Muqdisho (Caasimada Online) – Urur goboleedka IGAD ayaa shaaciyey in xilkii uu Ururkaas ka haayey ay ka qaadeen Janeraal Gabre oo u qaabilsnaa Soomaliya dhanka la talinta Siyaasada, waxaana durba soo dhaweeyey Xildhibaano ka tirsan Baarlamaanka Soomaaliya.

Xildhibaan Zakariye Xaaji Maxamuud oo ka mid ah Golaha Shacabka ayaa waa uu sheegay in Go’aanka xilka qaadista ah ee Gabre lala soodahay, isla markaana mar hore loo baahnaa.

Waxa uu sheegay in Gabre uu ahaa Nin dhibateeyey dad Soomaaliyeed, isaga oo xiriir la lahaa Siyaasiyiin iyo qaar ka mid ah madaxda Maamul Goboleedyada.

“Runtii mar hore ayay aheyd in la eryo, anaga 8-dii bishii Febraayo ayaan erinay, laakin dad uu u taliyo ayuu heystay isaga oo madaxweyne isku hesytay, wuxuu xukumayey laga soo billaabo :owya-cade, marka IGAD wey la daahday, laakin waxaan kuu sheegayaa in aan loo dhaafi doonin wixii dil iyo hanti bur burin ka dhacay Soomaaliya” ayuu yiri xildhibaan Zakariye.

Isaga oo sii hadlayay ayuu sheegay xildhibaan Zakariye in dhibaatadaas uu shacabka Soomaaliyeed u geystay Janeraal Gabre in ay noqon doonto mid aan looga hari doonin,isla markaana uu rajeynayo in la soo taago Maxkamada Caalami ah, waxa uuna sheegay in uu sabab u ahaa in Boqolaal Ruux lagu dilo dalka,dad badana uu barakaciyo.

Xildhibaan Zakariye Xaaji Maxamuud Cabdi oo ka mid ah xildhibaanada Golaha Shacabka ayaa ka mid ah Siyaasiyiinta aadka u neceb dowladda Itoobiya, waxana la xasuustaa in xilligii doorashada Madaxweynaha ee uu ku soo baxay Madaxweyne Farmaajo uu si dadban u sheegay in ay goobta fadhiyaan madax aan dooneyn Nabada Soomaaliya.

Hoos ka dhageyso wareysiga Xildhibaan Zakariye Xaaji Maxamuud Cabdi 

Caasimada Online
Xafiiska Muqdisho
[email protected] 

Muqdisho (Caasimada Online) – Sida ay qoreen wargeysyada kasoo baxa dalka Jarmalka, ciidamada Booliska dalkaasi ayaa maalinimadii shalay gacanta ku dhigay mid kamid ah Ilaalada khaaska ee Usaama Bin Laadin.

Wargeysyada ayaa qoray in eedeysanaha la qabtay uu ahaa mid si gaara uu u daneyn jiray Usaama, kaa oo xiliga la qabanaayay ku sugna magaalladda bojum ee waqooyi Galbeed ee Jarmalka.

Eedeysanaha la qabtay ee la soo shaqeeyey Hoggaamiyihii geeriyooday ee Alqaacida, Usaama Bin Laadin ayaa magaciisa lagu sheegay Saami A. waxa uuna toboneeyo jeer kasoo qeybqatay dagaalo argagixiso oo siyaabo kala duwan uga kala dhacay caalamka.

Booliska waxa ay sheegen in xiliga ay qabanayeen Saami A. aysan kala kulmin wax iska caabin ah, hase ahaatee uu si sahlan ku aqbalay inuu isku soo dhiibo.

Saami A. ayaa lagu daba jiray muddo kabadan sanad, waxaana iminka suurowday in si sahlan uu ku galo gacanta Booliska.

Wasiirka Arrimaha Gudaha ee dalka Jarmalka Horst Seehofer waxa uu ku amray Madaxda Socdaalka inay dedejiyaan sidii Eedeysanahaasi loo masaafurin lahaa.

Waxa uu Wasiirku sheegay in Saami A. uu yahay mid weli leh halistiisa, sidaa aawgeed la doonaayo in lasoo afjaro joogitaankiisa Jarmalka.

