Muqdisho (Caasimada Online) – Warbaahinta dowladda Soomaaliya ayaa xalay baahisay hordhaca muuqaal ay duubeen kaamirooyinka ku xiran wadooyinka Muqdisho, kaas oo lagu soo bandhigayo sii uu u dhacay weerarkii Hotel SYL.

Muuqaalkaan oo hordhac ah ayaa la balamiyey in habeen dambe oo Khamiis ah la baahi doono, waxaana ka soo muuqanaya xubno loo qabtay weerarkaas oo qiranaya inay fududeeyeen.

Labo gaari oo nooca raaxada ah ayaa lagu geystay weerarkaas, waxaana gaadiidka la arkaya markii ay dhaafayaan isgoysyada Tarbuunka, Shaqaalaha, Dabka, Sayid ilaa Hotelka SYL oo labada gaari ay ku qarxeen.

Ragga weerarka fuliyey ee toos u dagaalamay oo afar nin ahaa ayaa gaariga ka raacay banaanka hore ee masjidka Isbaheysiga Islaamka, waxayna raacayaan gaariga dambe, iyagoo dagaal ku galay Hotelka, markii uu qarxay gaarigii hore.

Intaas oo dhan muuqaalka ayaa laga dhex arkayaa, balse waa hordhac muuqaalka ay baahisay warbaahinta dowladda Soomaaliya, waxaana isagoo dhameystiran la sheegay in la baahi doono habeenka Khamiista ah.

Nin oday ah oo sharaxaya sida loo soo gudbiyey gaadiidka is qarxiyey ayaa ku jira muuqaalka kooban ee la baahiyey, kaas oo u xiran hey’adaha ammaanka, gaar ahaan NISA oo la wareegtay galka barista kiiskaan, markii uu weerarku dhacay.

Askar ka tirsan ciidanka ilaalada madaxtooyada Soomaaliya ayaa ka mid ah dadka u xiran soo gudbinta gaadiidkii ku qarxay weerarka Hotel SYL, waxaana weli socda baaritaan xoog leh.

NISA ayaa dhawaan baahisay in weerarkaas loo qabtay 16 qof oo ku eedeysan inay ku lugyeesheen, balse waxaa laga xusay nin magaciisa lagu sheegay Cabdinaasir oo gaadiidka qarxay soo geliyey magaalada.

Xogta muuqaalkaan ku jirta waxaa ka mid ah magacyada milkiilayaashii iska lahaa gaadiidka is qarxiyey iyo guud ahaan macluumaadka raggii weerarka geystay oo baaritaanka NISA lagu helay.

Hoos ka daawo

Muqdisho (Caasimada Online) – Madaxweynaha Jamhuuriyadda Federaalka Soomaaliya Mudane Xasan Sheekh Maxamuud oo safar shaqo oo rasmi ah ku jooga dalka Sacuudiga ayaa maanta booqday Masjidka Nebiga (CSW) ee magaalada Barakaysan ee Madiina Al-munawara.

Madaxweynaha ayaa salaaddaha ku oogay Masaajidka Rasuulka naxariis iyo nabadgelyo korkiisa ha ahaatee, waxa uuna shacabka iyo dowladda Soomaaliyeed ugu duceeyay amni, nabad waarta, horumar iyo xasillooni.

Madaxweyne Xasan Sheekh iyo wafdi uu hoggaaminayo oo casuumaad rasmi ah ka helay Boqorka Dalka Sucuudiga Salmaan Binu Cabdicasiis ayaa shalay si diirran loogu soo dhaweeyey magaalada Jiddah.

Madaxweyne Xasan Sheekh iyo Boqor Salmaan Binu Cabdicasiis ayaa ka wadahadlaya xoojinta xiriirka diblomaasiyadeed ee u dhexeeya labada dowladood ee Soomalaiya iyo Sacuudiga.

Arrimaha ajendaha ku jira ee wadahadalka madaxweynaha iyo Boqorka diiradda lagu saaray waxaa ka mid ah amniga, ganacsiga iyo iskaashiga miro-dhalka ah ee labada dal ay wadaagaan.

Soomaaliya iyo Sucuudiga waxaa ka dhaxeeya xiriir walaaltinimo oo qotadheer, waxaana hadda socda qorshe lagu sii xoojinayo xiriirkaas muhiimka ah ee labada dal.

