Lodon (Caasimadda Online) – Muwaadin soomaaliyeed oo laxiray isagoo doonaya in uu ku Biiro ururka Daacish ayaa la ogaaday in uu  Bangi ka deeynsaday lacag dhan 10,000 oo Euro oo u dhiganta 12,362 Dolar ka Mareeykanka ah, Sida uu daabacay Wargeyska telegraph ee ingiriiska kasoo baxa.

Muwaadinkaan oo magaciisa lagu sheegay Aweeys Shiikheey ayaa Bangiga u sheegay in uu Lacagta ugu Baahanyahay si uu ugu guursado, laakiin waxaa la ogaaday in uu ku talo galay in uu ugu safro Siiriya si uu Daacish ugu Biiro.

Wuxuu ahaa 38 jir Darawal ka ah Gaari Badeecooyinka daabula wuxuuna inkiray in uu diyaarinayay weerarro Argagixiso iyo in uu Dad kale kala dooday Dilka Boqoradda UK iyo ra’iisul wasaarihii hore ee ingiriiska David Camiroon.

Xeer ilaalinta eedeeymaha Aweeys Shiikhoow Gacanta ku haya ayaa sheegay in uu ka hadlay in laweeraro Yahuud Dagan Degmadda Stamford Hill ee ku taalla Waqooyi bari Magaaladda London ee Caasimadda Ingriiska iyo in Qori AK47 ah lagu Beegsado marka taagerasyaasha kubadda Cagtu kasoo Baxaan Garoonka Tottenham Hotspur.

Aweeys Shiikheey wuxuu heeytaa Dhalashadda Netherland wuxuuna leeyahay Labo xaas oo kala Dagan Netherland iyo Kenya iyo Caruur, waxaa 23 kii may ee Sanadkii tagay laga qabtay  Garoon Caalami ah oo kuyaala London.

Dacwad ooge lagu magacaabo Barnaby Jameson ayaa sheegay in ujoodo kasta oo uu lahaa Aweeys ay ka dhexmuuqatay Xagjirnimo.

Muwaadin Soomaaliyeed oo ku noolaa wadanka Kenya magaciisana lagu sheegay Abdirahman Idris Hassan ayaa la sheegay in uu Xagjirnimaddda ku dhiiri galiyay Aweys shiikhoow sida laga ogaaday Qoraal ay isku dhaaafsadeen Alaadaha lagu sheegkeeysto.

Dacwad oogaha kasoo horjeeda Muwaadinka Soomaaliyed ayaa Maxkamad ka hor aqriyay Qoraal uu soo qoray Abdirahman Idris Hassan oo u Qornaa “ ilaaheey hakugu darajeejo Dilka David camiroon iyo Haweeneeyda Duqda ah ee Elizabeth.

Caasimada Online
Xafiiska Muqdisho
[email protected]

Muqdisho (Caasimadda Online) _ Wasiirka Howlaha Guud ee xukuumadda Soomaaliya Saadaq C/llaahi Cabdi ayaa laga reebay tartanka Kursiga Beesha Hubeer ee Baarlamaanka Federaalka oo ahaa kursigii uu ka dhintay wasiir Cabaas C/llaahi Siraaje.

Wasiirka ayaa ka mid ahaa musharixiinta kursigan waxaana la sheegay inuu cadaadis uga yimid xafiisyada Madaxtooyada iyo Ra’iisal wasaaraha, taasoo keentay inuu ka haro doorashada kursiga uu musharax u ahaa oo lagu wado inay Berri ka dhacdo magaalada Kismaayo.

Waxaa socda olole Madaxtooyada Soomaaliya ugu jirto in kursigaasi loo doorto wiil la dhashay Cabaas Siraaji oo dhowaan soo gaaray magaalada Kismayo, kaasoo lagu magacabo Maxamuud C/llaahi Siraaji.

Wararka ayaa intaa ku Maxamuud C/llaahi Siraaji oo maalmo ka hor gaaray magaalada Kismaayo ay u badan tahay inuu kursigaas ku guuleysto, oo uu bedelo booska walaalkii, iyadoo uu la tartami doono musharax malxiis ah.

Dood badan ayaa ka jiray qaabka kursigan loogu tartamayo, iyadoo Madaxtooyada iyo Maamulka Jubbaland ay isku hayeen, inkastoo markii dambe la xaliyay.

Maxamuud Cabdi Beekoos oo ahaa Musharaxii laga guuleystay Tartanka kursigan ayaa sheegay inay jirto faragelin, isla markaana la baal maray shuruucdii doorashada, maadaama qofkii laga guuleystay ay aheyd inuu buuxiyo kursigan.

Taageerayaasha musharaxa Maxamuud C/llaahi Siraaje ayaa ku dhawaaqay inuu ku guuleystay xildhibaanni kursiga beesha Hubeer, iyadoo uu tanaasulay musharicii la tartamayey, waxaase go’aanka laga sugayaa Guddiga Doorashada, iyado ay jirto musharax haweeney ah oo tartanka ku jirta inkastoo aysan miisaan lahayn.

Musharaxa kale ee kursiga u taagan Maxamuud Cabdi Beekoos oo horeba uu uga qaaday Marxuum Cabbaas Siraaje ayaa ku dodaya inay doorahsda lagu hayo jirto faragelin, isagoo dacwad geystay Maxkamadda sare.

Caasimada Online
Xafiiska Muqdisho
[email protected]

Muqdisho (Caasimadda Online) – Sida ay sheegayaan wararka laga helayo Villa Somalia waxaa dhowaan lagu wadaa in la magacaabo safiiro dhowr ah oo cusub, kadib markii xilalkii laga qaaday in ka badan 8 safiir oo Soomaaliya u fadhiyey dalal muhiim ah.

Xogta ayaa sheegeysa in Agaasime kuxigeenka Madaxtooyada C/risaaq Axmed Shoole oo ah mid ka mida saaxiibada ugu waaweyn ee madaxweynaha Soomaaliya loo magacaabayo Safiirka Soomaaliya u fadhiya magaalada Doha ee dalka Qatar, xilkaas oo laga qaaday Cumar Idiris.

Magacaabidda safiirka cusub ee Qatar loogu magacaabayo C/risaaq Shoole ayaa la sheegay inuu taageero ka heysto xubno sar sare oo ka tirsan Villa Somalia , wuxuuna qeyb ka yahay safiiro dhowr ah oo lagu wado in la buuxiyo.

