Muqdisho (Caasimada Online) – Maxkamadda Ciidamada Qalabka Sida ayaa manta la hor geeyey askari xabad ku dhiftay Taliyihiisii, xilli lagu sugnaa furimaha dagaalka, kiiskaan ayaa ka mid noqday kiisaskii ugu cajiibsanaa ee maxkamadda ku soo dhamaada.

Askarigaan wuxuu afka xabad uga dhuftay taliyihiisii, xilli ciidanku u uku sugnaa degmada Maxaas ee gobolka Hiiraa, intaas kadib waxaa loo qaaday Guriceel, si loo maxkamadeeyo.

Intii ay socotay howsha maxkamadeynta wuxuu askarigaani ka baxsaday xabsiga, wuxuu soo galay Muqdisho, kadibna wuxuu degay Tabeelaha Sheekh Ibraahim.

Xeer ilaalinta maxkamadda ciidamada, ehellada taliyihii la dhaawacay iyo dhinacyo kale oo kiiskaan ku lug lahaa waxay isku dayeen inay soo qabtaan askarigaas, waxaana loo maleegay dabin uu markii dambe ku soo dhacay.

“Waxaan helnay lambarkiisa, waxaan siinay gabar si ay haasaawe ama shukaansi ula sameyso, kadibna u soo gacan gelisok, wuxuu gabadhii ka aqbalay xiriirka, kadib wuxuu ka codsaday inay ugu timaado xaafadiisa Tabeelaha, balse waa ay ka diiday waxayna ku balamisay xeebta Liido, halkaas ayaa loogu diyaariyey ciidankii qaban lahaa, oo ku guuleystay inay soo qabtaan,” ayuu yiri xeer ilaaliyihii dacwadda ku soo oogay askarigaan.

Sidoo kale Xeer ilaalinta ayaa ku jees jeestay sida fudud ee askarigaan uu ku soo gacan galay, iyadoo la soo baray xeeladahaan oo kale, waqti iyo dhaqaale badana ay tababarkiisa gelisay dowladda Soomaaliya.

Xeer ilaalinta ayaa maxkamadda ka codsatay in askarigaan labo arrin lagu xukumo, 1-inuu bixiyo dhiiga taliyihii uu xabadda ku dhuftay ee dhaawaca daran uu soo gaaray, 2-Iyo in lagu xukumo xabsi adag, si ay ugu quus qaataan askarta kale.

Xabadda uu askarigaan ku dhuftay taliyihiisa waxay ka dhalatay muran dhanka shaqada ah oo dhex-maray kadibna askariga ayaa taliyihiisa ugu hanjabay inuu baxad ku dhufa doono, murankii oo sii dheeraaday ayaa sababay in askarigii uu afka xabad u dhafto taliyaha.

Ilkihii iyo lafihii ka faniinay afka taliyaha ayaa ku dhacay nin kale oo askari ahaa, kaas oo marqaati ahaan manta loo horkeenay maxkamadda ciidamada, ugu dambeyntii guddoomiyaha maxkamadda Xasan Cali Nuur Shuute ayaa sheegay in go’aan laga soo gaari doono kiiskaan.

Hoos ka daawo

Dhuusamareeb (Caasimada Online) – Madaxweynaha dowlad-goboleedka Galmudug Axmed Qoor-Qoor oo shalay heshiis bilow u ah gogol nabadeed dhex dhigay beelihii colaadda dadka badan lagu laayey ay ku dhex-martay waqooyiga gobolka Galgaduud, ayaa shaaciyay in la hayo xogta dadkii ka dambeeyay hurinta dagaalka.

Qoor-Qoor ayaa waxa uu sheegay in uusan iska dhicin dagaalka labada beelood ee uu ahaa mid ay ka dambeeyeen siyaasiyiin ka dhex raadinayay dano siyaasadeed, islamarkaana ay hay’addaha ammaanka hayaan caddeymaha dadkii ka shaqeeyay arrinkaasi, lana soo bandhigi doono.

