Muqdisho (Caasimada Online) – Ciidamada dowladda Soomaaliya iyo kuwa dadka deegaanka ayaa lagu soo warramaya in howl-galo ay sameeyeen saacadihii ugu dambeeyay kula wareegay deegaanka Geerille oo u dhaxeysa magaalooyinka Ceeldheer iyo Cowsweyne ee gobolka Galgaduud.

Saraakiil ka tirsan ciidamada dowladda federaalka ee howl-galkaas hoggaaminaya ayaa sheegay in bartilmaameedkooda ugu weyn uu yahay deegaanka Cowsweyne oo ay tuhunsan yihiin in kooxda Al-Shabaab ay kasoo abaabuleen weerarkii maalmo kahor ay ku qaaday Masagawaay.

Ciidamada iskaashaanaua ayaa sidoo kale waxaa la sheegay ina ku wajahan yihiin magaalooyinka Ceelbuur, Galhareeri iyo Waxbo, oo dhamaantood ka tirsan gobolka Galgaduud, kuwaasi oo weli ay ku sugan yihiin kooxda Al-Shabaab

Howl-gallada ka socda deegaanadaasi ayaa muhiim u ah adkeynta xadka ay wadaagaan dowlad-goboleedyada HirShabelle iyo Galmudug, sida uu sheegay guddoomiyaha Degmada Ceelbuur Nuur Xasan Guutaale.

Abaabul iyo dhaq-dhaqaaq xooggan ayaa ka socda deegaanno ka tirsan gobolka, iyada oo saraakiisha hoggaamibaysa ciidanka iskaashanaya ay sheegeen inay ku wajahan yihiin deegaanada ka maqan gacantooda, ee weli ku harsan yihiin kooxda Al-Shabaab.

Howl-galkan cusub ayaa imanaya xilli dagaalka ka dhanka Al-Shabaab ee ka socday qeybo kamid ah gobolada dalka uu gaabis ku yimid toddobaadyadii dambe, kuwaasi oo markii hore kooxda lagu gaarsiiyay jab xoogan, islamarkaana looga qabsaday deegaano horleh.

Si kastaba, waxaa dhawaan lagu wadaa in si rasmi ah u billowdo wejiga 2-aad ee dagaalka kooxda Al-Shabaab, iyada oo wejigan ay qeyb ka noqon doonaan ciidamada dalalka deriska, si guul wax ku ool ah looga gaaro dagaalkan oo wejigiisi hore lagu xoreeyay deegaano horleh oo sanado badan ku jiray gacanta kooxda.

Garoowe (Caasimada Online) – Faah-faahin dheeraad ah ayaa kasoo baxeysa iska hor-imaad khasaare dhimasho iyo dhaawac sababay oo xalay ka dhacay magaalada Garoowe ee caasimadda Puntland.

Iska hor-imaadkaas ayaa waxaa la xaqiijiyay inay ku dhaawacmeen saddex askari oo ka tirsan Booliska Puntland oo ay ku jirto gabar.

Warar kala duwan ayaa sheegaya inay jirto dhimasho uu sababay iska hor-imaadkan, inkasta oo illaa hadda si rasmi ah loo xaqiijin.

Iska hor-imaadka ayaa waxaa la sheegaya inuu dhexmaray ciidanka Booliska iyo rag hubaysan oo lala xiriirinayo maandooriyaha Khamriga.

Wararka ayaa intaas kusii daraya in qaar kamid ah ragga hubeysnaa ee iska hor-imaadku dhexmar ciidanka Booliska ayaa la xidhay.

Kooxaha isticmaala maandooriyaha Khamriga oo horseeday falal amni-darro ayaa muddooyinkii danbe ku soo badanaya Garoowe.

Dhacdadan ayaa qayb ka noqoneyso dhibaatooyinka amni ee mararka qaar ka dhaca magaalada Garoowe oo xarunta gobolka Nugaal, sidoo kalena ah caasimadda Puntland.

Puntland ayaa sidoo kale dagaal adag kula jirta kooxaha ka ganacsada maandooriyaha ee ku sugan magaalooyinka maamulkaas, islamarkaana dhibaatada ku haya bulshada.

Si kastaba, arrimahan ayaa kusoo aadaya xilli ay caasimada Puntland ee Garoowe ay ka taagan tahay xiisad kacsanaan ah oo ka dhalatay damaca madaxweyne Saciid Deni ee ah in la furo dastuurka Puntland iyo khilaafka doorashada dowladaha Hoose ee Garoowe iyo laba degmo kale.

