Muqdisho (Caasimada Online) – Magaalada Muqdisho ee caasimada dalka ayaa waxaa maanta ka dhacay banaanbax lagu taageerayo hanaanka doorasho qof iyo cod, xilli ay cirka isku sii shareertay xiisadda ka dhalatay doorashadii Kismaayo ka dhacday.

Banaanbaxan oo uu qaban-qaabiyay maamulka gobolka Banaadir ayaa sidoo kale waxaa lagu taageeray go’aankii labada aqal ee baarlamaanka Soomaaliya ay ku meel-mariyeen xeerarkii doorashooyinka, xisbiyadda iyo guddiga doorashada iyo sohdimaha dalka.

Guddoomiyaha gobolka Banaadir ahna Duqa magaalada Muqdisho ayaa boqolaalka shacab ee isugu soo baxay caasimada kala qeyb-galay banaan-baxa lagu taageerayo hanaanka doorasho ee lagu muransan yahay.

“Shacabka isugu soo baxay taalada Daljirka Dahsoon ayaa waxa ay cod dheer ku taageereen go’aanka madaxweynaha Soomaaliya iyo xukuumada Dan-Qaran ee ah in dalka uu aaday doorasho qof iyo cod, si muwaadinka uu u helo xuquuqdiisa dastuuriga ah ee uu ku dooran karo madaxda dalka,” ayaa lagu yiri qoraal uu maamulka gobolka Banaadir kasoo saaray banaanbaxa maanta ka dhacay Muqdisho.

Guddoomiye Yuusuf Madaale ayaa bulshada Soomaaliyeed ugu baaqay isku duubni iyo in lagu kalsoonaado doorasho qof iyo cod, si muwaadin kasta oo codkiisa u dhiibto.

Sidoo kale waxaa isku soo baxa maanta goobjoog ka ahaa guddoomiye kuxigeenka amniga iyo siyaasadda gobolka Banaadir Maxamed Yabooh, guddoomiyeyaasha degmooyinka gobolka Banaadir, madaxda ururada dhalinyarada, haweenka iyo qeybaha kala gedisan ee bulshada caasimadda.

Si kastaba, hanaanka doorasho qof iyo cod ee sida weyn ugu dhagan yahay madaxweyne Xasan Sheekh ayaa la kulmaya diidmo culus, kadib markii ay ka horyimaadeen madaxdii hore iyo siyaasiyiinta mucaaradka ah oo iyagu u arka in madaxweynaha uga dan leeyahay damac muddo kororsi sharci darro ah.

Muqdisho (Caasimada Online) – Wasiirka arrimaha dibadda Soomaaliya Axmed Macallin Fiqi ayaa ka digay in la iska indho tiro sharciyada QM, Midowga Afrika iyo kuwa caalamiga, kuwaas oo sii hurin kara xiisadda gobolka haddii aan lagu dhaqmin.

Fiqi oo ka qeyb-galay shirkii 8-aad ee madasha aragti-wadaagga machadka daraasaadka siyaasadda ee Heritage oo shalay ka furmay Jabuuti ayaa isdul-taagay xad-gudubka ay ku kacday Itoobiya iyo sida ay iskaga indho tirtay shuruucda caalamiga.

“Haddii sharciyada UN, AU iyo kuwa kale la iska indho tiro, waxa sii kordhaya isku dhacyada iyo khilaafaadka gobolka. Laakiin haddii la dhaqan-geliyo iskaashi ku dhisan ilaalinta shuruucdaas, waxa si wadajir ah looga faa’iideysan karaa kheyraadka dabiiciga ah ee kala duwan, sida badda;wabiyada, iyo beeraha, oo dal kastaa leeyahay qeyb u gaar ah” ayuu yiri Wasiir Fiqi.

Wasiir Fiqi ayaa soo hadal qaaday dhacdii la xiriirtay xad-gudubkii Itoobiya ee shir madaxeedkii ka dhacay xarunta Midowga Afrika ee Addis Abbaba ee dowladda Itoobiya kula kacday madaxweyne Xasan Sheekh Maxamuud, taas oo keentay in saacado uu qalqal ku jiro kadibna uu ku khasbanaado inuu raaco gaariga madaxweyne Ismaaciil Cumar Geelle.

