Muqdisho (Caasimada Online) – Dowladda federaalka Soomaaliya ayaa shaacisay in dagaal-yahaano aad u badan kooxda Al-Shabaab looga dilay howl-gal qorsheysan oo afartii maalmood ee u dambeeyay ka socday gobolka Jubbada Hoose.

Wasiirka ku-xigeenka wasaaradda Warfaafinta Cabdiraxmaan Al-Cadaala ayaa shaaciyay in howl-galkaan oo ay iska kaashanayaan xoogga dalka iyo kuwa Jubbaland lagu khaarajiyay in ka badan 50 xubnood oo ka tirsan Al-Shabaab.

Sidoo kale waxaa gacanta lagu soo dhigay 20 kale oo dhagar-qabeyaal ah, kuwaasi oo dhibaato ku hayay dadka deegaannadaas ku dhaqan, sida uu sheegay Wasiir Al-Cadaala.

“Xoogga Dalka iyo Geesiyaasha Jubbaland waxa ay maalintii afaraad oo xiriir ah hawdka ku baacsanayaan Al-Shabaab, 50 ka badan waa la dilay, 20 kale nolosha ayaa lagu qabtay, dhul badanna waa laga sifeeyay, Alle ayaa mahadsan,” ayuu yiri Wasiir Cabdiraxmaan Al-Cadaala.

Howl-galladan ayaa waxay si gaar ah uga socdaan tuulooyinka Muuse-xaaji, Malaaylay, Turdho, Baxar-saafka iyo deegaanno kale, iyadaa oo intii uu socday lagu dilay horjoogeyaal iyo dagaal-yahaano kale, halka qaar kalenanolosha lagu qabtay tan iyo sabtidii la soo dhaafay, waana howl-gal ballaaran oo qeyb ka ah baacsiga Al-Shabaab.

Si kastaba, waxaa toddobaadyadii u dambeeyay dhiig cusub lagu shubay gulufka ka dhanka Al-Shabaab, ayada oo dardar xooggan ay ku socdaan howl-gallada lagu baacsanayo kooxda oo bilihii lasoo dhaafay uu gaabis ku yimid.

Ciidanka xoogga dalka oo kaashanayaa kuwa deegaanka ayaa hadda waxay howl-gallo ballaaran ka wadaan dowlad-gobolleedyada Jubbaland, Koonfur Galbeed iyo Galmudug, kuwaasi oo Shabaab lagu gaarsiiyay khasaare kala duwan.

Muqdisho (Caasimada Online) – Wasiirka arrimaha gudaha Soomaaliya Axmed Macalin Fiqi ayaa sheegay in ilaa hadda ay la yaaban yihiin ‘waxa qaaday Muuse Biixi’ oo badda Soomaaliya u saxiixay Itoobiya, saacado kadib markii ay kula soo heshiiyeen Jabuuti.

Wasiir Fiqi ayaa ka mid ahaa masuuliyiintii dowladda Soomaaliya ee madaxweyne Xasan Sheekh ku wehliyey wafdigii 28-kii December 2023 heshiiska la soo galay Somaliland ayaa wixii dhacay ku macneeyey oraahdii “Dibiga naasa adag iyo weedha maxaa kulmiyey.”

Wuxuu sheegay in wax dareen ah aysan qabin garabkii ka socday dowladda federaalka Soomaaliya, isla markaana ay aad ugu faraxsanaayeen heshiiskii bilowga ahaa ee Somaliland ay Jabuuti kula soo saxiixdeen.

Hase-yeeshee wuxuu sheegay in saacado kadib uu Muuse Biixi jaho wareer ilaa hadda socda geliyey gobolka Geeska Afrika, kadib markii uu badda Soomaaliya u saxiixay Itoobiya.

Wasiir Fiqi ayaa wax aan caadi aheyn ku macneeyey sida umadda Soomaaliyeed ay uga gilgisheen damaca Itoobiya, isagoo sheegay in aan loo kala harin difaaca badda Soomaaliya.

