Muqdisho (Caasimada Online) – Gudoomiyihii hore ee gobolka Banaadir, Thaabit Cabdi Maxamed ayaa markii ugu horreysay ka hadlay xiisadda ka taagan xaruntii hore ee Dab-demiska ee magaalada Muqdisho.

Dhulkan oo ay amartay dowladda in laga guuro ayaa waxay adka degan qaarkood si adag uga horyimaadeen amarka guurista, ayaga oo dowladda ku eedeeyay inay dhulkaas u gacan galineyso shaqsiyaad gaar ah, waxaana socda abaabul looga hortegayo in Booliska uu qasab ku raro dadka shacabka ah ee degan dhulkaasi maalinta berri ah ee Sabtida.

Thaabit Cabdi ayaa dowladda usoo jeediyay in aysan qasab uga rarin dhulkaasi shacabka degan, isaggoo ku taliyay in xiisadda taagan lagu dayo saddex arrin midkood, si xal-waara loo helo.

Hoos ka aqriso qoraalka Thaabit;

Haddii dhulka dantaguud dowladdu leedahay, dowladnimaduna soo shacabku ma lahan?

Hay’addaha kala duwan ee Dowladda dhul danguud ah wey u baahan karaan si loogu adeego shacabka balse waxaa loo maraa nidaam madani amma rayit ah si xal-waara loo helo oo ah sida soo socota:

1. In isla dhulka dantaguud loogu baahday laga cabiro dhul loo isticmaalo dantaguud dadkana lagu deegaameeyo dhulka kale ee soo hara. Sow Boolisku ma ahan saaxiibka iyo ilaaliyaha shacabka?.

2. Haddii uusan dhulka qaybsami karin, in dhul kale shacabka meesha dagan lagu deegaameeyo.

3. Haddii la waayo labbada xal ee 1 & 2 in shacabka meesha dagan la siiyo magdhaw maangal ah si shacabka aysan isla magaaladoodii la-barakiciyayaal ugu noqon.

Waxaan rabaa inaan si dareen leh u xusuusiyo madaxdka dalka dhaqaale xumida guud ee caalamka ka jirta, haddana shacabkeena badankii waxay maanta la daalaa-dhacayaan dhaqaalo xumi aad u daran, kuleylka bisha April-na u sii dheer tahay ee aan ahmiyad weyn siinno bad-qabka iyo daryeelka shacabkeena.

Muxuu salka ku hayaa khilaafka Xasan Sheekh iyo madax goboleedyada? 

Hargeysa (Caasimada Online) — Xukuumadsa Somaliland ayaa qaadday tallaabo ay sheegtay in dekad ay kaga dhiseyso magaalada qadiimiga ah ee Lughaya ee gobolka Awdal, iyadoo horey uu u jiray tuhun ah in halkaa ay tahay goobta laga kireeyay Itoobiya.

Kulan ku saabsanaa dhismaha dekaddaan ayaa magaalada Boorama ku dhex maray madaxweynihii hore ee Somaliland, Daahir Riyaale Kaahin, ganacsato iyo odayaasha gobolka.

Shirkaas waxaa laga sheegay in xukuumaddu bixisay lacag dhan hal malyan oo doolar oo dekadda lagu dhisayo, isla markaana loo dhiibay madaxweyne hore Riyaale.

Kulanka ganacsatada iyo odayashaan ayaa laga filayaa inay dhaqaale ay ku daraan kan xukuumaddu ay bixisay, haddii taa dhici kari waydana xukuumaddu waxay sheegtay in iyadu ay dhameystiri doonto.

Balse lama shaacin xilliga sida rasmiga uu dhismaha dekaddu u billaaban doono, marka laga tago in hadda la shaaciyay dhaqaalihii ugu horreeyay oo lagu bilaabayo.

Sidoo kale, lama shaacin tirada rasmiga ee dhaqaalaha ay ku kici karto dhismaha dekedan.