“Mar uu madaxweynaheena ka qeyb-galayay shir ka dhacay xarunta AU, waxaa lagu sameeyay xad-gudub hab-maamuus ah, taas oo keentay in saacado uu qalqal ku jiro ka dibna uu ku khasbanaado inuu raaco gaariga madaxweyne Geelle. Tani waxay muujinaysaa in aan la ixtiraameyn shuruucda iyo hab-dhaqanka caalamiga ah” ayuu yiri wasiir Fiqi.

Shirka madasha aragti-wadaagga machadka daraasaadka siyaasadda ee Heritage ayaa maalintiisa labaad galay, kaas oo sanadkaan diiradda lagu saarayo xooojinta xasilloonida gobolka, gaar ahaaj muhiimadda u hoggaansanaanta iskaashi ku salaysan shuruucda, ganacsiga, iyo nabadda Geeska Afrika.

Madashan ayaa inta ay socota waxaa lagu soo bandhigi doonaa cilmibaarisyo, dood cilmiyeysan, iyo hadal-jeedinno lagu lafagurayo sidii loo xoojin lahaa iskaashiga, xiriirka, xasilloonida, iyo dhaqaalaha Geeska Afrika, xal waarana loogu heli lahaa xiisadaha ka aloolsan gobolka.

Garoowe (Caasimada Online) – Madaxweynaha Puntland Saciid Cabdullaahi Deni ayaa hambalyeeyey Axmed Madoobe oo markii saddexaad doorasho uu qabsaday kusoo baxay, taas oo shalay ka dhacday magaalada Kismaayo.

Madaxweyne Deni ayaa wuxuu ugu baaqay maamulka Jubbaland iyo shacabkaba in la ilaaliyo, islamarkaana laga wada shaqeeyo amniga iyo xasiloonida maamulka Jubbaland, oo haatan ka taagan tahay xiisad xooggan.

“Waxaan u hambalyeeynaynaa madaxweynaha la doortay ee Jubaland Mudane Axmed Maxamed Islaam, guddoonka baarlamaanka iyo xildhibaanada baarlamaanka Jubaland,” ayuu yiri Saciide Deni.

Madaxweynaha Puntland ayaa waxa uu intaas kusii daray “Waxaan Allaah uga baryayaa in uu u fududeeyo masuuliyadda loo igmaday.”

Deni ayaa kula dardaarmay Axmed Madoobe oo shalay markale kusoo baxay doorashadii uu qabsaday in wixii kala aragti duwanaansho ah uu ku xaliyo wada-hadal iyo jawi nabdoon.

“Jubaland waxaan u rajeynaynaa nabad iyo horumar, waxaana ugu baaqaynaa dowladda Jubaland iyo shacabkaba in la illaaliyo oo laga wada shaqeeyo amniga iyo xasilloonida Jubaland,” ayuu hadalkiisa sii raaciyay madaxweyne Deni.

Axmed Madoobe ayaa shalay markii saddexaad loo doortay xilka madaxweynaha Jubbaland, kadib doorasho ka dhacday magaalada Kismaayo ee xarunta gobolka Jubbada Hoose.

Madoobe ayaa kusoo baxay wareegga koowaad ee doorashada, wuxuuna helay 55 cod, sida uu shaaciyay guddoomiyaha golaha wakiilada Jubbaland ee isna dhawaan la doortay.

Ninkan ayaa ku guuleystay saddex meelood labo meel oo ah aqlabiyada baarlamaanka Jubbaland, iyadoo soo bixistiisa lasii ogaa, maadaama uu asaga qabsaday doorashadaan, oo si adag u diiday dowladda dhexe.

Istanbul (Caasimada Online) – Nin 33 jir Turkish ah ayaa ku dilay magaalada Istanbul toddoba qof, oo ay ku jiraan waalidkiis, xaaskiisa iyo wiil uu dhalay oo 10 jir ahaa.

Ninkan ayaa dilka geystay ka hor inta uusan is-dilin, sida ay mas’uuliyiinta laamaha amnigu sheegeen Isniintii shalay aheyd.