Axmed Macalin Fiqi oo maanta ka qeyb galay shirka Heritage oo Muqdisho ka furmay ayaa aad ugu mahad celiyey Soomaalidii ka dhiidhisay damaca Itoobiya oo ay ugu horeeyaan reer Jigjiga oo maalin uu Addis Ababa ka dhacay heshiiskaas, maalinkii xigay Muuse Biixi ku soo dhaweeyey heesihii Soomaalida ee dagaalkii 1977-kii.

Sidoo kale Fiqi ayaa aad u amaanay doorkii difaac ee Soomaalida Kenya ay qaateen, isagoo si gaar ah ugu mahad celiyey Xildhibaan Yuusuf Xasan, wasiir Aadan Barre, Taliyaha nabad sugidda Kenya, iyo masuuliyiin kale oo dhamaantood Soomaali ah.

Gabagabadii hadalkiisa wasiir ayaa Jabuuti ku amaanay doorka ay ka cayaareyso dowlad-dhiska Soomaaliya, isagoo sheegay in wasaaradda arrimaha gudaha ee wasiirka uu ka yahay ay dejisay qorshe dib u heshiisiin oo ad u baaxad weyn, si loo gaaro xal nabadeed oo Soomaalidu u dhan tahay.

Hoos ka daawo

Arusha (Caasimada Online) – Soomaaliya ayaa ku dhowaad afar billood kadib waxay maanta si rasmi ah oo buuxda xubin uga noqotay Ururka Iskaashiga Dhaqaalaha Bariga Afrika (EAC).

Ku biirista rasmiga ah ee EAC, ayaa imaneysa kadib markii ay Soomaaliya soo dhameystirtay dhamaan shuruudihii looga baahnaa, waxaana maanta lagu shaaciyay dalka Tanzania.

Arrintaan ayaa waxaa lagu shaaciyey munaasabad maanta lagu qabtay magaalada Arusha ee casimadda dalka Tanzania.

Wasiirro ka tirsan xukuumadda federaalka Soomaaliya, oo ay kamid yihiin Wasiirka Ganacsiga Jibriil Cabdirashiid Xaaji Cabdi, Wasiirka Warfaafinta Daa’uud Aweys Jaamac iyo xubno kale oo dowladda matalaya ayaa ku sugan Arusha oo lagu shaaciyey guushaan taariikhiga ah.

Soomaaliya ayaa 24-kii November ee 2023-kii kamid noqotay Urur Goboleedka Bulshada Bariga Afrika, kadib codeyn loo qaaday.

Soomaaliya ayaa noqotay xubintii 8-aad ee urur-goboleedkan, kadib muddo ay dowladda dadaal xooggan ku bixisay sidii ay qeyb uga noqon laheyd EAC.

Si kastaba, Dowladda federaalka Soomaaliya ayaa tan iyo markaas dadaal badan ku bixineysay sidii ay usoo dhameystiri laheyd shuruudaha ku xiran buuxinta xubinimada EAC, oo ugu dambeyntiina ay maanta soo dhameystirtay.

Muqdisho (Caasimada Online) – Sida ay baahisay warbaahinta dowladda, maleeshiyaad ka tirsan Al-Shabaab ayaa lagu soo qabtay howl-galka ka socda gobolka Jubbada Hoose.

Howl-galka xubnaha Shabaab-ka lagu soo qabtay ayaa ka dhacay tuulada Soomarey oo hoos tagta degmada Jamaame ee gobolka Jubbada hoose.

Ciidamada Kumaandooska Danab iyo kuwa Nabad-sugida Jubbaland ee Gurmad Qaran ayaa Jubbada Hoose ka wada howl-galka ballaaran oo looga sifeynayo kooxda Al-Shabaab.

Dagaal-yahaanada ay nolosha kusoo qabteen ciidamada iskaashanaya ayaa sawiradooda la baahiyay, kuwaasi oo laga dheehan karayo wejigooda silica iyo rafaadka hawdka ku haysta kooxda, oo xilligaan wajaheysa guluf culus oo ka dhan ah.

