Muqdisho (Caasimada Online)-  Waxaa meel gabagabo ah marayo magacaabista golaha wasiirada iyadoo uu aad ugu mashquulsan yahay Ra’iulwasaaraha Soomaaliya Xasan Cali Kheyre kala doorashada shaqsiyaadka soo socoday golaha wasiirada.

Haddaba caasimadda Online ayaa heshay xog muujineyso sida Maamul Goboleedyada dalka loogu qeybisayay wasiirada ugu muhiisan dowladda.

Xogtaan ayaan ka helnay dad aad ugu dhaw dhaw xafiiska Ra’isulwasaaraha, waxayna arrintaan qaadatay muddo badan waxaana lagu sheegay inay tahay midda sababta weyn u ah inay dhawr jeer dib u dhacdo magacaabista golaha wasiirada.

Madaxweynaha ayaa la filayaa inuu dhawaan safar dibadda ah u baxo isagoo ka qeyb geli doono kulanka ay dowladaha IGAD ku yeelan doonaan Kenya kaasoo looga hadli doono arrimaha xaqootiga Kenya ee Soomaaliya, waxaana la filayaa in golaha wasiirada lagu dhawaaqo ka hor inta uusan madaxweynaha safarkaas u bixin.

Haddaba halkaan hoose ka aqriso qaabka maamul Goboleedyada dalka loogu qeybiyey wasiirada ugu muhiimsan ee xukuumadda Kheyre

– Puntland: Wasiirka Difaaca

– Koofur Galbeed: Arrimaha Dibadda

– Somaliland: Wasiirka Maaliyadda

– Jubbaland: Amniga

– Galmudug: Arrimaha Gudaha

– Hirshabelle: waxaa la filayaa in la siiyo Ra’isulwasaare ku xigeyn iyo wasiir.

Illo wareedyo rasmi ah ayaa Caasimadda u xaqiijiyey in wasiirka la siin doono Hirshabelle uu noqon doono wasiirka Ganacsiga iyo Warshadaha haddii aysan sheekada wax iska badalin maalmaha soo socdo.

Caasimada Online
Xafiiska Muqdisho
[email protected]

Muqdisho (Caasimada Online) – CDRC oo ah hey’ad bil kasta soo saarto joornaal ay kaga hadleyso baaritaano iyo warbixino isla markaasna laga leeyahay dalka Itoobiya ayaa qoraal dheer oo 10 bog ah kasoo saartay doorashadii Farmaajo, Magacaabista Ra’isulwasaate Kheyre, caqabadaha hor taagan iyo sida ay noqon doonaan wasiirada.

Haddaba Hey’addaan ayaa ka dhawaajiyey arrin aad loola yaabay markii ay sheegtay in Beesha Abgaal ay Farmaajo uga digtay inuu ka fiirsado Magacaabista golaha wasiirada.

Hey’adaan ayaa sheegtay in Odayaal, Xildhibaano iyo siyaasiyiin kasoo jeedo Beesha Abgaal ay kulan la qaateyn Madaxweynaha Soomaaliya Maxamed Cabdulaahi Farmaajo waxayna ka dhawaajiyey in intii uu socday kulankaas laga wada hadlay qaabka ay noqon doonaan wasiirada lasoo dhisayo.

Sida ay sheegtay Hey’adda Beesha Abgaal ayaa madaxweynaha u sheegtay inuu ka fiirsado magacaabista wasiirada iyo qaabka loo qeybsan doono haddii kalana ay midaas ka dhallan doonto caqbaad.

Hey’adda ayaa sheegtay in Abgaal ay bilaabeyn inay cuna qabateyn saaraan Dakadda Muqdisho kadib markii ganacsato beeshaas kasoo jeedo ay ka dhawaajiyeen inay dib u dhisi doonaan Dakadda macmalka ah ee Ceel Macaan.

Hey’adda ayaa arrintaas ku tilmaamtay inay tahay tallaabo lagu wiiqayo awoodda dowladda dhexe isla markaasna waxayna ka dhawaajisay arrin lala yaabay oo ah in beeshaan ay tallaabadan u qaadeyso kadib markii loogaga guuleystay doorashadii ka dhacday Soomaaliya.

Ugu dambeyntii Hey’adaan laga leeyahay dalka Itoobicya ayaa sheegtay in il gaar ah lagu hayo magacaabista golaha wasiirada midaasna ay ka dhallan karto caqabado ay la kulanto dowlada Farmaajo.

Warbixinada ay soo saartay hey’adaan oo aad u badan waxaana mid mid idinkugu soo gudbin doonaa waxyaabihii ugu muhiimsanaa ee looga hadlay.

Caasimada Online
Xafiiska Muqdisho
[email protected]

Muqdisho (Caasimada Online) – Warar dheeraad ah ayaa kasoo baxaya dhalinyaro Soomaaliyeed afduub ay u geysteen markab siday Saliid oo laga lahaa dalka Imaaraatka Carabta.

