Muqdisho (Caasimada Online) – Golaha Wasiirrada Xukuumadda Jamhuuriyadda Federaalka Soomaaliya oo yeeshay kulankoodii caadiga ahaa ayaa maanta meel-mariyey qaraarka maareynta isticmaalka khaldan ee baraha bulshada.

Shirka oo uu guddoominayey ra’iisul wasaare ku-xigeenka labaad ee XFS Cabdisalaan Cabdi Cali (Dhaay) ayaa waxaa lagu ansixiyey heshiisyo ku saabsan amniga internet-ka.

Kulanka ayaa sidoo kale waxaa lagu meel-mariyay heshiis is-afgarad wada-shaqayn oo u dhaxeeya guddiyada warbaahinta ee hey’addaha isgarsiinta dowladaha Soomaaliya iyo Malaysia.

Kulanka golaha ayaa sidoo kale lagu soo bandhigay warbixinno ku saabsan amniga iyo howl-galladii ugu dambeeyay ee ciidamada qalabka sida ay ka sameeyeen qeybo kamid ah gobollada dalka.

Dhinaca kale, golaha wasiirada ayaa diirada saaray dardar-gelinta dadaallada dowladdu ku gaarsiineyso bulshada adeegyada kala duwan.

Waxaa kale oo lagu soo bandhigay warbixinno ku aaddan horumarinta karaanka aadanaha iyo sidii kor loogu qaadi lahaa adeegga bulshada iyadoo wasaaraddaha caafimaadka, waxbarashada iyo dhallinyarada ay warbixino la wadaageen shirka.

Tiirka arrimaha bulshada oo ah mid muhiim u ah horumarinta ummadda Soomaaliyeed ayaa waxa uu ra’iisul wasaare ku-xigeenka labaad faray wasaaraddaha ku shaqada leh in la dardar-geliyo arrimaha la xiriirra adeegyadda dowladdu gaarsiinayso shacabkeenna si looga miradhaliyo qorshaha qaranka.

Moscow (Caasimada Online) – Dowladda Ruushka ayaa ku dhowaaqday ballan qaad culus oo ay u sameysay Soomaaliya, kadib wada-hadal ka dhacay magaalada Moscow ee caasimada dalkaasi.

Wada-hadalka oo ahaa mid xasaasi ah ayaa waxa uu dhex-maray guddoomiyaha hay’adda maareynta musiibooyinka SoDMA Maxamuud Macallin Cabdulle oo safar shaqo ku jooga dalka Ruushka iyo wasiir ku xigeenka wasaaradda ilaalada madaniga, xaaladaha deg-degga ah iyo arrimaha la tacaalidda musiibooyinka ee dalkaas Dr. Kurynin Roman Viktorovich.

Kulanka ayaa waxaa looga hadlay xaaladaha bani’aadannimo ee Soomaaliya, jawaabta deg-degga ah ee loo baahan yahay si loo yareeyo khataraha ka dhasha musiibooyinka, is ay isaga kaashadaan labada waddan.

Sidoo kale waxa ay dhinacyadu ka wada-hadleen inay yeeshaan wadashaqayn dhow iyo in si guud hay’adda SoDMA laga caawiyo dhisidda kartida iyo aqoonta, iyadoo loo marayo tababarro dhan kasta ah iyo qalabeyn.

Intaas kadib wasiir Roman Viktorovich oo madasha ka hadlay ayaa ballan-qaaday in uu madaxda ugu sarreysa Ruushka gaarsiin doono sida ay muhiim u tahay in gargaar deg-deg ah loo soo diro Soomaaliya, si saameynta abaaraha aysan u gaarin xaddi aan waxba laga qaban karin, ayna diyaar u yihiin inay garab istaagaan dowladda iyo shacabka Soomaaliyeed.

Dhankiisa guddoomiyaha hay’adda SoDMA Maxamuud Macallin ayaa ka mahad-celiyay taagerada muddada dheer ah, isagoo bogaadiyay xiriirka diblomaasiyadeed ee ka dhaxeeya Muqdisho iyo Moscow.

