Xudur (Caasimada Online) – Caddow Xassan Cabdi Cali oo ka tirsanaa kooxda Al-Shabaab ayaa maanta isku soo dhiibay ciidanka hay’adda Nabad-sugidda Koonfur Galbeed ee ku sugan degmada Xudur ee gobolka Bakool.

Caddow ayaa Al-Shabaab ka tirsanaa illaa 2013-kii, wuxuuna ugu dambeyntii uu maanta go’aansaday inuu isku dhiibo dowladda, isaga oo kooxda kala soo goostay qori AK47 ah iyo booshkiisa.

Ninkan oo warbaahinta dowladda ay soo bandhigtay ayaa waxa uu sheegay in uu kooxda uga soo baxay kadib markii uu fahmay dhagarta Khawaarijta, isaga oo ka faaideysanaya cafiska dowladda.

Caddow oo kooxda kaga biiray degmada Xudur ayaa waxa uu tababar kusoo qaatay deegaanno hoostaga gobolka Galgaduud, wuxuuna kamid ahaa sanadaha uu ka tirsanaa kooxda qeybta ay ugu yeerto jabhadda.

Waxa uu kasoo qeyb qaatay dhowr dagaal oo ka kala dhacay gobollada dalka, taasi oo markii dambe sababtay in uu isku dhiibo ciidamada dowladda kadib markii ciidamad dowladda iyo shacabka hubeysan ay guullo ka gaareen dagaalka ka dhanka ah Al-Shabaab.

Caddow oo la hadlay laamaha amniga ayaa sheegay in uu fahmay dhagarta kooxda, isaga oo saaxiibadiis kale ee weli ku harsan kooxda ugu baaqay inay isaga soo baxaan, ayna ka faa’iideystaan fursadda cafis ee dowladda u fidisay.

Si kastaba, isa-soo dhiibista Caddow ayaa kusoo aadeysa xilli gobollada dalka ay ka socdaan howl-gallo ka dhan ah Al-Shabaab, kaasi oo uu hormuud ka yahay madaxweyne Xasan Sheekh oo muddo ka badan hal bil u jooga Dhuusamareeb cirib-tirka kooxaha argagixisada.

Dhuusamareeb (Caasimada Online) –Madaxweynaha Jamhuuriyadda Federaalka Soomaaliya Xasan Sheekh Maxamuud ayaa Xeer Madaxweyne ugu magacaabay Sareeye Guuto Madeey Nuureey Sheekh Taliye Ku xigeenka Ciidanka Xoogga Dalka Soomaaliyeed.

Sidoo kale, Madaxweynaha ayaa darajada Gaashaanle Sare u dalacsiiyey Dayax Cabdi Cabdulle, waxa uuna u magacaabay Taliyaha ciidanka dhulka ee Ciidanka Xoogga Dalka Soomaaliyeed.

Madaxweynaha oo magaacaabistan ku saleeyey sharciga dhismaha Ciidanka Xoogga dalka ee Lr. 15 ayaa u rajeeyay Taliyayaasha cusub in uu Alle u fududeeyo gudashada howlaha muhiimka ah ee horyaalla.

Madaxweynaha ayaa xusay in muwaadin kasta oo Soomaaliyeed, shacab iyo ciidanba ay maanta hortaallo masuuliyad adag oo ku saabsan xoreynta dalka.

Madaxweynaha ayaa sidoo kale bogaadiyey sida naf-hurnimada leh ee Ciidamada Qalabka Sida iyo shacabka Soomaaliyeedba ay uga go’an tahay in dalka laga sifeeyo Khawaarijta.

Xeerkan Madaxweyne ayaa ku dhaqan-galay maanta oo Isniin ah, 18-ka Sebteembar 2023, saxiixa Madaxweynaha Jamhuuriyadda Federaalka Soomaaliya Mudane Xasan Sheekh Maxamuud.

Taliyaha ciidanka dhulka ayaa dhawaan lala magacaabay taliyaha guud ee ciidanka xoogga dalka, balse hadda ayaa laga qaaday xilkii waxaana loo magacaabay Gaashaanle Sare Dayax Cabdi oo ka mid ahaa saraakiisha ugu sareysa GorGor, sidoo kale sarkaalkaan wuxuu Madaxweynuhu dalacsiiyey hal darajo.

Hoos ka eeg sawirrada saraakiisha la magacaabay:

Dhuusamareeb (Caasimada Online) – Ciidanka dowladda iyo shacabka hubeysan ayaa goordhoweyd si buuxda ula wareegay gacanta ku haynta magaalada Camaara ee gobolka Mudug.

Qabashada Camaara ayaa waxaa hadda u xaqiijiyay warbaahinta dowladda, wasiir ku-xigeenka wasaaradda warfaafinta dhaqanka iyo dalxiiska.

