Muqdisho (Caasimada Online) – Warar lagu kalsoonaan karo ayaa sheegaya in maanta qarax xoogan kolonyo uu la socday guddoomiyaha maxkamadda darajada koowaad ee ciidamada qalabka sida Soomaaliya, Mudane Xasan Cali Nuur Shuute lagula eegtay duleedka magaalada Muqdisho, gaar ahaan waddada waddada jaayga ee degmada Kaxda.

Qaraxa ayaa ka dhashay Miino la dhigay waddada dhinaceeda, taas oo lala bartilmaameedsay gaadiidkan oo ka yimid dhanka gobolka Shabeelaha Hoose.

Wararka ay heleyso Caasimada Online ayaa sidoo kale intaas ku daraya in guddoomiyaha uu ka badbaaday qaraxaasi, walow uu jiro khasaare kale oo ka dhashay.

Inta la xaqiijiyey waxaa qaraxaasi ku dhaawacmay illaa saddex qof oo labo ka mid ah ay yihiin askar, halka ruuxa kale uu yahay shacab.

Sidoo kale wuxuu burbur xoogan soo soo gaaray mid ka mid ah gawaaridii galbineysay gudddoomiyaha, kaas oo uu lahaa xeer ilaaliyaha maxkamadda ciidamada, Buulle.

Xasan Cali Nuur iyo Shuute iyo saraakiil kale oo la socotay ayaa ka yimid saldhig ciidamada dowladda ay ku leeyihiin deegaanka Ceel Saliini, halkaas oo uu dhowaan ka dhacay weerar lagu dilay askar badan oo ka tirsanaa ciidanka Milatariga dowladda federaalka Soomaaliya.

Weli ma jiro wax hadal ah oo ka soo baxay laamaha amniga oo ku aadan qaraxaas oo noqonaya kii 2-aad oo isla maanta ka dhaca Muqdisho, iyadoo saaka ciidamo kale qarax lagula eegtay degmada Hodan ee gobolka Banaadir, kaas oo ay ku dhinteen 3 Askari.

Caasimada Online
Xafiiska Muqdisho
[email protected]

Muqdisho (Caasimada Online) – Aqoonyahan Feysal Rooble oo si aad ah u falanqeeya arrimaha Soomaaliya ayaa qoraal dheer ee uu soo dhigay bartiisa Facebook-ga waxa uu uga warbixiyey biladii shalay Madaxweynaha Soomaaliya lagu siiyey dalka Mareykanka.

Feysal Rooble ayaa sheegay in abaalmarinta Concordia ay tahay mid hooseysa oo aan loo baahneyn in aan laga dhigin mid weyn.

Halkan hoose ka aqriso:

Runta Waa In Si Daacadnimo Ah Loo Sheego.

Saaxiibkey ayaan ka arkay Xog-dhigaalkan. Waxaan filayaa in Danjiraha wanaagsan ay ahayd inuu ku sameeyo baaritaan waxa ay tahay Abaalmarinta Concordia. Aqoonsiga qofku waa mid wanaagsan. Laakiin tani waxay liiditaan ku tahay Madaxweynaha Soomaaliya. Intaas waxaa dheer, Waxay daciifnimo ku tahay Wakiil waxbartay sida saaxiibkey inuu arrintaan nooga dhigo guul mudan aqoonsi qaran taasoo aan ahayn, Waxaa la adeegsanayaa been-abuur si guul looga dhigo meel aan waxba ka jirin.

Concordia waxaa sameeyey urur yar oo buunbuuniya mashaariicda caalamka oo aqoonsata dadka ka shaqeeya ururradaas. Qaar ka mid ah dadkii la siiyey Abaalmarinta Concordia waxaa ka mid ah:

Gloria Malone, oo ah aasaasaha ururka “Teen Mom” ee magaalada New York iyo Mohamed Yonis oo isna leh ‘Micro Loan ee dalka Banhladesh.

Ujeedkeyga aan ku iftiiminayo dhacdadan waa rabitaan aan doonayo inaan ku dhiirrigeliyo kuweenna waxbartay si ay u yeeshaan tayo oo aysan u marin-habaabin dadkeenna. Postiga aan ka hadlayo wuxuu dirayaa farriin qaldan sida in adduunku uu aqoonsaday guulaha Madaxweyne Farmaajo sidaasna ma aha arrintu.

