Badhaadhe (Caasimada Online) – Ciidamo ka tirsan Al-Shabaab ayaa weerar culus ku qaaday degaan ka tirsan Gobolka Jubbada Hoose oo ay saldhig ku leeyihiin ciidamada Kenya oo ka tirsan howlgalka Midowga Afrika ee ATMIS.

Dagaalka ayaa ka dhacay saldhig Ciidamo ka tirsan kuwa Kenya ku leeyihiin deegaanka Kulbiyow oo hoostaga degmada Badhaadhe ee Gobolka Jubbada Hoose, waxaana dagaalka la isku adeegsaday hubka noocyadiisa kala duwan.

Dadka deegaanka Kulbiyow ayaa waxaa ay sheegeen inay maqlayeen dhawaqa rasaasta ay isku adeegsanayeen labada dhinac, sidoo kalena uu jiro khasaaro dagaalka kasoo gaaray labada dhinac iyo dad rayid ah.

Ciidamada Al-Shabaab ayaa la sheegay inay gudaha u galeen qeybo kamid ah saldhigga, waxaana lasoo sheegayaa inuu jiro khasaaro xoog leh oo soo gaaray ciidamadii Kenya ee halkaas ku sugnaa.

Sida ay dadka deegaanka u sheegeen Caasimadda Online, xaaladda ayaa hadda ah mid dagan waxaana saldhigga la weeraray ku sugan ciidamadii Kenya ee horey u joogay halkaas.

Saraakiisha ciidamada Kenya ayaan weli ka hadlin weerarka lagu qaaday Saldhigooda, hayeeshee dhowr jeer ayaa sidaan oo kale ay Al-Shabaab weerareen Saldhigyada Ciidamada Kenya ku leeyihiin degaano katirsan Gobolka Jubbada Hoose.

Kooxda Al-Shabaab ayaa muddooyinkaan kor u qaaday weerarada ay ka geysteen gudaha Soomaaliya iyo xuduuda dalka Itoobiya.

Muqdisho (Caasimada Online) – Hay’adda Qaramada Midoobay u qaabilsan arrimaha Bani’aadannimo ayaa bixisay 9.5 milyan oo dollar, si gar-gaar Bani’aadannimo oo deg deg ah loo gaarsiiyo bulshada ku nool meelaha macaluusha ay ka jirto ee gudaha Soomaaliya.

Sida laga soo xigtay Qaramada Midoobay, khatarta macluusha ee Soomaaliya ayaa sii korodhay ka dib xilli roobaadkii afraad oo hoos u dhacay, taas oo sababtay in ay ka baro kacaan deegaannadii ay dagnaayeen dadka, kuwaaas oo maciin badan deegaanno kale.

“Soomaaliya waxay qarka u saaran tahay masiibo bini’aadantinimo, haddana maal-gelinta loo baahan yahay si wax looga qabto baahiyaha sida xawliga ah u koraya ayaa weli ah mid aan ku filnayn si looga hortago macluusha,” ayuu yiri Adam Abdelmoula, ku-xigeenka ergeyga gaarka ah ee xoghayaha guud ee QM.

Sidoo kale waxaa lagu sheegay warbixinaha QM in xaaladaha abaareed ee sii kordhaya ay saameeyeen in ka badan 7 milyan oo qof ayna barakiciyeen in ka badan 900,000 oo qof oo kale oo guryahooda ka barakacay iyagoo raadinaya biyo, cunto iyo daaq.

Soomaaliya ayaa waxaa ka dhacday Abaar aad u daran taas oo saameysay; Dadka iyo duunyada, sidoo kale Madaxda Dowladda ayaa ugu baaqay deeq bixiyaasha Calamka iyo Shacabka Soomaaliyeed in ay gurmad la gaaraan dadka ay Abaarta ka laysay Xoolihii iyo dalagii ay beeranayeen.

