Muqdisho (Caasimada Online) – Diyaaradaha Milatariga Qatar ayaa maanta magaalada Muqdisho keenay qalab difaac oo casri ah, kaasi oo laga keenay dalka Turkiga.

Qalabkan difaac ayaa waxaa dowladda Soomaaliya usoo diray dowladda Turkiga oo iskaashi milatari uu kala dhaxeeyo, isla markaan maalmihii dambe dalka keenaysay saanad milatari oo xooggan.

Diyaarad xamuul ah oo nooca Boeing C-17 Globemaster III oo leeyihiin Ciidanka Cirka ee Qatar ayaa maanta garoonka Aadan Cadde keentay qalabka difaaca hawada ee ASELSAN ALP-100G AESA Alçak İrtifa Radar.

Raadarkan oo leh awood gaareysa 185+ km, ayaa ah nooc 3D ah oo loogu tala-galay ogaanshaha bartilmaameedyada ku duulaya joog hoose sida; diyaaradaha, drones-ka iyo gantaallada.

ALP-100G wuxuu ka mid yahay nidaamyada difaaca hawada ee casriga ah, isagoo adeegsanaya tiknoolajiyada AESA (Active Electronically Scanned Array).

Warbixinno la helayo ayaa tilmaamaya in qalabkan loo qorsheeyay goobta laga hirgelinayo xarunta dayax-gacmeedka iyo goobta laga tuuro gantaallada ee Turkigu ka dhisayo duleedka degmada Warsheekh ee gobolka Shabeellaha Dhexe.

Tallaabadan ayaa muujinaysa sii xoojinta iskaashiga milatari iyo kan amni ee u dhexeeya Turkiga iyo Soomaaliya, iyadoo diiradda la saarayo ilaalinta hawada iyo horumarinta awoodda farsamo ee labada dal

Si kastaba, dowlad Turkiga ayaa maalmihii dambe dalka keenaysay saanad milatari, iyadoo maantana ay garoonka caalamiga ah ee Aadan Cadde ay dhowr mar kasoo degtay diyaarad xamuul millatari oo ah nooca Airbus A400M Atlas ah.

Iskaashiga amni ee u dhexeeya Soomaaliya iyo Turkiga ayaa sii xoogeysanaya, iyadoo Ankara ay dhawaan Soomaaliya keentay diyaaradaha casriga ah ee dagaalka F-16.

Sidoo kale, Turkiga ayaa Soomaaliya u soo diray saraakiil ka kala socda ciidamada Cirka, Badda iyo Lugta, kuwaas oo door ka qaadanaya xoojinta wada-shaqeynta milatari ee labada dhinac.

Ankara ayaa sidoo kale xoojisay joogitaankiisa milatari ee Soomaaliya, iyadoo maraakiib casri ah ay ku sugan yihiin biyaha dalka. Maraakiibtaasi ayaa la sheegay inay ka qeyb qaadanayaan ilaalinta shidaalka la soo saarayo, xeryaha la dhisayo iyo xarunta dayax-gacmeedka ee haatan lagu howlan yahay.

Muqdisho (Caasimada Online) – Dowladda Federaalka Soomaaliya ayaa Danjire Ku-xigeenka Soomaaliya ee dalka Tansaaniya u magacowday Wasiiru-dowlihii hore ee Warfaafinta Puntland, Dr. Cabdifataax Nuur Axmed (Ashkir).

Ashkir ayaa sidoo kale noqonaya diblumaasi sare oo Soomaaliya ku meteli doona Ururka Bulshada Bariga Afrika (EAC).

Magacaabistan ayaa qeyb ka ah dadaallada dowladda ee lagu xoojinayo matalaadda Soomaaliya ee dalalka xubnaha ka ah EAC, xilli dalka uu si rasmi ah ugu biiray ururkaasi sanadkii 2023.

Soomaaliya ayaa haatan dadaal ku bixinaysa sidii ay uga faa’iideysan lahayd fursadaha dhaqaale iyo iskaashi ee ka dhex jira dalalka xubnaha ka ah ururka, gaar ahaan dhinacyada ganacsiga, isu-socodka iyo maalgashiga.

Dr. Ashkir ayaa lagu tilmaamaa xeeldheere ku takhasusay arrimaha Bariga Afrika iyo Carabta, isla markaana ah khabiir ku xeel dheer dejinta iyo hirgelinta siyaasadaha dowladeed.