Indheer-garadka mas’uuliyad ayaa ka saaran inay runta xoojiyaan iyagoo aan daacadnimada ka tegin. Soomaalida wey taqaan “Guulwadeyn” si la mid ah sida Afrikaanta Mareykanku ay meel fog uga ogaadaan Cunsuriyadda.

Abaalmarinta Concordia waa mid hooseysa oo uusan Madaxweyne arrin weyn ka dhigan karin. Abaalmarinta Concordia waa (NGO) yar oo xiriir la leh Jaamacado tayadoodu liidato oo saldhiggoodu yahay Virginia.

Waxaan u rajeynayaa Madaxweynaha Soomaaliya inuu maalin heli doono Abaalmarin u dhiganta sharafta iyo guulaha xafiiskiisa. Maalintaas ayaan la dabbaaldegi doonnaa laakiin tani ma aha Abaalmarin.

W/Q: Faisal Rooble

Caasimada Online
Xafiiska Muqdisho
[email protected]

Muqdisho (Caasimada Online) – Maareeyaha hay’adda duulista hawada Soomaaliya, Mudane  Axmed Macalin oo la hadlay warbaahinta ayaa faa faahin dheeri ah ka bixiyey waxa ka jira xiyaaradda dhinaca duulimaadka ee la saaray maamulka Jubbaland.

Maareeyaha ayaa marka hore beeniyey in la hakiyey dhammaan duulimaadyadii Kismaayo muddo saddex cisho ah, wuxuuna tilmaamay in aysan jirin warqad rasmi ah oo ka soo baxday dowladda federaalka oo lagu joojiyey diyaaradihii tagi jiray garoonka magaaladaasi.

Axmed Macalin ayaa sidoo kale intaasi ku daray in hadda aysan jirin wax xayiraad ah oo saaran Juubaland, kaliya waxa uu xusay in shirkadaha diyaaradaha la faray in duulimaadkooda Kismaayo ay hay’adda ku soo wargeliyaan 24 saac, ka hor, sida uu hadalka u dhigay.

Dhowaan ayey aheyd markii dowladda federaalka ah ee Soomaaliya ay hakad gelisay diyaarad siday Madaxweynihii hore ee Soomaaliya, Mudane Sheekh Shariif Sheekh Axmed oo ku sii jeeday magaallo xeebeedka Kismaayo ee xarunta gobolka Jubbada Hoose, waxaana xigay amar la sheegay inuu ka soo baxay dowladda oo muddo 3 cisho lagu hakiyey dhammaan duulimaadii magaaladaasi, inkastoo oo uu hadda amarkaasi meesha ka saaray Maareeyaha hay’adda duulista hawada, Mudane Axmed Macalin.

Khilaafka dowladda federaalka iyo Jubbaland ayaa sii xoogeysanaya marba marka ka dmabeysa, kaas oo ka dhashay doorashadii dib loogu doortay, Axmed Madoobe.

Halkan hoose ka dhageyso Codka.

Caasimada Online
Xafiiska Muqdisho
[email protected]

New York (Caasimadda Online) – Wadahadallo saddex geesood ah oo ay Magaalada New York ee dalka Mareykanka ku yeesheen Madaxweynaha Federaalka Soomaaliya Maxamed Cabdullaahi Farmaajo, Madaxweynaha Kenya Uhuru Kenyatta iyo Madaxweynaha Masar Cabdulfataax Al Sisi ayay dowladda Soomaaliya sheegtay in uu kusoo dhamaaday is faham.

Arrinkan ayaa lagu shaaciyay bogga Facebook ee madaxtooyada Soomaaliya ee Villa Somalia.

Kulankan oo uu soo qabanqaabiyay Guddoomiyaha Midowga Afrika, ahna Madaxweynaha Masar Cabdulfataax Al Sisi ayay dowladda Soomaaliya sheegtay in la isku raacay in xiriirka ka dhaxeeya Soomaaliya iyo Kenya lagu soo celiyo heerkii uu taagnaa bishii Febraayo ee sanadkan, lana qaado tallaabooyin diblomaasiyadeed oo lagu dhisayo kalsoonida labada dowladood iyo shacabka.