Walow warar kale ay sheegayaan in markabkaasi laga leeyahay dalka Jarmalka.

Wararka aan heleyno ayaa sheegaya in dhalinyaradaasi ay markabka geeyeen degmada Caluula ee gobolka Bari, waxaana la sheegayaa in dhalinyarada ay ahaayeen kuwo kaluumeysato ah.

Xaraare Axmed Maxamuud oo kamid ah dadka deegaanka degmada Caluula ayaa sheegay in dhalinayarada ay ku qasbanaadeen inay afduubkaasi geystaan kadib markii kaluumeysigoodii la hor istaagay.

Wuxuu sheegay in dad badan oo badda ka kaluumeysan jiray inay waxyeelo kala kulmeen maraakiibta dagaalka ee ilaalinaya xeebaha dalka Soomaaliya.

Wuxuu sheegay in dhalinyaro badan ay markabka ku xoomeen ayna doonayaan inay gorgortan ka galaan sii deynta markabkaasi.

Ilo-wareedyada ayaa sheegaya in ugu yaraan 8 qof ay ku lug-leeyihiin howlgalka afduubka markabkan.

Waxaa xusid mudan in Howl-gallada burcad badeedka ee afduubka maraakiibta ee xeebaha Somalia ayaa ahaayeen kuwa sii yaraaday saddexdii sano ee la soo dhaafay.

Caasimada Online
Xafiiska Muqdisho
[email protected]

Muqdisho (Caasimada Online) – Ra’isul wasaaraha Xukuumada Somalia Xasan Cali Kheyre ayaa lagu wadaa in gudaha Asbuucaani uu magacaabo Xubnaha Golaha Wasiiradiisa.

Ra’isul wasaaraha ayaa la xaqiijiyay inuu soo dhameystiray diyaarinta Liiska xubnaha loo aqoonsaday inay kamid noqonayaan Golaha kuwaa oo la filaayo in la shaacin doono gudaha Asbuucaani.

Ilo ku dhow dhow Xafiiska Ra’isul wasaaraha ayaa Caasimada Online u xaqiijiyay in Ra’isul wasaaraha uu Beelaha qaar tusay shaxda Golaha Wasiirada.

Caasimada Online oo u kuurgashay wax ka ogaanshiyaha Shaxda ayaa waxaa u suuragashay inay waxbadan ka ogaato Shaxda.

Inkastoo Shaxda ay tahay mid isbedeli karta ayaa waxaa hadana loo dhigay sida tan:

Beesha Hawiye

1-Wasiirka Ganacsiga iyo Warshadaha ahna RW ku xigeen
Maxamed Abuukar Islow Ducaale ( Abgaal , Harti , Obokar )

2-Wasiirka Qorsheynta iyo Iskaashiga Caalamiga C/raxmaan Awsaciid ( Xawadle )

3-Wasiirka Arrimaha Gudaha iyo Federaalka C/xakiin Macallin Axmed ( Habargidir , Ceyr )

4-Wsiirka Dib u heshiisiinta iyo Jaaliyadaha Eng C/qaadir (Gaaljecel)

5-Wasiirka Dhalinyarada iyo Isboortiga Khaliif Cabdi Cumar ( Gugundhabe Baadicadde )

6-Waziirka Amniga Gudaha
C/raxmaan Dheere (Shiikhaal Qudub)

Beesha Daarod

1-Wasiirka Cadaaladda Cabdi Faarax Juxa ( Majeerteen , Ciise Maxmuud)

2-Wasiirka Gaadiidka iyo Duulista Hawada Maxamed Jaamac Mursal Geelle ( Ogaden , Cawlyahan)

3-Wasiirka Boostada iyo Isgaarsiinta Jaamac Ceeydid ( Dhulbahante)

4-Wasiirka Dalxiiska iyo Duurjoogta Zakariye Maxamuud Xaaji Cabdi ( Leelkase )

5-Wasiirka Gaashaandhigga C/laahi Axmed Jaamac Ilkajiir (Warsangeli )

6-Wasiirka Awqaafta iyo Artimaha Diiinta C/raxmaan Cabdulle (Awrtable)

Beesha Dir

1-Wasiirka Deegaanka iyo Maareynta Aafooyinka Maxamuud cabdi Xayir Maareeye ( Isaaq Habar Jeclo)

2-Wasiirka Warfaafinta Saalax Axmed Jaamac ( Isaaq , Habar Yoonis )

3-Wasiirka Maaliyadda C/raxmaan Beyle ( Godo-Biirse)

4-Wasiirka Hiddaha iyo Tacliinta Sare Drs Deeqo Yaasiin( Dir , Surre)

5-Wasiirka Xanaanada Xoolaha Sheekh Nuur ( Dir , Biimaal)

6-Wasiirka Dekedaha iyo Gaadiidka Badda Maxamed Cali Xagaa (Dir Ciise)

