25.4 C
Mogadishu
Monday, June 30, 2025

GANACSADE maanta lagu dilay suuqa BAKAARAHA

Asad Cabdullahi Mataan
-
0
GANACSADE maanta lagu dilay suuqa BAKAARAHA

Muqdisho (Caasimada Online) – Suuqa Bakaaraha ee Magaalada Muqdisho waxaa lagu dilay nin ka ganacsan jiray Khudaarta ka soo go’da dalka.

Dilka ayaa ka dhacay suuqa Khudaarta ee Suuqa Bakaaraha qeybta Degmada Hodon. Goobjoogayaal ayaa Caasimada Online u sheegay l in labo Nin oo Baskoolado watay ay rasaas ku fureen Nin da’ ah oo magaciisa lagu soo koobay Jeeri.

Waxaa uu suuqa ku gadi jiray noocyada khudaarta sida; Bocorka, Barbarooni, Sabuulka iyo noocyada kale ee Khudaarta cagaaran.

Kooxda dilka geysatay ayaa ka baxsaday goobta dilka kaddib, waxaana markaas kaddib goobtii tagay Ciidamada dowladda Soomaaliya.

Dilalka loo geysanayo dadka ganacsatada ah ayaa ku badanaya Muqdisho, iyada oo inta badan bilihii la soo dhaafay la bartilmaameedsanayay Shaqaalaha sharikadaha Ganacsiga ee ka jira Muqdisho.

Caasimada Online
Xafiiska Muqdisho
[email protected] 

Tigrayga dalka Itoobiya oo eedeyn culus u jeediyey danjiraha USA ee Somalia

Asad Cabdullahi Mataan
-
0
Tigrayga dalka Itoobiya oo eedeyn culus u jeediyey danjiraha USA ee Somalia

Muqdisho (Caasimada Online) – Danjiraha Mareykanka ee Soomaaliya Donalt Yomomoto ayaa lagu eedeeyey inuu doorweyn ku lahaa magacaabista ra’iisul wasaaraha Ethiopia Dr Abiy Axmed, taasi oo awooddii maamulka dalkaas ka bixisay gacanta Igrayga.

Saraakiishii hore ee maamulka Tikreega ayaa ku eedeeyay dowladda Mareykanka inay iyaga ka dambeeyeen in talada dalka Ethiopia loo gacan geliyo Abiy Axmed oo Qowmiyadda Oromada kasoo jeeda.

Sarkaal howlgab ah oo ka mid ahaa Maamulkii hore ee Ethiopia una dhashay Qowmiyadda Tigreeda ayaa si cad u sheegay in Danjiraha Mareykanka ee Soomaaliya uu shaqsi ahaan ka dambeeyay magacaabista Dr Abiy Axmed.

Sebaht Nega oo ah sarkaalka howlgabka ah ayaa sheegay in Abiy Axmed uu ku yimid rabitaanka Mareykanka, islamarkaana uu ka shaqeynayo danahooda, sida uu hadalka u dhigay.

Safaaradda Mareykanka ee Adis ababa ayaa ka jawaabtay hadalkaasi waxaa Afhayeen u hadlay uu beeniyay sheegashada sarkaalka Tigreega ah, waxaana uu intaas ku daray in Mareykanka uu ilaalinayo madaxbanaanida dalalka Caalamka.

Wasiirkii hore ee Warfaafinta Ethiopia, Berekt Simoen, ayaa isaguna Madaxweynaha Eritrea Isaias Afewerki, ku eedeeyay in uu faraha kula jiro arrimaha gudaha Itoobiya,waxaana uu tusaale u soo qaatay hadal uu dhawaan jeediyay oo ay ka mid ahayd “Ciyaartii Tigreega waa dhamaatay”.

Caasimada Online
Xafiiska Muqdisho
[email protected]

Sawirro: Shacabka K/G si yaab leh uga fal-celiyay doorashada Lafta-gareen

Asad Cabdullahi Mataan
-
0
Sawirro: Shacabka K/G si yaab leh uga fal-celiyay doorashada Lafta-gareen

Baydhabo (Caasimada Online) – Shacabka deegaanada Koofur Galbeed ayaa si cajiib ah kaga jawaabay doorashadii madaxweynaha Koofur Galbeed iyo sida aysan ugu qanacsaneyn natiijada kasoo baxday doorashadii shalay.

Shacabka ayaa muujiyay sida ay u faarujinayaan magaalada Baydhabo mar haddii la doortay madaxweyne C/casiis Lafta Gareen oo aysan ku qanacsaneyn doorashadiisa, waxaana ay aheyd fal celin maad ah “Kaftan”.

Qaarkood ayaa isku soo sawiray iyagoo wata alaabadooda iskana dhigaya ineey magaalada Baydhabo ee gobolka Baay ka qaxayaan Mar hadii la doortay shaqsi Aan ku imaan rabitaankooda, sida ay matalayeen.

Shacabka ayaa taageero buuxdo u hayay musharixiinta kale oo uu kamid ahaa Mukhtaar Roobow Abuu Mansuur oo ku xiran magaalada Muqdisho.

Caasimada Online
Xafiiska Baydhabo
[email protected]

Musaveni oo soo jeediyay talo xoojineysa qorshahii madaxweyne FARMAAJO

Asad Cabdullahi Mataan
-
0

Muqdisho (Caasimada Online) – Madaxweynaha dalka Uganda Yuweri Musaveni oo dalkiisa ciidamo ay ka joogaan Soomaaliya ayaa soo jeediyay in taageerada la siiyo ciidamada AMISOM laga wareejiyo.

Isaga oo warbaahinta kula hadlayay magaalada Kampala ee dalka Uganda ayuu soo jeediyay in taageerada AMISOM loo wareejiyo dhismaha ciidamada xooga dalka Soomaaliya si ay AMISOM amaanka dalka kala wareegaan.

Madaxda Caalamka ee taageera Ciidamada iyo masuuliyiinta dowladda ayuu sheegay in looga baahan yahay inay doorweyn ka ciyaaraan tayeynta ciidamada Soomaaliya, maadaama ladoonayo inay amaanka guud ahaan AMISOM kala wareegaan.

Tayeynta hay’adaha ciidamada ayuu sheegay inay tahay halka ugu haboon ee dhaqaalo lagu bixiyo, isaga oo ku taliyay in taageerada AMISOM ee badan loo weeciyo dhismaha ciidamada xooga dalka.

Musaveni ayaa hadalkaan shaaciyay kadib kulan uu la qaatay Kaaliyaha cusub ee Xoghayaha Arrimaha Dibedda Maraykanka u qaabilsan Arrimaha Bariga Afrika, Ambassador Makila James.

Uganda waa dalka ciidamada ugu badan ay ka joogaan Soomaaliya kuwaasi oo si toos ah kaga mid ah howlgalka AMISOM ee Soomaaliya ka socdo muddo 11 sano ah.

Caasimada Online
Xafiiska Muqdisho
[email protected]

Sedex waxyaabood oo laga bartay doorashadi shalay ee madaxweynaha K/G

Asad Cabdullahi Mataan
-
0
Sedex waxyaabood oo laga bartay doorashadi shalay ee madaxweynaha K/G

Is jiijiid dheer kadib tanaasulkii Shariif, xiritaanki Roobow, banaabaxyadii Baydhaba, waxaa gebi ahaanbi lagu kale baxay doorashadi madaxtinimada ee Koonfur-galbeed taasoo muddo dhowr jeer baaqatay, si kastaba ha ahaatee, Cabdicaziz Xassan Maxamed (Lafta-gareen) ayaa  ku guuleystay madaxweynaha Koonfur-galbeed.