Horay Ruushka ayaa Soomaaliya ugu soo diray maraakiib siday gargaar, gaar ahaan Qamadi, kaas oo soo gaaray Muqdisho, kadibna ay la wareegtay dowladda Soomaaliya.

Garoowe (Caasimada Online) – Puntland ayaa qaaday tallaabo deg-deg ah oo la xiriirta sidii loogu hortagi lahaa beegsiga lagu bilaabay ajaaniibta ku sugan deegaanadeeda, kadib markii la dhibaateeyay Itoobiyaan ku sugnaa magaalooyinka Garoowe iyo Boosaaso.

Itoobiyaanka ku nool Puntland ayaa sheegay in “falal isugu jira handadaad, xarig sharci-darro ah, jirdil, iyo boob” oo ka dhan ah qaxootiga iyo muhaajiriinta Itoobiyaanka ah ay ka sii dareen magaalooyin dhowr ah, oo ay ka mid yihiin Garoowe oo ah xarunta maamulka, Boosaaso iyo Qardho.

Goob-joogayaal ayaa sheegay in rabshaduhu ay bilowdeen 26-kii Janaayo, kaddib markii muwaadin Itoobiyaan ah ay dileen ciidamada ammaanka Puntland. Maalintii xigtay, labo kale oo Itoobiyaan ah ayaa lagu warramay in lagu dilay Boosaaso kaddib markii “dadweyne careysan ay garaaceen.”

Wasaaradda arrimaha gudaha Puntland oo warsaxaafadeed soo saartay ayaa ka hadashay dhibaatooyinkan, oo ay ka qaarkood ka dambeeyeen dadweyne caraysan oo beegsaday Itoobiyaanka, sida sharci darrada ah ku jooga magaalooyinka maamulkaasi.

Wasaaradda ayaa sheegtay in waajib ay tahay  ilaalinta xuquuqda aadanaha ee dadka ajaanibta ah, waxayna tilmaamtay in tallaabo adag laga qaadi doono cid kasta oo ku xad-gudubta.

Sidoo kale wasaaradda ayaa shacabka Puntland ugu baaqday inay ka fogaadaan fal kasto oo xad-gudub ah ku ah sharciga, gaar ahaan dhibaatada dadka ajanabiga ah.

“Sidaas darteed, wasaaradda ayaa mar kale ugu baaqaysa shacabka in ay ka fogaadaan falalka sharci-darrada ah, isla markaana ay garab istaagaan hay’adaha ku shaqada leh la xisaabtanka cid kasta oo halis ku ah nabadda iyo amniga Puntland,” ayaa lagu yiri qoraalka.

Arrintan ayaa kusoo aadeyso, iyada oo Puntland shalay ay bilowday in deegaanadeeda ay ka tarxiisho ajaaniibta sharci darrada ku joogta maamulkaasi, gaar ahaan Itoobiyaanka oo la arkayay, iyaga oo gaadiid xamuul ah laga saaray magaalada Garoowe, sababo la xiriira si looga hortego ajaaniibta tiro badan ee mar kasta ku biirto kooxda argagixisada Daacish.

Muqdisho (Caasimada Online) – Xildibaan hore Idiris Cabdi Dakhtar oo wareysi gaar ah siiyay Telefishinka Soomaalia Cable ayaa si adag uga hadlay beegsi uu sheegay in lagu haayo shacabka kasoo jeedo Koonfur Galbeed ee ku dhaqan deegaannada Puntland.

Idiris Dhaqtar ayaa shaaca ka qaaday in wax laga xumaado ay tahay in deegaan Soomaaliyeed laga soo raafo dad Soomaaliyeed, iyaga oo loo beegsanayo hayb ahaan.

Sidoo kale wuxuu tilmaamay in sababta ugu wayn ee arrintan ka dambeysa ay tahay in la boobo hanti iyo ganacsi uu sheegay in dadka Koonfur Galbeed ku leeyihiin Puntlland.

“Waan ka xumahay in dad shacab ah oo magaalada deggan mar walba loo dhibaateeyo haybtooda dartood, waxaan u aragnaa in la rabo hantidooda”. ayuu yiri Dhaqtar.