Intii uu ka tirsanaa xukuumadihii kala dambeeyey ee Puntland, Dr. Ashkir waxaa si weyn loogu xusuustaa doorkii uu ka qaatay bud-dhigga iyo horumarinta hay’adaha dowliga ah, gaar ahaan dhinacyada warfaafinta iyo qorsheynta siyaasadda.

Ashkir ayaa sidoo kale si weyn loogu xusuustaa sida uu warbaahinta caalamka iyo tan Carabta uga difaacay qaranimada Soomaaliya, kadib markii Israa’iil ay sheegtay inay aqoonsatay Somaliland.

Si kastaba, ka mid ahaanshaha Soomaaliya ee Ururka Bulshada Bariga Afrika ayaa loo arkaa tallaabo istiraatiiji ah oo lagu xoojinayo is-dhexgalka gobolka, iyadoo dalka uu doonayo inuu door firfircoon ka qaato horumarka waara, shaqo-abuurka iyo sare u qaadista tayada nolosha bulshada Bariga Afrika.

Laascaanood (Caasimada Online) – Ciidanka Booliska Waqooyi Bari ayaa shaaciyay inay gacanta ku dhigeen nin isku dayay inuu lacag doollar ah laaluush ahaan u siiyo ciidanka.

Ninkan oo tagay saldhig uu kaga xirnaa gaari nooca Noah ah oo ay hayeen ciidamada, kaas oo loo haystay soo gelinta khamriga, ayaa isku dayay inuu laaluusho ciidanka si loogu sii daayo gaariga.

Taliska ciidanka ayaa ninkan magaciisa ku sheegay Cabdiqani Saciid Cabdi, wuxuuna haatan ku jiraa gacanta booliska.

“Eedeysanaha ayaa watay lacag uu doonayay inuu ku iibsado sii-deynta gaariga, hase yeeshee ciidanka ayaa si adag uga horyimid falkaasi sharci-darrada ah, isla markaana goobta ku xiray,” ayaa lagu yiri bayaan kasoo baxay Taliska Booliska Waqooyi Bari.

Taliska ayaa caddeeyay in aan la aqbali doonin wax musuq-maasuq, laaluush ama faragelin lagu sameeyo howlaha sharciga iyo amniga. Wuxuu sheegay in qof kasta oo isku daya inuu jebiyo sharciga uu mutaysan doono tallaabo waafaqsan qawaaniinta dalka.

Hoos ka aqriso bayaanka oo dhameystiran:

Sharciga ka sarreeya laaluush

Ciidanka Booliska Waqooyi Bari ayaa gacanta ku dhigay eedeysane lagu magacaabo C/Qani Saciid Cabdi, kaas oo isku dayay inuu laaluusho ciidanka si loogu sii daayo gaari nooca NOAH ah oo ay hayeen ciidamada, loona heystey soo gelinta Khamriga.

Eedeysanaha ayaa watay lacag uu doonayay in uu ku iibsado sii deynta gaadhiga, hase yeeshee ciidanka ayaa si adag uga horyimid falkaasi sharci-darrada ah, isla markaana isla goobta ku xiray. Lacagtii la soo bandhigayna waxaa loo qabtay caddeyn ahaan.

Taliska Ciidanka Booliska Waqooyi Bari waxa uu caddeynayaa in aan la aqbali doonin wax musuqmaasuq, laaluush ama faragelin lagu sameeyo howlaha sharciga iyo amniga.

Qof kasta oo isku daya inuu jebiyo sharciga waxa uu mutaysan doonaa tallaabo waafaqsan qawaaniinta dalka.

Ciidanku waxay mar kale u mahadcelinayaan shacabka wada shaqeynta la leh laamaha amniga, iyagoo ku boorrinaya in laga feejignaado falalka musuqmaasuqa ah, isla markaana lala soo socodsiiyo hay’adaha amniga cid kasta oo ku lug leh falal noocaas ah.

Allaa Mahad leh.

Muqdisho (Caasimada Online) – Ra’iisul Wasaaraha Soomaaliya, Xamza Cabdi Barre ayaa shaaciyay in si rasmi ah ay Dowladda Federaalka u bilowday bixinta Baasaboorka Bariga Afrika.

