New York (Caasimadda Online) – Dowladda Mareykanka ayaa markii ugu horeysay soo bandhigtay muuqaal muujinayo qaabkii uu u dhacay weerarkii lagu dilay hoggaamiyihii Kooxda Daacish Abuukar Al-Baqdaadi.

Militariga Mareykanka ayaa soo bandhigay sawiro iyo Muuqaal muujinayo duqeyntii lagu qaaday gurigii uu daganaa Abukar Al-Baqdaadi oo uu Mareykanka madaxiisa dul dhigay adduun lacageed oo gaarayo ilaa 25 Malyan oo lacagta Marekanka ah.

Muuqaalka ayaa muujinayo Ciidamada Mareykanka oo rasaas la dhacayo guriga uu daganaa Al-Baqdaadi kadibna waxaa la arkayaa duqeyn culus oo lala beegsaday taasoo keentay inuu burburo dhammaan gurigii uu daganaa Al-Baqdaadi.

Al Baqdaadi ayaa kadib ku cararaya god dhulka hoostiisa ku yaala, halkaas oo kolkii dambe uu isku qarxiyey isaga oo wehliyaan saddex caruur.

Madaxa Taliska Dhexe ee Mareykanka, General Kenneth McKenzie, ayaa sheegay in duqeynta ay dhacday ka dib markii la soo daad gureeyay dhammaan Ciidamadii la qeyb qaadanayey weerarkii lagu beegsaday Hoggaamiyihii Kooxda Daacish.

McKenzie wuu awoodi waayey inuu xaqiijiyo sheegashada Trump ee ah in hogaamiyaha Isis uu qaylinayey daqiiqado ka hor dhimashadiisa.

Wuxuu sheegay in la aruuriyey haraadigii meydka Baqdaadi  kadib markii uu isku qarxiyay god dhexdiisa, halkaas oo uu ku dilay laba caruur ah oo uu watay isla markaasna lagu aasay badda dhexdeeda. McKenzie wuxuu sheegay in warbixinnada bilowga ah ay sheegeen saddex carruur ah, laakiin baaritaanadii dambe waxay muujisay laba. Labaduba waxay da’doodu ka yartahay 12 sano, ayuu yiri.

Halkaan hoose ka daawo Muuqaalka

Caasimada Online
Xafiiska Muqdisho
[email protected]

Muqdisho (Caasimada Online) – Xildhibaan Mahad Maxamed Salaad oo hadal ka jeediyay kulankii shalay ee golaha ayaa ka dhawaajiyay ayaa shaaca ka qaaday saddex mooshin oo horey aan loo ogeyn oo ay ka gudbiyeen xukuumadda Kheyre balse fashilmay.

Mahad Salaad oo eedeymo dhawr ah oo uu u jeediyay guddoonka golaha, ayaa sheegay seddaxda mooshin oo ay ka keeneen la xisaabtanka xukuumadda, uu is hor taagay guddoomiye Maxamed Mursal.

Mahad Salaad waxa uu ku eedeeyey guddoomiyaasha baarlamaanka in ay xildhibaanada ka hortaaganyihiin la xisaabtayka xukuumadda, 3 mooshin oo isaga iyo xildhibaanno kale ay ugu yeerayeen wasiirro iyo mas’uuliyiin kale, si loola xisaabtamo su’aalana looga weydiiyo shaqada loo igmaday oo dayacan ayuu sheegay in guddoomiyuhu uu si cad u burburiyay golahana uusan hor keenin.

Xildhibaanka ayaa aad u dhaliilay shaqada Baarlamaanka, isagoo baarlamaankaan ku tilmaamay kii ugu liitay baarlamaanadii ka soo shaqeeyay dalkaan, isagoo dhaliilay kana dhawaajiyay sharciyo uu ansixiyay baarlamaankaan 10-aad, sharciyadaas oo uu ka mid yahay kii Banka Dhexe loogu ogolaaday in qof Ajanabi ah uu madax ka noqon karo.

Sidoo kale xeer hoosaadka xildhibaanada golaha shacabka oo sida uu sheegay liita ayuu guddoomiyaha Baarlamaanka kula taliyay in dib u habeyn lagu sameeyo.