Beesha Digil & Mirifle

1-Wasiirka Arrimaha Dibadda Maxamed Adaan Fargeeti (Mirifle Disoow)

2-Wasiirka Caafimaadka Maxamed xaaji C/nuur Madeer ( Mirifle / Hadame )

3-Wasiirka Hub ka dhigista iyo Dhaqancelinta C/fitaax Geesey ( Mirifle / Liisaan)

4-Wasiirka Biyaha iyo Korontada Cabaas Siraaj (Mirifle Hubeer)

5-Wasiirka Beeeraha C/xakiin Xaaji Faqi ( Digil / Dabare)

6-Wasiirka Dastuurka Cali Siciid Fiqi ( Digil / Tunni )

Beesha Shanaad

1-Wasiirka Kaluumeysiga iyo Kheyraadka Badda C/rashiid Siraaji ( Kulmis Reer Aw-Xasan )

2-Wasiirka Batroolka iyo Macdanta Siciid Xusen Ciid ( Carab-Salax)

3-Wasiirka Haweenka iyo Xuquuqda Aadanaha Khadiija Maxamed Diiriye (Yaxar)

4-Wasiirka Howlaha Guud iyo Dib Udhiska C/rashiid Maxamed (Banaadiri)

5-Wasiirka Waxbarasha Maryan Qaasim (Kulmis)

6-Wasiirka Shaqada iyo Shaqaalaha Maryan Aweys ( Jareerweyne)

Caasimada Online
Xafiiska Muqdisho
[email protected]

Muqdisho (Caasimada Online) – Madaxweynaha Soomaaliya Maxamed Cabdullaahi Farmaajo ayaa durba muujiyey hal arrin uu kaga duwan yahay madaxweynihii hore ee waqtigiisa dhamaaday Xasan Shiikh Maxauud.

Madaxweynaha Soomaaliya ayaa la sheegay inuu ka baaqday kulan xasaasi ay oo ay yeelanayaan madaxda dalalka loogu magacdaray Indian Ocean Rim Association (IORA) ee dhaca Badweynta India oo lagu wado in looga hadlo   Amniga Badweynta India.

Waxaa lagu wadaa inuu shirkaan bilawdo 5 March uuna dhamaado 7 March wuxuuna madaxweynaha sheegay inuusan kulankaas ka qeyb qaadan karin, waxaana madaxweynaha kulankaas u matali doono Maxamed Cumar Carte oo ah Ra’iisal wasaare ku xigeenka xilka sii haya.

Arrintaa ayaa muujineyso inuu madaxweynaha fulinayo ballanqaadkii uu horey u sameeyey ee ahaa inuusan u bixi doonin safari micno darro ah iyo sharar badan oo ka mashquulinayo shaqada uu dalka u qaban lahaa.

Dhanka kale waxaa laga war sugayaa go’aanka uu madaxweynaha ka qaadan doono casuumadda uu u sameeyey madaxweynaha Kenya I suu uga qeyb galo shirka ay madaxda Africa ku yeelan doonaan dhamaadka Bishaan magaalada Nairobi kaasoo looga hadli doono arrimaha xaqootiga Soomaaliya ee Kenya.

Tallabada uu madaxweynaha uga baaqday shirkaas ayaa muujineyso inuu si weyn uga duwan yahay madaxweynihii waqtigiisa dhamaaday Xasan Shiikh Maxamuud oo waqti badan ku bixiyey safaro dibadda ah oo micno darro ah.

Caasimada Online
Xafiiska Muqdisho
[email protected]

Muqdisho (Caasimada Online) – Askari ka tirsan Ciidamada Xoogga dalka ayaa Madaxweynaha Qaranka Maxamed C/llahi Farmaajo ka dalbaday lacago abaalmarin ah oo uu cadadkeeda ku sheegay $100,000 (Boqol kun oo doolar).

Askarigaani oo lagu magacaabo Deeq ayaa sheegay inuu fashiliyay weerarkii Qaraxii kadhacay warshadii hore ee Nanaca degmada wadajir ee gobolka Banaadir.

Halkan ka aqri faahfaahinta warkan.

Caasimada Online
Xafiiska Muqdisho
[email protected]

Afgooye (Caasimada Online) – Wararka aan ka heleyno degmada Afgooye ee gobolka Shabeelaha Hoose ayaa sheegaya in weerar uu ka dhacay degmadaasi.

Weerarka ayaa lala eegtay goob ganacsi uu lahaa wiil uu dhalay guddoomiyihii hore ee degmada Afgooye Cabdulaahi Cali Iideey, waxaana la sheegayaa in la afduubtay wiilkaasi.

Weerarkaasi ayaa ka dhacay degmada Afgooye, waxaana la sheegay in ku dhawaad shan ruux ay ku dhaawacmeen weerarka ka dhacay degmada Afgooye.

Waxaa wararka ay sheegayaan in kooxaha hubeysan oo watay gaari nooca raaxada ah ay afduubteen wiilka uu dhalay guddoomiyihii degmada Afgooye.