Wasiirka xiriirka golayaasha iyo arrimaha dastuurka ee Somaliland Cabdi Naasir Buuni ayaa sheegay in aaney jirin wax ka dhiman bilaabashada dhismaha, marka laga eego halka ay hadda wax marayaan iyo dedaallada socda.

“Wax harayba ma jirto waxa adduunka ugu daran waa dhaqaale dhaqaale-na xukuumadda madaxweyne Biixi ayaa bixisay waxa haray waa farsamo,” ayuu yiri wasiir Buun.

Wuxuu muujiyay wasiirku in dhismaha dekkaddu dhaqso u bilaabanayo marka hadalkiisa, maadama warka dhismaha uu muddo taagnaa.

Sanadkii 2017-kii markii madaxweyne Muuse Biixi uu raadinayay xukunka uu hadda hayo ayaa waxyaabihii kooxdiisii ay ku ololeynaysay waxaa ka mid ahaa dhismaha dekaddan, waxaana tillaabada ay hadda qaaday ay imaaneysaa xilli doorashdii kale ay soo dhowdahay.

Xiriir miyaa ka dhaxeeya dekaddii laga kireeyay Itoobiya iyo tan Lughaya laga dhisayo?

Dad badan sida ay la socdaan horraantii sanadkaan Itoobiya iyo Somaliland waxaa dhex maray is-afgarad ku saabsanaa in Itoobiya laga kireeynayo dekad ay wax kala soo degto iyo saldhig ciidan oo badda cas ku yaalla, hase yeeshee si cad looma shaacin halka dekadaasi noqonayso, labada dhinac midkoodna ma cayimin goobta ay gayiga kaga taal.

Balse waxaa jiray tuhunno ku gedaaman arriintaa kadib markii Ridwan Xuseen, oo markii xiisaddaan taagneed ahaa la-taliyaha amniga qaranka ee ra’iisul wasaaraha Itoobiya Abiy Axmed oo wareysi gaar ah siinayaya bishii jannaayo ee sanadkaan warbaahinta dowladda ee EBC uu ku sheegay “in goobta ay Somaliland heshiiska kula gashay ay tahay Lughaya oo ka tirsan gobolka Awdal,”.

Ridwan ayaa difaacay xilligaa go’aanka ay Itoobiya is-afgaradka kula saxiixatay Somaliland.

Waxa uu ku dooday in “inkasta oo Somaliland aysan helin aqoonsi calami ah, ay horey heshiisyo ula saxiixatay dalal kala duwan, oo ay ku jiraan heshiisyo dekado lagu horumarinayo.”

Waxaase hadda wasiirka xiriirka goleyaasha iyo arimaha dastuurka ee Somaliland Cabdi Naasir Buuni, uu BBC-da u sheegay in u qalab-qaadashada dhimaha dekadda Lughaya ee Somaliland iyo arrintaa aanu wax xiriir ah ka dhaxeyn.

“Wax xiriir ah ma jiro, iminka waa dekad horumar hadda waxa la dhisayo, dekaddu markey dhisantana wax kasta oo dekadi qabato ayaa looga faa’iideysan doonaa,” ayuu yiri wasiir Buuni.

Maxaan ka naqaannaa Lughaya?

Lughaya waa magaalo xeebeed qaddiimi ah oo ku taalla waqooyi galbeed ee gobolka Awdal, waxaana maamula Somaliland, waxayna 50 km koonfurta kaga beegantahay dekedda Jabuuti, halka 200 km-na ay dhanka waqooyiga ka xigto magaalada Berbera.

Lughaya waxay ka mid tahay magaalooyinka ugu faca weyn gobolka Awdal, iyadoo Shacabka degganna ay u badanyihiin dad xoolo dhaqato ah oo sidoo kalena ah, kalluumeysato.

Tirada dadka ku nool Lughaya waxaa lagu qiyaaso 75,000 oo qof.Waa deegaan muhiim ah marka la eego halka ay ku taallo.

