Muqdisho (Caasimada Online) – Wararka hadda kusoo dhacay xafiiska warqabadka Caasimadda Online ee magaalada Muqdisho ayaa ka dhawaajinayo inay dowladda Soomaaliya qaaday tallaabo aad loogu riyaaqay markii ay dalka ka musaafurisay dad kasoo jeedo dalka Kenya.

Wararka ayaa xaqiijinayo in Maanta Magaalada Muqdisho laga musaafuriyey laba nin oo kasoo jeedo dalka Kenya markii lagu eedeeyey inay dalka kusoo galeyn sharci darro.

Labadan nin ayaa la  sheegay in si sharci darro ah ay ku joogeen Soomaaliya isla markaana ay markii horana si dhuumaaleysi ah kusoo galeen.

Tallaabooyinka Soomaaliya looga musafurinayo dadka ajaanibta ah weliba kuwa kasoo jeedo Kenya ayaa maalmihii dambe si xooli ah uga socdo Magaalada Muqdisho taasoo muujineyso awoodda Dowladda.

Dhowaan Maamulka Galmudug ayaa Musaafuriyay kalumeysato reer Yemen ah oo si sharcidarro ah kaga kaga jilaabanayay Xeebaha badda Soomaaliya .

Kenya ayaa soohdin la wadaagta Soomaaliya waxaana shaqaale badan ay ka joogaan Soomaaliya kuwaas oo ka shaqeeya Hotelada iyo Dhismooyinka ka socda caasimadda Muqdisho waxana jira shaqaale badan oo u soo shaqo raadsaday Soomaaliya.

Dowladda Kenya ayaa looga bartay inay dalkeeda markasta kasoo musaafuriso muwaadiniinta kasoo jeedo wadanka Soopmaaliya.

Dadka Muqdisho ayaa si weyn usoo dhaweeyey talaabada ay dowladda maanta qaaday waxayna sheegeyn inay midaas keeni doonto in Kenya ay iska dhaafto Soomaalida ay soo musaafurineyso ama ay dalka Soomaaliya isaga baxdo.

Caasimada Online
Xafiiska Muqdisho
[email protected]

Muqdisho (Caasimada Online) – Wixii lasoo jiitamaba waxay xogta ay heleyso caasimadda Online sheegeysaa in Ra’isulwasaaraha Soomaaliya Xasan Cali Kheyre uu dhameystiray liiska golihiisa wasiirada iyadoo aysan jiri doonin cid dambe oo lagu soo dari doono.

Warar ku dhaw dhaw xafiiska Ra’isulwasaaraha ayaa Caasimadda Online u xaqiijiyey inuu Ra’isulwasaaraha qoray liiska golaha wasiirada ee kama dambeysta ah kadib wadatashiyo socday dhawr asbuuc.

Su,aasha soo laalaabatay ee ah goormaa la magacaabayaa golaha wasiirad ayaa u muuqato inay soo dhamaatay kadib markii ay Caasimadda Online heshay waqtiga rasmiga ah ee la filayo inuu Kheyre ku dhawaaqo golihiisa wasiirada.

Xogta ayaa sheegeyso in kama dambeyso uu Ra’isulwasaaraha ku dhawaaqi doono wasiiradiisa cusub maalinta Jimcaha ah oo ay taarikhdu ku beegan tahay 17 March 2017.

Dadka intooda badan ayaa filayey in wasiirada lagu dhawaaqo doono maalin Arbaco ah iyadoo arbaco kasta dhagta loo taagi jiray xafiiska Kheyre balse midaas waxay noqotay mid aan dhici doonin in arbaco lagu dhawaaqo.

Ujeedka ugu weyn ee keentay in wasiirada lagu dhawaaqo maalin aan arbaco aheyn ayaa ah in magacaabista lagu aadiyo maalin u dhaw xilliga uu madaxweynaha ka dhoofayo garoonka diyaaradaha Muqdisho si uu uga qeybgalo shirka IGAD uga furmi doono caasimadda Kenya ee Nairobi.

Tallaabadaan ah in marka wax la magacaabo durba laga dhuufo Magaalada ayaa aheyd siyaasad lagu yaqaanay Siyaad Barre oo uu soo min guuriyey madaxweynaha cusub ee Soomaaliya Maxamed Cabdullaahi Farmaajo.