Muqdisho (Caasimada Online) – Guddoomiye ku-xigeenka ee golaha shacabka Sacdiya Yaasiin Xaaji Samatar ayaa kasoo horjeeda habka loo xulay golaha wasiirada cusub ee Soomaaliya, sida ay ilo-wareedyo lagu kalsoon yahay u sheegeen Caasimada Online.

Xogta aan helnay ayaa sheegeysa in Sacdiya ay diidan tahay xilka kusoo aaday beesheeda Carab Saalax oo ah wasiir ku xigeenka wasaaradda qorsheynta, maalgashiga iyo horumarinta dhaqaalaha.

Xilkaas oo loo magacaabay Maxamed Cabdulqaadir Cali, ayaa isla maalintii lagu dhowaaqay golaha wasiirada sheegay inuusan qaadaneyn, islamarkaana uu yahay xil aan u qalmin beeshiisa, sida uu hadalka u dhigay.

“Waxaan rabaa inaan ka caddeeyo halkaan, inaan iska casilay xilkii la ii magacaabay ee wasiir ku-xigeenka qorsheynta, beel ahaan uma qalano kursigaan, kumana meteli karo beesheyda,” ayuu yiri Maxamed Cabdulqaadir Cali.

Ilo-wareedyo lagu kalsoon yahay aya Caasimada Online u sheegay in Sacdiya ay ka dambeysay is-casilaadda wasiir ku-xigeenka oo markii horeba ay ayada u gaysay madaxweyne Xasan Sheekh iyo ra’iisul wasaare Xamza.

Beesha Carab Saalax ayaa dowladdii hore ku lahayd wasiir, hase yeeshee maadaama ay hadda haystaan xilka guddoomiye ku-xigeenka koowaad ee golaha shacabka, waxaa la siiyey wasiir ku-xigeen, sida xilka wasiirka loo siiyo beelaha kale ee ka tirsan Beesha Shanaad.

Sacdiya, ayaa sida aan xogta ku hlenay raali ku aheyd wasiir ku-xigeenka balse waxay fileysay xilka wasiir ku-xigeenka maaliyadda oo ay kala hadashay madaxweynaha iyo ra’iisul wasaaraha, taasi oo markii ay ka waysay liiska ay ka carootay.

Ma cadda haddii Sacdiya ay xilkeeda iyo saameynteeda u adeegsan doonto inay ku curyaamin doonto ansixinta golaha wasiirada.

Golaha wasiirada oo ka kooban 76 ayaa 43 ka mid ah ama 56% ay yihiin xildhibaano, waxaana wasiir kasta loo diray inuu keeno ugu uaraan saddex xildhibaan oo ku beel ah oo codka siiya, waxayna u badan tahay in la ansixin doono.

Muqdisho (Caasimada Online) – Wasiirada magacaaban ee xukuumadda Soomaaliya ayaa kulamo isdaba-joog ah ka wada magaalada Muqdisho, kuwaasi oo ay la yeelanayaan Xildhibaanada Golaha Shacabka.

Kulamada oo shalay soo bilowday ayaa ka dambeeyay kadib markii Ra’iisul Wasaare Xamza uu ku wargeliyay Wasiirada cusub in mid walba uu codka kasloonida ka raadsado Xildhibaanada ku matala Golaha Shacabka.

Golaha Wasiirada magacaaban qaarkood ayaa soo bandhigay kulamo gaar-gaar ah oo ay la yeesheen Xildhibaannada ku matala Golaha Shacabka, kuwaasi oo kala ah, Wasiirka Amniga Axmed Macalin Fiqi, Wasiirka Duulista Hawada Fardowsa Cigaal, Wasiiru-dowlaha wasaaradda Qorsheynta Cabdirashiid Jire Qalanle.

Wasiirrada durba qaabilay xildhibaanada beeshooda ku metela baarlamaanka ayaa sidoo kale waxa ka mid ah Mukhtaar Roobow Cali Abuu Mansuur oo loo magacaabay wasiirka Diinta iyo Awqaafta.