Wasiir Cabdiraxmaan Yuusuf Cadaala oo hadda ku sugan magaalada Istaraatijiga ah ee Camaara ayaa warbaahinta Qaranka u sheegay in magaalada si buuxda loola wareegay kadib markii saddex jiho ay ciidamadu weerar uga qaadeen

Camaara oo ah magaalo istaraatiiji ah ayaa waxay wararka sheegayaan inay iskaga carareen dagaal-yahaanadii ku sugnaa kadib markii ay ka warheleen howl-galka culus ee kusoo wajahan iyo baaxadda ciidanka isgarabsanaya.

Qabashada Camaara ayaa imaneysa maalin un kadib markii ciidanka dowladda iyo shacabka hubeysan ay kooxda ka xoreeyeen magaalada Bacaadweyn iyo deegaanka Qeycad oo ka tirsan gobolka Mudug, halkaas oo sanado badan ka talineysay kooxda.

Kooxda Al-Shabaab ayaa kasii baxaysa inta badan gobolka Mudug, waxaana la aaminsan yahay in haddii ay Mudug kasoo dhamaadan in aanay ku hakan karin Galgaduud oo ay ku go’doomi doonaan.

Si kastaba, Qabashada Bacaadweyn iyo Camaara ayaa xilligaan waxay wax weyn uga dhigan tahay gulufka shacabka Soomaaliyeed iyo dowladooda iskaga saarayaan argagixisada.

Doolow (Caasimada Online) – Faah-faahino dheeraad ah ayaa laga helaya qarax xooggan oo maanta ka dhacay gobolka Gedo.

Qaraxa ayaa waxaa lala beegsaday kolonyo ay la socdeen ciidamo iyo saraakiil ka tirsan kuwa dowladda, wuxuuna qabsaday xilli ay marayeen waddada xiriirisa magaalooyinka Luuq iyo Doolow.

Kolonyada qaraxa lala beegsaday ayaa la sheegay inuu qeyb ka ahaa abaanduulaha ciidamada milateriga guutada 10-aad, qeybta 43-aad ee gobolka Gedo, Gaashaanle Dhexe Cabdirashiid Maxamed Cismaan (Rashiid Bohol).

Wararka ayaa sheegaya in qaraxan uu sababay dhimasho iyo dhaawac. Ururka Al-Shabaab ayaa sheegtay mas’uuliyadda weerarkan.

Wararka ayaa intaas kusii daraya in qaraxa uu haleelay gaariga uu saarna abaanduulaha, islamarkaana uu dhaawac kasoo gaaray, halka ay ku dhinteen lix askari oo kale.

Dhaawaca abaanduulaha guutada ayaa sidoo kale waxaa kasoo baxaya warar kala duwan, waxaana la sheegaya in uu yahay mid fudud, iyada oo islamarkiiba la geeyay degmada Luuq ee gobolkaasi.

Qaraxa oo loo maleynayo inuu ahaa nooca loo yaqaano Miinada ayaa waxa uu kusoo aadaya xilli kooxda ay culeys xooggan wajaheyso, uuna dagaal xooggan kaga socdo gobollada dhexe, islamarkaana laga qabsaday degmooyin iyo deegaano muhiim ah.

Si kastaba, Kooxda Al-Shabaab ayaa horay weeraro iyo dilal shirqool ah oo lagu bartilmaameedsaday masuuliyiin muhiim ah ka geystay gobolka Gedo, oo iyagu weli gacanta ku haya deegaano ka tirsan gobolkaasi.

Xarardheere (Caasimada Online) – Maxkamadda ciidamada qalabka sida, qaybta 21-aad ayaa maanta xukun dil toogasho ah ku filsay askari ka tirsanaa ciidamada milatariga, kaas oo 16-kii bishaan toogasho lagu xukumay, kadib markii uu dilka gaystay magaalada Xarardheere ee gobolka Mudug.

Askariga maanta xukunka qasaasta lagu fuliyay ayaa waxaa lagu magacaabi jiray, Shariif Abshir Cabdiraxmaan Jaamac (Jini) kaas oo ay dhowaan xukuntay maxkamadda ciidamada.

Shariif Jini ayaa lagu helay inuu 11-kii September uu degmada Xarardheere ku dilay marxuum Saacid Cali Cabdi Shabeel oo ay ka wada tirsanaayeen ciidanka milatariga.

Sidoo kale, Maxkamadda ayaa maalintaas isna xukun sanad xabsi ah ku ridday Mursal Maxamed Cabdi (Canjeex) oo dhankiisa ku eedeysnaa in uu qalqalgelin ka gaystay degmada Xarardheere ee gobolka Mudug ,kaddib markii uu isna riday rasaas xoogan.

Goobta lagu toogtay Shariif Jini ayaa waxaa ku sugnaa saraakiil ka tirsan maxkamadda, mas;uuliyiinta degmada iyo ciidamo goobjoog u ahaa falka toogashada.