Caasimada Online
Xafiiska Muqdisho
[email protected]

Qahira (Caasimada Online)-War goordhow kasoo baxaya Xafiiska Xoghayaha Guud ee Ururka Jaamacadda Carabta, Dr. Ahmed Abu Kheyd ayaa waxaa lagu sheegay inaanu garankarin sababta Dowladaha Carabta ay kaga gaabinayaan garab istaaga Somalia.

Xoghayaha ayaa sheegay in Dowladaha Carabta uu ugu baaqayo inay muujiyaan garab istaaga Somalia, waxa uuna cadeeyay in Somalia ay kaalinta koowad ka galeyso Dowladaha la liita Abaarta.

Xoghayaha waxa uu Dowladaha Carabta ku booriyay inaan indhaha laga qabsan abaarta kusii faafeysa Somalia, waxa uuna tilmaamay in Abaaraha ay gaaren deegaano hor leh.

Wuxuu sheegay in Dowladaha Carabta iyo Hay’addaha Samafalka Carbeed in sida ugu dhaqsaha badan Gargaar Dhaqaale iyo Sahay Aadminimo u gaarsiiyaan dadka Soomaalida ee dhibaatadda kala kulmay Macluusha iyo Abaaraha ka jira qeybo ka mid ah Somalia.

Maxamuud Cafiifi oo ah Afhayeenka Xoghayaha Guud ee Ururka Jaamacadda Carabta, ayaa sheegay in Xoghayaha uu aad uga xanuunsaday abaarta ka jirta Somalia, kadib markii uu helay muuqaal laga diyaariyay abaaraha.

Muuqaalka ayuu sheegay in Xoghayaha la ilmeeyay kadib markii uu arkay qoysas is dulsaaran oo ku dhamaaday abaaraha.

Cafiifi waxa uu intaa raaciyay in Xoghayaha Guud Ahmed Abu Kheyd uu la kulmay qaar ka mid ah Wasiirada Arrimaha Dibedda ee dalalka Carabta oo uu kala hadlay Xaalladda Macluusha ee ka jirta Somalia, kuna booriyey inay si ficil leh ugu gurmadaan Walaalaha Soomaalida ee dhibaataysan.

Xoghayaha Guud ee Ururka Jaamacadda Carabta, waxa uu ku baaqay inay DFS lala garab istaago Dhaqaale iyo Farsamo, si loo dhaqaajiyo Gurmadka la gaarsiinayo dadka macluulsan.

Haddalka iyo Baaqa kasoo baxay Xoghayaha Guud ee Ururka Jaamacadda Carabta, ayaa kusoo beegmaaya xili Dowladaha reer Galbeedka ay kusoo hormareen Gurmadka abaaraha Somalia.

Caasimada Online
Xafiiska Qahira
[email protected]

Muqdisho (Caasimada Online)-Dowlada Mareykanka ayaa shaaca ka qaaday in dhawaan ay tababar u bilaabi doonto dhalinyaro ka tirsan Sirdoonka Somalia.

Dhalinyaradaani ayaa la sheegay in lasiin doono tababar dhanka ka hortaga lacagaha dollarka ee been abuurka ah, si loo kala saaro lacagaha fiican iyo kuwa faalsada ah.

Telefishinka CNBC ee dalka Maraykanka ayaa shaaciyey in Ciidanka Sirdoonka Mareykanka qorshahooda qeyb ka yahay sidii Saraakiisha Maaliyadda iyo kuwa Sirdoonka Somalia loo bari lahaa Teknoolajiyadda lagu ogaan karo Lacagaha Dollarka Maraykanka ee la been abuuray.

Sargaal u waramaayay CNBCTV ayaa sheegay in tababarkaasi ay bixin doonaan Saraakiil ka tirsan Sirdoonka CIA-da.

Waxa uu Sargaalka sheegay in Saraakiisha CIA-da ee bixin doona tababarka ay caawinaad ka heli doonaan Howlwadeeno ka tirsan Hay’adda Lacagaha Adduunka (IMF).