Ninkan oo meydkiisa laga helay gaarigiisa wax yar kadib markii uu toogashada sameeyey ayaa sidoo kale lagu eedeeyay inuu dhaawacay laba qof oo kale oo qoys kale ka tirsan, oo mid kamid ah uu dhaawaciisu culus yahay, sida lagu sheegay bayaan ka soo baxay xafiiska barasaabka Istanbul.

Mas’uuliyiinta oo tirada dhimashada ku sheegay afar, ayaa shalay ku dhawaaqay in meel u dhow haro ku taalla xeebta Istanbul ee qeybta Yurub laga helay meydka xaaskiisa iyo wiil uu dhalay iyo sidoo kale meydka soddohdiis.

Sida laga soo xigtay hay’adda Small Arms Survey (SAS), oo ah hay’ad cilmi-baaris dhanka hubka yaryar ah, in ka badan 13.2 milyan oo hub ah ayaa dhex socda Turkiga.

Hubkan ayaa intooda badan si sharci darro ah lagu haystaa, halka shacabka dalkaasi ay gaarayaan illaa 85 milyan.

Raaskambooni (Caasimada Online) –Dowladda Federaalka Soomaaliya ayaa wada qorshe culus oo Jubbaland ay uga fara-maroojineyso Axmed Madoobe, iyadoo aan u bareerin dagaal toos ah.

Toddoba diyaaradood oo ciidamo Gorgor iyo Haramcad ah sida ayaa shalay laga dejiyey Raaskambooni, waxaana halkaas ku soo dhaweeyey oo warbaahinta la hadlay saraakiil ka tirsan Daraawiishta Jubbaland oo isku dhiibay dowladda federaalka.

Taliyaha guutada 18-aad ee Gorgor G/Dhexe Xasan Ciraaqi oo warbaahinta kula hadlay deegaanka Raaskambooni ayaa cadeeyey in halkaas ay u tageen xoreynta deegaanada ay Khawaarijtu joogto iyo inay amniga deegaanada xorta ah kala wareegaan Ciidanka ATMIS oo dalka isaga baxaya.

Sida ay ilo xog ogaal ay u xaqiijiyeen Caasimada Online, dowladda federaalka ayaa qorsheyneysa inay maanta ciidamo kale ka dejiso gobolka Gedo, kuwaas oo la wareegaya gacan ku heynta deegaanada xorta ah iyo kuwa ay Shabaab heystaan.

Dhanka Afmadow, Ra’iisul Wasaare Xamsa ayaa ka wada kala furfurka ciidamada Jubbaland, waxaana la qorsheeyey in Axmed Madoobe laga qabsado dhamaan degmooyinka iyo deegaanada Jubbaland oo loo reebo Kismaayo oo kaliya.

Dowladda Federaalka ayaa qorsheyneysa in markii la gaaro waqtiga ay ugu tala gashay doorashada in qof iyo cod laga qabto deegaanada dhan, iyadoo Kismaayo loo dhaafayo Axmed Madoobe, hadii aysan wax is bedelin.

Dowladda ayaa sidoo kale berri direysa diyaarado waaweyn oo qaadaya gaadiidka dagaalka, rasaas iyo sahayda ciidanka, kuwaas oo ka degi doona Gedo iyo Jubbada Hoose, gaar ahaan Raaskambooni oo hadda ay ciidanku gacanta ku hayaan.

Dhanka Jubbaland waxaa lasoo werinayaa in Axmed Madoobe diray ciidan Daraawiish ah, kuwaas oo shalay ka baxay Buuloxaaji iyo deegaano kale, waxaa la faray inay ka hor tagaan qorshaha dowladda federaalka, waxaana suurtagal ah inay dagaalamaan.

Muqdisho (Caasimada Online) – Golaha Wasiirrada Xukuumadda Soomaaliya oo caawa yeeshay kulan deg deg ah ayaa go’aan adag ka soo saareen is doorashada Axmed Madoobe, waxaana Garqyaqaanka guud ee dowladda la faray inuu maxkamadda sare ee dalka u gudbiyo dacwad ka dhan ah Axmed Madoobe.

Afhayeenka Xukuumadda Farxaan Maxamed Jimcaale oo qaraarka caawa soo baxay warbaahinta u akhriyay ayaa dul istaagay ilaa seddax qodob oo lagu xaaraantinimeeyey gabi ahaanba doorashadii maanta ka dhacday Kismaayo.