Shacabka iyo dowladda Soomaaliyeed ayaa xasuusan garab istaagga ay u muujiyeen walaalahooda Boqortooyada, xilliyaddii adkaa ee Soomaalidu ay soo martay.

Shirarka madaxda Sasuudiga uu la yeela doono kadib, Xasan Sheekh ayaa u gudbi doona cumrada, maadaama lagu jiro maalmihii ugu dambeeyey bishaan barakeysan ee Ramadaan.

Sacuudiga ayaa inta badan madaxda dalalka saboolka ah casuumaad u dira, si ay uga faa’iideystaan cumrada iyo xajka, maadaama dalkiisa ay ku yaallaan goobaha barakeysan ee loo dawaaf tago.

Afgooye (Caasimada Online) – Ciidamada Xoogga dalka Soomaaliyeed ayaa maanta howlgallo culus oo ka dhan ah Al-Shabaab ka wada qaybo kamid ah gobolka Shabeelaha Hoose, kaas oo ay qaadeen Ciidanka Ilaalo Qaran ee lagu soo tababaray dalka Eritrea.

Ciidamada ayaa isku fidiyay dhulka howdka ah ee gobolkaasi, halkaas oo ay ku dhuumaaleysanayaan maleeshiyaad ka tirsan kooxda Al-Shabaab.

War kasoo baxay taliska ciidanka Xoogga ayaa waxaa lagu sheegay in ciidamada ay gudaha u galeen deegaanada Maracadde, Galka Saalimow iyo Garas-wayne oo ah dhul howd ah.

Ujeedka howlgalka ayaa ahaa sidii looga hortagi lahaa dhagarta Al-Shabaab, gaar ahaan weerarada ay kasoo abaabulaan halkaasi, sida lagu sheegay qoraalka.

Xaaladda ayaa haatan ah mid aad u kacsan, waxaana dhaq-dhaqaaqyo ciidan oo iska soo horjeedo laga dareemaaya howdka gobolka Shabeelaha Hoose.

Maalmihii u dambeeyay ciidamada Xoogga dalka Soomaaliyeed ayaa howlgallo culus oo ka dhan ah Al-Shabaab ka waday gobolka Shabeelaha Hoose, si looga saaro kooxda.

Soomaaliya ayaa waxaa weli ka socda guluf xoogan oo ay iska kaashanayaan ciidamada dowladda iyo kuwa deegaanka, kaas oo lagu xoreeyay dhul aad u ballaaran.

Muqdisho (Caasimada Online) – Golaha Wasiirada Soomaaliya ayaa maanta la filayaa inay isbeddel ku sameeyaan hoggaanka sare ee hay’adda Nabad-sugidda iyo Sirdoonka Qaranka ee (NISA), kadib markii la sheegay inuu is casilaad gudbiyay Mahad Salaad.

Wararka ayaa sheegaya kulanka todobaadlaha ah ee Golaha Wasiirada maanta lagu magacaabayo agaasime cusub oo halkeeda kasii wadi doono shaqada hay’adda.

Sida ay ogaatay Caasimada Online, Mahad Salaad ayaa doonaya inuu isku sharraxo xilka madaxweynaha Galmudug, si uu uga qayb-galo doorashada soo socota ee hoggaankaasi.

Ilo wareedyo lagu kalsoon yahay ayaa innoo sheegay in laga yaabo in booska Mahad Salaad loo magacaabo Xildhibaan Sanbaloolshe oo horay usoo qabtay hoggaanka NISA.

Sidoo kale baraha bulshada ayaa si weyn loogu faafiyay warka ku saabsan is casilaadda Mahad Salaad iyo in uu maanta dhacayo isbeddelka lagu sameynayo hay’adda NISA.

Mahad Salaad ayaa xilkan loo magacaabay 26-kii May ee 2022-kii, kadib dib u doorashadii madaxweyne Xasan Sheekh, wuxuuna kahor ahaa xildhibaan ka tirsan Golaha Shacabka.

Ra’iisul wasaare Xamza ayaa sidoo kale laga sugayaa inuu soo buuxiyo kuraasta ka maqan golaha wasiirada, gaar ahaan wasaaradaha amniga iyo dibadda oo muddo bannaan.