Dhalinyarada Soomaalida ah ee loo tababari doono kala sifeynta lacagaha doolarka ah, ayaa si gaara looga soo dhex xuli doonaa Hay’adda Sirdoonka iyo Nabadsugida Qaranka ee NISA.

Hay’adda IMF ayaa horey u sheegtay in 98% Lacagaha Shillin Soomaaliga ee haatan la isticmaalo yihiin kuwo Macmal ah oo la been abuuray.

Somalia ayaa dadaal ugu jirta sidii ay u habayn lahayd Nidaamka Lacagaha, waxayna Somalia ka mid tahay dalalka ugu saboolsan Caalaqmka, sida lagu xusay Xogta Bangiga Adduunka.

Geesta kale, Hay’adda La-socota Hufnaanta ee Transparency International waxay Somalia ku tilmaamtay dalka kaalinta ugu hooseysa kaga jira Waddamadda ugu musuqa badan Caalamka.

Caasimada Online
Xafiiska Muqdisho
[email protected]

Muqdisho (Caasimada Online) – Madaxweynaha Jamhuuriyadda Federaalka Soomaaliya Maxamed C/llaahi Farmaajo ayaa maanta garroonka diyaaradaha Aadan Cadde ee magaalada Muqdisho kula kulmay Xoghayaha Arimaha Dibadda ee dalka Ingiriiska  Boris Johnson oo saaka soo gaaray gudaha dalka.

Xoghayaha oo saaka socdaal aan horay loo sii shaacin ku yimid Muqdisho,waxaa garoonka diyaaradaha ku soo dhoweeyay  mas’uuliyiin sare oo ka tirsan dowladda Soomaaliya.

Madaxweynaha iyo xog ayaa wada qaatay kulan khaas ah oo la iskula soo hadal qaaday arrimo badan oo ku aadan Soomaaliya.

Madaxweynaha iyo Xoghayaha ayaa waxa ay ka wadahadleen, arrimo dhowr ah oo ay ku jiraan xoojiinta xiriirka  laba dal ,dardargalinta taageeerada wax ku oolka ah ee Ingiriisku siiyo dowladda Soomaaliya iyo taakuleynta howlaha samofal ee xaaladda abaareed ee ka jirta dalka.

Madaxweynaha ayaa xoghayaha Arrimaha dibadda ee Ingiriiska ka codsaday inay dowladiisa ka qeyb qaadato gargaarka loo fidinayo dadka ay saameysay abaaraha ee ku sugan gobolo badan oo ka tirsan Soomaaliya.

Xoghayaha Arrimaha Dibadda Ingiriiska, ayaa la sheegay inuuu balan qaaday in dowladiisu ay ka qayb qaadaneyso samato bixinta dadka ay abaarta saameynta ku yeelatay iyo sdii gurmad deg deg ah loo gaarsiin lahaa malaayiinka qof ee kaalmada u baahan.

Ujeedka imaanshiyaha Xoghayaha Arrimaha Dibadda Ingiriiska Boris Johnson, ayaa lagu macneeyay sidii uu ugu kuur gali lahaa xaaladda dhabta ah e ka jirta.

Xoghayaha ayaa Muqdisho uga dhawaaqay inay dowladda Ingiriiska 100 Milyan siineyso Soomaaliya si wax looga qabto abaaraha  saameynta ku yeeshay Shacabka Soomaaliyeed

Kulankaasi waxaa sidoo kale looga hadlay ,shirka London  ee bisha May ka dhici doona, kaas oo la xiriira  arrimaha Somalia.

Caasimada Online
Xafiiska Muqdisho
[email protected]

Muqdisho (Caasimada Online) – Madaxweynaha Soomaaliya ayaa dhawaan kormeer ku tagay xabsiga dhexe ee Muqdisho markaas oo uu soo booqday dadka ku xiran xabsiga, wuxuuna qiimeyn weyn ku sameeyey dhanka caafimaad oo la sheegay inay dhawr jeer dad ku dhinteyn xabsiga dhexdiisa.

Haddaba madaxweynaha ayaa markii uu halkaas tagay amray in si deg deg ah uu taliyaha ciidamada Asluubta Soomaaliyeed uga  sameeyo xabsiga dhexdiisa xarun Caafimaad oo lagu daaweenayo dadka xabsiga ku xiran.