Docda kale, Eedeysane Saami A. oo u dhashay dalka Tunisia, ayuu Wasiirka Arrimaha Gudaha ee dalka Jarmalka Horst Seehofer amar ku bixiyay in lagu wareejiyo dalkiisa.

Caasimada Online
Xafiiska Muqdisho
[email protected]

Addis-Ababa (Caasimada Online) – Ra’isul wasaaraha Ethiopia Abiy Ahmed ayaa ka badbaaay Qarax la doonaayay in lagu khaarijiyo xili uu khudbad u jeedinaayay kumanaan shacab Ethiopian ah.

Ra’isul wasaare Abiy Axmed oo saacado kadib Qaraxa magacaabay guddi baaritaan ayaa sheegay in dowladiisu ay aqbali doonto natiijada kasoo baxda baaritaanka.

Natiijo hordhac ah oo kasoo baxday baaritaan qaatay muddo laba cisho ayaa sheegaya in baaritaanka lagu ogaaday cida ka danbeysay Qaraxa lagu khaarijin lahaa Abiy Axmed.

Guddiga baaritaabka oo ka koobna ilaa 12 Khubaro ku xeeldheer arimahaasi ayaa Ra’isul wasaare Abiy Axmed u gudbiyay in Qaraxaasi aysan ku lug laheyn Kooxo argagixiso.

Guddiga ayaa warbixintooda ku sheegay in Qaraxa uu yahay mid looga soo horgeedo Siyaasada cusub oo ay qaadatay Ethiopia, taa oo lagu muujinaayo furfurnaanshi Siyaasadeed.

Guddigu waxa ay baaritaanka ku ogaaden in Qaraxa ay geysteen Xubno ka tirsan Mucaaradka Ethiopia kana soo jeeda Qowmiyada Tigree.

Guddigu waxa uu qoraalkiisa hordhaca ah intaa ku daray in Qaraxa loo hayo ilaa iyo afar xubnood oo ka tirsan garabka mucaaradka dowlada ee kasoo jeeda Qowmiyada Tigree.

Qowmiyada Tigree oo uu ka dhashay Milazanaawi ayaa aad uga soo horjeeda Siyaasada Ra’isul wasaare Abiy uu ku doonaayo in wadahadal lagula galo Dowlada Eriterea.

Tigree, waxa ay sidoo kale doonayaan in talada dalka laga saaro gacantooda waxa ayna rumeysan yihiin in Heshiiska lala galaayo Etiterea uu dhabar jab ku noqon karo Ethiopia, waana tan keentay inay qalqal amni galiyaan nolosha Ra’isul wasaare Abiy Axmed.

Sidoo kale, Kiiska Qaraxa oo u muuqda mid sii fogaaday ayaa waxaa iminka ka qeybqaadanaaya Khubaro ka socta FBI-da Mareykanka sababo la xiriira in Qowmiyada Tigree aysan baaritaanka Dowlada u fahmin mid lagu faquuqayo.

Dhinaca kale, Ra’isul wasaare Abiy Axmed ayaa iminka rumeysan in Qaraxa la doonaayay in lagu khaarijiyo aysan ku lug laheyn Ururo argagixiso balse uu yahay mid ay ku lug leeyiniin mucaaradka Tigree.

Caasimada Online
Xafiiska Addis-Ababa
[email protected]

Muqdisho (Caasimada Online) – Waxaa inta badan magaalada Muqdisho ee caasimada Somalia ku yaalla xarumaha ugu badan dowlad Federaalka kuwaa oo ay u shaqo tagaan Kumanaan shaqaale.

Xarumaha qaar ayaan ku shaqeyn amarada Wasaarada shaqada iyo Shaqaalaha, iyadoo ay  xusid mudan tahay in xarun waliba ay u shaqeyso iskeeda.

Amarka Wasaarada shaqada iyo shaqaalaha ayaan ka dhaqan galin dhammaan xarumaha dowlada markii laga reebo dhowr xarun oo aan sidaa usii badneyn.

Amarada ugu badan ee aan dhaqan galin ayaa ah sida ‘’xiliga fasaxa 26 June’’ oo ah maalin muqadas ah.

