Muqdisho (Caasimada Online) – Xiriirka Dowladda Federaalka Soomaaliya iyo Shiinaha oo sii xoogeysanaya ayaa sababay in dhawaan dal-ku-galka laga mamnuuco baasaboorka Taiwan, oo si weyn isku hayaan xukuumadda Beijing.

Labada dal oo muddooyinkii kadib uu xiriirkooda heer sare ahaa ayaa sii xoojiyay iskaashiga labada dhinac, iyada oo maanta Safiirka Shiinaha iyo Wasiirka Kalluumeysiga iyo Dhaqaalaha Buluugga ah ay kulan muhiim ah ku yeesheen magaalada Muqdisho.

Wasiir Axmed Xasan Aadan ayaa xarunta wasaaradda ku qaabilay Danjire Wang Yu, iyo wafdi uu hoggaaminayo. Waxaa kulanka qeyb ka ahaa Agaasimaha Guud ee Wasaaradda, Mudane Cabdi Diirshe.

Intii uu socday kulanka labada dhinac waxa ay ka wadda hadleen xoojinta xiriirka taariikhiga ah ee u dhexeeya Soomaaliya iyo Shiinaha, iyaga oo carabka ku adkeeyay muhiimadda ay leedahay ballaarinta iskaashiga dhaqaale gaar ahaan kan la xiriira kalluumeysiga iyo dhaqaalaha buluugga ah.

Wasiir Axmed Xasan ayaa boggaadiyay xiriirka iskaashi ee ganacsiga kalluumeysiga iyo dhaqaalaha buluugga ah ee labada dal, wuxuuna muujiyay sida ay wasaaradda uga go’an tahay horumarinta fursadaha suuq-geynta kalluunka Soomaaliyeed.

Danjire Wang Yu ayaa dhankiisa sheegay in Dowladda Shiinaha ay diyaar u tahay in ay suuqyadeeda waaweyn u furto ganacsatada Soomaaliyeed ee ku hawlan kalluumeysiga iyo dhaqaalaha buluugga ah, isagoo xusay in badeecadahaas si canshuur-dhaaf ah loogu iibin karo gudaha Shiinaha.

Sidoo kale, labada dhinac waxay isla garteen in ay si wadajir ah uga shaqeeyaan la-dagaallanka kalluumeysiga sharci darrada ah, ayna taageeraan horumarinta ganacsiga kalluumeysiga sharciyeysan iyo kobcinta dhaqaalaha buluugga ah ee u dhexeeya labada dal.

Muqdisho (Caasimada Online) –Madaxweynaha Soomaaliya Xasan Sheekh Maxamuud ayaa maanta ku qaabilay Ms. Harriet Mathews, Agaasimaha Guud ee FCDO ee UK u qaabilsan Afrika iyo Ameerika kulan wax ku ool ah oo ku saabsan iskaashiga Soomaaliya iyo UK.

Wada-hadallada ayaa diiradda lagu saaray amniga oo ay ku jiraan howlgalka AUSSOM, horumarka siyaasadeed, iyo joogtaynta guulaha amniga, iyadoo loo marayo taageero iyo isku-dubarid labada dhinac ah.

Madaxweynaha ayaa xaqiijiyay sida ay Soomaaliya uga go’an tahay sii xoojinta iskaashiga istiraatijiyadeed ee ay la leedahay UK, taas oo xoojinaysa xasilloonida, doorashada caalamiga ah iyo nabadda mustaqbalka fog ee gobolka.

Madaxweynaha ayaa kala hadlay masuulkaan ka socday dowladda UK bixinta dhaqaalaha ay ku howlgelayaan ciidamada Midowga Afrika ee AUSSOM.

Dowladda Soomaaliya ayaa dhaqaale u raadineysa howlgalka cusub ee AUSSOM, dowladaha caalamka ee Soomaaliya ka taageeri jiray bixinta dhaqaalaha amniga, gaar ahaan ciidamada Midowga Afrika, maadaama uu dhamaaday howlgalkii horay loogu heshiiyey ee ATMIS.

Bilaha soo socda ayaa lagu wadaa in ciidamada howlgalka AUSSOM ay ka shaqo bilaabaan Soomaaliya, balse weli meel ma saara dhaqaalihii ay ku howlgeli lahaayeen waxaana socda dadaallo ay wado dowladda Soomaaliya.

