Muqdisho (Caasimada Online) – Madaxweynaha Jamhuuriyadda Federaalka Soomaaliya Mudane Xasan Sheekh Maxamuud ayaa kulan sagootin ah la qaatay Danjiraha muddo xileedkiisa diblumaasiyadeed uu dhammaaday ee Jamhuuriyadda Shacbiga ah ee Shiinaha u fadhiyey dalkeenna, Safiir Fei Shengchao.

Madaxweynaha ayaa ku ammaanay Danjire Fei doorka uu ka qaatay adkaynta xiriirka Labada dal iyo kobcinta iskaashiga faca weyn ee ka dhexeeya Labada shacab.

Madaxweyne Xasan Sheekh ayaa xusay sida dowladda iyo shacabka Soomaaliyeed ay u soo dhaweeyeen Danjiraha, ulana shaqeeyeen muddadii uu matalayey dalkiisa.

Dhankiisa, Danjire Fei Shengchao ayaa uga mahadceliyey Madaxweynaha Jamhuuriyadda kulankan saagootinta ah ee uu ugu sameeyey Madaxtooyada Qaranka.

Sidoo kale Safiirka ayaa tilmaamay xusuusta wanaagsan ee uu ka haysto shacabka Soomaaliyeed iyo dowladdooda, muddada uu ku sugnaa dalkeenna.

Shiinaha ayaa ka mid ah dowladaha sida dhow u taageera Soomaaliya, sidoo kale waa mid ka mid ah saaxiibada ugu weyn ee Soomaalidu ay leedahay, waana soo jireen xiriirka salka adag oo Soomaaliya iyo Shiinaha.

Safiirada Shiinaha ee Soomaaliya ka howlgala oo mid kasta oo maandheydkiisu yahay labo sano ayaa dalkaan ka taga iyagoo qiraya saaxiibtinimada iyo wanaagga Soomaalida.

Shiinaha ayaa Soomaaliya u arka wadan istaraatiiji ah oo ku haboon saaxiibtinimada, sidoo kale Shiinaha ayaa daneynaya in geeska Afrika uu ku yeesho dhaqdhaqaaq muuqda, halka fursadaas uu ka heli karana waa Soomaaliya.

Muqdisho (Caasimada Online) – Guddoomiyaha maamulka gobolka Banaadir, ahna duqa magaalada Muqdisho Yuusuf Xuseen Jimcaale (Madaale) ayaa xalay kormeer shaqo ku tegay gudaha suuqa weyn ee Bakaaraha, taas oo uu ugu kuurgalayay xaaladda guud.

Madaale ayaa waxaa booqashadan ku wehlinayay, mas’uuliyiin ka tirsan gobolka, maamulka degmada Howlwadaag iyo saraakiil ka tirsan laamaha ammaanka Soomaaliya.

Ujeedka duqa Muqdisho ayaa ahaa u kuurgelidda isbadalka dhinaca Amniga iyo dhaq-dhaqaaqa Ganacsi ee suuqaasi ka jira xilliyada Habeenkii ah, maadaama loo diyaar garoobayo munaasabadda maalmaha Ciidul-Fidriga oo foodda innagu soo haayo.

Inta uu ku jiray kormeerkan duqa Muqdisho wuxuu mid mid u dhageystay shacabka usoo dukaameysi tagay suuqa iyo qaar ka mid ah ganacsatada, kuwaasi oo ka warbixiyay isbadalka amni iyo kobaca ganacsi ee ka jira suuqa.

Guddoomiyaha Gobolka ayaa ugu baaqay shacabka iyo ganacsatada in ay la shaqeeyaan Laamaha Amniga si loo xoojiyo Amniga Caasimadda.

Shacabka caasimada ayaa si aad ah ugu dukaameysanaya Suuqa Bakaaraha iyo Suuqyada kale ee Magaalada Muqdisho xilliyada Habeenkii maadaama lagu jiro 10-kii ugu danbeeyay ee Bisha Ramadaan.