Siyaasigan oo sii hadlaya ayaa sidoo kale shaaca ka qaaday in Baydhabo oo ah xarunta KMG ah ee Koonfur Galbeed ay joogaan dad kasoo jeedo Puntland, isla markaana ay ugu nool yihiin si xor ah, sidaas oo kalena looga baahan yahay dadka reer Puntland.

“Haddii aad tegtid Koonfur Galbeed cid walba ayaa joogta kuwa hay’adaha haysto waxaa u badan dad kasoo jeedo Puntland” ayuu sii raaciyay.

Ugu dambeyn wuxuu baaq u diray madaxda Puntland oo uu ka dalbaday inay soo farogeliyaan arrintaan, isla markaana ay ka hadlaan dhibaatada lagu hayo dadkaasi.

Horay shacab kasoo jeeda deegaannada Koonfur Galbeed ayaa waxaa Somaliland ay uga soo masaafurisay Laascaanood, iyada oo sababta ku sheegtay in arrimo la xiriira amniga, waxaana arrintaasi ka dhashay caro xoogan iyo cambaareyn loo jeediyay maamulkaasi.

Washington (Caasimada Online) – Hay’adda Socdaalka iyo Kastamada ee Mareykanka (ICE) ayaa sare u qaadday dadaalladeeda la xiriira tarxiilidda muhaajiriinta aan sharciga haysan, iyadoo Soomaaliya ay hormuud u tahay waddamada Afrika ee ay sida gaarka ah u beegsanayso.

Tirada muwaadiniinta Soomaaliyeed ee hadda loo qorsheeyay in dalka laga saaro ayaa gaareysa 4,090, taasoo ka tarjumeysa baaxadda hawlgallada lagu hayo muhaajiriintan. Waxaa Soomaaliya ku xiga Nigeria oo leh 3,690 kiis oo la sugayo in la tarxiilo, halka Ghana ay ka joogaan 3,228 kiis.

Culeyska saaran hay’adda ICE ayaa si xawli ah u kordhay tan iyo markii uu xilka dib ula wareegay madaxweynaha cusub ee Mareykanka, Donald Trump, iyadoo la raacayo siyaasadihiisa adag ee dhanka socdaalka.

Mid ka mid ah qodobada ugu muhiimsan ee siyaasaddan ayaa ah amar fulineed oo dib u eegis ku sameynaya dhalashada-ku-dhalashada (birthright citizenship) carruurta ay dhalaan muhaajiriinta aan sharciga haysan. Arrintan ayaa dhalisay hadal-hayn badan oo ku saabsan cawaaqibka ka dhalan kara.

Siyaasaddan ayaa walaac xooggan ka dhex dhalisay u doodayaasha xuquuqda muhaajiriinta, kuwaasoo ka cabsi qaba in ay sare u sii qaaddo kala-tagga qoysaska, isla markaana ay horseedi karto xadgudubyo ka dhan ah xuquuqul insaanka.

Dadka dhaliilsan ayaa sheegaya in xoog-saaridda Soomaaliya ay la xiriiri karto walaac amni oo ka dhashay xasillooni-darro siyaasadeed ee dalkaas ka jirta, inkastoo aysan jirin xiriir toos ah oo ay xaqiijiyeen ICE ama maamulka Trump.

Saraakiisha dowladda Mareykanka ayaa ku sababeeyay tallaabooyinkan adag inay salka ku hayaan ilaalinta amniga guud iyo dhaqangelinta sharciyada hadda jira. Hase yeeshee, fal-celinno kala duwan ayaa ka dhashay, waxaana ka dhashay mudaaharaadyo iyo dacwado sharci ah oo ay soo gudbiyeen kooxo u dooda xuquuqul insaanka, kuwaasoo ka walaacsan saameynta ay ku yeelan karaan arrimaha bini’aadantinimada iyo xiriirka caalamiga ah.