Wasaaradda amniga waxaa horay u hayay Maxamed Cali Doodishe oo loo magacaabay safiirka Soomaaliya ee dalka Qatar, halka wasaaradda arrimaha dibadda uu iska casilay Abshir Cumar Jaamac (Huruuse) oo isku sharraxay hoggaanka sare ee Puntland.

Tallaabadan ayaa haddii laga dhabeeyo waxa ay kusoo aadayaan, xilli xasaasi ah oo ay taagan tahay xiisad siyaasadeed oo ka dhalatay wax ka beddelka dastuurka KMG ah.

Cadaado (Caasimada Online) – Booliska Degmada Cadaado ayaa gacanta ku soo dhigay ku dhawaad 10 qof oo la sheegay inay masoomayaal yihiin.

Raggaan ayaa lagu soo qabtay howlgallo ay ciidamada booliska degmada Cadaado ka fuliyeen duleedka degmada Cadaado ee Gobolka Galgaduud.

Taliyaha saldhigga booliska Cadaado L/Xidigle Xuseen Axmed Xaashi ayaa sheegay in ragaan lasoo qabtay ay muddo kudaba jireen.

Taliyaha ayaa sheegay in maanta ay ku guuleysteen soo qabashada raggaan ku eedeysan inay masoomayaal yihiin.

Taliyaha oo faahfaahin ka bixiyey arrinta lagu soo qabtay ragaan 10-ka gaaraaya ayaa sheegay in waxyaabaha maanka-dooriya ay isticmaalayeen maalin cad, iyadoo lagu jiro bisha barakeysan ee Ramadaan.

Ragaan ayaa laga soo qabtay deegaanka Bali-higis oo hoos taga degmada Cadaado, halkaas oo waxyaabaha maanka-dooriya ay ku isticmaalayeen.

Ugu dambeyntii Taliyaha ayaa digniin culus u diray dadka falalka noocaan ah ku guda jira, asagoo sheegay in cidii lagu qabto tilaabo adag ay ka qaadi doonaan.

Inta badan gobollada dalka iyo caasimadda Muqdisho inta lagu guda jiro bishaan barakeysan ee Ramadaan waxaa lagala dagaalamaa dadka masoomayaasha ah, maadaama dadka Soomaaliyeed ay dhamaantood muslimiin yihiin.

Nairobi (Caasimada Online) – Sagaal bilood kadib illaa hadda weli ma fulin heshiiskii Soomaaliya iyo Kenya ee furista xuduudka labada dal, xilli ay Kenya soo saartay amar sii dheereynaya inuu waqti dhow dhaqan-gal noqdo.

Dowladda Kenya ayaa sheegtay in aysan qorshaha ugu jirin in mardhow dib u furto xuduudka ay la wadaagto Soomaaliya, ayadoo walaac ka muujisay saameynta amni ee ka dhalan karta howl-galka Midowga Afrika ee gudaha Soomaaliya.

Raymond Omollo oo ah Xoghayaha arrimaha gudaha Kenya oo la hadlay Nation Africa ayaa shaaciyay in go’aankan uu yimid kadib markii “ay qiimeeyeen baahida loo qabo in la sugo ammaanka dalka ee dhamaan goobaha laga soo galo iyo kuwa laga baxo.”

Go’aankan sii dheereynaya furista xuduudka labada dal ayaaa kusoo beegmaya sagaal bilood kadib markii ay Soomaaliya iyo Kenya ay ku dhawaaqeen in dib loo furayo xuduudka kadib wada-tashiyo heer sare ah oo ka dhacay magaalada Nairobi.

Xuduudka Soomaaliya iyo Kenya ayaa waxa uu xiran yahay muddo ku siman 12 sano.

Soomaaliya ayaa hadda waxaa ka socda guluf dagaal oo ka dhanka ah kooxda Al-Shabaab oo mararka qaar weeraro ka geysata gudaha Kenya, oo ayadu feejignaan dheeraad ah ku jirtay tan iyo markii ay howl-gallada tooska ka bilowdeen Soomaaliya.