Ku dhawaad 20 sano ayaa Soomaaliya laga taageerayaa bixinta dhaqaalaha ay ku howlgelayaan ciidmaada Midowga Afrika, waxaana hadda la sheegayaa in caalamku ka niyad jabay, maadaama hormar badan aan laga gaarin dagaalka argagixisada iyo sugidda ammaanka.

Muqdisho (Caasimada Online) – Fal-celin xooggan iyo hadal-heyn ayaa ka dhalatay go’aannadii kasoo baxay shirka Golaha Wadatashiga Qaran ee xalay lagu soo gabagabeeyay magaalada Muqdisho, kaas oo laga soo saaray war-saxaafadeed ka kooban 10 qodob oo xasaasi ah.

Qodobada ugu muhiimsan ayaa waxaa kamid ah in xaaladda culus ee Jubbaland loo xil-saaray inay ka soo tala-bixso Wasaaradda Arrimaha Gudaha Dowladda Federaalka Soomaaliya, si loo helo maamul sharci ah.

“Golaha Wadatashiga Qaranka, wuxuu isku raacay in wasaaradda arrimaha gudaha federaalka ay talo iyo soo jeedin ka keento xaaladda dowlad goboleedka Jubbaland, si waafaqsan dastuurka dalka, si loo helo nidaam dowlad goboleed oo sharci ah,” ayaa lagu yiri qodobkaas.

Sidoo kale waxaa si rasmi ah loo aqoonsaday Dawlad-goboleedka SSC-Khaatumo, waxaana shirweynaha dhismaha maamulkaas iyo dhameystirka hanaanka dowladnimo ee SSC loo xil-saaray inay ka shaqeyso wasaaradda arrimaha gudaha dowladda federaalka Soomaaliya.

Golaha ayaa sidoo kale isku raacay in Dawlad-goboleedyada dalka ay guddiga doorashooyinka kala shaqeeyaan diiwaan-gelinta dadweynaha, si loo qabto doorasho xor iyo xalaal ah.

Qodob ka mid ah bayaanka waxaa hambalyo loogu diray xisbiyada is diiwaan geliyey, waxaana bayaankaan lagu taageeray hanaanka xisbiyada badan ee dalka ka dhaqan galay.

Haddaba side looga fal-celiyay go’aannada kasoo baxay shirka Golaha Wadatashiga Qaran?

Cabdirsaaq Sheekh Xasan: “GWQ kala bar sharci kuma joogaan, oo mudo xiloodkoodi waa dhamaaday, sidee doorasho xor iyo xalaal ah oga hadli karaan ayagoo baadil ku joogo xukunka?”.

Sharma’arke Cali: “Jubbaland-taan aan dhaafsaneyn magaalada Kismaayo waan qabaa in laga tashto”.

Cabdifitaax Dhaqaaje: “Qodobka aqoonsiga SSC-Khaatumo aad baan ugu farxay Wallaahi”.

Maxamed Cabdulqaadir: “Waa yaabee waxeey yiraahdeen maamulka Jubbaland sharci maaha, waa yehee maamulada kale miyeey sharci ku joogaan, ileen mar hore ayey sharciyadda ka wada dhacdayee?”.

Cabdirsaaq Xaashi: “Madal kala aragti duwan maba jirto haddii hal xisbi ay noqdeen”.

Muqdisho (Caasimada Online) – Dowladda Mareykanka ayaa maanta Dowladda Federaalka Soomaaliya ku wareejisay agab ciidan oo casri ah.

Qalabkan ayaa loogu talagalay in uu gacan ka geysto kor u qaadista awoodda dagaal ee ciidanka sida gaarka ah u tababaran ee Danab, si ay door muuqda uga qaataan hawlgallada ka dhanka ah kooxda Al-Shabaab ee ka socda gobollada dalka.

Wasaaradda Gaashaandhigga ee Soomaaliya ayaa qoraal rasmi ah ku muujisay mahadcelin ay u jeedisay Dowladda Mareykanka, gaar ahaan Danjire Richard Riley, oo matalaya dowladdaasi. Wasaaraddu waxay ammaan iyo bogaadin u jeedisay taageerada joogtada ah ee Mareykanku siiyo Ciidanka Xoogga Dalka Soomaaliyeed (CXDS).