Bakaaro ayaa waxaa maalmihii u dambeeyay laga dareemayay isbeddel wayn oo dhinaca amniga, waxaana horay u booqday taliyaha hay’adda NISA, Mahad Maxamed Salaad.

Xarardheere (Caasimada Online) – Madaxweynaha Soomaaliya, Mudane Xasan Sheekh iyow wafdi uu hoggaaminayo ayaa saacadaha soo socda ee maanta ku wajahan furimaha hore ee dagaalka, gaar ahaan gobolka Mudug oo ay weli ka socdaan howlgallo xoreyn ah.

Ilo wareedyo lagu kalsoon yahay ayaa innoo sheegay in madaxweynaha la filayo inuu gaaro degmada Xarardheere oo kamid ah magaalooyinka waa weyn ee laga saaray Al-Shabaab.

Sidoo kale madaxweynaha ayaa booqdan doono degmada Ceeldheer, halkaasi oo ay gacanta ku hayaan Ciidamada Dowlada iyo kuwa dadka deegaanka ee Macawiisleyda.

Madaxweynaha waxaa wafdigiisa ku biiraya MadaxweynahaGalmudug Axmed Cabdi Kaariye (Qoor-Qoor) oo ay wehliyaan mas’uuliyiin heer Federaal & heer dowlad-Goboleed, waxaana ujeedka uu yahay inay dhiirageliyaan ciidamada Xoogga dalka ee la dagaalamaya Shabaab.

Xasan Sheekh iyo wafdigiisa oo ay qayb ka yihiin saraakiil sar sare ayaa booqdan doono saldhigyada ciidamada dowladda iyo kuwa deegaanka laga abaabulayo dagaalka, si mar kale la’isugu daba rido, una qaadaan duulaan culus oo ka dhan ah kooxda Al-Shabaab.

Horay madaxweynaha Soomaaliya ayaa Dhuusamareeb u joogay muddo aad u dheer, isaga oo ka hagayay wajiga koowaad ee dagaalka oo lagu xoreeyay dhul aad u ballaaran,

Galmudug iyo HirShabelle ayaa kamid ah meelaha lagu jebiyay kooxda Al-Shabaab, isla markaana lagu xorreeyay deegaanada ugu badan ee soo galay gacanta dowladda.

Si kastaba, booqashadiisa haatan lagu wado inuu ku tego Galgaduud iyo Mudug ayaa kusoo aadeyso, ayada oo dhowaan ay ciidamada dib uga soo baxeen magaalooyin ay horay ugala wareegeen kooxda Al-Shabaab, sababo la xiriira cabasho ay qabaan ciidamada dowladda.

Muqdisho (Caasimada Online) – Beesha Caalamka ayaa soo saartay qoraal ay ku soo dhowaysay dadaalka Dowladda Federaalka Soomaaliya ay ku bixinayso dhamaystirka waxyaabaha muhiimka u ah dowlad wanaagga, sida qabya tirka Dastuurka.

War qoraal ah oo ka soo baxay beesha caalamka ayaa lagu yiri, “Saaxiibada Caalamka ee Soomaaliya waxay bogaadinayaan dadaallada Dowladda Federaalka Soomaaliya iyo Baarlamaanka Federaalka ah ee lagu xaqiijinayo u hogaansanaanta Soomaaliya ee waajibaadka caalamiga ah iyo kuwa heer gobol ee khuseeya xuquuqul insaanka, oo ay ku jiraan xuquuqda carruurta.”

Qoraalka ayaa intaas ku sii daray “Waxaan rajeyneynaa iskaashi [sii socda] mustaqbalka oo aan la yeelano Soomaaliya oo iyadu xoojineysa doorka ay ku leedahay fagaarayaasha caalamiga ah.”

Sidoo kale beesha caalamka ayaa farriin u dirtay saamileyda siyaasadda dalka, kuwaas oo loogu baaqay inay u hoggaansamaan hanaan wadar-ogol ah oo ku saabsan arrimaha masiiriga ah.

