Muqdisho (Caasimada Online) – Waxaa maanta si weyn looga ciiday magaalada Muqdisho iyo magaalooyinka kale ee Soomaaliya maalinta koowaad ee Ciidul-Adxa, ayada oo inta badan salaadda ciida lagu dukaday goobaha fagaaraayaasha.

Magaalada Muqdisho ayaa kamid ahaa goobihii lagu dukaday salaadda ciida, oo qaarkood ay bulshada dukashada salaadda ciida kala soo qeyb-galeen madax ka tirsan dowladda federaalka Soomaaliya.

Waxaa saxmad ahaa saaka waddooyinka waaweyn ee magaalada Muqdisho, ayada oo indhahaaga ay qabanayeen caruur iyo waalid gacanta haya oo u socda goobaha loo diyaariyay ciida iyo tamashleynta.

Sidoo kale, Ra’iisul Wasaare Xamza Cabdi Barre iyo masuuliyiin uu kamid yahay ku-simaha madaxweynaha ahna gudoomiyaha Golaha Shacabka Sheekh Aadan Madoobe ayaa salaadda Ciidda Carafo boqolaal kamid ah shacabka Soomaaliyeed kula tukaday Masjidka Isbahaysiga Islaamka ee magaalada Muqdisho.

Ra’iisul Wasaaraha ayaa dhammaan shacabka Soomaaliyeed iyo ummadda Muslimiinta ah ugu hambalyeeyey munaasabadda Ciidda Carafo, isaga oo xujayda sanadkan gudanaya waajibaadka xajka Alle uga baryey in uu ka aqbalo acmaashooda suubban.

Mudane Xamza ayaa ugu baaqay shacabka Soomaaliyeed in ay isku naxariistaan isla markaana ay is caawiyaan, si farxadda Ciiddu ay u wada gaarto dhammaan bulshada gaar ahaan inta nugul.

Guddomiye Sheekh Aadan Madoobe oo isna salaadda Ciidda kadib la hadlay dadweynihii masaajidka ku sugnaa ayaa ugu hambalyeeyay munaasabada Ciidda, isaga oo dadka Soomaaliyeed ku booriyay garab istaagida dadka danta yar.

Ugu dambeyn guddoomiye Sheekh Aadan Madoobe ayaa ugu baaqay dadka Soomaaliyeed midnimo, wadajir iyo in ay taageeraan horumarka dowladnimo ee dalka.

Isku soo wada duubo, Munaasabadda Ciidul-Adxa ayaa si weyn looga dabaal-degay guud ahaan magaalooyinka dalka, waxaana laga dareemaya saxmad waddooyinka waaweyn iyo goobaha ay iskugu imaadan dadweynaha.

Muqdisho (Caasimada Online) – Ciidamada Kumaandooska DANAB, gaar ahaan Guutada 16-aad ayaa maanta waxay Salaadda Ciidda ku oogeen Jiidda hore ee howdka.

Ciidankan oo muddooyinkii dambe ku sugnaa howdka degmada Ruuni-nirgood ee gobolka Shabeellaha Dhexe, ayaa maanta ku ciidday halkaasi oo ay ka waddaan howl-gallo ka dhan ah kooxda Al-Shabaab.

Bartamaha sanadkii hore ee 2023-ka ayey aheyd markii ciidanka xoogga dalka si buuxda ula wareegeen gacan ku heynta degmada Ruun-nirgood iyo deegaanno hoosyimaada oo ka tirsan gobolka Shabeellaha Dhexe.

Marar badan ayey Al-Shabaab ciidamada dowladda ku soo weerareen Ruun-nirgood oo ah degmo istaraatiiji ah, waxaana hadda socda guluf culus oo la doonayo in aaggaas looga nadiifiyo kooxda.