Kenya ayaa ka cabsi qabta in dagaalamayaasha kooxda qaarkood ay usoo gudbaan dhankeeda, ayaga firxad ka ah howl-gallada lagu beegsanayo ee ay iska kaashanayaan ciidamada geesiyaasha ah ee xoogga dalka Soomaaliyeed iyo shacabka hubeysan ee Macawiisleyda.

Muqdisho (Caasimada Online) – Dowladda Federaalka Soomaaliya ayaa qaaday talaabo culus oo ka dhan ah Samira Gaid oo ahayd La-taliyihii mashruuca  ay Midowga Yurub maalgeliyaan ee SJGAB.

Warsaxaafadeed ay soo saartay Wasaaradda Amniga Gudaha Soomaaliya ayaa shaqadii looga joojiyay Samira, kaas oo ku qornaa Luqadda Engilishka.

Sababta Samira Gaid loo eryay ayaa la xiriirta qoraaladeeda siyaasadeed ee barta X (Twitter-ka), kuwaas oo lo arkay inay khilaafsan yihiin “madax bannaanida iyo dhex-dhexaadnimada” looga baahan yahay doorka latalinta sida lagu sheegay qoraalka.

Samira Gaid ayaa qoraaladeedii ugu dambeysay si wayn uga hortimid wax-ka-beddelka Dastuurka dalka oo ay todobaadkii hore meel-mariyeen labada Gole ee Baarlamaanka.

Shaqo joojinta haatan lagu sameeyay Samira ayaa waxaa ka horreeyay weerar toos ah oo dhanka afka ah oo uu isna maalin kahor ku qaaday Wasiirka Macdanta iyo Baatroolka Cabdirisaaq Maxamed Cumar, kaas oo u muuqday mid hanjabaad loogu diray Samira Gaid.

Tallaabadan ay dowladdu qaaday ayaa loo arkaa mid keeneyso walaac ku saabsan xorriyadda hadalka iyo suurtagalnimada caburinta aragtida shaqsiyadeed ee mashaariicda dadweynaha, iyadoo qaarkood ay tilmaamayaan inay tahay mid siyaasadeed.

Si kastaba Kooxdii hore ee NN ee Farmaajo ayaa caan ku ahaa tallaabooyinkan noocaan ah, iyadoo sidan oo kale dad shaqooyin iyo qandaraasyo ka heystay hey’ado sidaan oo kale ay shaqada uga joojiyeen.

Jowhar (Caasimada Online) – Warar kala duwan ayaa kasoo baxaya dil arxan darro ah oo Nabadoon caan ahaa xalay loogu gaystay magaalada Jowhar ee caasimada HirShabelle.

Maruumka oo lagu magacaabi jiray Nabadoon Xasan Cali Muude ayaa waxaa dabley hubeysan ay u dileen tuulada Casir Maal oo hoostegtaga magaaladaasi.

Xilliga la dilayay Nadoonka ayaa la socday gaari ay kala dageen ragga hubeysan oo kadib xabad ku furay, illaa ay nafta kaga baxdo goobta.

Nabadoon Maxamed Xasan oo kamid ah waxgaradka deegaanka ayaa faahfaahin k bixiyay sida ay wax u dhaceen, wuxuuna sheegay in si gaar ah loo beegsaday Marxuumka.

“Dabley hubeysan ayaa dhexda u gashay waa la istaajiyay oo la aqoonsaday soo dag ayaa ka dhahay, kadibna kaligiis ayay wateen, wayna dileen” ayuu yiri Nadoon Maxamed Xasan.

Sidoo kale wuxuu tilmaamay in mid kamid ah dableyda ka dambeysay dilka Nabadoonka gacanta lagu soo dhigay, kuwa kalena lagu raad joogo.

Waxaa kale oo uu intaasi k daray in dilkaasi aanay ka dambeyn kooxda Al-Shabaab, balse ay gaysteen koox uu ku sheegay ma naxayaal isa soo abaabushay.

“Nimanka dilay cid kale ma’aha Shabaabna ma aha ee waa niman ay isku hayb yihiin, haddana mid kamid ah waa la haayaa isaga iyo qorigiisa” ayuu sii raaciyay.

Laamaha ammaanka ee HirShabelle ayaa weli baaritaano dheeraad ah oo ku aadan dhacdadaasi, gaar ahaan dilka loo gaystay Nabadoon Xasan Cali Muude.