Madaxweynayaashu waxa ay ku heshiiyeen in la sameeyo guddi isku dhaf ah oo ka kooban labada dhinac kuwaas oo ka shaqeyn doonaa ka mira dhalinta isafgaradka haatan la gaaray.

Sidoo kale Dowladda Federaalka Soomaaliya ayaa sheegtay inay ku adkeysatay in kiiska badda go’aan kiisa loo daayo Maxkamadda Caddaaladda Adduunka, taas ay shegeen in la isku waafaqay.

Kenya ayaa marar badan ku adkeysatay in kiiska dacwadda badda laga soo celiyo maxkamadda, oo is-afgarad lagu dhameeyo.

Khilaafka diblomaasiyadeed ee Kenya iyo Soomaaliya ayaa gaaray halkii ugu xumeyd gaaray bishii February markii ay dowladda Kenya u yeeratay safiirkii u jooga Muqdisho, halka kan Soomaalida na ay ku amartay in uu dalkiisa ku laabto.

Waxay ka dambeysay Kenya oo ku doodaysa in Soomaaliya “ay ku xaraashtay” magaalada London ee wadanka Ingiriiska ceelal shidaal oo ku yaal dhulka xuduudda ee lagu muransan yahay. Soomaliya ayaa arrintaa si kulul u beenisay.

Kulanka New York ayaa noqonaya kii ugu horreeyay ee yeeshaan labada hogaamiye tan iyo bishii March markaas oo ay ku kulmeen magaalada Nairobi. kuna heshiiyeen inay soo celiyaan xiriirka labada dal, sida uu sheegay ra’isilwasaaraha Itoobiya Aby Axmed oo labada dhinac dhexdhexadinayay.

Balse tan iyo markaasi waxaa dhacay dhacdoyin loo arkayay inuu dhaawac ku yahay xiriirka labada dal sida Kenya oo dib u billowday inay diyaardaha Soomaaliya soo maraan Wajeer, iyo Soomaaliya oo dalabatay in shirarkii Nairobi ka dhici jiray qeyb ka mid ah loo wareeiyay dalalka kale ee deriska ah.

Muranka dhanka badda ee u dhaxeeya dalalka Kenya iyo Soomaaliya ayaa in muddo ah soo jiitamayay, waxaana sannadkii 2014-ka ay dowladda Soomaaliya maxkamadda cadaaladda ee adduunka ay u gudbisay dacwad ka dhan ah Kenya, iyaddoona dooneesay in soohdinta badda ee labada dal la waafajiyo tan barriga.

Cabdinuur Maxamed Axmed oo ah Agaasimaha Warfaafinta Madaxtooyada JFS ayaa bartiisa Facebook kusoo qoray faahfaahin ku saabsan wixii ay labada Madaxweyne ka wada hadleen.

Halkaan ka akhriso qoraalka uu soo dhigay Facebook:

Muqdisho (Caasimada Online) – Madaxweynihii hore ee Soomaaliya Sheekh Shariif Sheekh Axmed, oo dhowaan laga diiday in uu u duulo magaalada Kismaayo ee gobalka Jubada Hoose, ayaa ka badbaaday shirqool sumcaddiisa ay ku dhiman lahayd oo lala rabay.

Madaxweyne Shariif, oo ah hogaamiye saameyn ballaaran leh, sidoo kalane lagu tiriyo dadka ugu dhow ee Soomaaliya hogaankeeda ku soo laban kara, ayaa dowladda Kenya iyo masuuliyiin ka tirsan dowladda Soomaaliya waxay usoo jeediyeen in uu diyaarad Milateri ka raaco magaalada Nairobi ee xarunta Kenya, taas oo toos u tageysa Kismaayo.

Inkastoo ay magaalada Kismaayo saarantahay xanibaad ay ku soo rogtay dowladda Soomaaliya ayaa hadane Kismaayo waxaa si maalinle ah u taga diyaarado dagaal oo ka baxa Nairobi iyo kuwa UN ah oo aysan waajib aheyn in ay Muqdisho soo maraan ama Kismaayo laga celiyo.