Qoraalka ayaa si gaar ah u xusay in qalabkan la guddoonsiiyay ciidamada Danab uu muhiimad weyn u leeyahay howl-galadooda dagaal, gaar ahaan kuwa ka dhan ah Al-Shabaab. Wasaaraddu waxay sheegtay in qalabkani uu door muuqda ka qaadan doono sare u qaadidda xirfadaha iyo waxqabadka ciidamadaasi.

Sidoo kale, Wasaaradda Difaaca ayaa tilmaantay in taageeradan ay qayb ka tahay dadaallada socda ee lagu xoojinayo awoodda ciidanka Danab.

Waxay sheegtay in agabkan cusub uu siin doono ciidanka fursad ay kaga hortagaan caqabadaha amni ee weli ka jira qeybo badan oo dalka ka mid ah.

War-saxaafadeedka ayaa xusay in iskaashiga xooggan ee ka dhaxeeya Soomaaliya iyo Mareykanka uu yahay tiir muhiim ah oo lagu kobcinayo awoodda ciidamada qaranka.

“Iskaashiga xooggan ee labada dal wuxuu kaalin muhiim ah ka qaadanayaa xoojinta awoodda ciidankeena, sare u qaadista isla xisaabtanka, iyo gaaridda isku filnaanta amni,” ayaa lagu yiri qoraalka.

Waxa kale oo lagu sheegay in iskaashigan uu horseedayo in la gaaro isku filnaansho dhanka amniga ah iyo sare u qaadidda isla xisaabtanka ciidamada.

Dowladda Soomaaliya ayaa mar kale muujisay sida ay uga go’an tahay xoojinta xiriirka saaxiibtinimo iyo iskaashi ee kala dhaxeeya dowladda Mareykanka.

Beledweyne (Caasimada Online) – Ciidamada Qaranka Soomaaliyeed ee ka howl-gala gobolka Hiiraan ayaa howl-gal ballaaran ku tegay deegaanada hoos yimaada degmada Matabaan, si ay u damiyaan colaad beeleedyo dhowaan halkaasi ka soo cusboonaaday.

Colaadahaas ayaa saameyn ku yeeshay nabadgelyada deegaanka, waxaana ay ka dhaceen dhulka miyiga ah ee ku yaalla dhanka woqooyi galbeed ee degmada.

Howl-galkaan waxaa horkacayay ciidamo ka tirsan Xoogga Dalka Soomaaliyeed iyo kuwa Nabad Sugidda Qaranka. Ciidamada ayaa ku guuleystay in ay kala dhexgalaan beello walaalo ah oo ku dagaalamay deegaanada Miirdacay iyo Miir Makaleey, iyagoo u jeedadoodu tahay in ay joojiyaan dagaalka isla markaana ay dib u soo celiyaan xasilloonida guud ee deegaanka.

Saraakiisha hoggaamineysa ciidamada oo si dhow ula shaqeynaya maamulka degmada Matabaan ayaa wadaan dadaallo lagu doonayo in lagu xakameeyo dagaal kale oo dhaca, iyagoo ka hortagaya in xiisadda markale kacdo.

Tallaabadan ayaa qeyb ka ah qorshaha dowladda ee lagu xoojinayo nabadda iyo wada noolaanshaha bulshada ku nool Gobolka Hiiraan.

Sidoo kale, saraakiil ay kamid yihiin Dhamme Cabdi Cismaan Waasuge, Cabdi Muumin iyo Guddoomiyaha degmada Matabaan Bashiir Cabdiraxmaan Sheekeeye ayaa la kulmay dhinacyadii ku dagaalamay tuullooyinka hoostaga Matabaan. Kulankaasi ayaa diiradda lagu saaray sidii loo joojin lahaa colaadda loogana shaqeyn lahaa xal waara.

Ugu dambeyn, saraakiisha iyo maamulka degmada ayaa ku booriyay beelaha in ay aqbalaan baaqa ciidamada oo ah mid ku saleysan nabad iyo wada noolaansho.

Waxa ay shacabka ugu baaqeen in ay iska kaashadaan ilaalinta nabadda iyo iskaashiga si looga hortago colaado kale oo dib uga soo cusboonaada gobolka.

Garoowe (Caasimada Online) – Maamul-goboleedka Puntland ee uu hoggaamiyo madaxweyne  Saciid Cabdullaahi Deni ayaashaki wayn ka muujiyay go’aannada kasoo baxay shirka Golaha Wadatashiga Qaran ee xalay lagu soo gabagabageeyay magaalada Muqdisho.

