Muqdisho (Caasimada Online) – Dowladda federaalka Soomaaliya ayaa shalay galinkii dambe dirtay gaadiidkii ugu badnaa oo ku raran raashinka noocyadiisa kala duwan, kuna sii jeeda magaalada Beledweyne ee gobolka Hiiraan.

Munaasabad kooban oo lugu sagoontinyay gawaaridan oo gaarayay 50 ayaa ka qabsoomtay magaalada Muqdisho, taasi oo goobjoog ka ahaayeen gudoomiyaha hay’adda SoDMA Maxamuud Macalin Cabdulle iyo wasiirka wasaarada qorsheynta iyo maalgashiga Xildhibaan Maxamuud Cabdiraxman Beene-Beene.

Gudoomiyaha Hay’adda Maareynta Musiibooyinka oo warbaahinta kula hadlay goobta lugu sagootinayay gaadiidka raashinka wado ayaa sheegay in kadib markii uu soo arkay baaxada dadka ku barakacay fatahaada Beledweyne uu ka shaqeynayay in wax walbo oo la awoodo lala gaaro barakacayaasha.

Waxaa uu si gaar ah ugu mahad-celiyay dowlada Imaaraadka Carabta oo ayadu kaalin mugleh ka geysatay gaarsinta gargaarkan dadka ku nool magaalada Beledweyne ee xarunta gobolka Hiiraan.

Wasiirka Wasaaradda Qorsheynta oo asagna hadal kooban ka jeediyay munaasabada ayaa u mahad-celiyay hay’adda SoDMA, isaga oo sheegay in dhamaan hay’addaha dowlada ay ka qeyb qaadanayaan sidii loogu gargaari lahaa dadka ay fataahaduhu saameeyeen ee ku nool magaalada Beledweyne.

Gaadiidkan gaaraya 50 ayaa safar dhanka dhulka ah ku tegi doona magaalada Beledweyne ee gobolka Hiiraan, oo ay ka jirto xaalad adag kadib fatahaad uu halkaas ka geystay wabiga Shabeelle.

Deeqdan oo ah tii u horeysay ee nooceeda ah ayaa imanaysa xilli uu barakac horleh ka billowday xaafadaha magaalada Beledweyne ee xarunta gobolka Hiiraan, uuna madaxweynaha HirShabeelle uu dowladda federaalka ugu baaqay inay si deg deg ah ugu soo gurmadaan shacabka Beledweyne.

Si kastaba, Fatahaadda wabiga Shabelle ee Beledweyne ayaa marar badan soo laa’labatay, mana muuqdan qorshayaal guud oo wax looga qabanayo fatahaadaasi oo saameyn ballaaran ku yeelatay nolosha dadka deegaanka iyo guud ahaan dhismaha magaaladaas aadka u weyn.

Garoowe (Caasimada Online) – Isimida SSC oo dhawaan ku biiray waan-waanta hoos loogu dhigayo xiisadda ka dhalatay khilaafka siyaasadeed ee Puntland ayaa soo saaray go’aan cusub.

Isimida SSC oo xalay shir jaraa’id ku qabtay magaalada Garoowe ayaa shaaciyay inay go’aamiyeen in doorashada goleyaasha deegaanka Puntland qabsoonto, kadib kulan ay la qaateen madaxweynaha Puntland Saciid Cabdullaahi Deni.

Kadib doorashadaas ayay sheegeen in la iskugu yimaado wada-tashi guud iyo halka la aadayo 8-da Janaayo ee 2024-ka, iyada oo maalmihii u dambeeyay uu meel sare gaaray khilaafka doorashada Puntland ee u dhaxeeya madaxweyne Deni iyo siyaasiyiinta mucaaradka.

Garaad Jaamac Gaarad Ismaaciil iyo Garaad Cabdirisaaq Garaad Soofe oo ka hadlay shirka jaraa’id ee Isimida ay xalay ku qabteen magaalada Garoowe ayaa shaaciyay in go’aankan ay ku dhawaaqeen ay isla qaateen Madaxweyne Deni.

“Howshaas ciddii ka hortimaada waa cid anaga nala dagaashay. Hadal cad iyo go’aan adag ayaa iskula imaaneyn, ninkii ka horyimaada meel ayaa uga soo wada jeesaneyna,” ayuu yiri Garaad Jaamac Garaad Cali.