“Waxaan sidoo kale qireynaa ku talagalka adag ee Dowladda Federaalka Soomaaliya ku talagashay in horumar ay ka sameyso dhameystirka Dastuurka, waxaana ku boorineynaa dhammaan saamileyda inay sii laba jibbaaraan dedaalladooda ku aaddan dhisidda  wadar-oggol loo marayo geeddi-socod loo dhanyahay,” ayaa lagu yiri qoraalka beesha caalamka.

Wax weyn ayey dowladda federaalka uga dhigan tahay taageerada beesha caalamka ee qorshaha dhameystirka dastuurka oo wajahaya mucaaradad weyn oo maxali ah.

Madaxweynayaashii hore ee dalka iyo dowlad goboleedka Puntland ayaa si adag uga hor yimid ansixinta afarta cutub ee ugu horeysa dastuurka oo hadda beesha caalamka ay aad u soo dhaweysay.

Mucaaradka dowladda waxaa dhabarjab weyn ku ah go’aanka beesha caalamka oo taageertay qorshaha dowladda federaalka, halkii ay doonayeen in beesha caalamka ay u kala dab-qaado iyaga iyo dowladda federaalka.

Muqdisho (Caasimada Online) –Madaxweynaha Jamhuuriyadda Federaalka Soomaaliya Mudane Xasan Sheekh Maxamuud ayaa caawa saxiixay Nuqulka Rasmiga ah ee Wax-ka beddelka cutubyada 1-aad, 2-aad, 3-aad iyo 4-aad ee Dastuurka JFS.

Afarta cutub ee Xasan Sheekh uu caawa saxiixay ayay shalay cod Aqlabiyad leh ku ansixiyeen xildhibaanada labada Aqal ee Baarlamaanka Federaalka Soomaaliya.

Madaxweyne Xasan Sheekh ayaa tilmaamay in dhammeystirka Dastuurku uu aas-aas u yahay horumarinta dimuqraadiyadda, sinaanta dhammaan muwaadiniinta Soomaaliyeed, adkaynta iyo dhisida hay’ado dowladeed oo hufan.

Munaasabadda saxiixa Nuqulka Rasmiga ah ee Wax-kabeddelka cutubyada Dastuurka dalka waxaa goobjoog ahaa Guddoonka Labada Aqal ee Baarlamaanka Jamhuuriyadda Federaalka Soomaaliya.

Sidoo kale waxaa ku sugnaa xubnaha guddiga dib u eegista dastuurka oo xildhibaan Xuseen Iidow uu hoggaaminayo, tallaabadaan ayaa muujineysa sida Xasan Sheekh uu ula dhacsan yahay shaqada socota ee dastuurka, hal qeylo dhaanta siyaasiyiinta iyo saamileyda kale ee siyaasadda Soomaaliya ay cirka isku sii shareereyso.

Madaxweynayaashii iyo ra’iisul wasaarayaashii hore ayaa Xasan Sheekh uu eedeyey in awooda wadanka uu doonayo in xafiiskiisa uu isugu keeno, iyadoo meesha laga saarayo doorkii baarlamaanka, sida in madaxweynuhu uu keenayo ra’iisul wasaaraha, hadii ay is qabtana uu eryi karo.

Dowlad goboleedka Puntland ayaa si adag uga horyimid qorshaha lagu dhameystirayo dastuurka dalka, waxay Puntland gaartay heer ay tiraa “waxaan aqoonsigii kala noqonay hey’adaha dowladda federaalka.”

Muqdisho (Caasimada Online) – Madaxweyne Xasan Sheekh Maxamuud ayaa shalay ku guuleystay inuu labada aqal ee baarlamaanka Soomaaliya ka ansixiyo afarta cutub ee ugu horreysa dastuurka.

Cutubyada la meel-mariyay ayaa dano gaar ah oo badan uga dhex jireen Villa Somalia, si gaar ah doorashada, xisbiyada, awoodda ra’iisul wasaaraha iyo muddo xileedka.

Meel-marinta dastuurka ayaa waxaa si adag uga horyimid madaxdii hore iyo siyaasiyiinta mucaaradka, oo ayagu qaadacay ansixinta afarta cutub ee ugu horreysa dastuurka, oo shalay si aqlabiyad loogu coddeeyay.