Mukhtaar ayaa la kulmay xildhibaanada jufasiida hoose ee Liisaan ku metela golaha shacabka, waxaana la sheegay inuu ka codsaday in codkooda kalsoonida ay siiyaan xukuumadaan uu ka tirsan yahay.

Wasiirka cusub ee gaashaandhigga Cabdulqaadir Maxamed Nuur ayaa ka mid ah xubnaha deg-deg u qaabilay xildhibaanada metela, si codka kalsoonida ay uga helaan.

Kulamadaan ay bilaabeen wasiirradu ee xildhibaanada looga codsanayo codkooda, waxay ku soo aadayaan iyadoo beelaha Digil iyo Mirif ay aad u saluugsan yihiin karaasta laga siiyey xukuumadda cusub.

Muqdisho (Caasimada Online) – Madaxda maamul goboleedyada Soomaaliya ayaa kasoo horjeeda golaha wasiirada cusub ee Soomaaliya ee uu ku dhowaaqay ra’iisul wasaare Xamza Cabdi Barre, sida ay ogaatay Caasimada Online.

Madax goboleedyada oo inta badan soo dhoweyn jiray ama hambalyeyn jiray isbeddelada siyaasadeed ee waa weyn ee dalka ka dhaca, ayaa illaa hadda ka aamusan magacaabista golaha wasiirada, taasi oo sida aan xog ku helnay, astaan u ah qanaaco la’aantooda.

Ilo-wareedyo kala duwan ayaa sheegay in madax goboleedyada ay ka careysan yihiin inaan laga talo-gelin wasiirada ka imanaya deegaanadooda, halka qaarkoodna loogu daray in lasoo magacaabay rag ay siyaasad ahaan aad isu diidan yihiin.

Axmed Madoobe iyo Cali Guudlaawe ayaa dhaliilsan inaan wax talo ah laga siin xubnaha matalaya deeganadooda, halka Saciid Deni, Qoor Qoor iyo Lafta-gareen ay usii dheertay in xilal sare loo dhiibay siyaasiyiin aysan is arki karin. 

Qoor Qoor ayaa waxaa wasiirka arrimaha gudaha iyo federaalka looga dhigay wasiirkii hore ee amniga maamulkiisa Axmed Macallin Fiqi, oo ah nin ay dagaal ku kala tageen, oo aad uga weerarayey warbaahinta tan iyo markii uu xilka Galmudug ka tegay . 

Lafta-gareen waxaa wasiirka awqaafta iyo arrimaha diinta looga dhigay Mukhtaar Roobow, oo aad uu uga cabsanayey in xabsiga laga soo daayo, iskaba daa in laga dhigo wasiir federaal. Farmaajo ayaa Roobow xabsi u geliyey, islamarkaana dad shacab ah Baydhaba ugu laayey inuu madaxweyne ka dhigo Lafta-gareen. 

Saciid Deni ayaa isna la rumeysan yahay inuu ka xun yahay xilka loo magacaabay wasiirka arrimaha dibedda Abshir Cumar Huruuse. Wararka qaar ayaa sheegaya inuu dagaal siyaasadeed ka dhaxeeyo labada nin, halka qaarna ay leeyihiin inuusan dagaal ka dhaxeyn, balse Deni uu diidan yahay kaliya inaan lagala tashan.  

Ma cadda haddii qanacsanaan la’aanta madax goboleedyada ay ka tarjumi doonto inay ka qeyb-galaan ololaha socda ee ay wadaan xildhibaanada xilalka waayey, si aan xukuumadda loo ansixin, ayada oo la rumeysan yahay inay baarlamanka ku jiraan xildhibaano badan oo ku xiran madax goboleedyada. 

Golaha wasiirada oo ka kooban 76 ayaa 43 ka mid ah ama 56% ay yihiin xildhibaano, waxaana wasiir kasta loo diray inuu keeno ugu uaraan saddex xildhibaan oo ku beel ah oo codka siiya. 