“Hoggaankii ayaa nahay anagu, waxaa nagala yaqaana marka howshaas dhamaato (doorashada) in aan iskugu yeerno in aan dhexdaa dhigno oo ka tashano wixii reerku ku guurayo, iyada oo la isku raacsan yahay looga gudbo. Ninkii ka horyimaadana kursiga ha ku fadhiyo ama kan dambe ha fadhiye in gacan bir ah lagu qabto.”

Garaadada ayaa madaxweyne Saciid Cabdullaahi Deni kulan xasaasi ah kula yeeshay magaalada Qardho, kaasi oo is-afgaradka ay caawa shaaciyeen looga gaaray muranka doorashada.

Isimida SSC ayaa waxa ugu dambeyntiina sheegeen in go’aankan ay ku dhawaaqeen ay wakiil uga yihiin dhamaan Isimida Puntland, si miiska wada-hadalka loogu xaliyo khilaafka doorashada Puntland.

Go’aankan Isimida ayaa imanaya xilli hilaafka doorashada ee u dhaxeeya madaxweyne Saciid Deni iyo siyaasiyiinta mucaaradka uu dhawaan isku rogay gacan ka hadalka, kadib markii ciidamo taabacsan labada dhinac ay isku fara saareen magaalada Garoowe, kaasi oo dhaliyay dhimasho iyo dhaawac.

Jeddah (Caasimada Online) – Madaxweynaha Jamhuuriyadda Federaalka Soomaaliya Mudane Xasan Sheekh Maxamuud iyo wafdi uu hoggaaminayo ayaa caawa gaaray magaalada Jidda ee dalka Boqortooyada Sucuudi Carabiya.

Madaxweynaha ayaa berri oo Jimce ah ka qeyb-gali doona Meertada 32-aad ee hoggaamiyeyaasha dalalka ku mideysan Jaamacadda Carabta oo lagu gorfeynayo qadiyadaha wada-jirka ah ee ay wadaagaan dalalka Carabta iyo arrimaha Gobolka.

Xasan Sheekh ayaa waxa uu la wadaagi doona Boqorrada, Amiirrada iyo Madaxda dalalka Carabta xaaladda Soomaaliya, guulaha laga gaaray dowlad-dhiska, dagaalka ka dhanka argagixisada iyo xaqiijinta Soomaali heshiis ah, dunidana heshiis la ah.

Sidoo kale, Madaxweynaha Jamhuuriyadda iyo wafdigiisa ayaa kulan-doceedyo la qaadan doona wufuudda dowladaha Carbeed ee Shirka ka qeyb galaya, si ay u xoojiyaan doorka dalkeenna ee Gobolka iyo Dallada Carbeed.

Madaxweyne Xasan Sheekh ayaa maalmihii dambe ku sugna magaalada Dooxa ee caasimadda dalka Qatar, hakaasi oo caawa uga soo duulay magaalada Jidda ee dalka Boqortooyada Sucuudi Carabiya.

Madaxweynaha ayaa intii uu ku sugna Dooxa waxa uu Qasriga Madaxtooyada dalkaas kulan kula qaatay Amiirka Qatar Mudane Tamiim Binu Xamad Al Taani.

Madaxweyne Xasan Sheekh Maxamuud iyo Amiirka Qatar Sheekh Tamiim Binu Xamad ayaa kulankooda diirradda ku saaray xoojinta iskaashiga labada dal, amniga iyo dhammeystirka hirgelinta heshiisyadii ay horey u galeen Soomaaliya iyo Qatar, taasi oo dhabbaha u xaareyso adkeynta xiriirka diblomaasiyadeed ee labada dowladood.

Amiir Tamiim Binu Xamad ayaa dhankiisa bogaadiyey guulaha miro-dhalka ah ee laga gaaray dagaalka ka dhanka ah kooxda Al-Shabaab, isaga oo dowladda federaalka Soomaaliya ku ammaannay daddallada ay ku bixineyso ka sifeynta dalkeeda argagixisada iyo inay hormuud u noqoto xasillooni waarta oo ka hirgasha gobolka Geeska Afrika.

Si kastaba, Soomaaliya ayaa haatan ku jirto marxalad dagaal, kaasi oo uu haatan taageero caalami ah u raadinayo madaxweyne Xasan Sheekh, waxaana dhawaan la filayaa in dalka ka billowdo wejiga labaad ee dagaalkan oo qeyb ka noqonayaan ciidamo ka socda dalalka deriska.