Mahad Salaad ayaa dhamaan xildhibaanada ku eedeeyay in ay iska in dhatirayaan howlihii loo igmaday, isla markaana uu yaryahay xildhibaan dib ugu laabtay oo wax u qabtay dadkii soo doortay.

Waxa uu ku taliyay in lhnati-dhowraha qaranka looga yeero fadhiga golaha waxna laga weydiiyo warbixintii muujinaysay lacag badan oo maqan, isagoo quus ka muujiyay in taasi dhacdo tusaalana u soo qaatay guddigii maaliyadda golaha shacabka oo uu isagu ku jiray ee la kala diray markii ay ku dhiiradeen in ay ku dhaqaaqaan isla xisaabtan.

Halkaan ka Daawo:

Caasi mada Online
Xaafiiska Muqdisho
[email protected]

Muqdisho (Caasimadda Online) – Xisbiga uu hoggaamiyaha ka yahay Sheekh Mukhtaar Roobow Abuu Mansuur oo u xiran Dowladda Federaalka Soomaaliya ayaa sheegay inaysan kamid aheyn Isbaheysiga Madasha Xisbiyada Qaran ee Shalay looga dhawaaqay Magaalada Muqdisho.

Xisbiga Amni iyo Cadaaladda ayaa sheegay inaysan ka qeyb aheyn madashaad iyagoo arrintaas sabab uga dhigay inuu jiro wadahadal u socdo iyaga iyo Dowladda Federaalka Soomaaliya.

Xisbiga ayaa sheegay inaysan fikrad ahaan iyo qorsho ahaan qeyb ka aheyn shirkaas looga dhawaaqay Madasha Xisbiyada Qaran ayna ka cudur daarteen inay ka qeybgaleen.

Sidoo kale Xisbiga ayaa sheegay in Xafladdii caleema saarka Madaxweyne Axmed Madoobe lagu casuumay balse aysan ka qeybgelin iyagoo tixgelinayo wadahadal u socdo iyaga iyo Dowladda kaasoo la doonayo in lagu sii daayo hoggaamiyahooda xiran muddo dhawr bil ah.

xisbiga ayaa sheegay in wadahadalkii u socday Dowladda iyo Xisbiga uu hakad ku jiro maadaama uu khilaaf ka dhex jiro Ururka IGAD oo garwadeyn ka ahaa wadahadalkaas sida ay Caasimadda Online u sheegeen xubo ka tirsan Xisbiga.

Xisbiga ayaa dhanka kale xusay inay ka bixi doonaan wadahadalka u socdo iyaga iyo Dowladda haddii aan sida ugu dhaqsiyaha badan dib loo bilaabin.

Xisbiga ayaa sheegay inay rajo fiican ka qabaan in lasoo daayo hoggaamiyahooda Shiikh Mukhtaar oo lasoo xiray xilligii ay dhaceysay doorashadii Koonfur Galbeed markaas oo ay Dowladda Soomaaliya u aragtay inuu dhibaato ku yahay musharaxa ay wadatay ee Lafta Gareen.

Hadalka kasoo baxay Xisbiga Amni iyo Cadaalad ayaa kusoo aadayo xilli Shalay Magaalada Muqdisho looga dhawaaqay Isbaheysiga Madasha Xisbiyada Qaran kaasoo hoggaamiye looga dhigay madaxweynihii hore ee Soomaaliya Shiikh Shariif Shiikh Axmed.

Caasimada Online
Xafiiska Muqdisho
[email protected]

Beledweyne (Caasimadda Online) – Wasiirka Warfaafinta, Dhaqanka iyo Dalxiiska ee Xukuumadda Federaalka Soomaaliya Maxamed Cabdi Xayir Maareeye oo xubin ka ah Guddiga Qaranka ee gurmadka fatahaadaha ayaa sheegay in gurmad ballaaran uu Maanta gaari doono magaalada Beledweyne ee xarunta Gobolka Hiiraan.

Wasiirka oo ka waramayay xaaladda fatahaadda ayaa sheegay in 24-kii saac ee la soo dhaafay aysan ka soo darin dhamaan deegaannada sidii ay ahayd 24 saac ka hor, isagoo xusay in goobta ugu qasaaraha badan ay tahay magaalada Beladweyne.