Illaa 12 Safaaradood ayaa laheyn wax safiir ah, tan iyo markii sanadkii hore xilalka laga qaaday Safiiradii dalalkaas joogay oo qaarkood muddo sanado hayay xilalka, waxaana lagu dhaliilayaa Wasaaradda Arrimaha Dibadda in aanay wali soo jeedin buuxinta safaaradaha banaan.

Xilalka safiirnimo ee dalalka muhiimka ah sida: Kenya, Imaaraadka, Kuwait, Shiinaha, Mareykanka iyo Qatar ayaa bannaan iyadoo uu socdo olole olole lagu doonayo in lagu buuxiyo xilalkaasi.

Caasimada Online
Xafiiska Muqdisho
[email protected]

Muqdisho (Caasimadda Online) – Magaalada Muqdisho waxaa soo gaaray wafdi ka socda Midowga Afrika iyaga oo Magaalada Muqdisho uga qeybgelaya shir u dhaxeeya Dowladda Federaalka ee Soomaaliya,Midowga Afrika oo ay iyaga matalayaan iyo danjirayaasha Waddamada ay Ciidamada ka joogaan Soomaaliya.

Wafddigan oo tiradoodu tahay 10 Qof waxaa ay Muqdisho u joogaan shirkaas iyo qiimeyn ay ku sameynayaan howlgalka nabad ilaalinta midowga Afrika ee Soomaaliya.

Wafddiga ayaa sidoo kale u kuur gelaya hanaanka mas’uuliyadda amniga Soomaaliya Ciidanka AMISOM ugu wareejinayaan Ciidamada Dowladda Soomaaliya.

Shirkan waxaa diiradda lagu saarayaa guulaha laga gaaray howlgalka AMISOM ee Soomaaliya oo sanadkii 11aad gelaya Bisha March ee soo socota, caqabadaha lagala kulmay,waxyaabaha hadda taagan ee ay tahay in la wajaho, sida amniga Soomaaliya loogu wareejin karo Ciidamada dowladda Soomaaliya iyo qodobo kale.

Wafddiga oo uu hoggaaminayay madaxa qorsheynta howlgallada ee Midowga Afrika Jen. Francis Okello,waxaa ay durba kulan horudhac ah la qaateen wakiillo ka socda dowladda Soomaaliya oo uu ka mid yahay lataliyaha amniga ee Madaxweynaha Soomaaliya Cabdi Siciid Cali.

Kulanka hordhaca ah oo ka dhacay Madaxtooyada Soomaaliya waxaa sidoo kale ka qeybgelay ergeyga Mudowga Afrika ee Soomaaliya sidoo kalena ah Madaxa howlgalka AMISOM Francisco Madeira..

Caasimada Online
Xafiiska Muqdisho
[email protected]

Nairobi (Caasimadda Online) – Madaxweynaha maamulka Jubbaland Axmed Maxamed Islaam shaaciyey inuu ku biiray wadahadalka magaalada Nairobi uga socda dowladda Itoobiya iyo Ururka ONLF.

Wadahadalka nabadeed ee labada dhinac uga socda magaalada Nairobi ayaa waxaa soo qabanqaabiyey oo martigelinaya dowladda Kenya oo la sheegay inay u yeertay Axmed Madoobe si uu gacan uga geysto cadaadiska la saarayo labada dhinac si heshiis loo gaaro.

Qoraal la soo dhigay bartiisa rasmiga ah ee facebook ayaa lagu sheegay in Axmed Madoobe ku guda jiro dadaalo uu ugu kala dabqaadayo ergooyinka kala matalaya Dowlada Itoobiya iyo Ururka ONLF ee ka qayb galaya wadahadallada kasocda Magaalada Nairobi ee wadanka Kenya.

Wakiilada kala metalaya labada dhinac iyo dhexdhexaadiyeyaasha ka socda Soomaaliya iyo Kenya ayaa la sheegay inay yihiin dad kasoo wada jeeda hal beel.

Muqdisho (Caasimada Online)-Waxaa magaalada Kismaayo ee xarunta maamulka Jubbaland ka socda diyaar garow lagu doonaayo in lagu qabto doorashada Kursiga Xildhibaanimo ee uu ka dhintay Cabaas Cabdullaahi Sheekh Siraaji.

Doorashada ayaa lagu wadaa inay dhacdo maalinta Beri ah, waxaana la filayaa in shaqsiyaadka u tartamaaya Kursiga Marxuum Cabaas Siraaji uu kamid yahay wiil la dhashay oo ka imaaday dalka dibadiisa.

Xubnaha ku tartamaaya Doorashada oo ku sugan magaalada Kismaayo, ayaa saaka halkaa kawada diyaar garowgii ugu danbeeyay maadaama ay maalinta Beri ah dhici doonto Doorashada.

Waxaa Magaalada Kismaayo xiligaan diyaar ku ah dhammaan Ergooyinkii loogu tala galay in ay wax doortaan.

Xaliimo Yarey oo ah Guddoomiyaha Guddiga doorashooyinka Madaxa Banaan, ayaa saxaafada u xaqiijisay in maanta ay bilaabi doonaan in ay hubiyaan Ergooyinka, islamarkaana ay xaliyaan wixi tabasho ah ee jira si ay biri u dhacdo Doorashada.

Amniga ayey sheegtay in si weyn loo adkeyn doono mudada ay socto Doorashada, islamarkaana ay ka hortagi doonaan wixii musuq iyo eedeynba ah.

Sidoo kale, Guddiga doorashooyinka ayaa wadda dadaallo lagu soo buuxinaayo kuraastii ka banaanaatay Golaha Shacabka.

Bishii lasoo dhaafaya ayey aheyd markii ay Guddiga ku qabteen Magaalada Jowhar Doorashada kursi ka mid ah Kuraasta Golaha Shacabka.

Caasimada Online

Xafiiska Muqdisho

[email protected]

Muqdisho (Caasimada Online)-Waxaa habbeenimadii xalay magaalada Muqdisho lagu dhaawacay mid ka mid ah Agaasime Waxeedyadda Wasaaradda Dhalinyaradda iyo Cayaaraha Xukuumadda Soomaaliya.

Agaasime waaxeedkan ayaa waxaa magaciisa lagu sheegay C/llaahi C/kariin Maxamed Xiirey, oo ku magacaaban Agaasimaha Waaxda Xiriirka Gobolada ee Wasaaradda Dhalinyarada iyo Isboortiga.

Agaasimaha ayaa la sheegay inay rasaaseeyen ciidamo ka tirsan dowlada, kadib markii ay ka shakiyeen gaari uu la socday oo isku dayay inuu si xooli ah ku dhaafo ciidamada.