Doha (Caasimada Online) – Madaxweynaha Jamhuuriyadda Federaalka Soomaaliya Mudane Xasan Sheekh Maxamuud ayaa kulamo ka wada magaalada Dooxa ee caasimadda dalka Qatar, halkaasi oo uu gaaray Talaadadii.

Madaxweynaha ayaa waxa uu kulammo kala duwan la yeeshay hoggaanka rugta ganacsiga Qatar iyo ururka ganacsatada Qatar, isaga oo u soo bandhigay sida dowladda federaalka Soomaaliya ay uga go’an tahay xoojinta fursadaha maalgashiga.

Xasan Sheekh ayaa ganacsatada dalka Qatar waxa uu u iftiimiyey fursadaha maalgashiga ee ka jira dalkeenna, kheyraadka dihan ee ka faa’iideysigoodu uu fursadda u yahay shacabka Soomaaliyeed iyo malgashadeyaasha caalamiga ah.

“Soomaaliya waa dal hodon ah dhanka khayraadka, waxaan leenahay dhul-beeraadkii, baddii iyo barrigii oo dihan. In la maalgashado waxaa hortaagnaa argagixisada dhiigmiiratada ah, iyagana hadda waa ka xoreynaynaa taako kasta oo ka mid ah dalkayaga,” ayuu yiri madaxweyne Xasan Sheekh Maxamuud.

Hal-abuureyaasha ganacsi iyo maalgashadeyaasha waaweyn ee dalka Qatar ayaa dhankooda uga mahad-celiyey Madaxweynaha Jamhuuriyadda Mudane Xasan Sheekh Maxamuud xogtan dhammeystiran ee ku dhiirri-gelinaysa in ay hantidooda geliyaan Soomaaliya.

Sidoo kale waxay si weyn ugu bogaadiyeen guulaha dowladnimada ee ay gaareen shacabka iyo dowladda Soomaaliyeed.

Dhanka kale, Madaxweynaha Soomaaliya ayaa waxa uu kulan gaar ah magaalada Dooxa ee caasimadda dalka Qatar kula yeeshay saraakiil iyo saraakiil ku-xigeenno tababar ku qaadanayo waddankaasi.

Madaxweyne Xasan Sheekh ayaa waxa uu la wadaagay saraakiisha ay Soomaaliya u tababareyso Qatar, warbixin ku aadan xaaladda dalka iyo guulaha laga gaaray dagaalka Al-Shabaab.

Waxa uu hoosta ka xariiqay in idhalinyaradaan looga baahan yahay inay hormuud u noqdaan howl-gallada xoreynta ah ee haatan ka socda koonfurta iyo bartamaha Soomaaliya.

Sidoo kale madaxweynaha ayaa shaaca ka qaaday in Soomaaliya aysan heynin askar la’aan balse ay tahay saraakiil la’aan., “dhibaatada Soomaaliya heysta maanta askari ma’ahan ee waa sarkaal la’aan.”

Si kastaba, Madaxweyne Xasan Sheekh inta uu ku sugan yahay dalkaasi waxay madaxda iyo diblumaasiyiinta kale ee ku wehlinaya safarkaan madaxweynaha ay la saxiixan doonaan dhiggooda dalka Qatar heshiisyo iyo is-afgarad ku qotoma danaha Soomaaliya.

Ilo wareedyo lagu kalsoon yahay ayaa sidoo kale innoo sheegay in socdaalka madaxweynaha ee Qatar ay qeyb ka tahay qorshaha ay dowladda taageero dhaqaale ugu raadinayso dagaal culus ee kula jirto kooxda Al-Shabaab.

Safarkan ayaa noqonaya kii saddexaad ee madaxweyne Xasan Sheekh uu ku tego dalka Qatar, tan iyo markii dib loo doortay 15-kii May ee sanadkii hore.

Qatar ayaa kamid ah dowladdaha Carbeed ee taageera Soomaaliya, waxayna mashaariicyo kala duwan ay ka fulisa gudaha dalka, sida dib u dhiska waddooyinka iyo kuwa kale.

Muqdisho (Caasimada Online) – Ra’iisul Wasaaraha Xukuumadda Jamhuuriyadda Federaalka Soomaaliya Mudane Xamza Cabdi Barre ayaa maanta kulan la yeeshay Golaha Dhaqaalaha Qaranka.