Dilka ayaa qayb ka noqonayo falalka ammaan darri ee ka dhaca Shabeelaha Dhexe oo ay sidoo kale ku badan yihiin dagaal beeleedyo gaystay khasaarooyin kala duwan.

Garoowe (Caasimada Online) – Madaxweynaha maamul goboleedka Puntland, Saciid Cabdullahi Deni iyo wafdi uu hoggaaminayo ayaa maanta ku wajahan magaalada Dubai ee caasimada dalka Isu Tegga Imaaraadka Carabta oo ay booqasho uga bilaaban doonto.

Ilo wareedyo lagu kalsoon yahay ayaa innoo xaqiijiyay safarka Saciid Deni ee Imaaraadka Carabta, kaas oo uu maanta uga bixi doono magaalada Garoowe ee xarunta Nugaal.

Wararka ayaa sheegaya in madaxweynuhu uu sii mari doono magaalada Addis Ababa ee caasimadda dalka Itoobiya, kadibna uu usii gudbi doono dalka Imaaraadka Carabta.

Sidoo kale wararka ayaa intaasi kusii daraya in Saciid Deni uu kusoo ciidi doono magaalada Abu Dubai oo uu shantii sano lasoo dhaafay intiisa badan kusoo ciidayay halkaasi.

Waxaa sidoo kale kulamo iyo shirar gooni gooni ah uu la yeelan doonaan madaxda dalkaas oo haatan galaangal xoogan ku leh arrimaha siyaasadda ee maamulka Puntland.

Socdaalka Deni ayaa imaanaya, xilli haatan ay kasii dartay xiisadda siyaasadeed ee u dhexeyso Puntland iyo dowladda federaalka, kadib wax ka beddelka dastuurka KMG ah.

Puntland oo ka carootay ansixinta dastuurka ayaa ku dhowaaqday go’aan culus oo ka dhan ah dowladda dhexe, waxayna sheegtay inay kala laabatay kalsoonidii iyo aqoonsigii.

Safarkan ayaa noqonaya kii u horreeyay ee uu dalka kaga baxo Saciid Deni, tan iyo markii dib loogu doortay xilka madaxweynaha Puntland sideedii Janaayo ee sanadkan 2024-ka.

Muqdisho (Caasimada Online) – Sida ay Caasimada Online u xaqiijiyeen ilo wareedyo ka tirsan Villa Somalia, madaxweyne Xasan Sheekh ayaa mar kale qorsheynaya inuu ka guuro Muqdisho, isagoo degaya caasimadda Galmudug ee Dhuusamareeb.

Sida la qorsheeyey hadii aysan wax iska bedelin, madaxweynuhu wuxuu Dhuusamareeb u guurayaa 10-ka bishaan Abriil, waxaana toos u bilaabanaya howlgallada dalka looga xoreynayo Khawaarijta.

Xubnaha dhanka amniga kala taliya madaxweynaha ayaa soo jeediyey inay muhiim tahay in dhulka Galmudug deg deg looga abaabulo dagaal ka dhan Al-Shabaab.

Villa Somalia ayaa mar kale qorsheysay in Xasan Sheekh uu ka guuro Muqdisho oo la dejiyo Dhuusamareeb, si geed fadhi aan howlo kale ku mashquulin uu ugu noqdo dagaalka Al-Shabaab.

Inta ka dhiman bishaan Ramadaan ayuu Xasan Sheekh sii joogayaa Muqdisho, waxaana hadda socda abaabul xoog leh, si howlgalka loo bilaabo ‘bacdul Ramadaan.’

Ciidamada dowladda ayaa ku jabay dagaaladii Caad iyo Cowsweyne, waxaana aad u yar tirada ciidamada abaabulan xiligaan, balse waxaa jirta xog sheegeysa in qorshaha howlgalka dhanka duqeynta loo weeciyey.

Dowladda Turkiga ayaa la sheegay in dowladda Soomaaliya ay ka balan-qaaday in Shabaab-ka jooga Galmudug ay duqeyn ku leyneyso, rajada la qabo hada ayaa ku soo aruurtay duqeyntaan, doorka ciidamada ayaa hadda kadib noqon doona nadiifin, kadib markii la duqeeyo deegaanada ay argagixisadu joogto.