Deegaannada hoos-yimaada degmada Lughaya waxaa lagu cabbiraa dhul baaxaddiisu le’eg tahay ilaa 10,421 kiiloo mitir oo ay dhaqan yihiin dad lagu sheegay tiradooda ilaa 182,706 oo qof.

BBC

Muxuu salka ku hayaa khilaafka Xasan Sheekh iyo madax goboleedyada? 

Muqdisho (Caasimada Online) – Dowladda Federaalka Soomaaliya ayaa dhiggeeda Kenya uga tacsiyeysay geerida Taliyihii Ciidamada Kenya oo galabta ku geeriyooday shil diyaaradeed oo ka dhacay dalkaas.

Wasaaradda Gaashaandhigga Soomaaliya  ayaa tacsi u dirtay Wasaaradda Gaashaandhigga Kenya, Ciidanka Difaaca Kenya, Dowladda iyo Shacabkeeda, kadib geeridii ku timid Taliyihii Ciidanka Difaaca Kenya Lt. General Francis Ogolla.

Sidoo kale, xogta ay heyso Caasimada Online waxay sheegeysaa in dowladda Soomaaliya ay sii balaarineyso tacsida oo xitaa xafiiska Ra’iisul Wasaaraha Soomaaliya uu qorsheynayo inuu war ka soo saaro geerida Taliyihii ciidamada difaaca Kenya.

Taliyaha ayaa saaraa diyaarad milateri oo nooca qumaatiga u kaca ah, taas oo ku bur-burtay hawada dalka Kenya, wax yar uun kadib markii ay kacday.

8 qof oo saraakiil iyo askar isugu jirtay ayaa Taliyaha kula geeriyootay shilkaas, diyaaradda ayaa ku bur-burtay galbeedka dalka Kenya.

Taliyaha ayaa isbitaal loo qaaday isagoo haawacmay daran qaba, balse wax yar kadib waa uu geeriyooday, sida ay tebisay warbaahinta dalka Kenya.

Afhayeen u hadlay dowladda Kenya ayaa uga baaqay dadka Kenyanka ah in ay is dajiyaan, islamarkaana ay ka fogaadaan warrarka kutiri kunteenka ah, isagoo isku dayey inuu qariyo xaqiiqada geerida Taliyaha.

Dowladda Kenya ilaa hadda war rasmi ah kama soo saarin geerida Taliyihii ciidamada difaaca qaranka Kenya oo ku dhintay shilka diyaaraddeed, balse waxaa lagu wadaa in saacadaha na soo aadan uu ka soo baxay war dhameystiran.

Muqdisho (Caasimada Online) – Dowaldda federaalka Soomaaliya ayaa soo bandhigtay rag loo qabtay fududeynta iyo ka qeyb galka weerarradii Hotel Xayaat, Hotel Elite, Hotel Afrik, xarunta maamulka gobolka Banaadir iyo hoobiyaal lagu garaacay Muqdisho.

Raggan ayaa sidoo kale gacan ka geystay qaraxyadii dadka badan lagu halaagay ee loogu magacdaray Soobe 2, Hotel Villa Rays, Hotel Pral Beck, Stadium Muqdisho, maqaayadda Jawi Coffe iyo goobo kale oo dad badan lagu laayey.

Dhammaan weeraradaas waxay dowladda Soomaaliya diiwaan gelisay in lagu laayey dad ka badan 400 oo qof, waxaana lagu dhaawacay oo qaarkood naafo daran ku noqday boqolaal qof oo dad Soomaaliyeed ah, kuwaas oo aan waxaba ka galabsan ragga maanta hor taagan cadaaladda.

Ugu yaraan shan nin oo ka tirsanaa kooxda Al-Shabaab oo weeraradaas wax ka qorsheeyey, waxna ka fuliyey ayaa lagu soo bandhigay barnaamijka Gungaar ee ka baxa Warbaahinta Dowladda Soomaaliya, kaas oo diiradda saara cadeymaha laga helo dhagarta Khawaarijta.