Kulankaan ayaa waxaa looga hadlay qodobada mudnaanta u leh horumarinta dhaqaalaha dalka iyo barnaamijka dayn cafinta, sida lagu sheegay qoraal kasoo baxay xafiiska ra’iisul wasaaraha.

Sidoo kale waxaa kulankaan diirada lagu saaray kobcinta cilmi baarista dhaqaalaha, kobcinta heerka nolosha shacabka Soomaaliyeed iyo wada-shaqeynta hey’adaha kala duwan ee dowladda iyo Golaha Dhaqaalaha Qaranka, si loogu diyaar garoobo koboc dhaqaale waara marxaladda ka dambeysa deyn-cafinta iyo ka xoreynta.

Ra’iisul Wasaaraha ayaa ku bogaadiyay Golaha dadaalkii ay ku bixiyeen diyaarinta wejiga 1-aad ee Hiigsiga Qarni-jirka ee 2060-ka, isaga oo faray inay dardar-geliyaan qorshaha dhaqaalaha dalka kadib deyn cafinta iyo sidii dalku u yeelan lahaa kaaboyaal dhaqaale oo xooggan.

Golaha Dhaqaalaha Qaranka ayaa dhawaan isku raacay in dalka uu yeesho hiigsiga 2060, iyaga oo meel-mariyay talooyinkii ka soo baxay wajiga 1-aad ee geeddi-socodka diyaarinta hiigsiga 2060, kadib kulan ay ku yeesheen Madaxtooyada Qaranka, kaasi oo uu shir-guddoominayey madaxweyne Xasan Sheekh Maxamuud.

Sidoo kale waxay isla meel-dhigay in hiigsiga 2060 uu noqdo dukumentiga hagi doona dhammaan qorshahayaasha horumarineed ee dalka, si loo xaqiijiyo Soomaaliya xasilloon, barwaaqo ah, dadkeeduna haystaan nolol tayadeedu sarrayso.

Golahaan ayaa waxa uu xilligaasi usoo jeediyay xukuumadda federaalka Soomaaliya in la ansixiyo diyaarinta hiigsiga 2060 iyo meel-marinta talooyinka ka soo baxay heerka farsamo ee golaha dhaqaalaha qaranka.

Si kastaba, dowladda federaalka Soomaaliya ayaa waxaa ka go’an soo noolaynta dhaqaalaha dalka iyo dhammaystirka hannaanka dayn cafinta oo hadda meel fiican maraya, iyada oo xukuumadduna qaaday tallaabooyin la xiriira la-dagaalanka musuqa.

Muqdisho (Caasimada Online) – Taliska Hay’adda Nabad Sugidda iyo Sirdoonka Qaranka ee NISA oo howlgal culus qaaday ayaa gacanta kusoo dhigay agab iyo saanad ciidan oo loo waday kooxda Al-Shabaab, kuwaas oo laga soo dajiyay dekedda weyn ee Muqdisho iyo garoonka Aadan Cadde.

Warsaxaafadeed kasoo baxay NISA ayaa waxaa lagu sheegay in agabka ciidamada iyo saanad kale lagu qabtay gudaha dekadda, kuwaas oo ay sheegtay in lagu soo dhex qariyay badeeco ganacsi ahaan looga soo dajiyay dekadda iyo garoonka Muqdisho.

“Ciidanka Hay’adda Sirdoonka iyo Nabad Sugida Qaranka ayaa Dekadda Muqdisho ku qabtay alaabo ay ciidamada Isticmaalaan oo ay ku jiraan Saanad ciidan kuwaas oo loo waday Khawaarijta Al-Shabaab” ayay tiri NISA.

Sirdoonka Soomaaliyaa ayaa intaasi ku daray in uu si dhow ula socday saanaddan ciidan, ilaa iyo waddankii laga soo qaaday iyo mudadii laga shaqaynayay in la keeno gudaha dalka.

NISA ayaa sidoo kale sheegtay in ay la socotay dhaq dhaqaaqa iyo xiriirka shabakad ballaaran oo kala joogtay dibadda, Muqdisho iyo gobollada, sida ay hadalka u dhigtay.

Waxa ay sidoo lale xustay inay ka wada shaqaynayeen, soo iibinta, soo rarista iyo soo dejinta , si loo gaarsiiyo Al-Shabaab, ayada oo dhammaantoodna gacanta lagu soo dhigay.

