamza Saciid.

“Madaxdeyda qaranka kama weyni raalli-gelina waa qaadasho, walaalkey Hon Xamza cafis baa iga tahay Aboow,” ayey iyaduna tiri wasiir Khadiijo Maxamed Diiriye.

Dagaalka labada wasiir oo hadal heyn badan dhaliyey ayaa yimid, kadib markii wasiirka dhalinyarada iyo ciyaaraha xukuumadda federaalka ah ee  Soomaaliyauu sheegay in markii loo magacaabay wasaaradda uu waayey xafiis uu ku shaqeeyo, sidoo kalena uu u tegay shaqaalihii oo fasax isaga maqan ku dhawaad laba sano ah, mushaarna iska qaadanaya, taas oo shaqa badan kadib uu sheegay in hadda uu wax badan ka bedelay.

Wasiir Khadiija Diiriye oo hadalkaas ka carootay ayaa dhankeeda ka soo jawaabtay, waxayna wasiir Xamza Saciid Xamza ku eedeysay in markii la bedelay uu horay u sii kaxeystay, oo ‘soo celi laga kari waayey gaari ay leedahay wasaaradda gargaarka’.

Nairobi (Caasimada Online) – Kenya iyo Soomaaliya ayaa billaabay safar cuusb oo ay dib ugu dhisayaan xiriirkooda kadib bilo ay u dhaxeysay xiisad diblomaasiyadeed oo xooggan. 

Soomaaliya ayaa dhammaadkii 2020 xiriirka diblomaasi u jartay Kenya, ayada oo ku eedeysay inay faro-gelin ku hayso arrimaha gudaha, islamarkaana ay dhaawaceyso madax-banaanida dalka.

Xoghayaha joogtada ah ee wasaaradda arrimaha dibedda Kenya Ambassador Macharia Kamau ayaa shalay la kulmay safiirka Soomaaliya ee Kenya Maxamuud Axmed Nuur Tarsan, oo ay ka wada hadleen xiriirka labada dal.

Kulankan oo ahaa mid ay albaabada u xiran yihiin, ayaa labada dhinac waxay ku sahmiyeen dhinacyo cusub oo ay ka wada-shaqeyn karaan labada dal, si loo xoojiyo xiriirka burburay.

“Ambassador Macharia Kamau wuxuu wada-hadallo la yeeshay safiirka Soomaaliya ee Kenya Mohamud Ahmed Nur, waxayna sahmiyeen dhinacyo cusub oo ay labada dal iska kaashaan karaan, sida dhaqanka, ganacsiga, nabadda iyo amnga. Labada dhinac waxaa ka go’an xoojinta xiriirka,” waxaa sidaas barta twitter-ka ku qortay wasaaradda arrimaha dibedda Kenya.

Sidoo kale afhayeen u hadlay dowladda Kenya Cyrus Oguna ayaa sheegay in Nairobi ay dhistay guddi baara arrimaha sababaya khilaafka labada dal. 

Oguna ayaa sheegay in guddigan uu sahmin doono hanaan diblomaasiyadeed oo lagu xalin karo arrimahan, islamarkaana uu goor horeba sameeyey horumar. 

Bishii June 2021, wasiirada arrimaha dibedda Soomaaliya iyo Kenya ayaa isku raacay inay dedejiyaan dib u furista safaaradaha labada dal, taasi oo ay ku guuleysteen. 

Kismaayo (Caasimada Online) – Wararka laga helayo gobolka Jubbada Hoose ayaa sheegaya in saacadihii lasoo dhaafay ciidamada Jubbaland ay xukun dil toogasho ah ku fuliyeen Xuseen Aadan Cali ‘oo lagu helay inuu kufsi u geystay’ gabar saddex sano jir ah.

Toogashada ayaa ka dhacday degmada Dhoobley, sida ay shaaciyeen mas’uuliyiin deegaanka ah, waxaana goobjoog ahaa saraakiil ka socotay dhanka maxkamadda.

Ninka toogashada lagu fuliyey oo ay dhowaan gacanta ku soo dhigeen ciidamada ammaanka ayaa kufsi arxan darro ah u geystay Gacalo Ismaaciil Cabdullahi oo saddex sano jir aheyd, iyadoo ugu dambeyn lagu fuliyey xukunka lagu ridday oo toogasho ahaa.

Gabadha yar oo uu dhaawac daran kasoo gaaray kufsiga lagula kacay ayaa markii dambe u geeriyootay, sida ay xaqiijiyeen qaar ka mid ah ehelladeeda.

Sidoo kale wararka ayaa intaasi ku daraya Xuseen Aadan Cali uu gabadha yar u ahaa adeer, isla-markaana uu qabay hooyadeed, iyada oo wax lala yaabo ay noqotay inuu fara-xumeeyo gabar yar oo uu hooyadeed qabo.