Dowladaha qaar ayaa isu diyaarinaya inay dib u soo dhaweeyaan muwaadiniintooda, halka kuwa kalena ay walaac ka muujinayaan habka loola dhaqmayo dadka la tarxiilayo xagga arrimaha bini’aadantinimada.

Beledweyne (Caasimada Online) – Faah-faahino dheeraad ah ayaa waxaa laga helayaa duqeymo diyaaradeed oo xalay ka dhacay agagaarka galbeedka gobolka Hiiraan, taas oo lala beegsaday xubno sar sare iyo maleeshiyaad ka tirsan kooxda Al-Shabaab.

Duqeynta ayaa waxaa lagu soo warramayaa in lala beegsaday goob ay isku uruursanayeen maleeshiyaadka Al-Shabaab xilli ay kasoo talaabeen jinga wabiga Shabelle.

Saraakiil ka tirsan milatariga Soomaaliya ayaa shaaca ka qaaday in weerarkan dhanka cirka ah khasaare culus lagu gaarsiiyay Khawaarijta, sidoo kalena looga gubay gaadiid dagaal.

Dhanka kale, ma jiro wax hadal ah oo kasoo baxay dhinaca Al-Shabaab oo ku aadan howlgalkaasi ee ay guusha ka sheegatay dowladda federaalka ah ee Soomaaliya.

Xaaladda ayaa haatan ah mid aad u kacsan, waxaana dhaq-dhaqaaqyo iska soo horjeedo laga dareemayaa qaybo badan oo kamid ah gobolka Hiiraan ee bartamaha Soomaaliya.

Hiiraan ayaa waxaa haatan dib uga bilowday gulufka ka dhanka ah Al-Shabaab, kaas oo ay iska kaashanayaan ciidamada dowladda iyo kuwa dadka deegaanka ee Macawiisleyda.

Si kastaba, HirShabelle  ayaa kamid ah meelaha ay weli ku xoogan yihiin Shabaabka, waxaase ka soconaya howlgallo ujeedkooda uu yahay in looga xoreeyo maamulkaasi.

Muqdisho (Caasimada Online) –Madaxweynaha Jamhuuriyadda Federaalka Soomaaliya Mudane Xasan Sheekh Maxamuud ayaa ka qeyb-galay Shir madaxeedka 26-aad ee aan caadiga ahayn ee Madaxda Urur Goboleedka Iskaashiga Dhaqaalaha Bariga Afrika (EAC).

Shirkaas ayaa caawa looga hadlay xiisadda dagaal ee kasoo cusboonaatay Bariga Jamhuuriyadda Dimuqraadiga ah ee Congo (DRC) oo xubin ka ah dalalka ururkaas.

Shirkan oo ay Madaxdu ku yeesheen habka fogaan aragga ah ayaa Madaxweynaha Jamhuuriyadda Soomaaliya, waxa uu la wadaagay hoggaamiyeyaasha kale ee Urur Goboleedka Iskaashiga Dhaqaalaha Bariga Afrika, sida dowladda Soomaaliya ay uga walaacsan tahay xaaladda dalka Congo (DRC).

Xasan Sheekh ayaa dhinacyada is haya ugu baaqay in ay si shuruud la’aan ah u joojiyaan colaadda sokeeye, ayna dib ugu laabtaan miiska wada-hadalka.

Madaxweyne Xasan Sheekh ayaa dul istaagay waayo aragnimada Soomaaliya ee colaadaha sokeeye iyo cawaaqib xumada ka dhalata.

Madaxweynaha Soomaaliya ayaa usoo jeediyay dhinacyada dagaallamaya inay ilaaliyaan goobaha rayidka iyo xarumaha diblomaasiyadda, si waafaqsan xeerarka caalamiga ah iyo xaquuqda Aadanaha.

Ugu dambayn, Madaxda dalalka Urur Goboleedka Iskaashiga Dhaqaalaha Bariga Afrika ee shirkan ka qayb galay ayaa isla qaatay in la qabto shir degdeg ah oo ay madaxda EAC iyo Urur Goboleedka Horumarinta Koonfurta Afrika (SADC) ay kaga wada hadlayaan colaadda sokeeye ee Jamhuuriyadda Dimuqraadiga ah ee Congo DRC.