Puntland ayaa ka hortimid qodobada laga soo saaray shirkan oo ay mar hore isaga baxday, waxayna sheegtay aanu quseyn ka maamul ahaan.

Sidoo kale waxa ay eedeyn culus u jeedisa Dawladda Federaalka, gaar ahaan madaxweyne Xasan Sheekh, waxayna intaasi ku dartay inay qabto shaki wayn oo ku aadan in la rabo in duulaan lagu qaado  Puntland iyo Jubbaland, sida ay hadalka u dhigtay.

“Shirka waxaa ka soo baxey oo Xasan Shiikh ku xalaaleystey duulaan lagu qaado Puntland iyo Jubbaland, waxaase xaqiiq ah in aan lagu guuleysan doonin duulaankan gardaradda ah” ayuu yiri wasiirka cadaaladda Puntland Maxamed Cabdiwahaab.

Puntland ayaanan ka qayb-gelin shirka kusoo dhammaaday Muqdisho oo laga soo saaray go’aann culus oo la xiriir xaaladda dalka iyo doorashooyinka 2026.

Dhankeeda Jubbaland ayaa si weyn uga hortimid go’aannada kasoo baxay shirkii Golaha Wadatashiga Qaran ee xalay lagu soo gabagabeeyay magaalada Muqdisho, kaas oo uu ka maqnaa madaxweynaha maamulkaas Axmed Maxamed Islaam (Axmed Madoobe).

Jubbaland ayaa shaaca ka qaaday in aysan quseyn qodobada kasoo baxay shirkaas oo qaarkood si toos ah u saameynaya maamulkaasi, maadaama lasoo jeediyay in si sharci ah loo wajahyo xaaladda maamulkaas oo loo xilsaaran wasaaradda arrimaha gudaha,

“Waan socon weyney ee aan orodno weeye waxa ka soo baxay madaxda Hal Xisbi shirkooda, mana quayso Dowladda Jubbaland.” ayuu yiri wasiirka warfaafinta Jubbaland Cabdifitaax Mukhtaar oo qoraal uu soo saaray uga fal-celiyay qodobada shirkii Muqdisho.

Puntland iyo Jubbaland ayaa labaduna waxaa haatan khilaag culus uu kala dhexeeya Dawladda Federaalka, waxayna gebi ahaan isaga baxeen Golaha Wadatashiga Qaran, sidoo kale waxaa go’ay wadashaqeyntii iyo xiriirka ay la lahaayeen dawladda dhexe.

Muqdisho (Caasimada Online) – Qaar kamid ah Dawlad-goboleedyada dalka ayaa haatan bilaabaya inay si toos ah u hirgeliyaan qorshaha Villa Soomaaliya ee la xiriira doorashooyinka dalka, kadib shirkii Golaha Wadatashiga Qaranka ee xalay lagu soo gabagabeeyay magaalada Muqdisho ee caasimada dalka.

Maamul-goboleedyada Galmudug, HirShabelle, Koonfur Galbeed iyo SSC-Khaatumo ayaa ogolaaday inay qayb ka noqdaan qorshaha socda ee la xiriira hirgelinta doorashooyinka qof iyo codka ah ee la filayo inay ka dhacaan dalka.

Sida lagu sheegay warsaxaafadeedkii xalay soo baxay, Golaha Wadatashiga Qaran ayaa isku raacay in maamul-goboleedyadan ay qayb ka noqdaan baahinta diiwaangelinta dadweynaha ee haatan ka socota magaalada Muqdisho, iyaga toos ah ula shaqeynayo guddiga madaxa bannaan ee doorashooyinka qaranka.

“Golaha waxa uu isku raacay in maamul-goboleedyada ay guddiga doorashada kala shaqeeyaan dardargelinta iyo baahinta diiwaangelinta dadweynaha, si loo hirgeliyo doorasho xor iyo xalaal ah” ayaa lagu yiri qayb kamid ah war-murtiyeedka xalay soo baxay ee Golaha Wadatashiga Qaran.

Sidoo kale, Golaha ayaa soo dhaweeyay in dalka uu aado hannaanka xisbiyada badan, iyaga oo u hambalyeeyay ururada is diiwaangeliyay oo kor u dhaafaya illaa 20 urur, kuwaas oo qaatay shahaaddada diiwaangelinta.