Haddaba aan halkan idinku soo gudbiyo seddex waxyaabood oo aan ka baran karno doorashada Koonfur-Galbeed.

1) – Ninkii xoogaa heysta bay xaajo u toostaa

Marka aad u kuurgasho qaababka ay u dhacaan doorashooyinka Soomaaliya, waxaa kuu soo baxaya in kaliya ninkii xoogaa heysta ay xaajadu u toosto, lacagtuna tahay mid wax doorata, si kale hadaan u dhaho, Xildhibaanka wax dooranaya ma ahan mid qadiyad ama hadaf guud ka leh cidda la dooranayo. Taas sababteeda miyaad aqriste I weydiin?! Xaq baad u leedahay, aan jawaabta kuu dedejiyee, Xildhibaanka wax dooranaya laftigiisa ma ahan mid si caddaalad ah lagu soo doortay si uu u kasbado kursigaasna kaash badan baa kaga baxay. Codkiisu wuxuu ugu deeqaa shaqsiga dantiisa gaarka ah fulinaya, isagoon danna ka gelin danta guud ee bulshada uu metelo, wallow ay jiraan qaar wanaagsan laakin sida ay u badanyihiin baan ka hadlay.

2) – Saameynta taageerada Dowladda

Sida muuqatay madaxweynaha la doortay ee Cabdicaziz laftagareen waxa uu taageero dhinac kasta leh ka helayay dowladda federaalka Soomaaliya. Kana garo taas dadaalkii ay dowladda ku bixisay doorashada KG. Dhabcan sida la fahmi karo dowladda ayaa u jeedkeedu ahaa inay madaxtimada Koonfur-galbeed kusoo baxo shaqsi ay isku aragti yihiin amaba ay wada shaqeyn karaan. Maadaama maamulkii hore ee Shariif ay kala aragti duwanaayeen. Waxaana muuqanaysa in taageerada dowladda ay saameyn weyn ku yeelan doonta doorashooyinka xiga cidda noqoneysa madaxda maamul goboleedyada.

3) – Dowladda waxa ka go’an inay madaxda maamulada kale meesha ka saarto

Kadib khilaaf daba-dheeraaday oo u dhaxeeyay madaxda dowladda federaalka iyo kuwa maamul goboleedyada kaasoo dib u dhigay hannaanki horay u socodka dowlada, ayaa waxaa hadda muuqanaya in xal lagu kala quustay, dowladdana xusul duub xooggan ugu jirto sir iyo saaq kastaba ha u martee sidii ay gebi ahaanba meesha uga saari laheyd madaxda maamul goboleedyada kale, iyadoo ku dadaaleysa inay keento shaqsiyaad iyada ay isku aragti yihiin.

Waxa ay hadda soo afjartay maamuladi Hirshabeelle iyo Koonfur-Galbeed iyadoo hadda u muuqata inay u tafaxeydeynaso sidii ay meesha looga saari lahaa madaxda maamulada Puntland, Jubaland iyo Galmudag oo ay kala hoggaamiyaan Gaas, Madoobe iyo Xaaf, waxeyna howsha u muuqataa faanoole weli fara kama qodna.

Dhanka kale, madaxda dowladda federaal ayaa dagaal ba’an ugu jira sidii ay markale ugu soo noqon lahaayeen hoggaanka madaxtinimo ee doorashada 2021, taasoo ku xiran inay taageero xooggan ku yeeshaan maamul gobaleedyada kale.

W/Q: Abdinasir Safaana
Email: [email protected]

Afeef: Aragtida qoraalkan waxa ay ku gaar tahay qofka ku saxiixan, kamana tarjumeyso tan Caasimada Online. Caasimada Online, waa mareeg u furan qof kasta inuu ku gudbiyo ra’yigiisa saliimka ah. Kusoo dir qoraaladaada [email protected] Mahadsanid

Netanyahu oo shaacinaya arrin culus oo la xiriirta boqortooyada Sacuudiga

Asad Cabdullahi Mataan
-
0
Netanyahu oo shaacinaya arrin culus oo la xiriirta boqortooyada Sacuudiga

Riyadh (Caasimada Online) – Ra’iisul wasaare Benjamin Netanyahu ayaa daaha gadaashiisa ka shaqeynaya isaga oo doonaya in la wanaajiyo xiriirka u dhaxeeya maamulka Yahuuda Israel iyo boqortooyada Sacuudiga.

Wararka ayaa sheegaya in ra’iisul wasaare Netanyahu hadafkiisu uu yahay in la abuuro xiriir wanaagsan oo u dhaxeeya labada dowladood ka hor doorashada 2019 ka dhacaysa Israel, waxaana howshaasi ka shaqeynaya madaxa Sirdoonka Israel Yossi Cohen.

Mr Cohen ayaa masuul ka ahaa fududeynta Booqashadii Netanyahu 26-Bishii October uu ku tagay dalka Cumaan, waxaana xiligaasi ujeedada socdaalkiisa uu ahaa inuu dhiso xiriirka kala dhaxeeya Sacuudiga.

Netanyahu ayaa garab istaagay dhaxal sugaha Sacuudiga Maxamed Bin Salmaan kadib markii uu cambaareeyn kala kulmay caalamka, isaga oo ku eedeysan inuu lahaa amarkii lagu dilay Wariye Jamaal Kashoqji oo lagu dhex dilay qunsuliyadda Sacuudiga ee Istanbul.

Warbixino laga soo xigtay diblumaasiyiin sar sare ayaa sheegay in Israel ay xiriiro kala duwan la sameysay dalal badan oo carabta ah si loo xisaabiyo ama loola socdo danaha Iran sida ka muuqata Sacuudiga.

Netanyahu ayaa intii uu ku sugnaa dalka Cumaan wuxuu sheegay iney jiri doonto booqasho uu ku tagayo dalal kale oo Muslim ah,  kuwaasi oo hadda Israel xiriir wanaagsan iyo xiriir diblumaasi uusan kala dhaxeyn.

Wasiirka arrimaha dibadda Baxreyn Sheikh Khalid Al Khalifa ayaa xiisadda kiciyay waxaana uu sheegay in wadanka Baxreyn uu noqon doono wadanka labaad ee uu booqan doono Netanyahu, wuxuuna Twitter-kiisa sidaasi kusoo qoray isla maalintii uu Netanyahu joogay dalka Cumaan.

“Inkastoo Khilaafka jiro, Mr Benjamin Netanyahu wuxuu meel muhiim ah ka joogaa muhuumadda hergelinta xasiloonida gobolka Sidoo kale Sacuudiga ayaa door ku lahaan kara arintan”ayuu yiri Al Khalifa.

Caasimada Online
Xafiiska Qaahira
[email protected]

Lacagtii ay DF ku bixisay in Lafta-gareen madaxweyne laga dhigo oo la shaaciyey

Asad Cabdullahi Mataan
-
0
Lacagtii ay DF ku bixisay in Lafta-gareen madaxweyne laga dhigo oo la shaaciyey

Muqdisho (Caasimada Online) – Dowladda federaalka ah ee Soomaaliya ayaa qarash gaaraya saddex milyan oo dollar ku bixisay sidii Cabdcasiis Lafta-gareen loogu dooran lahaa madaxweynaha Koonfur Galbeed, sida uu sheegay, wasiirkii hore ee Howlaha guud ee Xukuumadda Kheyre, Saalax Sheekh Cismaan.