“Gabadha wuxuu u ahaa adeer, wuxuuna qabay hooyadeed, Wallaahi ilaa iyo haatan waa wax lala yaaban yahay sababta ku kaliftay inuu fara-xumeeyo gabar uu hooyadeed qabay,” ayuu yiri mid ka mida ehellada gabadha yar ee u geeriyootay kusfiga lo geystay.

Dhacdadan naxtinta leh ayaa hadal heyn badan dhalisay, waxaase dadka deegaanka ay soo dhoweeyeen xukunka dilka ee ay Jubbaland ku ridday ninkii ka dambeeyey falkaas.

Soomaaliya ayaa mid ah dalalka ay ka dhacaan tacadiyada ka dhanka ah dumar, sida kufsiga, kaas oo meelo kala duwan laga soo wariyey, waxaana ugu dambeeyey Hargeysa oo kufsi iyo dil la’isugu diray haweeney lagu magacaabi jiray Marxuumad Hinda Cumar.

Garoowe (Caasimada Online) – Dowladda dhexe ee federaalka, dowlad goboleedyada iyo gobolka Banaadir oo shir maamlmo qaatay ku yeeshay magaalado Garoowe ee xarunta gobolka Nugaal ayaa kala saxiixday heshiis cusub oo ku aadan waxbarashada.

Shirka ka dhacay Garoowe ayaa wuxuu u dhexeeya wasiirada waxbarashada ee dowladda dhexe, dowlad goboleedyada iyo sidoo kale xubno ka socda gobolka Banaadir, waxaana lagu faray arrimaha waxbarashada, shahaadiyoonka iyo imtixaanaadka.

Sidoo kale shirkan ayaa waxa lagu gaaray is afargad ay dhinacyadu wada saxiixeen oo lagu horumarinayi waxbarashada, iyadoo gabagabadee laga soo saaray war-murtiyeed.

Qodobada lagu heshiiyey ayaa waxaa ka mid ah In la aas aaso Golaha Iskaashiga iyo Wadatashiga Wasaaradaha Waxbarashada, nn la mideeyo qalfoofta manhajka (Curriculum Framework), loona saaro guddi farsamo midaynta Qalfoofka Manhajka( Curriculum Framework).

Sidoo kale waxay dowlad federaalka, dowlad goboleedyada iyo gobolka Banaadir isku af-garteen in maamul goboleed walba si madax banaan u maamusho imtixaankiisa, lana sameeyo guddi madax banaan oo sameeya halbeegyada Guud.

War-murtiyeedka ayaa sidoo kale lagu shaaciyey in shahaadooyinka laga qaato lagana bixiyo maamul goboleed walba loona daabacan karo hab online ah.

Heshiiskan cusub ayaa ah mid meesha ka saarayo khilaafaad hore uga jiray dhinaca imtixaanaadka oo u dhexeeyey dowladda dhexe & qaar ka mida maamul goboleedyada.

Muqdisho (CaasimadaOnline) – Hay’adda gargaarka OCHA ee Qaramada Midoobay ayaa ka deyrisay xaaladda bani’aadanimo ee Soomaaliya, waxaana ay shaacisay in haatan Soomaaliya ay wajaheyso xaaladdii ugu xumeyd ee dhanka bani’aadanimada.

OCHA ayaa sheegtay inay yaraadeen maal-gelintii dhanka gargaarka ee Samafalka, taasina ay uga sii dartay xaaladda adag ee ay haatan wajaheyso Soomaaliya.

Sidoo kale waxa ay shaacisay in aysan bartamaha sanadkan hay’adaha samafalka dabooli Karin baahiyaha aas aasiga ah ee ku dhowaad ka labar dadka Soomaaliyeed.

“In kasta oo celcelis ahaan 1.52 milyan oo qof ay heleen gargaar cunno bil kasta laga bilaabo Maarso ilaa May, haddana heerarka hadda jira iyo kuwa la filayo ee kaalmada cuntada kuma filna in laga hortago dhibaatooyinka meelo badan ka jira,”ayay tiri OCHA.

Qaramada Midoobay ayaa sidoo kale intaasi kusii dartay in hoos u dhaca ugu weyn ee haatan la dareemayao ay tahay cunno yarida oo dhibaato ku heyso dadka Soomaalida.

Warbixinta hay’adda gargaarka OCHA ayaa sidoo kale lagu sheegay in sannadkan, dad lagu qiyaasay 5.9 milyan oo qof ay u baahan yihiin gargaar bani’aadamnimo, kuwaas oo 2.9 milyan oo qof ay ka barakaceen guryahooda, kadib duruufo adag oo soo wajahay.

Ugu dambeyn warbixinta ayaa lagu sheegay in xaaladaha bani’aadanimo ee Soomaaliya ay uga sii dareen cimilada xumaatay, abaaro, daadad iyo saameynta cudurla Covid-19.

Qeylo dhaantan ayaa ku soo aadeyso, iyadoo ay Soomaaliya haatan ku jirto marxalad kala guur ah, isla-markaana la’aadayo doorashada baarlamaanka & tan madaxweynaha.