Caasimada Online, ayaa xog ku heshay in masuuliyiiin sare oo ka tirsan dowladda Soomaaliya ay u soo jeediyeen in uu ka baxo Nairobi islamarkaana uu qaato diyaarad Milateri maadaama uu yahay masuul xushmad leh oo dalka xil muhiim ah ka soo qabtay. Sidoo kalane uu saaxiib la yahay hogaanka dowladda Soomaaliya.

Sidoo kale dowladda Kenya ayaa Shariif usoo jeedisay in isaga iyo wafdigiisaba ay siin doonto diyaarad Milateri oo ka qaada Nairobi toosna u geysa Kismaayo kana soo celisa balse waxaa warkaasi diiday Madaxweyne Sheekh Shariif Sheekh Axmed.

Sheekh Shariif, hadii uu raaci lahaa diyaarad milateri oo ay leedahay Kenya, waxa lagu eedeyn lahaa in uu xariir la leeyahay Kenya islamarkaana uu kala shaqeynayo qabsashada degaanada Jubbaland iyo ka guul gaarida murunka Badda.

“Waxay geliyeen waqti dheer iyo maskax in ay Madaxweynaha ku qanciyaan socdaalkiisa Kismaayo in uu ku tago diyaarad Milateri oo ay leedahay Kenya, laakiin kuma guuleysan hadafkooda” ayuu yiri Xildhibaan ka tirsan Golaha Shacabka ee Baarlamaanka Soomaaliya oo la hadlay Caasimada Online.

Ma cadda in xubnaha ka tirsan dowladda Soomaaliya iyo dowladda Kenya ee soo jeedintan sameeyey inay is ogaayeen. Waxaa macquul ah in kenya danteedu tahay in Shariif geyso Kismaayo, si uu uga qeyb-galo caleemo-saarka Axmed Madoobe, halka dowladda Soomaaliya danteedu tahay inay sumcad disho Shariifka.

Caasimada Online
Xafiiska Muqdisho
[email protected]

New York (Caasimadda Online) – Dadka sida adag u dhalleeceeya Trump waxay ku eedeynayaan in uu awoodda xilka madaxweynaha u adeegsaday in uu ku handado Ukraine, si ay u soo saaraan macluumaad dhaawaca sumcadda ninka siyaasadda ay ku loollamayaan ee Joe Biden, oo ka tirsan xisbiga Dimuquraaddiga.

Qorshaha la doonayo in xilka looga qaado Madaxweyne Donald Trump ayaa la sheegay in uu ka yimid madaxda sare ee xisbiga dimuqraaddiga, waxaana afhayeenka aqalka Kongreska, Nancy Pelosi ay sheegtay in Madaxweynaha uu la kulmaa isla xisaabtan dhab ah.

Ilhaan Cumar oo ah xubin ka tirsan aqalka Kongreska ee dalka Mareykanka ayaa sheegtay in Trump uu isaga xilka iska qaadayo marka loo fiiriyo khaladaadka uu sameeyey sida ay hadalka u dhigtay.

Ilhaan oo wareysi dheer siisay Telefishinka CNN ayaa sheegtay in xil ka qaadista Trump loo marayo dhanka Sharciga, waxayna madaxweynaha ku eedeysay inuu jabiyey Sharciga Mareykanka.

” Waxay u muuqataa inuu Madaxweynaha sharciga ka sareeyo marka loo fiiriyo dhacdadaan” ayey tiri.

Waxay ugu dambeyn sheegtay inay ka go’an tahay sidii loo sii wadi lahaa qorshahaan xilka looga qaadayo Trump, iyadoo caddeysay in Afhayeenka aqalka Kongreska Nancy Pelosi ay ka go’an tahay sidi xilka looga qaadi lahaa.

Caasimada Online
Xafiiska New York
[email protected]

Muqdisho (Caasimada Online) – Xildhibaan Cali Yuusuf Xoosh ayaa si adag u dhaliilay Buug uu Cabdiwali Gaas ku aflagaadeeyay mas’uuliyiin kala duwan oo uu kamid yahay Cabdiraxmaan Faroole, mid kamid ah bud-dhigeyaashii Puntland.