Waxaa kale oo ay farriin u direen siyaasiyiinta mucaaradka oo ay ugu baaqeen inay sameystaan ururro, si ay qayb uga noqdaan ololaha socda ee diiwaangelinta iyo doorashada 2026.

“Golaha waxa uu soo dhaweeyay hannaanka xisbiyada badan ee dalka ka hirgalay, wuxuuna u hambalyeeyay xisbiyada is-diiwaangeliyay, sidoo kale wuxuu dhammaan kooxaha daneeya siyaasadda in diiwaangashadaan ururro siyaasadeed metala afkaartooda” ayaa mar kale lagu yiri bayaanka.

Qorshahan waxaa horay isaga diiday maamullada Jubbaland iyo Puntland oo labaduba ka maqnaa shirka Golaha Wadatashiga Qaran ee xalay laga soo saaray go’aannada culus.

Soomaaliya ayaa haatan isku diyaarineyso doorasho qof iyo cod ah, waxaase ka taagan dood xoogan oo u dhexeyso Dawladda Federaalka, Jubbaland, Puntland iyo mucaaradka dalka.

Garoowe (Caasimada Online) – Maamulka Puntland ayaa markii ugu horreysay si rasmi ah uga jawaabay raadaarka militari ee Imaaraadka Carabta ay ku rakibeen Boosaaso, kaasi oo ah raadaar ay sameysay Israel.

Wasiirka Warfaafinta Puntland, Maxamuud Caydheed Diriir, ayaa si adag u beeniyay wararkaas sheegaya in Dowladda Isutagga Imaaraadka Carabta ay raadaarro ciidan ka rakibtay magaalada xeebta ku taalla ee Boosaaso, si loogu fuliyo weerarro cirka ah oo lagu beegsanayo Suudaan iyo Yemen.

Wasiir Diriir ayaa war-saxaafadeed uu soo saaray ku tilmaamay eedeymahan “borobogaando been abuur ah” oo uu sheegay in ay faafinayaan kooxo uu ku sifeeyay kuwo si cad uga soo horjeeda xasilloonida Puntland iyo guulaha laga gaaray dagaalka ka dhanka ah argagixisada.

“Waddamo ay ka mid yihiin Turkiga, Qatar, iyo hay’ado iska dhigaya inay yihiin warbaahin caalami ah ayaa ka dambeeya eedeymahan salka la’a,” ayuu yiri Wasiir Diriir. “Weli ma aqbali karaan xaqiiqda ah in Puntland ay si dhab ah u jebisay kooxaha argagixisada — kooxo Turkigu sanado badan la dagaallamay haddana ku guuldareystay inuu ciribtiro.”

Sawirro dayax-gacmeed oo la qaaday horraantii bishii Maarso ayaa daaha ka rogay in radar-ka noociisu yahay ELM-2084 ee Israel samaysay, kaasoo ah radar casri ah oo leh 3D lagu xiray agagaarka garoonka diyaaradaha.

Xogta duulimaadyada hawada ee guud ahaan la heli karo ayaa muujinaysa in dowladda Imaaraadka Carabtu ay si joogto ah oo isa soo taraysa u adeegsanayso garoonka Boosaaso, si ay saanad ugu gaarsiiso ciidamada taageerada degdegga ah (Rapid Support Forces – RSF) ee Suudaan.

Ciidamada RSF ayaa muddo labo sano ah dagaal kula jiray militariga dalka Suudaan.

“Imaaraadka Carabtu waxay rakibtay radar-ka wax yar ka dib markii RSF ay gacanteeda ka baxday inta badan Khartoum horraantii Maarso,” sida uu il-wareed gobolka ka tirsan u sheegay Middle East Eye.

“Ujeeddada radar-ku waa in la ogaado loogana digo khataraha ka iman kara diyaaradaha aan duuliyaha lahayn (drones) ama gantaalaha, gaar ahaan kuwa ay suuragalka tahay inay Xuutiyiintu ka soo tuuraan meel Boosaaso ka baxsan.”

Kismaayo (Caasimada Online) – Dawlad-goboleedka Soomaaliyeed ee Jubbaland ayaa si weyn uga hortimid go’aannadii kasoo baxay shirka Golaha Wadatashiga Qaran ee xalay lagu soo gabagabeeyay magaalada Muqdisho, kaas oo uu ka maqnaa madaxweynaha maamulkaas Axmed Maxamed Islaam (Axmed Madoobe).