Kooxda ayaa degmada iyo deegaanada ku teedsan aad u jecel, maadaama ay yihiin dhul howd ah, waxaana marar badan ay isku dayeen inay dib u qabsadaan, taasi oo kusoo dhamaatay fashil

Degmadaan oo dhacda halka ay iska galaan gobollada Shabeellada Dhexe iyo Galgaduud ayaa sanadkii tegay kamid noqotay magaalooyinkii kooxda Al-Shabaab, uuna illaa hadda ka socda howdkeeda howl-gallo lagu baacsanayo maleeshiyaadka kooxda.

Si kastaba, dagaalka Al-Shabaab ayaa xilligaan maraya meel xasaasi ah, waxaana socda dadaallo dowladda ku dardar-gelinayso howl-gallada ka dhanka ah kooxda oo muddooyinkii dambe uu gaabis ku yimid.

Muqdisho (Caasimada Online) –Madaxweynaha Soomaaliya Xasan Sheekh Maxamuud ayaa farriin u diray dadka baraha bulshada ku faafiya been abuurka iyo aflagaadada dadka kale, iyagoo ka raadinaya dhaqaale, sida uu sheegay Madaxweynuhu.

Madaxweynaha ayaa ugu horeyn dadkaas ugu duceeyey in ilaahey meel kale irsaaqad ka siiyo, si ay isaga dhaafaan been abuurka ay wax ku raadinayaan.

“Kuwa beenta sheega, kuwa dadka caaya iyo kuwa irsaaqada ka raadiya inay dadka aflagaadeeyaan waan u duceyneynaa, walaal inaad been dhaqaale ku raadiso waxaa ka macna badan inaad baahnaato adigoo run sheegaya,” ayuu yiri Madaxweyne Xasan Sheekh.

Sidoo kale Madaxweynaha ayaa sheegay in dadka Soomaaliyeed ay leeyihiin boogo badan oo in la damqiyo ay fududahay, “dhalinyaro yaan la damqin boogahaas, kuwa beenta sheegow ka jooga oo u soo noqda qiimaha ay leedahay diinteena suuban,” ayuu yiri Madaxweyne Xasan Sheekh.

Hadalkaan ayuu madaxweynuhu caawa ku dhex sheegay farriintiisii hambalyada ciidda, wuxuuna ku soo aadayaa iyadoo baraha bulshada uu ka socdo weerar ku wajahan siyaasadda uu ku hoggaamiyo dowladda, kaas oo xoogeystay markii ay dowladdu amartay in lasoo faago qabuurihii Iskuul Buluusiya.

Dowladda Madaxweyne Xasan Sheekh ayaa wajaheysa mucaaradad isisoo tareysa, xili ay gashay sanadkii 3-aad, waxaana baraha bulshada iyo warbaahinta gudaha uga socda weerar iyo doodo xoog leh.

Inta badan doodaha ay wajaheyso dowladda Xasan Sheekh uu hoggaamiyo ayaa ku qotoma guul darooyinka dagaalka Al-Shabaab, waxka bedelka dastuurka, doorashooyinka dowlad goboleedyada oo dib u dhac weyn uu ka jiro iyo arrinta qabuuraha uu ugu dambeysay.

Madaxweynaha ayaa u muuqda inay gaartay farriinta shacabka, wuxuuna codsaday in la joojiyo hadallada xanafta leh, isagoo si cad u sheegay in dadka qaar ay aflagaadada iyo been abuurka dhaqaale ka sameeyaan.

Hoos ka daawo

Muqdisho (Caasimada Online) –Madaxweynaha Soomaaliya Xasan Sheekh Maxamuud oo caawa hadlay ayaa ugu horeyn shacabka Soomaaliyeed ugu hambalyeeyey munaasabadda ciida Carafo, sidoo kale madaxweynaha ayaa ka hadlay dagaalka Al-Shabaab.

Madaxweynaha ayaa sheegay in caqabada ugu weyn ee Soomaaliya heysata hadda ay tahay kooxaha Khawaarijta ah, isagoo wacad ku maray in dowladdu ay soo afjari doonto argagixisada mar aan dheereyn.

Sidoo kale Madaxweyne Xasan Sheekh ayaa farriin u diray dhalinyarada la qalday ee ka tirsan Al-Shabaab, isagoo ugu gacan haatiyey inay ku soo laabtaan dowladda iyo shacabkooda.