Agaasimaha ayaa xiliga la rasaaseynaayay maraayay agagaarka Madaxtooyadda Soomaaliya, waxaana la xaqiijiyay in dhaawiciisa uu yahay mid aan sidaa usii buurneyn, sida ay xaqiijiyeen dad ku booqday isbitaalka lagu dabiibaayo.

Wasiirka Dhalinyarada iyo Ciyaaraha Khadiijo Maxamed Diiriye, ayaa xaqiijisay dhaawaca Agaasimaha waxa ayna barteeda Facebook ku soo qortay in lagu soo wargeliyay dhaawaca Agaasime C/llaahi.

Sidoo kale, Agaasimaha ayaa la sheegay inay ku dhaceen ilaa Seddex xabadood oo kaga beegnaa dhanka caloosha, hase ahaatee ciidamada rasaaseeyay ayaa ku andacoonaaya inuu isku dayay awood.

Dhinaca kale, Saraakiisha ciidamada dowlada ayaan weli ka hadal dhaawaca Agaasimaha, inkastoo la sheegay in xaalkiisa uu iminka yahay mid caadi ah.

Caasimada Online

Xafiiska Muqdisho

[email protected]

Waxaa biyo la’aan ah webiga Shabeelle, waa markii 3aad muddo 3 sano ah, in kasta oo abaar ka jirto gudaha Soomaaliya, haddana dadka Hiiraan iyo Labada shabeelle waxaa ay qabaan in sababta ugu weyn ee webigu u guray ay tahay biyo-xireennada Itoobiya.

Hiiraan: Wararka ayaa sheegaya in biyaha webiga oo guray awgeed ay dadku halis ugu jiraan cudurro, Beledweyn waxaa ay dadku cabbaan biyo Mooyo-saxo ah, markii horena ceelal ka fog webiga lama sameysan, taasi oo dhibaato hadda ku noqotay dadka deegaaanka.

Cabdullaahi Indhoy Nuur, oo ka tirsan dadka deggan Ceel-jaalle, ayaa sheegay in webiga lagu dhex lugeeyo, oo meelaha biyuhu ku jiraan ay qaraar yihiin isaga oo ku qeyliyay “Dadkii waa bakhtiyay, Ceel-gaal ayaa booyado ka soo iibsannaa, dadku ma awoodaan, oo waa qaxooti…Itoobiyaa leexsatay, oo beero ku waraabsataa la yiri, dadku waa ba’ay, lacagtiina waa la diiday, wax dowlad dhexe oo gurmad noogu yimid ma heyno.”

Shabeellada Dhexe: Biyaha oo guray awgeed, dadka deegaanku waxaa ay webiga ka  dhex qodeen “Xin” oo ah god dheer, si ay biyo uga helaan, dhaansi ka dibna u cabbaan, halka dad qaarna Jowhar biyo looga qaado.

Aadan Sheekh Cabdiqaadir, guddoomiye ku-xigeenka tuulada Beexow oo ka tirsan Jowhar, isaga oo ka hadlaya dhibaatada biyo la’aanta waxaa uu sheegay, in ay ku tiirsan yihiin Bajaaj maalin walba biyo ka soo qaaddo Far-janno (ceel Jowhar ku yaallo), halkii jeerigaanna ugu yimaado 3 kun ShS. 3 jiilaal ayey sidan ahaayeen, xoolo, beero iyo dadka oo dhanna nolol kale ma heystaan.

Aadan oo hadalkiisa sii watana waxaa uu sheegay in Itoobiyaa biyo-xireen samaysatay, oo xitaa haddii webigu biyo keeno malaygii iyo faa’idii kala soo baxaan, biyaha koonfurtana “Musqulaha xitaa waa ku soo shubaan, biyuhu nacfi ma leh, oo macdanta ayaa laga la soo baxay, dhulkii lagu waraabiyana waa qalalaa, biyo dhintay waaye,” waxa uuna soo jeediyay in ay dowladdu la hadasho dadka biyo-xireenka dhigtay, “waa shaqo u taallo dowladda Soomaaliya, inay la hadasho, baan qabnaa” ayuu hadalkiisa ku soo gabagabeeyay.

Shabeellada Hoose: Maamo reer Afgooye ah oo codsatay in magaceeda la qariyo waxaa ay sababta biyo la’aanta Webiga Shabeelle ku sheegtay in biyaha webiga ay leexsadeen Soomaalida Itoobiya, oo kanaallo ka sameeyeen gudaha, “90% waxaa u sabab ah kanaaladaas la leexiyay ee kilinka 5aad, 10% waa abaar” ayey intaasi raacisay.

Maamadan waxaa ay intaasi ku dartay in reer Afgooye dhibaato qabaan sida in hal moos ah oo tallaalan ay 3 jiilaal ku timid. Liinta, Mooska iyo dhammaan geedihii waxaa ka qalalay caleenta, waxaana lagu waraabiyaa jiirigaamo, inta hantida heysatana ceelal.

Maamadan waxaa ay ugu dambeyntii, dowladda ugu baaqday in ay la hadlaan Itoobiya si arrinkan wax looga qabto, iyada oo ka digtay in haddii aan wax laga qaban beeraleyda inta ay shaqada ka soo tagaan buushash ka dhisan-doonaan inta u dhaxeysa Xamar iyo Afgooye.

Biyo-Xireennada Itoobiya:

Mas’uul Itoobiyaan ah oo horay Xildhibaan uga ahaa maamulkii Mengistu Haile Mariam ayaa horay uga warramay biyo-xireennada ay Itoobiya ka sameysay Webiga Shabeelle.

Mas’uulkan oo codsaday in magaciisa la qariyo ayaa sheegay in uu ka mid ahaa wafti Xildhibaano ah oo tagay 1980-kii(1971-dii Taariikhda Xabashida) dhulka Oromada oo ah dhulka uu ka soo baxo Webiga Shabeelle, Xildhibaanku waxaa uu goobjoog ka ahaa dhismaha mashruuca Meka Wakena oo ahaa mashruuc ay dowladdii loo yaqaanay Darbiga ee Mengistu Haile Mariam u sameysay in ay koronto uga dhaliso biyaha Webiga Shabeelle, korontadaas oo awooddeeda xitaa la sheegay in laga isticmaalayo waddamada dariska ah sida Soomaaliya.