Rome (Caasimada Online) – Allaha u naxariistee waxaa maanta dalka Talyaaniga ku geeriyooday wariyihii caanka ahaa Cali Muuse Cabdi oo sanadahaan ku noolaa dalkaas.

Marxuumka ayaa waxaa ku soo booday xanuun deg-deg ah oo sabab u noqday geeridiisa, sida ay xaqiijiyeen qaar ka mid ah ehelladiisa.

Wariye Cabdiweli Ibraahim Garyare oo ay saaxibo ahaayeen marxuum Cali Muuse ayaa ka warbixiyey geerida ku timid, wuxuuna tacsi u diray ehellada iyo bahda saxaafadda.

Garyare ayaa sheegay inuu la xiriira xaaska uu ka tegay marxuumka, ayna u sheegtay geeridiisa, wuxuuna tilmaamay inuu xalay nabad ku seexday, balse saaka lagu soo waabariistay geeridiisa.

“Allaha u naxariisto Cali Muuse Cabdi geeridiisa waxa ay igu soo gaartay taleefoonkiisaan wacay mar weliba si caadi ah ayaanu u wada xiriiri jirnay markiina waxaa taleefankiisa iga qabatay xaaskiisa iina sheegtay in xalay uu si nabad ah ku seexday, saakana isaga oo geeriyooday oo nafta ka baxday lagu waabariistay,” ayuu yiri wariye Cabdiweli Garyare.

Sidoo kale wuxuu intaasi ku daray “Nin yahow wax xanuun ah ma heynin waa caafimaad qabyey waxay iska aheyd geeridiisa lama filaan hal-mar ayuu wadnaha iska istaagay,”.

Dhinaca kale xukuumadda federaalka ah ee Soomaaliya ayaa war kasoo saartay geerida marxuuumka, waxayna tacsi u dirtay ehellada Marxuum Cali Muuse iyo bahda suxufiyiinta.

Wasiir ku xigeenka magacaaban ee wasaaradda warfaafinta Cabdiraxmaan Al-Cadaala oo qoraal soo saaray ayaa sheegay inuu marxuumka ahaa xirfadle sare oo geesi ah.

“Ilaaheey ha unaxariisto Rugcadaagii Saxaafadeed Marxuum Cali Muuse Cabdi, waxaa uu ahaa xirfadle sare oo geesi ah. Waxaan xanuunka laqaybsanaynaa Qooyska, Qaraabada iyo saaxiibada uu ka baxay gadaashiis ilaahoow hana fidnayn innagana,” ayuu yiri Cadaala.

AUN Wariye Cali Muuse Cabdi ayaa ahaa suxufi caan ka ah gayiga Soomaaliya, wuxuuna ka soo shaqeeyey warbaahinno caalami ah sida, BBC-da iyo Wakaaladda Wararka ee AFP.

Muqdisho (Caasimada Onine) – Guddoomiyaha golaha shacabka, Mudane Sheekh Aadan Maxamed Nuur (Madoobe) ayaa xalay kulan la yeeshay qaar ka mid ah golaha wasiirada ee magacaaban, gaar ahaan xubnaha ka soo jeeda maamullada Koonfur Galbeed & Jubbaland.

Kulanka oo ka dhacay hoyga uu magaalada Muqdisho ka dagan yahay Sheekh Aadan Madoobe ayaa waxaa uu ahaa mid gaar ah oo gooni u ahaa isaga iyo wasiirada dowladda federaalka ku metelaya Koonfur Galbeed iyo Jubbaland, sida lagu sheegay qoraal kooban oo ka soo baxay xafiiska guddoomiyaha baarlamaanka federaalka ah ee Soomaaliya.

“Guddoomiyaha Golaha Shacabka BJFS mudane Sheekh Aadan Maxamed Nuur (Madoobe) ayaa hoygiisa ku qaabiley Wasiirada magacaaban ee dowladda Federaalka ku matala dowlad goboleedka Koonfur galbeed iyo qaar ka mid ah Jubaland,” ayaa lagu yiri qoraalka.