Golaha wasiirrada ayaa qaraarkooda ku cadeeyey in doorashada Madaxweynaha iyo tan baarlamaanka 3-aad ee Jubbaland ay labaduba baal-marsan yihiin shuruucda dalka.

Sidoo kale waxaa qaraarkaan lagu cadeeyey in Dastuurka Jubbaland uu dhigayo in labo jeer ka badan uusan hal madaxweyne hoggaami karin maamulka, halka Axmed Madoobe uu is dooranayo markii 3-aad.

“Golaha Wasiirrada waxa uu farayaa Garqayaanka guud ee dowladda federaalka Soomaaliya inuu si deg deg ah uga howlgalo horgeynta maxkamadda sare ee dalka dacwad lid ku ah dhamaan talaabooyinka aan xeerar doorashooyinka dalka ee Axmed Madoobe uu qaaday,” ayaa lagu yiri qaraarka caawa ka soo baxay xukuumadda.

Qaraarkaan ayaa caawa dhaqan-galay waxaana u codeeyey dhamaan golaha wasiirrada, halka Ra’iisul Wasaare oo shir guddoominayey kulankaan deg degga ah uu saxiixay, sida uu shaaciyey afhayeenka xukuumadda.

Hoos ka daawo qodobada qaraarka

Raaskambooni (Caasimada Online) –Agaasimihii hore ee NISA Fahad Yaasiin ayaa war ka soo saaray ciidanka ay dowladda federaalku maanta ka dejisay degaanka Raaskambooni ee gobolka Jubbada Hoose, isagoo hambalyeeyey qorshaha socda.

“Waxaan boogaadin iyo hambalyo u dirayaa Ciidanka Xoogga Dalka Soomaaliyeed oo maanta gutay waajibkooda qarannimo ee ah ilaalinta xuduudaha dalka iyo la wareegidda amniga soohdimaha labada dal ee Soomaaliya iyo Kenya,” ayuu yiri Fahad Yaasiin.

Fahad Yaasiin ayaa dowladda Kenya ku amaanay inay la shaqeyso dowladda federaalka, isla markaana iskaashiga amniga labada dal ay toos uga wada xiriiraan labada dowladood.

“Waxaan ugu baaqayaa Dowladda Kenya inay wada shaqayn buuxda la yeelato Dowladda Federaalka, ayna iyada si toos ah ugala macaamisho arrimaha la xiriira amniga iyo iskaashiga dhaqaalaha ee labada dal,” ayuu qoraalkiisa ku yiri Fahad Yaasiin.

Fahad markii uu ahaa Taliyaha NISA ayaa sidaan oo kale loo weeraray Axmed Madoobe, si looga tuuro xukunka, balse ma dhicin oo weli Axmed Madoobe waa hoggaamiyaa Jubbaland.

Ciidanka Xoogga Dalka ayaa maanta laga dejiyey Raaskambooni, si ay ula wareegaan deegaanada Jubbaland, waxaana taagan xiisad culus.

Axmed Madoobe ayaa ciidan ka tirsan Daraawiishta Jubbaland ka diray aagga deegaanka Buuloxaaji, waxaana caawa la isku horfadhiyaa aagga deegaanka Raaskambooni, sida ay Caasimada Online u sheegeen ilo deegaanka ah.

Raaskambooni waa deegaan in ka badan 200 oo KM koonfur ka xiga Kismaayo, waa magaalo xeebeed ay dowladda isku dhiibeen ciidankii Jubbaland ee ku sugnaa, balse inta u dhaxeysa Kismaayo iyo Raaskambooni waxaa jooga Al-Shabaab.

Muqdisho (Caasimada Online) – Xafiiska Amniga Qaranka ayaa maanta magalada Muqdisho ku qabtey Shirweynaha Qaran ee maareynta hubka iyo rasaasta, kaas oo qayb ka ah tiirarka Istaraatijiyadda Qaran ee maareynta hubka iyo rasaasta.