“Ilaa iyo hadda waxaa ugu dhibaato badan oo qasaaraha ugu badan oo dalka ka dhacay ay tahay Degmada Beladweyne ee Gobolka Hiiraan, oo runtii dad gaaraya 300,000 oo qof dad ka badani ay ka qaxeen guryahoodii, dhamaan wixii ay heysteena ay ka baaba’een, oo ku sugan meel aad u kooban oo Beladweyne duleedkeeda ah’ ayuu yiri Wasiir Maareeye.

Wasiirka ayaa hadalkiisa ku daray inay jiraan meelo kale oo fatahaado ka dhaceen oo ay ka midyihiin Degmooyinka Baardheere iyo Belad Xaawo oo ka wada tirsan Gobolka Gedo halka magaalada Bardaale ee Gobolka Baay roobab xoogleh oo ka da’ay ay sababeen inay biyo badan ku rogmadaan magaalada, taasi oo aan ahayn biyo ka yimid Webi balse roobabka ay keeneen daadad xoog badan oo sababtay inay dadku ka barakacaan magaalada.

Mudane Maxamed Cabdi Xayir Maareeye ayaa sheegay in dowladda Federaalka ay guddi heer sare ah u magacawday arrintan, isagoo intaa ku daray in Madaxweynaha iyo Ra’iisul Wasaaraha ay baaq ka saareen oo ah in loo gurmado dadka ay saameysay fatahaaduhu.

Wasiir Maareeye ayaa yiri “Runtii dadku waxa ay u baahanyihiin taakuleen, dowladdu wixii karaankeeda ah wey geysay, inkasta airport Beladweyn uu naga xirnaa labo maalmood, waxaa nasiib wanaag ah in uu hadda dib u furmay, oo galabta naloo sheegay in Airport uu furanyahay, Maanta waxaa tegi doona wafdi balaaran oo ay xubnaha guddiga, dad badan oo ka socda Baarlamaanka Soomaaliya  iyo dadkale oo technical ka ah oo ku shaqada leh oo ka socda Wasaaraha ay Maanta tegi doonaan oo gar gaar wada”.

Dowladaha Qatar, Turkiga iyo hay’adaha caalamiga ah ayaa la sheegay in dhankooda ay gacan ka geysan doonaan kaalmo gaarsiinta dadku ay fatahaaduhu saameeyeen.

Caasimada Online
Xafiiska Muqdisho
[email protected]

Muqdisho (Caasimadda Online) – Xisbiga Wadajir ayaa markii ugu horeysay si rasmi ah uga hadlay sababta keentay in xisbigooda uusan kamid noqon Isbaheysiga Madasha Xisbiyada Qaran ee Maanta looga dhawaaqay Magaalada Muqdisho iyadoo Guddoomiye looga dhigay madaxweynihii hore ee Soomaaliya Shiikh Shariif Shiikh Axmed.

Sayid Cali Macalin Cabdulle oo ah Guddoomiye kuxigeenka Xisbiga Wadajir ayaa sheegay in xisbigooda uu aad usoo dhaweenayo  Isbaheysiga Madasha Xisbiyada Qaran ee Maanta looga dhawaaqay Magaalada Muqdisho, wuxuuna hawada usoo mariyey Hamlbayo.

Sayid Cali Macalin ayaa Isbaheysiga Madasha Xisbiyada Qaran ku tilmaamay inay tahay biseyl siyaasadeed oo ay tahay in si weyn loo dhiira geliyo.

“Waa biseyl siyaasadeed oo loo baahan yahay in la dhiirageliyo waana ugu hambalyeynaynaa, in la isu tago oo intii isku aragti ah waxay xoojineysaa doorashooyinka soo socda ee 2021″ayuu yiri.

Wuxuu kaloo sheegay in sababta Xisbiga Wadajir uusan uga mid noqon Isbaheysigaas ay tahay in weli uusan xisbiga go’aan ka gaarin.

Wuxuu sheegay in go’aankaas uu leeyahay Golaha Dhexe ee Xisbiga loona baahan yahay in marka uu Golaha soo ansixiyo.