Wasiirkii Howlaha Guud iyo Dib u dhiska Soomaaliya, ayaa ku tilmaamay doorashadii ka dhacday Baydhabo mid lagu shubtay, oo aan u dhicin hanaan hufan oo xor iyo xalaal ah.

Eng Saalad ayaa wax laga xumaado ku tilmaamay in iyadoo ay malaayiin shacab Soomaaliyeed ah ay ku dhibaateysan yihiin xeryaha barakaciyaasha Baydhabo ay Xukuumadd Soomaaliya ay lacag intaasi la eg ku kharasha gareyso Guusha Lafta Gareen.

Doorashadii shalay xilka Madaxweynaha maamulka Koonfur Galbeed ayaa kusoo baxay Cabdicasiia Lafta Gareen, oo ahaa Musharax ay dowladda Muqdisho kasoo dirtay, isagoo hub, ciidan iyo lacag wata ka degay Baydhabo bishii lasoo dhaafay.

Dowladda Federaalka wali kama aysan jawaabin eedeyntan.

Lafta Gareen ayaa helay codad aad u badan wareeggii kowaad, kuwaasi oo gaaraya 101, halka musharixii ugu dhawaa, Aadan Saransoor uu ku guuleystay 22 cod, iyadoo doorashada ay ahayd mid qaadatey mudo ka yar saddex saacadood.

Caasimada Online
Xafiiska Muqdisho
[email protected] 

Aqoonyahanada Somaliland iyo dagaalka twitter-ka ah ee ay kula jiraan Somalia

Asad Cabdullahi Mataan
-
0
Aqoonyahanada Somaliland iyo dagaalka twitter-ka ah ee ay kula jiraan Somalia

Hargeysa (Caasimada Online) – Inkastoo ay inta badan dadka Soomaalida ahi siyaasadda kaga faalloodaan baraha bulshada, haddana aaladda twitter-ka ayaa ah fagaare ay inta badan ku dooddaan dadka aqoonyahanka ah ee siyaasadda lafo-guraa.

Twitterka oo qoraalka la ogolyahay in lagu qoraa uu aad u koobanyahay ayaa waxa jira dad reer Somaliland ah oo si maalinle ah ugu baahiya qoraalo iyo xoggo la xidhiidha Somaliland, waxaanay qoraaladooda oo ay ku qoraan luuqadaha Ingiriisida iyo Carabiga ugu babac dhigaan dadka Soomaalida ama ajaanibka ah ee faafiya qoraalada sumcad dilka ku ah Somaliland amaba kuwa taariikh khaldan ka baahinaya qaddiyadda Somaliland.

Aqoonyahanada reer Somaliland ee sida maalinlaha ah qoraalada ku saabsan Somaliland iyo qadiyadeeda ugu baahiya twitterka waxa ka mid ah Dr. Maxamed Warsame Ducaale, Yuusuf Cabdi Gaboobe, Sarah Axmed Yuusuf, Siciid Shukri Xuseen iyo dad kale. Ka sokow qoraalada ay ugu jawaabayaan dadka Soomaalida ama ajaanibka ah ee baahiya qoraalada ku liddiga ah Somaliland, waxa ay qoraaladooda saldhig uga dhigaan hadba wixii ka soo kordha siyaasadaha dunida ee si uun saamayn ugu yeelanaya Somaliland.

Tusaale ahaan Dr. Maxamed Warsame Ducaale iyo Yuusuf Cabdi Gaboobe, waxa ay qoraaladoodii u dambeeyay ee shalay kaga hadleen go’aan ay dawladda Soomaaliya dalkeeda kaga mamnuucday hay’adda cilmi baadhista ah ee SAHAN ee uu fadhigeedu yahay dalka Kenya oo uu agaasime ka yahay Mr. Matt Bryden oo u dhashay dalka Kanada.

Mr. Matt, ayaa la aaminsanyahay inay dawladda Soomaaliya ku qaniintay faallo lagu qoray wargeyska caanka ah ee Washington post oo lagaga hadlay xadhiga Mukhaar Roobow oo uu Mr. Matt qaybo ka mid ah lagu soo xigtay hadalo uu wargeysku weydiiyay.

Dr. Maxamed Warsame Ducaale, ayaa qoraal kooban oo uu soo geliyay bartiisa twitterka, wuxuu ku sheegay in Mr. Matt Bryden iyo ururkiisa SAHAN, laga soo dhawaynayo Somaliland.

Sarah Axmed Yuusuf oo degen dalka dibadiisa, ayaa iyadu si maalinle ah qoraalo ugu baahisa sanduuqa ay ku leedahay twitterka, waxaanay qoraaladeeda oo u badan kuwo ay ku difaacayso Somaliland ku baahisaa luuqadda Ingiriisida. Sarah ayaa qoraalkeedii ugu dambeeyay ee shalay waxa ugu jawaabtay xildhibaan Fowsiya Yuusuf Xaaji Aadan oo shir ka dhacay Djibouti ku sheegtay inay Soomaaliya ku metesho Somaliland, “Marwo, shaqadaada siyaasadeed maaha mid aan ku metesho Somaliland, waxaad meteshaa naftaada, maaha Somaliland.” Ayay tidhi Sahra iyadoo u jawaabaysa xildhibaanad Fowsiya, waxaanay intaas raacisay inay dadka reer Somaliland iyagu doortaan xildhibaanadooda iyo madaxdooda siyaasadeed ee kale.

Waxa kale oo ay muwaadiniintan iyo kuwo kaleba baahiyaan qoraalo koob-kooban balse nuxur badan xambaarsan oo ay kaga hadlaan dawladda Soomaaliya iyo madaxweyne Farmaajo. Sidoo kalena siyaasadda gobalka Geeska Afrika ayay si maalinle ah u falanqeeyaan.

Qoraalada ay baahiyaan ayay waxa kale oo ay mararka qaar ugu jawaabaan saxafiyiinta Koonfurta Soomaaliya ee ka shaqeeya warbaahinta caalamiga ah amaba saxafiyiinta ajaanibka ah ee laga yaabo inay mararka qaar taariikh khaldan ama xoggo aan la hubin ka baahiya Somaliland.

Shakhsiyaadkan ayaa inkastoo aanay keli ku ahayn difaaca Somaliland iyo gudbinta wararkeeda, haddana waxay ka mid yihiin dadka ka dhex muuqda aaladda twitterka ee subax kasta soo gudbiya qoraalo kala duwan, waxaanay baahinta qoraaladooda bilaabeen markii ay dawladda Soomaaliya sida adag uga hortimid maalshashiga DP world ee dekedda Berbera.

Waxaana jirtay dhawr goor oo ay xubno ka tirsan Baarlamaanka Soomaaliya iyo saraakiisha dawladda Soomaaliya si toos ah uga jawaabaan qoraalada ay reer Somaliland ku baahiyaan barahooda twitter-ka. Dad kale oo ajaanib ah ayaa iyaguna ka jawaaba qoraalada ay baahiyaan oo ku qoran luuqadda Ingiriisida, waxaanay taasi ku tusaysaa sida loogu xidhanyahay sanaaduuqda ay aqoonyahanadani ku leeyihiin twitter-ka.

Caasimada Online
Xafiiska Hargeysa
[email protected] 

Doodda sadex xagal-ka ah ee wixii shalay ka dhacay magaalada BAYDHABO

Asad Cabdullahi Mataan
-
0
Doodda sadex xagal-ka ah ee wixii shalay ka dhacay magaalada BAYDHABO

Doorashadii ka dhacday magaalada Baydhabo ee lagu doortay Cabdicasiis Laftagareen waxa ay ahayd wixii la filayey, yeelkii qofkii meel kale u muuqatay!