“Waxa dhacay waan isla ognahay oo wax baa la wada fahmayaa oo wax iska dhacay keliya ma ahanee, wax laga shaqeynayay oo fursad laga dhex raadinayo oo dano siyaasadeed laga leeyahay oo aan ka soo baxeynin meesha ayay aheyd,” ayuu yiri Qoor-Qoor.

Waxa uu intaas kusii daray “Waxyaabaha dhacay hay’addaha baarista kuli waa hayaan, meelo badan oo waxyaabaha dhacay kamid ah caddeyntooda ayaa la hayaa dadkii waxaas ka shaqeeyay, colaadda huriyay, xoolana ku bixiyay caddeyntooda waa la hayaa,”

Madaxweynaha Galmudug ayaa sidoo kale waxa uu sheegay in waqtiga ku habboon lasoo bandhigi doono dadka uu sheegay inay ka dambeeyeen hurinta colaadda ay ku baxeen dadka badan.

“Waxaa la soo bandhigi doonnaa waqtiga ku habboon, haddii Ilaahay yiraahdo. Hay’addaha amniga ayaa soo bandhigi doona, loogana hari maayo,” ayuu yiri Mudane Qoor-Qoor.

Hadalka madaxweyne Qoor-Qoor ayaa imaanaya, iyada oo deegaanada Galmudug ay ku soo laab-laabteen dagaal beeleedyada, oo kan ugu dambeeyay uu galaaftay nolosha ku dhowaad 100 qof oo labada dhinac ah, halka ay ku dhaawacmeen dad intaas ka badan.

Muqdisho (Caasimada Online) – Ciidamada xoogga dalka ayaa maanta soo bandhigay laba xubnood oo kasoo goostay kooxda Al-Shabaab, kuwaas oo usoo gacan galay dowladda.

Xubnahan ayaa waxaa kamid ahaa Cali Xasan Cali oo magaciisa afgarashada uu yahay (Cali Dheere), kaasi oo tirsanaa kooxda muddo dheer oo ku siman 12 sano.

Ninka kale ee Cali lala soo bandhigay ayaa isna waxaa lagu magacaaba Maxamed Cabdullaahi Cali, wuxuuna muddo kamid ahaa Shabaab-ka ku dhuumaalaysanaya deegaannada maamulka Koofur Galbeed.

Cali Xasan Cali ayaa kasoo qeyb-qaatay dagaalo badan oo kooxda ay gashay, halka Maxamed Cabdullaahi Cali uu isna kaga biiray Al-Shabaab deegaanka 20-jirow wuxuuna u qaabilsanaa baada shacabka ku nool gobolka Baay.

Labada nin ayaa waxaa hadda gacanta ku haya oo ay isku soo dhiibeen ciidanka xoogga dalka Soomaaliyeed, gaar ahaan qeybta 60-aad ee ku sugan deegaanka Goof-gaduud ee gobolka Baay.

Isa-soo dhiibista xubnahan ayaa qeyb ka ah Shabaab badan oo dhowrkii bilood ee la soo dhaafay u soo gacan galayey ciidamada dowladda, ayada oo bilihii dambe uu hoos u dhac ku yimid gulufkii dagaal ee kooxda ay wajaheysay.

Dowladda ayaa muddooyinkii dambe soo bandhigaysay xubno ka tirsanaa kooxda oo isku soo dhiibayay, kuwaasi oo inta badan sheega in lagu qalday fikrad Diimeed ay salkeeda soo taabteen in aysan waxba ka jirin iyo inay u adkeysan waayeen gulufka ay kooxda wajaheyso.

Muqdisho (Caasimada Online) – Xildhibaan Cabdiraxmaan Cabdishakuur Warsame oo ka jawaabay wareysi uu bixiyay Sheekh Cali Wajiis oo uu kaga hadlay arrinta qabuuraha Iskuul Buluusiya, ayaa wuxuu sheegay inuu galay laba dambi oo waaweyn.

Cabdiraxmaan ayaa marka hore waxa uu Injineer Yariisow ka difaacay Cali Wajiis oo isagu sheegay inuu dalbaday xilligii uu guddoomiyaha gobolka Banaadir ahaa in la faago qabuuraha Iskuul Buluusiya, lagana saaro maydadka.