Illaa Hadda ayaa lagu waramayaa in la la’yahay wiilkii goobta ganacsi ee la weeraray nolol iyo geeri midna.

Waqtiyadii ugu dambeeyey ayaa waxaa soo badanayey weerarada joogtada ah ee lagu qadayo xarumaha maamulka ee ku yaalla gudaha degmada Afgooye ee Gobolka Shabeelaha hoose,waxaana sidoo kale barbar socotay arintaa dilalka iyo dhaca ddka rayidka ah ee magaalada Ku nool.

Caasimada Online
Xafiiska Muqdisho
[email protected]

Muqdisho (Caasimada Online) – Madaxweynaha JFS Maxamed C/llahi Farmaajo ayaa dhawaan shaaca ka qaaday in Dowladiisu ay xooga saari doonto Amniga dalka, gaar ahaan kan magaalada Muqdisho.

Madaxweynaha waxa uu tilmaamay in Amniga uu ku bixin doono dhaqaalaha ugu badan, isla markaana uusan ka aamusi doonin in Hay’adaha amaanka ay dayacaan Amniga.

Magaalada Muqdisho, ayaa tan iyo markii la doortay Madaxweyne Farmaajo marti galineysay Qaraxyo iyo dilal lala eeganaayo Shaqaalaha Dowlada iyo dadka shacabka ah.

Qaraxyada ayaa isugu jira kuwo ismiidaamin ah, kuwo lagu xiro gaadiidka shaqaalaha Dowlada iyo kuwa lagu weeraro goobaha Ciidamada ay ku sugan yihiin.

Qaraxyada ayaa waxaa ka badan dilalka loo geysanaayo Shaqaalaha Dowlada, Odayaasha iyo Shacabka maatida ah, waxa ayna musiibooyinkaani muujinayaan in Hay’adaha amaanka Dowlada ay dayaceen wax ka qabashada amniga magaalada Muqdisho.

Shacabka Magaalada Muqdisho ayaa bilowgii Doorashada Somalia ee uu kusoo baxay Madaxweyne Farmaajo muujiyay taageero xad dhaaf ah, iyagoo Farmaajo ku amaanay hal ku dhigyada Amniga iyo Cadaalada waxaana iminka muuqaneysa in isbedel uu ku imaan doono Taageerada Farmaajo, haddii aan wax laga bedelin Amni darida ka taagan dalka, gaar ahaan Magaalada Muqdisho.

Waxyaabaha ay shacabka ku taageeren Madaxweynaha ayaa waxaa kamid ahaa isbedelka Amniga, Cadaalada iyo dib usoo celinta Horumarka, waxaana haddalka iyo ballanqaadka Madaxweynaha kadib ay magaalada Muqdisho marti galisay amni darro heerkii ugu sareeyay.

Madaxweyne Farmaajo ayaa laga yaabaa in Shacabka Muqdisho uu kala kulmo kalsooni darro maadaama Dowladiisu aysan wali qaadin talaabo lagu xoojinaayo amniga magaalada Muqdisho.

Dhaliisha ugu badan ee Amni darrida ayaa dusha looga tuuray Taliyayaasha Hay’adaha amaanka oo qaarkood aan kawarqabin waxyaabaha ka dhacaaya dalka.

Si kastaba ha ahaatee, Dowlada Somalia ee uu Hogaaminaayo Madaxweyne Farmaajo ayaa looga fadhiyaa inay la imaado isbedel dhanka Amniga.

Caasimada Online
Xafiiska Muqdisho
[email protected]

Muqdisho (Caasimada Online) – Dowladda Britain oo kamid ah Dowladaha taageera Somalia ayaa shaaca ka qaaday in Dowlada Somalia ay ugu deeqi doonto lacago lagu taageeraayo Gurmadka Abaaraha.

Dowlada Britain ayaa sheegtay in lacag dhan 16 millin oo Giniga Istarliinka ku maalgelinayso dhowrka bilood ee soo socda Barnaamijka looga hortegayo Macluusha Somalia.

Warbixin lagu soo daabacay Websaytka Golaha Qaxootiga Norway NRC, ayaa lagu sheegay in lacagtaasi ay khaas u tahay dadka ay daashatay Abaaraha, waxaana lagu sheegay in gurmadka Britain uusan intaa ku ekaan doonin.

Waxaa lagu sheegay warbixinta in Kharajkaasi lagu taageeri doono in ka badan 450,000 oo qof oo naf-badbaadin ah, waxa ayna Britain sheegtay in Dowladaha Caalamka looga baahan yahay inay qeyb ka noqdaan Gurmadka.

Dowlada Britain ayaa tilmaantay in Macluusha ka jirta africa ay saameynta ugu badan ku yeelaneyso Somalia oo aan ilaa iyo hadda helin gurmad heerkii la filaayay.