Doodda ma aha qiimeynta Laftagareen iyo waxa uu ku soo kordhin karo ama u dhimi karo maamulka Koonfur Galbeed ee uu afarta sano ee soo socota hoggaamin doono, balse waxaan si qotodheer u lafaguri doonnaa dood saddex xagal ah oo ka dhalaneysa doorashadii shalay.

Doodda saddex xagal ah ayaa ku kooban doorashada 2021-ka la filayo in ay dalka ka dhacdo marka uu dhammaado muddo xilleedka maamulka hadda jira.

1.Doodda Siyaasiyiinta Mucaaradka ah

2.Xisbiyada abuurmaya iyo siyaasiyiinta mucaaradka ah ee u soo guuray Muqdisho

3.Faragalinta Nabad iyo Nolol ee doorashooyinka Maamulada

XAGASHA KOWAAD – Doodda Siyaasiyiinta Mucaaradka ka ah

Kaddib markii lagu dhawaaqay natiijadii doorashada Koonfur Galbeed durba waxa uu walaac soo galay qaar ka mid ah siyaasiyiinta mucaaradkan dowladda dhexe oo u arkay in wixii Baydhabo ka dhacay halis ku yahay rejada ay 2021-ka qabaan.

Cabdiraxmaan Cabdishakuur oo dowladda wanaag iyo xummaanba ku dhaliila ayaa boggiisa Facebook ku soo qoray saddaro dhaadheer oo uu ku muujinayo cabsidiisa, ila eegga qeybtan ka mid ah….

“Ma filaayo in Madaxweyne Farmaajo doorasho diyaar u yahay sanadka 2020 ee waa in inagoo wadajirna talo ka yeelanaa oo aanan sugin in horudhac riwaayada ee maanta Baydhabo lagu soo bandhigay aanan 2020 ka dusheena lagu dhigin.”

Siyaasiyiinta mucaaradka ah waxa ay u arkaan wixii ka dhacay Baydhabo afgambi horseedi doona in 2021-kana dalka ka dhaco oo ay ama doorashada ugu shubtaan ama u dheereystaan waqtida mamaulka hadda jira.

XAGASHA LABAAD – Xisbiyada abuurmaya iyo siyaasiyiinta mucaaradka ah ee u soo guuray Muqdisho

Si qotdheer maanka uga shaqeysii! Maxaa soo dedejiyey Xassan Shikh Maxamuud iyo dhismaha xisbiga Midowga Nabadda iyo Horumarka, maxaa Cabdiraxmaan Cabdishakuur ku soo celiyey Muqdisho oo uu durba murankii isaga iyo dowladda u dhexeeyey u bilowday, Shariif iyo Xisbigiisa Himilo Qaran???

Waxaa si fudud kuugu soo baxaya hal xigmad oo aan rabo in aan uga jawaabno sida loo odoroso Kubadda Cagta natiijadeeda!

Ka soo qaad, waxaa afar dhammaadka (Semi Final) tartanka kooxaha Yurub (UEFA Champions League) isugu soo baxay; Real Madrid, Manchester United, Schalke 04 iyo Roma. Waxaa isku aaday Manchester United iyo Real Madrid iyo Roma iyo Schalke 04!

Halkaas marka ay mareyso, fallanqeeyeyaasha Kubadda Cagta Maxay yiraahdaan? Finaalihii oo la soo hormariyey waxaa dheelaya Manchester United iyo Real Madrid!

Sheekada xagashada labaad waxaad ka fahmi kartaa in uu bilowday oo uu waliba xoogeystay ol’olaha 2021 oo lagu go’aamin doono natiijada xilligaas waxa hadda ka socda Maamulada ee uu dagaalka ugu dhaxeeyo dowladda iyo mucaaradka ka soo horjeeda.

Hadda waa looga adkaaday Hirshabeelle iyo Koonfur Galbeed balse waxaa la sugi doonaa Kismaayo iyo Garoowe!

XAGASHA SADDEXAAD – Faragalinta Nabad iyo Nolo ee doorashooyinka Maamulada

Mamaulka hadda jira ee ay hoggaamiyaan Madaxweyne Maxamed Cabdullahi Farmaajo iyo Raisul Wasaare Xassan Cali Kheyre wey ku soo talagaleen oo siyaasadooda ay ka mid tahay in ay saameeyaan doorashiiyinka Maamulada.

Ma aha arrin weecsan waayo, nidaam markaa jira haddii uusan is wadan, siyaasadana ka mideysneyn ma hana qaado – waxaa tusaale kuugu filan afartii sano ee iyaga ka horreysay!

Sida muuqata, Nabad iyo Nolol waxa ay doonayaan in ay helaan hoggaamiyeyaal ku aragti ah oo ka soo baxa Maamul Gobolleedyada ama ugu yaraan ay iyaga soo saaraan taas oo u fududeyn doonta qodobada soo socda.

  1. Abuuridda xasillooni siyaasadeed

2- Dardargalinta qorshaha amniga qaranka (National Security Architecture).

3.Higalinta doorasho qof iyo cod ah

Uma baahna in aan saddexdaas qodob mid mid u sharraxo, waayo tan hore oo la helo waxa ay ugu gogol xaari doontaa midda labaad oo Iyana sahli doonta midda saddexaad.

W/Q: Mohamed Kaafi
Email: [email protected]

Dowladda Denmark oo ku dhowaaqday go’aan 1000 Soomaali ah saameynaya

Asad Cabdullahi Mataan
-
0
Dowladda Denmark oo ku dhowaaqday go’aan 1000 Soomaali ah saameynaya

Muqdisho (Caasimada Online) – Dowladda Denmark ayaa ku dhawaaqday go’aan saameynaya kun Ruux oo Soomaali ah, waxaana dhamaantood dadkaasi lagu soo celin doonaa dalka Soomaaliya.

Denmark ayaa shaacisay in dhamaan dadkaasi ay lumiyeen sharciga deganaanshaha dalkaasi, islamarkaana lagu celin doono dalka Soomaaliya.

Inger Støjberg oo ah wasiirka socdaalka ee dalka Denmark ayaa shaacisay in dadkaasi ay baaritaan ku bilaabeen bartamihii sanadkii 2017, islamarkaana la ogaaday inay lumiyeen sharciyada dal ku jooga dalkaasi. dibna loogu celin doono Soomaaliya.

Waxay wasiirka ay sheegtay in hadda Soomaaliya ay ka jiraan meelo badan oo amaan ah, islamarkaana dadkaasi ay dib ugu laaban karaan dalkooda iyaga oo la midoobayo ehelkooda.

Dowladda Denmark ayaa sheegtay in qofkasta oo ku laabanaya dalkiisa, la siinayo taageero dhinaca safarka ah oo gaareysa $16,056 oo doollar oo ah dadka waaweyn halka Carruurta qofkiiba la siinayo $4,817 oo doollar.

Dowladda Denmark ayaa sheegtay 42 Qof oo Soomaali ah dalkooda dib loogu celiyay sanadkii 2017i, halka sanadkan 2018 ay dib u celisay 32 Qof oo Soomaali ah.

Caasimada Online
Xafiiska Muqdisho
[email protected]

Doorashada P/land: Xil-kas dadka kama dhammaado!

Asad Cabdullahi Mataan
-
0
Doorashada P/land: Xil-kas dadka kama dhammaado!

Yaa Maali Jirayeey?!…Maantay taagantahay!