Toogashadan oo si deg deg ah loo fuliyay ayaa farriin u direyso ciidamada kale, si ay uga digtoonaadaan inay dhexdooda is dilaan.

Maxkamadda Ciidamada Qalabka Sida waxa ay u digtay ciidamada Dowladda Federaalka ee ku howlan qalqalgelinta Amniga sida in ay ridaan rasaas ama ay dhexdooda isku geysaan dhibaatooyin kala duwan.

Si kastaba, saraakiil ka tirsan Maxkamadda Ciidamada Qalabka Sida ayaa haatan ku sugan furimaha dagaalka iyo deegaannadii dhowaan Al-Shabaab laga qabsaday, si ay ula socdaan fal dambiyeedka ka dhici kara ciidamadaas howlgallada ku jira.

Xudur (Caasimada Online) – Wararka ka imaanaya gobolka Bakool ayaa sheegaya in mar kale ciidamada Itoobiya oo kaashanaya kuwa dowladda federaalka ay maanta qaadeen dagaal rogaal celis ah oo ay uga jawaabeen weerar ay shalay Al-Shabaab la beegsadeen ciidan Itoobiyaan oo ku sii jeeday degmada Waajid, kaas oo dhaliyay khasaare lixaad leh.

Dagaalka rogaal celiska oo ahaa mid xoogan ayaa waxaa lagu soo warramayaa in ciidamada isbhaysanaya ay ku qaadeen goobo ay ku sugnaayeen xubo ka tirsan Al-Shabaab, isla-markaana uu jiro khasaare dhimasho iyo dhaawac ka dhashay halkaasi.

Sarkaal ka tirsan milatariga Soomaaliya oo ku sugan degmada Xudur ayaa sheegay in howlgalaas oo jawaab ah lagu dilay ugu yaraan 55 xubnood oo ka tirsanaa Al-Shabaab.

Weerarka lagu dilay xubnahaas ayaa yimid, kaddib markii ciidamada iskaashanaya ay weerar rogaal celis ah ku qaadeen kooxda Alshabaab, kuwaas oo Axadii shalay weeraray kolonyo ka tirsan ciidanka Itoobiya ee ku sugan gobolka Bakool ee Koonfur Galbeed.

Kooxda Al-Shabaab ayaa bayaan ay soo saartay ku sheegtay inay dagaalkaas ku dishay illaa 167 askari oo Itoobiyaan ah, isla-markaana ay burburisay baabuur militari.

Hase yeeshee, safiirka Itoobiya ee Soomaaliya Mukhtar Mohamed Ware ayaa VOA u sheegay inuu baraha bulshada ku arkay sheegashada Al-Shabaab, wuxuuna ku qeexay “dacaayad.”

“Waa ay isku dayi karaan [inay weeraraan ciidamada Itoobiya] balse xitaa 10 daqiiqo rasaas kuma ridi karaan ciidamada difaaca Itoobiya,” ayuu yiri.

“Ciidankani waa kuwo xirfad leh; waa mid aad u qalabaysan, aadna u abaabulan, mar walbana si adag ayay u garaacaan marka ay timaado Al-Shabaab, marka tani waa dacaayad kaliya; ma ahan wax ka badan dacaayad ka dhan ah Itoobiya iyo ciidamada difaaca Itoobiya.”

Itoobiya ayaa kumanaan askari usoo dirtay Soomaaliya kuwaasi oo qeyb ka ah howlgalka ATMIS, iyo ciidamo kale oo Soomaaliya ku jooga heshiisyo ay la gashay dowladda dhexe.

Dhuusamareeb (Caasimada Online) – Xildhibaan Cabdisalaan Xaaji Axmed (Dhabancad) oo ka tirsan Golaha Shacabka ayaa weli ku sugan jiidda hore ee dagaalka, wuxuuna kamid ahaa madaxdii ay waxyeelada faduud kasoo gaartay weerarkii todobaadkan ka dhacay deegaanka Laas-gacmey, kadib markii qarax lagu weeraray isaga, Qoor Qoor iyo Cabdi Qaybdiid

Dhabancad oo wareysi gaar ah siiyay Telefishinka Universal ayaa ka hadlay sababihii uu uga haray diyaaraddii loo diray dhaawacyada ee soo qaaday madaxweynaha dowlad goboleedka Galmudg iyo Senator Cabdi Qaybdiid, wuxuuna sheegay inay ahayd inuu ka dhabeeyo ujeedka uu u tegay Galmudug oo ah xoreynta deegaanada ay joogaan Shabaab.

“Waxaan uga haray howshii aan u imid oo qabyo ah inaan ka tegin, illaa inta aan ka gaareyno meeshii aan u soconay oo ah xoereynta gobolka Mudug” ayuu yiri Dhabancad.