Inkastoo Sayid Cali sidaas ku micneeyey haddana xogta ay heleyso Shabakadda Caasimadda Online ayaa sheegeysa in Cabdiraxmaan Cabdishakuur uu diiday in Madashu yeelato Guddoomiye, taas bedelkeed uu soo jeediyay inay Xiriiriye kaliya yeelato.

Sidoo kale Cabdiraxmaan ayaa la sheegay inuu aad u daneenayey inuu isaga noqdo Guddoomiyaha Madasha haddiiba ay yeelaneyso Guddoomiye sida ay noo xaqiijiyeen xubno ka tirsan Xisbiyada ku midoobay Isbaheysiga Madasha Xisbiyada Qaran.

Caasimada Online
Xafiiska Muqdisho
[email protected]

Muqdisho (Caasimada Online) – Shacabka magaalada Muqdisho ayaa markii ugu horreysay billaabay inay gacmahooda isaga qaadaan dhagxaanta dowladda Soomaaliya ay ku goyso waddooyinka magaalada.

Ciidamada Dowladda ayaa xalay dhagxaan cusub dhigay waddooyinka jid-cadayaasha loo yaqaan ee xaafadaha Jidadka Sodonka soo gala taasoo sababtay kacdoon ay sameeyeen Dadweynaha Xaafadda.

Hase yeeshee dadka ku dhaqan Xaafadahaas ayaa saaka bilaabay inay iska qaadaan dhagxaantaas cusub ee ay kusoo tooseen.

Xaafadaha ay dadweynaha billaabeen inay dhagxaanta iska qaadaan ayaa waxaa ka mid ah xaafadaha ku dhow Hotelka Lafweyn iyo xaafadda SIISII, halkaas oo ay isugu soo baxeen dadweyne aad u badan oo la arkayey iyagoo gacmaha ku qaadayo Dhagaxaanta lagu xiray xaafadahooda.

Qaar ka tirsan dadkaas oo la hadlay Saxaafadda ayaa sheegay inaysan marnaba ogolaan doonin jidgooyo iyo in cunaqabateyn la saaro xaafadahooda.

Muddo laba sano ah waxaa xiran jid cadayaasha soo galo xaafadaha waddada wadnaha, waxayna Dowladda Soomaaliya waday qorsho ay dooneysay in lagu furo jidadkaas dhagxaantana loo geeyo jidka Sodonka iyo Warshadaha.

Qaar ka tirsan Xildhibaanada Baarlamaanka oo ay kamid yihiin Xildhibaan Axmed Macalin Fiqi iyo Xildhibaan Mahad Salaad ayaa aad usoo dhaweeyey arrintaan, waxayna ku tilmaameyn in dhagxaanta ay yihiin kuwa lagu cunaqabateenayo nolosha dadka Muqdisho.

Muqdisho (Caasimadda Online) – Shariif Sheekh Axmed  Madaxweynihii hore ee Soomaaliya Maantana loo doortay inuu hoggaamiyo Madal ay ku mideysan yihiin Xisbiyada Siyaasadda oo la magac baxay Madasha Xisbiyada Qaran ayaa Xisbiyadii xilkaas u doortay uga mahadceliyey kalsoonida ay xilkaas ugu magacabeen.

Shiikh Shariif ayaa mahad celin kadib ka hadlay waxyaabo badan oo ku saabsan xaaladda siyaasadeed ee dalka ku jiro gaar ahaan doorashada la filayo inay dhacdo marka uu  dhamaado waqtiga Madaxweyne Farmaajo.

Sababta loo Aas’aasay Madashaan ayuu ku sheegay in la abuuro jawi siyaasadeed oo lagu tartamo oo ku dhisan nidaam iyo is ixtiraam si looga gudbo 4.5 loona gaaro marxalad baahsan oo Aas Aaskeedu yahay dadku inay isku raacaan aragti Siyaasadeed.

Waxaa uu sheegay Sheekh Shariif Sheekh Axmed in doorashada ay ka dhiman tahay Sanad iyo waxyar hadana aysan muuqan ilaa iyo hadda nidaamka ay doorashada ku geli karaan, sidoo kalena aysan jirin xuriyad ay ku dhaq dhaqaaqi karaan Xisbiyada iyo dadka Soomaaliyeed, isla markaana qofkii doonayo in uu qabto lagu waajibiyey in uu dowladda fasax ka qaato taasina ay Dastuurka kasoo horjeedo sida uu hadalka u dhigay.