Puntland, waa Alle mahaddii haddii ay ka bedbaaday shanti sano ee dowlad la’aanta ahayd! SHantii sano ee ganacsatada naxariista daran ay haysatay! SHantii sano ee dulaalayda maamulaysay!…SHantii sano ee shacabkeedu dulmanaa!… Waxaa Alle mahaddii ah in dhulkii iyo dadkii ay jiraan! Yaaaba intaas filaayay?!! Waxaad taqaan guurso waxaad taqaan ha kuu dhashaanee! Waa maanta, waa fursad, waa fursad, Allow doorashadii tan ka horeysay ma la il-duufay!…Yaa! Haddee maantana aan mar kale xil-dibaannada la soo xulay xasuusiyee waa fursad ee ha il-duufina!…Hadaad il-duuftaanna ha innoogu darina inaad dadka iyo dalka ku fiirsataan mid calooshiis u nool ah!…mid aan waxba garanayn oo u haysta in loo soo doortay in isaga loo adeego intuu dadka iyo dalka u adeegi lahaa!

Maantay taagantahay, Xil-DHibaan; waa erey bixin aan ku qeexi lahaa inay tahay qofkii uu xilka dhibayo, qofka ay mas’uuliyadda dhibayso, qofka isagoo u qadi kara qof ka liita si uu u badbaadiyo ama sida Af-Soomaligeenu yahayba waa qof xil-kas ah, marka aad dib u fiiriso dhaqankii xil-dhibaannada hadda baneeyay golaha shacabka Puntland waxaad garowsanaysaa murtidii oranaysay Xil-Kas; rag waa ku yarahay dumarna kuma jiro! Waxaa laga yaabaa ninkii oraahdaas lahaa inuu arkay rag la mid aha axil-dhibaannada Puntland ee hadda xilku ka dhammaaday, raggii iska noolaa oo hantidooda iyo hantidii dadkooda xoogaaga yar ee laaluushka ah laga siinayay, raggii inta beenta loo sheego oo la ihaaneeyo xoogaaga agoontii lahayd laga qadiyaya iyaga lagu sasabayay, xil-dhibaannadii la wada habaaray, ee aad moodaysay inaysan dad iyo dal lahayn ee ay nin keliya masaakiin u ahaayeen! Xil-dhibaannadii gaajada ka cabsanayay ee malaha is lahaa dadku haday wada dhintaan adinka keigiin aad noolaataan!…xil-dhibaannadii waxay cunaan ceeb kastaba u sameeyay!!….

Kulligeen waxaan aammiin leennahay kuwaas iyo kuwo la mid ah inaan dadkeena iyo dalkeena midna Alle xil ugu dhiibin! Murtida inteeda dambe, ama dumar inay xil-kas leeyihiin iyo in kalana waxaa jawaab ugu filan qof kasta oo innaga mid ah hooyaa soo korisay, wax soo bartay, wax uu yahayna ka dhigtay, balse waxaan shaki ku jirin 66kii xil-dhibaan ee baneeyay golaha shacabka Puntland inaysan wax xil-kasnimo muujin ama nin keliya oo iayaga ka mid ah aan marna laga dheehan! SHan sano oo dib-u-dhac ah! Xukuumadda Cabdi-Wali Max’ed Cali Gaas, sida u isagaba qiray marki uu xilka kala wareegayay Cabdi-Raxmaan SHiikh Max’ed Faroole, waxaa lagu wareejiyay maamul iyo nidaam dowladeed oo dhameys-tiran, inta badan dadka Soomaaliyeed ee in-dheer garadka ahna ay rumaysnaayeen haddii ay sii shaqayso inay guud ahaan siyaasadda Soomaaliya u horseedi lahayd horumar iyo inay Soomaaliya cagaha saarto tubtii dowladnimada.

Indhaha dad-weynaha hortooda:

Xil-DHibaannada cusub waa rajadii ummadda!

Indhaha murashaxa hortooda:

Xil-DHibaannada cusub waa r’asu maalkaygii!  

Kee baa run ah?! La arki doone!

Is-sharaxaadda madax-weyne Gaas maxaad ku macanayn lahayd?!…Ma dano xafiiska uga xiran baa qabaya ka ah mase hawlo uu ummadda u hayay?!… Xil-DHibaannada cusub ee la soo xulay, ammaannadii ay cirka iyo dhulku diideen ee bini-aadanka aqoon yarida dhabarka ugu raitay qaybtii ugu cuslayd baad dusha saarateen, qofka xilkaas oo kale qaadana waa inuu murugoodaa ee ma aha inuu farxaa, waa inuu walaacaa, waa inuu ka fekeraa awoodda ummadu ku ammaanaysatay inuusan iyada ku dulmin! Xil-DHibaannada waxaa hor yaala inay ka fekeraan murashaxiinta xilka madax-weynenimmada Puntland isu soo taagay, kuwo badan oo aan aqoon loo lahayna baa ku jira, waxaana loo bahanyahay inay kuwaas imtixaanaan oo wareysi la yeeshaan, waana in iyaga laga baqaa oo qofka murashaxu ah ka fekeraa maxay igu dhliili karaan ee ma aha in sida marar badan dhacda xilliyada wax la dooranayo lacag loogu soo dhiibo kuray u murashaxu adeer u yahay!….CEEEEEEEBBBBB!

Murashaxiinta la yaqaan; xil-dhibaanku waa inuu dib u aqriyaa waxa u ku yaqaano murashaxa dalka inuu xukumo rabo, weydiinta u horeyso oo lagu qiimayniyana waxay tahay horta Puntland oo dad ahaan iyo dal ahaan is haysata oo mid ah shanta sano ee la doortay ka dib ma loogu imaan karaa?!… weydiintaan waxaan ka soo qaatay wallaac faro badan oo arrintaas laga qabay intii uu xilka hayay madax-weyne Gaas, waana midkaas oo kale walaaca ugu weyn ee hadda laga qabao xukuumadda ay Farmaajo iyo KHeyre madaxda ka yihiin! Haddii uu yahay  nin taas lagu aamini karo, waxaa ku xiga in la hubiyo dadka iyo dalka(Qaranka), wax danbi ah  ma ka galay? SHisheeye ma u shaqeeyaa? Dano ma wadaagaan isaga ama qoyskiisa dal shisheeye ah? Ma khayaanay qaranka Soomaaliyeed ama maamulka Puntland? Ma u basaasay dal shisheeye ah?Been ma u sheegay qaranka Soomaaliyeed ama maamulka Puntland? Intii u soo shaqayniyay cahdiga iyo qawaaniinta ummadda ku heshiisay ma ku shaqayniyay oo ma ilaalinayay?  Dadka ma la tashan jiray mise…?!

Arrimahaas oo dhan waa kuwa ugu muhiimsan ee qofka wax dooranayo in wax ka ogyahay ay muhiim tahay. Dad-weynaha Puntland quus bay ahaayeen, madax-weyne ku-xigeen,  gole-shacbi, iyo waziiro uu madax-weynuhu imtixaanayo sida arday uu macallin u yahay!…Sax (maba jirin wax sax ahee) iyo khaladba isaga iska daba socda!….qiyaas, maxaa keenay baad u malaynaysaa?! Wax kale ma aha dowlad dhan oo waxay ahayd sharci daro ku heshiisay, Gablan Siyaasadeed baa ku habsaday Puntland shantaas sano! Mana qaadi karayso hal daqiiqo oo kale in loogu daro! Durba ololaha doorashada ee bilowday waxaa ka soo baxaya cabashooyin la xiriira handdadaad  lagula kacay qaar ka mid ah xubnaha cusub ee xil-dhibaannada la soo xulay.