Buuga ayaa waxaa lagu soo qaadey rag uu u bixiyey ‘Midowga Shayaadiinta’ wuxuuna is-barbardhig ku sameeyay xukuumadiisa iyo kuwii kale ee ka horeeyay.

Xoosh ayaa markii uu Buuga arkay xiriir la sameeyay Gaas. Cabdiwali wuxuu qirtay in uu Buugu isagu leeyahay, wuxuuse qiil ka dhigtay ‘gedaal buu ka fiican yahay’. Hase ahaatee, warkaa “ima anficin,” ayuu yiri Cali Yuusuf.

“Waxaa la yiraahdaa beenlowga waxaa sira beenta oo xusuustaa yar; beelow xusuus yari ayaa sirdha [sirta] ayaa la yiraahdaa,” ayuu tibaaxay, isaga oo raaciyey: “Wuxuu yiri ‘Cali baa lasoo xiriiray Maxamed Cabdiraxmaan buu qadka soo geliyay si qarsoodi ah’ dabeecadaas maba aqaano, tiknoolajiyad ahaan”.

Gaas, kahor inta aan 8-dii Janaayo 2014-kii loo doortay madaxweynaha Puntland, ayaa wuxuu soo noqday ra’iisul wasaaraha Soomaaliya.

“Ragga uu u bixiyey 12-ka uu yiri ‘Midowga Shayaadiinta’ wuu sii fogaadey oo abkooda ayuu gaarey…nimankaasi waa niman reer Nugaaleed ah…oo tiradooda maba aqaani oo tiruu sheegay isagu…waan maleynayaa in ragaasi oo aan anigu kamid ahay oo akhyaar ah oo odayaasha meeshaas ah oo xag cibaado, akhlaakh, xag mas’uuliyadeed niman qiima gal ah…laakiin garan kara ninka xun ee isaga oo kale nooca uu yahay ah oo doonayo in uu ku kaarto baxo oo xumaanta uu leeyahay diiradda ku saara halkaas,” ayuu hadalkiisa raaciyay.

10-kii bishii June 2011-kii, kadib codsi ka yimid Gaas isaga oo Kampala ku sugan, Senator Faroole oo haatan kamid ah Aqalka Sarre ee baarlamaanka federaalka, ayaa Cabdiwali ku taageeray inuu noqdo ra’iisul wasaaraha Soomaaliya.

“Aniga oo Qardho maraya ayuu ila soo hadlay wuxuu igu yiri ‘Cabdiraxman Faroole igala hadal Farmaajo ra’iisul wasaare buu ii wadaa’ Faroole oo Jabuuti jooga ayaan la hadlay wuuna ogolaadey, sidaasi ayaana ku dhameeyay, abaal bey ahayd oo aan u galay,” ayuu sharcidejiyaha ku daray hadalkiisa.

“Abaal-laawe”

“Ragga kale oo uu xusay, Shayaadiinta uu ku sheegay, laakiin qiimigooda dadka kale og-soon yahay, waxaan ogaa oo aan anigu kamid ahaa lacag 100-kun oo dollar ah in aanu siinay oo jeebabkeena aanu uga qaaraanay, waqti uu lahaa doorashaaan gelayaa…abaal la’aanta marka waa lagu yaqaanaa, as-raarta beenta ahna waa lagu yaqaanaa…Farmaaijhii boosas-kaasi keenay iyo Faroole-iyo kuli waxa uu ugu abaal-guday waa lagu yaqaanaa…marka ninkii wanaag u gala xume ayuu ugu abaal-gudaa, as-raarkana waa yaqaanaa,” ayuu daba dhigay xildhibaan Xoosh.

“Waa ninka baarlamaanka dhexdiisa lacagta uu sameeyay oo la yiri ‘lacagtan ma sameyn’ oo uu yiri ‘gacantiina ayaan ku arkay’ waa ninka intii shaqaalihii ay soo istaageen yiraahdeen ‘mushahar ma aanan qaadan oo caan ah’ oo isaga markaa Garowe dabaqyo ka dhisanayey oo hadda uga dhisan yihiin Gaalkacyo, Washington, lahaa ‘shaqaaluhu mushahar buu qaatay’ asraar noocaas ah aniga ahaan waa qofkii ugu horeeyay oo meel lasoo istaaga mas’uul noocaas ah,” ayuu mudanaha hoosta ka xariiqay.