“Hadda Sheekh Cali Wajiis markii uu dadkii noolaa kula dhici waayey ayuu Allaha u naxariiste saaxiibkeey Eng C/raxmaan Cumar Cismaan Yariisow u saariyey isku day eed qabuuro faagis ah,” ayuu Cabdiraxmaan Cabdishakuur ku yiri qoraal uu soo saaray maanta.

Sheekh Cali Wajiis ayaa sheegay in guddoomiyihii gobolka Injineer Yariisow uu lahaa soo jeedinta in qabuurahaas lasoo fago oo laga saaro dhulkaas, balse ay ka diideen, maadaama la sii rabay shakhsiyaad gaar ah, taasi oo maanta uu ka difaacay Xildhibaan Cabdiraxmaan Cabdishakuur.

Cabdiraxmaan Cabdishakuur ayaa waxa uu yiri “Labo danbi ayuu Sheekh Cali mowtada ka galay, markii uu fatwooday in uu qabuuraha la faago iyo markii uu nin geeriyooday oo ay argagexiso dishay eed uusan iska difaaci karin dusha ka saaray.”

Hoos ka aqriso qoraalka Cabdiraxmaan Cabdishakuur

Waagii aan Naxwaha baran jirnay ayaa kitaabka Alfiyatu Ibnu Maalik, waxay culimada ka sheegi jireen in Sheekha markuu alifayey ee uu marayo tuducda فائقة الفية إبن المعطي “Way ka sarraysaa Alfiyadi Ibnu Mucdhi” ayey ka istaagtay. Ibnu Mucdhi wuxuu ahaa Sheekh hortii geeriyooday oo Kitaab Naxwaxaha alifay.

Ibnu Maalik ayaa riyada ku arkay Ibnu Mucdhi, kolkaa buu ku yiri; Ibni Maalik waan ogahay in ay kaa istaagtay Alfiyadii ee anigaa kuu furayee, waxaa tiraa والحي يغلب الف ميت “oo ah ruux nool kun dhimatay wuu ka adagyahay” taaoo uu ula jeedo, haddii aan noolaan lahaa sidaa ima tiraahdeen.

Halkaa markii ay taagan tahay, ayuu Ibnu Maalik xishooday kolkaasuu dhowrkan tuduc raaciyey tii hore ee ahayd فائقة الفية ابن المعطي

و هو بسبق حائز تفضيلا
مستوجب ثنائي الجميلا
و اللّه يقضي بهبات وافره‌
لي و له في درجات الآخره‌

“Fadli uu iiga horeeyey ayuu koobsaday
Wuxuuna mutay amaantayda
Ilaaheey hibo buuxda ha u qadaro
Aniga iyo isagaba, daroojiyinka sare ee Janada”

Hadda Sheekh Cali Wajiis markii uu dadkii noolaa kula dhici waayey ayuu AUN saaxibkeey Eng C/raxmaan Cumar Cismaan Yariisow u saariyey isku day eed qabuuro faagis ah.

Labo danbi ayuu Sheekh Cali mowtada ka galay, markii uu fatwooday in uu qabuuraha la faago iyo markii uu nin geeriyooday oo ay argagexiso dishay eed uusan iska difaaci karin dusha ka saaray.

“Damiirku hadduu qallalo
Hadduu dufan-raadis yahay
Daliilka hortiisa yaal
Waxaa kaga beegan daah,
Dadkuna badi waa sidaas.”

Hadraawi

Muqdisho (Caasimada Online) – Ra’iisul Wasaaraha Xukuumadda Jamhuuriyadda Federaalka Soomaaliya Xamza Cabdi Barre ayaa maanta guddoomiyey shirka toddobaadlaha ah ee Golaha Wasiirrada.

Shirkan ayaa waxaa wasaaradda gaashaandhigga looga dhageystay warbixin ku saabsan bixitaanka ciidanka ATMIS iyo qorshaha u diyaar garowga ciidanka qaranka uu kula wareegi lahaa mas’uuliyadda amniga guud ee dalka, marka ay baxaan bisha December 2024.