Ciidamada ugu muhiimsan ee dowladdu ku tashato waxay ahaayeen Gorgor oo labo guuto ka kooban, labo urur oo Gorgor ah oo aad u abaabulan ayaa joogta Xarardheere, balse ururradii kale ee Gorgor waxay ku jabeen dagaalladii Caad iyo Cawsweyne, waxayna u qeybsameen qaar dhintay, qaar baxsaday, qaar loo heysto gaadiidkii la furtay iyo hubkoodii oo maxkamad sugayaal ah iyo qaar iyagoo niyad jabay ku sugan degmada Wisil ee gobolka Mudug.

Ciidamadii Guutada Abuu-dujaana oo ka baxday Camaara iyo Bacaadweyne ayaa ku sugan magaalada Baxdo ee gobolka Galgaduud, kuwaas oo weli aan la kulmi wax dagaal ah, balse tiranaya tabashooyin aan badneyn oo dhanka mushaarka ah.

Sidoo kale qabaa’il kasta ayaa heysta ciidamo badan oo abaabulan una diyaarsan inay wajahaan Khawaarijta, ciidan aan guuto ka yareyn oo u diiwaan gashan daraawiishta Galmudug ayaa iyaguna jooga aagga Wisil.

Xasan Sheekh ayaa hadda go’aansaday inuu dib u abaabulo ciidamadaas oo la galo dagaalka, Shabaab-na laga soo dhameeyo gobollada dhexe, wuxuuna howlgalkaas ka hoggaami doonaa madaxtooyada Galmudug ee Dhuusamareeb oo la qorsheeyey inuu dego wixii ka dambeeya 10-ka bishaan Abriil.

Muqdisho (Caasimada Online) – Ra’iisul Wasaaraha Xukuumadda Jamhuuriyadda Federaalka Soomaaliya Xamsa Cabdi Barre, ayaa degmada Kaxda uga qeyb galay Kulan Affur Wadareed oo lagu muujinayey amniga iyo horumarrada kala duwan ka jira Caasimadda dalka ee Muqdisho.

Ra’iisul Wasaaraha ayaa ku ammaanay shacabka degmada Kaxda sida ay isugu tashadeen, isla markaana ay horumarka degmadooda gacan weyn ugu geysteen.

Sidoo kale wuxuu sheegay in hormarinta kaabayaasha bulshadu ee ay ugu horreeyaan dhismaha waddooyinka ay qeyb weyn ka qaataan bilicda, horumarka iyo amniga.

“Degmada Kaxda waxaa deggan dad iimaan iyo akhlaaq leh, lagamana filaayo in daroogo iyo khawaarij ku faafto, labaduba waxa ay ku faafaan meelaha jahligu yaal, halkaanna waa goob culimo oo kitaabta lagu akhriyo,” ayuu yiri Ra’iisul Wasaare Xamsa.

Waxa uu sheegay in horumarka degmada ay qeyb weyn ka qaadatay isbeddelka amni ee jira, taas oo keentay in lala affuro bulshada Kaxda oo kamid ah degmooyinka dhaca cirifyada.

Xamza ayaa intaas ku sii daray intaas ku daray in amniga caasimaddu uusan hagaageen haddii aan lagu guuleysteen caqabado badan oo kamid yihiin, Khawaarijta, ciyaal-weerada, hubkii magaalada lagu dhex watay iyo nidaaminta Bajaaj-ta.

Ra’iisul Wasaaraha ayaa xusay in wax laga qaban doono baahiyaha kale duwan ee ka jira degmada iyo guud ahaan gobolka Banaadir, isaga oo ugu baaqay shacabka in ay bixiyaan canshuurta, si loogu beddelo horumar iyo amni, caasimaduna u noqoto mid la tartanta caasimadaha dhiggeeda ah.

Muqdisho (Caasimada Online) – Wararka ka imaanaya degmada Sablaale ee gobolka Shabeellada Hoose ayaa sheegaya in duqeyn culus loogu geystay guri ay ku shirayeen horjoogayaal ka tirsan kooxda Al-Shabaab, kuwaas oo lagu bartilmaamadeedsaday howlgalka.