Beruit (Caasimada Online) – Wafdi uu hogaaminayo Wasiiru-dowlaha Wasaaradda Shaqada iyo Arrimaha Bulshada XFS ayaa ka qayb galay Shirka Madasha labaad ee Arab Forum For Equality oo ka dhacay xarunta Qaramada Midoobay ay ku leedahay Beruit.

Wasiiro-dowlaha wasaarada shaqada iyo arimaha bulshada XFS Yuusuf Maxamed Aadan iyo Xildhibaan Maxamed Cabdiraxmaan (Nadiif), qubaro ka socdey wasaaradda beeraha iyo xafiiska ra’iisul wasaaraha ayaa ka qeyb-galay madaashaasi.

Madashan ayaa waxaa looga hadlayey ilaalinta bulshada sinaan la’aanta bulshada iyo sugnaanta cuntada, kaasi oo maalmahanba ka socday xarunta Qaramada Midoobey UNESCWA ee magaalada Beruit.

Wasiir Yusuf oo ka qeyb-galey Madasha Dood wadaaga ayaa ka faaloodey qorshaha wasaaradda kaga degan arrimaha bulshada, ayaa ugu horeyn uga mahad-celiyey dowladda Lubnaan iyo xafiiska Qaramada Midoobay ee magaalada Beyruut casuumaadda ay u fidiyeen.

Waxa uu la wadaagay in Soomaaliya ay u aragto waddamada Carabta saaxiibo muhiim ah oo door weyn ka ciyaarayo dowalad dhiska Soomaaliyeed.

Wasiiru-dowlaha ayaa ku dheeraadey guulaha ay gaartey wasaarada dhanka arrimaha bulshada iyo faa’iidada uu u leeyahay diiwaanka bulshada nugul (Unified Social Registry).

Ugu dambeyntiina wuxuu halkaasi ka sheegay sida ay dowaldda federaalka Soomaaliya ugu go’an tahay siyaasadda ilaalinta bulshada, xaqiijinta amniga dalka, iyo dagaalka Al-Shabaab lagula jiro oo dhamaadka sanadkaan qorshaha yahay sidii lagu so afjari lahaa.

Muqdisho (Caasimada Online) – Madaxweynaha Jamhuuriyadda Federaalka Soomaaliya Mudane Xasan Sheekh Maxamuud ayaa Madaxtooyada Qaranka ku qaabilay ganacsato iyo madaxda Bankiga Ziraat.

Ganacasatadan ayaa caasimadda dalka ee Muqdisho u yimid sidii ay maalgashi ugu sameysan lahaayeen dalkeenna.

Ganacsatada Turkiga ayaa sheegay in ay dhawaan xarigga laga jari-doono Bangiga Ziraat oo ay ka hirgeliyeen caasimadda Muqdisho, arrinkaas oo xoojinaya isku xirnaanta ganacsatada labada dal iyo kalsooni-gelinta maalgashadeyaasha dibadda.

Madaxweynaha ayaa ka hadlay fursadaha maalgashi ee ka jira Soomaaliya iyo qorsheyaasha ay dowladdu ku dhiirri-gelinayso arrinkaasi.

Sidoo kale waxa uu tilmaamay in dowladda iyo shacabka Turkigu ay safka hore kaga jiraan saaxiibbada iyo walaalaha ay ku kalsoon yihiin ganacsatada Soomaaliyeed.

Si kastaba, Soomaaliya iyo Turkiga ayaa waxaa ka dhaxeeya xiriir aad u wayn oo ku qotoma dhinacyada dublamaasiyadda, siyaasadda, ganacsiga iyo arrimaha militariga.

Baaxadda ganacsiga Turkiga iyo Soomaaliya ayaa waxaa lagu qiyaasay 280 milyan oo doolar, waxaana lagu qiyaasa in shirkadaha Turkiga ay maalgashi ku sameeyeen dalka ay gaareen $100 milyan.

Riyadh (Caasimada Online) – Wasiirka Wasaaradda Gaashaandhigga Xukuumadda Federaalka Soomaaliya Cabdulqaadir Maxamed Nuur (Jaamac) ayaa maalmihii dambe booqasho rasmi ah ku jooga Boqortooyada Sacuudi Carabiya.