Wasiirka Amniga gudaha Dowladda Federaalka Soomaaliya Senator Cabdullaahi Shiikh Ismaaciil (Fartaag) oo shirka furay ayaa sheegay Dowladda Federaalka Soomaaliya iney xoogga saarayso sidii loo xakameyn lahaa isticmaalka hubka iyo rasaasta.

Wasiir Fartaag ayaa hoosta ka xariiqey iney ka mid tahay mowduucaan kuwa ugu horeeya ee u degsan dowladda Soomaaliya.

‘’Si looga hortago qulqulka hubka sharci darrada ah ee dalka soo galaya, waxaan bilownay calaameynta rasaasta, iyada oo la isticmaalayo tiknoloojiyadda casriga ah’’ ayuu yiri Wasiir Fartaag.

Sidoo kale Wasiirka Amniga gudaha ayaa sheegay inta uu socdo shirkan iney kaga hadli doonaan waxyaabihii sannadkaan dhammaadka ah uga qabsoomey arrimaha maareynta hubka iyo rasaasta.

Wasiirka Amniga Soomaaliya ayaa sheegay iney sidoo kale doodo ka geli doonaan sidii loo xakameyn lahaa hubka sharci daradda ah ee qeybo ka mid ah xaduudaha dalka lasoo dhaafsiiyo.

Ku xigeenka La-taliyaha Amniga Qaranka Mukhtaar Maxamed Xasan oo shirka ka hadlay ayaa muujiyey siday ay xafiis ahaan uga go’an tahay xaqiijinta la-dagalanka hubka sharci darradda ah iyo calaamadeynta rasaasta.

‘’Waxyaabaha ugu muhiimsan ee maanta shirka looga hadlay waxaa ka mid ah;

qiimeynta qorshaha Qaran ee sannadlaha kaas oo aan ka fiirinay guulaha ay Dowladda ka gaartay iyo waxyaabihii qabsoomay,” ayuu yiri Wasiirka Amniga Soomaaliya.

Garbahaarey (Caasimada Online) – Taliyaha ciidamada daraawiishta Jubbaland ee gobolka Gedo Janaraal Cabaas Ibraahim Gurey ayaa faah-faahin dheeraad ah ka bixiyay qarax culus oo gelinkii dambe ee shalay lagula eegtay xadka dalalka Soomaaliya iyo Kenya.

Taliyaha ayaa shaaca ka qaaday in qaraxa oo ay ka dambeeyeen Al-Shabaab uu haleelyay gaarigiisa, balse uu ka bad-baaday, islamarkaana aanay waxyeelo kasoo gaarin miinada.

Sidoo kale wuxuu tilmaamay in ujeedka qaraxa uu ahaa in isaga lagu khaarijiyo, isla markaana qaybta uu fadhiyay lagu soo aadiyay, balse uu Alle ka bad-baadiyay.

“Gudaha dowladda aan dariska nahay ee Kenya kooxdii arxanka darneyd ee baneysatay dhiiga iyo hantida muslimka waxay nala eegteen qaraxa oo ay ku dhufteen baabuurkii aan anigu waday Alxm waxba Ilaahey naguma yeelin, kaliya baabuurka ayay naga garaafeeyeen” ayuu yiri Janaraal Cabaas Ibraahim Gureey.

Waxaa kale oo uu intaasi kusii daray in wax naxariis aysan ka dhexeyn iyaga iyo Al-Shabaab, isla markaana ay sii wadi doonaan dagaalka adag ee ay kula jiraan.

“Waa noolnahay waxbana nama gaarin anaga iyo Shabaab waxaa noo dhexeeyo dagaal hana cafina idina ma cafineynee” ayuu mar kale yiri taliyuhu.

Horay ayaa Al-Shabaab qaraxyo noocaan oo kale ah uga fulisay Gedo waxaana mid kamid ah lagu dilay taliyihii hore ee Nabad-sugidda ee gobolkaasi, Bakaal Kooke.

Gedo ayaa waxaa weli ku xoogan Al-Shabaab, waxaana dhinaca kale howlgallo ka wada ciidamada dowladda, daraawiishta Jubbaland iyo sidoo kale ciidamada Itoobiya.

Muqdisho (Caasimada Online) – Ra’iisul Wasaarihii hore ee Soomaaliya Xasan Cali Kheyre oo ka hadlay doorashada maanta ka dhacday magaalada Kismaayo ayaa hambalyeeyey Axmed Madoobe.