“Dhammaan Shabakaddii ka shaqaynaysay arrintaan oo ka kooban in ka badan 10 ayaa NISA ay ku guulaysatay inay gacanta kuwada dhigto, iyadoo qofna uusan ka baxsan” ayaa mar kale lagu yiri warsaxaafadeedka NISA.

Dadkan ayaa waxaa sidoo kale ku jiro ganacsato waa weyn oo ay dowladdu siisay ogolaansho ah inay wadanka keenaan waxyaabaha ay u baahanyihiin, si ay ugu ganacsadaan gudaha waddanka.

Hay’adda ayaa sidoo kale la wareegtay afar baabuur oo loo diyaariyay in lagu qaado qalabkaan, si ay u geeyaan deegaanada Al-Shabaab ee ku yaalla gobollada dalka.

Dhanka kale, Hay’adda Nabad Sugidda ayaa sheegtay in agab kale oo ciidan ay ku qabatay garoonka diyaaradaha Aadan Cadde oo laga sameeyay howlgal kale oo qorsheysan, kuwaas oo toos loogu keenay diyaarad.

“Dekadda iyo Airport-ka waa labo il oo dalka u muhiim ah, qabashada qalabkaan iyo alaabaha ayaa caddeyn u ah shaqada adag ay haayaan hay’adaha ammaanka waddanka iyo sida uu u xoogaysatay xogta sirdoonkeenna” ayuu sii raaciyay qoraalka kasoo baxay taliska NISA.

Si kastaba, dowladda Soomaaliya ayaa horay digniin uga soo saartay la shaqeynta iyo la macaamiilka Al-Shabaab oo haatan wajaheysa dagaallo culus oo uga furan gobollada dalka.

Muqdisho (Caasimada Online) – Golaha wasiirada Soomaaliya oo maanta kulan xasaasi ah ku yeeshay magaalada Muqdisho ayaa uga hadlay hal ajende oo ah amniga caasimada.

Kulankan ayaa waxaa guddoomiyay ra’iisul wasaare Xamza Cabdi Barre, ayada oo ay inta badan goobjoog ahaayeen xubnaha golaha wasiirada xukuumadda Soomaaliya.

Sidoo kale waxaa kulanka maanta ka qayb-galay guddoomiyaha gobolka Banaadir, ahna duqa magaalada Muqdisho iyo saraakiisha laamaha ammaanka ee dowladda Soomaaliya.

Ugu horreyn golaha warbixin ka dhageystay duqa Muqdisho iyo taliyeyaasha ciidanka ee goobjooga ahaa, kuwaas oo faahfaahiyay guulaha laga gaaray amniga gobolka Banaadir.

Sidoo kale ra’iisul wasaare Xamza Cabdi Barre oo madasha ka hadlay ayaa sheegay in lagu guuleystay sugidda amniga Muqdisho, isaga oo sheegay in sare u qaadday kalsoonida shacabka Soomaaliyeed ay ku qabaan dowladdooda, sida uu hadalka u dhigauy

Sidoo kale wuxuu intaas ku daray in Xukuumadda #DanQaran oo ka duulaysa Tiirka Amniga iyo Dib u Xorreynta ay qaadday tallaabooyin wax ku ool ah oo suuragaliyay in nolosha shacabka, ganacsiga iyo isu socodka dadweynaha uu si weyn u hagaago.

Ra’iisul wasaaraha ayaa sidoo kale tilmaamay in guulaha la gaaray ay ka mid tahay in magaalada si buuxda la isugu furo, taasi oo masuuliyiinta Qaranka ku dhiirrigelisey in ay tagaan degmo kasta oo gobolka Banaadir ka tirsan, talaabadaas oo aan macquul ahayn muddo ka hor.

Ugu dambeyn ra’iisul wasaare Xamza ayaa saraakiisha hay’adaha amniga ku ammaanay dadaallada ay wadaan ee lagu xasillinayo amniga caasimada, isagoo tilmaamay in hadafka Xukuumadda Dan-Qaran uu yahay in magaalada Muqdisho laga dhigo caasimadda ugu amniga badan qaaradda Afrika, wuxuuna faray in ay dadaalkooda sii laban-laabaan.

Magaalada Muqdisho ayaa waxaa qayb ahaan amniga lagu wareejiyay ciidamo boolis milataaro ah oo kusoo tababartay Uganda, kuwaas oo guul ka keenay amniga caasimada.