Wasiir Jaamac ayaa waxa uu magaalada Riyadh kulan kula qaatay Wasiirka Difaaca dalkaas Khalid Bin Salman Bin AbdulAziz.

Kulanka wasiirrada ayaa waxaa diiradda lagu saaray sidii labada dal ay u sameysan lahaayeen iskaashi dhanka difaacada iyo amniga, oo sii xoojinaya xiriirka ka dhaxeeya labada dal.

Wasiirka Difaaca Soomaaliya Cabdulqaadir Maxamed Nuur ayaa booqasho ku tagay dalka Sacuudi Carabiya Juun 3, 2023-ka, isaga oo kulamo kala duwa la yeeshay hoggaanka ciidanka Boqortooyada.

Sidoo kale Wasiir Jaamac ayaa booqasho ku tagay kuliyadda hoggaaminta ciidanka qalabka sida iyo hay’adda qaran ee Cyber Security-tiga Boqortooyada Sacuudi Carabiya.

“Ujeedka booqashada hay’adahaan wuxuu ahaa ka dhuuxista khibradda boqortooyada aan walaalaha nahay ka gaartay tacliinta sare ee xiriirka la leh arrimaha ciidanka iyo ka hortagga khataraha ay xambaarsan tahay teknaloojiyadda isgaarsiinta casriga ah,” ayuu Wasiir Jaamac ku yiri qoraal uu soo dhigay bartiisa Facebook.

Wasiirka Gaashaandhigga XFS mudane Cabdulqaadir Maxamed Nuur ayaa sidoo kale waxa uu kulan gaar ah la yeeshay Taliyaha ciidanka xoogga dalkaas General Fayyad Al-Ruwaili.

Kulankan ayay labada masuul uga wada-hadleen sidii loo xoojin lahaa iskaashiga ciidamada labada dal iyo sidii la isaga kaashan lahaa la-dagaallanka waxa loogu yeero “argagixisada caalamiga ah.”

Si kastaba, Soomaaliya ayaa haatan ku jirto marxalad dagaal, kaasi oo uu haatan taageero caalami ah u raadinayso dowladda madaxweyne Xasan Sheekh, waxaana dhawaan la filayaa in dalka ka billowdo wejiga labaad ee dagaalkan oo qeyb ka noqonayaan ciidamo ka socda dalalka deriska.

Garoowe (Caasimada Online) – Dowlad-goboleedka Puntland ayaa si adag uga hortimid hanaanka ay dowladda federaalka Soomaaliya sanadkaan u maareysay arrimaha Xajka.

Puntland ayaa waxay dowladda federaalka ku eedeysay inay musuq-maasuq ku sameysay qeybsiga saamiga Xajka, taasi oo si weyn loogu cambaareeyay war-saxaafadeed kasoo baxay wasaaradda caddaaladda Puntland.

”Wasaaradda Caddaaladda Puntland waxay cambaaraynaysaa boobka, eexda iyo musuq-maasuqa ay wasaaradda diinta iyo awqaafta federaalku ku samaysey hab qeybsiga, maamulka iyo adeegyada Xajka,” ayaa lagu yiri qoraalka kasoo baxay Puntland.

Wasaaradda ayaa ku eedaysay dowladda federaalka Soomaaliya inay si ku dhisan caddaalad-darro u qeybisay saamiga Xajka ee sanadkaan, islamarkaana maamulka Puntland ka siisay 850 kursi tirada guud oo dhan 11,500.

“Waxay magacowday (wasaaradda) guddi mukhalasiin ah oo ka kooban shaqaalaha wasaaradda oo xigto iyo xaalad dhow la ah madaxda wasaaradda, shaqadooduna tahay in ay lacagaha ka soo aruurshaan xujeyda.”

Puntland ayaa sidoo kale waxay wasaaradda diinta iyo awqaafta federaalka ku eedeysay inay la wareegtay adeegyadii shirkadaha Xajku siin-jireen xujeyda, taas oo saamayn togan ku yeelan doonta tayada adeega, cibaadada iyo nolosha xujeyda.

“Wasaaradda ma samayn tartan furan oo shirkadaha Xajka Soomaaliyeed ugu tartamaan si xalaal ah oo daah-furan si xujeyda u helaan adeeg tayo leh. Halka wasaaraddu xulatay ay ka qaadey lacago hormaris ah.”