Magaallada Boosaaso waxaa la sheegayaa in weriye ka tirsanaa Dal-Jir Radio  oo magaciisa laynoogu soo gaabiyay Tall-Man lagu xabadeeyay xilli uu ka adeeganayay suuqa magaallada, si loo cabsi geliyo, sidaas oo kale waxaa magaalada Garowe aad loo soo tuuray ciidamo gaar ah, inta badan ciidammadaan ayaa lagu sheegay inay si gaar ah uga amar qaataan Gaas iyo murashaxa ay xulufada yihiin isla markaasna ah taliyaha ciidammada PSF-ta ee Mareykanku taba baro Asad Cusmaan Cabdullaahi, iyadoo waliba ay wararka qaar ay sheegayaan Asad inuu ka yaryahay da’da qaynuun ahaan uu qofka u tartamay xilka madax-weynenimaada Puntland isku soo rashixi karo, taasoo ah inuusan qofka ka yaraan 40 sano, halka da’da Asad Cusmaan dadka yaqaana ay ku sheegeen 34 jir, dhashay sanadkii 1984kii. Waxaa iyaga sidaasoo kale ay xil-dhibaannada cusub cabasho taas la mid ah ka sheeganayaan waziirrada xukuumadda Gaas oo iyaga ka garab shaqayniya guddiga xallinta khilaafaadka doorashada Puntland. 

Si kastaba ha ahaatee, doorashadan ayaad moodaa inay ka duwantahay kuwii horay u soo mari jiray Puntland, waana Doorasho-Badbaado, oo lagu badbaadinayo maamulka ay dhisteen dadka reer Puntland, waana rajo ay dadku aad uga walaacsanyihiin sidii ay u suuro geli lahayd Badbaadadaas, waxayse mar kasta isku qancinayaan inaan dadku xil-kaskii ka dhammaan, in xil-dhibaannada cusub ay ku shaqayn doonaan dareenka iyo baahida muuqata ee ah in dalka laga badbaadiyo nidaamkii boobka iyo burcadnimmada ku dhisnaa ee ay ku midaysnayd xukuumaddii Cabdi-Wali Max’ed Cali Gaas iyo golaheedii shacabkaba!…..Soomaaliya Nin Door iyo Xil-Kas kama dhammaan, xil-dhibaannada cusubna ma mooga waxa ku dhacay reer Puntland!….

W/Q: Axmed-Yaasiin Max’ed Sooyaan

Afeef: Aragtida qoraalkan waxa ay ku gaar tahay qofka ku saxiixan, kamana tarjumeyso tan Caasimada Online. Caasimada Online, waa mareeg u furan qof kasta inuu ku gudbiyo ra’yigiisa saliimka ah. Kusoo dir qoraaladaada [email protected] Mahadsanid

Lafta Gareen oo kulamo la qaatay saraakiisha ciidanka

Asad Cabdullahi Mataan
-
0
Lafta Gareen oo kulamo la qaatay saraakiisha ciidanka

Baydhabo (Caasimada Online) – Madaxweynaha Koofur Galbeed C/Casiis xasan Maxamed Lafta Gareen ayaa durba bilaabay kulamo kala duwan oo uu la qaadanayo shacabka ku dhaqan magaalada, odayaasha iyo saraakiisha ciidamada.

Lafta Gareen, ayaa xalay kulan saacado qaatay la yeeshay saraakiisha ciidamada booliska Koofur Galbeed isaga oo kala hadlay xaqiijinta amaanka magaalada Baydhabo oo doorashada ka hor ay rabshado ka dhaceen.

Saraakiisha ciidamada booliska ayaa laga dalbaday inay xaqiijiyeen amaanka magaalada Baydhabo, waxaana madaxweynaha cusub ee Koofur Galbeed uu u balanqaaday inuu ka shaqeyn doono tayeynta ciidamada booliska.

Madaxweynaha cusub ee Koofur Galbeed ayaa ku amray ciidamada booliska inay maanta magaalada Baydhabo ku qabtaan sanad guurada ciidamada booliska oo inta badan laga xuso gobolada dalka Soomaaliya.

Sidoo kale madaxweynaha Koofur Galbeed ayaa kulamo la qaatay odayaasha iyo waxgaradka magaalada Baydhabo, isaga oo u balanqaaday inuu joogteyn doono kulamada uu kala tashanayo horumarinta Koofur Galbeed.

Lafta Gareen ayaa shalay loo doortay Madaxweynaha Koofur Galbeed Soomaaliya,waxaana lagu dhaariyay isla goobtii lagu doortay inkasta oo aan wali la caleemasaarin.

Caasimada Online
Xafiiska Baydhabo
[email protected]

Wasaaradda A/Gudaha oo guddoomiyaal degmo xil ka qaadis ku sameysay

Asad Cabdullahi Mataan
-
0
Wasaaradda A/Gudaha oo guddoomiyaal degmo xil ka qaadis ku sameysay

Jowhar (Caasimada Online) – Wasaaradda arrimaha gudaha ee Hirshabeelle ayaa xil ka qaadis ku sameysay guddoomiyaasha degmooyin ka tirsan gobolka Hiiraan oo muddooyinkii ugu dambeeyay buuq uu ka taagnaa.

Wasiirka Arrimaha Gudaha iyo dowladaha Hoose ee Dowlad Goboleedka Hirshabeelle Maxamed Cali Caadle ayaa xilkii ka qaaday guddoomiyeyaasha laba ka mid ah degmooyinka Gobolka Hiiraan oo kala ah Jalalaqsi iyo Buulobarde.

Maamulka Hirshabeelle ayaa sheegay in arintaasi lagu xalinayay khilaaf maalmihii ugu dambeeyay ka taagnaa mid kamid ah degmooyinka Gobolka Hiiraan.

Caasimada Online
Xafiiska Jowhar
[email protected]

Ciidanka booliska Somalia oo u dabaal dagaya 75 sano kadib aasaaskooda

Asad Cabdullahi Mataan
-
0
Ciidanka booliska Somalia oo u dabaal dagaya 75 sano kadib aasaaskooda

Muqdisho (Caasimada Online) – Waxaa saaka xiran waddooyin waaweyn oo ku yaala magaalada Muqdisho, iyadoo loo diidayo gaadiidka dadweynaha, balse waxaa loo ogol yahay inay dadka lugtooda adeegsadaan.

Ciidamada booliska Soomaaliyeed ayaa saaka loo xiray waddooyinka waaweyn ee magaalada Muqdisho, waxayna maanta u dabaal dagayaan sanadkii 75aad  ee kasoo wareegatay aasaaska ciidanka booliska.

Labadii maalin ee lasoo dhaafay ciidamada booliska ayaa tijaabooyin kala duwan ku sameynayay magaalada Muqdisho, waxaana qaarkood shalay loosoo xiray tababar kaga socday xarunta tababarka ciidamada ee Turkey ku leeyihiin Muqdisho.

Ciidamada booliska Soomaaliyeed ayaa lagu bilaabay 3500 oo askari oo xiligaasi tababar kala duwan ku qaatay magaalooyinka Mandheera,Beledweyne iyo Muqdisho, waxaana kadib ciidamada laga dhex xulay ciidamada kala duwan ee dalka.