Illaa afar xubnood ayaa la baahiyay sawiradooda, waxaana weli socda howl-galka lagu baacsanayo dagaal-yahaanada kooxda, ee ka socda gobolka Jubbada Hoose.

Si kastaba, Ciidamada Qaranka oo kaashanaya xoogagga deegaanka iyo ciidamada ammaanka dowlad-goboleedyada ayaa kordhiyey howl-galada lagu beegsanayo Al-Shabaab, iyada oo guulo wax ku ool ah laga gaaray wejiga koowaad ee dagaalka.

Inkasta oo kooxda Al-Shabaab ay mararka qaar weeraro ku soo qaado xeryaha ciidamada dagaalka kula jira, haddana waxay kooxdu gulufka socda wejigiisa koowaad ay ku lumisay deegaano iyo degmooyin muhiim ah oo sanado badan ay gacanta ku haysay, halka looga laayay dagaal-yahaano iyo horjoogayaal badan.

Muqdisho (Caasimada Online) – Wararka naga soo gaaraya gobolka Bakool ayaa sheegaya in howl-gal culus oo lagu fashilayay qorshe ay damacsaneyd kooxda Al-Shabaab laga fuliyay duleedka degmada Waajib.

Ciidamada Qaranka ayaa maanta dagaal-yahaano Al-Shabaab ah ku weeraray goob ay isku uruursanayeen duleedka degmada Waajid ee gobolka Bakool, halkaasi oo ay kasoo maleegayeen weeraro lagu beegsanayo ciidamada huwanta.

Wararka hordhaca ah ee aan ka heleyno howl-galkaas ayaa xaqiijinaya in kooxda jab culus lagu gaarsiiyey halkaasi, ayada oo lasoo warinayo in meydad tiro badan ay ka carareen dagaal-yahaanadii halkaasi nolol uga baxsaday.

Sidoo kale saraakiisha ciidamada fuliyey howl-galka ayaa dhankooda xaqiijiyey inay kooxda Al-Shabaab ka xoreeyeen goobihii ay isku uruursanayeen ee lagu weeraray.

Bur-burinta Shabaab-kii isku aruursaneyay Waajib ayaa imanaya xilli ay shalay ciidamada dowladda iyo kuwa Jubbaland ay howl-gal culus ka fuliyeen deegaano dhaca jiinka wabiga, oo hoostaga degmada Jamaame ee gobolkaasi.

Howl-galkaasi ayaa lagu dilay in ka badan 30 ka tirsanaa kooxda Al-Shabaab oo ku sugnaa halkaasi, sida lagu sheegay bayaan shalay kasoo baxay dowladda.

“Howlgalka oo loo qorsheeyey si heerkeedu sarreeyo laguna dilay in ka badan 30 Khawaarij ah ayaa ciidamadu ka fuliyeen deegaano hoos taga degmada Jamaame ee gobolka Jubbada hoose iyo jiinka Wabiga” ayaa lagu yiri bayaanka dowladda.

Sidoo kale waxaa howl-gallo kale oo ka dhacay deegaanka Baarsanguuni lagu soo qabtay illaa 10 xubnood oo ka tirsan Al-Shabaab oo iyagana dhibaato ka waday gudaha deegaankaasi.

Si kastaba, Maalmihii u dambeeyay ciidamada xoogga dalka iyo kuwa deegaanka ayaa kordhiyay howl-galladii ka dhanka ahaa kooxda Al-Shabaab, taasi oo meesha ka saareysa gaabiskii bilihii dambe ku yimid howl-galka kooxda, oo wejiga koowaad ee dagaalka looga xoreeyay deegaano iyo degmooyin muhiim ah oo sanado badan ku jiray gacantooda.