Eedeynta Puntland ayaa imaneysa xilli dowladda federaalka Soomaaliya ay shaacisay in meesha laga saaray musuq-maasuqii adeegga Xajka, islamarkaana qiimihii hore hoos loo dhigay.

Dowladda ayaa sidoo kale hore ugu dhawaaqday in xujeyda Soomaaliyeed loo baajiyey lacag ka badan 8 Milyan oo dollar sanadkan, kadib markii meesha laga saaray musuq-maasuqii ka jiray adeegga Xajka, hoosna loo dhigay qiimaha.

Muqdisho (Caasimada Online) – Taliska Ciidanka Booliska Soomaaliyeed ayaa goordhoweyd shaaciyay in lasoo xiray Agaasimaha Guud ee Wasaaradda Shaqada iyo Arrimaha Bulshada, Cabdullaahi Maxamed Cali.

Taliska ayaa sheegay in agaasimaha lagu soo xiray waaran maxkamadeed, ayada oo la dhowrayo sareynta sharciga, sida lagu yiri qoraal kasoo baxay taliska qeybta guud Booliska gobolka Banaadir.

“Taliska Qeybta Guud ee Boliiska Gobolka Banaadir ayaa maanta iyada oo la dhowrayo Sareynta Sharciga, Waaran maxkamadeed ku soo xiray Edeysane Cabdulaahi Maxamed Cali, Agaasimaha Guud ee Wasaaradda Shaqada iyo Arrimaha Bulshada,” ayaa lagu yiri qoraalka kasoo baxay taliska.

Agaasimaha Guud ee Wasaaradda Shaqada iyo Arrimaha Bulshada ee Booliska uu shaaciyay in la xiray ayaa waxaa loo haysta eedeyn culus oo la xiriirta musuq-maasuq.

Xafiiska Xeer Ilaaliyaha Guud ee Qaranka ayaa hore  agaasimahan lasoo xiray maanta ugu soo eedeeyay musuq, si loo horkeeno maxkamadda gobolka Banaadir.

Tallaabadan ayaa imanaysa xilli masuuliyiin ka tirsan dowladda ay u xiran yihiin xatooyo xoola dadweyne, kuwaaasi oo dhawaan la hor geynayo maxkamadaha dalka.

Sidoo kale waxaa baaritaan lagu hayaa masuuliyiin ka tirsan dowladda oo aan weli lasoo xirin, sida uu shaaciyay Xafiiska Xeer Ilaaliyaha Guud ee Qaranka.

“Qof kasta oo masuul dowlo ah ama shacab ah waxaan uga digayaa musuq-maasuq, waxaan ula dagaalami doonaa si adag, nagamana faka doono,” ayuu yiri Xeer ilaaliye Suleymaan Maxamed Maxamuud.

Dowladda federaalka Soomaaliya ayaa hore ugu dhawaaqday dagaal culus oo ka dhan ah musuq-maasuqa, kaasi oo aan loo kala eegi doonin sarkaal sare iyo mid hoose, islamarkaana uusan masuul ku baxsan doonin xilka uu ka hayo dowladda.

Si kastaba, Dowladda ayaa qorsheynaysa inay qaado tallaabooyin waaweyn oo lagula dagaalamayo musuq-maasuq, iyada oo dhawaan Golaha Wasiiradda ay ansixiyeen qaraarka adkaynta hufnaanta maaraynta maaliyadda dalka.

Kampala (Caasimada Online) – Madaxweynaha Uganda Yoweri Museveni ayaa laga helay COVID-19, sida uu sheegay sarkaal sare oo ka tirsan wasaaradda caafimaadka xalay, isaga oo intaas ku daray in caafimaadkiisu uu wanaagsan yahay, uuna sii wadi doonaa shaqadiisa inta lala tacaalayo.

“Madaxweynaha waxaa laga helay cudurka COVID-19. Tani waxay ahayd kadib markii ay soo baxeen astaamo u eg hargab fudud. Si kastaba ha ahaatee caafimaadkiisu waa wanaagsan yahay, wuxuuna ii si caadi ah u gudan doonaan waajibaadkiisa” ayay barteeda Twitterka ku sheegtay Diane Atwine oo ah xoghayaha joogtada ah ee Wasaaradda caafimaadka.

Horraantii Arbacadii, kadib markii uu khudbad ka jeediyay xarunta baarlamaanka, Museveni, oo 78 jir ah, ayaa tilmaamay inuu shakiga inuu ku dhacay COVID, isagoo sheegay subaxdii inuu dareemay qabow yar, taasoo ku kalliftay inuu codsado tijaabooyin COVID.