Wuxuu si toos ah u caddeeyey inaysan xisbiyada midoobay marnaba aqbali doonin Koox la magac baxday Xooggaga Waddaniyiinta in doorasho lagu galo iyagana ay camiraan sida uu hadalka u dhigay.

“Ma aqbali-karno inta koox xoogga waddaniyiinta ah la aruuriyaa la yiraahdo doorashaan galaynaa anaguna aan camirno, dowladdu inadhaheeda ha furto, Shalay Madaxweyne Xasan Sheekh School Polizio in doorasho lagu qabto anagaa ka diidnay maxaa yeelay taliyaha booliska ayaa taageersanaa wuuna naga yeelay, dadkii diidanaa in halkaas doorasho lagu qabtana waxaa kamid ahaa madaxweyne Farmaajo dowladdu ma qaban wixii doorasho laga rabay”ayuu yiri Sheekh Shariif.

Magaalada Muqdisho waxaa Maanta lagu qabtay Munaasabad kooban oo looga dhawaaqay Madasha Xisbiyada Qaran oo ay ku midoobeen Xisbiyo dhowr ah oo dalka kajira oo ay qeyb ka yihiin Madaxweynayaashii hore ee Soomaaliya ee Sheekh Shariif Sheekh Axmed iyo Xasan Sheekh Maxamuud.

Caasimada Online
Xafiiska Muqdisho
[email protected]

Muqdisho (Caasimada Online) – Shir goordhow ay yeesheen xisbiyada siyaasadeed ee dalka, kaas oo ka dhacay magaalada Muqdisho ayaa waxaa si rasmi ah loogu dhowaaqay madal ay leeyihiin oo lagu magacaabo Madasha Xisbiyada Qaran.

Waxaa sidoo kale hoggaanka Madasha Xisbiyada Qaran loo doortay Sheekh Shariif Sheekh Axmed oo ahaa madaxweynihii hore ee Soomaaliya.

Arrintan ayaa la timid kadib wadatashi muddo socday taasi oo looga gol leeyahay in la mideeyo garabyada kala duwan ee xisbiyada mucaaradka dalka.

Sheekh Shariif waxaa uu ahaa hoggaamiyaha xisbiga Himilo Qaran, waxaana u tanaasulay madaxweyne Xasan Sheekh Maxamuud oo ah guddoomiyaha xisbiga UPD.

Sidoo kale guddoomiye ku-xigeennada Madasha xisbiyada Qaran  ayaa waxaa loo doortay Prof. Maxamed Cabdi Gaandi  oo ah guddoomiyaha Xisbiga Nabadda iyo Shariif Xasan Sheekh Aadan oo ah Madaxweynihii hore ee Maamulka Koonfur Galbeed.

Sheekh Shariif Sheekh Axmed ayaa uga mahad celiyey Xisbiyada sida kalsoonida leh oo ay ugu doorteen guddoomiyaha Madasha Xisbiyada Qaran, isaga oo ballan-qaaday inuu si hufan ugu shaqeyn doono.

Shariif ayaa sheegay in sababta loo aas-aasay madashaan ay tahay in la abuuro jawi siyaasadeed oo lagu tartamo oo ku dhisan nidaam iyo is-ixtiraam si looga gudbo 4.5 loona gaaro marxalad baahsan oo aas aaskeedu yahay dadku inay isku raacaan aragti siyaasadeed.

Sheekh Shariif Sheekh Axmed ayaa ugu dambeyn sheegay in doorashada ay ka dhiman tahay Sanad iyo waxyar hadana aysan muuqan ilaa iyo hadda nidaamka ay doorashada ku geli karaan, sidoo kalena aysan jirin xuriyad ay ku dhaq dhaqaaqi karaan Xisbiyada iyo dadka Soomaaliyeed.

Madashan ayaa waxaa ku jira xisbiyo ay ka mid yihiin Himilo Qaran, UPD, Ileys, NPP, Kulan iyo Xisbiga Nabadda.