Xubnaha lagu soo bandhigay barnaamijkaan ayaa si furan uga sheekeynaya doorkii ay ku lahaayeen weerarradii Al-Shabaab ee ka dhacay Muqdisho, waxayna qirsan yihiin inay dadka reer Muqdisho u maleegayeen nolol halaag ah, balse midba mar ayuu ku soo dhacay dabinka weyn ee dowladda.

Al-Shabaab-ka nolosha lagu hayo waxay ka sheekeynayaan sooyaalkooda, wuxuuna mid kasta ka warbixinayaa sidii ay ugu suurta gashay inuu ku biiro argagixisada iyo halkii uu kaga biiray.

Tababaro ayey ku soo qaateen deegaanada Al-Shabaab, mid kasta markii loo soo wareejiyey Muqdisho, wuxuu qirayaa in dhibaatada ugu badan ay ka mari jireen sidii ay qaraxyo u soo geli lahaayeen Muqdisho, maadaama ciidamada ammaanka ay u yaallaan baro koontrool oo adag.

Ragaan waxay ka soo muuqdeen maxkamadda ciidamada, waxayna wajahayaan cadaaladda, qaarkood waxay muteysan karaan dilal toogasho ah, maadaama weerarro ay fuliyeen lagu laayey dad badan oo reer Muqdisho ahaa.

Waxyaabaha yaabka leh oo ay ka sheekeynayaan waxaa ka mid ah sida ay ugu suurtageli jirtay in xeryaha dowladda, waxayna bixiyeen xogo xasaasi ah, “Ma jirto Hoobiye aan la hageyn oo lasoo rido” ayuu yiri Yuusuf oo ka mid ah ragga nolosha lagu hayo ee Hoobiyaha ku soo weerari jiray dadka ku nool caasimadda Muqdisho.

Inta badan hoobiyaha ay ku garaacaan Muqdisho kuma dilaan ciidan ama masuuliyiin dowladeed, balse waxay ku laayaan Shacabka, balse Al-Shabaab waxay ku raaxeystaan xasuuqa shacabka, taas oo waxaba kama jiraan ka dhigeysa bartilmaameedka ay sheegayaan inay ku ridi jireen Hoobiyaha lagu garaaco Muqdisho.

Hoos ka daawo Barnaamijka Gungaar

Hargeysa (Caasimada Online) – Golaha Wasiirada Somaliland oo maanta shirkoodii caadiga ahaa ku yeeshay magaalada Hargeysa ayaa shaaca ka qaaday in tirada dadka degan Somaliland ay haatan gaartay illaa 6.2 Milyan, loona baahan yahay in laga shaqeeyo sidii ay u heli lahaayeen adeegyo dhammeystiran oo muhiim ah.

Shirkan oo uu guddoomiyeay madaxweyne Muuse Biixi ayaa waxaa looga hadlay arrimo xasaasi ah, ayada oo laga soosaaray 4 qodob oo lagu xusay war kasoo baxay shirka.

“Tirada dadka Jamhuuriyadda Somaliland ku dhaqan oo wakhtigan maraya 6.2 Milyan, waxa ay xukuumaddu ku hawlan tahay sidii ay u heli lahaayeen adeegyo dhamaystiran oo laga baaraan degay” ayaa lagu yiri warsaxaafadeedka Golaha Wasiirada Somaliland.

Sidoo kale waxaa shirka lagu soo qaaday arrimo ay kamid yihiin  sidii la isu-waafijin lahaa arrimaha doorashooyinka sannadkan iyo qorshayaasha kale ee muhiimka ah.

Halkan hoose ka akhriso: 

𝐖𝐀𝐑-𝐒𝐀𝐗𝐀𝐀𝐅𝐀𝐃𝐄𝐄𝐃.