Muqdisho (Caasimada Online) – Kooxo hubeysan oo loo maleynayo inay ka tirsan yihiin Al-Shabaab ayaa lagu soo warramayaa inay xalay sarkaal ka tirsanaa ciidanka Booliska Soomaaliya ay ku dileen degmada Kaaraan, gaar ahaan xaafadda Arjantiin ee degmadaasi.

Marxuumka ayaa waxaa lagu magacaabi jiray Gaashaanle Cabdullaahi Cali Calasow (Madaxey), wuxuuna horay usoo noqday taliye ku xigeenkii booliska degmada Waabari iyo sidoo kale taliyaha ciidanka Taraafikada ee magaalada Jowhar ee caasimada HirShabelle.

Ilo dadka deegaanka ah ayaa innoo sheegay in marxuumka ay toogteen dhalinyaro hubeysan, xilli uu kasoo baxay masaajid ku yaalla halkaasi, waxaana kadib baxsaday ragga dilka gaystay.

Dhanka kale, ma jiro wax hadal ah oo kasoo baxay mas’uuliyiinta degmada iyo saraakiisha laamaha ammaanka oo ku aadan toogashada loo gaystay Cabdullaahi Madaxey.

Waa dilkii labaad ee ka dhacaya caasimada, waxaana xalay Nabadoon lagu magacaabi jiray Cabdi Xasan koox ka tirsan Shabaab ay ku dishay degmada Dayniile ee gobolka Banaadir.

Weerarka ayaa waxaa toos loogu qaaday guri uu waaxda Buurdheere  ka daganaa nabadoon, ayada oo lala dilay askari waardiye u ahaa marxuumka.

Wararka ayaa intaasi ku daray in xubno badan oo ka tirsan Al-Shabaab ay fuliyeen weerarka, kuwaas oo gudaha u galay guriga marxuumka, kadibna si arxan daran u dilay.

Laba kamid ah xubnihii weerarka fuliyay ayaa nolosha lagu qabtay, halka la helay maydka mid kale, sida uu shaaciyay xoghayaha maamulka degmada Dayniile.

Dhacdooyinkan ayaa kusoo aadaya, xilli maalmihii u dambeeyay ay daganayd xaaladda Muqdisho, kadib qorshe cusub oo ay la yimaadeen hay’adaha ammaanka ee dowladda.

Muqdisho (Caasimada Online) – Faahfaahino dheeri ah ayaa kasoo baxaya khasaaraha ka dhashay qarax miino oo maanta ka dhacay degmada Heliwaa ee gobolka Banaadir.

Qaraxa oo jugtiisa ay si xoogan u maqleen dadka deegaanka ayaa waxaa uu si gaar ah uga dhacay xaafadda Shaaciye ee degmadaasi, sida ay innoo sheegeen goobjoogaal

Wararka ayaa sheegaya in qaraxa lala eegtay gaari ay la socdeen ciidamo ka tirsan kuwa dowladda, gaar ahaan kuwa Xasilinta ee loo yaqaano Boolis Milataari.

Ugu yaraan illaa 4 qof oo uu mid kamid ah askari ka tirsan ciidamada dowlada ayaa ku dhaawacmay qaraxaas, halka saddex kale ay yihiin dad shacab ah oo ku sugnaa goobta.

Ciidamada la qarxiyay ayaa howlgal kooban ka sameeyay goobta, waxayna kadib sii wateen socdaalkooda horay u qaaday askariga ka dhaawacmay.

Xaaladda goobta uu qaraxu ka dhacay ayaa hadda ah mid deggan, mana jiro wax faahfaahin oo ay ka bixiyeen laamaha ammaanka ee dowladda Soomaaliya.

Magaalada caasimada ah ee Muqdisho ayaa waxaa inta badan ka dhaca weeraro qaraxyo ah, kuwaas oo ay soo maleegaan xubnaha kooxda Al-Shabaab oo haatan wajahaya dagaal culus oo ay iska kaashanayaan dowladda iyo dadka deegaanka.