Shaqaalaha qaar ayaa saaka u shaqo tagay xarumahooda xili ay Wasaarada shaqada iyo shaqaalaha ku dhawaaqday inay fasaxan yihiin dhammaan shaqaalaha dowlada.

Inta bada amarka dowlada federaalka Somalia ayaan si buuxda uga dhex shaqeyn Xarumaha dowlada taa oo muujineysa inaanu jirin xarun dhexe oo laga bixiyo amarada maadaama wax kama jiraan laga dhigay tan Wasaarada shaqada iyo shaqaalaha.

Sidoo kale, Madaxda qaar ee ka tirsan dowlada ayaa xiliyada fasaxa sida 26 June shaqaalaha ku cadaadiya inay usoo shaqo tagaan Xafiisyadooda.

Sida caadaduba aheyd shaqaalaha dowlada qaarkood ayaa saaka oo ku began 26 June u shaqo tagay xarumahooda iyadoo aan khiimo gaara lasiin maalinta qiimaha leh ee 26 June.

Si kastaba ha ahaatee, dowlada Somalia ayaan looga fadhiyaa inay dhaqan galiso amaradeeda si aan meesha uga muuqan dowlado kala duwan oo ka shaqeeya Muqdisho.

Caasimada Online

Xafiiska Muqdisho

[email protected]

Nairobi (Caasimada Online) – Fariida Karoney oo ah wasiirka arrimaha dhulka ee Kenya, ayaa sheegtay in la hakiyey hawlihii sahminta iyo dhismaha derbiga laga waday xuduudka Somalia, kadib, markii la waayey kharajkii lagu socodsiin lahaa.

Waxay tilmaamtay in la dhisay 24 km oo ka mid ah 150 km ee uu ka koobnaan doono dhismaha derbigaasi, iyadoo sahminta iyo khariidaynta mashruucaasi la bilaabay sannadkii 2016-kii.

Dowladda Kenya waxay u qoondeysay in ka badan 5.6 billion oo dollar, si loogu calaamadeeyo, looguna dhiso xuduudaha caalamiga ee ay Kenya la leedahay Somalia iyo dalalka kale ee deriska.

Hadalka ka soo baxay dowladda Kenya waxa uu ku soo beegmay heshiiskii madaxweynayaasha Somalia iyo Kenya ay dabayaaqadii bishii Maarso ee sannadkan ku gaareen in gebbi ahaan la joojiyey dhismaha derbiga laga dhisayo xuduudka labada waddan, kaasi oo xiisad diplomaasiyadeed iyo mid amni-xumi ka dhex abuuri karta labada waddan, gaar ahaan deegaanadda ku teedsan xuduudka.

Caasimada Online
Xafiiska Nairobi
[email protected]

Muqdisho (Caasimada Online) – Iyadoo dhawaan ay Wasaarada Maaliyada Xukuumada Somalia ay shaacisay in dalka loo sameynaayo lacago cusub, ayaa waxaa arrintaasi mar kale ka hadlay Guddoomiyaha Bankiga dhexe ee DFS Bashiir Ciise Cali.

Guddoomiyaha Bankiga dhexe ayaa tilmaamay inay wanaagsan tahay isticmaalka lacagta cusub balse waxa uu sheegay inay jirto caqabad ah sare u kac  ku yimid qiimaha sarifka Shilin Soomaaliga.

Guddoomiyaha Bankiga dhexe waxa uu sheegay in Sarifleyda ay caqabad ku yihiin lacagaha cusub ee imaan doona waxa uuna Hay’adaha amaanka faray in tallaabo sharci ah laga qaado shaqsiyadka abuuraya sicir barar.

‘’Waxaan Hay’adaha amniga farayaa inay talaabo sharciga waafaqsan ka qaadan shaqsiyaadka caqabada ku ah sharciga ee abuuraya sicir bararka’’

‘’Waxa ay amar u qabaan inay la tiigsadaan sharciga Bankiga Dhexe ayaa ka jawaabi doona cidii is hortaag ku sameysaa waayo dhibka ay dadka ceynkaasi ah ku hayaan dalka inaga ayaa og’’

Guddoomiyaha Bankiga dhexe ee DFS Bashiir Ciise Cali, waxa uu sheegay in sicir kororka ku yimid Shilin Soomaaliga ay ka dambeeyan shaqsiyaad dambiilayaal ah oo qalqal gelinaaya nolosha bulshada Soomaaliyeed, isla markaana ay muhiim tahay in laga qaado talaabo sharciga waafaqsan ciddi ka shaqeysa sare u kac ku yimaada lacagta shilin Soomaaliga ah.