Haddaba, waa maxay rejada mucaaradka kadib natiijaddii shalay kasoo baxday BF?

Siyaasiyiinta mucaaradka oo habraacii hore iyo ansixintii shalay looga adkaaday ayaa hadda ku doodaya inay adkaan doonto inuu Xasan Sheekh dhaqan-geliyo qorshihiisa dastuurka.

Waxay kale oo ay sheegayaan inuu dalka u baahan doono shir dib u heshiisiin qaran, sida muuqatana waa rejada xilligaan ee madaxdii hore iyo mucaaradka.

Madaxdii hore ee dalka iyo siyaasiyiinta mucaaradka oo horey loogu awood sheegtay baarlamaanka, ayaa rejo ka qaba in uusan dhaqan-gal rasmi ah noqon doonin dastuurka shalay la meel-mariyay, xilli ay weli dhiman yihiin cutubyo badan oo dastuurka.

Sidoo kale, dhinacyada durba la saadaalinayo inuu culeys ka imaan doono waxaa kamid ah dhinaca maamul goboleedyada la safan madaxweyne Xasan Sheekh, kuwaasi oo u baahan doona in go’aan laga gaaro doorashooyinkooda.

Garoowe (Caasimada Online) – Madaxweynaha Puntland Siciid Cabdullaahi Deni ayaa maanta Qasriga Madaxtooyada ku qaabilay wafdi ka socda Qaramada Midoobey oo ay hoggaaminayso Ergeyga Qaramada Midoobey ee Soomaaliya Catriona Laing.

Kadib go’aankii xalay kasoo baxay Golaha Wasiirada maamulka, Puntland ayaa gaarkeeda ula macaamilaysa beesha caalamka, sida lagu yiri qoraal goordhoweyd kasoo baxay Madaxtooyada Puntland.

Madaxweyne Saciid Deni ayaa la wadaagay Qaramada Midoobey qoraalka rasmiga ah ee go’aanka Puntland, kaasi oo ay aqoonsigii iyo kalsoonidii kagala laabteen hay’addaha dowladda federaalka Soomaaliya.

Kulankaan ayaa waxaa looga wada-hadlay mashaariicda horumarin iyo kuwa bani’aadantinimo ee ay iska kaashaadaan Qaramada Midoobey iyo hay’adaha Puntland, iyadoo la dardar-gelinayo wada shaqeyn toos ah, sida ay sheegtay Madaxtooyada Puntland.

Kulanka ayaa sidoo kale waxaa ka qeyb-galay madaxweyne ku-xigeenka Puntland Ilyaas Cismaan Lugatoor, qaar ka mid ah xubaha Golaha Wasiirada, Agaasimaha Guud ee Madaxtooyada iyo Af-hayeenka ahna Agaasimaha Warfaafinta Madaxtooyada.

Kulankaan ayaa imanaya saacado kadib markii maamulka uu ku dhawaaqay inuu aqoonsigii iyo kalsoonidii kala laabtay hay’addaha dowladda federaalka, uuna qaadacay tallaabadi uu shalay qaaday baarlamaanka Soomaaliya.

Puntland ayaa madaxweyne Xasan Sheekh Maxamuud ku eedeysay inuu buriyay dastuurkii heshiiska lagu ahaa, islamarkaana uu jeebkiisa kala soo baxay dastuur cusub.

Si kastaba, Wax ka beddelka dastuurka ee shalay meel-marka noqday ayaa la kulmaya diidmo xooggan oo dhanka madaxdii hore iyo siyaasiyiinta mucaaradka, waxaana shaki la gelinaya dhaqan-galkiisa, xilli uu baarlamaanka ka fal-xashay afarta cutub ee u horreysay dastuurka.

Muqdisho (Caasimada Online) – Xildhibaan Cabdiraxmaan Maxamed Xuseen (Odowaa) oo ka tirsan Golaha Shacabka Soomaaliya ayaa ka hadlay tallaabadii shalay ee baarlamaanka Soomaaliya uu ku meel-mariyay wax ka beddelka dastuurka, isaga oo sidoo kale si cajiib ah ugu jawaabay madaxweynayaashii hore ee dalka Farmaajo iyo Sharfiif.