“Waxaan hambalyo u dirayaa Madaxweyne Axmed Maxamed Islaam oo mar kale loo doortay Madaxweynaha Dowlad-Goboleedka Jubbaland,” ayuu Kheyre ku yiri qoraal uu kasoo saaray doorashada maamulka Jubbaland.

Ra’iisul Wasaarihii hore ee dalka ayaa sidoo kale wuxuu ugu baaqay Axmed Madoobe in uu mudnaanta koowaad siiyo dib-u-heshiisiinta Jubbaland, la-dagaallanka kooxda Al-Shabaab iyo xasilloonida maamulka Jubbaland.

Waxa uu nasiib darro ku tilmaamay in madaxda dowladda federaalka ay ciidankii qaranka ku sii daad-gureynayaan maamulka Jubbaland, si ay colaad uga huriyaan deegaanka.

“Waxaana ugu baaqayaa in ay degdeg u joojiyaan hurinta colaaddan oo fursad siinayso khawaarijta, halis gelinaysa xasilloonida dalka iyo guud ahaan gobolka, sidoo kalena wiiqaysa midnimada dalka iyo wadajirka ummadda Soomaaliyeed,” ayuu yiri Kheyre.

Waxa uu intaas kusii daray “Doorashada Jubbaland waxa ay jid iyo jiho u yeelaysaa doorashooyinka dowladda federaalka iyo dowlad-goboleedyada oo hubanti la’aan ku jiray.”

Ugu dambeyntiina wuxuu madaxda dowlad-goboleedyada Galmumug, Koonfur-Galbeed, iyo HirShabelle ugu baaqay in ay deg-deg u qabtaan doorashooyinka dowlad-goboleedyada, si waafaqsan dastuurka dalka iyo dolwad-goboleedyada.

Kismaayo (Caasimada Online) – Madaxweynaha cusub ee maamul goboleedka Jubbaland, Axmed Maxamed Islaam (Axmed Madoobe) oo maanta mar kale dib loo doortay ayaa ka hadlay guushiisa iyo arrimo ku aadan khilaafka kala dhexeeya dowladda federaalka.

Ugu hooreyn Axmed Madoobe ayaa shaaca ka qaaday in isaga oo kaliya uu Jubbaland madaxweyne ka yahay maanta kadibna aanay jirin dooni cid kale oo sheegan karta.

“Xasan Sheekh Jubaland ayuu Xasuusinayaa wixii uu ku sameeyey 2013-kii,Aniga ayaa madaxweyne ka ah Jubaland cid kale oo sheegan karto majirto Wada hadal oo kaliya ayaana Ogolahay,” ayuu yiri madaxweynaha dib loo doortay ee maamulka Jubbaland.

Sidoo kale wuxuu sii raaciyay “Waxaan oranayaa madaxweyne Xasan Sheekh taariikhda dib ha u celin dadkii reer Jubbaland way bogsadeen wixiiay horay usoo mareen”.

Axmed Madoobe ayaa sidoo kale weerar toos ah ku qaaday madaxweyne Xasan Sheekh iyo ra’iisul wasaare Xamza, isaga oo tilmaamay in dagaal aanay waxba uga qaadi karin.

Madaxweynaha dib loo doortay ee Jubbaland ayaa si gaar ah ugu jawaabay ra’iisul wasaaraha oo deegaan ahaan kasoo jeedo maamulkaasi, wuxuuna nasiib darro ku tilmaamay in loo adeegsado deegaankiisa, sida uu hadalka u dhigay.

“Haddaba madaxweynow waxaa nasiib darro ah wiilka shalay aan xildhibaanka siinay ee ra’iisul wasaaraha noqday maanta inuu noqdo cidda loo adeegsanyo Jubbaland burburinteeda waa nasiib darro,” ayuu mar kale yiri madaxweyne Axmed Madoobe.

Hadalkan ayaa kusoo aadayo, ayada oo si weyn ay dowladda dhexe u diidan tahay dib u doorashada Axmed Madoobe, iyada oo horay u sheegtay in aanay aqoonsan doonin maamulkiisa.