Intii lagu jiray masiibadii COVID, Museveni, oo qaatay tallaalka COVID, ayaa had iyo jeer lagu arki jiray fagaaraha isagoo xiran mask.

Xanuunka COVID-19 oo soo shaac baxay bishii December 2019, ayaa caalamka ku dilay dhwor milyan oo qof labadii sano ee ugu horreeyey hase yeeshee wuxuu yaraaday 2022, kadib markii la helay tallaalka xanuunka.

REUTERS + VOA

Garbahaarey (Caasimada Online) – Guddoomiyaha gobolka Gedo, Axmed Buulle Gareed oo wareysi gaar ah siiyay BBC-da ayaa ka horyimid tallaabadii uu qaaday madaxweynaha Jubbaland, Axmed Madoobe oo maalin ka hor maamul cusub u magacaabay gobolka Gedo.

Gareed ayaa shaaca ka qaaday in aysan waxba ka quseynin magacaabista uu sameeyay madaxweyne Axmed Madoobe ee ku aadan maamulka gobolka Gedo.

Sidoo kale wuxuu intaasi kusii daray in aysan jirin cid ka socota Jubbaland oo imaan karta gobolka, sida uu hadalka u dhigay.

“Nama quseyso waxa uu magacaabay Axmed Madoobe, mana jirto cid ka socota maamulkiisa ama taageersan oo imaan karta gobolka Gedo” ayuu yiri Gareed.

Guddoomiyaha oo hadalkiisa sii wata ayaa sheegay inuu isagu yahay madaxweynaha xorta ah ee Jubbaland, isla-markaana uu wado qorshe uu mideynayo reer Jubbaland.

“Waxaan ahay madaxweynaha xorta ah ee Jubbaland, waxaana wada qorshahii aan ku mideyn laha Jubbaland sax ah oo aan maamul ugu dhisi laha gobolada Jubbada Hoose iyo Jubbada dhexe” ayuu hadalkiisa sii raaciyay guddoomiyaha gobolka Gedo Axmed Buule.

Dhanka kale, Axmed Buulle Gareed ayaa eedeyn culus u jeediyay dowladda dhexe, gaar ahaan xukuumadda uu hoggaamiyo ra’iisul wasaare Xamza Cabdi Barre, isaga oo sheegay inay ka shaqeyneyso sii kala fogeynta Jubbaland iyo dadka ku nool gobolka Gedo.

Arrinata gobolka Gedo ayaa mar kale kasii dareysa, kadib tallaabada uu qaaday Axmed Madoobe oo maamul cusub u magacaabay gobolkan, xilli weli laga diidan yahay halkaasi.

Guddoomiyaha gobolka ayaa waxaa loo magacaabay Cabdullaahi Cadbi Jaamac, sidoo kale xubnaha uu magacaabay Axmed Madoobe ayaa waxaa ku jira Cusmaan Nuur Xaaji Macallimuu oo mar kale loo magacaabay guddoomiye ku-xigeenka Amniga iyo Siyaasadda.

Si kastaba, lama oga sida ay wax noqon doonaan, balse xaaladda ayaa u muuqata mid haatan kasii dareysa, waxaana laga digayaa in dagaallo ay ka qarxaan gobolka Gedo.

Muqdisho (Caasimada Online) – Golaha wasiirada xukuumadda Soomaaliya oo maanta kulankooda caadiga ahaa ku yeeshay xaruntooda magaalada Muqdisho ayaa ku asixiyay magacaabista maamulka Hay’adda Aqoonsiga iyo Diiwaangelinta Dadweynaha (National Identification and Registration Authority).

Agaasimaha guud ee hay’adda ayaa waxaa loo magacaabay Cabdiweli Timacadde, halka ku-xigeenkiisana loo magacaabay Cabdullaahi Biixi Xuseen.

Magacaabista maamulka cusub ee hay’adda ayaa timid, kadib soo jeedin ay golaha ka sameysay Wasaaradda Arrimaha Gudaha, Federaalka iyo Dib-u-heshiisiinta Soomaaliya

Timacadde oo loo magacaabay agaasinka hay’addan ayaa ah aqoonyahan dhalinyaro ah, kana soo jeedo magaalada Laascaanood ee xarunta gobolka Sool oo ay hadda ka socdaan dagaallo culus oo u dhexeeyo ciidamada Somaliland iyo kuwa deegaanka ee SSC.