Golaha Wasiirrada ayaa bogaadiyey howl-gallada dalka looga sifeynayo kooxaha Khawaarijta ah ee ciidamada geesiyaasha xoogga dalka Soomaaliyeed ay ka wadaan gobollada dalka, gaar ahaan dagaalladii ugu danbeeyey ee ka dhacay Jubbaland iyo Galmudug oo ay guulo waaweyn ka gaareen.

Sidoo kale, golaha ayaa wssaaradda waxbarashada, hiddaha iyo tacliinta sare ka dhageystay warbixin ku saabsan u diyaar garowga imtixaanka qaran ee dugsiga sare, gaar ahaan fasalka 4-aad ee sanad dugsiyeedka 2023-2024.

Imtixaanka shahaadiga ayaa si xiriir ah sanadkii 10-aad si isku mar ah looga qaadaya gobollada dalka, iyada oo sanadkaan imtixaanaadka u fariisan doonaan in ka badan 37,000 oo arday.

Shirka golaha wasiirrada ayaa sidoo kale waxaa lagu ansixiyey xeer-nidaamiyaha sharciga xafiiska hanti-dhawraha guud ee qaranka, kaas oo uu soo gudbiyay xafiiska.

Xeer-nidaamiyahan ayaa wuxuu xoojinaya dhaqan-gelinta sharciga xafiiska, kaasi oo muhiim u ah kor joogteynta nidaamka maareynta maaliyadda dalka, sida lagu sheegay xeerkan.

Garoowe (Caasimada Online) – Wasaaradda amniga Puntland oo warsaxaafadeed soo saartay ayaa qiraal ka sameysay dil dhowaan magaalada Garoowe loogu gaystay Marxuum Axmed Saxane Cabdi oo kamid ahaa dadka deegaanka, kaas oo uu dilkiisu dhaliyay caro xoogan.

Warqad kasoo baxday wasaaradda amniga Puntland ayaa waxaa lagu sheegay in marxuumka uu ku baxay gacanta ciidamada amniga, xilli ay wadeen howlgal ka dhacay bartamaha magaalada Garoowe ee xarunta gobolka Nugaal.

Wasaaradda ayaa ballan-qaaday inay dowladda bixineyso magta marxuum Axmed Saxane Cabdk iyo duugtiisa, sida ay ku caddeysay warsaxaafadeedka.

Sidoo kale wasaaradda amniga Puntland ayaa beesha uu ka dhashay marxuumka iyo ehelladiisa ka dalbatay in la aaso, maadaama dowladda ay ballan qaaday bixinta magtiisa.

“Waxay wasaaraddu amreysaa in marxuumka la aaso isla maanta, bacdamaa dowladdu xilqaadatay magta iyo duugtiisa”, ayaa lagu warka kasoo baxay xafiiska wasiirka Amniga Puntland Ibraahim Cartan Xaaji Bakiin.

Qoraalka ayaa sidoo kale lagu sheegay in xukuumaddu bixinayso dhammaan kharashaadka daawaynta dad kale ee ku dhaawacay hawlgalkaasi ciidan oo dhaliyay waxyeelada dhimashada iyo dhaawaca.

Garoowe ayaa waxaa haatan howlgallo culus ka wada ciidamada ammaanka ee Puntland, kuwaas oo dagaal adag kula jira kooxaha ka ganacsada maandooriyaha, waxaana badanaa ka dhaca isku dhacyo u dhexeeya labada dhinac, ayada oo khasaaraha ugu badan uu soo gaaro dadka rayidka ah ee aanu waxba galabsan.

Kismaayo (Caasimada Online) – Wararka naga soo gaarayo gobolka Jubbada Hoose ayaa sheegaya in xalay maleeshiyaadka Al-Shabaab ay weerar rogaal celis ah ku qaadeen deegaanka Buula Xaaji oo ay maalin kahor qabsadeen ciidamada dowladda iyo kuwa daraawiishta ee maamulka Jubbaland, isla-markaana uu aad ugu farxay ra’iisul wasaaraha Soomaaliya oo soo dhaweeyay xoreynta deegaankaasi.