Sidoo kale wuxuu sheegay in haatan ay wanaagsan tahay xaaladdiisa, isla-markaana aysan jirin khatar weyn oo uu hadda wajahayo, marka laga reebo nabaro yar oo ku yaallo.

“Nabarada igu yaallo kuwa khatar ah uma eka, mana u arkin inaan raaco diyaaraddii dhaawacyada loo soo diray” ayuu hadalkiisa sii raaciyay xildhibaanku.

Waxaa kale oo uu intaasi kusii daray inuu hadda gaaray ujeedkii uu u tegay Galmudug oo uu ku sheegay inay ahayd inuu booqdo magaalada Bacaadweyne oo xor ah, wuxuuna kamid mas’uuliyiintii u horreysay ee tegtay, kadib markii shalay la qabtay magaaladaasi.

“Ujeedadii aan usoo baxay waxay ahayd inaan tego Bacaadweyne, ilaaheyna waa noo rumeeyay oo waan tegnay annaga oo nabad ah, waana xorowday” ayuu mar kale yiri.

Galmudug ayaa waxaa hadda ka socda guluf dagaal oo ka dhan ah Al-Shabaab, kaas oo ujeedka uu yahay in laga tir tiro guud ahaan gobollada dhexe ee dalka.

Addis-Ababa (Caasimada Online) – Dowladda Itoobiya ayaa beenisay sheegashooyinka kooxda Al-Shabaab kadib dagaal ciidankeeda iyo maleeshiyada shalay ku dhex-maray gobolka Bakool ee koonfur-galbeed Soomaaliya.

Dagaalka ayaa yimid kadib markii Al-Shabaab ay weerareen laba kolonyo oo ka mid ciidamada Itoobiya, oo mid uu ka yimid Yeed kuna socda Waajid, halka kan kale la beegsaday xillii ay ka safrayeen Ceel-Barde kuna socdeen Xudur. Ciidamada Itoobiya ayaa fariisimo ku leh Xudur iyo Waajid.

Kooxda Al-Shabaab ayaa bayaan ay soo saartay ku sheegtay inay dagaalka ku dishay 167 askari oo Itoobiyaan ah, islamarkaana ay burburisay baabuur militari.

Hase yeeshee, safiirka Itoobiya ee Soomaaliya Mukhtar Mohamed Ware ayaa VOA u sheegay inuu baraha bulshada ku arkay sheegashada Al-Shabaab, wuxuuna ku qeexay “dacaayad.”

“Waa ay isku dayi karaan [inay weeraraan ciidamada Itoobiya] balse xitaa 10 daqiiqo rasaas kuma ridi karaan ciidamada difaaca Itoobiya,” ayuu yiri.

“Ciidankani waa kuwo xirfad leh; waa mid aad u qalabaysan, aadna u abaabulan, mar walbana si adag ayay u garaacaan marka ay timaado Al-Shabaab, marka tani waa dacaayad kaliya; ma ahan wax ka badan dacaayad ka dhan ah Itoobiya iyo ciidamada difaaca Itoobiya.”

Safiirka ayaa uu sidoo kale diiday bayaanka Al-Shabaab oo ku tilmaamay ciidamada Itoobiya inay yihiin “Saliibiyiin.”

“Ma nihin Saliibiyiin; Waxaan halkaas ku joognaa go’aannadii Midowga Afrika iyo beesha caalamka ee lagu taageerayo dowladda sharciga ah ee Soomaaliya iyo dadaalka ay ugu jirto sidii dalkan nabad looga dhalin lahaa. Marka, tani waa dacaayad kaliya oo ay afuufayaan Al-Shabaab oo inta badan lagu yaqaanno.”

Itoobiya ayaa kumanaan askari usoo dirtay Soomaaliya kuwaasi oo qeyb ka ah howlgalka ATMIS, iyo ciidamo kale oo Soomaaliya ku jooga heshiisyo ay la gashay dowladda Muqdisho.

Ilo-wareedyo amni ayaa VOA u sheegay in ciidamada la weeraray aysan qeyb ka aheyn ATMIS.

“Weerarka gaadmada ah waa run, dhacdadu waxay ahayd mid xun, laakiin tirada Al-Shabaab ay sheegeen waa la buunbuuniyay,” ayuu yiri il-wareedka.

VOA

Mahadaay (Caasimada Online) – Maleeshiyaad badan oo ka tirsan kooxda Al-Shabaab ayaa in ka badan 24-saac ku go’doonsan deegaan lagu magacaabo Ciid-ciidka oo u dhaxeeya degmada Mahadaay iyo deegaanka Cali-fooldheere ee gobolka Shabeellada Dhexe.

Kooxdaan la go’doomiyey ayaa la ogaaday in dhowrkii maalmood ee lasoo dhaafay ay ka soo gudbayeen wabiga Shabeelle ee aagga Mahadaay, waxayna doonayeen inay kala jiraan degmooyin la xoreeyey ee gobolka Shabeellada Dhexe.