Sida ay Caasimada Online u sheegeen ilo xog ogaal ah guriga la bartilmaameedsaday waxaa ka socday shir xasaasi ah oo xubno Shabaab ah ay halkaas ku lahaayeen.

Shabaab-ka la duqeeyey waxay ka shirayeen sida ay ka yeelayaan howlgallada ciidamada xoogga dalka, Haramcad iyo boolis-militeri ay ka bilaabeen aagga deegaanka Jilib-marka ee gobolka Shabeellada Hoose.

Xogta aan helnay waxay intaas ku dareysaa in guriga la duqeeyey uu joogay oo shir guddoonka xubnaha halkaas ku shiraayey uu ahaa ninkii Shabaab guddoomiyaha uga ahaa Sh/Hoose, balse weli lama xaqiijin inuu geeriyooday.

Kooxda Al-Shabaab waxay culeys badan kala kulmeysaa ciidamada dowladda ee ka gudbay xeebaha bari ee Muqdisho, kuwaas oo u sii ruuqaansanaya deegaanada ay Shabaab ka joogaan gobolka Shabeellada Hoose.

Duqeymaha loo geysanayo kooxda ayaa ah kuwo ay ku naafoobeen, maadaama ay ka quusteen inay meel isugu tagaan oo shiraan ama isku gudbaan oo wadooyin iyo gaadiid ay ku safraan.

Guriga lagu duqeeyey ee Sablaale ku yaalla waxaa la sheegay inay joogeen ku dhawaad 30 horjooge iyo maleeshiyaad badan, kuwaas oo ajendaha shirkooda uu ahaa dagaalka dowladda iyo howlgallada kooxda looga sifeynayo Sh/Hoose.

Shalay Madaxweyne Xasan Sheekh ayaa tegay furimaha dagaalka ee Galmudug, isagoo balan qaaday inuu dib u abaabulayo dagaalka kooxda, isla markaana ay ka go’antahay in deg deg dalka looga xoreeyo, wuxuuna dalacsiiyey dhamaan saraakiisha ciidankii Khawaarijta ka difaacay Xarardheere.

Jiddah (Caasimada Online) –Madaxweynaha Jamhuuriyadda Federaalka Soomaaliya Mudane Xasan Sheekh Maxamuud iyo wafdi uu hoggaaminayo oo casuumaad rasmi ah ka helay Boqorka Dalka Sucuudiga Mudane Salmaan Binu Cabdicasiis ayaa si diirran loogu soo dhaweeyey magaalada Jiddah.

Madaxweyne Xasan Sheekh Maxamuud iyo Boqor Salmaan Binu Cabdicasiis ayaa ka wadahadli doona xoojinta xiriirka diblomaasiyadeed ee u dhexeeya labada dowladood ee Soomalaiya iyo Sacuudiga.

Arrimaha ajendaha ku jira ee wadahadalka madaxweynaha iyo boqorka diiradda lagu saari doono waxaa ka mid ah amniga, ganacsiga iyo iskaashiga miro-dhalka ah ee labada dal ay wadaagaan.

Soomaaliya iyo Sucuudiga waxaa ka dhaxeeya xiriir walaaltinimo oo qotadheer, waxaana hadda socda qorshe lagu sii xoojinayo xiriirkaas muhiimka ah ee labada dal.

Shacabka iyo dowladda Soomaaliyeed ayaa xasuusan garab istaagga ay u muujiyeen walaalahooda Boqortooyada, xilliyaddii adkaa ee Soomaalidu ay soo martay.

Shirarka madaxda Sasuudiga uu la yeela doono kadib, Xasan Sheekh ayaa u gudbi doona cumrada, maadaama lagu jiro maalmihii ugu dambeeyey bishaan barakeysan ee Ramadaan.

Sacuudiga ayaa inta badan madaxda dalalka saboolka ah casuumaad u dira, si ay uga faa’iideystaan cumrada iyo xajka, maadaama dalkiisa ay ku yaallaan goobaha barakeysan ee loo dawaaf tago.

Dowladda Soomaaliya ayaa Sacuudiga u heysa abaal xoog leh, maadaama ay soo garab istaageen xilli adag, ilaa hadana uu Sacuudigu garab taagan yahay shacabka iyo dowladda Soomaaliya.