Xubno ka tirsan kooxda ayaa lasoo wariyay in weerar aarbushaad ah ay ku qaadeen deegaankan oo hoostaga magaalo xeebeedka Kismaayo, waxaana kadib xigay dagaal kooban oo dhex-maray labada dhinac.

Iska hor imaadka dhex maray ciidamada huwanta iyo Al-Shabaab oo socday muddo daqiiqado ah ayaan la ogayn khasaaraha ka dhashay, waxaana dib loo celiyay dagaalyahanadii weerarka soo qaaday.

Saraakiisha hoggaamineysa ciidamada ku sugan Buula Xaaji ayaa sheegay in weli ay joogaan magaalada, ayna wadaan howlgallo ay ku baacsanahaan xubnaha weerarka soo qaaday oo ka baxsaday goobta.

Deegaankan ayaa waxaa horay u tagay mas’uuliyiin ka tirsan  dowlad goboleedka Jubbaland iyo saraakiil ciidan, si ay u dhiirogeliyaan ciidamada xoreeyay halkaasi.

Sidoo kale ra’iisul wasaaraha Soomaaliya, Xamza Cabdi Barre oo ka hadlay qabashada Buula Xaaji ayaa u hambaleeyay ciidamada dowladda iyo kuwa Jubbaland ee fuliyay howlgalka looga adkaaday Al-Shabaab.

“Waxaan ku ammaanayaa Ciidammada Halyeeyada Qaranka ee sida geesinimada, Dadaalka iyo Daacadnimadu ku jirto uga xoreynaya Khawaarijta deegaanada fara kutiriska ah ee ay gacanta ku hayaan” ayuu horay u yiri ra’iisul wasaaruhu.

Xaaladda ayaa weli kacsan, waxaana weli ciidamada ay kusii siqayaan deegaano horleh, iyaga oo kaabiga ku haya degmada Badhaadhe oo weli gacanta ugu jirto kooxda Al-Shabaab.

Jubbooyinka ayaa kamid ah meelaha ay ku xoogan yihiin maleeshiyaadka Al-Shabaab, waxaana haatan ku wajahan wajiga labaad ee howlgallada xoreynta ee ka socda gudaha dalka.

Muqdisho (Caasimada Online) – Wasiirka Arrimaha Dibadda iyo Iskaashiga Caalamiga Soomaaliya Axmed Macalin Fiqi ayaa Muqdisho kula kulmay Safiirka dowladda Hindiya u qaabilsan Soomaaliya.

Safiirka Hindiya Namgya Choden Khampa ayaa wasiirka kala hadashay sidii sare loogu qaadi lahaa xiriirka labada dal ee Soomaaliya iyo Hindiya.

Sidoo kale, kulankaan oo ka dhacay xafiiska Wasiir Fiqi ayaa lagu gorfeeyey fursadaha lagu ballaari karo iskaashiga wadajirka ah ee labada dal oo ku kala yaalla qaaradaha Afrika iyo Aasiya.

Safiirka Hindiya ayaa Wasiirka arrimaha dibadda Soomaaliya u sheegtay in ay ka go’an tahay fududeynta codsiga dal ku galka muwaadiniinta Soomaaliyeed ee u baahan inay caafimaad u aadaan Hindiya.

“Waa naga go’antahay inaan hubino in ay Soomaalidu si degdeg ah u heli karaan fiisaha, iyada oo aysan jirin cid kale oo na dhexdhexaadi doonta,” ayey tiri Namgya Choden safiirka Hindiya u joogta Soomaaliya.

Hindiya ayaa safka hore uga jirta dalalka ay dadka Soomaaliyeed u aadaan caafimaadka, hadana dhibaato weyn ayaa lagu qabaa sidii qof Soomaali ah uu Hindiya ku tegi lahaa.

Inta badan Soomaalida u socota Hindiya waxay aadaa Addis Ababa – Itoobiya, halkaas ka jartaan fiidaha ama dal ku galka Hindiya, dad badan ayaa cabasho ka muujiyey wareegaas dheer, kuwaas oo dowladda Soomaaliya ka dalbaday in safarada Hindiya la fududeeyo.