Mas’uulka waxaa uu sidoo kale sheegay in markaasi loo sheegay in webiga lix bil uu xirnaanayo si biyaha loo keydiyo kadibna la sii deyn doono, mashruucaas kama wada hadlin dowladihii xilligaas ka jiray labada dhinac ee Mengistu Haile Mariam iyo Maxamed Siyaad Barre, biyo xireenkana waxaa fuliyey shirkado laga lahaa dalka Ruushka oo ay xilligaas cadawtinnimo ka dhaxeysay Soomaaliya.

Xildhibaankan Itoobiyaanka ah waxaa uu sidoo kale ka hadlay mashruuc kale oo uu fuliyay Melez Zenawi kaas oo loogu talagay in ay ka faa’iideystaan dadka ku nool meel degmada Godey u jirta ilaa 35 KM. Mashruucan waxa dadku ugu yeeraan Mashruuca biyo-xireenka ama waraabka Galbeedka Godey.

Mashruucan waa kii ugu horreeyay ee loo sameeyo Soomaalida ku nool dalka Itoobiya, waxaa mashruucan ujeeddadiisu tahay in beeraleyda Soomaalidu ka faa’iideystaan biyaha webiga, waxaana hirgelintiisa ku han weynaa Ra’iisulwasaarihii hore ee Itoobiya Melez Zenawi, isaga ayaana lacag badan ku bixiyay laakiin waxaa dhammaystirtay xukuumadda hadda jirta.

Webiga Shabeelle waxaa uu maraa deegaanno badan oo Soomaali galbeed ah sida Raafo, Godey, Qalaafo, Mustaxiil, Feerfeer iyo meelo kale. Kanaallo la jeexay iyo dhul beereed cusub oo laga sameeyay Godey ayaa keenay in qeyb ka mid ah webiga Shabeelle la leexiyo. Kani waa biyo-xireenkii labaad ee webiga Shabeelle ee laga sameeyo gudaha Itoobiya, mashruucan dambe waxaa uu socday 5-tii sano ee la soo dhaafay, waxaana la yaab leh in aysan ka hadlin xukuumadihii Soomaaliya ee xilliyadaas sida Cabdullaahi Yuusuf, Sheekh Shariif, Xasan Sheekh Maxamuud iyo Farmaajo.

Hadaba, iyada oo dhibaatooyinkaasi jiraan, dadkana ka sheeganayaan biyo-xireennada Itoobiya ka waddo webiga Shabeelle ayaaney jirin ajende cad oo dowladda Soomaaliya ah, madaxweyne Farmaajo waxaa uu sanad gudahiisa booqday Itoobiya muddo 3 jeer, waxyaabaha uu mas’uuliyiinta dalkaasi kala hadlay kuma jirin biyaha halka booqashada madaxweyneyaasha dhiggiisa ah ee Suudaan iyo Masar ee Addis Ababa ajendaha ugu muhiimsan ka dhigaan biyaha Nile-ka. Ogow Nile kama nafci badno Shabeelle!

Waxaa maalintii seddexaad galay wadahadalo magaalada Nairobi uga furmay jabhadda ONLF iyo Dowladda Itoobiya, waxayna ka socdaan goob qarsoodi ah.

Afhayeenka ONLF Cabdiqaadir Xasan Hirmooge ayaa BBC-da u sheegay in uu u malaynayo in wadahadalada ay si wanaagsan ku socdaan, lagana soo saari doono war saxaafadeed.

Maxay wadahadalan kaga duwanyihiin kuwii hore?

Ma ahan markii koowaad oo ay wadahadlaan Itoobiyo iyo ONLF, laakiin waxa ay u egtahay in kuwan ay aad uga miisaan culusyihiin kuwii hore.

Hirmooge, afhayeenka ONLF oo ay BBC-da wax ka weeydiisay moowqifka jabhadda ee wadahadala ayaa yiri “Barnaamijka siyaasiga ah ee ONLF ayuu ku xusanyahay in khilaafka Ogaadeeniya iyo Itoobiya lagu xaliyo hab wadahadal ah, mana ahan markii ugu horeysay, 1989-kii ayaan wadahadalnay, 1990-kiibaan wada hadalnay”.

Dhammaan wadahadaladaasi waxa ay ku dhammaadeen guul daro, balse xaqiiqda ah in ay hadda isa soo hor fariisteen madaxweynaha dowlad deegaanka Soomaaliya Cabdi Maxamuud Cumar iyo mas’uuliyiinta wasaaradda gaashaandhiga Itoobiya oo dhinac ah iyo waftiga ONLF oo dhinaca kale ah ayaa wadahadalan ka dhigaya kuwa dad badan ay ka filayaan natiijo wanaagsan.

Taageerayaasha jabhadda iyo kuwa kale ayaa baraha bulshada kusoo qoray in horumar laga gaaray shirka, islamarkaasma ay u muuqato in heshiis kama dambeys ah la’isla fahmi doono.

Sida uu sheegay afhayeenka ONLF, waxaa jiri doona shir kan ka weyn oo lagu kala saxiixan doono waxyaabihii lagu heshiiyay.

Yaa dhexdhexaadinaya dhinacyada?

Waxaa jiray guddi hawsha wadahadalka u xilsaarnaa muddo sanooyin ah oo ka tirsan dowladda Kenya oo uu hoggaaminayo xildhibaan Yuusuf Xaaji oo markii ay wadahadalada bilaabanayeen ahaan jiray wasiirka gaashaandhigga.

Waxaa kale oo guddiga dhexdhexaadinta ka mid ah guddoomiyaha Gaarisa Cali Bunoow Qorane iyo Danjire Maxamed Cabdi Affey, kuwaas oo sida uu sheegay afhayeenka ONLF ay dowladda Kenya markale u xilsaartay hawsha dhexdhexaadinta maadaamaa ay iyaga hawsha horey ugu jireen.

“Dowladda Kenya ayaa u xilsaartay, maadaamaa dhinac ka mid ah uu Af Soomaali ku hadlayay, Itoobiya waxaa matalayay wasaaradda gaashaandhigga, dhanka Kenyana wasiirkii gaashaandhiga xiligaas Yuusuf Xaaji, madaxweynaha hadda jirana isla guddigii hore ayuu dib usoo magacaabay”.

Xubnaha wadahalada ee labada dhinac

Labada dhinac ee wadahadlaya iyo dhexdhexaadiyeyaashaba dhammaantood waa Soomaali marka laga reebo dhawr qof oo ka socda dowladda federaalka ee Itoobiya.