Muddooyinkii u dambeeyay ayaa waxa xasiloonood caasimada, marka loo eego weeraradii horay uga dhici jiray, hadana mararka qaarkood waxaa dhaca falal ammaan darri oo qaarkood ay gaystaan xubnaha Al-Shabaab, sida qaraxyo miino iyo dilal qorsheysan intaba.

Muqdisho (Caasimada Online) – Warar kala duwan ayaa kasoo baxaya weerar culus oo ay xalay Al-Shabaab ka fuliyeen magaalada Muqdisho, kaas oo sababay khasaare xoogan.

Weerarka oo ka dhacay degmada Dayniile ayaa waxaa lagu qaaday guri uu waaxda Buurdheere  ka daganaa nabadoon lagu magacaanitay Cabdi Xasan, sida ay sheegeen ilo dadka deegaanka.

Wararka ayaa intaasi ku daray in xubno badan oo ka tirsan Al-Shabaab ay fuliyeen weerarka, kuwaas oo gudaha u galay guriga marxuumka, kadibna si arxan daran u dilay.

Marxuum Nabadoon Cabdi Xasan ayaa lala dhacay rasaas tiro badan, taas oo ka muuqatay jirkiisa, kadib weerarka, waxaana lala dilay askar waardiye u ahaa.

Xoghayaha maamulka degmada Dayniile oo la hadlay warbaahinta ayaa xaqiijiyay jirintaanka weerarkan iyo dilka nabadoonka, wuxuun sheegay inay gurmad sameeyeen, kadib weerarka.

Sidoo kale wuxuu tilmaamay in ay gacanta kusoo dhigeen laba kamid ah Shabaabkii weerarka geystay oo nool iyo mid kale oo mayd ah, sida uu hadalka u dhigay.

Ma jiro wax war ah oo kas oo baxay dhinaca Al-Shabaab oo ku aadan weerarkaasi, mana sababta ay u beegsadeen nabadoonka oo ay gurigiisa ugu tageen xubno aad u hubeysan.

Weerarkan ayaa kusoo aaday, xilli maalmihii u dambeeyay ay daganayd xaaladda ammaan ee Muqdisho, kadib qorshe cusub oo ay la yimaadeen hay’adaha ammaanka ee dowladda.

Muqdisho (Caasimada Online) – Xoghayihii joogtada ahaa ee Xafiiska Ra’iisul Wasaaraha Soomaaliya Maxamad Abuukar Zubeyr ayaa shalay xilkii iska casilay, isagoo qoraal dheer oo shaqo ka tegis ah u diray Ra’iisal Wasaare Xamza Cabdi Barre.

Qoraalka ayuu ku sheegay Maxamed Abuukar inuu si iskiis ah u go’aansaday inuu xilka iska casilo, isagoo uga mahadceliyay Raysal wasaaraha Soomaaliya Xamse Cabdi Barre shaqadan uu horay ugu igmaday. 

Warar hoose oo soo baxaya ayaa sheegaya in dhawaan lagu wado in isku shaandheyn iyo isbadalo lagu sameynayo hay’adaha dowladda, gaar ahaan xilalka Golaha Wasiirada iyo agaasimayaasha, waxaana sidoo kale laga yaaba iney is-casili doonaan saacadaha soo socda xubno kale.

Maxamed Zubeyr ayaa xitaa is-casilaaddiisa kahor la rumeysnaa inaanu awood buuxda ku lahayn xafiiska, ayada oo ra’iisul wasaaraha ay ku hareereysan yihiin la-taliyeyaal badan oo awood leh, taasi oo jahwareer ku haysa xafiiska.

Xogta la helay ayaa sheegeysa in xilkan Xoghayaha joogtada ah ee Xafiiska Ra’iisal Wasaaraha loo wado Kamaal Xasan Guutaale, oo hadda ka mid ah la-taliyayaasha tirada badan ee Ra’iisal Wasaaraha.

Kismaayo (Caasimada Online) – Wararka naga soo gaaraya gobolka Jubbada Hoose ayaa sheegaya in maalintii saddexaad oo xiriir ah ciidamada dowladda iyo kuwa Jubbaland ay howlgallo culus ka wadaan deegaano ka tirsan gobolkaas oo hoostaga Jubbaland.