Caasimada Online
Xafiiska Muqdisho
[email protected]

Garoowe (Caasimada Online) – Xeer ilaalinta guud ee dowlad goboleedka Puntland ayaa maanta dacwad xasaasi ah ku soo oogtay, Xildhibaan Cawil Xasan Daad oo ka mid ah mudanayaasha golaha wakiilada maamulkaasi oo dhowaan su’aal adag weydiiyey Madaxweyne, Siciid Cabdullaahi Deni.

Warqad uu ku saxiixan yahay xeer ilaaliye ku xigeenka Puntland, islamarkaana guddoonka baarlamaanka maamulkaasi la gaarsiiyey ayaa waxaa looga codsaday in xasaanada laga qaado Xildhibaan Daad, si loogu soo oogo dacwadda loo heysto.

Xafiiska xeer ilaalinta ayaa xildhibaanka ku eedeeyey inuu ku xadgudbay shuruucda u taalla dowlad goboleedka Puntland, loona baahan yahay in lala xisaabto, si wax looga weydiiyo hadallada xanafta leh ee uu ku dhawaaqay.

Sidoo kale warqadda ayaa lagu sheegay haddii guddoonku ogolaado dalabkan in xeer ilaalintu ay soo gudbi doonto eeda loo heysto xildhibaankaasi oo 26-kii bishan ka careysiiyey Madaxweynaha Puntland oo ku sugnaa xarunta golaha wakiilada

Su’aasha xildhibaanka oo uu ku sheegay in xukuumaddu fashilantay, islamarkaana laga soo Qanuudo masaajida ayaa xiisad weyn ka abuurtay guud ahaan Puntland.

Halkan hoose ka aqriso:

Muqdisho (Caasimada Online) – Madaxweynihii hore ee dalka, Xasan Sheekh Maxamuud oo ka hadlayey shir madaxda xisbiyada uga socdo Muqdisho ayaa weerar afka ah ku qaaday dowladda, gaar ahaan Ra’iisul wasaaraha iyo madaxweynaha.

Xasan Sheekh Maxamuud ayaa sheegay in dowladdu ay ka gaabisay u gurmashada dadka Soomaaliyeed ee ku dhibaateysan maamullada HirShabelle iyo Koonfur Galbeed, kuwaas oo ay saameeyeen fatahaadaha ka jira dalka.

Sidoo kale wuxuu carabka ku dhuftay in aan la’is qabad siin karin in malaayiin Dollar oo aan bajadka ku jirin dowladda ay ku dhisto taalooyin, hadana aysan dadka Soomaaliyeed ee dhibaateysan u heli karin gurmad.

Madaxaweynihii hore ee dalka, Xasan Sheekh Maxamuud oo hadalkiisa sii wata ayaa sheegay in tallaabo aan laga fileyn ay aheyd in dowladdu ay ku dhawaaqdo Qaaraan hala keeno, si loogu badbaadiyo dadka ku dhimanaya magaalada Beledweyne oo ka mid ah meelaha uu sida daran u saameeyey wabiga Shabelle

“Dowladdu mallaayiin Dollar oo aan bajadka ku jirin taalooyin ku dhisi kartaa waa soo heli karta,dadka Reer Baladweyne ee Biyaha dhex-jiifa qaarkood ku dhamaadeen dowladda lacag uma heli karto ee qaaraan hala keeno in leys qabadsiiyo ayaa loo baahan yahay ayuu yiri.” Xasan Sheekh Maxamuud.

Hadalkan ayaa ku soo aadaya, iyadoo weli jawaab rasmi ah dowladdu aysan ka bixin dhibaatada bani’aadanimo ee ka taagan Beledweyne, marka laga reebo dhaq dhaqaaqyo ay waddo, kuwaas oo loogu gurmanayo dadkaasi.

Caasimada Online
Xafiiska Muqdisho
[email protected]

Muqdisho (Caasimada Online) – Dowladda Turkiga aya noqotay dowladdii ugu horreysay ee ka soo jawaabta baaqii Madaxweynaha Soomaaliya, Mudane Maxamed Cabdullaahi Maxamed (Farmaajo) ee u gurmashada dadka ay sameeyeen fatahaadaha xoogan ee ka jira qeybo badan oo ka mid ah Soomaaliya.