Kooxdii ka soo gudubtay wabiga oo la sheegay inay aheyd boqolaal dagaalyahan ayaa waxaa shalay gelinkii dambe ku bilowday duqeymo iyo dagaallo toos ah, waxayna noqdeen kuwo go’doomay iyo kuwo lagu dilay duqeymo iyo dagaal toos ah.

Dhul keymo ah iyo godad ay qoteen ayey ku go’doonsan yihiin Shabaab-kii ku dhiiraday inuu ka soo gudbo wabiga Shabeelle ee u socday degmooyinka xorta ah ee gobolka Shabeellada Dhexe, ilaa hadda waxaa la sheegay inay ku socoto duqeyn aan kala joogsaneyn.

Duqeymaha dhacay waxaa lagu dilay oo lagu dhaawacay dagaalyahano badan, kuwa weli nool ee dagaalamaya waxaa ku socota duqeyn, sidoo kale waxaa hor fadhiya oo meelaha qaar ay dagaal toos ah kala kulmayaan ciidamo kuwa deegaanka ah oo garab ka helaya ciidanka xoogga dalka.

Halkaas waxaa laga soo weriyey qisada wiil dhalinyaro ah oo ka mid ahaa shacabka ku nool aagga Mahadaay oo ku dhiiraday inuu qoriga ka furto nin Shabaab ah oo god ku dhuumanaya, kaas oo la dilay, kadib markii ay u suurta-geli weysay inuu furto qorigii ninka Shabaab-ka ah.

Shabaab-ka go’doonsan waxaa ka dhamaatay sahaydii, godadka ay qoteen kama bixi karaan, intooda badan waxaa lagu laayey duqeymo soo bilowday shalay galab, xalay ilaa maanta, sidoo kale ciidamada deegaanka ayaa laayey kuwii isku dayey inay cagahooda uga baxsadaan halkaas.

Dowladda Soomaaliya ayaa maanta sheegtay in howlgalka aagga Mahadaay uu weli socdo oo khasaaraha lagu gaarsiiyey Al-Shabaab aysan ka hor dhaceyn oo dib ay kasoo shaaci doonto natiijada markii lasoo afjaro kooxdaas.

Jowhar (Caasimada Online) – Howl-galka Ururka Midowga Afrika ATMIS ayaa haatan bilaabay wajigii labaad ee dhimista ciidamadooda jooga gudaha Soomaaliya, waxaana Axaddii shalay talisku wareejiyay saldhigga Biyo Cadde ee gobolka Shabeelaha Dhexe.

Saldhiggan ayaa waxaa sanadihii u dambeeyay ka howlgalayay ciidanka Burundi ee qaybta ka ah howlgalka ATMIS, wuxuuna ahaa saldhigga ugu weyn ATMIS ee Shabeelaha Dhexe.

Sidoo kale waa saldhig istaraatiiji ah, maadaama uu ku yaalla furinta hore ee difaaca magaalada Jowhar ee caasimada maamul goboleedka HirShabelle.

Munaasabadda wareejinta saldhigga ayaa waxaa goob joog ka ahaa mas’uuliyiin ka kala socday Hawlgalka ATMIS, dowladda federaalka ah ee Soomaaliya iyo xafiiska taageerada Qaramada Midoobay ee Soomaaliya ee UNSOS.

Waxaa munaasabadda hadal ka jeediyay taliyaha ATMIS ee saldhigga Biy Cadde Gaashaanle Dhexe Philippe Butoyi, kaas oo madasha ka sheegay in wareejintan ay cadeyn u tahay hoggaanka Somalia ee dib u dhiska dalka, ilaalinta shacabka iyo xaqiijinta amniga

“Waxaan marqaati ka nahay guulaha laga gaaray furimaha dagaalka oo ay ciidamada amaanka ee Soomaaliya ku muujiyeen awooddooda sii kordheysa ee ku aaddan sugidda amniga dalka. Waxaan aragnay ciidamada oo weeraray, qabsaday oo gacanta ku dhigay deegaano badan,” ayuu yiri Gaashaanle Dhexe Philippe Butoyi,

Waxaa kale oo uu intaasi kusii daray “In ay Ciidamada ammaanka Soomaaliyeed oo si xirfad leh u tababaran oo si wanaagsan u qalabaysan ay yihiin kuwa wax ka beddelaya dagaalka lagula jiro argagixisada Soomaaliya.”