Ugu horeyn Odowaa ayaa boggaadiyay wax ka beddelka dastuurka oo uu ku tilmaamay inay tahay tallaabo wanaagsan oo horay loo qaaday, dhanka dowladnimada.

Intaas kadib xildhibaanka ayaa u jawaabay Maxamed Farmaajo iyo Sheekh Shariif oo labaduba ka biyo diidan talllaabadan oo ay gadaal ka riixeyso Villa Soomaaliya.

Odowaa ayaa shaaca ka qaaday in labada madaxweyne hore ay hadda yihiin laba xildhibaan, loogana baahnaa inay kulanka yimaadaan oo ay ra’yigooda dhiibtaan.

Labada madaxweyne ee hore ee aniga qadarin baa u hayaa waa laba xildhibaan marka waxa ay ahayd in maanta inay yimaadaan halkan oo ay ka codeeyaan” ayuu yiri Odowaa.

Sidoo kale wuxuu intaasi ku daray in xildhibaannadu ay isku fac yihiin, isla markaana ay leeyihiin cod ay wax ku diidi karaan ama ku yeeli karaan.

“Waxaan idin sheegaa xildhibaan kama cod badna xildhibaan kale marka xildhibaannadu waxaa isku facee ha’is aaminaan, hana yimaadaan” ayuu sii raaciyay.

Cabdiraxmaan Odowaa oo kamid ah kooxda aadka ugu dhow madaxweyne Xasan Sheekh ayaa shalay waxa ay guul ka gaareen arrinta dastuurka oo ay muddo ka taagnayd dood.

Hadalkan ayaa kusoo aadayo, ayada oo xubnaha mucaaradka oo ay hoggaaminayaan Farmaajo iyo Shariif ay kasoo horjeesteen wax ka beddelka dastuurka, waxaana dhankeeda tallaabadan qaadacday Puntland oo sheegtay inay kalsoonidii kala noqotay dowlada dhexe.

Muqdisho (Caasimada Online) – Wasiirka cadaaladda iyo arrimaha dastuurka Soomaaliya, Xasan Macallin Maxamuud oo shir jaraa’id qabtay ayaa ka falceliyay tallaabadii ay Sabtidii shalay ku meelmariyeen xildhibaanada labada gole wax ka beddelka dastuurka.

Xasan Macallin ayaa shaaca ka qaaday in go’aanka baarlamaanka uu yahay mid geesinimo leh, isla markaana waa cusub u furay Soomaaliya, sida uu hadalka u dhigay.

“Shaqo iyo howl hadda ayay bilaabatay, waa cusub ayaana Soomaaliya u baryay” ayuu yiri wasiirka cadaaladda iyo arrimaha dastuurka dalka.

Isaga oo ka hadlayay arrimaha dastuurka waxa uu hoosta ka xariiqay inuu yahay mid ay Soomaali qoratay, isla markaana lagu diyaariyay hanti qaran oo Soomaaliyeed.

“Waa dastuur Soomaali qorotay, ayna ka dooday, Soomaalina ansixisay waxaana lagu diyaariyay aqoon, tabar iyo hanti Soomaaliyeed” ayuu yiri Xasan Macallin.

Sidoo kale wuxuu intaasi ku daray in afarta cutub ee la ansixiyay inay awood siinayaan shacabka Soomaaliyeed, si ay usoo doortaan hoggaankooda.

“Maanta waa maalin wayn oo taariikhi ah waa maalin dadweynaha Soomaaliyeed loo soo celshay awoodoodii oo ay ku dooran lahaayeen madaxdooda” ayuu markale yiri.

254 mudane oo ka tirsan labada gole ee Baarlamaanka ayaa si aqlabiyad leh shalay u meel-mariyay wax ka beddelka dastuurka, mana jirin cid diiday, ama ka aamustay.