Beledweyne (Caasimada Online) – Wasaaradda arrimaha gudaha ee HirShabelle ayaa qaaday tallaabo deg-deg ah oo wax looga qabanayo xiisada xoogan ee haatan ka taagan degmada Buulo-Burte ee gobolka Hiiraan taas oo ka dhalatay, kadib markii shaqo joojin lagu sameeyey guddoomiyihii maamulka degmadaasi, Mudane Feysal Haajir Aadan.

Warqad uu soo saaray wasiirka arrimaha gudaha HirShabelle, Maxamed Cali Caadle ayaa waxaa maamul cusub loogu magacaabay Buulo-Barte, waxaana gudddoomiye  u ah Axmed Mahad Nuur, kaas oo bedelaya guddoomiyihii shaqo joojinta lagu sameeyey.

Magacaabistan ayaa lagu sheegay inay keentay baahi loo qabo in la dardar-geliyo howlaha maamulka ee degmada, si looga gudbo caqabadaha haatan ka jira halkaasi.

Sidoo kale hay’adaha amniga iyo shacabka ayaa waxaa la faray inay si dhow u la shaqeeyaan guddoomiyaha cusub, Mudane Axmed Mahad Nuur.

Tallaabadan ayaa kusoo aadeysa, xilli xiisad horleh ay ka dhalatay shaqo joojintii uu Yuusuf Dabageed ku sameeyey guddoomiyihii Buulo-Burte Feysal Haajir Aadan oo si weyn uga horyimid go’aankaasi, waxaana ka dhashay xiisad illaa iyo hadda laga dareemayo gudaha degmadaasi, sida ay sheegayaan ilo wareedyo lagu kalsoon yahay.

Xaaladda degmada ayaa kacsan waxaana dadka deegaanka ay wajahayaan marxlad cusub iyo khilaaf dhinaca maamulka ah oo markale soo cusboonaaday..

HirShabelle ayaa waxaa kusoo noq-noqday is qab-qabsiga dhinaca maamulka, haba ugu badnaadee gobolka Hiiraan ee bartamaha Soomaaliya.

Si kastaba lama oga waxa ka dhalan karo go’aankan cusub, maadaama weli uu Buulo-Burte ku sugan yahay guddoomiyihii hore ee degmada oo kasoo horjeeda HirShabelle.

Muqdisho (Caasimada Online)- Cumar Macalin Muxumed oo ahaa Macalin Dugsi Qur’aan ayaa caawa u geeriyooday Sun ay siisay xaaskiisa, sida ay Caasimada Online u xaqiijiyeen xubno ka tirsan qoyska marxuumka.

Arrintaan ayaa ka dhacday xaafadda Xaawo-taako ee magaalada Beledweyne ee xarunta gobolka Hiiraan.

Xubno ka tirsan ehellada marxuumka ayaa noo sheegay in Macalin Cumar uu dhawaan guursaday haweeneyda Sumeysay caawa.

Sida aan xogta ku helnay gabadha ayaa Macalinka Sunta uu u geeriyooday waxay ugu dartay Raashinka.

Dadaallo caafimaad oo la sameeyey ayaan guul dareystay markii ay Suntu qabatay kadib, sidaas ayuuna ku geeriyooday caawa.

Dhacdadaan ayey aad uga argagaxeen inta badan dadka ku nool xaafada Xaawo-taako ee magaalada Beledweyne, maadaama uu ahaa Macalin Dugsi Qur’aan oo aad looga yaqaanay xaafadaas.

Berbera (Caasimada Online) – Markab u rarnaa Ganacsato reer Somaliland ah oo muddooyinkii dambe ku xirnaa dekedda Berbera ee Somaliland ayaa dib uga goostay dekedda, sida ay ogaatay Caasimada Online.

Saraakiil ka tirsan dekedda oo la hadlay Caasimada Online ayaa sheegay in Markabkaas uu dib uga goostay dekedda Berbera, ayada oo aan laga dejin shixnadii saarneyd oo ay lahaayeen ganasato reer Somaliland ah.

Sidoo kale waxay sheegen in uu jiro khilaaf kooban oo soo kala dhex-galay Ninkii wakiilka u ahaa, oo asagu degan dalka Imaaraadka Carabta iyo howl-wadeenadii Markabka.

Markabka ayaa siday shixnad lagu qisaay ku dhawaad 5 Milyan oo dollar, waxa uuna kusoo aadaya goosashadiisa xili ay maalmo kooban inaga xigaan Ciida Carafo oo alaabta badankeeda loogu talo-galay.

Ganacsatada uu u rarnaa Markabkaas ayaa illaa hadda ku mashquulsan helistiisa, mana jiro ilaa hadda war sugan oo laga helayo goobta uu u goostay Markabkaasi iyo inay jirto dekedd kale oo uu ku xirtay.