Dhankiisa taliyaha ciidanka Xoogga dalka ee Saldhigga Biyo Cadde, Saddex Xidigle Axmed Cali Taakow, ayaa saxiixay warqadaha wareejinta ee Saldhigga, taas oo cadayn u ah wareejinta mas’uuliyadda amniga, waxaana goob joog ka ahaa wakiil ka socday Xarunta dhexe ee Hawlgalka ATMIS, Gaashaanle Dhexe Edouard Nzohabonayo iyo, Madaxa UNSOS ee unugga Qorshaynta Kala-guurka, Patrick Duah, iyo Taliye Ku-xigeenka Waaxda Hawlgallada ee CXDS, Gaashaanle Muxudiin Axmed.

Intii ay wareejintu socotay ayaa hay’adda UNSOS oo ATMIS ka taageerta dhanka saadka aya waxa ay sidoo kale ku wareejisay Ciidanka Xoogga Dalka Soomaaliyeed qalab ay Qaramada Midoobay leedahay oo ay ka mid yihiin, Matoor, Warshadda biyaha sifeysa, baalayaasha cadceedda, ceelal riig ah, talaajado, qaboojiyaal, iyo haamaha kaydka biyaha iyo agab kale.

“Iyada oo qayb ka ah hannaanka wareejinta, UNSOS waxa ay qalab ay Qaramada Midoobay leedahay ugu deeqday Ciidamada XDS ee kala wareegaya ATMIS saldhigga. UNSOS waxa ay sidoo kale tababar u qabatay saraakiisha SNA si ay ugu suurtagasho in ay ku shaqeeyaan oo ay dayactiraan qalabkan,” ayuu yiri Madaxa Unugga Qorsheynta Kala-guurka ee UNSOS, Patrick Duah.

Si kastaba, dhimista Ciidamda ATMIS aya imaanaysa kadib Qaraarradii Golaha Ammaanka ee Qaramada Midoobay: 2628 (2022), 2670 (2022), iyo 2687 (2023), oo faraya ATMIS in ay ka soo saarto Soomaaliya laba kun oo askari marka la gaaro Juun 2023-da iyo saddex kun oo kale dhamaadka Sebtembar 2023-da.

Dhuusamareeb (Caasimada Online) – Madaxweynaha Jamhuuriyadda Federaalka Soomaaliya Mudane Xasan Sheekh Maxamuud ayaa maanta warqadaha aqoonsiga Danjirenimo ka guddoomay safiirka cusub ee Midowga Yurub Marwo Karin Johansson.

Madaxweyne Xasan Sheekh oo magaalada Dhuusamareeb u jooga hoggaaminta dagaalka ka dhanka aragagixisada ayaa waxay danjiraha cusub ee Midowga Yurub ugu hambalyeysay dowladda shacabka Soomaaliyeed guulaha laga gaaray dagaalka Al-Shabaab.

Marwo Karina Johansson ayaa sidoo kale waxay madaxweynaha la wadaagtay dadaalka ay ku bixin doonto adkaynta xiriirka iyo wada-shaqaynta ka dhexeeya Soomaaliya iyo Midowga Yurub.

Sidoo kale, Madaxweyne Xasan Sheekh iyo Danjire Karin ayaa ka wada-hadlay xoojinta taageerada Midowga Yurub ay siiyaan Soomaaliya, gaar ahaan howl-gallada sifeynta kooxaha argagixisada iyo sugidda amniga dalka.

Madaxweynaha ayaa intii kulanka socday u xaqiijiyay danjiraha in dowladda federaalka Soomaaliya ay si buuxda ula shaqeyn doonto, una fududayn doonto gudashada waajibaadka diblumaasiyadeed ee loo igmaday.

Xasan ayaa weli magaalada Dhuusamareeb ee xarunta maamulka Dhuusamareeb u jooga dardar-gelinta dagaalka kooxda Al-Shabaab ka dhanka ah, xilli ay socdaan howl-galladii u dambeeyay ee lagu soo afmeerayo wejiga koowaad ee dagaalka.

Si kastaba, wejiga labaad ee dagaalka Al-Shabaab ayaa dhawaan bilaaban doona, kadib marka uu soo idlaado gulufka uu madaxweynuhu xarunta uga dhigtay Dhuusamareeb, kaasi oo dhameystir u ah wejiga hore ee dagaalka, si loo guda-galo wejiga xiga oo ay qeyb ka noqonayaan ciidamo ka socda dalalka deriska.

Jawiil (Caasimada Online) – Abaabul dagaal oo ka dhan ah kooxda Al-Shabaab ayaa maalmahaan ka socda deegaanada dhaca galbeedka gobolka Hiiraan, kaas oo beelaha Gaaljecel iyo Udeejeen ay wado.

Magaalooyinka Beledweyne iyo Jawiil ee gobolka Hiiraan waxaa saacadihii lasoo dhaafay lagu soo bandhigay ciidankii ugu badnaa oo dadka deegaanka ah, kuwaas oo hubka u qaatay inay la dagaalamaan Khawaarijta Al-Shabaab.