Daabicista baasaboorkan oo dhawaan ogolaansho loo siiyay Soomaaliya ayaa wuxuu ra’iisul wasaaruhu sheegay in uu qaadano karo qof kasta muwaadin ah.

“Maanta Soomaaliya waxa ay biloowday bixinta Baasaboorka Bariga Afrika oo la siinayo shacabkeenna, ardayda, ganacsatada, shaqaalaha, iyo qoysaska, tan oo fureysa albaabka gobolka iyo dunida inteeda kaleba,” ayuu Ra’iisul Wasaare Xamza ku yiri qoraal u soo saaray.

Sidoo kale waxa uu xusay in horumar weyn ku tallaabsaday baasaboorka Soomaaliga, uuna sare u kac sameeyay afartii sano ee u dambeeyay. “Baasaboorkeena oo sanadkii 2021-dii ku jiray kaalinta 111-aad ee dunida, ayaa hadda soo gaaray kaalinta 96-aad, sarena u kacay 15 buundo.”

Waxa uu intaas kusii daray “Maanta dadkeena ma haystaan baasaboor oo kaliya, ee waxa ay haystaan baasaboor albaabo badan fura, abuura xiriiro, dunidana tusaya in Soomaaliya ay dib usoo laabatay.”

Hoos ka aqriso qoraalka Xamza oo dhameystiran:

Maanta Soomaaliya waxa ay biloowday bixinta Baasaboorka Bariga Afrika oo la siinayo shacabkeenna, ardayda, ganacsatada, shaqaalaha, iyo qoysaska, tan oo fureysa albaabka gobolka iyo dunida inteeda kaleba.

Ku biirista Bulshooyinka Bariga Afrika, waa astaan lahaansho, waxa ay fududeynaysa socdaalka, abuureysana fursado wadaag ah, taasi oo ka dhigan sare u kaca aqoonsiga uu dunida ka heley baasaboorka Soomaaliga ah.

Baasaboorkeena oo sanadkii 2021-dii ku jiray kaalinta 111-aad ee dunida, ayaa hadda soo gaaray kaalinta 96-aad, sarena u kacay 15 buundo. Maanta dadkeena ma haystaan baasaboor oo kaliya, ee waxa ay haystaan baasaboor albaabo badan fura, abuura xiriiro, dunidana tusaya in Soomaaliya ay dib usoo laabatay.

Waxaa muuqata kalsooni sii kordheysa oo uu adduunka ku qabo baasaboorka Soomaaliga ah dowlad wanaag iyada oo ay kordhayso kaalinta Basabboorka Soomaaliya ee heerarka caalamka.

Maanta muwaadhiniinta Soomaaliyeed waxa ay si xor ah ugu safri karaan ku dhowaad 40 waddan si dal ku-gal la’aan ah ama dal ku-gal garoonka laga qaato, taas oo faa’iido la taaban karo u ah muwaaddiniinta, ardayda iyo ganacsatadaba.

In badan oo ka mid ah bah-wadaagteenna caalamka ayaa noo fidiyay fursadda dal-ku-gal la’aanta ah ee dadka wata baasaboorka diblumaasiga, waxaanna rajo togan ka qabnaa in fursadaasi ay helaan shacabka intiisa kale.

Baasaboorka Bulshada Bariga Afrika, waxa uu xoojinayaa ganacasiga, dhaqaalaha iyo amniga gobolka, waxa uu fududeynayaa socdaalka, wuxuu balaarinayaa is-dhexgalka, isaga oo sare u qaadaya fursadaha jira sida waxbarasho, iyo isweeydaarsiga dhaqanka.

Sidoo kale waxa uu qiimo weyn u yeelayaa baasaboorka Soomaaliga ah, kaas oo hadda noqday summadda adkaysiga, hamiga dheer, iyo sare u kaca heybadda Qaranka. Tallaabadan ayaa timid kadib markii Shir-madaxeedkii dalalka Bariga Afrika ee 2024 lagu ansixiyey in Soomaaliya ku biirto ururkan Bariga Afrika.

Dadka Soomaaliyeed ma ahan kuwo faro-madhnaan la tagaya ururrada dunida, ee waa dal istaraatiiji ah oo leh xeebta Afrika ugu dheer, iskuna xiraya qaaraddan iyo Gacanta Carbeed, leh raasumaal dhaqaalaha buluugga ah, Dekedo, Kalluun, iyo xeendaabyo ganacsi, kuwaas oo Badweynta Hindiya u horseedi kara fursado wanaag ah oo barwaaqo sooran lagu gaaro.