Jubbaland ayaa shaaca ka qaaday in aysan quseyn qodobada kasoo baxay shirkaas oo qaarkood si toos ah u saameynaya maamulkaasi.

Wasiirka Warfaafinta Jubbaland Mudane Cabdifitaax Mukhtaar oo qoraal soo saaray ayaa wax aan socon karin ku tilmaamay qodobada laga soo saaray shirkaas oo uu tilmaamay inay yeesheen oo kaliya madaxda hal xisbi, sida uu hadalka u dhigay.

“Waan socon weyney ee aan orodno weeye waxa ka soo baxay madaxda Hal Xisbi shirkooda, mana quayso Dowladda Jubbaland.” ayuu yiri Wasiir Cabdifitaax Mukhtaar.

Jawaabta deg-degga ah ee Jubbaland ayaa daba socoto go’aan culus oo ay maamulkan kasoo saareen xubnaha Golaha Wadatashiga Qaran, waxayna soo jeediyeen in si sharci ah loo wajahyo xaaladda maamulkaas oo meel xun gaartay, si loo soo afjaro.

Xaaladda Jubbaland waxaa loo xil-saaray inay ka soo tala-bixso Wasaaradda Arrimaha Gudaha Dowladda Federaalka Soomaaliya oo la faray inay keento xal rasmi ah, si loo helo Dawlad-goboleed sharci ah.

“Golaha Wadatashiga Qaranka, wuxuu isku raacay in wasaaradda arrimaha gudaha federaalka ay talo iyo soo jeedin ka keento xaaladda dowlad goboleedka Jubbaland, si waafaqsan dastuurka dalka, si loo helo nidaam dowlad goboleed oo sharci ah,” ayaa lagu yiri qodobkaas.

Dawladda Federaalka Soomaaliya ayaa diiddan doorashadii ka dhacday Kismaayo ee mar kale dib loogu doortay Axmed Madoobe, waxaana kadib xigay dagaal toos ah oo ka dhex-qarxay labada dhinac, isla-markaana dhaliyay saameyn xooggan gudaha dalka ah.

Si kastaba, arrinta ayaa u muuqata in weli dawladda dhexe aanay ka tanaasulin mowqifkeeda ku aadan Jubbaland, iyada oo dooneyso in meesha laga saaro Axmed Madoobe, waxaase la ogeyn qaabka ay u wajihi doonto, maadaama dagaalkii hore lagu fashilmay.

Washington (Caasimada Online) – Dowladda Mareykanka ayaa ku dhawaaqday abaal-marin dhan illaa $10 milyan oo la siinayo cid kasta oo keenta xog sugan oo horseedi karta in la helo ama la xukumo Cabdullaahi Banaati, oo lagu eedeeyay inuu ka mid ahaa dadkii abaabulay weerarkii ka dhacay saldhigga Manda Bay ee Kenya 5-tii Janaayo 2020.

Banaati waa shaqsigii labaad ee barnaamijka Rewards for Justice (RFJ) ee Wasaaradda Arrimaha Dibadda Mareykanka lagu raadinayo, iyadoo la xiriirinayo weerarkaas. Barnaamijkan waxaa maamula Waaxda Amniga Dibadda ee Mareykanka (Diplomatic Security Service).

Sanadkii 2023, barnaamijka RFJ ayaa abaal-marin la mid ah u ballanqaaday ciddii keenta xog horseedaysa qabashada ama xukunka Macalim Ayman — hoggaamiyaha Jaysh Ayman — oo lagu eedeeyay inuu mas’uul ka ahaa abaabulka weerarkaas. Macalim Ayman ayaa bishii November 2020 lagu daray liiska Argagixisada Caalamiga ah ee si gaar ah loo calaamadeeyay (Specially Designated Global Terrorist), iyadoo lagu saleynayo Amar Madaxweyne (EO) 13224.

Bayaan kasoo baxay Mareykanka Arbacadii ayaa lagu sheegay in Cabdullaahi Banaati uu ka mid ahaa shaqsiyaadkii si toos ah ugu lug lahaa qorsheynta weerarkii Manda Bay. Weerarkaas ayey fulisay kooxda Al-Shabaab, oo ah faraca Al-Qaacida ee Geeska Afrika, waxaana lagu dilay hal askari Mareykan ah iyo laba qandaraasle oo u shaqeynayay Wasaaradda Difaaca Mareykanka (DoD). Sidoo kale, laba askari iyo qandaraasle kale ayaa ku dhaawacmay.