Garoowe (Caasimada Online) – Saddex muwaadin oo Itoobiyaan ah ayaa lagu dilay labo maalmood gudahood deegaanada Puntland, iyadoo lagu eedeeyay inay “xiriir la leeyihiin kooxda argagixisada ah ee Daacish,” halka tiro Itoobiyaan ah la xiray, sida ay dadka deegaanka u sheegeen wargeyska Addis Standard.

Itoobiyaanka ku nool Puntland ayaa sheegay in “falal isugu jira handadaad, xarig sharci-darro ah, jirdil, iyo boob” oo ka dhan ah qaxootiga iyo muhaajiriinta Itoobiyaanka ah ay ka sii dareen magaalooyin dhowr ah, oo ay ka mid yihiin Garoowe oo ah xarunta maamulka, Boosaaso iyo Qardho.

Goob-joogayaal ayaa sheegay in rabshaduhu ay bilowdeen 26-kii Janaayo, kaddib markii muwaadin Itoobiyaan ah ay dileen ciidamada ammaanka Puntland. Maalintii xigtay, labo kale oo Itoobiyaan ah ayaa lagu warramay in lagu dilay Boosaaso kaddib markii “dadweyne careysan ay garaaceen.”

Muwaadin reer Puntland ah, oo codsaday inaan magaciisa la shaacin sababo amni awgood, ayaa Addis Standard u sheegay in dilalkan lala xiriirinayo eedeymo sheegaya in Itoobiyaanka qaar “ay xiriir la leeyihiin kooxda argagixisada ah ee Daacish.”

“Waxaa suurtogal ah inay jiraan shaqsiyaad Itoobiyaan ah oo arrintan ku lug leh, laakiin in la ciqaabo dhammaan Itoobiyaanka iyadoo marmarsiyo laga dhiganayo in koox yar ay xiriir la leedahay Daacish ma ahan mid xaq ah,” ayuu yiri.

Ciidamada ammaanka ee maamulka Puntland ayaa la sheegay inay xabsiga dhigeen “kumanaan Itoobiyaan ah,” ayuu yiri muwaadinkan.

“Magaalada Garoowe oo keliya, in ka badan 500 oo Itoobiyaan ah ayaa lagu xiray,” ayuu sii raaciyay, isagoo ku dooday in dadka la xiray ay yihiin rayid aan la aqoonin wax xiriir ah oo ay la leeyihiin kooxaha hubeysan.

Muwaadin kale oo Itoobiyaan ah oo la hadlay Addis Standard ayaa sheegay in tallaabadan ay u muuqato mid ka dhalatay “cadaawadda sii kordheysa” oo loo qabo Itoobiyaanka, taasoo cirka isku shareertay kaddib markii Itoobiya ay heshiis is-afgarad ah (MoU) oo dhanka badda ah la saxiixatay Somaliland — heshiiskaas oo dowladda Federaalka Soomaaliya ay si adag uga soo horjeedo.

Muwaadinkan ayaa sidoo kale sheegay in ciidamada ammaanka ee Puntland, oo ay ku jiraan booliiska iyo maleeshiyaadka deegaanka, ay ku lug leeyihiin weerarrada ka dhanka ah Itoobiyaanka.

Wuxuu xusay in dadweynaha reer Puntland qaarkood “ay Itoobiyaanka ugu hanjabayeen inay dalka isaga baxaan, ayna ka tagaan hantidooda, taasoo salka ku haysa nacayb.”

Qaxootiga Itoobiyaanka ah ee ku nool Puntland ayaa horay ula kulmay dhibaatooyin la mid ah. Bishii Juun 2024-kii, maamulka Puntland ayaa amar ku bixiyay in Itoobiyaanka aan haysan sharciga qaxootinimo ee ku sugan Garoowe ay si degdeg ah uga baxaan magaalada, iyagoo walaac ka muujiyay “tiradooda oo sii kordheysa iyo saameynta ay ku yeelan karaan fursadaha shaqo ee deegaanka.”