Si kastaba, waxaa weli go’aankan diidan xubnaha mucaaradka iyo Puntland oo iyadu ku dhawaaqday inay kalsoonidii kala laabatay dowladda federaalka Soomaaliya.

Muqdisho (Caasimada Online) – Saacadihii lasoo dhaafay waxaa baraha bulshada qabsatay hadal-heynta Jaay laga keenay dalka Turkiga oo laga soo dejiyey dekedda Muqdisho, si loogu dhiso guryaha.

Sawirro laga soo qaaday ku dhowaad 10 carro gediye oo dekedda Muqdisho taagan, isla markaana Jaay sida ayaa lagu faafiyey baraha bulshada.

Soomaaliya waxaa aad ugu badan dhagaxa oo laga sameeyo Jaay, sidoo kale inta badan dalka waxaa laga helaa Jaay aan warshadeyn u baahneyn.

Arrintaan ayaa la yaab ku noqotay dadka Soomaaliyeed markii ay maanta ku arkeen baraha bulshada, waxaana ilaa hadda laga yaaban yahay sababta loogu baahday in Jaay laga soo dhoofiyo Turkiga.

Ganacsatada dalka keentay Jaaygaas ayaa laga soo xigtay inuu ka tayo fiican yahay kan Soomaaliya, balse ma jirto khasaaro lagu qabo Jaayga ama dhagaxaanta ay Soomaalidu ku dhisato guryaha.

Dowladnimada Soomaaliya oo aad u jilicsan ayaa loo aaneynayaa sababta dalkaan loo keenayo wax kasta, mana ahan markii ugu horeysay oo Soomaaliya loo soo dhoofiyey waxyaabo laga helo dalka.

Hadda ka hor waxaa la keenay oo hadal heyn badan abuuray qudaar loo soo dhoofiyey Soomaaliya, sida Canbe iyo Moos, kuwaas oo si xad dhaaf ah uga baxa Soomaaliya.

Sidoo kale waxaa mar la sheegay in madax Ari ciiriin ah oo seejalan la keenay dalka, taas oo la yaab iyo niyad jab ku noqotay dadka Soomaaliyeed oo aan weli helin dowlad ka koontoroosha waxyaabaha loo soo dhoofinayo dalka.

Muqdisho (Caasimada Online) – Guddoomiyaha gobolka Banaadir ahna Duqa Muqdisho Yuusuf Madaale ayaa maanta ka qeyb-galay munaasabad lagu soo gaba-gabeenayay tartanka Qur’aan aqriska bisha Ramadaan ee maamulka gobolka Banaadir iyo dowladda Hoose ee Xamar.

Tartankaan oo mid sanadle ah ayaa waxaa taaba-geliya guddoomiyaha gobolka Banaadir Md. Madaale, waxaana ku tartamay ardey ka kala socday dugsiyadda Qu’aanka Kariimka ee degmooyinka iyo deegaanada gobolka Banaadir.

Guddoomiye Madaale ayaa abaal-marino lacag ah siiyay ardeyda kaalmaha hore ka gashay tartankaan, kuwaasi oo kaalimaha u kala galay:

1- Mujiiburaxmaan Maxamed Cabdullaahi (Kaalinta 1-aad). Waxa uu ka socday degmada Waabari.

2- Asmaa Maxamed Ibraahim (Kaalinta 2-aad) oo ka socotay degmada Wadajir.

Guddoomiyaha gobolka Banaadir ayaa sidoo kale waxa uu ballan-qaaday in guuleystayaasha kala galay kaalmaha 1-aad iyo 2-aad Waalidiintooda loo qaadi doono Xajka.

Waxa uuna ku amaanay ardayda xaafidul Qur’aanka iyo Waalidiintooda sida ay ugu da’daaleen xafidida Qur’aanka Kariimka oo ah daraja iyo maqaamka sare oo uu gaaro qofka muslimka ah.