Markii ugu horeysay waxaa miiska dhinaca kale ka fadhiya madaxweynaha dowlad deegaanka Soomaaliya Itoobiya Cabdi Maxamuud Cumar, kaas oo xurgufta ugu badan ay ka dhaxaysay ONLF sanadihii dhawaa kadib dagaalo ay ciidammada Liyuuga ee ismaamulka la galeen dagaalamayaasha jabhadda.

Sawirro ay soo bandhigeen dhexdhexaadiyeyaasha ayaa waxaa sidoo kale ka muuqda Sheekh Ibraahim Dheere oo horey u ahaan jiray guddoomiyihii jabhaddii Soomaali Galbeed ee Itoobiya la dagaalami jirtay, taas oo heshiis ay gashay kadib hubka ku dhigtay.

Dhanka jabhadda waxaa waftiga hoggaaminaya guddoomiyaha wadahadalada ee ONLF Cabdiraxmaan Sheekh Maadeey, ahna madaxa arrimaha dibedda jabhadda. Waxaa wehliya saddex xubnood oo kale.

Xigasho: BBC

Muqdisho (Caasimada Online) – Raadinta ehelka maxaabbiista Soomaalida ee ku jiray xabsiyada Ethiopia, ka dib markii lagu qabtay dagaalkii 1977, waxaa ka shaqeeynayay dad qaarba mar ku soo biiray.

Xafiiska ICRC ee qaabbishan howshaan waxaan 1987 ku nahay saddex ruux.  Faadumo Shiikh Cabdi oo inta badan howsha xafiiska wadda, dibaddana marmar u shaqo tagta oo baadigoobta qoysaska maxaabbista, marna qoysas la helay oo la wargeliyay u geysa waraaqaha kana soo qaadda jawaabaha.

Aniga oo shaqadeyda oo dhami ay tahay baadigoodbka qoysaska maxaabbiista iyo xiriirintooda oo ah in waraaqaha bil walba loo geeyo jawaabana laga keeno.

Iyo Beatrix Attinger oo inta aniga iyo Faadumo aan qabanno oo kale qabata, Madaxna ka ah Waaxda Baadigoobka ee aan ka wada tirsan nahay.

Faadumo iyo Beatrix waxaa howshaan u dheer booqashada iyo ka warqabka maxaabbiista Ethiopian-ka ah ee ku xiran Soomaaliya.

Waxay hey’addu ammin kooban adeegsatay laba nin oo gacan ka geysta raadinta qoysaska maxaabbiista Soomaalida.

Midkood waxaan u dirnay Jowhar oo waxaa loo dhiibay waraaqaha u socday Shabeellaha Dhexe.

Sahay ugu filan baska, Hoteelka, Raashinka, Taksiga iyo telefoonka muddo toddobaad ah ayaan siinnay iyo waliba xoogaa dheeri ah haddii kharash aan la sii qorsheyn uu ku soo baxo.

Tababbar iyo hanuunin ku saabsan xasaasiyadda howsha iyo sida nabadsugidda ama booliisku haddii ay shakiyaan ay tahay in uu ku qanciyo ayaa la tusay.  Muhiimadda howshana waa loo fasiray waana la diray isaga oo sita koobbi waraaqaha Gobolkaas u socda oo dhan iyo liiska maxaabbiista.

Marka uu amba baxay waxaan ka filayay usbuucaas haddii uu laba ama saddex qoys soo helo in ay tahay libin mudan in loo dabbaal dego.

Laakiin ninkii wuxuu soo laabtay laba maalmood ka dib.  Waxaan u qaatay in hey’adaha amnigu ay ka soo saareen magaalada.  Laakiin wuxuu ii sheegay in ay howshii soo dhammaatay. Dhammaantood wuu soo helay qoysaskii loo diray.  Mid kastana jawaab ayuu ka sidaa.

Maaddaama aan khibrad u leeyahay culeyska howshan waxaa igu adkaatay in aan aammino in laba maalmood lagu soo helay qoysaskii Shabeellaha Dhexe.

Waxaan soo xusuustay Xaawa Cabdi oo ah hooyo Soomaaliyeed oo deggan Budbud oo aad uga fog Jowhar oo wiilkeeda oo aanay ka warqabin in uu nool yahay uu waraaq uga soo diray xabsi Ethiopia ah.

Waraaqdeedii ayaan baaray, waxayna ku calaameysan tahay in loo geeyay, jawaab magaceedu ku saxiixan yahayna wuu ka sidaa.

Waxaan weydiiyay sida uu u helay Xaawa Cabdi oo ku nool Budbud oo ka fog Jowhar.  Wuxuu ii sheegay in ay isbitaalka ku jirtay oo ay xanuunsanayd oo uu halkaa kula kulmay.

Waxaan weydiiyay maaddaama cinwaankeedu yahay Budbud, maxaa kugu dhaliyay in aad Isbitaalka Jowhar ka raadiso.  Wuxuu ii sheegay wiil iyada la socday in uu magaalada kula kulmay.

Sheekadu waa ay isu keey qaban weyday.  Qof weyn oo ku hor taagan oo wax ku kallifaya aan la aragna in aad hadalkiisa rumeysan weydo waa ay culus tahay.

Waan u mahadceliyay wixii uu lacag shaqeystayna waan siinnay.  Laakiin markii aan arrinta ka fekeray waa ay igu cuslaatay in aan sidaas ku aammino.   Xataa farta ay ku qoran tahay inta badan waa isku mid oo wuxuu ii sheegay in uu isagu u qoray.

Safar Hubsiimo

Waxaan Xafiiska la wadaagay tuhunka aan qabo.  Kaas oo la ila gartay.  Waxaan goostay in aan arrintan daba-gal ku sameeyo oo aan soo hubiyo.

Waraaqihii aan koobbigooda isaga u dhiibay ayaan soo qaatay.  Waxaan tegey Jowhar.  Waxaan ka billaabay nin cinwaankiisu ahaa Shaneemada Jowhar.  Ninkii waan ka waayay goobta.  Laakiin meel la iigu tilmaamay ayaan ka helay.   Waxaan uga warramay askarigii waraaqda u soo qoray oo xabsiga Ethiopia ku jira.

Meeshii aan ka filayay in uu yiraahdo shalay ama dorraad ayaa waraaqdaas la ii keenay, arrintu waa ay ka fogeyd.  Waxay ahayd markii ugu horreysay ee uu maqlo in qofkaasi nool yahay, xiran yahayna.

Maaddaama safarkeyga gaabani ahaa hubinta in Jawaabihii Jowhar laga keenay ay sax ahaayeen iyo in kale, safarkeygii halkaas ayaan ku soo geba gebeeyay.