“Dalkeenu wuxuu ka soo kabanayaa duruufo adag, dhalinyarada la qalday waxaan ugu baaqayaa inay dadkooda ku soo noqdaan, dambiilayaal dalalkoodii ka soo cararay yeysan idinku laheyn dadkiina, soo noqda dhalinyaro waa sii dhacayaa gabalka Khawaarijta, mustaqbal ma jiro dhankaas ee ka soo noqda,” ayuu yiri Madaxweyne Xasan oo farriin u diray dhalinyarada ka tirsan Al-Shabaab.

Madaxweynaha ayaa waalidiinta dhashay dhalinyarada u dagaalanta Al-Shabaab wuxuu ku dhiirigeliyey in carruurtooda ay ka soo reebtaan cadowga isagoo ka balan-qaaday inay dowladda ka heli doonaan nolol ay ku farxaan.

“Waalidiinta waxaan leeyahay dhalinyarada ka soo reeba Khawaarijta, ninkii ka soo hara Khawaarijta cafis ayuu helayaa, dowladuna noloshiisa ayey ka shaqey doontaa,” ayuu yiri Madaxweynuhu.

Dhinaca kale, madaxweynaha ayaa dadka fuqarada ah ugu laab qaboojiyey inay ku sabraan imtixaanka Alle, isagoo dadka wax heysta ka codsaday inay u gargaaraan walaalahood oo ay wax sadaqeystaan.

“Farriinteydu waxay ku socotaa dadka wax heysta, walaalayaal deriskiinu yeysan gaajoon, carruurta qoyska kula degan ayeysan gaajoon kuwaaga oo dhergan, markii aan dhulka isugu kaalmeyno ayuu ilaahey samada nooga soo kaalmey doonaa,” ayuu yiri Madaxweynaha JFS.

Hoos ka daawo

Muqdisho (Caasimada Online) – Warar kala duwan ayaa kasoo baxaya dagaal u dhexeeyay kooxda Al-Shabaab iyo ciidamada ATMIS oo xalay ka dhacay degmada Balcad oo qiyaastii 30 kiilo mitir u jirta Muqdisho, kaas oo laga helayo faah-faahino dheeraad ah.

Dagaalka ayaa yimid, kadib markii ay Al-Shabaab weerar toos ah ku qaadeen saldhig ciidamada Burundi ee qaybta ka ah howlgalka ATMIS ay ku leeyihiin halkaasi.

War kasoo baxay Al-Shabaab ayaa waxaa lagu sheegay in weerarka oo dhacay xilli habeen ah ay ku beegsadeen xero ay ku sugnaayeen ciidaka shisheeye, gaar ahaan kuwa ATMIS.

Al-Shabaab ayaa guul ka sheegatay dagaalka, waxayna shaacisay inay khasaare culus gaarsiisay ciidamada Burundi, balse ma shaacin tiro rasmiga ah.

Dhanka kale ma jiro wax hadal ah oo kasoo baxay howlgalka ATMIS oo ku aadan weerarkaas iyo dagaalka xigay ee guulaha ka sheegteen maleeshiyada Al-Shabaab.

Xaaladda ayaa maanta deggan, waxaana Balcad iyo nawaaxigeeda ku sugan ciidamada dowladda iyo kuwa ATMIS oo howlgallo ka wada halkaasi.

Balcad ayaa waxaa badanaa weeraro kusoo qaada kooxda Al-Shabaab, waxaana ka dhashay khasaare isugu jiro dhimasho iyo dhaawac.

Si kastana HirShabelle ayaa kamid ah meelaha lagu jabiyay Al-Shabaab wajigii 1-aad ee dagaalka, balse mar kale ayay u muuqataa in kooxda ay kusoo rogaal celisay maamulkaasi.