Sidoo kale ujeedka kulankaan ayaa waxaa lagu sheegay inuu ahaa salaan iyo booqasho ay guddoomiyaha ugu tegeen xubnaha golaha wasiirada ee magacaaban.

“Wasiirada magacaaban ayaa guddoomiyaha ugu yimid salaan iyo kala warqaadasho,” ayaa markale lagu yiri warka ka soo baxay xafiiska Aadan Madoobe.

Xubnaha uu qaabilay Aadan Madoobe waxaa ku jiray Sheekh Mukhtaar Roobow Cali (Abuu Mansuur) oo loo magacaabay wasiirka diinta iyo awqaafta, waxaana soo deyntiisa iyo xilka loo magacaabay door ku lahaa guddoomiyaha Golaha Shacabka oo ay isku deegaan yihiin.

Warar kale oo ay heshay Caasimada Online ayaa sheegaya in wasiirada magacaaban iyo Aadan Madoobe ay ka wada-hadleen arrimo ku aadan sidii ay xukuumadda cusub u heli laheyd codka kalsoonida ah, maadaama uu dhowaan uu horgeyn doono ra’iisul wasaaraha.

Somalia ayaa yeelatay xukuumad rasmi ah, taas oo dhismaheedu ay qaadatay ku dhowaad 40 cisho, kadib markii ay daba dheeraadeen wada-tashiyadii uu waday Xamza Cabdi Barre.

Muqdisho (Caasimada Online) – Faahfaahino dheeraad ah ayaa waxaa laga helayaa weerar ay ka hortageen ciidamada ammaanka ee dowladda Soomaaliya, kadib howlgal ay xalay ka sameeyeen qaybo ka mid ah degmada Warta Nabadda ee gobolka Banaadir.

Taliyaha qaybta bari ee Booliska Cali Calasow Goofjooge oo la hadlay warbaahinta ayaa ka warbixiyey howlgalkaasi, wuxuuna sheegay in looga hortegey weerar ay qorsheysay kooxda Al-Shabaab, kadib markii ay ka dul dhaceen ciidamada Booliska Somalia oo ka war helay.

Goofjooge ayaa shaaca ka qaaday inay heleen xog ku aadan qorshaha weerarkaasi, ayna fashiliyeen, intii ay is diyaarinayeen raggii fulin lahaa, sida uu hadalka u dhigay,

Sidoo kale wuxuu intaasi ku daray in bartilmaameedka uu ahaa inay weeraraan xarun ku taalla isla degmada Warta Nabadda, balse ma shaacin goobtaas iyo waxa ay tahay.

Inta uu howlgalka socday wuxuu sheegay inay dhacday israsaaseyn, isla-markaana ay gacanta kusoo dhigeen mid ka mid ah ragga weerarka diyaarinayey iyo qoray uu watay.

“Nimankii dhagar-qabayaasha ahaa oo raba inay weeraraan rug ku taalla degmada Warta Nabadda, inta ay is diyaar gareynaayeen laga qabtay. ayagii ayaa loo diyaar garoobay hortood la arkay la xabadeeyey nin iyo qorigiisna waa laga qabtay,” ayuu yiri taliyuhu.

Waxa kale oo uu intaasi sii raaciyey “Micnaheedu waxay ku tusinee dadaalka la wado, shaqada iyo isku xirnaanta inay dhan kasoo muuqanayaan,”.

Hadalkaan ayaa ku soo aadayo, ayada oo haatan Muqdisho uu ka socdo howlgal culus oo lagu sugayo amniga, sidoo kalena lagula dagaalamayo burcadda iyo ciyaal weerada.

Muqdisho (Caasimada Online) – Ciidamada ammaanka ee dowladda Soomaaliya ayaa xalay howlgallo ka sameeyey degmada Kaaraan ee gobolka Banaadir, kaas oo lagu soo qabtay rag burcad ah oo dhawaan dhac ka geystay xaafado ka tirsan magaalada Muqdisho.