Agaasime ka tirsan Warshadda Sonkorta, ahaana garsoore Kubadda Koleyga, Cabdulqaadir Mille, oo ahaa arday aan Jaamacadda ka wada baxnay laakiin iga horreeyay ayaan la soo qadeeyay. Liiska maxaabbiista ayaan la wadaagay bal in qoyskii uu ii heli karo i soo wargeliyo. Ka dibna waxaan ku soo laabtay Muqdisho.

Wuxuu qadada iigu sameeyay guri qurux badan oo uu degganaa, leh beer nasasho oo dhir iyo ubax udgoon oo leh wiifow carruurta iyo dadka is jeceli ku cayaaraan.  Sababta aan xusayo waa in aan sheego in gurigaasi ahaa mid ay Dowladdu siisay.

Jawaabihii uu keenay wiilkii aan shaqada u dirnay dhammaantood waxaan u aragnay been-abuur, waxaanna ka soo qaadnay waxba kama jiraan.

Wakhti kale iyo safarro dhowr ah oo gaa-gaaban ayay nagu qaadatay in aan soo helno dhammaan qoysaskii ay waraaquhu u socdeen ee Gobolka Shabeellaha Dhexe.

Khatar weyn ayay ahayd iyo cuqubo laga gelayo in maxaabbiis iyo ehelkooda.

Waxay khiyaamo ku ahayd Maxaabbiista oo is moodsiinayay in reerkoodu ka warqabo, dhanka kalana aan war sax ah ka heleyn reerka yaa dhashay, yaa dhintay, yaa guursaday.

Sidoo kale waxay khiyaamo ku ahayd qoysaska oo iyaga oo weli u haysta in wiilkoodii, aabbahood ama walaalkood uu ku geeriyooday dagaalka, haddana laga warbixiyay in qoyska la wargeliyay.

Ugu dambeyntana waxay khiyaamo ku ahayd hey’adda intaas oo dadaal iyo kharash ah gelisay isku xirka maxaabbiista iyo qoysaskooda in laga wasakheeyo shaqada sharafta badan.

Laakiin nasiib wanaag intaas oo dhan waan ka badbaadnay.

Sagaashameeyadii aniga oo BBC u shaqeeya ayaan ninkii is aragnay, iguma soo qaadin arrinkii anna dacwad ma qabin.

W/Q. Yuusuf Garaad

Caasimada Online

Xafiiska Muqdisho

[email protected]

Hargeysa (Caasimada Online)- Wasiirkii hore ee arrimaha dibada Somalia, Maxamed C/llaahi Oomaar oo kasoo jeeda gobolada waqooyi ee isku magacaabay Somaliland ayaa ka tanaasulay fikirkii uu aaminsanaa ee Somaliweyn.

Mr. Oomaar oo dib ugu laabtay Hargeysa shalay ayaa sheegay inuu garowsaday qadiyada gooni isu taaga Somaliland, waxaana cafis u fidiyay madaxweynaha maamulka Somaliland Muuse Biixi Cabdi.

Saxaafadda Somaliland ayaa baahisay socdaalka Maxamed C/llaahi Oomaar ku tegay Hargeysa, iyadoo lagu wado inuu warbaahin la hadlo.

Mas’uuliyiinta kasoo jeeda Somaliland ee xilalka ka qabta Somalia ayaa ka mamnuuc inay tagaan Somaliland ilaa ay ka tanaasulay mowqifkoda Somaliweyn.

Waxaa horay Hargeysa ugu laabtay wasiirkii hore ee arrimaha dibadda, Ismaaciil Hurre Buubaa, iyo Prof. Cabdi Ismaaciil Samatar u tartamay xilka madaxweynaha Somalia 2012-kii balse markii uu ku hunhuubay ka tanaasulay mowqifkii uu ku dheganaa ee Soomaaliweyn.

Caasimada Online
Xafiiska Hargeysa
[email protected]

Muqdisho (Caasimada Online)-Qarax xoogan ayaa waxaa caawa uu ka dhacay magaalada Muqdisho ee caasimada Somalia xili ay dadku kasoo kala baxeen Salaada Makhrib.

Qaraxa oo intiisa badan laga maqlay Xaafadahada magaalada Muqdisho, ayaa waxaa la xaqiijiyay inuu ka dhashay Miino ay ku cayaarayeen Carruur.

Caruurtan oo laba aheyd ayaa Walxaha qarxa ku heystay Isgoyska KM4 gaar ahaan aagga Aargada, iyaga oo ku cayaaraya ayay mar qura la qaraxday, sida ay xaqiijiyeen dad goobjoog ahaa.

Carruurta ayaa la sheegay inay ahaayen Darbi jiif ku noolaa hareeraha Aargada, waxa ayna markeedii hore kasoo qaaden goob leysugu geeyo qashinka oo ku taal dhabarka danbe ee iskuulka Turkida.

Mid kamid ah Darbi jiifta ayaa sheegay in Carruurtaas ay Miinada ku cayaarayeen tan iyo duhurkii maanta, kuwaasi oo aanan kala garaneynin in birahan ay ku cayaarayeen ay dhibaato ka soo gaari karto.

Gaadiidka gurmadka ayaa goobta ka qaaday Meydka mid ka mid ah caruurta iyo mid kale oo uu dhaawac soo gaaray, waxaana loo qaaday goobaha caafimaadka ee ka dhaw dhow Isgooyska.

Qaraxaani miinada ah ayaa noqonaaya kii ugu horeeyay oo ka dhaca Aargada KM4 oo ah halka ugu badan oo ay isticmaalaan shacabka, waxaana xusid mudan in labada Carruur ee waxyeeladu soo gaartay ay isku hayeen Miinada ilaa ay ka Qaraxdo.

Caasimada Online

Xafiiska Muqdisho

[email protected]

Garoowe (Caasimada Online)-Waxaa weli socda gurmadka lagu doonaayo in lagu badbaadiyo Dooni weyn kusoo caarisay Xeebta magaalada Boosaaso ee Gobolka Bari.

Doonidan oo qaar kamid ah alaabihii saarnaa ku qubtay Badda ayaa waxaa iminka xooga la saarayaa sida lagu badbaadin lahaa alaabaha badqaba ee saran Doonida.

Doonida ayaa u raran ganacsato Soomaaliyeed waxaana la xaqiijiyay in rarka saran uu yahay ilaa 10 Milyan oo dollarka Mareykanka ah.