Garoowe (Caasimada Online) – Madaxweynaha maamulka Puntland, Saciid Cabdullahi Deni ayaa markii ugu horreysay ka hadlay xaaladda ka taagan qabuuraha Iskuul Buluusiya, kadib markii dowladda Soomaaliya ay amartay in maydadka lagala baxo qabuurahaasi.

Saciid Deni ayaa nasiib darro ku tilmaamay faagista qabuuraha, wuxuuna weerar toos ah ku qaaday madaxweyne Xasan Sheekh Maxamuud iyo dowladdiisa.

Madaxweynaha Puntland ayaa sheegay in aysan jirin baahi keeni karta in la faago qabuuraha, isla markaana aysan jirin dhul la’aan, sida uu hadalka u dhigay.

“Madaxweyne Xasan Sheekh waxa aan leeyahay maytida u dhimri, dhul la’aan ma jirtee, dalka oo dhan waa dhul dowladeed.” ayuu yiri Deni.

Sidoo kale wuxuu ku eedeeyay dowladda dhexe in ay horay u iibisay xarumo dan-guud ah, iyada oo looga faa’iideysanayo si shaqsi ah.

“Waxaan ognahay xarumihii dowladda iyo xeryihii dowladda in la yiri  waa laga maarmay oo waala iibinayaa, haddana laleeyahay qabuuraa laga maarmi waayay waa la faagayaa, waa arrimo aan is qaban karin,” ayuu sii raaciyay madaxweyne Siciid Deni.

“Baahi dhuleed maanta Soomaaliya uma qabto inay qabuuro faagto. Dhulka Soomaaliya 70% waa banaan yahay, dadkiisa waa yar yahay.”

Horay waxaa sidaan oo kale arrinta qabuuraha uga horyimid siyaasiyiinta mucaaradka oo ay ku jiraan madaxweynayaashii hore ee dalka,  kuwaas oo eedeymo huwiyay madaxda sare ee dalka.

Si kastaba, waxaa haatan la faagay inta badan qabuuraha oo laga saaray maydadkii, kadib markii ay la baxeen ehelladooda oo u hoggaansamay amarka dowladda, waxayna ku aasteen goobo kale.

Muqdisho (Caasimada Online) – Wasiirka Wasaaradda Gaashaandhigga Soomaaliya Cabdulqaadir Maxamed Nuur ayaa war ka soo saaray geerida Taliyihii guutada 8-aad ee qeybta 60-aad oo maanta lagu dilay qarax miino.

Gaashaanle Maxamed Nuur Sheegow (Mad Dheere), iyo saraakiisha kale oo la shahiiday ayaa maanta duhurkii lagu dilay inta u dhaxeysa degmooyinka Aw-diinle iyo Berdaale ee Koonfur Galbeed, xili ay ku jireen howlgal sifeyn ah.

“Qoyska, ehelada, Ciidanka Xoogga Dalka iyo guud ahaan Shacabka Soomaaliyeed, waxaan uga tacsiyeynaynaa Geerida shahiid Maxamed Nuur Sheegow, Taliyahii Guutada 8-aad, Qeybta 60-aad iyo saraakiishii Ciidanka Xoogga Dalka Soomaaliyeed ee inaga shahiiday, waxaana Alle uga baryeynaa inuu Janadii Firdowso ka waraabiyo inta dhaawaca ahna uu alle caafiyo,” ayuu yiri Wasiirka Gaashaandhigga XFS.

Allaha u naxariistee Taliyahii Guutada 8-aad, Qeybta 60-aad ee Ciidanka Xoogga Dalka Soomaaliyeed G/le Maxamed Nuur Sheegow iyo saraakiisha kale ee la socotay iyo guud ahaan naftood hurayaasha CXDS ee horay inooga Shahiiday waxa ay naftooda u hureen in Dalka, Dadka iyo Diinteenna suuban ay ka badbaadiyaan Cadowga Khawaarijta ah.

Guddoomiyihii hore ee degmada Diinsoor oo ahaa sarkaal ciidan iyo tiro kale oo saraakiil ah ayaa qaraxaas lagu laayey, sidoo kale askar badan ayaa geeriyootay maanta, in kalena dhaawacyo culus ayaa soo gaaray.