Guddoomiyaha Bankiga dhexe ee DFS Bashiir Ciise Cali, wuxuu markale ku wargeliyay bulshada Soomaaliyeed in loo bedeli doono lacagahooda marka dalka laga dhaqangeliyo lacagaha cusub ee la qorsheeynayo in la soo daabaco, sida uu hadalka u dhigay.

Dhinaca kale, Guddoomiyaha ayaa cadeeyay in lacagaha cusub aan lasoo daabici doonin muddo hadda dhow, balse inta aan lasoo daabicin ay usii gogol xaari doonaan hanaanka lagu dhaqan galin laha lacagta cusub.

Caasimada Online

Xafiiska Muqdisho

[email protected]

Muqdisho (Caasimada Online)-Tan iyo markii uu kusoo baxay Doorashada Madaxweyne Rajab Dayib Erdogan warbaahinta caalamka ayaa baahineysa sawirro muujinaaya Erdogan oo cayaaraya banooni.

Warbaahinta ayaa sheegeysa in Erdogan uu ahaa cayaaryahan ka hor inta uusan kusoo biirin Siyaasada, isagoo u cayaari jiray ciyaartooy ka tirsan Naadiga K/cagta ee Kasımpaşa Spor Kulübü oo la asaasay sannadkii 1921-kii, kana mid ahayd Kooxaha Heerka Koowaad ee Turkiga.

Kooxdan uu u cayaari jiray Erdogan ayaa ka dhisneyd Xaafadda Beyoğlu ee magaalladda labaad ee ugu weyn dalkaasi ee Istanbuul.

Waxa ay warbaahintu Erdogan ku sifeysay inuu ahaa cayaaryahan caan ka ahaa dalka Turkiga, balse uu markii danbe kusoo biiray Siyaasada.

Inta uusan kusoo biirin Siyaasada waxa uu Erdogan ahaa Xiddig khadka dhexe ka ciyaara, isla markaana shacbiyadda ku dhex lahaa Taageerayaasha K/Cagta ee dalka Turkiga.

Kampala (Caasimadda Online) – Iyadoo dowladda Farmaajo uu hoggaamiyo ay wado dadaal dheer oo ku aadan sidii Ciidamada AMISOM looga maarmi lahaa isla markaasna loogu badali lahaa Ciidamo Soomaaliyeed ayaa waxaa dhanka kale socdo qorsho ay wadaan dowladaha ay ciidamadooda joogaan Soomaaliya, kuwaas oo raadinayo hab kasta oo ay kusii joogi karaan.

Madaxda qorshahaas wado waxaa ugu horeeyo kuwa dowladda Uganda oo ah wadanka ugu badan oo ay ciidamo ka joogaan Somaaliya.

Ra’isulwasaaraha dalka Uganda Ruhakana Rugunda oo kulanka la qaatay Gudoomiyaha Xisbiga Talada haya ee wadanka Shiinaha, waxayna labada Mas’uul ka wada hadleyn arrimo badan oo ay ugu muhiimsaneyd tan Soomaaliya.

Ra’isulwasaaraha Uganda ayaa waxaa uu weydiistay Gudoomiye Wang Yang inay ka taageerto dowladiisa sidii ay baaqi ugu sii ahaan lahaayeen Soomaaliya, maadaama dalka Shiinaha uu kamid yahay wadamada taageera xukuumadda Soomaaliya.

Gudoomiye Wang Yang ayaa u ballan qaaday Ra’isulwasaaraha dalka Uganda inuu ka caawin doono arrintaas isla markaasna ay iska kaashaan doonaan waxyaabo badan.

“Maadaama aan kamid nahay dalalka ciidamada ku tabarucay howlgalka Nabad illaalinta Soomaaliya, waxaan ka dooneynaa in Shiinuhu nagu garab siiyo sidii Golaha Amaanka Qaramada Midoobay noogu sameyn lahaa Muddo kordhin,” ayuu  yiri Rugunda.