Kooxda la soo qabtay oo ka kooban illaa 4 xubnood ayaa waxaa horjooge uu ahaa askari ka tirsan ciidamada dowladda oo la sheegay inuu baxsad yahay, sida ay shaaciyeen saraakiisha Booliska Soomaaliya ee xalay howlgalka ka sameeyey degmada Kaaraan.

Taliyaha saldhigga degmada Howlwadaag, Najiib Carab oo faahfaahin ka bixiyey howlgalkan ayaa sheegay inay heleen xog sheegeysa in gaari laga dhacay xaafadda Daallo ee degmada Howlwadaag uu yaallo xaafadda Buulo Maxaay oo ka tirsan degmada Kaaraan, kadibna ay soo qabteen gaariga oo ah Karoolo, isaga oo rinjiga laga beddelay iyo raggii dhacay.

“Waxaan ku guuleysanay inaan helno xog ah in gaari laga dhacay Howlwadaag uu yaallo Kaaraan, waana ku guulaysanay burcada meelna ugama hari doono, waxaan leeyahay qof walbo oo burcad ah oo raba inuu Xamar ku dhuumaaleysto waan ka daba tageynaa,”

Sidoo kale waxaa wariyeyaasha la hadlay milkiilaha gaariga oo lagu magacaabo Shariif Xidig, wuxuuna sheegay in gaariga markii la dhacayey uu watay walaalkiis, isla-markaana ragga dhacay ay isku soo ekeysiiyeen ciidanka ammaanka, kadibna ay la carareen gaariga iyo wiilkaba balse mar dambe ay wiilka isaga tuureen meel wado ah, gaarigana ay wateen.

Shariif Xidig ayaa sidoo kale u mahadceliyey ciidamada Booliska Soomaaliya oo ugu dambeyn gaarigiisa u soo celiyey, xalayna ku wareejiyey.

“Gaariga waxaa la dhacay 22-kii bishii hore, habeen Jimco aheyd, waxaana laga qaatay wiil yar oo ila dhashay waxay u fariisteen meel lagu yaqaano askarta nabad sugidda waxay ku shideen toosh, sidaas darteed wuu ka istaagay waxayna ku amreen inuu gaariga ka dago, kadibna toorey ayey ku qabteen wayna isla wateen ku dhowaad 4 saacadood ayey wareejinaayeen markii dambena waxay ku tuureen meel wado ah,” ayuu yiri Shariif Xidig.

Magaalada Muqdisho ayaa waxaa haatan ka socda howlgallo culus oo loogu magac daray sama-kaab, isla-markaana lagula dagaalamyo kooxaha burcadda ah iyo ciyaal weerada.

Muqdisho (Caasimada Online) – Taliska Militeriga Maraykanka Afrika ee loo soo gaabiyo AFRICOM ayaa todobaadkaan yeelanaya taliye cusub, kaas oo lagu magacaabo Jeneraal Michael Langley.

Taliyaha cusub ayaa noqday sarkaalkii ugu horreeyey ee ka tirsan ciidmaada badda Maraykanka ee madow ah oo gaaray darajada Jeneraalka afarta xiddigood leh.

Aqalka Sanate-ka ee dalka Maraykanka ayaa shalay ansixiyey dallacsiinta Jeneraal Langley oo loo magacaabay taliyaha ciidanka AFRICOM.

Taliska AFRICOM ayaa xaqiijiyey in Jeneraal Langley uu xilka kala wareegi doono Jeneraal Stephen Townsend toddobaadka dambe, gaar ahaan 9-ka Agoosto.

Wadamada ay ka howlgalaan ciidamada AFRICOM waxaa ku jirta Soomaaliya, waxayna dowladda Soomaaliya ka caawiyaan la-dagaalanka kooxda Al-Shabaab.

Waxay AFRICOM gudaha Soomaaliya ka fulisaa duqeymo ka dhan ah Al-Shabaab iyo Daacish, sidoo kalena wuxuu taliskaasi tababarro siiyaa guutada Dana bee ciidamada xoogga Soomaaliya.