Ciidankaan waxay ku jireen howlgal muddo 3 maalmood ah, waxayna ku howlanaayeen inay isku furaan wadooyinka ay Shabaab go’doomiyeen ee isaga kala goosha gobollada Bay, Bakool iyo Gedo.

Kooxda Al-Shabaab ayaa maanta agga Berdaale qarax miino kula beegsatay kulanyadii ku jirtay howlgalka, ilaa 3 gaari ayaa la sheegay inay isku mar miinooyinku haleeleen, kuwaas oo goobta ku basbeelay, waxaana ku dhamaatay askar iyo saraakiil badan.

Madaxweynaha K/Galbeed iyo guddoomiyaha golaha shacabka oo maanta war ka soo saaray dilka Taliyaha iyo saraakiisha kale ayaa uga tacsiyeyey dhamaan umadda Soomaaliyeed, geeridaan ayaa maanta aad u taabatay dadka Soomaaliyeed ee rajada weyn ka qaba in laga adkaado kooxaha argagixisada ah.

Baydhaba (Caasimada Online) – Warar kala duwan ayaa kasoo baxaya khasaaraha ka dhashay qarax maanta ka dhacay inta u dhexeysa deegaanka Awdiinleh iyo degmada Bardaale ee gobolka Baay, kaas oo lagu dilay sarkaal sare oo lagu magacaabi jiray Gaashaanle Maxamed Nuur oo loo yaqiinay (Maxamed Dheere) iyo ciidamo kale oo la socdey.

Marxuumka ayaa hadda ahaa taliyahii guutada 8-aad, qeybta 60-aad ee ciidanka Xoogga dalka, waxaana xilliga la dilayay uu kasoo laabtay howlgal ka dhacay halkaasi.

Allaha u naxariistee Maxamed Dheere ayaa hoggaaminayay howlgallo waddo furis ah oo ay ciidamada dowladda iyo kuwa Koonfur Galbeed ka wadaan halkaasi, kuwaas oo uu ujeedkoodu  yahay in la’isugu furo gobollada Baay, Balool iyo Gedo ee koonfurta Soomaaliya.

Xaaladda ayaa haatan ah mid aad u kacsan, waxaana weli socda dhaq-dhaqaaqyo iska soo horjeedo oo ay wadaan labada dhinac.

Sidoo kale ma jiro wax hadal ah oo kasoo baxay dowladda federaalka Soomaaliya iyo Koonfur Galbeed oo ku aadan qaraxa lagu dilay taliye Mahad Dheere.

Gobollada Baay iyo Bakool ayaa waxaa weli ku xoogan maleeshiyada kooxda Al-Shabaab oo inta badan weeraro culus ka fuliya gobolladaas oo haatan ay howlgallo ka wadaan ciidamada dowladda iyo kuwa Koonfur Galbeed Soomaaliya.

Oslo (Caasimada Online) – Madaxweynaha dowladda federaalka ah ee  Soomaaliya, Mudane Xasan Sheekh Maxamuud oo ka qayb-galayay shir ka dhacay dalka Norway oo uu booqasho ku tegay ayaa ka hadlay arrimo xasaasi ah oo ku aadan kooxda Al-Shabaab.

Xasan Sheekh oo wax laga waydiiyay in dowladdiisa ay wada-hadal la fureyso Al-Shabaab ayaa ku jawaabay inay diyaar u yihiin, si wax kasta loogu dhameeo miiska wada-hadalka.

Madaxweynaha ayaa sheegay in dhammaadka Al-Shabaab uu yahay wada-hadal, isla markaana dowladda Soomaaliyeed ay ku dadaali doonto, sidii loo wada-hadli lahaa.

“Waxaan rumeysanahay in dhamaadka Al-Shabaab uu yahay wada-hadal, goormee ayay diyaar yihiin? dowladda Soomaaliya waa diyaar” ayuu yiri madaxweyne Xasan Sheekh.