Talaabadaan ay qaadeyso dowladda Uganda ayaa imaaneyso iyadoo  Dhawaan ahayd markii Golaha Amaanka ee Qaramada Midoobay uu isku raacay in ciidamada Soomaaliya iyo dowladooda loo ogolaado inay masuuliyadda amaanka dalkooda dib loogu noqodo, taasoo saraakiisha AMISOM walaac ay ka muujiyeen, maadaama ay Soomaaliya ka heleen lacag aad u badan.

Dowladda Uganda ayaa waxaa howlgalka AMISOM ku wehliyo wadamada Djibouti, Burundi iyo Ethiopia waxaana muuqato inuusan howgalkaan kusoo dhamaan doonin waqtiga loo qabtay taasoo niyad jab ku noqon doonto ciidamada Soomaalida oo lahaa hami ah inay la wareegi karaan amniga Soomaaliya inkastoo aysan dhisneyn ciidamo awood leh.

Madaxweyne Farmaajo ayaa dhawr jeer ku celceliyey in laga maarmi doono AMISOM isla markaasna la dhisi doono ciidamo Soomaaliyeed oo booskaas buuxiyo balse weli arrintaas jidkeeda lama hayo oo waxaa socdo qorshooyin ay wadaan dowladaha ciidamadooda ay joogaan Soomaaliya kuwaas oo aan marnaba ku qanacsaneyn inuu soo dhamaado howgalkaas mashruuc ah.

Caasimada Online
Xafiiska Muqdisho
[email protected]

Muqdisho (Caasimada Online) –Urur goboleedka IGAD ayaa shaqada ka eryey kornayl Gabrezabher Alemsged oo Soomaalidu u taqaanno Jeneraal Gabre.

Warqad ka soo baxday xafiiska xoghayaha fulinta ee IGAD, Eng Maxbuub Macallim ayaa si rasmi ah maanta looga joojiyey jeneraal Gabre shaqadiisii ahayd la-taliyaha sare ee arrimaha siyaasadda ee xoghayaha fulinta ee urur-goboleedka IGAD.

Warqaddaas waxaa BBC soo gaarsiiyey xubno ka tirsan IGAD oo dalbaday in aan magacooda la soo xigan.

Qoraalka shaqo ka joojinta oo isla maanta dhaqan galay ayaa looga dalbaday jeneraal Gabre inuu wareejiyo wixii qalab xafiiseed ah ee IGAD ay leedahay ee uu hayo ka hor 02:30 duhurnimo.

Isla qoraalka ayaa looga dalbaday qaybta maamulka iyo maaliyadda ee IGAD inay fududeeyaan xil ka wareejinta, iyo inay shaqaale u xil saaraan sidii looga qaadi lahaa jeneraal gabre dukumentiga lagu safro ee IGAD, haddiiba hore loo siiyey.

Siiqada ay u qornayd warqadda xil-ka-qaadista ee jeneraal Gabre ayaa ahayd mid aad u adag oo aan inta badan la adeegsan marka la eryayo mas’uul sare.

Inkastoo aysan caddayn sababta shaqada looga eryey jeneraal Gabre, misna dadka wax indha-indheeya waxay u tirinayaan qodobbada soo socda inay ka dambeeyaan in xilka laga qaado.

1- Jeneral Gabre wuxuu ku maqnaa markii xilka laga qaadayey dalka South Sudan oo hawlo shaqo uu u aaday, hase yeeshee isagoo shaqadaas rasmiga ah haya ayuu misna, sida ay BBC-da u xaqiijijyeen ilo kala duwan, wuxuu faraha kula jiray arrimaha Soomaaliya isagoo faragelin ku hayey.

2- Xil ka qaadistiisa waxay ku soo beegantay iyadoo waddanka Itoobiya ay ka socoto dabayl siyaasadeed oo isbeddello wadata, waxaana loo badinayaa in raalli ahaanshaha Itoobiya ee ah in xilka laga qaado uusan meesha ka marnayn. Waxaa tan wehliya cadaadis ay DF Somalia ku saartay Abiy Ahmed in xilka laga qadao Gabre

Jeneraal Gabre wuxuu dhowrkii iyo tobankii sano ee u dambeeyey si toos ah iyo si dadbanba ugu lug lahaa arrimaha Soomaaliya, isagoo waddankiisa Itoobiyana ka ahaa mid ka mid ah saraakiisha milateriga ee saamaynta weyn leh marka la soo qaado arrimaha Soomaaliya.