“Isbarbardhigii baan wadaa…waqtigii uu joogay iyo waqtigii kale….wuxuu sii daayay argagixisadii jeelasha ku xirneyd…wuxuu sii xoojiyey oo uu heshiis la galay argagixisadii kale ee beeraha joogtay, illaa iyo ay baadeen ganacsatadii…wali lama arag Puntland…xiligiisii maraakiib deeq ah oo masaakiinta loogu talogalay uu yiri xulufo aktiisa ‘isoo iibsha’ oo ganacsatadii laga wada iibiyey oo kuli bakhaarada lawada dhigi jiray,” ayuu yiri Xoosh.

“Waxayno aragnay in madal kasta uu tago wax been ah oo aan daacad ahayn oo dadka meesha uu jooga uu ku qacinayo in uu sheego sidii markii Canada uu tago uu yiri ‘Puntland faqiiriin baa isugu soo haray iyo dadaan aqoon lahayn’ tii Dubai oo uu yiri ‘Puntland waa gabar fiicanoo [laakiin] aal-ku-luusteyaal baa guursadey’ odayaashii soo xukumay [Puntland] nin been sheegay kuma jirin; nin faanaana kuma jirin; nin khaladaadka suuqa lehna kuma jirin; nin-nin u gefaya nin-nin wax ka sheegaya kuma jiirn,” ayuu xusay.

Hoos ka daawo muuqaalka 

Hargeysa (Caasimada Online) ― Boqor Cismaan Buurmadow oo ka mid ah madax-dhaqameedka Somaliland ayaa ka hadlay xiisada colaadeed ee mudooyinkii dambe ka soo cusboonaaneysay deegaanada Ceel-Afweyn.

Boqor Buurmadow ayaa gebi ahaanba gaashanka u daruuray in uu lug ku leeyahay colaada deegaanka Ceel-Afweyne ee xukuumada Biixi ay dhowr jeer oo hore ula xiriirisay xiisadaasi.

Buurmadow ayaa sidoo kale waxa uu sheegay in xukuumada Somaliland ee uu hogaamiye Madaxweyne Biixi, aysan daacad ka aheyn daminta xiisada colaadeed ee ka soo noq-noqota deegaanadaasi, isagoona dusha u saaray colaada mudada badan ka taagan deegaanada Ceel-Afweyn.

Boqor Cismaan Buurmadow oo arrimahaasi ka hadlayana wuxuu yiri “Waxaan leeyahay labada ardaa ee walaalaha ah ee ehelkana ah ee meesha ku wada-hadlaya, anigoo afkooga ku wada-hadlaya, weyna fadhiyaan guurtidii Suldaan dhawal iyo garaad Jaaamac, iyo raggii arrinkayaga galayba, waxaanan leeyahay reer Somaliland arrinkaa waxa ka dhiman intii dowladda”.

“Marka aynu wax ku heshiino fulintiisa dowladda ayey ka bixi laadahay, waxayna ka fuli laadahay dhinacooda, waxaana jirra kuwo aan dowladda saddex jeer u dhiibnay oo inaga haya, haddana ay soo deyso oo suuqa dhexdiisa wax ku dilay baa jira”.

Wuxuuna intaas kusii daray “Hadii aysan dalka dowladi ka jirin Ceel-Afweyn aad garaneysan baa tikniko lagu dhex wataa, oo magaalada hub lagu dhex wataa, magaalo yar bey xasilin laadahay dowladu, waxaana dalka haysata dowlad daciifa”.

Muqdisho (Caasimada Online) – Xarunta dowladda hoose ee Xamar ee uu ku shaqeeyo guddoomiya maamulka gobolka Banaadir ayaa caawa amnigeeda si buuxda loogu wareejiyay ciidamo si gaar ah u taba baran.

Guddoomiyaha gobolka Banaadir Cumar Maxamuud Maxamed Filish ayaa xog ay heshay Caasimada Online waxa ay sheegaysaa intii uu hayay xilkaan in uu ka shaqaynayey sidii uu u xulan lahaa ciidamo uu ku aamino amnigiisa.