Sidoo kale Cabdiweli Timacade ayaa horay u soo noqday agaasime ku-xigeenkii hore ee madaxtooyada Puntland, inkasta oo uu iska casilay xilkaasi.

Ninkan ayaa sidoo kale kamid ahaa saaxibadii aadka ugu dhowaa madaxweyne Saciid Deni, isaga oo kamid ahaa kooxdii ololaha doorashadii Muqdisho, balse waxa kala tageen markii ay dhammaatay doorashada oo Deni iyo raggii kale uu uga adkaaday madaxweyne Xasan Sheekh.

Dhanka kale, golaha wasiirada ayaa isla maanta sidoo kale ku meel-mariyey magacaabista Guddoomiyaha Hey’adda Qaxoootiga iyo Barakacayaasha Qaranka oo loo magacaabay, Marwo Safiya Xasan Maxamed, halka ku-xigeen koowaad loo magacaabay Mudane Cabdullaahi Aadan Cabdi iyo Ku xigeenka Labaad Mudane Maxamed Cabdullaahi Salaad.

Kulanka golaha, ayaa sidoo kale lagu ansixiyey dib ugu noqoshada ku talagalka Miisaaniyadda Dowladda ee Sannadka 2023 iyo heshiisyada Ku Biiridda Aaga Ganacsiga Xorta ah ee Qaaradda Afrika iyo Ku Biiridda Suuqa Iskaashiga Ganacsiga ee Bariga iyo Koonfur Afrika (COMES),

Si kastaba, dhismaha labadan hay’adood ayaa xilligan muhiim u ah Soomaaliya oo haatan kasoo kabaneyso burbur, waxayna qayb tahay horumarka ay ku talaabsaneyso dowladda.

Muqdisho (Caasimada Online) – Golaha Wasiirada Xukuumadda Federaalka Soomaaliya ayaa maanta kulankoodii todobaadlaha ahaa ku yeeshay xaruntooda Muqdisho, ayaa lagu ansixiyay Jiheynta Hannaanka Doorashooyinka Jamhuuriyadda Federaalka Soomaaliya.

Golaha ayaa soo saaray saddex qodob oo ku aadan hannaanka uu golughu u maray mee-marinta hannaanka doorashooyinka dalka, kuwaas oo kala ah:-

Qodobka 1-aad: Dhaqangelinta Heshiiska Golaha Wadatashiga Qaranka

1- Xukuumadda Federaalka Soomaaliya waxay go’aamisay dhammeystirka iyo dhaqangelinta Hannaanka Doorashooyinka Jamhuuriyadda Federaalka Soomaaliya ee uu ku heshiiyay Golaha Wadatashiga Qaranka 27 Maajo 2023 .

3- Waxaa la farayaa dhammaan wasaaradaha iyo hay’adaha ay khuseyso in ay si degdeg ah uga hawlgalaan diyaarinta shuruucda loo baahan yahay ee lagu dhaqangelinayo heshiiska kor ku xusan.

3- Wixii wax-ka-beddel ah ee lagu sameynayo Dastuurka KMG ah waxaa loo soo diyaarinayaa si waafaqsan Cutubka 15aad ee Dastuurka KMG ah loona soo gudbinayaa Golaha Wasiirada J.F.S. si loo horgeeyo labada aqal ee Baarlamaanka Federaalka Soomaaliya

Qodobka 2-aad: Dhammeystirka Habraacyada

4- Dhammaan wasaaradaha iyo hay’adaha ay khuseyso waa in ay dhammeystiraan dhammaan habraacyada dastuuriga ah iyo kuwa latashiga ee lagama maarmaanka u ah dhaqangelinta Heshiiska Golaha Wadatashiga Qaranka, iyada oo la xeerinayo danta guud ee Qaranka.

5- Wasaarad kasta iyo hay’ad kasta oo kaalin ku leh dhaqangelinta go’aankaan waxaa lagula xisaabtami doonaa hirgelinta kaalinteeda ku aaddan hirgelinta Heshiiska.

Qodobka 3-aad: Dhaqangalka Go’aankan

6- Go’aankan oo dhaqan galaya maanta oo Khamiis ah ayaa Golaha Wasiiradu aansixiyeen, isla markaana uu saxiixay Ra’iisul-wasaaraha Jamhuuriyadda Federaalka Soomaaliya.