Howlgalka lagu badbaadinaayo doontaasi ayaa socdo ku dhawaad todobaad,Doontaan oo cilad ku timid, ayaa markeedii hore loo diiday inay  ku xirato Dakadda Magaalada Boosaaso.

Ganacsatada iyo dad weynaha ayaa caro tuur iyo Kunteenaro laga buuxiyay carro dhigay inta u dhexeysa Doonida ilaa Xeebta, iyadoo ujeedka uu yahay badbaadinta Hantida saran Doonida.

Doonida ayaa waxaa saran Gaadiid kuwaa oo sababta ugu weyn u noqday inay caariso doonida, waxaana suuragal ah in ilaa iyo bari lagu soo afmeero caro tuurka loo sameynaayo Doonida.

Muqdisho (Caasimadda Online) – Safiirka Turkiga ee Soomaaliya Olgan Bekar ayaa sheegay in booqashadii madaxweynaha Turkiga Recep Tayyip Erdoğan uu ku yimid Soomaaliya 19 August 2011-kii,  ay badashay mustaqbalka dalka, ayna soo nooleysay rajadii shacabka Soomaaliyeed.

Bekar waxa uu tilmaamay in Turkiga uu si weyn uga qeyb qaatay horumarka Soomaaliya intii lagu guda jiray afartii sano ee ugu dambeysay, isaga oo ka fuliyey mashaariica kala duwan, gaar ahaan dhinacyada waxbarashada, Caafimaadka, Beeraha, Kaabayaasha dhaqaalaha iyo gargaarka.

Safiirka Turkiga waxa uu intaasi ku daray “Ujeedkeenna waa horumarinta bani’aadanimada iyo in xal loo helo dhibaatooyinka ay ka cabanayaan walaalaheenna Soomaaliya iyo in naloshooda ay ku soo laabato sidii hore ee dabiiciga aheyd, waan sii wadeynaa shaqadeenna iyo talaabooyinkeena ku aadan dhinacaani”.

Waxa uu tilmaamay in shaqada Turkiga ee Soomaaliya aysan ku ekeen guud ahaan hay’adaha dowladda, balse ay ka qeyb qaateen iskaashiga ay la sameeyeen ururada bulshada iyo hantida guud iyo midda gaarka loo leeyahay.

Waxa uu sheegay in hay’adaha Turkiga, oo ay ka midka yihiin Istanbul Metropolitan Municipality iyo bisha cas ee Turkiga ay ka qeyb qaateen badalidda magaalada Muqdisho in ay u badalaan magaalo barwaaqo, ka dib markii in badan oo ka mid ah magaalada ay ka cabaneysay dhibaatooyin la xiriira, dhanka nadaafadda, dayacaada iyo amni darrada, kaasi oo ka dhigaya in mooralka dadka uu soo wanaagsanaado.

Safiirka Turkiga, waxaa uu ka hadlay dhibaatooyinka ay ka sheeganayaan hay’adaha dowladda Soomaaliya tan iyo sanadkii 1991, markaas oo ay socdeen loolanno gudaha ah, waxa uu sheegay in loo baahanyahay in la kordhiyo awoodaha hay’adaha  dowladda si ay shacabka ugu adeegaan.

Safiir Bekar waxa uu sheegay in hogaanka ciidamada Turkiga ee jooga Soomaaliya ay si weyn uga qeyb-qaataan tobabaridaa ciidamada Soomaaliya ee dhanka amniga.

Waxaa uu cadeeyay in saldhigga Turkiga ee ku yaallo Soomaaliya uusan aheyn saldhig millatari, balse uu yahay xarun tobabar oo bahwadaag ay Soomaaliya kula yihiin, warbaahinta ay arrintaasi isku qalado.

Waxa uu carabka ku adkeeyay Safiirka Turkiga ee Soomaaliya  Olgan Bekar in ciidamada lagu siiyo tobabarka xarunta Turkiga ay ahaan doonaan laf dhabarta ciidamada Soomaaliya xilliyada soo socda,ayna tahay tallaabo sax ah oo keeneysa kalsoonida iyo taageerada aragtida guud ee Soomaaliya.

Caasimada Online
Xafiiska Muqdisho
[email protected]

Muqdisho (Caasimadda Online) – Agaasimaha guud ee wasaarada Ganacsiga iyo Warshadaha xukuumadda Soomaaliya Cabdullahi Xayir Ducaale ayaa ku gacan seyray wareegto xilka looga qaaday oo kasoo baxday wasiirka wasaaradaasi iyo eedeyn musuq ah oo loo jeediyay.

Qoraal jawaab celin ah oo uu soo saaray maanta agaasimaha guud ayuu ku sheegay in wasiirka Maxamed Cabdi Xayir (Maareeye) aanu awood sharci ah u laheyn inuu xilka ka qaado, wuxuuna intaas ku daray in markii hore xilka loogu magacaabay Wareegto Madaxweyne oo ay ansixiyeen golaha Wasiirada, haddii xilka laga qaadayana ay tahay in wadadaas loo maro.

Agaasimaha ayaa sheegay in shaqo joojin uun uu sameyn karay Wasiir Maareeye, wuxuuna qoraalkiisa oo loo kala diray xafiisyo kala duwan oo ay ku jiraan kan madxweynaha iyo Ra’iisal wasaaraha uu si weyn ugu beeniyay oo uu been abuur ku tilmaamay eedaha wasiir Maareeye u jeediyay.

HOOS KA AKHRISO QORAALKA AGAASIMAHA

Tixraac warqadda summadeedu tahay summad wgw/ xw 14/,2018

Kuna tariikheysan 10.2.2018 kana soobaxday xafiiska wasiirka ganacsiga iyo warashada nuxurkeeduna ahaa shaqa ka joojin iyo xilkaqadis

Mudane wasiir waan aqbalay shaqo ka joojinta aad ii soo jeedisay waana awoodaha wasiirka

Dhan kakale xilkaqadista agaasimaha guud ee aad ii soo gudbisay ka ma mid aha awoodaha Wasiir

Waxaan ahay agaasimaha guud oo heysta ansixinta golaha wasiiirada ee ku tariiqeysan 11.02.2018

Islamarkaana helay digreeto madaxweyne oo ku tariqeysan 08/07/2018 sidaa darteed waxaa xilka sirasmi ah igaga qaadi kara madaxda sare ee dowlada Madaxweynaha ama Ra’iisul wasaaraha