Hadda waxaa xaaladda sii adkeysay arrinta Itoobiya iyo Soomaaliya oo dagaal culus oo diblomaasiyadeed uu ka dhex qarxay, dadka Soomaaliyeed waa ku sii dhibtoodeen helidda dal ku galka Hindiya, balse hadda waxaa muuqata in dowladda garowsatay inay raadiso xal deg deg.

Muqdisho (Caasimada Online) – Sheekh Cali Wajiis oo ayaa si faahfaahsan uga hadlay arrinta qabuuraha Iskuul Buluusiya, isagoo si weyn u difaacay go’aanka dowladda, tusaaleyn dhanka diiniga ahna ka bixiyey qodobada uu ku difaacayo go’aanka qabuuraha looga rarayo dhulkaas.

Sidoo kale Sheekh Cali Wajiis ayaa shaaciyey in xilligii dowladii Farmaajo, ay mar sidaan oo kale isugu dayeen maamulkii gobolka Banaadir, gaar ahaan in qabuurahaas lasoo fago oo laga saaro dhulkaas, balse ay ka diideen, maadaama la sii rabay shakhsiyaad gaar ah.

Waxa uu si gaar ah u xaqiijiyey in Farmaajo iyo ra’iisul wasaareyaashiisa aanay dalban, balse arrintaas uu soo jeediyey guddoomiyihii gobolka Injineer Yariisow.

Hadda oo dowladda Xasan Sheekh ay go’aankaan la qaateen iyo xiligii Farmaajo oo ay ka diideen wuxuu sheegay Sheekh Cali Wajiis inuu jiray kala duwanaasho, maadaama dowladda Xasan Sheekh ay dhulkaas uga faa’iideysaneyso, si dan-guud ah, halka dowladii Farmaajo ay ka kirey rabtay shakhsiyaad ganacsato ah.

Shiikha oo wareysigaan siiyey TV-ga Universal ayaa sidoo kale sheegay in xiligii Farmaajo ay mar kale dowladda ka diideen in dadka ku shaqeysta laga saaro dhul u badan hoteelo uu ku jiro Hotel Afrik oo dowladda u jireysan.

“Guddoomiye Injineer Yariisow ayaa noo keenay liis dheer oo qiyaastii 30 ah, kuwaas oo u kireysan dowladda oo Hotel Afrik uu ku jiro, waxaan R/Wasaare Kheyre ku dhahnay dhulkaan hadii dadka ku shaqeysta laga saaro dan-guud maka hirgelinee? Wuxuu yiri maya, ka leexo ayaan dhahnay dadka degan ayaa u xaq leh oo sanado badan laga kireeyee, waana naga aqbalay,” ayuu yiri Sheekh Cali Wajiis.

Sidoo kale Sheekh Cali ayaa sheegay in xiligaas ay dowladii Farmaajo ka aqbashay culimada is hortaagii ay ku sameeyeen go’aanka lagu fagi lahaa qabuuraha iskuul Buluusiya, balse hadda dowladda Xasan Sheekh ay halkaas ka fulineyso qorshe danguud ah oo dhulkaas la dejinayo in ciidanka ilaalada xeebaha dalka oo baahi weyn loo qabo.

Sheekh Cali Wajiis waxaa la weydiiyey waxa  la gudboon culimada, hadii dhulkaas laga dhigo dhul ganacsi oo shakhsiyaad la siiyo, isagoo sheegay markaas ay ka hor imaa doonaan dadkana u cadey doonaan in balantii ay uga baxday dowladdu, balse hadda qorshaha loo sheegay oo dowladda ay ku raaceen uu yahay in dhulkaas hanaan danguud ah loo isticmaalo.

Wuxuu intaas ku sii daray, in diinta islaamka aysan baneyn in dangaar ah loo isticmaalo dhul danguud ah, inta laga saaro dadkii ku xabaalaa, sidoo kale wuxuu faahfaahin dheer ka bixiyey marka la ogolyahay in meyd laga saaro meel ee meel kale lagu aaso, isagoo ka bixiyey tusaalooyin waaweyn oo ku qanciyey in culimadu ay go’aankaas la qaadayo dowladda.