Sidoo kale, warbixinta ayaa lagu sheegay in sida ugu dhaqsaha badan Lacagta dhan 16-ka million ee Gini loogu wareejin doono 7 Hay’addo Aan Dowli ahayn (NGO), kuwaasi oo koox ahaan uga dhex shaqeeya gudaha Somalia.

Geesta kale, Dowlada Britain ayaa mar kale ku celisay inay hor boodi doonto Dowladaha ka qeybqaadanaaya Gurmadka Abaaraha Somalia.

Caasimada Online
Xafiiska Muqdisho
[email protected]

Nairobi (Caasimada Online) – Dowladda Kenya ayaa markii ugu horreysay ka hadashay sababta ka dambeyso inay joojiso dhismihii ay ka waday safaaradeeda Magaalada Muqdisho oo uu hakid ku yimid.

Amina Maxamed oo ah Wasiirka arimaha dibada dalka Kenya ayaa baarlamaanka dalka Kenya ka hor sheegtay in dhismihii safaaradda Kenya ee Muqdisho loo joojiyey sababo xagga amaanka ah markii ay sheegtay inay Muqdisho kusoo bateyn dilalka iyo qaraxyada.

Wasiirka oo warbixin siineysay Guddiiga Difaaca iyo arrimaha Dibadda ee Baaralmaanka Kenya ayaa ka dhawaajiyey inuu istaagay mashruucaan lasoo bilaabay sanadkii 2015 iyadoo la filayey in lasoo gabagabeeyo sanadkii dhamaaday 2016 .

Amina oo ka hadleysay arrintaan ayaa sheegtay inay hakiyeen dhismaha safaaradooda kadib marki ay soo bateen arrimaha ka dhanka ah amaanka Muqdisho iyadoo ku nuux nuuxsatay in shaqadaas ay mareyso meel fiican.

“ Waxaa hakad ku yimaaday dhismaha safaarada Kenya ee Muqdisho kadib markii ay soo kordheen dhibaatada xagga amaanka ah ee Caasimadda Soomaaliya, balse waxaan idiin xaqiijinayaa in shaqadaas la qabtay 35% oo ah meel wanaagsan oo lasii wadi karo marka ay fursada saamaxdo” ayey Amina ka hor tiri guddigaas.

Dowladda Kenya ayaa sanadkii 2014 ku dhawaaqday inay wanaajin doonto xiriirka kala dhaxeeyo Soomaaliya iyadoo markaasna sheegtay inay halkaan ka furan doonaan safaarad maadaama ay markii hore si kumeel gaar ah ugu shaqeyn jirtay Nairobi.

Dowlado badan ayaa ku dhiiraday inay Muqidisho ka furtaan safaarado inkastoo badankood ay dhex dagan yihiin xarunta ay AMISOM ku xoogan tahay ee Xalane.

Hadalka ay Kenya ka dhawaajisay ayaa kusoo aadayo xilli uu dalka la wareegay Maxamed Cabdulaahi Farmaajo

Caasimada Online
Xafiiska Nairobi
[email protected]

Muqdisho (Caasimada Online)-Qaraxyo culus ayaa waxaa Caawa laga maqlayaa qeybo kamid ah Magaalada Muqdisho waxaana lasoo sheegayaa in Qaraxyadaasi loo adeegsanaayo Bam gacmeedyo.

Maleeshiyaad hubeysnaa ayaa goordhow oo Caawa ah Bam gacmeedyo ku weeraray Ciidamo ka tirsan Dowlada oo ku sugnaa isgooyska jid mareexaan ee magaalada Muqdisho.

Ciidamadaani ayaa rasaas ooda ka qaaday Qaraxa kadib waxaana la soo warinayaa in lagu tuuray Bam gacmeedyo uu ka dhashay Khasaaro kala duwan.

Goobjoogayaal ayaa sheegay in Bamka ay tuureen Laba ruux oo Dhalinyaro ah kuwaa oo Qaraxa kadib ka baxsaday goobta, sida laga soo xigtay goobjoogayaasha.

Qarax kale oo loo adeegsaday Bam gacmeed ayaa sidoo kale ka dhacay isla magaalada Muqdisho, inkastoo aan si rasmi ah loo xaqiijin halka lagu weeraray.

Qaraxyada loo adeegsaday Bam gacmeedyada ayaa laga wada maqlay inta badan Degmooyinka magaalada Muqdisho.

Qaraxyadaani ayaa barbar socda laba Qarax oo maanta ka dhacay magaalada Muqdisho.

Caasimada Online
Xafiiska Muqdisho
[email protected]

Muqdisho (Caasimada Online)- Waxaa soo baxayo xog ku saabsan takri fal iyo xadgudub hanta qaran oo ka jiro maamulka Gobolka Banaadir, iydoo madaxda ugu sarreyso lagu eedeeyey inay ka gaabiyeen la xisaabtanka guddoomiyayaaaha degmooyinka.

