DF oo shaacisay in wiilka Mahad Karataay iyo sarkaal kale oo sare oo la dilay

Muqdisho (Caasimada Online) – Wararka laga helayo Shabeellaha Hoose ayaa sheegaya in saacadihii la soo dhaafay ciidamada huwanta ay howlgallo ballaaran ka fuliyeen qeybo ka mid ah gobolkaasi, kuwaas oo Al-Shabaab looga dilay laba sarkaal oo sare.

Howlgallada oo ahaa kuwa qorsheysan ayaa waxa ay ciidamada sida gaarka ah u tababaran ee Danab iyo kuwa Mareykan ah ay ka sameeyeen deegaanka Sablaale oo ay gacanta ku hayaan Xooggaga Al-Shabaab.

Qaar ka mid ah saraakiisha ciidamada dowladda oo la hadlay warbaahinta ayaa sheegay in howlgalkaasi ay ku dileen 18 xubnood oo ka tirsanaa Al-Shabaab.

Sidoo kale saraakiisha ayaa xusay in dagaalyahannada ay dileen uu ku jiro sarkaal sare oo lagu magacaabo Maxamed Dhuubow, kaas oo ay horay Kenya u dul saartay madaxiisa lacag dhan labo milyan oo Dollerka Mareykanka ah.

Weerarka ayaa waxaa sidoo kale lagu dilay sarkaal lagu magacaabo Cumar Mahad Karataay oo Al-shabaab u qaabilsanaa Taakulaynta Ajaanibta ka tirsan Al-Shabaab, sida ay sheegeen saraakiisha ciidamada.

Saraakiisha ayaa tilmaamay in Cumar Mahad Karataay uu ahaa wiil uu dhalay Mahad Karataay oo ka mid ah madaxda sare ee Al-Shabaab.

Dhinaca kale ma jiro illaa iyo hadda wax hadal ah oo ka soo baxay Al-Shabaab oo ku aadan weerarkaas, mana jirto cid si madax banaan u xaqiijin karta sheegashada dowladda.

Ciidamada dowladda iyo kuwa Midowga Africa ee AMISOM ayaa maalmihii la soo dhaafay dhaq dhaqaaqyo Milatari ka waday Shabeelaha Hoose, iyagoo dagaalyahannada Al-Shabaab ka saaray deegaano muhiim ah oo ay ka mid ah degmada Awdheegle ee gobolkaasi.

Caasimada Online
Xafiiska Muqdisho
caasimada@live.com