Hoos ka daawo

Muqdisho (Caasimada Online) – Madaxweynaha Soomaaliya, Mudane Xasan Sheekh Maxamuud ayaa xiriir dhanka khadka taleefoonka ah la sameeyey Amiirka dalka Qatar Sheikh Tamim bin Hamad Al-Thani, ayaga oo ka wada-hadlay arrimo ku aadan horumarinta xiriirka labada waddan.

Labada mas’uul ayaa sidoo kale wada-hadalkooda ku soo qaaday xaaladihii ugu dambeeyay ee diblumaasiyadda iyo arrimaha gobolka ee geeska Afrika.

Qoraal kooban oo kasoo baxay Villa Soomaaliya ayaa lagu yiri “Madaxweynaha Jamhuuriyadda Federaalka Soomaaliya Mudane Dr. Xasan Sheekh Maxamuud ayaa qadka taleefoonka wadahadal miro dhal ah kula qaatay Amiirka Dowladda Qatar Sheikh Tamim bin Hamad Al Thani, waxayna labada masuul diiradda saareen xoojinta iskaashiga labada dal”.

Sidoo kale Madaxweyne Xasan Sheekh Maxamuud iyo Amiir Tamiim ayaa isla gartay dardar-gelinta mashaariicda horumarineed ee ay dowladda Qatar ka fulinayso Soomaaliya, kuwaas oo lagu tageerayo dowladda federaalka iyo shacabka Soomaaliya.

Qatar ayaa ka mid ah dowladaha carbeed ee xiriirka wanaagsan la leh Soomaaliya, kaas oo sii xoogeystay kadib dib u doorashadii madaxweyne Xasan Sheekh Maxamuud ee 15-kii May ee 2022.

Wadahadallada  dhex-maray Soomaaliya iyo Qatar ayaa ku soo aaday, xilli maalmihii u dambeeyay dowladda federaalka ay wadday dadaallo ay ku hormarineyso siyaasaddeeda arrimaha dibadda, gaar ahaan xoojinta dhanka diblumaasiyadda.

Si kastaba, xiriirka labada dal ayaa weli ah mid aad u sarreeya, waxaana haatan Qatar mashaariicyo waa wayn ay ka fulisaa gudaha dalka, sida dhismayaasha waddooyinka.

Dhuusamareeb (Caasimada Online) –Heshiis ka kooban 3 qodob ayaa laga gaaray colaadkii dadka badan lagu laayey ee beelaha Dir iyo Mareexaan ku dhex martay waqooyiga gobolka Galgaduud, waxaana ku baxay madaxda ugu sareysa Galmudug.

Madaxweynaha Galmudug Axmed Cabdi Kaariye Qoor Qoor oo hoggaaminaya wafdi culus oo maamulkiisa ka tirsan ayaa gaaray deegaanadii lagu dagaalamay maalmihii lasoo dhaafay ee u dhaxeeya Caabudwaaq iyo Xeraale.

Madaxweyne Qoor Qoor oo halkaas ka furay gogol nabadeed ayaa la kulmay odayaasha iyo waxgaradka labada dhinac, isagoo kala hadlay sida ay muhiim ugu tahay in ay gaaraan xal deg deg ah iyo nabad waarta oo labada dhinac dhex marta.

Isla maanta waxaa la gaaray heshiis bilow u ah gogosha, kaas oo ka kooban 3-qodob oo kala ah:

1: In xabbad joojinta la is la qaatay, sidoo kalana lala shaqeeyo ciidammada amniga.

2: In la kala qaado maleeshiyaadka.

3: Iyo in dhinacyadu usoo diyaar garoobaan gogol nabadeed oo caasimadda Dhuusamareeb la dhigay.

Dadka ku geeriyooday dagaal maalmo kooban ka socday deegaanada u dhaxeeya Xeraale iyo Caabudwaaq waxaa ku geeriyootay ku dhowaad 100 qof oo labada dhinac ah, waxaana ku dhaawacmay dad intaas ka badan.

Deegaano ayey kala qabsadeen labada beelood, waxaana adkaatay in la kala dhexgalo, waxayna dileen askar boolis ah oo lagu amray inay dagaalka joojiyaan oo beelaha kala dhexgalaan.