Ka go’naanshaha Soomaaliya ee ka mid ahaanshaha Ururka Bariga Afrika waa mid giijisan, Soomaaliya waxa ay door firfircoon ka qaadanaysaa horumarka waara, ganacsiga, shaqo abuurka iyo sare u qaadista tayada nolosha ee dadka Bariga Afrika.

Muqdisho (Caasimada Online) – Kulankii maanta loo ballansanaa inuu ka qabsoomo Villa Soomaaliya ee u dhaxeeyay Madaxweynaha Soomaaliya iyo madaxda Golaha Mustaqbalka ayaa baaqday, sida ay ogaatay Caasimada Online.

Wada-hadallada ayaa dib loo sii amba-qaadi doona maalinta berri ah, iyadoo maanta kulamo gaar gaar ah ay labada dhinac ka wadaan magaalada Muqdisho.

Kulamadan ayaa la sheegay in dhinac walba uu gaarkii uga arrinsanayo qodobada muhiimka ah ee diiradda lagu saarayo wareegga soo socda ee wada-hadallada, si dhinac weliba uu usii xoojisto ajendaha u la shir tagayo.

Xalay, Madaxda Golaha Mustaqbalka oo shir muhiim ah ku yeeshay gudaha Xalane ayaa isku raacay in shirka berri loo ballamay ee Villa Soomaaliya ay u diraan Madaxweynaha Puntland, Saciid Cabdullaahi Deni, Madaxweynihii hore, Shariif Sheekh Axmed, Ra’iisul Wasaarihii hore, Xasan Cali Kheyre, Xildhibaan Cabdiraxmaan Cabdishakuur iyo Xildhibaan Cabdullaahi Carab

Xubnahan ayaa qorshuhu yahay inay si gaar ah ula xaajoodaan Madaxweyne Xasan Sheekh, taas oo meesha ka saaraysa in xubno kale oo ka tirsan dowladda ay qeyb ka noqdaan shirka berri.

Shirka berri ayaa waxaa diiradda lagu saari doonaa arrimaha doorashooyinka heer federaal iyo heer dowlad-goboleed, gaar ahaan maamullada Koonfur Galbeed, Galmudug iyo HirShabelle oo muddo dhaaf ku fadhiya kuraasta.

Mucaaradka ayaa doonaya in la qabto doorashooyin heshiis lagu yahay, halka Dowladda Federaalka ay doorbideyso qabashada doorasho qof iyo cod ah.

Waxaa la filayaa in berri la kala caddeeyo nooca doorasho ee laga qaban doono maamul-goboleedyada waqtigoodu dhammaaday.

Madaxda labada dhinac ayaa shalay isku afgartay sii wadista wada-hadallada, si xal looga gaaro kala aragti duwanaanshaha jira, kaasi oo salka ku haya hanaanka doorashooyinka iyo wax-ka-beddelka dastuurka.

Shirkan oo kusoo aaday xilli xasaasi ah oo dalku wajahayo abaaro baahsan iyo xaalado bani’aadannimo ayaa waxaa si dhow ula socda Beesha Caalamka, oo cadaadis xooggan ku saartay dhinacyada inay xal ka gaaraan is-mari-waaga siyaasadeed.

Muqdisho (Caasimada Online) – Wasiirka Arrimaha Dibadda iyo Iskaashiga Caalamiga ah ee Soomaaliya, Cabdisalaan Cabdi Cali (Dhaay) ayaa caddeeyay in dowladda Soomaaliya aysan u baahnayn dammaanad ka timaada dibadda, si ay u difaacato midnimadeeda iyo xuduudaheeda.

Arrintan ayuu wasiirku sheegay, kaddib markii wax laga weydiiyay in dowladdu ay ku kalsoon tahay in dalal kale aysan aqoonsan doonin Somaliland kaddib talaabada ay qaadday Israel.

Wasiir Dhaay ayaa sheegay in dunida maanta aanay jirin wax dammaanad ah oo la isku halayn karo, maaddaama xaaladda caalamku tahay mid isbedbeddelaysa, sidaas darteedna Soomaaliya ku kalsoon tahay mowqifkeeda sharci iyo dadaalka ay ugu jirto difaaca qaranimadeeda.