Gabre wuxuu saaxiibo badan ku dhex leeyahay siyaasiyiinta iyo saraakiisha ciidamada ee Soomaalida.

Sannadkii hore, bishii Juun ayey ahayd markii loo magacaabay xilkan ah la taliyaha arrimaha siyaasadda ee xoghayaha fulinta ee IGAD, oo ah xil siyaasadeed.

Ka sokow IGAD, Gabre ayaa ahaa sarkaal sare oo ka tirsan sirdoonka Ethiopia, wuxuuna xiriir dhow la lahaa maamul goboleedyada Soomaaliya iyo saraakiil ka tirsan milatariga Soomaaliya.

Wuxuu aad ugu dhowaa Axmed Madoobe oo bil walba uu lacag ka qaadan jiray iyo kooxda Damu-Jadiid ee hogaanka dalka lagala wareegay, gaar ahaan Faarax Cabdulqaadir.

Ceyrinta Gabre, oo ah nin ay aad u neceb yihiin Soomaalida, ayaa noqon doonta mid ka mid ah guulaha ugu weyn ee lagu xasuusan doono dowladda hadda jirta, oo ka dagaalameysa in dalal shisheeye ay faro-gelin ku sameeyaan arrimaha gudaha dalka.

Caasimada Online
Xafiiska Muqdisho
[email protected] 

Muqdisho (Caasimada Online) – Xildhibaanada ka tirsan Golaha Shacabka iyo Aqalka Sare ee ka soo jeeda maamulka Somaliland ayaa ka digay cawaaqib xumada ka dhalan karta hadii dowladda federaalka Soomaaliya ay hakiso deeqaha gargaarka ee Beesha Caalamka ay sida gaarka ah u siiso Somaliland.

Senator Nuuro Faarax Jimcaale oo ka mid ah Baarlamaanka Aqalka Sare ayaa Idaacadda Risaala ee magaalada Muqdisho u sheegtay in wax laga xumaado ay tahay in maamul goboleedyada iyo dowladda dhexe ay isku raacaan in la jaro deeqaha la siiyo Somaliland.

“In maamul goboleedyada ay yiraahdaan Somaliland waa in laga joojiyaa wax allaale wixii caawimaad ah ee la siinayay taasi waxay keeneysaa cawaaqib xumo oo horseedi kara in Soomaaliya ay kala tagto, waxaan aaminsanahay in taasi ay tahay in la sii fogeynayo arrinta Somaliland, waxaan maamulada ugu baaqeynaa in arrimaha Somaliland ay faraha kala baxaan.” Ayay tiri xildhibaan Nuuro.

Xubnahanan ka kala tirsan Golaha Shacabka iyo Aqalka Sare ayaa waxa ay sheegeen in ay wadaan qorshe ay xukuumadda Soomaaliya wax kaga weydiinayaan arrintan, sida ay inoo sheegtay Senator Nuuro Cali Faarax.

Qoraal ay shalay si wadajir ah u soo saareen Golaha iskaashiga Dowlad goboleedyada ayaa waxa ay ku taageereen go’aankii dowladda Soomaaliya ay ku hakisay deeqihii la siin jiray Somaliland.

Caasimada Online
Xafiiska Muqdisho
[email protected] 

Hargeysa (Caasimada Online) – Siyaasiga Faysal Cali Waraabe oo wareysi gaar ah siiyay idaacadda Goobjoog ee ku taalla magaalada Muqdisho, ayaa ka hadlay go’aanka dowladda federaalka ah ee la xiriira qoondada Somaliland.

Feysal ayaa sheegay in aanay wax saameyn ah ku yeelan doonin hadalkii kasoo baxay dowladda federaalka iyo maamul goboleedyada ee ah in Somaliland aan si gaar ah loogala macaamilin deeqaha beesha caalamka.