Howlgalladan ayaa si gaar ah uga dhacay deegaanada kala ah:- Muuse-xaaji, Malaaylay, Turdho, Baxar-saafka iyo kuwa kale, iyada oo lagu dilay Al-Shabaab fara badan.

Xubnaha la laayey ayaa isugu jiro horjoogaal Soomaali ahaa, kuwa ajaaniib ah iyo maleeshiyaad kale, sida ay sheegeen saraakiil ka tirsan milatariga Soomaaliya.

Sidoo kale waxa ay xaqiijiyeen in tirada dhimashada ay gaareyso illaa 35 xubnood oo isugu jiro saraakiil sar sare iyo dagaalamayaal, kuwaas oo loogu daaday godadkii ay ku jireen.

“Ciidamada ayaa cadowga ugu galay godadkii ay ku dhuumaaleysanayeen ee deegaanadaas, waxaana la dilay 35 Horjoogayaal iyo maleeshiyaad isugu jira Soomaali iyo Ajaabib” ayaa lagu yiri qoraal lagu daabacay warbaahinta dowladda.

Sidoo kale waxaa la sii raaciyay “Horjoogeyaasha la dilay waxaa ku jira, Jaabir oo dhalashadiisu tahay Kenya horjoogihii sirdoonka Khawaarijta Saadiq iyo horjoogihii qaraxyada uqaabilsanaa oo lagu magacaabo Cabdiqani ayaa dhammaantood lagu dilay howlgalka sida ay xaqiijiyeen Saraakiisha Ciidanka”

Dhinaca kale ciidamada ayaa inta uu socday howlgalkan kusoo qabtay illaa 7 kale oo ka tirsan kooxda Al-Shababa, kuwaas oo ay bandhigeen ciidamada huwanta ah.

Xaaladda ayaa weli kacsan, mana jiro wax hadal ah oo kasoo baxay Al-Shabaab oo ku aadan howlgalladaasu khasaaraha culus lagu gaarsiiyay.

Jubbooyinka ayaa maalmihii u dmabeeyay waxaa ka socday guluf ay iska kaashanayaan dowladda iyo Jubbaland, si Al-Shabaab looga xoreeyo gobolladaas oo ay ku xoogan yihiin.

Garoowe (Caasimada Online) – Ciidamada ammaanka ee Puntland ayaa xalay gacanta ku dhigay shabakad isku xiran oo qalab u waday kooxaha argagixisada, gaar ahaan Al-Shabaab ee ku sugan buuraha Galgala ee maamulkaasi.

Kooxdan oo ka kooban 5 qof oo mid kamid ah ay tahay haweeney ayaa lagu qabtay  koontaroolka galbeed ee caasimada Garoowe.

Magacyada shanta qof oo sawirradooda lasoo bandhigay ayaa lagu kala sheegay 1-Faisa Cali Maxamed, 2-Cabdi Axmed Cusmaan 3-Haaddi Cumar Cilmi, 4-Cabdi Maxamuud Cali, 5-Saalax Cabdulqaadit Mahad

Sidoo kale wuxuu booliska shaaciyay waxa uu yahay qalabka lagu qabtay ee loo waday kooxda Al-Shabaab, kuwaas oo kala ah:-

1-Gacamo kuwa loo isticmaalo GPS MAP, 2-Qalbkaa Caafimaad oo dhamaystiran ( A leukocyte alkaline phosphatase (LAP) – Laboratory 3-Biisooyin Kaashwito, 4-Kabo balistig ah, 5- Envactar kuwa solar loo isticmalo. ( Inverter solar energy system), 6- Hal Mobile kuwa qarxa lagu kiciyo. ( An improvised explosive device (IED) Cell Phone),

Warbixinta kasoo baxday booliska gobolka Nugaal ayaa waxaa sidoo kale lagu yiri  “Laanta Dembi-baarista ee Qeybta Booliska Gobolka Nugaal ayaa xaqiijiyey in dadka la qabtay iyo qalabka ay wadeen ay ku socdeen Buuraha Gobolka Bari, kuwaa oo laga keenay Koonfurta dalka Soomaaliya”.