Muqdisho (Caasimada Online) – Afhayeenka ciidanka booliska Soomaaliya ayaa maanta wax laga weydiiyey guuxa magaalada ka jira ee ah in sababta habeenkii Bajaajta Muqdisho bandow loogu soo rogay ay tahay qorshe lagu naas nuujinayo shirakadda Tagaasida ee Dhaweeye.

Gaashaanle Cabdifitaax Aadan Xasan oo ka jawaabayey su’aalo ay saxaafadu weydiisay ayaa beeniyey arrintaas, isagoo sheegay in hadda ay ka fekerayaan in bandowga lagu daro tagaasida ama gaadiidka raaxada ee ku shaqeysta adeega Dhaweeye.

Afhayeenka ayaa carabka ku adkeeyey in qorshaha laga leeyahay xayiraadaan habeenkii la saaray socodka Bajaajta uu yahay sidii loo xakameyn lahaa dhaqan xumada.

“Bajaajta waxaan u joojinay, habeen xilli dambe ayaan Buundooyinka ugu imid 7 gabdhood iyo lix Bajaaj, markaan weydiiyey sababta ay xiligaas meesha u joogaan waxay ii sheegeen in guryihii laga xirtay, lix saac wixii ka dambeeya waxaaba socda mooyaan, askari ama qof ahlu marqaan ah,” ayuu yiri Gaashaanle Cabdifitaax.

Wuxuu sheegay in hadda uu Muqdisho ka socdo howlgal ay ugu magac dareen ‘Samakaab’ kaas oo hadii uu guuleysto ay dib u eegis ku sameyn doonaan bandowgaan saaran Bajaajleyda Muqdisho.

Habeenkii markii la gaaro 12:00 AM ee saqda dhexe waxaa hakad gala dhamaan dhaqdhaqaaqa Mooto Bajaaj-yada ka howlgala Muqdisho, waxaana kii la qabto lagu ganaaxaa lacag 10 dollar ah, sida ay noo sheegeen dhalinyarada ku xamaalata.

Afhayeenka booliska ayaa mar uu samabeynayey xayiraadaan la saaray Bajaajta, wuxuu ka sheekeeyey dhacdooyin xun oo ay kala kulmeen ka boolis ahaan oo Bajaajleyda qaar.

Hoos ka daawo afhayeenka oo su’aalihii la hor dhigay ka jawaabaya

Muqdisho (Caasimada Online) – Golaha cusub ee wasiirrada Soomaaliya ayaa bilaabay xod-xodashada xildhibaanada golaha shacabka ee baarlamaanka Soomaaliya, si codkooda kalsoonida ay uga helaan.

Wasiirrada durba qaabilay xildhibaanada beeshooda ku metela baarlamaanka waxaa ka mid ah Mukhtaar Roobow Cali Abuu Mansuur oo shalay loo magacaabay wasiirka Diinta iyo Awqaafta.

Mukhtaar ayaa maanta la kulmay xildhibaanada jufasiida hoose ee Liisaan ku metela golaha shacabka, waxaana la sheegay inuu ka codsaday in codkooda kalsoonida ay siiyaan xukuumadaan uu ka tirsan yahay.

Wasiirka cusub ee gaashaandhigga Cabdulqaadir Maxamed Nuur ayaa ka mid ah xubnaha maanta deg deg u qaabilay xildhibaanada metela, si codka kalsoonida ay uga helaan.

Wasiir Jaamac Taqal ayaa sidoo kale muujiyey inuu la kulmay Xildhibaannada beeshiisa, waxaana taladaan wasiirrada siiyey ra’iisul wasaare Xamse Barre oo xubnaha uu soo xushay kula taliyey in wasiir kasta uu xildhibaanada beeshiisa codka weydiisto inta aan la gaarin ansixinta.