Ciidankaan is baabulay oo wata gadiid dagaal ayaa lagu wareejiyey taliska ciidanka xoogga dalka oo ay ka barbar dagaalami doonaa maalmaha soo socda oo howlgal culus uu ka bilaaba doono galbeedka Hiiraan.

Beelaha Gaaljecel iyo Udeejeen ayaa ka mid ah beelaha dhulka ugu badan ay Shabaab ka heystaan, waxaana dhowrkii bilood ee lasoo dhaafay deegaanada beelahaas ka socday abaabul dagaal kii ugu cuslaa oo ay sameeyaan.

Beelahaas oo dega dhul balaaran ayaa dhamaan deegaanada ay ka degaan gobolka Hiiraan iyo qeybo ka mid ah Shabeelooyinka waxaa maamusha Khawaarijta Al-Shabaab, xilli beesha la degta ee Xawaadle ay dhamaan dhulkeeda bariga Hiiraan ka xoreysatay kooxda.

Is xoreynta Xawaadle ayaa xujo ku noqotay beelaha kale ee dhulkooda Shabaab heysto, waxayna hadda beelahaasi ku dhaqaaqeen sidii ay isaga dul qaadi lahaayeen kooxda, ciidamadii iyo hubkii ugu badnaa ayey maalmahaan isku soo uruuriyeen saraakiisha iyo siyaasiyiinta Gaaljecel iyo Udeejeen.

Siyaasiyiinta beesha Udeejeen ayaa maanta ciidankii lasoo abaabulay oo la isugu keenay deegaanka Jawiil waxay ku wareejiyeen taliyaha guutada 5-aad ee qeybta 27-aad, si maleeshiyaadkaan ay ciidanka qaranka uga barbar dagaalamaan.

Saraakiishii iyo masuuliyiintii beesha Gaaljecel ee u hadlay ciidankii dagaalka u diyaarsanaa ayaa wacad ku maray inay dhulkooda ka xoreysa doonaan kooxda, si lamid ah inta badan beelaha kale ee dega HirShabeelle iyo Galmudug.

Abaabul kale oo beeshaani ay wado ayaa dhowrkii bilood ee u dambeeyey ka socday aagga degmada Walaweyn ee gobolka Shabeellada Hoose, halkaas oo Xildhibaan Daahir Amiin Jeesow uu joogo mudo dhowr bilood ah, Jeesow oo hadlay ayaa wacad ku mara inuusan soo laaba doonin, isagoo Shabaab ka xoreyn dhulka beeshiisu ay ka degto gobolkaas.

Hoos ka daawo

Amsterdam (Caasimada Online) – Waxaa shalay Magaalada Magaalada Amsterdam ee dalka Netherland ku shiray ururada Soomaalida ah ee ku middeysan dalladda “Isutagga Ururada Soomaalida ee Nederland” oo magaceeda loo soo gaabiyo FSAN.

Dalladda FSAN,  oo ay ku middeysan yihiin in ka badan 45 ururo Soomaali ah oo ka dhisan Nederlands, waxaa la aasaasay 1994-tii, iyada oo Guddiga dalladda oo la doorto saddexdii sanno halmar ay ka shaqeeyaan isku xirka Jaaliyadaha Soomaalida & Dowladda Nederland & Sidoo kale wacyigelinta mushtamaca Soomaalida.

Kulankii shalay waxaa lagaga hadlayay qoddobo ay ka mid yihiin:-

1- Miisaaniyada ururka
2- Qiimeyn lagu sameynayay waxyaabihii ururka u qabsoomay muddada sannadka & barka ah ee ay shaqeynayeen guddiga cusub.
3- Eegista & ansixinta 2 urur oo ku soo biiray dalladda.
4- Balaarinta xubnaha guddiga oo markii hore ahaa 5 oo laga dhigay 7, iyo qoddobo kale.

Guddoomiyaha dalladda Maxamed Cabdullaahi [Askari], Guddoomiye ku-xigeenka C/qaadir Nuune, Xisaabiye Cabdiwahaab Yariisow iyo Maxamed Cusmaan [Guurre] ayaa xubnihii metalayay ururada si guud ugu faahfaahiyay qoddobadii laga hadlayay.

Ururada ayaa ansixiyay in la ballaariyo Guddiga, waxaanna ku soo biiray saddex xubnood oo kala ah: Cali Amiin, Raaxo Cabdishakuur Cilmi

HOOS KA DAAWO VIDEOW-GA KULANKA.

Xarardheere (Caasimada Online) – Ciidamada Xoogga dalka iyo kuwa deegaanka ayaa lagu soo warramayaa inay weli howlgallo ka wadaan gobollada dhexe, ayaga oo saacadihii ugu dambeeyay la wareegay deegaano muhiim ah oo ay kamid tahay Bacaadweyne.