La taliyaha amniga Madaxweynaha Soomaaliya ayaa dhawaan sheegay in dowladda Federaalka ah ee hadda jirta ay leedahay 5,000 oo Askar oo meletari ah, kuwaasi oo diiwaangeshan islamarkaana mushaarkooda si joogto ah u hela.

Xafladda ciidamada booliska ayaa lagu dhigayaa garoonka kubbada cagta ee Koonis ee magaalada Muqdisho, waxaana la filayaa inay ka qeyb galaan masuuliyiinta kala duwan ee dalka.

Caasimada Online
Xafiiska Muqdisho
[email protected]

Mursal oo goor-dhow shaacinaya go’aan cusub oo ku saabsan mooshinka

Asad Cabdullahi Mataan
-
0
Mursal oo goor-dhow shaacinaya go’aan cusub oo ku saabsan mooshinka

Muqdisho (Caasimada Online) – Guddoomiyaha baarlamanka Soomaaliya Maxamed Mursal Cabdiraxmaan ayaa la filayaa in goordhow uu soo saaro war cusub oo ku saabsan mooshinkii laga keenay madaxweyne Maxamed Cabdullaahi Farmajao.

Wararka ayaa sheegaya in Mursal uu shaacin doono in mooshinka madaxweynaha laga laabtay, oo khilaafkii taagnaa lagu dhameeyey wada-hadal.

Mursal ayaa la sheegay inuu shaacin doono in xildhibaanada mshinka keenay ay ka laabteen, sidaasna uu mooshinki ku buray.

Dad ku dhow guddoomiyaha baarlamanka ayaa sheegay inay jiraan heshiisyo hoose oo la isku afgartay kuwaasi oo dhamaantood salka ku haya xilal siyaasadeed, balse ma jiraan faah-faahin ku saabsan waxa ay yihiin.

Waxaa hadda socda kulamo uu Mursal la leeyahay Xildhibaanadii mooshinka ka keenay Madaxweynaha, waxaana kulanka kaddib laga soo saari doonaa war saxaafadeed ku saabsan in mooshinka uu jabay..

Naga filo faahfaahin dhowaan Insha Allah

Caasimada Online
Xafiiska Muqdisho
[email protected]

Sawirro: Muxuu yahay qorshaha 2020-2024 ee Kheyre uu maanta shaaciyey?

Asad Cabdullahi Mataan
-
0
Sawirro: Muxuu yahay qorshaha 2020-2024 ee Kheyre uu maanta shaaciyey?

Muqdisho (Caasimada Online) – Ra’iisul wasaaraha xukuumadda federaalka Soomaaliya (XFS), mudane Xasan Cali Khayre, ayaa maanta guddoomiyay shir lagu daah furayay qorshaha horumarinta qaranka ee 2020-2024 kaas oo gundhig u noqonaya horumarka la doonayo in dalku gaaro muddda shan sano gudahood ah.

Wasiirka qorshaynta, maalgashiga iyo horumarinta dhaqaalaha XFS, Jamaal Maxamed Xasan, oo ka war bixiyay kulanka ayaa sheegay in la diyaariyay hannaanka iyo qaab dhismeedka qorshaha horumarinta qaranka ee 2020-2024, lana billaabayo la tashiyo lagala samaynayo mawaadiniinta Soomaaliyeed meel waliba oo ay dunida uga suganyihiin si qorshaha loogu saleeyo rabitaankooda.

Bulshada ayaa ka talo bixinaysa sida uu qorshuhu u ekaanayo, ahmiyadda uu u leeyahay horumarinta dalka iyo muuqalka ay rabaan in dalku u ekaado si dawladda iyo hay’adaha kale ay ugu shaqeeyaan qorshaha laga sameeyo natiijada kasoo baxda xog iyo talo aruurinta bulshada Soomaaliyeed.

Qorshaha horumarinta qaranka ee maanta la daah furay oo noqonaya kii sagaalaad laga soo billaabo 1960-kii iyo sidoo kale qorshihii 2-aad tan iyo bur-burkii, ayaa bedelaya qorsha hadda jira ee 2017-2020.

Sida loola dhaqmay Galan iyo Faarax Cali Shire oo muujiyey in beeshooda laga ilaalinayo xukunka

Asad Cabdullahi Mataan
-
0
Sida loola dhaqmay Galan iyo Faarax Cali Shire oo muujiyey in beeshooda laga ilaalinayo xukunka

Yaab iyo dhabanno hays ayey noqotay in markale maanta musharax Gallan loo diiday in uu ka khudbadeeyo Barxadda Garowe oo ay taageereyaashiisu aad ugu diyaar garoobeen.

Sida uu wareysi uu bixiyey Gallan ku xaqiijiyey waxaa arrintaas ka dambeeyey Cabdiweli Gaas oo ciidamada Puntland soo dhoobay Barxadda iyaga oo xir xiray gudigii qaban qaabada soo dhaweynta Gallan halka ay xabsi iyo jirdil isugu dareen.

Ma aha dhacdo ugub ah in musharax Cali Saleebaan ah sidaas loola dhaqmo, isla ol’olahan hadda socda waxaa sidoo kale magaalada Qardho lagu bahdilay Faarax Cali Shire oo ka mid ah mushariixiinta ugu cad cad ee la loolami kara kuwa Maxamuud Saleebaan.

Ku darso, Shire Cali Faarax ayaa 2009 isna loo diiday Garowe in lagu soo dhaweeyo xilligii Faroole Madaxweynaha ka ahaa Puntland.

Hore waxaa aad loo baahiyey oo ay qoreen wargeyso badan in beesha Maxamuud Saleebaan ay shir qarsoodi ah ka yeesheen cabsida ka soo food sareysa Cali Saleebaan oo aan hore xilkan uga qaban Puntland 20-ka sano ee ay jirto.

Waxyaabaha ay shirkaas qarsoodida ah kaga hadleen ayaa lagu sheegay in Madaxweynaha uusan dhaafin Maxamuud Saleebaan lagana hortago Cali Saleebaan oo ay u arkaan caqabad.

Gaas wuu la socdaa in aan la dooran doonin si loo dhawro is afgarad-ka reer magaal (Gentleman agreement) ka dhexeeya saddex jifi ee Maxamuud Saleebaan (Cumar, Cismaan iyo Ciise).

Cismaan Maxamuud ayey sida ay u dhigan tahay tookadan ku soo aadeysaa waana sababta ay saddex meelood laba meel u leeyihiin musharixiinta.

Si taas loo ilaaliyo, waa in Gaas ku ceshaddaa ama aan la dhaafin Cismaan Maxamuud oo daga Qardho, halka lagu bah-dilay Faarax Cali Shire, tookada xigtana Ciise Maxamuud oo daga Garoowe, isla meesha kaaramada looga qaaday Gallan.

W/Q: Mahad Xuseen Guuleed
Gaalkacyo, Soomaalida

Afeef: Aragtida qoraalkan waxa ay ku gaar tahay qofka ku saxiixan, kamana tarjumeyso tan Caasimada Online. Caasimada Online, waa mareeg u furan qof kasta inuu ku gudbiyo ra’yigiisa saliimka ah. Kusoo dir qoraaladaada [email protected] Mahadsanid

Soomaali Daacish ah oo kaniisado weerari rabay oo lagu xiray Talyaaniga

Asad Cabdullahi Mataan
-
0
Soomaali Daacish ah oo kaniisado weerari rabay oo lagu xiray Talyaaniga

Roma (Caasimada Online) – Muwaaddin Soomaali ah oo da’diisa lagu sheegay 20 jir kaasoo qorsheynayey inuu weerarro argagixiso ka fuliyo kaniisado ku yaal dalka Talyaaniga ayaa lagu xiray gobolka Bari.