Waxa uu sheegay Faysal in dowladda federaalka iyo dowlad goboleedyada aanay iyagaba dalka maamulin, sidaasi darteedna aanay waxbo ka celinkarin.

Beesha caalamka ayuu sheegay inuu kala dhaxeeyo xiriir aad u wanaagsan, islamarkaana aanu ku go’i karin hadalka DFS iyo maamul goboleedyada.

Halkaan hoose ka dhageyso

Caasimada Online
Xafiiska Hargeysa
[email protected] 

Muqdisho (Caasimada Online) – Warar lagu kalsoon yahay ayaa sheegaya in Agaasimihii hore ee hay’adda nabad-sugidda Somalia, Cabdullaahi Maxamed Cali Sanbaloolshe uu ku biiray garabka mucaaradka dowlada ee sida dhow ula shaqeeya dowlada Imaaraadka carabta.

Wararku waxa ay sheegayaan in Sanbaloolshe ay kulamo kala duwan magaalada Nairobi ee xarunta dalka Kenya ku qaaten Ra’isul wasaarihii hore ee Somalia Cumar C/rashiid iyo Diplumaasiyiin ka tirsan Wasaarada arrimaha Dibadda dalka Imaaraadka kaa oo ka dhacay Safaarada dalkaasi ay ku leedahay Kenya.

Kulamada waxaa qeyb ka ahaa Xildhibaano iyo Siyaasiyiin uu kamid ahaa C/raxmaan Cabdishakuur kuwaa oo taabacsan garabka Cumar C/rashiid ee aadka uga soo horjeeda dhismaha dowladnimo ee Somalia.

Xogtu waxa ay tibaaxeysaa in Cumar C/rashiid uu Sanbaloolshe usoo bandhigay inuu ku biiro garabka uu isaga hogaaminaayo si loo helo isbedel dhanka Siyaasada ah, waxa uuna sidoo kale u cadeeyay inay wada shaqeyn la sameyn doonaan Imaaraadka.

Cumar C/rashiid iyo Dowlada Imaaraadka ayaa isla wada qorsho lagu kordhinaayo cadadka mucaaradka kasoo horjeeda dowlada Somalia.

Cumar C/rashiid waxa uu Sanbaloolshe u sheegay in Somalia ay u baahan tahay isbedel ku xiran iskaashi si buu yiri meesha looga saaro maamulka iminka jira, hase yeeshee waxaa la xaqiijiyay in tashkiilin maalmo qaadatay kadib uu Sanbaloolshe aqbalay.

Cumar C/rashiid ayaa la xaqiijiyay inuu dhigay bohosha uu ku dhacay Sanbaloolshe oo ay isku dhacsan yihiin madaxda ugu sareysa Dowlada Somalia.

Sanbaloolshe, ayaa xoojin doona garabka mucaaradka, waxaana xusid mudan in Siyaasad ahaan uu aad u adag yahay mowqifkiisa ku aadan ka hor imaanshiyaha dowlada hadda jirta.

Sidoo kale, Sanbaloolshe ayaa horay u ahaa shaqsiga Cumar C/rashiid u qaabilsanaa ololaha doorashada, taa oo sabab u ah in labada mas’uul ay ku midooban garabsiinta  Dowlada Imaaraadka oo caqabad ku ah amniga iyo xasiloonida Siyaasadeed ee xiligaan kajirta Somalia.

Dhinaca kale, Sanbaloolshe, ayaa go’aankaani qaatay kadib xil ka qaadista uu kala kulmay Madaxweynaha Somalia Maxamed C/llaahi Farmaajo, xili uu ahaa Agaasimihii hay’adda nabad-sugidda Somalia.

Caasimada Online
Xafiiska Muqdisho
[email protected]

Addis Ababa (Caasimada Online) – Sida ay baahiyeen wargeysyada mucaaradka dalka Ethiopia dowlada Imaaraadka Carabta ayaa Saanad Huba ku yaboohday dowlada Ethiopia.

Waxa ay qoreen in Saanadasi ay u badan tahay Hubka noocyada culus, kadib markii dowlada Ethiopia ay codsi saanad u dirtay Imaaraadka.