Wararka ayaa sheegaya in ciidamada huwanta ee shalay qabtay magaalada Bacaadweyne ay sii dhaq-dhaqaaqayaan, waxayna ku wajahan yihiin magaalada kale ee Camaara oo iyana hoostagta magaallo xeebeedka Xarardheere ee koonfurta gobolka Mudug.

Ilo wareedyo lagu kalsoonyahay ayaa innoo sheegay in haatan ciidamada ay joogaan deegaan u dhexeeya Bacaadweyne iyo Camaara, ayna doonayaan inay galaan magaalada.

Xaaladda ayaa ah mid aad u kacsan, waxaana dhaq-dhaqaaqyo iska soo horjeedo laga dareemayaa qaybo badan oo kamid ah Galmudug oo ka socdo guluf ka dhan ah Shabaab.

Sidoo kale, waxaana dagaalkan kusii biiraya ciidamo horleh oo ka yimid dhanka magaalada Gaalkacyo iyo kuwa kale oo kasoo baxay dhanka degmada Maxaas ee gobolka Hiiraan.

Saraakiisha ciidamada dowladda ayaa shaaca ka qaaday in ujeedkooda uu yahay in Al-Shabaab laga saaro dhulkaasi, waxayna ballan qaadeen in aysan dib uga soo bixi doonin.

Howlgalladan ayaa waxaa hoggaaminaya madaxweyne Xasan Sheekh oo ku dhowaad laba bilood fadhiya caasimada Galmudug, si uu dhiirogeliyo ciidanka ku jira dagaalka.

Dagaalkii ugu cuslaa ayaa Shabaab hadda kaga furan Galmudug, ugu yaraan seddax jiho oo kala ah Ceel-lahelay, Xinlebi iyo Laas-gacamey ayey kala joogaan ciidamada dowladda, deegaanadaan iyo kuwo kaleba waxaa kooxda laga xoreeyey toddobaadkaan dhamaaday.

Cadale (Caasimada Online) – Hay’adaha ammaanka ee dowlad goboleedka HirShabeelle ayaa xalay qaaday tallaabo la mahadiyey, kadib markii ay baacsadeen, kuna guuleysteen inay soo qabtaan koox tuugo ah oo dhac u geysatay dad safar ah.

Dhacaas ayaa loo geystay dad u socday magaalada Gaalkacyo oo ka baxay Muqdisho, waxaana lagu baartay meel banaanka ka ah magaalada Cadale ee gobolka Shabeellada Dhexe.

Darawalkii waday gaariga xalay dhaca loo geystay ayaa ka sheekeeyey sida ay wax u dhaceen, isagoo sheegay in markii ay ka casheeyeen Cadale ay ka dhaqaaqeen xalay 10:00 saac, markii ay magaalada ka baxeen ayuu sheegay in koox tuugo ah ay xabado ku fureen.

Markii uu gaarigu istaagay ayay tuugadu baaratay lix nin iyo afar gabdhood oo la socday gaari Leylo ah oo Gaalkacyo u socday, sidoo kale dadkaas waxay sheegeen in loo geystay jir dil xoog leh.

Markii laga furtay wixii ay taleefan, lacag, dahab iyo sahay kaleba siteen ayaa la fasaxay, waxayna dib ugu soo laabteen degmada Cadale, iyagoo booliskii joogay ku war-geliyey in lasoo baartay oo dhac xoog leh iyo jir-dil loo geystay.

Intaas kadib booliska degmada Cadale ayaa qaaday tallaabo guuleysatay, waxayna raadiyeen oo gacanta ku soo dhigeen kooxdii dhaca u geysatay dadkaas safarka ah.

Maanta ayaa saldhigga degmada Cadale lagu soo bandhigay afar nin oo tuugnimadaas ku eedeysan iyo alaabihii ay dadkaan ka dhaceen, shacabkii dhaca loo geystay ayaa warbaahinta la hadlay, iyagoo aad ugu mahadceliyey booliska Cadale.

Taliyaha booliska degmada Cadale oo kiiskaan ka hadlay ayaa sheegay inay muddo ku raadjoogeen kooxdaan xalay dhaca u geysatay shacabka, isla markaana howlgal dheer kadib ay ku guuleysteen inay soo qabtaan.

Dadka ku safra gaadiidka isaga kala gudba Muqdisho iyo gobollada dhexe ayaa dhibaatooyin badan ku qaba kooxo tuugo ah oo ku furata meelo ka tirsan Sh/Dhexe, waxayna xalay booliska degmada Cadale qaadeen tallaabo dhif iyo naadir ka ah gobolkaas.

Madaxweyne Xasan Sheekh ayaa bilo ka hor waxgaradka beelaha dega aaggaas isugu keenay degmada Cadale, isagoo wacad ku maray in isbaarooyinka loo dhigto dadka musaafirka ah ay dowladiisu diyaar u tahay inay ku suuliso awood ciidan, balse weli ma suurta gelin.

Hoos ka daawo