Sidoo kale wuxuu tilmaamay in wada-hadalkaas uu waqti dheer qaadan karo, balse ay ku dadaalayaan sidii loo abuuri lahaa wada xaajoodkaas, kadibna looga miro dhaliyo.

“Waxaan rajeyneynaa inay arrintaasi diyaar u noqdaan, marka ay diyaar noqdaan waan wada-hadli doonaa, wada xaajoodkaas wuxuu qaadan karaa waqti, laakiin ugu yaraan waxaan abuuri doonaa waddo cusub” ayuu sii raaciyay madaxweynaha Soomaaliya.

Hadalkan ayaa kusoo aadayo, ayada oo haatan dowladda dhexe ay dagaal culus kula jirto kooxda Al-Shabaab, kaas oo deegaano badan looga xoreeyay kooxda.

Dagaalkan ayaa sii xoogeystay kadib dib u doorashadii madaxweyne Xasan Sheekh ee 15-kii May ee sanadkii 2022-kii, waxaana Al-Shabaab lagu qaaday dagaal saddex jiho ah.

Si kastaba, dagaalka ayaa hadda yare istaagay marka loo eego dardarkii uu billowday, waxaase weli socda qorshaha wajiga labaad oo ay kusoo biiri doonaan ciidamo cusub.

Dhuusamareeb (Caasimada Online) – Hoggaamiyaha guud ee Ahlu-sunna Waljamaaca Macallin Maxamuud Sheekh Xasan ayaa markii ugu horreysay ka hadlay dagaal beeleedka lagu hoobtay ee kasoo cusboonaaday waqooyiga gobolka Galgaduud ee bartamaha dalka..

Macallin Maxamuud ayaa sheegay in wax laga xumaado ay tahay inay is laayaan dad walaalo ah oo haddana muslimiin ah, ayna iska dilaan dad badan oo aan waxba galabsan.

“War Maxaa la’isku leynayaa maxaa dadka loo dilayaa maxaa dhibaatadaas loo gaysanayaa hadda wax aan cid ka xanuunsaneyo la arag ugu yaraana dhowr boqol oo qof ay ku dhimanayaan waa dhibaato xaqiiqi ah” ayuu yiri Macallin Maxamuud Sheekh Xasan.

Sidoo kale waxa uu tilmaamay in culimada Soomaaliyeed ay ka gaabiyeen doorkii ay ka qaadan lahaayeen colaadaasi, wuxuuna ugu baaqay inay u istaagaan xalka.

“Dhibaatada jirto ayaa waxa ay tahay doorkii culimada ayaa meesha laga waayay, waxaana leeyahay culimada doorkoodii hasoo celiyaan” ayuu sii raaciyay.

Waxaa kale oo uu yiri “Waxaan leeyahay qaddiyooyinka noocaas oo kala ah waxaan waydiisaneynaa mar dambe in aysan ka dhicin dadka muslimiinta ah waa dad aan meel kala aadeyn”.

Hoggaamiyaha Ahlu-sunna ayaa ugu dambeyntii baaq culus u diray beelaha dagaalamaya, wuxuuna ka dalbaday inay ka waantoobaan dagaalka ay isku laynayaan.

“Waxaan soo jeedineynaa oo magaca Ahlu-sunna Waljamaaca kusoo jeedineynaa ummaddu inay ka waantowdo waxaan oo kale, dib dambana aysan uga dhicin” ayuu yiri.

Hadalkan ayaa kusoo aadayo, ayada oo weli ay socdaan dadaallada lagu heshiisiinayo beelaha Soomaaliyeed ee ku dagaalamayaa agga deegaanka Laadheer oo u dhexeeya magaalooyinka Caabudwaaq iyo Xeraale ee waqooyiga gobolka Galgaduud.

Garoowe (Caasimada Online) – Madaxwweynaha dowlad goboleedka Puntland  Siciid Cabdullaahi Deni oo maanta furay Kalfadhiga 54-aad ee Golaha Wakiilada maamulkaasi ayaa mar kale ka hadlay khilaafka siyaasadeed ee kala dhexeeyo dowladda Soomaaliya.