Haddaba Taliyaha ciidamada asluubta Soomaaliyeed, Sarreeye Guud Bashiir Maxamed Jaamac oo ka jawaabayo amarka madaxweynaha ayaa xariga ka jaray xarun caafimaad oo xabsiga dhexe ee Xamar laga hirgaliyey, waxaana xaruntan caafimaad yaala Qalabka lagu baaro cudurada kala duwan gaar ahaan T.P da, iyadoo Maxbuuskii laga helo cudurkan la siinayo daawooyinkii loogu talagalay.

Wasaaradda Caafimaadka ee xukuumadda Soomaaliya, taliska ciidamada asluubta Soomaaliyeed iyo hay’adda caafimaadka adduunka ee WHO, ayaana iska kaashaday hirgalinta xaruntan caafimaad.

Taliyaha Ciidanka Asluubta Soomaaliyeed,  Sareeye Guud Bashiir Maxamed Jaamac, ayaa sheegay in Xaruntan Caafimaad loogu tala galay in lagu daweeyo maxaabiista iyo skarta ciidanka asluubta Soomaaliyeed, isagoo tilmaamay in dhaqaatiirta ka shaqeyneyso ay ka tirsan yihiin  Ciidanka Asluubta, ayna aqoon u leeyihiin caafimaadka.

Amarka uu bixiyey madaxweynaha iyo sida uu taliyaha asluubta durba uga jawaabay ayaa muujineyso sida ay dowladda cusub uga go’an tahay inay wadanka wax badan ka badasho  waxaana arrintaas si weyn usoo dhaweeyey shacabka kala duwan ee ku nool Muqdisho.

Madaxweynaha Soomaaliya ayaa sameenayo tallaabo kasta oo uu kusoo jiidan karo shacabka Muqdisho si ay dowladiisa u noqot mid waxyar leh oo wadanka wax badan kuso kodhiso.

Caasimada Online
Xafiiska Muqdisho
[email protected]

Muqdisho (Caasimada Online) – Warar soo baxaaya ayaa sheegaya in Mohamud Ahmed Nur Tarsan uu kamid noqday Siyaasiyiinta sida dhow ula shaqeysa Madaxweynaha Somalia Maxamed C/llahi Farmaajo.

Tarsan oo kamid ahaa Musharaxiintii loolanka kula jiray Farmaajo ayaa iminka noqday shaqsiga kaliya ee uu wax ka maqlo Madaxweynaha waxa uuna ka caawiyaa dhinacyada Siyaasada iyo Bulshada.

Tarsan oo ah rafiiqa koowaad ee Madaxweynaha ayaa baadi goob ugu jira xilka Guddoomiyaha Gobolka Banaadir si uu qeyb uga noqdo isbedelka dalka.

Tarsan ayaa helida xilkaasi u kaashanaaya Mas’uuliyiin dhowr ah, inkastoo uu iska iibiyay Madaxweynaha haddana waxaa xilkaasi ku heysta Musharax kamid ahaa Musharaxiintii laga guuleystay.

Madaxweynaha ayaa isna doonaaya in Tarsan uu kasii mid ahaado shaqsiyaadka garabka ka siiya arrimaha Siyaasada, waxaana xusid mudan in Tarsan uu heebad u leeyahay la dhaqanka iyo kasbashada Bulshada.

Tarsan waxa uu si KMG ah ula sii shaqeyn doonaa Madaxweynaha waxaana suuragal ah inay ku kala tagaan Siyaasada waa haddii uu waayo xilka uu iminka doonaayo.

Dhinaca kale, Madaxweyne Farmaajo ayaa qudhiisa xilkaasi la doonaayo Siyaasi kale, waxaana adag in la ogaado qorshaha dhabta ah ee uu Madaxweynaha ka damacsan yahay Tarsan.

Caaasimada Onlie
Xafiiska Muqdisho
[email protected]

Muqdisho (Caasimada Online)-Madaxweynaha JFS Maxamed C/llahi Farmaajo ayaa lagu wadaa in go’aan kama danbeys ah uu ka gaaro Taliyayaasha Hay’adaha amaanka Somalia.

ilo ku dho dhow Madaxweynaha ayaa sheegay in Farmaajo uu qaadi doono talaabo lidi ku ah Taliyayaasha Hay’adaha amaanka waxaana la xaqiijiyay in dhammaantooda uu ku bedeli doono.