Kulanka Golaha, ayaa sidoo kale lagu ansixiyey dib ugu noqoshada ku talagalka Miisaaniyadda Dowladda ee Sannadka 2023 iyo heshiisyada Ku Biiridda Aaga Ganacsiga Xorta ah ee Qaaradda Afrika iyo Ku Biiridda Suuqa Iskaashiga Ganacsiga ee Bariga iyo Koonfur Afrika (COMES)

Ugu dambeyn Wasaaradda Qorsheynta, Maalgashiga iyo Horumarinta Dhaqaalaha Xukuumadda Federaalka Soomaaliya, ayaa Golaha horkeentay warbixin la xiriirta qorshaha dowladda ee ku aaddan soo raridda Hay’ adaha UN-ka iyo kuwa kale Caalamiga ah ee Weli Xafiisyadu uga furan yihiin dalka Dibeddiisa, si ay dalka gudihiisa ugu howlgalaan.

Muqdisho (Caasimada Online) – Madaxweynaha Soomaaliya Xasan Sheekh Maxamuud ayaa soo dhaweeyey go’aannada Golaha Ammaanka ee Qaramada Midoobay ay ka soo saareen xaaladda ka taagan magaalada Laascaanood, sida lagu sheegay qoraal kasoo baxay madaxtooyada.

Golaha Ammaanka ayaa shalay ugu baaqay dhammaan dhinacyada ku lugta leh colaadda inay heshiis xabad joojin ah gaaraan, waxayna booriyeen wada-hadal loo dhanyahay oo colaadda nabad ku soo dabbaala.

Xubnaha Golaha Ammaanka ayaa sidoo kale ugu baaqay Somaliland inay si dhaqso ah ciidamadeeda ugala baxdo Laascaanood, islamarkaana ay dhinacyadu is xakameeyaan, oo ay joojiyaan daandaansiga iyo hadallada colaad hurinta ah.

Madaxweyne Xasan Sheekh oo uu wehliyo Ra’iisul Wasaare Xamza ayaa xalay madaxtooyada kulan casho kula yeeshay Isimada Dhaqanka Gobollada Sool iyo Sanaag oo maalmahan ku sugnaa Muqdisho, si ay xaaladda deegaanka ula wadaagaan Madaxda heer Federaal.

Sida lagu sheegay qoraalka madaxtooyada, madaxweynaha ayaa ku baaqay in fursad loo siiyo gurmadka iyo gargaarka degdegga ah ee ay u baahan yihiin dadka deegaanku, loona abuuro jawi ku habboon waan-waanta iyo xalka nabadda.

“Sidoo kale, Madaxweyne Xasan Sheekh Maxamuud ayaa adkeeyey baaqii dowladda ee ku wajahnaa dhinacyada xiisadda Gobolka, kaas oo salku ku hayey in xal aan xabbad ahayn lagu wajaho, dowladda Federaalka Soomaaliyana ay ka go’an tahay in ay qaadato doorkeeda nabadeynta iyo fududeynta wada-xaajoodka, si loo joojiyo colaada,” ayaa lagu yiri qoraalka Villa Somalia.

Dhanka kale, Isimada SSC ayaa madaxweynaha iyo ra’iisul wasaaraha uga mahad-celiyey kulankan iyo soo dhaweynta wanaagsan, waxaa ayna bogaadiyeen mowqifkii dowladda ee masiirka Sool, Sanaag iyo Ceyn.

Waxaa kale oo ay soo bandhigeen aragtidooda ku aaddan xaaladda taagan, dhibaatada jirta iyo caqabadaha nololeed ee soo food-saaray dadka deegaanka kuwaas oo ka dhasahy dagaalka.

Dhaq-dhaqaaqan Muqdisho ku billowday ee ku aadan arrinta Laascaanood ayaa kusoo aadaya, xilli maalmihii u dambeeyay ay istaageen dagaalladii ka socday magaaladaasi, inkastoo ay weli is horfadhiyaan labada dhinac oo mararka qaar is dhaafsada madaafiic.

Magaalada Laascaanood ayaa waxaa tan iyo bishii Febraayo ka taagnaa dagaallo u dhaxeeya ciidamada Somaliland iyo ciidamo kasoo jeeda deegaanka, kuwaasi oo ay ku dhinteen tobanaan qof, kuna barakaceen kumanaan kale.