Hubkan ayaa la sheegay in diyaarad Militery oo laga leeyahay dalka Imaaraadka ay maalmo un ka hor ka dajisay Garoonka ay leeyihiin Militeriga Ethiopia ee ku yaalla Nansereed.

Hubka ayaa la xaqiijiyay inay la socdeen qalab casri ah oo ciidamada Militeriga ay ku isticmaalan duurka iyo goobaha godcurka ah.

Yabooha sanada Militery ayaa waxaa lahaa Dhaxal-sugaha Boqortooyada Imaaraadka ahna Taliye xigeenka ciidamada wadankaasi Maxamed bin Zayed.

Dowlada Imaaraadka carabta ayaa labadii sano ee ugu danbeysay xiriir wanaagsan la leh dowlada Ethiopia oo siyaasad ahaa ku dhow Somalia.

Dowlada Ethiopia ayaa saanadaasi ciidan u adeegsan doonta Kooxaha nabadiidka ee dagaalka kula jira, iyadoo ay suuragal tahay in loo soo daadgureeyo ciidamada Ethiopia ka jooga Baydhabo, Galgaduud iyo Kismaayo.

Caasimada Online
Xafiiska Addis Ababa
[email protected]

Hargeysa (Caasimada Online) – Wasiirka Arimaha Dibada maamulka Somaliland Sacad Cali Shire, ayaa daboolka ka qaaday in Dowlada Somalia ay ka shaqeyneyso hoos u dhiga horumada Somalia.

Wasiir Shire, waxa uu sheegay in dowladu ay xooga saareyso sida lagu cuuryaamin lahaa Somalia, waxa uuna tilmaamay in Somaliland aysan u babac dhigi doonin talaabooyinkasi.

Shire, waxa uu sheegay in Dowlada Somalia ay xiligaan isku dayeyso inay ka daba shaqeyso Somaliland, balse waxa uu ku celcelshay in ficil waliba oo ka dhaca Somalia ay baraarujin u tahay Somaliland.

Shire, waxa uu sheegay in cadaawad muuqata ay kala kulmayaan Somalia, waxa uuna cadeeyay in Somaliland ay ka facweyn tahay Somalia inteeda kale oo uu sheegay inay iminka kasoo boganeyso colaado daba dheeraaday.

Shire, waxa uu sheegay in dowlada Somalia ay isku dayeyso xitaa in Somaliland laga joojiyo macaamilka deeq bixiyayaasha, waxa uuna sheegay in Somaliland ay u madaxbanaan tahay Heshiisyada ay la galaan deeq bixiyayaasha.

Waxa uu tilmaamay in dowlada Somalia aanu waxba ka khuseyn cusbooneysiinta mucaamalka Somaliland kala dhexeeya adduunka waxa uuna cod dheer ku sheegay in Somalia iyo Somaliland ay kala yihiin laba dal oo kala gaara.

Waxa uu tusaale usoo qaatay dharta uu sheegay in Somalia ay u maleegeyso Somaliland in Hawada maamulkooda laga shaqeeyay in laga maamulo magaalada Xamar, hase yeeshee waxa uu taa ku sheegay riyo aan rumoobi doonin.

‘’Somalia waxa ay ka shaqeyneysaa dhagarteena dhan waliba waxa ay ka faragalineysaa qorshooyinkeena madaxbanaani, waxaan ku talineynaa inay ka fiirsato talaabooyinka ay qaadeyso’’

‘’Somalia inta ay naga daba shaqeyneyso anagu lama jecleysan waa inay faraha kala baxdaa howlaheena gaarka ah, wayo waxaa dhibato nagu ah inaan xor u noqon weyno howlaheena’’

Sidoo kale, Wasiir Shire, waxa uu cadeeyay in Somaliland ay garaneyso sida ay u waaji laheyd culeyska la saarayo, waxa uuna rajo ka muujiyay inay meel isaga soo xiri doonaan dharbaaxooyinka uu sheegay inay kala kulmayaan Somalia.

Haddalka Shire ayaa kusoo beegmaaya iyadoo dowlada Somalia ay xiligaani culeyska saareyso sida lagu hakin lahaa deeqaha ay Somaliland ka hesho deeq bixiyayaasha adduunka.

Caasimada Online
Xafiiska Hargeysa
[email protected]