Waxaa kale oo lasii raaciyay :Booliska Qeybta Gobolka Nugaal ayaa eedaysanayaasha iyo qalabka lagu qabtay la horgayn doonaa Laamaha Garsoorka”.

Ugu dambeyn booliska Puntland ayaa farriin u diray shacabka, wuxuuna ugu baaqay inay kala shaqeeyaan nabad-gelyada, si looga hortago falalka ammaan darrida ah

“Booliska ayaa  fariin adag u diraya dhammaan dadka ku hawlan falalka amniga lidka ku ah in tilaabo sharci ah laga qaadi doono, waxaana shacabka Puntland ugu baaqeynaa inay la shaqeeyaan Laamaha amniga si kooxaha Argagixisada ah tilaabo sharci ah looga qaado” ayaa mar kale lagu yiri warsaxaafadeedka kasoo baxay taliska qaybta gobolka Nugaal.

Garowe (Caasimada Online) – Xaafadda Horseed ee magaalada Garowe waxaa laga helay meydka gabar yar oo la gowracay, jirkeedana ay nabaro badan ka muuqdaan.

Falkaan ayaa xaafadda uu ka dhacay aad looga hadal hayaa. Waxaana socda baaritaan ay wadaan laamaha amniga gobolka Nugaal, si gacanta loogu soo dhigo dambiilayaasha.

Lama oga ilaa hadda sababta loo dilay gabadhaas iyo cidda falkaan gaysatay, balse dhacdadaan ayaa kusoo beegmaysa iyadoo fal kufsi ah uu ka dhacay isla magaalada Garowe.

Gabar yar oo 13 jir ah oo ku nooleed Kaam-ka Shabeelle ee  magaalada Garowe ayaa la sheegay kufsi loo geystay saacadihii lasoo dhaafay.

Ciidamada Booliiska Puntaland ayaa ku guulaystay inay soo qabtaan mid kamid  ah labo nin oo loo heysto inay kufsadeen gabadha yar.

Ragga labada ah ee loo heysto kufsiga ayaa ka tirsan ciidamada Puntland, taas oo fadeexad ku noqotay maamulka, gaar ahaan hey’adaha amniga.

Dhacdooyinkaan xanuunka badan ee gabdhaha yaryar loogu geystay dilka iyo kufsiga saacado is xiga ayaa aad looga hadal hayaa magaalada Garoowe iyo inta badan deegaanada Puntland.

Maalmahaan dalka dhan, haba ugu daraatee Muqdisho waxaa ka socday tacadi ay dadku isku geysanayaan, sida lamaane is dilay, kufsi iyo kuwo nolosha lagu gubay, arrintaan ayaa la yaab ku noqotay bulshada.

Nairobi (Caasimada Online) – Shir u dhaxeeya Dowladda Soomaaliya iyo Hey’adda Lacagta Adduunka ee IMF ayaa maanta ka furmay magaalada Nairobi ee dalka Kenya.

Wasiirka Maaliyadda Xukumadda Federaalka Soomaaliya Biixi Imaan Cige oo uu wehliyaan wasiirka Qorsheynta iyo Guddoomiyaha Bangiga Dhexe ee dalka ayaa daah-furay shirka.

Shirkaas ajendihiisu waa dib-u-habeynta Maaliyadda Soomaaliya, waxaana mar kasta isugu timaada masuuliyiinta dhanka dhaqaalaha u qaabilsan dowladda iyo madaxda hey’adda lacagta adduunka ee IMF.

Shirkaan uu ka mid ah kulamadii ugu horeeyey oo lagu eegayo dib u habeynta dhaqaalaha Soomaaliya tan iyo markii deymaha laga cafiyey Soomaaliya ayaa soca doona muddo toddobaad ah.