Muqdisho (Caasimada Online) – Xeer Ilaaliyaha Guud ee Qaranka, Dr. Saleebaan Maxamed Maxamuud oo maanta qoraal soo saaray ayaa sheegay in shabakad ka ganacsaneysay maan-dooriye oo dhowaan lagu qabtay Muqdisho ay u gudbiyeen Maxkamadda Gobolka Banaadir.

Xeer ilaalinta ayaa shaaca ka qaaday in marka hore la qabtay nin hoggaaminayay kooxdan, kadibna lagu oo qabtay raggii kale ee la shaqeynaay, kadib howlgal ka dhacay gudaha caasimada.

Xafiiska Xeer Ilaalinta ayaa sidoo kale sheegay in shabakaddan ay ku howlanayd sameynta iyo ka ganacsiga maan-dooriyaha gaar ahaan Calaqa oo dhibaato ku hayo bulshadeenna.

“Xafiiiska Xeer-ilaalinta Guud ee Qaranka waxa uu Maxkamadda Gobolka Banaadir horgeeyay shabakad abaabulan, kuna howlanayd sameynta ka iyo ganacsiga maan-dooriyaha gaar ahaan Calaqa,” ayaa lagu yiri war kasoo baxay Xeer Ilaalinta Qaranka.

Sidoo kale waxa ay Xeer Ilaalintu intaasi kusii dartay in la guda-gali doono maxkamadeynta raggan, kadibna tallaabo adag laga qaadi doono.

“Marka ay baarista soo dhammaato waxaa loo gudbin doonaa maxkamadda, si loo maxkamadeeyo,” ayuu mar kale lagu yiri warqadda.

Dhanka kale, Xeer Ilaaliyaha Guud ew Qaranka ayaa digniin culus u diray ganacsatada soo dajisa maan-dooriyaha iyo kuwa isticmaala, isaga oo sheegay inay la dagaalami doonaan.

Xeer Ilaalinta ayaa sidoo kale boggaadisay howlgallada ay wadaan ciidamada ammaanka ee lagula dagaalamayo maan-dooriyaha, isla-markaana uu horkacayo gobolka Banaadir.

Ugu dambeyn Xeer Ilaaliyaha Guud ee Qaranka ayaa baaq u diray shacabka Soomaaliyeed, wuxuuna ku booriyay in ay qayb ka noqdaan dagaalka ka dhanka ah maan-dooriyaha.

“Waxaan bulshada Soomaaliyeed kula dardaarmayaa inay qayb ka noqdaan dagaalanka lagu ciribtirayo maan-dooriyaha oo ay la soo wadaagaan warbixinada dembi, ayaga oo soo wacay 4949” ayaa lagu soo gabaganeeyay qoraalka Xafiiska Xeer Ilaalinta.

X

Muqdisho (Caasimada Online) – Beesha Caalamka oo warsaxaafadeed kasoo saartay xaaladda adag ee Puntland ayaa faro-gelisay muranka hareeyay doorashada maamulkaasi oo ay isku hayaan xukuumadda madaxweyne Saciid Deni iyo ururada kale ee siyaasadda.

Bayaankan kooban ayaa waxa si wadajir ah usoo saaray dalal ay kamid yihiin, Mareykanka, UK, Switzerland, Sweden, Danmark, Norway, Germany iyo weliba Midowga Yurub.

Beesha Caalamka ayaa shaaca ka qaaday inay si dhow ula socoto doorashada Puntland, oo haatan isku rogtay gacan ka hadal, kadib dagaal habeenkii Talaadada ka dhacay Garoowe.

Qoraalka ayaa sidoo kale xusay in Beesha Caalamka ay aad uga walaacsan tahay rabshadaha kasoo cusboonaaday Garoowe ee ka dhashay doorashada golaha geeaanka.

“Saaxiibada caalamiga ah, waxay si dhow ula socdaan hanaanka dimuqraadiyeynta ee Puntland, waxayna aad uga walaacsan yihiin rabshadihii dhawaan ka dhacay ee la xiriira doorashada golaha deegaanka ee soo socota,” ayaa lagu yiri qoraalka beesha caalamka.

Sidoo kale Beesha Caalamka ayaa farriin culus u dirtay dhinacyada isku haya siyaasadda Puntland, oo ay ugu baaqday in miiska wada-hadalka lagu xaliyo xiisadda ka dhalatay doorashooyinka.

“Rabshadduhu xal maaha, waxaanu ku boorinaynaa wada-hadal dhexmara daneeyayaasha (saamileyda siyaasadda Puntland) si loo xaliyo khilaafaadka.” ayuu sii raaciyay qoraalka.