Saciid Deni ayaa shaaca ka qaaday in weli halkiisii uu yahay khilaafka, isla markaana, isaga oo madaxda dowladda federaalka ku eedeeyay inay la wareegeen awooddii dalka oo dhan.

“Waxay Puntland ku talineysaa in laga fogaado siyaasadaha gurracan ee ku dhisan in talada dalka la maroorsado, isla markaana ay koox dano gaar ah wadata ay dalka iyo dastuurka u afduubnaado” ayuu khudbaddiisa ku yiri madaxweyne Saciid Cabdullahi Deni.

Sidoo kale wuxuu ku adkeystay go’aankiisii hore isaga oo sheegay in Puntland ay u dhaqmi doonto si madax bannaan, inta ay sharciga kusoo noqonayaan madaxda sare ee dalka, waa sida uu ku dooday madaxweynuhu.

“Dowladda Puntland waxay ku dhaqmi doontaa awoodaha uu siinaya dastuutka Puntland iyo dastuurka KMG ah ee Soomaaliya inta ay hoggaanka sare ee hay’adaha dowladda federaalka kusoo noqonayaan xeyndaabka sharciga ee lagu heshiiyay” ayuu sii raaciyay.

Dhinaca kale waxa uu tilmaamay in maamul ahaan ay diyaar u yihiin in la furo wada-hadal looga gudbayo marxaladda is faham waaga ah ee ka dhex taagan labada dhinac.

Dowladda Puntland waxay diyaar u tahay in arrimaha khilaafaadka siyaasiga ah iyo midka sharci looga gudbi karo mabaadii’ ku saleysan wada-hadal ku qotoma wadar ogol, isla markaana la ixtiraamayo ku dhaqanka sharciga oo uu ugu horreeyo dastuurka” ayuu yiiri.

Waxaa kale oo uu yiri “Puntland waxay juhdi badan gelisay sidii loo xaqiijin lahaa dowlad Soomaaliyeed oo sal xasilan, oo amni ah oo horumarsan”.

Hadalkan ayaa meesha ka saaray filashadii ku aadaneyd inuu jiro isku soo dhawaasho labada dhinac ah, kadib markii dhowaan Puntland loo fasaxay mashaarciid ka xayirnayd.

Baydhaba (Caasimada Online) – Madaxweynaha maamulka Koonfur Galbeed Soomaaliya, Mudane Cabdicasiis Xasan Maxamed (Lafta-gareen) oo warsaxaafadeed soo saaray ayaa ka hadlay qarax miino oo maanta ka dhacay gobolka Baay, kaas oo lagu dilay Alle ha u naxariistee Taliyihii Guutada 8-aad ee Ciidanka Xoogga Dalka Gaashanle Maxamed Dheere, Guddoomiyihii hore ee Degmada Diinsoor Abdisalaan Xaaji Siidow iyo askartii kale oo la socotay.

Laftagareen ayaa tacsi tiraanyo leh u diray guud ahaan dadka Soomaaliyeed iyo ehellada ay ka dhinteen saraakiisha iyo askarta lagu dilay weerarkaasi qaraxa ah.

“Waxaan tacsi tiiraanyo leh u dirayaa ehelka, qaraabada iyo dhammaan Ummadda Soomaaliyeed, gaar ahaan Ciidanka Xooga Dalka Soomaaliyeed ee uu ka geeriyooday Taliyihii guutada 8-aad qeybta 60-aad ee CXD iyo saraakiil kale oo shahiiday iyagoo  ku jira hawl-gal lagu beegsanayey kooxaha Khawaarijta ah” ayuu yiri madaxweyne Lafta-gareen.

Dhankiisa waxaa qaraxan mas’uuliyiinta lagu dilay ka hadlay guddoomiyaha Golaha Shacabka ee BJFS Sheekh Aadan Maxamed Nuur Madoobe oo ka tacsiyadeeyey geerida Gaashaanle Maxamed Nuur Sheegow (Maad Dheere) oo ahaa Taliyihii Guutada 8-aad qeybta 60-aad ee Ciidanka Xoogga Dalka Soomaaliyeed iyo saraakiisha kale ee dhintay.