Wasaaradda arrimaha dibadda ee dalka Turkiga ayaa qoraal ka soo baxay waxa ay uga  hadashay saameynta ka dhalatay fatahaadaha wabiyada Shabelle iyo Jubba, kuwaas oo ay ku barakaceen dad badan oo Soomaaliyeed.

Warka ka soo baxay wasaaradda arrimaha dibadda ee dalkaasi ayaa lagu sheegay in ugu horreyn ay ka tacsiyeyneyso dhimashada ka dhalatay fahadahaasi, islamarkaana ay aad uga xun tahay dhibaatadaasi.

Sidoo kale waxa ay wasaaradddi sheegtay inay ka qeyb qaadaneyso gurmadka loo fidinayo dadka barakacayaasha ee ku dhibaateysan magaalooyinka ay ka mid tahay degmada Beleweyne ee xarunta gobolka Hiiraan.

Turkiga ayaa ka mid ah dalalka saaxibada dhow la ah Soomaaliya, wuxuuna ka taageeraada dhinacyo kala duwan oo ay ugu horreyso dhismaha ciidanka Xoogga dalka Soomaaliyeed.

Waxaa kaloo Turkiga lagu xasuustaa gurmadkii uu dadka Soomaaliyeed u fidiyey sanadkii 2011-kii, xilligaas oo ay Soomaaliya ka jirtay abaar xoogan oo saameysay dadka iyo duunyada.

Hadalka hadda ka soo baxay Turkiga ayaa waxa uu ku soo aadayaa, iyadoo xaaladdii ugu darneyd ee fatahaada ay ka taagan tahay deegaano ka tirsan HirShabelle.

Caasimada Online
Xafiiska Muqdisho
[email protected]

Muqdisho (Caasimada Online) – Guddoomiyaha gobalka Banaadir ahna duqa Muqdisho Cumar Maxamuud Maxamed Filish ayaa sheegay in magaalada muqdisho ay ka jirto dhibaatooyin badan oo aan la mahdin, kuwaas oo u baahan in wax laga qabto.

Cumar Filish oo aan hadalkaan ka dhihin meel fagaaro ah ayaa dhowr qof oo siyaabo kala duwan ula kulantay oo ay ku jiraan odoyaal u qiray in uu wajahayo culeysyo ka weyn wixii uu filiyay markii loo magacaabay guddoomiyaha gobalka Banaadir ahna duqa muqdisho.

Caqabadda ugu weyn waxa uu sheegay in uu kala kulmayo xubno ka tirsan xukuumadda iyo hay’adaha ammaanka, dhibaatooyinkaas ayuu sheegay in ay ku rideen niyad jab iyo rajo xumo sida ay noo xaqiijiyeen dadkii la kulmay Cumar Filish.

“Dhibka aad ku qabtaan booliiska, shacabka oo dhana ay ku qabaan, weriyaashana ay ku qabaan ayaa anna ku qabaa waliba isku mid ayaa ka nahay” ayuu ku yiri qaar kamid ah odayaasha dhaqanka ee magaalada muqdisho oo la kulmay duqa muqdisho.

“Waxaan isku dayay inaa kow wax ka qabto dhibaatada shacabka si aan u abuuro xiriirka shacabka iyo ciidamada lagana wadashaqeeyo amaanka laakiin waa laga horyimid waliba dagaal ayaa laygula galay dad sare ayaana ku jira kuwa igula dagaalay” ayuu yiri Cumar Maxamuud Maxamed Filish.

Cumar Filish ayaa odayaasha u sheegay in dhibka uusan ku qaban oo kaliya saraakiisha ciidamada booliiska balse uu wajahayo dagaal kale oo culus kaas oo saameen ku leh shaqadiisa iyo masuuliyadii loo idmaday.

“Kaliya saraakiisha ma ahan dhibka aan qabno hadii aa nahay gobalka ee waxaa dhib intaas ka weyn aan kala kulmeynaa masuuliyiin ka tirsan xukuumadda, waana ka dhaqaaqi la’nahay” ayuu yiri Cumar Filish oo la hadlay qaar kamid ah odayaasha Muqdisho.