Kulamadaan ay bilaabeen wasiirradu ee xildhibaanada looga codsanayo codkooda, waxay ku soo aadayaan iyadoo beelaha Digil iyo Mirif ay aad u saluugsan yihiin karaasta laga siiyey xukuumadda cusub.

Inta badan xildhibaanada kasoo jeeda maamul goboleedka Koonfur Galbeed ayaa wada olole lagu diidayo asixinta xukuumadda cusub ee shalay lagu dhawaaqay, waxayna qaarkood baraha bulshada ku soo qoreen inay saluugsan yihiin boosaska laga siiyey xukuumadda.

Xilalka Digil iyo Mirifle laga siiyey golaha wasiirada ayaa kala ah:

1- Wasaaradda Gaashanadhigga, 2-wasaaradda diinta iyo awqaafta, 3- Wasaaradda xanaanada xoolaha, 4- wasaaradda Ganacsiga iyo 5- wasaaradda beeraha iyo waraabka.

Xildhibaanada Digil iyo Mirif waxay ku doodeen in wasaaradaha la siiyey ay aad u hooseeyaan oo C ay u badan yihiin, waxaana xusid mudan in xubnaha baarlamaanka ka soo galay Koonfur Galbeed ay laba jibaar ka badan yihiin kuwa ka yimid maamul goboleed kasta, taas oo cabsi weyn ku abuureysa ansixinta xukuumadda.

Muqdisho (Caasimada Online) – Fu’aad Maxamed Khaliif (Fu’aad Shangole) oo ka mid ah madaxda ugu sareysa Al-Shabaab ayaa markii u horeysay soo hadlay tan iyo markii ay dowladda Itoobiya sheegatay inay dishay.

Fu’aad Shangole ayaa wax lagu qoslo ku tilmaamay sheegashada Itoobiya ee dilkiisa, isaga oo sheegay inaysan weligood guul arki doonin maadama ay dhawaan ku joog-joogsadeen magaca Allaah iyo kalmadda towxiidka, sida uu sheegay.

“Waaniga aniga oo nool la hadlaya muslimiinta, waxaa u sheegayna muslimiinta in aan noolnahay oo sharaf leenahay. Waa noolahay waana caafimaad qabaa,” ayuu yiri Fu’aad Shangole.

Sidoo kale waxa uu ku goodiyay in weeraro hor leh ku beegsan doonaan ciidamada Liyuu Booliska, kuwaasi oo uu ku tilmaamay “kuwa ugu liita maleeshiyaadka Soomaalida diin ahaan iyo dhaqan ahaanba”, islamarkaana ay joogteyn doonaan beegsiga ciidamadaas.

“Waxay ku dambeyn doonaan (Ciidamada Liyuu Booliska) darxumadii uu ku dambeeyey ninkii aas-aasay (oo uu kala jeedo Cabdi ileey).”

Ugu dambeyntiina wuxuu ku dheeraaday kalimado dhiiri-gelin ah oo dagaal-yahaanada ku riixaya inay sii wadaan dagaalka, isagoo guulo waaweyn ka sheegtay dagaaladii u dambeeyay ee ku qaadeen ciidamada Itoobiya.

Fu’aad Shangole ayaa ah madaxa abaabulka iyo tashkiilinta dagaalyahanada Al-Shabaab, sidoo kale Shangole wuxuu kamid yahay madaxda Al-Shabaab ee dowladda Mareykanka ay madaxooda dul dhigtay malaayiinta dollar.

Madaxa Sirdoonka Itoobiya Major General Tesfaye Ayalew ayaa dhawaan u sheegay Wakaalada Wararka Itoobiya ee Ethiopian News Agency inay dileen sedax hoggaamiye oo kamid ah Al-Shabaab, kuwaasi oo kala ah Fu’aad Shangole, Abuu Muscab iyo Cubeyda Nuur Ciise oo la sheegay inuu yahay madaxa Al-Shabaab u qaabilsan abaabulka ay kooxdu ka wado xuduudka dowlad deegaanka iyo Gobalka Bakool ee Soomaaliya.