Caasimadda Online ayaa heshay warar lagu kalsoon karo oo muujinayo in la isla xisaabtan la’aanta ka jirto maamulka Gobolka Banaadir ay sababtay in lagu xadgudbo hantida qaranka kadib markii ay soo baxday arrin sheegeyso in shidaalka loogu talagalay shaqalaha Gobolka Banaadir lagu kala iibsado suuqayada Magaalada Muqdisho.

Mid kamid ah guddoomiye waaxyeedyada Gobolka Banaadir oo naga codsaday inaan magaciisa soo bndhigin ayaa caasimadda Online uga waramay arrin xasaasi ah oo ku aadan arrintaas isagoo xusay in qaar kamid ah guddoomiye waaxeedyada Gobolka Banaadir ay shidaalkii shaqada loogu talagalay ay u iib geeyaan meelaha shidaalka lagu kala iibsado ee suuqayada Muqdisho.

Waxaa la sheegay in shaqsiyaad ka tirsan keydka shidaalka ee Maamulka Gobolka Banaadir inay heshiis ganacsi la galeyn ku dhawaad lix kaalin shidaal oo ku taal Muqdisho waxaana mar kasta si hoose loo geeyaa shidaalkii loogu talagalay inuu ku shaqeeyo Maamulka Gobolka Banaadir.

Shidaalka ayaa lagu suuq geeyaa qiimo aad uga jaban mid ay ganacsatada kusoo iibsato, waana shidaalki loogu talagalay inay mas’uuliyiinta ugu adeegaan shacabka Muqdisho iyo degmooyinka kala duwan.

Shidaalka la iibiyo ayaa xilliyada habeenkii ah lagu qaadaa caagago waaweyn oo kuwa shidaalka loogu talagalay ah sida ay Caasimadda xogta ku heshay.

Fadeexaadaan soo baxday ayaa kusoo aadeyso xilli uu shaki ku jiro xilka Guddoomiyaha Gobolka Banaadir Boorsaani oo la filayo in dhawaan xilkaas laga qaado loona dhiibo shaqsi kale oo ay saaxiibo yihiin Maxamed Cabdulaahi Farmaajo.

Caasimada Online
Xafiiska Muqdisho
[email protected]

Kismaayo (Caasimada Online)-War goordhow nasoo gaaray ayaa sheegaya in Qarax xoogan uu ka dhacay magaalada Kismaayo ee xarunta maamulka Jubbaland, gaar ahaan Xaafada Xaafada Farjano.

Qaraxa ayaa la sheegayaa inuu fuliyay ruux isku soo xiray walxaha Qarxa kaa oo kamid ahaa dadka deegaanka.

Ruuxaani isa soo miidaamiyay ayaa la sheegay inuu ku dhex qarxay goob ay ku sugnaayen dad shacab ah, sida laga soo xigtay dad Goobjoogayaal ah.

Qaraxa kadib ayaa waxaa goobta gaaray Ciidanka ammaanka Maamulka Jubbaland waxa ayna halkaa ku xireen dhowr qof oo la sheegay inay ku cusbaayen Xaafadda.

Ciidamada ayaa iminka wada baaritaan xoogan waxaana la sheegayaa in dadka ku dhaawacmay Qaraxa la geeyay isbitaalka weyn ee magaalada Kismaayo.

ma jirto cid wax ku noqotay oo lasoo sheegay ilaa hadda marka laga reebo qof uu ku qarxay Gaariga la aaminsan yahay inuu ujeedkiisa ahaa inuu meel kale isku qarxiyo

Qaraxaani ismiidaaminta ah ayaa kusoo beegmaaya xili maanta 2 Qarax oo loo adeegsaday gawaari ka dhaceen Magaalada Muqdisho.

Caasimadda Online ayaa heshay sawirka ninkii isku qarxiyey gaariga

Caasimada Online
Xafiiska Kismaayo
[email protected]

Muqdisho (Caasimada Online)-Ra’isul wasaaraha Xukuumadda Federaalka ah ee Somalia Xasan Cali Kheyre, ayaa maanta kormeer howlleed ku tagey xarunta isku xirka Gurmadka Abaaraha u qaabilsan QM.

Ra’isul wasaaraha ayaa markii uu gaaray xarunta warbixino ka dhageystay qaar ka mid ah Hay’addaha gacanta ku haya xog uruurinta xaaladihii ugu danbeeyey ee Abaaraha ka jira Gobolada dalka.

Dhageysiga kadib waxa uu Ra’isul wasaaraha maamulka xarunta Hay’addaha Qaramada Midoobey kala hadlay in la mideeyo isla markaana la isku dheeli tiro habka gargaarka loo gaarsiinayo deegaanada ay saameeyen abaaruhu, lana wadaago macluumaadka ku saabsan meelaha ugu daran ee u baahan gargaarka degdegga ah, gaar ahaan dawladda iyo QM.

Ra’isul wasaaraha waxa uu guddiga xusuusiyay in deegaanada ay ka jiraan abaaraha ay kala daran yihiin balse waxa uu soo jeediyay in si siman loo gaarsiiyo dadkaasi gurmadka.