Hadalka Cumar Filish ayaa imanaya ayada oo uu sii xumaanayo xiriirka kala dhaxeeya booliska, waxaana dhowaan ay isku dhaceen taliye ku-xigeenka koowaad ee booliiska Cusmaan Kaniif. Halka ka aqri xogtaas.

Caasimada Online
Xafiiska Muqdisho
[email protected]

Dhuusamareeb (Caasimada Online)  – Madaxa xukuumadda Galmudug, kana mid ah hoggaanka Ahlu Sunna Sheekh Maxamed Shakaarir Cali Xasan oo shir jaraa’id ku qabtay Dhuusamareeb ayaa ka hadlay geerida hoggaamiyaha Ururka Daacish oo uu dhowaan sheegay Mareykanka inuu ku dilay weerar qorsheysnaa oo ka dhacay dalka Syria.

Sheekh Shaakir ayaa shirkiisa jaraa’id ku sheegay in Abuubakar Al-Baqdaadi uu ahaa cadowga Islaamka, islamarkaana uu soo dhoweynayo dilkiisa, sida uu hadalka u dhigay.

Sidoo kale wuxuu tilmaamay inuu ahaa axad dhibaateeyey dunida, dilkiisuna wuxuu xusay inuu faa’iido weyn u yahay Muslimiinta iyo Insaaniyadda.

“Wuxuu ahaa axad dunida dhibaateeyey waxaan leenahay gacan walbo haku baxo, laakin waxaa weeeye faa’iido u soo hoytay dadka Muslimiinta.” ayuu yiri, Sheekh Maxamed Shaakri Cali Xasan oo ah madaxa xukuumadda dowlad goboleedka Galmudug.

Dilka hoggaamiyaha Daacish oo uu dhowaan xaqiijiyey Madaxweynaha Mareykanka, Donald Trump ayaa la sheegay in ay tahay guul weyn oo lagagaaray dagaalka la gula jiro kooxda Daacish oo weeraro argagixiso ka fulisa dalal badan oo ku yaalla Caalamka.

Halkan hoose ka dhageyso Codka.

Caasimada Online
Xafiiska Dhuusamareeb
[email protected]  

Beledweyne (Caasimada Online) – Tobaneeyo kamid ah maxaabiista magaalada Beladweyne ee xarunta gobalka Hiiraan ayaa wajahaya dhibaatooyin daran oo ay ka dhaxleen fatahaadda wabiga Shabeelle ee mara magaalada Beladweyne ee xarunta gobalka hiiraan.

Maxaabiistaan ayaa shalay waxaa xabsiyada ugu galay biyo xoog leh kuwaas oo la sheegay in ay baabi’iyeen inta badan xabsiga dhexe ee Beladweyne iyadoo si dhib yar looga badbaadiyay maxaabiistii xabsiga ku jirtay, sida ay noo xaqiijiyeen dadka degaanka.

“Aniga waxaa iiga xiran walaalkeey maalmahaan dhan waxaan u sheegeynay saraakiisha ciidamada in wiilasha meesha laga saaro laakiin waana diideen haddane waxaa qaaday biyihii oo si dhib leh looga soo badbaadiyay” ayey tiri haweeney ka tirsan dadka ku sugan magaalada Beladweyne ee xarunta gobalka Hiiraan.

Maxaabiista ayaa hadda lagu hayaa saldhig ay dagan yihiin ciidamada booliiska Soomaaliya oo ku yaalo gobalka Hiiraan.

Magaalada ee xarunta gobalka Hiiraan waxaa ka jiro dhibaatooyin ballaaran oo ka dhashay fatahaadda wabiga Shabeelle kuwaas oo saameeyay guud ahaan dadkii ku noolaa magaalada oo isugu jira nuucyada bulshada ka kooban tahay.

Sidoo kale fatahaaduhu ma saameeniin oo kaliya xabsigii Beladweyne balse waxay sidoo kale galeen xaruntii gobalka iyo xarumo kale oo muhiiim ah oo ka tirsan Beladweyne.

Caasimada Online
Xafiiska Beledweyne
[email protected]