Muqdisho (Caasimada Online) – Madaxweynihii hore ee dalka Shariif Sheekh Axmed ayaa si weyn usoo dhaweeyay dib u doorashada madaxweynaha Jubbaland Axmed Madoobe oo maanta Kismaayo ku qabsaday doorasho ay diidan tahay dowladda dhexe.

Doorashada Jubbaland ka dhacday maanta ayaa wuxuu ku tilmaamay mid meesha ka saartay muddo kordhintii sharci darrada aheyd ee madaxda dowladda federaalka ku cadaadinayeen dowlad goboleedyadda dalka.

“Waxaan halkaan ugu hambalyeynayaa Mudane Axmed Maxamed Islaam (Axmed Madoobe) oo maanta baarlamaanka Jubaland u doortay in uu hogaamiyo dowlad-goboleedka Jubaland shanta sano ee soo socota,” ayuu Shariif ku yiri qoraal uu soo saaray goordhoweyd.

Waxa uu intaas kusii daray “Waxaan Allaah ugu baryayaa in uu u fududeeyo mas’uuliyadda culus ee loo doortay.”

Shariif ayaa sidoo kale wuxuu uga digay madaxda dowladda federaalka in ciidamada qaranka loo adeegsado danno siyaasadeed, islamarkaana laga fogaado xasarad abuurka iyo qalqal-galinta deegaannada Jubaland.

Ugu dambeyntiina wuxuu madaxweynaha Jubbaland usoo jeediyay in uu kaalin mug leh ka qaato xal u helidda arrimaha siyaasadeed ee cakiran.

Axmed Madoobe ayaa maanta markii saddexaad loo doortay xilka madaxweynaha Jubbaland, kadib doorasho saaka ka dhacday magaalada Kismaayo ee xarunta gobolka Jubbada Hoose.

Axmed Madoobe ayaa kusoo baxay wareegga koowaad ee doorashada, wuxuuna helay 55 cod, sida uu shaaciyay guddoomiyaha golaha wakiilada Jubbaland.

Ninkan ayaa ku guuleystay saddex meelood labo meel oo ah aqlabiyada baarlamaanka Jubbaland, iyadoo soo bixistiisa lasii ogaa, maadaama uu asaga qabsaday doorashadaan, oo si adag u diiday dowladda dhexe.

Kismaayo (Caasimada Online) – Dowladda Federaalka Soomaaliya ayaa maanta qaaday tallaabo milatari oo ka dhan ah maamulka Jubbaland, waxayna ciidamo dheeraad ka dajisay gobolka Jubbada Hoose, kuwaas oo diyaarado looga qaaday magaalada Muqdisho.

Sida ay ogaatay, Caasimada Online illaa laba diyaaradood oo sida ciidamo fara badan iyo hubkooda ayaa maanta laga dajiyay gudaha deegaanka Raaskambooni oo u dhow magaalo xeebeedka Kismaayo ee xarunta KMG ah ee maamul goboleedka Jubbaland.

Wararka ayaa intaasi ku daraya in diyaaradaha ay saaka ku dageen garoon uu horay qaadka uga dagi jiray oo ku yaalla halkaasi, waxayna isla markiiba bilaabeen dhaq-dhaqaaq culus.

Sidoo kale dowladda Soomaaliya ayaa lasoo warinayaa inay qorsheyneyso in diyaarado kale oo ciidamo sida ay u dirto dhinaca Jubbaland, waxaana ujeedka uu yahay inay ka hortagaan dhaq-dhaqaaqa maamulka Axmed Madoobe  oo ay hadda is hayaan dowladda dhexe.

Tallaabadan ayaa kusoo aadeyso, iyada oo maanta Kismaayo ay ka dhacday doorashada Jubbaland, waxaana markii saddexaaad dib loogu doortay Axmed Madoobe, kaas oo ay doorashadiisu diidan tahay dowladda federaalka ee uu hoggaamiyo Xasan Sheekh Maxamuud.

Axmed Madoobe ayaa kusoo baxay wareegga koowaad ee doorashada, wuxuuna helay 55 cod, sida uu shaaciyay guddoomiyaha golaha wakiilada Jubbaland.