“Waxaan si buuxda uga hortagi doona wax kasta oo aan u aragno aqoonsi sharci-darro ah oo ka dhan ah waqooyiga Soomaaliya. Cid aan ka sugayno dammaanad si aan u difaacno qarannimadeenna ma jirto,” ayuu yiri Wasiirka Arrimaha Dibadda ee Soomaaliya.

Sidoo kale wuxuu xusay in dowladda mar walba diyaar u tahay inay beesha caalamka u bandhigto xaqiiqada la xiriirta taariikhda, xuduudaha iyo jiritaanka dowladnimada Soomaaliya.

Wasiir Dhaay ayaa waxa kale uu muujiyay in dowladda Soomaaliya ay doorbideyso in mowqifkeeda si nabad ah oo ku dhisan sharci loogu bandhigo caalamka.

“Soomaaliya waxay leedahay dadkeeda, sidaas darteedna iyada difaacan doonta jiritaankeeda iyo midnimadeeda,” ayuu hadalkiisa sii raaciyay wasiirka.

Hadalkan ayaa imanaya xilli Dowladda Federaalka ay dagaal diblumaasiyadeed adag ka gashay aqoonsiga Israel ay sheegtay inay siisay maamulka Somaliland, iyadoo ku tilmaamtay sharci-darro ah iyo daandaansi ka dhan ah madax-bannaanida Soomaaliya.

Dalal badan oo kamid yahay Mareykanka ayaa si adag uga horyimid aqoonsigan, isagoo si cad u muujiyay in Washington ay garab taagan tahay Muqdisho iyo ururrada waaweyn ee gobolka, kuwaas oo muddo dheer taageersanaa ilaalinta xuduudaha caalamiga ah ee Soomaaliya.

Sidoo kale, isbahaysi ballaaran oo ka kooban dalal iyo ururro Carbeed, Islaam iyo Afrikaan ah ayaa si wadajir ah u diiday aqoonsiga Israa’iil, iyagoo ka digay “cawaaqib-xumo halis ah” oo ka dhalan karta tallaabadaas, taasoo khatar ku ah nabadda iyo amniga Geeska Afrika iyo gobolka Badda Cas.

Waxay si adag u diideen tallaabo kasta oo lagu doonayo in si qasab ah lagu barakiciyo Falastiiniyiinta, taasoo ka tarjumeysa dareenka guud ee gobolka ee ku aaddan qorshayaal bilihii la soo dhaafay la hadal-hayay oo ku saabsan in shacabka Gaza loo raro dhul ka baxsan dalkooda.

Muqdisho (Caasimada Online) – Faahfaahino hordhac ah ayaa ka soo baxaya qarax saaka aroortii ka dhacay degmada Shibis ee magaalada Muqdisho.

Qaraxan oo jugtiisa laga maqlay qeybo ka mid ah magaalada ayaa la sheegay inuu ka yimid gaari la shaaciyey inuu leeyahay sarkaal ka tirsan booliska Soomaaliya.

Gaariga sarkaalka ayaa loo badinayaa in lagu xiray walxaha qarxa, inkastoo aysan jirin war rasmi ah oo ka soo baxay hay’adaha ammaanka ee Muqdisho.

Weli lama soo warin khasaare uu geystay qaraxu, waxaana la sheegaya in xilliga uu dhacayay uusan gaariga la socon sarkaalka iska lahaa, kaas oo magaciisa lagu sheegay Jeneraal Cabdirisaaq Afgaduud, kana tirsan hoggaanka caafimaadka ee ciidanka booliska Soomaaliyeed.

Qaraxa kadib, waxaa goobta gaaray ciidamada ammaanka, kuwaas oo markiiba guda galay baaritaanka qaraxa, kaas oo imanaya xilli ammaanka magaalada Muqdisho si aad ah loo adkeeyey.

Booliska ayaa la filayaa in saacadaha soo socda ay faahfaahin ka bixiyaan qaraxan oo saaka qalqal geliyey shacabka caasimadda, kuwaas oo muddooyinkii u dambeeyey ka nastay dhawaaqa qaraxyada.

Ciidamada kala duwan ee dowladda ayaa dadaal badan ku bixiyey xaqiijinta ammaanka caasimadda, iyadoo Muqdisho haatan ay martigelinayso wada-hadallo u dhexeeya Dowladda Federaalka Soomaaliya iyo Golaha Mustaqbalka, si xal looga gaaro khilaafka siyaasadeed ee ka taagan dalka.