Intaa kadib waxa uu Ra’isul wasaaraha kulan gaara la qaatay Ergayga gaarka ah ee Xoghayaha guud ee QM u qaabilsan Somalia Michael Keating, waxayna isla soo qaadeen sidii QM ay gurmadku degdeg ugu gaari lahaa goobaha ay sida daran u saameysay Abaartu.

Waxaa bishii la soo dhaafay aad u kordhay weerarrada iyo dilalka qorsheysan ee ka dhacaya magaalada Muqdisho marka la bar bar-bar dhigo January iyo doorashada madaxweyne Farmaajo ka hor, dhimashada waxaa ay korortay illaa 28.5% halka dhaawacana uu sare u kacay illaa 38.8%.

January 2017-ka, dhacdooyinkii ugu waaweynaa ee dhacay waxaan ka xusi karnaa: qarax ka dhacay bar kontorool oo u dhaw saldhigga AMISOM ee Xalane iyo Hotel Peace oo 10 ka badan ku dhinteen, qarax ka dhacay maqaahi ku taallo Tarabuunka oo 3 ku dhinteen iyo mid kale oo ka dhacay Hotel Dayax oo 28 ku dhinteen 51-na ku dhaawacmeen, inta kale

January, guud ahaan dadka Muqdisho lagu dilay waxaa ay gaarayeen 60 qof halka dhaawacana uu ahaa 57 qof, tiradan waxaa ay ka yar tahay wixii dhacay doorashada madaxweynaha.

Bishii January dadka la dilay waxaa ay u badnaayeen shacab ku geeriyooday qaraxyo, ma jirin hal Oday dhaqameed la dilay, NISA iyo hey’adaha ammaanka waxaa laga dilay 4 qof.

Bishii February, gaar ahaan doorashada madaxweyne madaxweyne Maxamed Cabdullahi Farmaajo kadib, waxaa kordhay qaraxyada iyo dilalka tooska ah, tusaale ahaan, doorashada Farmaajo kadib waxaa Muqdisho lagu dilay in ka badan 84 qof halka lagu dhaawacay in ka badan 78 qof.

Muddadaas bisha ah,  in ka badan 38 qof waxaa lagu dilay qaab qorsheysan oo toos ayaa loo toogtay, waxaa kordhay dilka loo geystay oday dhaqameedka, oo in ka badan 5 oday dhaqameed ayaa hal bil gudaheed la dilay, waxaa intaa dheer saraakiil ka tirsan ciimada nabad-sugidda.

February 2017-kii,  wixii ka dambeeyay, waxaa dhacay dhowr qaraxo oo uu ku jiro Qarax ka dhacay Kaawo-godey oo ay ku dhinteen in ka bada 30 qof iyo qaraxyo kale oo kuwa maanta ugu dambeeyeen,  guud ahaan tirada shacabka ka dhimatay waa 67 qof

Si ka duwan January, bishii la soo dhaafay, waxaa la dilay illaa shan(5) Oday-dhaqameed, waxaa ka mid ahaa:  Nabadoon Bashiir Maxamed Cali (Xagaley), Nabadoon Muuse Maxamuud Rooble (Muuse Ilka-weyne), Nabadoon Cabdi Cumar Ibraahim iyo nabadoonno kal, waxaa kaloo la dhaawacay labo oday dhaqameed, Odoyaashan waxaa ay qeyb ka ahaayeen doorashadii dalka ka dhacday 5-tii bil ee la soo dhaafay.

Bishii tagtay, waxaa sidoo kale aad loo dilay ciidanka nabad sugidda ee dowladda illaa 12 qof ayaa ka dhimatay, inta badan waxaa ay ahaayeen dilal toos ah iyo qaraxyo gawaari.

Xilligan kala guurka ah, waxaa muuqata in ammaanka magaalada Muqdisho uu faraha ka baxay, dowladda waxaa ay leedahay ciidamo jooga magaalada min laan iyo gobolka Banaadir guud ahaan kuwaas oo isugu jira Booliis, Nabad Sugid iyo Militari, waxaa la sheegaa in xukuumaddii Cumar Cabdirashid ay aheyd in weli shaqeyso, sidaas ay tahay dilalka iyo qaraxyada waa ka soo dareen.

Dalka waxaa uu ku jiraa xilli kala guud ah iyo marnaan xagga siyaasadda ah, waxaa lagu mashquulsan yahay dhismaha xukuumad, isla xisaatanka ayaa aad u yar, su’aasha mar walbo jawaab u baahan waa: Aaway maamulka amnigii caasimadda? Maxaase isku xiray kala guurka xukuumadaha iyo amniga?  Yaase lagula xisaabtamaa?

Caasimada Online
Xafiiska Muqdisho
[email protected]

Muqdisho (Caasimada Online)-Warar dheeraad ah ayaa kasoo baxay oday 90 sano jir ah oo kooxo hubeysan ay ku dileen degmada Dharkeynley ee gobolka Banaadir.