Munaasabadda waxaa goobjoog ka ahaa guddoomiye ku-xigeenka arrimaha bulshada iyo wacyi-gelinta maamulka gobolka, wasiir ku-xigeenka wasaaradda Diinta iyo awqaafta, xildhibaano, culuma’udiin, agaasimeyaal, guddoomiyeyaal degmo, ururka haweenka gobolka, macalimiinta dugsiyadda, waalidiin iyo marti sharaf kale.

Muqdisho (Caasimada Online) – Dable Xoogga Axmed Cali Maxamed, Dable Xoogga Cabdiraxmaan Cabdullaahi Cismaan, Dable Xoogga Khaalid Maxamed Sheekh Muuse, Xasan Axmed Xuseen iyo Maxamuud Daahir Maxamed oo labaduba shacab ah, ayaa si wadajjir ah loogu soo eedeeyey Burcadnimmo hubeysan iyo Dhac ay ka geeysteen degmadda Afgooye ee gobolka Shabeellaha hoose.

Shantaan eedeysane ayaa Taleefano iyo lacago ka qaatay dad isugu jira Shacab iyo Askar aan xilligaasi hubeysaneyn oo shaqada fasax ka ahaa, iyaggoo dhaawac u geeystay qaar kamid ah dhibaneyaasha, waxaana eedeysaneyaasha ay falkaan ku geysteen hal qori oo Ak47 ah oo uu lahaa Dable Xoogga Axmed Cali Maxamed.

Dhaca kadib Eedeysaneyaasha ayaa tagay Guriga Eedeysanaha Koowaad Axmed Cali Maxamed, si ay u qeybsadaan Taleefanada iyo Lacagihii ay soo dhaceen, ugu dambeynna waxay isku qabsadeen sida loo kala qaadanayo, halkaasna waxaa ka dhashay buuq ku dhowaaday gacan ka hadal.

Intaasi kadib Dable Axmed Aabihiis oo guriga ku sugnaa ayaa kusoo Baxay buuqa eedeysaneyaasha, markii uu arkay in wiilkiisa iyo saaxiibadiis ay isku heystaan, iskuna dagaaleen Taleefanada iyo lacagtii ay soo dhaceen ayaa waxa uu qaatay go’aan dhif iyo naadir ah oo ku dayasho mudan, waxa uu wacay Ciidanka Booliska degmadda Afgooye, isaggoo ku war geliyey falka ay ku kaceen.

Wiilkiisa iyo saaxiibadiis, halkaasi ayaana lagu soo xiray Eedeysaneyaasha Taariikhdu markii ay aheyd Todobada Bishii labo iyo tobnaad 2023.

Baaris dheer kadib Xafiiska Xeer Ilaalinta Ciidamada Q.S, ayaa codsaday qaadista kiiskaan, waxaana laga oggolaaday Labaatan iyo todobadii bishaan.

Garsoorka Maxkamadda Ciidamada Qalabka sida oo waqti ku filan siiyey dhinacyadda dacwadda ayaa ugu dambeyn maanta go’aan ka soo saaray Shanta eedeysane, waxaa lagu kala xukumay:-

1- Ex Dable Xoogga Axmed Cali Maxamed, ayaa lagu Xukumay 8 sano oo Xabsi ciidan ah iyo in laga saaray kamid ahaanshiyaha ciidanka xoogga dalka.

2- Ex dable Xoogga Cabdiraxmaan Cabdullaahi Cismaan iyo Ex dable Xoogga Khaalid Maxamed Sheekh Muuse, ayaa lagu xukumay min Shan sano oo xabsi ciidan ah iyo in laga saaray kamid ah ahaanshiyaha Ciidanka xoogga dalka.

3- Xasan Axmed Xuseen iyo Maxamuud Daahir Maxamed, ayaa iyagana lagu xukumay min shan sano oo Xabsi ciidan ah.

Sidoo kale waxaa lagu xukumay dhammaan inay bixiyaan Taleefanada iyo lacagihii ay dhaceen, sida uu warbaahinta u sheegay Garsoore Gaashaanle Maxamed Cabdi Muumin oo ka tirsan garsoorka Maxkamadda Darajada Koowaad Ee Ciidamadda Qalabka Sida.