Kadib weerarka, Al-Shabaab ayaa baahisay muuqaal ay si rasmi ah mas’uuliyadda ugu sheegatay.

Saldhigga Manda Bay, oo qayb ka ah xarunta ciidamada Kenya (KDF), ayaa Mareykanku u adeegsadaa tababarka iyo taageerada la dagaalanka argagixisada ee Bariga Afrika, ka falcelinta xaaladaha degdegga ah, iyo difaaca danaha Mareykanka ee gobolka.

Cabdullaahi Banaati ma aha magac cusub oo ka dhex muuqda warbixinaha amniga Kenya. Inkasta oo muddo ku dhow toban sano lagu daba socday, haddana weli gacanta laguma dhigin.

Magaciisu wuxuu si joogto ah ugu soo baxay saddex weerar oo ka mid ah kuwii ugu dhimashada badnaa ee ka dhacay gudaha Kenya tan iyo markii uu kooxda Al-Shabaab ku biiray sanadkii 2012.

Boolisku waxay rumeysan yihiin inuu door muhiim ah ka qaatay daadgureynta dagaalyahannadii fuliyay weerarkii Dusit D2 ee Nairobi sanadkii 2019, halkaas oo 21 qof lagu dilay. Sidoo kale, Banaati ayaa lagu tuhunsan yahay inuu door la mid ah ka ciyaaray weerarkii Westgate ee 2013, oo ay ku dhinteen 67 qof.

Sannadkii 2015, weerarkii lagu qaaday Jaamacadda Garissa, Banaati ayaa la rumeysan yahay inuu martigeliyay dagaalyahannadii dilalka geystay. Waxaa intaas dheer in la tuhunsan yahay inuu ka mid ahaa ragii weeraray saldhigga KDF ee Baure, gobolka Lamu, bishii Juun 2015, halkaas oo 11 dagaalyahan oo Al-Shabaab ah lagu dilay.

Beledweyne (Caasimada Online) – Faah-faahinno dheeraad ah ayaa kasoo baxay howlgal guuleystay oo xalay ka dhacay gudaha magaalada Beledweyne ee xarunta gobolka Hiiraan, kaas oo lagu toogtay nin hubeysan oo halis ku ahaa magaaladaasi, sida ay sheegeen saraakiilsha laamaha amniga.

Ninka la toogtay ayaa lasoo wariyay inuu watay bistoolad iyo bam-gacmeed, waxaana ka war helay ciidamada ammaanka eek u sugan xaafadda Buundo Wayn, kuwaas oo toogasho ku dilay.

Sidoo kale, nin kale oo la socday marxuumka la toogtay ayaa baxsaday, wuxuuna ka cararay ciidamada sameeyay howlgalka xalay ka dhacay halkaasi.

Mid kamid ah dadka deegaanka oo la hadlay warbaahinta ayaa sheegay in ciidamadu ay ka hortageen weerar ay damacsanaayeen raggaasi oo ka tirsan maleeshiyada kooxda Al-Shabaab.

“Laamaha amniga ee ku sugan Beledweyne ayaa toogtay nin ku hubeysnaa bistoolad iyo sidoo kale bambo, kaas oo doonayay inuu weerar ka gaysto magaalada” ayuu yiri qof kamid dadka deegaanka.

Sidoo kale wuxuu sii raaciyay “Nin kale oo la socday ayaa jiro, kaas oo ka baxsaday ciidamada, wxuuna falka ka dhacay bar-kontarol oo ku taalla xaafadda Buundo Wayn” .

Xaaladda ayaa haatan ah mid deggan, waxaana falka ka hortegga ah ee ay sameeyeen ciidamada soo dhaweeyay bulshada deegaanka, maadaama laga hortegay weerarkii ay qorsheynayeen raggaasi.

Beledweyn ayaa waxaa marar badan weeraro qaraxyo iyo dilal ka fulisay kooxda Al-Shabaab, waxaana u dambeeyay weerarkii odayaasha lagu dilay ee dhowaan ka dhacay hotel ku yaalla magaaladaasi.

Reer Hiiraan ayaa si weyn ula dagaalama Al-Shabaab, waxaana sababta soo celcelisay weerarada Al-Shabaab ee Beledweyne lagu sheegay kacdoonka shacabka ay ugu jiraan xoreynta gobolkaasi.