Addis Standard ayaa horey uga warramay “hanjabaado iyo falal-gacan ka hadal ah” oo ka dhan ah Itoobiyaanka ku nool Soomaaliya kuwaasoo sii kordhay kadib heshiiskii is-afgaradka ahaa ee Itoobiya ay la gashay Somaliland.

Maamulka Puntland weli kama hadal dadka Itoobiyaanka ah ee lagu warramay in la dilay.

Muqdisho (Caasimada Online) – Masuuliyiin ka tirsan dowladda, dhalinyarada caanka ka ah baraha bulshada iyo qeybaha kala duwan ee bulshada caasimadda Muqdisho ayaa maanta garoonka Aadan Cadde ku soo dhaweeyey Asad Xaajiyow oo ah wiil caan ah oo Khawaarijta Al-Shabaab ay naafeeyeen.

Soo dhaweynta Asad Xaajiyow ayaa maanta saxmad badan ka abuurtay Garoonka Aadan Cadde, wuxuuna soo dhaweynta kadib warbaahinta la hadlay isagoo qiireysan.

“12-sano ka hor ayaa halkaan diyaarad la iga saaray anigoo nolosha ka dhacay oo dhabarka la igu sido, maanta waxaan dalkeyga ku soo laabtay iyadoo la i wada jecelyahay,” ayuu yiri Asad Xaajiyow.

Wiilkaan oo naafo ka ah ayaa ku noolaa jiray dalka Malaysia, waxaana bartiisa YouTube ku xiran in ka badan 2 milyan oo qof, wuxuuna baraha bulshada ku soo bandhigaa jiliimo cajiib ah oo asluubeysan, dadkuna jecelyihiin.

Youtuberka caanka ah ee Asad Xaajiyow waxaa 27-kii Agoosto 2012-kii toos u weeraray oo doonayey inuu dilo, balse dhaawac culus u geystay Maxamed Xaaji Ilkacase (Macalinkii Dilaaga ahaa) oo markii dambe gacanta dowladda Soomaaliya soo galay.

Asad markii dhibkaas loo geystay wuxuu ahaa wiil yar oo ku noolaa magaalada Marka ee gobolka Sh/Hoose, xiligaas ayaa Soomaaliya laga qaaday isagoo ku jira xaalad quus ah, in ka badan 12 sano kadib ayuu maanta dib ugu soo laabtay Muqdisho.

29-kii November 2020-kii Dowladda Soomaaliya ayaa tiirka cadaaladda geysay oo toogatay Maxamed Xaaji Ilkacase oo ahaa dhagarqabihii dhaawacay Asad Xaajiyow, sidoo kalena dilay dad badan oo Soomaaliyeed.

Asad Xaajiyow ayaa sheegay in hadda uu ku soo dhiiraday nabadda ka jirta Soomaaliya, wuxuu gocanayaa dhibaatooyinkii ay Al-Shabaab u geysteen, wuxuuna maanta cesha waayey ilintii intii uu la hadlaayey warbaahinta iyo dadkii ku soo dhaweeyey garoonka Aadan Cadde.

Hoos ka daawo

Muqdisho (Caasimada Online) – Guddiga Madaxa Bannaan ee Doorashooyinka Qaranka Soomaaliya (NIEC) ayaa ku dhawaaqay in doorashooyinka goleyaasha deegaanka la qaban doono bisha Juun, iyadoo ay ka mid yihiin gobollada Gedo iyo Khaatumo.

Doorashooyinkan ayaa qeyb ka ah dadaalka dowladda federaalka ee lagu xoojinayo maamulka dowladaha hoose.

Guddoomiyaha NIEC, Cabdikariin Axmed Xasan, ayaa wareysi uu siiyay Telefishinka Qaranka ku sheegay in la aqoonsaday 800 xarumood oo codbixin ah, kuwaasoo laga hirgelin doono Muqdisho, Hirshabelle, Galmudug, Jubbaland—oo ay Gedo ku jirto—Koonfur Galbeed, iyo maamulka ku-meel-gaarka ah ee SSC-Khaatumo.