Dhowaan ayay ahayd markii Madasha Siyaasadda Puntland oo ay ku mideysan yiihiin xubnahaha mucaraadka ay hortimid doorashooyinka golaha deegaanka ee Puntland, kadib shirweyne xasaasi ah oo ay ku yeesheen Garoowe, kaas oo ay kasoo saareen bayaan culus.

Sidoo kale siyaasiyiinta ayaa shaaca ka qaaday in qaabka loo wado doorashada ay horseedayso xasilooni darro, ayaga oo dhaliil xoogan u jeediyay hoggaanka Puntland.

“Shirku wuxuu ugu baaqayaa xukuumadda Puntland in ay joojiso doorashooyinka aan heshiiska lagu ahayn oo sababi kara xasilooni darro iyo qalalaase” ayaa lagu yiri bayaanka.

Si kastaba, Puntland ayaa haatan wajaheysa xaalad siyaasadeed oo ah tii ugu darneyd, taas oo ka dhalatay doorashada iyo khilaaf kale oo kala dhexeeyo dowladda federaalka Soomaaliya.

Dooxa (Caasimada Online) – Madaxweynaha Soomaaliya, Mudane Xasan Sheekh Maxamuud oo haatan ku sugan magaalada Dooxa ee caasimada dalka Qatar ayaa kulan gaar ah la yeeshay saraakiil iyo saraakiil ku xigeenno tababar ku qaadanayo waddankaasi.

Madaxweyne Xasan Sheekh oo khudbad u jeediyay saraakiishan dhalinyarada ah ayaa ka hadlay arrimo xasaasi ah, sida dagaalka Al-Shabaab, doorka ATMIS iyo ammaanka guud.

Sidoo kale madaxweynaha ayaa shaaca ka qaaday in Soomaaliya aysan heynin askar la’aan balse ay tahay saraakiil la’aan. “Dhibaatada Soomaaliya heysta maanta Askari ma’ahan ee waa Sarkaal la’aan,” ayuu yiri khudbaddiisa ku yiri madaxweyne Xasan Sheekh Maxamuud.

Waxaa kale oo uu madaxweynuhu la wadaagay saraakiisha ay Soomaaliya u tababareyso Qatar, warbixin ku aadan xaaladda dalka iyo guulaha laga gaaray dagaalka Al-Shabaab, isaga oo sidoo kale sheegay in dhalinyaradaan looga baahan yahay inay hormuud u noqdaan howlgallada xoreynta ah ee haatan ka socda koonurta iyo bartamaha Soomaaliya.

Dhanka kale, waxa uu hoosta ka xariiqay in Ciidamada Xoogga dalka Soomaaliyeed ay qaadeen tallaabo aad loogu baahnaa, isla-markaana ay qabteen wax ay 15 sano qaban weysan AMISOM oo hadda loo yaqaano ATMIS, taas oo muddo fog ka howlgaleysa dalka.

“AMISOM oo haysata Taangiyaal, Beebayaal, Madaafiic iyo waxl waliba, 15 sano way noo sameen waayeen waxa ay innoo sameeyeen Ciidanka xogga dalka muddada yar,” ayuu yiri.

Madaxweynaha dowladda federaalka oo hadalkiisa sii wata ayaa xusay in Soomaaliya aysan cid kale wax u qaban karin, isla-markaana ay iyadu kaliya dhisan karto dowladdeeda, sidaas daraadeedna loo baahanyahay in la’is kaashado guud ahaan dadka Soomaaliyeed.

“Dalkeenna isaga oo dowlad leh oo dhisan annagaa duminnay, hadda in aan dhisno oo dowlad u yeelno annaga uu naga sugayaa, gaashaanbuur NETO haddii ay timaado dowlad nooma dhisi karto. 33 dawladood Ciidankooda ayaa Soomaaliya yimaaday dhawr sano ka dib way isaga baxeen.” ayuu mar kale khudbaddiisa ku yiri madaxweynaha Soomaaliya.

Hadalkan ayaa kusoo aadayo, ayada oo haatan Soomaaliya ay dagaal adag kula jirto kooxda Al-Shabaab, kaas oo ay guullo waa weyn kasoo hoyeen ciidamada dowladda federaalka Soomaaliya iyo kuwa dadka deegaanka ee haatan loo yaqaano Macawiisleyda.