Hargeysa-18-04-2024-()-Fadhigii 127aad ee Golaha Wasiirrada Jamhuuriyadda Somaliland oo uu Shir-guddoominayey Madaxweynaha Jamhuuriyadda Somaliland, Mudane Muuse Biixi Cabdi, oo lagu lafo-guray qodobbo kala duwan oo salka ku haya sidii la isu-waafijin lahaa arrimaha doorashooyinka sannadkan gudihiisa loo diyaar garoobayo iyo qorsheyaasha guud ee qaranka ee dhinaca maaliyadda, amniga iyo shilalka gaadiidka ee marba marka ka danbaysa sii badanaya.

Ugu horayn, Golaha Wasiirradu waxa uu war-bixin guud oo la xidhiidha amniga dalka ka dhegeystay wasiir ku xigeenka arrimaha Gudaha, ahna ku simaha wasiirka, Mudane Cabdilaahi Xuseen Maxamed oo xog-waran golaha ka siiyey xaaladda amniga ee dalka iyo midda geeskaba iyo diyaar garawga Xuska Sannad Guurada 34aad ee dib ula soo noqoshadii Jamhuuriyadda Somaliland ee 18-May oo gudaha iyo dibeddaba ay ka socdaan abaabul xooggan oo la xidhidha qadiyadaha madax-bannaanida Somaliland.

Sidoo kale waxa goluhu warbixin ka dhegeystay, wasiirrada wasaaradaha, Horumarinta Maaliyadda, Dr. Sacad Cali Shire, qorshaynta iyo horumarinta qaranka, Axmed Maxamed Diiriye (Toorno), Horumarinta Beeraha, Mudane Axmed Maxamed Habbane iyo Horumarinta Caafimaadka, Mudane Xasan Maxamed Cali (Xasan Gaafaadhi) waxaanay dhammaantood golaha warbixin guud ka siiyeen hawlaha shaqo ee ay qaranka u hayaan wasaaradahaasi iyo qorsheyaasha sannadkan lagu jiro u degsan.

Dhinaca kale, goluhu waxa uu dood iyo falan-qayn dheer ka dib soo saaray qodobbo muhiima oo la xidhidha danaha qaranka iyo kuwa bulshadaba, kuwaas oo kala ah;-

1. In la Aas-aaso sanduuqa horumarinta qaranka laga bilaabo 2025-ka, iyadoo habraaca lagu maamulayo ay soo diyaariyaan wasaaradaha horumarinta maaliyadda iyo qorshaynta iyo horumarinta qaranka.
2. Goluhu waxa uu xoojinayaa go’aamadii hore uga soo baxay shirarkii hore ee la xidhiidhay in mashaariicda horumarineed ee ay Jamhuuriyadda Somaliland ka hesho beesha Caalamka aan cid kale loo soo marin ee wixii ay xaq u leedahay toos loogu soo hagaajiyo.
3. Tirada Dadka Jamhuuriyadda Somaliland ku dhaqan oo wakhtigan maraya 6.2 Milyan, waxa ay xukuumaddu ku hawlan tahay sidii ay u heli lahaayeen adeegyo dhamaystiran oo laga baaraan degay.
4. In tallaabo sharci oo deg-deg ah laga qaado arrimaha soo noq-noqday ee sababa shilalka gaadiidka ee naf iyo maalba ee dhibaatada ku haya dalka iyo dadkaba, iyadoo loo saaray guddi ka kooban wasaaradda gaadiidka iyo horumarinta jidadka iyo laamaha amniga ee arrintaasi khusayso.

ALLAA MAHAD LEH.

Muqdisho (Caasimada Online) – Ciidamada xeebaha Soomaaliya iyo kuwa badda ee Midowga Yurub ee loo yaqaano (ATALANTA) ayaa maanta si wadajir ah dhoolatus wayn uga sameeyay xeebaha Soomaaliya, oo muddooyinkii dambe lagu arkayay burcad badeed.