Inta uu shirkaasi socdo waxaa dib-u-eegis lagu sameynayaa wixii horumar maaliyadeed ah ee u qabsoomay Dowladda Federaalka Soomaaliya oo 3 bilood ka hor laga cafiyay deymihii cuuryaamiyay horumarinta dhaqaalaha Soomaaliya.

Qodobada ugu muhiimsan ee laga wadahadlayo ayaa ah sare uqadidda dakhliga dowladda, hannaanka maamul-wanagga maaliyadda iyo horumarinta barnaamijka Qorshaha Qaranka.

Wasiirka Maaliyadda XFS Biixi Imaan Cige oo furitaankii shirka hadal kooban ka jeediyay ayaa sheegay in wasaaradda Maaliyadda iyo guud ahaan dowladda Soomaaliyeed ay u qabsoomeen waxyaabo muhiim ah oo la taaban karo.

Wasiirka ayaa sheegay in waxyaabaha mudadaas u qabsoomay Soomaaliya ay ugu horeeyaan ‘horumarinta ilaha dakhliga dowladda oo dadaal dheer ay galisay wasaaradda Maaliyadda oo kaashanaysa wasaaradaha dowlad-goboleedyada dalka.’

Wasiirka Maaliyadda Soomaaliya ayaa u mahadceliyay dhammaan hey’adaha ka soo qeybgalay kulankaan oo ay ka mid yihiin Wasaaradda Maaliyadda, Wasaaradda Qorsheynta, Wasaaradda Cadaaladda, Bangiga dhexe, Xafiisyada Madaxweynaha iyo Ra’isul Wasaaraha iyo IMF iyo Bangiga Adduunka.

Waxaa gabagabada shirkaan la filayaa in laga soo saaro war-saxaafadeed arrimaha maaliyadeed ee dowladda Soomaaliya 3-bilood kadib markii laga cafiyey dhamaan deymihii Soomaaliya lagu lahaa.

Muqdisho (Caasimada Online) – Dowladda Qatar ayaa u ballan-qaaday Soomaaliya inay sii wadi doonto taageerada muhiimka ah ee xilligaan u baahan tahay Soomaaliya, kadib kulan maanta ka dhacay Villa Soomaaliya.

Kulankaan oo ay wada qaateen ra’iisul wasaaraha Soomaaliya Xamza Cabdi Barre iyo Danjiraha Qatar ee Soomaaliya Abdullah Salem Al Nuaimi ayaa waxaa looga hadlay xoojinta xiriirka iyo iskaashiga ka dhaxeeya labada dal.

Mudane Xamza ayaa uga mahad-celiyey dowladda Qatar taageerada ay siiso Soomaaliya, gaar ahaan dhinacyada amniga, tababarka ciidamada qalabka sida, horumarinta adeegyada aas-aasiga ah iyo gargaarka.

Danjire Abdullah ayaa dhankiisa ballan-qaaday in ay sii wadi doonaan taageerada dhinacyada kala duwan leh ee ay mar walba la garab taagan yihiin dowladda iyo shacabka Soomaaliyeed.

Soomaaliya iyo Qatar ayaa leh xiriir saaxiibtinimo oo wanaagsan, ayada oo dhawaan labada dhinac ay heshiis is-afgarad ku kala saxiixdeen magaalada Dooxa ee caasimada dalkaasi.

Heshiiskaas oo salka ku haya dhinaca sharciga ah ayaa sidoo kale ka turjumaysa danaha labada waddan ee is-weydaarsiga macluumaadka iyo khibradaha qaabka diyaarinta, qorista iyo daraaseynta qabyo-qoraallada heshiisyada iyo heshiisyada is-afgaradka.

Si kastaba, Qatar ayaa kamid ah dalalka carbeed ee sida u dhow u taageera Soomaaliya, waxayna sidoo kale dalka ka fulisaa mashaariicyo kala duwan oo horumarineed.