Natiijada soo baxday ee doorashada ayaa lasii ogaaa, waxaana Axmed Madoobe la tartamay laba musharrax oo kaliya, kuwaas oo kala ahaa Cabdi Xajiin oo helay 16 cod iyo Abuubakar Cabdi Xasan oo helay 4 cod, kuwaas oo malxiis uun u ahaa Axmed Madoobe.

Si kastaba, dowladda dhexe ayaa horay u sheegtay in aanay aqoonsan doonin natiijada doorashada Jubbaland, iyada oo boob ku eedeysay madaxweyne Axmed Madoobe.

Kismaayo (Caasimada Online) – Axmed Maxamed Islaam (Axmed Madoobe) ayaa markii saddexaad loo doortay hoggaamiyaha maamul goboleedka Soomaaliyeed ee Jubbaland, kadib doorasho maanta ka dhacday magaalada  Kismaayo ee xarunta gobolka Jubbada Hoose.

Axmed Madoobe ayaa kusoo baxay wareegga koowaad ee doorashada, wuxuuna helay 55 cod, sida uu shaaciyay guddoomiyaha golaha wakiilada Jubbaland.

Natiijada soo baxday ee doorashada ayaa lasii ogaaa, waxaana Axmed Madoobe la tartamay laba musharrax oo kaliya, kuwaas oo kala ahaa Cabdi Xajiin oo helay 16 cod iyo Abuubakar Cabdi Xasan oo helay 4 cod, kuwaas oo malxiis uun u ahaa Axmed Madoobe.

Madaxweynaha dib loo doortay Axmed Madoobe oo hadal kooban ka jeediyay hoolka doorashada ayaa u mahadceliyay xildhibaannada doortay, wuxuuna ballan qaaday in shaqada halkeeda uu kasii wadi doono.

Sidoo kale mar wax laga waydiiyay aqoonsiga dowladda federaalka ayaa waxa uu tilmaamay in aanay waxba uga baahneyn dowladda dhexe, sida uu hadalka u dhigay.

Dowladda Federaalka ayaa sidoo kale dibadda ka joogtay doorashada Jubbaland, taas oo iyana saameyn ku leh doorashadaas, waxayna horay u sheegtay in aanay aqoonsan doonin maamulka ka yimaada halkaas, iyada oo boob ku eedeysay madaxweyne Axmed Madoobe.

Janaale (Caasimada Online) – Faah-faahino dheeraad ah ayaa waxaa laga helayaa khasaaraha ka dhashay dagaal u dhexeeyay ciidamada dowladda iyo Al-Shababa oo maanta ka dhacay qaybo kamid ah gobolka Shabeelaha Hoose.

Dagaalka ayaa yimid, kadib arkii maleeshiyaad ka tirsan kooxda Al-Shabaab ay weerar ku qaadeen fariisimo ay ciidamada Xoogga dalka, gaar ahaan Guutada 14 Oktoobar ay ku leeyihiin deegaannada Janaale iyo Buufow Bacaad ee gobolkaasi.

Wararka ayaa intaasi kusii daraya in weerarka kadib uu xigay iska hor imaad toos ah oo u dhexeeyay Al-Shabaabkii weerarka soo qaaday iyo ciidamada dowladda, waxaana ka dhashay khasaare kala duwan, walow aan la xaqiijin karin inta uu gaarsiisan yahay.

Saraakiil u hadashay milatariga Soomaaliya ayaa sheegay inay iska difaaceen weerarka uga yimid Al-Shabaab, ayna dib u celiyeen xubnihii duulaanka soo qaaday.

Sidoo kale saraakiisha ayaa tilmaamay in khasaare culus dagaalkan lagu gaarsiiyay maleeshiyaadka Al-Shabaab, welina ay sii wadaan howlgallo baacsi ah.

Xaaladda ayaa hadda deggan, waxaana goobaha lagu dagaalamay ku sugan ciidamada dowladda Soomaaliya oo weli baaritaano kasii wada halkaasi.

Inta badan kooxda Al-Shabaab ayaa weeraro ku dhufo oo ka dhaqaaq ah ku qaada saldhigyada ciidamada dowladda iyo kuwa ATMIS ee ku yaalla Shabeelaha Hoose.