Waxa uu ila wareedka intaa ku daray in Madaxweynaha uu dib usoo celin doono Khubaro dhanka amaanka oo horay ula soo shaqeeyay dowladii Dhexe ee Somalia.

Qorshaha Farmaajo ee ku aadan Isbedelka Taliyayaasha ayaa la sheegay inay ku hormari doonaan Taliyaha Booliska iyo NISA oo la rumeysan yahay in lagala xaajoonaayo amniga magaalada Muqdisho.

Khubarada dhanka amaanka ee loo kala dhiibi doono xilalkaasi ayaa la sheegay inay kasoo kala jeedan Beelaha Daarood iyo Hawiye, waxa uuna qorshuhu yahay in isbedelkaasi uu dhaco magacaabida Golaha Wasiirada kadib.

Madaxweynaha Somalia Maxamed C/llahi Farmaajo ayaa horay u sheegay inaysan wada shaqeyn doonin Taliyayaasha Hay’adaha amaanka waa haddii aan wax laga bedelin amni darida ka taagan magaalada Muqdisho.

Magaalada Muqdisho ayaa marti galineysa Qaraxyo iyo dilal joogta ah, oo loo geysanaayo Madaxda, Saraakiisha, Ciidamada, Odayaasha iyo Shacabka.

Caasimada Online

Xafiiska Muqdisho

[email protected]

Muqdisho (Caasimada Online) – Warar hoose oo ay caasimadda Online ka heshay safaaradda dowladda Turkiga ee Magaalada Muqdisho ayaa xaqiijinayo in ciidamo ka tirsan dowladda Turkiga ay dhawaan imaan doonaan Magaalada Muqdisho.

Xogtaan ay Caasimadda heshay oo ah mid la isku haleyn karo ayaa sheegeyso inay dowladda Turkiga Muqdisho dhawaan usoo direyso tiro badan oo ka tirsan ciidamadeeda sida gaarka ah u tababar.

Tirada ciidamadaan ayaa lagu sheegay inay gaarayaa ilaa 4000  (Afar Kun) oo askari kuwaas oo dhawaan la filayo inay Muqdisho imaadaan, weliba waa ciidamo ay dowladda Turkiga si gaar ah usoo tababartay.

Wararka ayaa sheegayo inay ciidamadaan tababaro gaar ah siin doonaan Ciidamo ay dowladda Soomaaliya u rabto in si gaar ah loogu tababaro si ay u sugaan amniga Muqdisho iyo qeyb kamid ah Soomaaliya.

Turkiga ayaa xero lagu tababari doono ciidamada Dowladda ka sameysay Muqdisho waxaana dhawaan lagu xareyn doonaa kumanaan kun oo askari oo ay soo qori doonto dowladda Soomaaliya.

Sidoo kale warar kale ayaa sheegayo in ciidamadaan sidoo kale ay dowladda ka caawin doonaan suggidda amniga Muqdisho maadaama ay si fiican ugu tababaran yihiin  ka hor tagga qaraxyada iyo sidoo kale weerarada, gaar ahaan qaraxyada ay sameeyaan Al-shabaa, waxayna si gaar ah u ilaalin doonaan xarumaha dowladda.

Ciidamadan ayaa gacan ka geysan doona in la helo ciidamo awood badan leh oo Soomaaliyeed, waxayna si hagar la’aaneed ula shaqeyn doonaan shacabka iyo dowladda Soomaaliya.

Ilaa hadda si rasmi ah looma xaqiijin waqtiga rasmiga ah ee ciidamadaan soo gaarayaan Magaalada Muqdisho balse waxaa la filayaa inay noqon doonto marka uu Kheyre ku dhawaaqo golaha wasiirada.

Dowladda Turkiga ayaa wada shaqeyn dhaw la leh dowladda Soomaaliya, waana dowlad ay aad u jecel yihiin shacabka Muqdisho kadib markii ay si weyn ugu gurmatay xilligii ay abaaraha xun ku dhufteyn Soomaaliya.

Caasimada Online
Xafiiska Muqdisho
[email protected]