Wuxuu xusay in wadatashiyo lala yeeshay inta badan madaxda dowlad-goboleedyada ay aasaas u noqdeen diyaarinta doorashooyinka.

Ururada siyaasadeed ee doonaya inay ka qeyb galaan doorashada waa inay buuxiyaan shuruudo adag oo cusub. Sida uu sheegay Cabdikariin, dhammaan ururada waa in ay iska diiwaan geliyaan guddiga, halka ururadii horey u diiwaangashanaa laga doonayo inay dib u cusboonaysiiyaan shahaadooyinkooda.

Sidoo kale, urur kasta waa in uu cadeeyaa inuu haysto ugu yaraan 10,000 xubnood, shuruud loo dejiyey si loo hubiyo kalsoonida iyo taageerada ballaaran ee ay haystaan.

Doorashooyinka dhammaan gobollada waxaa lagu wadaa in hal maalin la wada qabto, iyadoo Muqdisho door muhiim ah ka qaadan doonto.

Goobaha codbixintu waxay ka dhici doonaan degmooyinkii rasmiga ahaa ee la aqoonsanaa ka hor 1991 xilligii dowladdii militariga, oo tiradoodu ahayd 95 degmo. Si kastaba ha ahaatee, NIEC ayaa arrintaas dib u eegis ku sameysay, iyadoo fududeysay hannaanka doorashada lana dhimay tirada degmooyinka si ay u noqdaan 65, si loo hagaajiyo hab-sami u socodka doorashooyinka.

Hase yeeshee, hannaanka doorashooyinka ayaa wajahaya caqabado waaweyn.

Khilaafaadka siyaasadeed ee u dhexeeya dowladda federaalka iyo maamullada Puntland iyo Jubbaland ayaa weli jira, halka mucaaradku ay si adag uga soo horjeedaan in doorasho guud laga qabto dalka oo dhan. Xiisadahan ayaa dhalinaya su’aalo la xiriira suurtagalnimada in doorashooyinka ay si buuxda uga qabsoomaan dhammaan goobaha la qorsheeyey.

Daaru-salaam (Caasimada Online) – Madaxweynaha Jamhuuriyadda Federaalka Soomaaliya Dr. Xasan Sheekh Maxamuud ayaa kulan-doceedyo miro-dhal ah la yeeshay madax kala duwan oo ka qeyb-galay shirweynaha tamarta Afrika ee ka socda Daaru-Salaam ee dalka Tanzania.

Madaxweynaha ayaa la kulmay madaxweynaha Tanzania Marwo Samia Suluhu Hassan oo ay ka wada-hadleen xoojinta xiriirka labada dal iyo iskaashiga istiraatiijiga ee arrimaha bulshada bariga Afrika.

Labada dowladood ee Soomaaliya iyo Tanzania ayaa kala saxiixday heshiisyo muhiim ah oo lagu xoojinayo wada shaqeynta dhinacyo badan.

Tan ayaa muujineysa rabitaanka labada dal ee kobcinta xasilloonida iyo horumarka gobolka, sida ay sheegtay Madaxtooyada Soomaaliya.

Sidoo kale madaxweyne Xasan Sheekh ayaa kulan la qaatay madaxweynaha Ghana John Dramani Mahama, waxayna ka wada-hadleen sidii kor loogu qaadi lahaa xiriirka Soomaaliya iyo Ghana, maalgashiga iyo isku xirka ganacsatada labada dal.

Madaxweynaha ayaa la kulmay madaxa bangiga horumarinta Afrika (AfDB) Akinwumi Adesina oo ay dul istaageen wadashaqeynta Soomaaliya iyo Bangiga, kobcinta fursadaha maalgashi ee Soomaaliya, gaar ahaan xoolaha, dhaqaalaha badda, tamarta iyo horumarinta kaabeyaasha dhaqaalaha.

Madaxweyne Xasan Sheekh ayaa casuumaad rasmi ah u fidiyay Dr. Adesina si uu u booqdo Soomaaliya taas oo uu aqbalay.