Dilka ayaa ka dambeeyay kadib markii kooxo hubeysan ay bastoolado la dhaceen odayga 90 jirka ah ee ku sugnaa degmada Dharkeynley ee gobolka Banaadir.

Waxaa odayga lagu magacaabayay Maxamed Axmed Saacid, waxaana kooxaha dilka geystay ay ka baxsadeen goobta ay falka dilka ka geysteen.

Waa dil ay aad uga yaabeen dhamaan dadka ku dhaqan degmada Dharkeylay ee gobolka Banaadir iyo guud ahaan caasimada Soomaaliya, maadaama odayga uu ahaa ruux da’ ah.

Muddooyinkii ugu dambeeyay waxaa magaalada Muqdisho kusoo kordhayay dilalka qorsheysan ee loo geysanayo dadka ku sugan magaalada ee wax kasoo dhisay maamul goboleedyada.

Maanta oo kaliya waxaa magaalada ka dhacay labo qarax, iyadoo shalay qarax lagu dhaawacay wariye ka tirsanaa TV Univeysal.

Caasimada Online
Xafiiska Muqdisho
[email protected]

Muqdisho (Caasimada Online) – Dhismooyin gaagaaban oo laga dhisay xeyndaabka taliska AMISOM ee Xalane ayaa waxaa loogu magac daray Chelsea Village, taasoo ay degan yihiin shaqaalaha reer galbeedka iyo sirdoonkooda ee u jooga Somalia arrimo aan laga war cabin.

Xaafadda Chelsea ayaa guryaha ka dhisan ay yihiin kuwo gaagaaban oo laga sameeyay kunteenaro iyo alwaax, lehna adeeg walba, waxaana habeenkii lagu jiiftaa lacag ka badan $300.

https://www.youtube.com/watch?v=qPKdZrl_pm8

Sida lagu galo ayaa adag Chelsea Village, loomana ogola in ay galaan dadka Soomaalida xitaa mas’uuliyiinta dowladda Soomaaliya.

Shirked caddaan ay leeyihiin ayaa mashruucaan ka hirgelisay gudaha xarunta AMISOM, waxaana suuragal ah in madaxda shacabka Soomaaliyeed madasha inaysan ka war qabin howsha ka socota Chelsea Village.

Caasimada Online
Xafiiska Muqdisho
[email protected]

Muqdisho (Caasimada Online)-Weerar ismiidaamin ah ayaa ka dhacay afafka hore ee Hotel Wehliye ee magaalada Muqdisho xili boqolaal ruux ay ku sugnaayen maqaayado iyo goobo lagu shaaho oo ku dhagan Hoteelka.

Goob joogayaal ayaa sheegay in gaariga walxaha qarxa laga soo buuxiyay oo uu waday wiil dhalinyaro ah ka imaaday waddo yar oo dhawaan laga sameeyay dhinaca Hoteelka, waxa ayna xaqiijiyeen in Gaariga ismiidaaminta lagu fuliyay uu ahaa nooca raaxada oo loo yaqaan Kaarib.

Gaariga oo ka imaaday dhanka Degmada Waaberi, ayaa la sheegay in qasdiga wadaha uu ahaa inuu ku jaro Hoteelka, hayeeshee uusan gaarin halkii uu qorshihiisa ahaa.

Goobjoogayaasha ayaa sheegay in wadaha gaariga ee ismiidaaminta fuliyay ay da’diisa u dhexeysay 20 ilaa 28 sano jir, waxa ayna intaa ku dareen in wiil dhalinyaro ah uu goobta Qaraxa ku dajiyay ka hor inta aysan dhicin ismiidaaminta.

Ciidamada amaanka ayaa Qaraxa kadib goobta ku qabtay nin da’diisa lagu qiyaasay 30 ilaa 40 kaa oo looga shakiyay inuu hagaayay wadaha gaariga ee ismiidaaminta fuliyay.

Ismiidaaminta ayaa waxaa ku dhintay dad gaaraya ilaa 11 ruux oo shacab ah, waxaa sidoo kale ku dhaawacmay dad kale oo tiradooda lagu sheegay 14 ruux oo ay ku jiraan ilaalada Wasiirka Kaluumeysiga.

Ciidamada amaanka gaar ahaan kuwa Nabad sugida oo qaraxa kadib gaaray Hotelka Wehliye ayaa gurmad u fidiyay dadkii waxyeelada uu kasoo gaaray qaraxa, waxa ay sidoo kale ciidamada xireen dad la tuhmayo.

Waxa uu noqonayaa kii labaad ee maanta kaliya ka dhaca Muqdisho, waxaa saakay sidoo kale qarax ismiidaamin ah uu ka dhacay meel ku dhaw warshada Nac naca oo ah xero ay degan yihiin ciidanka Milatariga Soomaaliya.