New York (Caasimada Online – Dowladda Federaalka Soomaaliya ayaa si kulul u cambaareysay go’aanka ay Israa’iil ugu aqoonsatay gobollada waqooyi galbeed ee Somaliland maamul madax-bannaan, waxayna ka digtay qorshe ay hadda damacsan tahay Tel Aviv oo ah in shacabka Falastiiniyiinta xoog loogu soo raro gudaha ciidda Soomaaliya.

Danjiraha Soomaaliya u fadhiya Qaramada Midoobay, Abuukar Daahir Cusmaan (Abuukar Baalle), oo khudbad xasaasi ah ka jeediyay fadhi uu yeeshay Golaha Ammaanka, ayaa tallaabooyinkan ku tilmaamay xadgudub qaawan oo ka dhan ah madax-bannaanida, midnimada iyo wadajirka dhuleed ee qaranka Soomaaliyeed.

Wuxuu si adag uga digay in arrintan ay Geeska Afrika u horseedi karto inuu ku dhex milmo qalalaasaha iyo saameynta taban ee colaadaha ka holcaya Bariga Dhexe.

Safiirka ayaa Golaha u caddeeyay in isku-day kasta oo lagu doonayo in xaqiiqooyin siyaasadeed oo cusub oo lagu soo rogo qaaradda Afrika ay dhaawacayso mabaadi’da asaasiga ah ee xeerarka caalamiga ah, isla markaana ay abuureyso dhabbe halis ah oo hor leh.

Dhinaca kale, Soomaaliya ayaa si aan gabbasho lahayn u diiday hindise kasta oo salka ku haya in Falastiiniyiinta si qasab ah looga barakiciyo deegaannadooda, ha noqoto gudaha dhulkooda ama in loo raro dalal kale. Danjire Abuukar ayaa falkaas ku sifeeyay xadgudub weyn oo ka dhan ah sharciga caalamiga ah, kaas oo u dhigma “tirtirid isir”.

“Waa in beesha caalamku ay si wadajir ah uga hortagto isku-day kasta oo xoog ama cago-jugleyn loogu beddelayo qaab-dhismeedka bulshada ee dhulka Falastiiniyiinta,” ayuu yiri Danjiraha, isagoo hoosta ka xarriiqay muhiimadda ay leedahay in la dhawro shuruucda caalamiga ah.

Danjiraha ayaa sidoo kale xusay in hawlgallada bani’aadannimo ee marinka Gaza uu saaran yahay culeys baaxad leh, inkastoo ay jirto xabad-joojin aad u jilicsan, wuxuuna ku baaqay in la helo taageero caalami ah oo joogto ah si loo badbaadiyo nolosha dadka tabaaleysan.

Xukuumadda Muqdisho oo muddo dheer taageero hagar la’aan ah la garab taagneyd in la helo dowlad madax-bannaan oo ay Falastiiniyiintu leeyihiin, ayaa wacad ku martay inay iska caabin doonto faragelin kasta oo shisheeye—ha noqoto dhaqdhaqaaqyo aqoonsi diblomaasiyadeed ah ama fikrado la xiriira in dad la soo raro—kuwaas oo ay u aragto inay wiiqayaan shuruucda caalamiga ah iyo xuduudaha Soomaaliya ee dunidu aqoonsan tahay.

Muscat (Caasimada Online) – Diyaaradda Saldanadda Cumaan ee SalamAir ayaa ku dhawaaqday inay bilaabayso duulimaadyo toos ah oo ku wajahan magaalada Muqdisho ee caasimadda Soomaaliya.

Duulimaadyadan ayaa toddobaadkii laba jeer la fulin doonaa, maalmaha Axadda iyo Khamiista, iyagoo si rasmi ah u bilaabanaya 3-da Sebtembar 2026. Diyaaradaha SalamAir ayaa si toos ah uga degi doona Garoonka Diyaaradaha Aadan Cadde ee caasimadda Muqdisho.

Tani waxay noqonaysaa markii ugu horreysay ee shirkadda duulimaadyada qiimaha jaban ee ay leedahay dowladda Cumaan si rasmi ah uga hawl-gasho Soomaaliya.