Sida kucad dastuurka dalka markuu dhammaado habraaca xilka qaadista si sharci ah waxaana diyaar in xilka aan k uwareejiyo sifa sharci ah inta ka horeysana waxaan ahay agaasimah guud ee wasarada

Mudane wasiir anigoo xushmad kuu haya waxaad hareer martay sharciga shaqaalaha rayidka ee qaranka (sharciga no. 11) qodabadiisa 45aad iyo 46aad sidookale waxaad tixgelin weyday dastuur kumeelgaarka ah qodobka 115aad iyo 116aad oo ka hadlaya wajibaadka iyo ilaalinta xaquuqda shaqaalaha rayidka ee dowlada

Mudane Wasiir waxaan kula socodsiinaya waxaan lasoo shaqeeyay 10 wasiir wasiiru dowle iyo wasiir kuxigeen oo kaa horeeyay oo ilaa hadda qaar shaqeynaya mana aanan sheegin waxyaabaha aad ku sheegtay warqadada ee eedeymaha, waana markii ugu horeysay muddo 9 sano oo aan ka shaqeynaayay oo khilafkedu bannaanka usoo baxo adigoo nala shaqeynaya bil iyo laba maalin

Waxqabadkii ugu muhiimsana waxaa kamid ahaa dhismaha wasdaradda maanta aan ku shaqeyneeno inaga iyo wasaradaha kale iyo sameynta sharciyadda lagu shaqeeyo hada

Mudane wasiir waxaad ii soo jeedisay eedeymo dhamaantood aanay waxba kajirin madaama ay jirto sameynta shardciga waxaa lagaaga fadhiyaa caddeymo ku qotomo (hanti dhowr iyo garsoor)

Sida marar badan soo laablaabatay oo ah awood sheegashada agaasimayaasha ay ku sameeyen wasiiraddoodu waxaan kacodsanayaa madaxweyna iyo ra iisulwasaraha in ay arintaan soo fara geliyaan si ay xal ugu noqoto khilaafad danbe dowlada madxweyna farmaajo iyo xukumada ra iisul wasaare kheyre ee nabad iyo nolol waxay ku baqeen hirgilint sareynta sharciga

Dhammaan hay’adaha ay warqadan ku socoto iyo kuwa ay ogeysiinta ku tahayba waxaan ka codsanayaa in ay arintan sida ugu dhaqsiyaha badan u soo farageliyaan madaama aan ahay masuul dowladeed oo sharaftiisa dastuuriga meel looga dhacay iyadoo loo adegsanaya awood dowladed oo xil ah.

Caasimada Online
Xafiiska Muqdisho
[email protected]

Muqdisho (Caasimadda Online) – Xildhibaan Mahad Maxamed Salaad ayaa weerar ku qaaday Wasiirka Maaliyadda xukuumadda Soomaaliya, isagoo sheegay hadal kasoo yeeray inuusan ahayn mid mas’uulk dowladeed ku hadlo.

“Waa wax aad looga xumaado hadalka kasoo yeeray Wasiirka Maaliyada ee ah: in Ganacsatada reer Muqdisho haddii aysan bixinayn lacagta lagu soo rogay ay badeecadooda kala soo dagaan Dekadda Kismaayo. Hadalkaasi ma ahan hadal qof mas’uul dowladeed ah uu ku hadlo, waana in Wasiirku raali gelin ka bixiyaa..” ayuu yiri Xildhibaanka oo ka mida mucaaradka dowladda uu hoggaamiyo Ra’iisal wasaare Xasan Cali Kheyre.

Xildhibaan Mahad Salaad ayaa uga digey Wasaarada Maaliyada inay qaado lacago baad ah oo aan waafaqsanayn nidaamka maaliyadeed ee dalka u yaala, sida uu yiri, isagoo ku dooday inuusan diidaneyn in dowladu canshuur qaado laakin canshuurtu ay leedahay sharciyad lagu qaado.

Caasimada Online
Xafiiska Muqdisho
[email protected]

Nairobi (Caasimadda Online) – Saraakiil Katirsan Ururka ONLF ayaa gaaray magaalada Nairobi ee caasimadda dalka Kenya halkaas oo uu ka furmay wadahadal u dhaxeeya madaxda Ururka iyo dowladda Itoobiya.

Shirka Nairobi ka furmay waxaa dhanka Itoobiya u metelaya Cabdi Ileey oo ah guddoomiyaha gobolka Somaligalbeed iyo Jeneraal Gabre oo kamid ah saraakiisha Itoobiya ee qaabilsan gumeysiga Soomaaliya.

Ilo wareedyo ayaa sheegaya in ujeedka shirka laga leeyahay uu yahay sidii loosoo gaba gabeyn lahaa dagaalka u dhaxeeya Jabhadda ONLF iyo dowladda Itoobiya arrinkaas oo ah isku day kale oo ladoonayo in xabashida loogu xalaaleeyo heysashada dhulka Soomaaligalbeed oo gumeysi kujira wax kabadan 100 sanadood.

Caasimada Online
Xafiiska Muqdisho
[email protected]

Baydhabo (Caasimadda Online) – Maamulka Koonfur Galbeed Somaliya ayaa heshiis la gaaray shirkad laga leeyahay dalka Shiinaha, taasoo lagu wado inay dhisto, isla-markaana ballaariso Dekedaha Magaalooyinka Marka iyo Baraawe ee Gobolka Shabellaha Hoose.

Sida uu qorshuhu yahay Shirkadda SIIH (Silkroad International Industry Holding) oo bahwadaag la ah Shirkadda Damerjog oo laga leeyahay dalka Jabuuti ayaa marka hore dhisi doonto dekedda ku taala Xarunta Gobolka Shabellaha Hoose ee Magaalada Marka.

Silkroad International Industry Holding ayaa dhismaha Dekedda Magaalada Marka bilaabi doonto sanadkan gudahiisa.

Heshiiskan oo mid saddex geesood ahaa ayaa waxaa Isniintii shalay Magaalada Djibouti ku wada gaaray Madaxweynaha Dowlad Goboleedka Koonfur Galbeed, Shariif Xasan Sheekh Aadan, Gudoomiyaha Maamulka Dekedaha Jabuuti, Abuubakar Cumar Hadi iyo mas’uuliyiin ka socday Shirkadda SIIH.

Munaasabadda heshiiskan lagu kala saxiixday ayaa waxaa goobjoog ka ahaa xubno uu ka mid yahay Danjiraha Jamhuuriyadda Jabuuti u fadhiya Somaliya, Danjire Aadan Xasan Aadan.

Caasimada Online
Xafiiska Muqdisho
[email protected]