Sheekh Aadan Madoobe ayaa marxuumiinta Alle uga baryay in uu naxariistiisii Janno ka waraabiyo, dhammaan qoysaska iyo ehellada ay ka baxeena uu samir iyo iimaan ka siiyo.

sidoo kale waxa uu caafimaad deg-deg ah u rajeeyay dhammaan askarta kale ee ku dhaawacantay qaraxaas oo ka dhacay inta u dhexeysa Awdiinle iyo Berdaale.

Allaha u naxariistee Maxamae Dheere ayaa xilliga la diayay hoggaaminayay howlgallo waddo furis ah oo ay ciidamada dowladda iyo kuwa Koonfur Galbeed ka wadaan halkaasi, kuwaas oo uu ujeedkoodu  yahay in la’isugu furo gobollada Baay, Balool iyo Gedo.

Xaaladda ayaa haatan ah mid aad u kacsan, waxaana weli socda dhaq-dhaqaaqyo iska soo horjeedo oo ay wadaan labada dhinac.

Gobollada Baay iyo Bakool ayaa waxaa weli ku xoogan maleeshiyada kooxda Al-Shabaab oo inta badan weeraro culus ka fuliya gobolladaas oo haatan ay howlgallo ka wadaan ciidamada dowladda iyo kuwa Koonfur Galbeed Soomaaliya.

Muqdisho (Caasimada Online) – Dowladda federaalka Soomaaliya ayaa shaacisay inuu socdo qorshe garoon diyaaradeed cusub looga dhisayo magaalada Muqdisho ee caasimadda dalka.

Maareeyaha hay’adda duulista rayidka Soomaaliya Axmed Macalin Xasan ayaa sheegay in waqtiyada soo socda magaalada Muqdhisho ay yeelan doonto garoon diyaradeed cusub, oo laga heli karo adeegyada u baahan yihiin dhammaan nuucyada diyaaradaha ee u kala goosha gudaha iyo dibadda dalka.

Axmed Macalin Xasan ayaa sheegay in dhismaha garoonka cusub ee diyaaradaha laga hirgalin doono Ceel-macaan, kaasi oo uu sheegay inuu fududeyn doono in laga baxo ciriiriga iyo dhibaatooyinka kale ee hadda ka jira garoonka diyaaradaha ee Aadan Cadde.

“Istaraatijiyo ayaa u degsan dowladda uu hoggaamiyo madaxweyne Xasan Sheekh iyo ra’iisul wasaare Xamza, markii xukuumadda la doortay madaxweynaha wuxuu amar ku siiyay in aan la imaano qorshe lagu dhisayo garoon cusub oo ay yeelaneyso caasimadda,” ayuu yiri Mareeyaha oo ka hadlay sida uu ku yimid qorshaha garoonkan cusub.

Waxa uu intaas kusii daray “Sahan badan oo ay sameysay hay’adda duulista rayidka waxaa noo hirgashay in aan helno dhul ku habboon garoon cusub in laga dhiso oo la yiraahdo Ceel-macaan, kuna yaala dhul siman oo baddana saaran.”

Sidoo kale waxa uu sheegay in garoonka cusub ee la qorsheynayo dhismihiisa uu noqonayo mid baaxad weyn, si taxadar lehna loo hubiyay bad-qabka dhulkaasi, kadib muddo ay darseen jawiga iyo badqabka garoonka Ceel-macaan, isla markaana ay xaqiijiyeen in halkaasi tahay meel ku haboon adeegga diyaaradaha.

Si kastaba, garoonka Addan Cadde ee magaalada Muqdisho oo hadda ah kan keliya ee caasimadda leedahay ayaa mararka qaar laga dareema cariiri iyo dhibaatooyin kale oo meesha ka bixi doona haddii garoonka cusub lagu guuleysto hirgelintiisa.