Shirkaddu waxay sheegtay in qiimaha tigidhada u dhexeeya Muscat iyo Muqdisho uu ka bilaabanayo $208, taas oo ka dhigaysa mid ka mid ah duulimaadyada ugu jaban ee ka shaqeeya khadkaas. Qiimahan jaban ayaa la filayaa inuu kordhiyo tirada rakaabka iyo isu socodka labada dal.

Tallaabadan ayaa lagu tilmaamay mid lagu xoojinayo xiriirka dhaqaale iyo kan ganacsi ee u dhexeeya Soomaaliya iyo Cumaan. Sidoo kale, waxay fududeyn doontaa isu socodka ganacsatada iyo qurba-joogta Soomaaliyeed ee ku nool dalalka Khaliijka.

Soomaaliya ayaa noqonaysa waddankii afraad ee Afrika ah oo ay SalamAir gaarto. Shirkaddu waxay hadda ka hawl-gashaa in ka badan 40 magaalo oo ku kala yaalla Aasiya, Afrika iyo Yurub.

Mas’uuliyiinta shirkadda ayaa sheegay in suuqyada Afrika ay yihiin kuwo muhiim u ah qorshahooda ballaarinta, isla markaana Soomaaliya ay leedahay fursado ganacsi oo sii kordhaya.

Maamulaha guud ee SalamAir, Adrian Hamilton-Manns, ayaa sheegay in duulimaadkan cusub uu ka tarjumayo koboca dhaqaale ee ka socda Soomaaliya. Wuxuu xusay in shirkaddu ay aragto mustaqbal ifaya oo ku aaddan iskaashiga labada dal.

“Soomaaliya sannadihii u dambeeyay waxay sameynaysay koboc iyo horumar dhaqaale oo muuqda. Duulimaadyadeenna tooska ah waxay sii xoojin doonaan dhaqaalaha, waxayna abuuri doonaan fursado cusub oo ganacsi iyo safar,” ayuu yiri maamulaha guud ee SalamAir.

Si kastaba, diyaaraddan ayaa ku soo biiraysa shirkadaha diyaaradaha caalamiga ah ee ka hawl-gala Soomaaliya, sida Turkish Airlines, Qatar Airways, Ethiopian Airlines, Kenya Airways, Flydubai, Air Arabia iyo Egypt Air.

London (Caasimada Online) – Ciidanka Booliiska dalka Ingiriiska ayaa maanta xabsiga dhigay Andrew Mountbatten-Windsor, oo hore loogu yaqaanay Prince Andrew, kadib markii la helay dukumiintiyo cusub oo la xiriira dacwadaha dambiyada ee Jeffrey Epstein.

Sida lagu soo warramayo, Andrew waxaa laga qabtay gurigiisa ku yaalla Sandringham, iyadoo tallaabadan lagu saleeyay baaritaan ka dhashay eedeymo cusub oo ka soo baxay faylalka Epstein ee dhowaan la faafiyay.

Ciidanka Thames Valley Police ayaa xaqiijiyay inay wadaan baaritaan ku saabsan tuhun la xiriira “ku takri-fal awoodeed oo xafiis dadweyne” iyo xiriirro hore oo dhexmaray Andrew iyo Epstein.

Andrew ayaa hore uga fariistay howlaha boqortooyada, kadib muranno ka dhashay xiriirkiisa Epstein. Sannadkii tegay, Boqor Charles III ayaa ka xayuubiyay inta badan xilalkii iyo maamuusyadii uu hayay.

Dukumiintiyada cusub ee laga sii daayay Mareykanka ayaa tilmaamaya xiriirro isgaarsiineed iyo kulamo hore oo u dhexeeyay Andrew iyo Epstein, inkastoo Andrew uu horay u beeniyay dhammaan eedeymaha la xiriira falal sharci-darro ah.

Booliiska ayaa sheegay in baaritaanku weli socdo, go’aanka kama dambaysta ahna la qaadi doono marka la soo gabagabeeyo wareysiyada iyo qiimeynta caddeymaha jira.

Dhanka kale, ilo ku dhow qoyska boqortooyada ayaa sheegay in Andrew uu hore u beeniyay wax kasta oo sharci-darro ah oo lala xiriiriyo Epstein, isla markaana uu diyaar u yahay inuu la shaqeeyo hay’adaha baaritaanka. Arrintan ayaa sii kordhisay xiisadda ku hareereysan kiiska, iyadoo la sugayo natiijada kama dambaysta ah ee baaritaanka socda.