Qaraxa ayaa la doonayey in lagu fuliyo kaniisado iyadoo qarax weyn lala damacsanaa in lagu weeraro halka lagu magacaabo Basilica of San Pietro ee magaalada Rome iyadoo qorshuhu ahaa in maalmaha Kirishmaska la qaado weerarradaas. Caddeymo la helay oo lagu ogaaday qorshaha ninkaan ayaa keentay in si degdeg ah loo xiro Mohsin Ibrahim omar oo loo yaqaan Anas Khalil.

Xarigga 20 jirkaan Soomaaliga ah ee lagu xiray xabsi ku yaal gobolka Bari maalmihii ugu dambeeyey markii lagu helay dambiyo ah inuu aaminsan yahay afkaar argagixisannimo, abuurid fitno, ka raali-ahaansho fal argagixisinnimo iyo heysasho aalado laga sameeyo qaraxyo oo halis ah. Xaakinka maxkamadda gobolka Bari, Maria Teresa Romita ayaa soo gudbisay caddeymahaan 13kii bishan December.

Anas Khalil ayaa hay’adaha ammaanku u arkeen inuu xiriir la leeyahay kooxda Daacish ee Soomaaliya xiriirna la leeyahay mid ka mid ah hawlwadeennada kooxda. Tani waa caddeymaha kasoo baxay Digos oo ah saldhigga Boliiska ee gobolka Bari.

Caddeymaha hay’adaha ammaanku heleen waxaa lagu sheegay in ay jiraan weerar aad u xun in lagu soo beegi rabo maalmaha ciidda Kirismaska iyadoo la weerarayo kaniisado iyo meelo ay u badan yihiin dadka Kirishtaanka ah.

Baareyaasha gacanta ku haysa muwaaddinkaan Soomaaliga ah ayaa sheegay iney baaritaan ku sameeyeen taleefankiisa iyagoo helay qalab badan oo laga shakisan yahay oo uu haystay 20 jirkaan waxayna intaas ku dareen in la helay sawirro carunta Vaticanka oo uu labaatan jirkaan kasoo dejiyey Internetka.

“Waxaan rajeynaa in kii dila Kirishtaanka, Cadowha Ilaahey inuu yahay walaalkeen, meeshii uu ka yimaadaba haddiiba uu dilayo Kirishtaan waa walaalkeen” 20 jirkaan ayaa hadalladaas yiri markii weerar ka dhacay Strasbourg Decembertii tagtay  11keeda. Sida ay sheegaan baareyaasha ka hortaga argagixisada ee gobolka Bari.

Subaxnimadii sabtida iyadoo uu la socdo qof difaacaya iyo turjubaan ayaa ninkan la tuhunsan yahay su’aalo lagu weydiiyey xabsiga ka horbaaritaanka xaakinka. Wuxuu ka jawaabayey su’aalaha illaa laba saacadood iyadoo xaakinka gobolka Bari ee isku-duwaha ka ah baaritaannada  Giuseppe Maralfa, uu sii xoojiyey aadeymaha la xiriira argagixisada.

Caasimada Online
Xafiiska Roma
[email protected]

Diyaraadaha 5 dal oo kale oo doonaya in duulimaad toos ah ay ku tagaan Xamar

Asad Cabdullahi Mataan
-
0
Diyaraadaha 5 dal oo kale oo doonaya in duulimaad toos ah ay ku tagaan Xamar

Muqdisho (Caasimada Online) – Diyaaradaha shan ka mid ah dalalka caalamka, ayaa daneynaya inay duulimaadyo toos ah ka billaabaan magaalada Muqdisho ee caasimadda Soomaaliya, sida uu sheegay agaasimaha howl-gallada iyo xiriirka caalamiga ee garoonka Aadan Cadde, Saciid Celiye.

Saciid ayaa sheegay in ammaanka duulimaadyada iyo midka guud ee Soomaaliya ay ku dhiir-geliyeen diyaaradaha caalamiga ah inay duulimaadyo toos ah ka billaabaan Muqdisho.

Waxa uu sheegay in  Qatar Airways iyo diyaarado ganacsi oo laga leeyahay dalalka Masar, Sacuudiga, Imaaraadka, iyo Uganada ay muujiyeen inay danaynayaan inay duulimaad toos ah ka billaabaan Muqdisho.

Garoonka Aadan Cadde ee Muqdisho, ayaa waxaa iminka duulimaad toos ah ku taga Turkish Airlines, Ethiopian Airlines iyo Kenya Airways.

Saciid ayaa arrintan shaaciyey kadib markii Kenya Airways ay shalay billowday duulimaad toos ah oo u dhaxeeya Nairobi iyo Muqdisho. Kenya Airways waa diyaaraddii saddexaad oo caalami ah oo Muqdisho duulimaad ku tagta, kadib Turkish Airlines iyo Ethiopian Airlines.

Caasimada Online
Xafiiska Muqdisho
[email protected]

Amarkii DF Soomaaliya oo hir-galay iyo IOM waqtigii loo qabtay uga soo baxday

Asad Cabdullahi Mataan
-
0
Amarkii DF Soomaaliya oo hir-galay iyo IOM waqtigii loo qabtay uga soo baxday

Muqdisho (Caasimada Online) – Hay’adda socdaalka u qaabilsan Qaramada Midoobey ee loo soo gaabiyo IOM ayaa maanta xafiiskeeda u soo wareejisay magaalada Muqdisho, kana soo wareegtay Nairobi.

Wasiirka qorsheynta iyo xiriirka Caalamiga ah Jamaal Maxamed Xasan oo ka qeybgalay munaasibadda lagu furyay xafiiska IOM ee Muqdisho ayaa bogaadiyay go’aanka hay’adda ay xafiiskeeda ugu soo wareejisay magaalada Muqdisho.

Wasiir Jamaal Maxamed, ayaa dhamaan hay’adaha aan dowliga ahayn ee ka howlgala Soomaaliya ugu baaqay in ay raacaan IOM islamarkaana xafiisyadooda ka furtaan Muqdisho.

Wasiirku waxaa uu sheegay in Hay’addii xafiiskeeda Muqdisho u soo wareejin weysay waxii ka horreeya 31-ka Bishan December ay Dowladda Federaalka ah kala laabaneyso ruqsadda ay uga shaqeyso Soomaaliya.

Dhowr bilood ka hor ayuu Wasiir Jamaal hay’adaha aan dowliga ahayn ee ka howlgala Soomaaliya ku wargeliyay in ay xafiisyadooda Nairobi u soo wareejiyaan Muqdisho.

Burburkii kaddib hay’adaha ka howlgala Soomaaliya ee aan dowliga ahayn ayaa waxaa ay ku shaqeynayeen Xafiisyo ay ku leeyihiin caasimadda Kenya ee Nairobi.

Caasimada Online
Xafiiska Muqdisho
[email protected]

1...1,9271,9281,929...3,530Page 1,928 of 3,530

Caasimada Online is a reputable and reliable source of news and information on Somalia. As the largest Somali news site, we are dedicated to providing our readers with accurate and up-to-date coverage of the country's politics, society, and culture. Founded in 2009 by a Somali-American journalist, Caasimada Online is owned by Caasimada Media Group and headquartered in Mogadishu. In addition to keeping our readers informed, we strive to promote democracy in Somalia. If you have any questions or comments, please don't hesitate to contact us at [email protected]

Important Links

Trending

Social Media

© Caasimada Online 2012 | All Rights Reserved