Labada ciidan ayaa si mideysan Layli ugu qaatay Markabka dagaalka lagu magacaabo (CANARIAS) ee dalka Spain ee jooga gudaha biyaha Soomaaliya.

Ujeedka Layligaan ayaa xambaarsanaa qaababka la dagaalanka  burcad-badeedka, dhaca hubeysan ee badda iyo ka hortagga maagelinta sharci darrada ah ee dembiilayaasha iyo shabakadaha Argagixisada.

Sidoo kale Layligaan wuxuu kamid yahay tababarada joogtada ah ee lagu tayeynayo ciidanka ilaalada xeebaha Soomaaliya, sarena loogu qaadayo xirfadaha kala duwan ee saraakiisha ammaanka iyo nabadgalyada badaha.

Dhaq-dhaqaaqan waxaa  hoogaaminaayay Taliyaha Ilaalada Xeebaha Gaashaanle sare Bashiir Cabdi Qaasim iyo Taliyaha Markabka Dagaalka “CANARIAS” (F-86) Carlos CASTOSA.

Tallaabadan ayaa kusoo aadeyso, ayada oo mar kale ay soo rogaal celiyaan kooxaha burcad badeedda oo todobaadkan 5 milyan oo dollar madax furasho uga qaateen Marka MV Abdullah oo todobaadyadii lasoo dhaafay ay ku haysteen xeebaha bari ee Soomaaliya.

Afduubkan markabkan waxaa ka horreeyay markab kale oo lagu magacaabo MV Ruen oo isna laga badbaadiyay burcad badeeda, kadib markii ay nolosha ku qabteen kooxdii afduubayaasha ahaa ciidanka badda Hindiya oo ugu dambeyn ka dajiyay dalka Hindiya.

Muqdisho (Caasimada Online) – Golaha Wasiirada Xukuumadda Soomaaliya ayaa maanta kulankoodii caadiga ahaa ku yeeshay magaalada Muqdisho, kaas oo uu guddoomiyey ra’iisul wasaare Xamza Cabdi Barre.

Shirka oo looga hadlay arrimo xasaasi ah ayaa waxaa sidoo kale lagu ansixiyay saddex heshiis oo ay wada gaareen dowladaha Soomaaliya iyo Tansaaniya.

Heshiiska koowaad ee ay golaha meel-mariyeen ayaa ah heshiis iskaashi oo u dhexeeya Soomaaliya iyo Tansaaniya, kaas oo kor loogu qaadayo xiriirka labada waddan oo ka wada tirsan ururka ganacsiga ee bariga Afrika.

Sidoo kale heshiiska labaad ayaa dhigaya wareejinta Maxaabiista Xukuman ee ku xiran xabsiyada dalka Tansaaniya, kaas oo fursad siinayo muwaadiniinta ku xiran dalkaas oo dib loogu soo celinayo gudaha Soomaaliya.

Heshiiska saddaxaad Iskaashiga Dalxiiska, si ay labada dal isku dhaafsadaan booqashooyin iyo safarro dalxiis oo muhiim ah.

Intaasi kqei Shirka Golaha Wasiirada ayaa looga dhageysatay Wasaaradaha Amniga Gudaha iyo Gaashaandhigga warbixinno la xiriira amniga guud ee dalka, xasillinta iyo dagaalka lagu ciribtirayo kooxaha Khawaarijta ah.

Soomaaliya ayaa muddooyinkii ugu dambeysay sameyneysay horumar dhanka islaashiga dibadda ah, waxayna dalal waa wayn lasoo gashay heshiis muhiim ah iyo kuwa kale oo quseeya difaaca guud ee dalka

Qoryooley (Caasimada Online) – Warar kala duwan ayaa kasoo baxaya dagaal culus oo markale maanta dib uga qarxay degmada Qoryooley ee gobolka Shabeelaha Hoose, kaas oo u dhexeeyo laba maleeshiyo beeleed, waxaana ka dhashay khasaare kala duwan.

Dagaalka ayaa xoogiisa waxa uu maanta ka dhacay xaafada Buulo Siidow, wuxuuna saameyn ku yeeshay dhaq-dhaqaaqa guud ee magaaladaasi.

Sawirro laga soo qaaday bartamaha Qoryooley ayaa muujinaya degmada oo haawaneysa, isla markaana cidlo ah, maadaama dagaalka si weyn looga dareemay halkaasi.

Ilo deegaanka ah Caasimada Online u sheegay in dagaalka uu weli socdo, isla markaana la’isku adeegsanayo hubka noocyadiisa kala duwan, ayna cakiran tahay xaaladda.

Ma cadda khasaaraha rasmiga ah ee ka dhashay dagaalkan oo marar badan kusoo laa laabtay aagga degmada Qoryooley ee gobolka Shabeelaha Hoose.

Xiisadda ka taagan Qoryooley oo u dhexeyso labada beelood ayaa todobaadii u dambeeyay ka taagnayd magaalada, waxaana fashilmay dadaallo lagu xalinayay labada dhinac.

Marka laga tego Qoryooley, waxaa jira magaalooyin kale oo ka tirsan Koonfur Galbeed, sida Diinsoor iyo Buurhakaba oo iyana ay ka taagan yihiin dagaal beeleedyo, waxaase faro-gelisay dowlad goboleedka Koonfur Galbeed Soomaaliya oo ciidan gaysay degmooyinkaasi.

Baraawe oo ah caasimada rasmiga ah ee maamulka, waxaa iyadana ka jirta xiisad kale oo u dhexeyso ciidamada Xoogga dalka iyo kuwa Koonfur Galbeed ee ku sugan magaaladaasi.

Muqdisho (Caasimada Online) – Ururka Midowga Yurub oo si weyn u taageero dowladda federaalka iyo howlgalka ATMIS ayaa mar kale qaaday tallaab ku aadan horumarinta amniga Soomaaliya, wuxuuna ansixiyay malaayiin doollar oo ku baxaysa amniga dalka.

Midowga Yurub ayaa haatan Soomaaliya u ansixiyay $74.4 milyan oo dollar, taas oo loogu talagalay qorshaha kala guurka ee ay ciidamada ATMIS uga baxayaan gudaha Soomaaliya.

Lacagtan ayaa si gaar ah loogu qarash gareyn doonaa wareejinta mas’uuliyadda amniga ee ciidamada ATMIS oo la filayo inay Soomaaliya ka baxayaan dhammaadka sanadkan 2024.

Waxaa kale oo jirtay lacag kale oo gaareysa $42.5 milyan oo uu Midowga Yurub ku taageeri doono ciidamada Xoogga dalka, si ay awood ugu yeeshaan la wareegidda amniga dalka.

Taageeradan dhaqaale ee ay dalalka Yurub ku bixinayaan Soomaaliya ayaa wax badan ka tari doonto amniga dalka, maadaama la dhisayo ciidan Soomaali ah oo beddalaya ATMIS.

Waxaa haatan dowladda federaalka ay waddaa diyaar garowgii ugu dambeeyay ee la wareegidda amniga, maadaama uu si tartiib ah ku bilowday qorshaha bixista ATMIS oo horay ciidamada Xoogga dalka ugu wareejisay xarumo iyo saldhigyo muhiim ah.

Dhinaca kale waxaa dhowaan la qorsheynayaa in 4,000 oo askari oo dheeraad ah oo ka tirsan howlgalka ATMIS laga saaro Soomaaliya dhamaadka bisha soo socota June.

Si kastaba, Midowga Yurub ayaa taageera dhaqaale oo weyn ku bixiya howgalka ATMIS, isaga oo horay u siiyay ku dhawaad 2.87 bilyan oo dollar tan iyo 2007.