Ciidamada caawa la wareegay ammaanka xarunta gobolka Banaadir ayaa ka tirsan booliiska Soomaaliya gaar ahaan kuwo loo yaqaano Birmadka, waxaana dhawaan tababar gaar ah loogu soo gaba-gabeeyay magaalada Muqdisho.

Xaruntaan ayaa qarax ka dhacay 24-kii bishii July waxaa lagu dilay Allaha u naxariistee guddoomiyihii kan ka horeeyay Cabdiraxmaan Yariisow iyo mas’uuliyiin kale oo ka tirsanaa maamulka gobolka Banaadir.

Dhamaan ciidamadii u xilsaaraa sugidda ammaanka xarunta gobolka Banaadir intii uu shaqeynayay maamulkii kan ka horeeyay ayaa laga wareejiyay xarunta, waxaana qaar ka mid ah ciidamadaas, saraakiishoodii iyo xubno kale oo ka tirsan maamulka gobolka ku socda baaritaano ku saabsan qaabkii loo fududeeyay qaraxii is-miidaaminta ahaa ee ka dhacay xarunta dowladda hoose ee Xamar.

Caasimada Online

Xaafiiska Muqdisho

[email protected]

Muqdisho (Caasimada Online) – Askar ka tirsan ciidanka xoogga dalka oo Muqdisho laga qaaday ayaa galabta laga dajiyay degamada Baardheere ee gobalka Gedo, kuwaas oo hor dhac u ah ciidamo kale oo dowladdu ay damacsantahay in ay ku daad gureyso gobolka Gedo.

Ciidamada galabta laga dajiyay Baardheere ayaa tiro ahaan gaaraya 300 askari, sida ay ogaatay Caasimada Online waxayna saraakiisha hogaaminaysa sheegeen in ay hor dhac u yihiin ciidamo kale oo lagu daabulayo gobolka Gedo ee koonfurta Soomaaliya, kuwaas oo lagu wado in maalmaha nasoo aadan ay gaaraan halkaas.

Ciidamada ayaa qeyb ka ah qorshe ay dowladda dooneyso inay guud ahaan ku wada qabsato gobolka Gedo, kadibna u gudubto Jubbada Dhexe, si ay Axmed Madoobe ugu soo reebto kaliya dhowr degmo oo ka tirsan Jubbada Hoose.

Talaabadaan dowladda federaalka ay ciidamada ugu dajisay Baardheere ayaa kusoo aadeysa, iyadoo Wasiirka arimaha gudaha xukuumadda Soomaaliya Cabdi Maxamed Sabriye, uu u yeeray guddoomiyaha gobalka Gedo Maxamed Maxamuud Muxumed iyo Saraakiil ka tirsan ciidamada Milateriga Soomaaliya ee ka howlgala gobalka Gedo.

Qaar ka mid ah xubnahaas ay u yeertay wasaaradda arimaha gudaha ayaa soo gaaray magaalada Muqdisho sida aan xogta ku helnay, waxaana lagala hadlay xubnihii soo gaaray Muqdisho fulinta go’aano ka soo baxay Wasaaradda arrimaha gudaha Soomaaliya iyo Xafiiska Madaxtooyada, kuwaas oo la rabo in ay ka dhaqan galaan gobolka Gedo.

Caasimada Online ayaa ogaatay in go’aanadaas ay ku jiraan qodobadaan.

1) – In guddoomiyaha gobalka uu ku dhawaaqo xil ka qaadis lagu sameeyo guddoomiyaasha afar degmo oo kala ah, Luuq, Doolow, Ceelwaaq iyo Baardheere, kuwaas oo ah degmooyinka aadka looga taageero Axmed Madoobe kana tirsan Gedo.
2) – In taliyaal cusub iyo guddoomiyaha gobalka, ay hogaamiyaan howlgal ka bilaaban doono Gedo oo lagu imaan doono Jubbooyinka, waxaana lagu wareejin doonaa Ciidamo cusub oo tababar ka soo baxay iyo saanad ciidan.
3) – Iyo in aysan fulin, kana amar qaadan Axmed Madoobe, balse ay fuliyaan amarada ka soo baxa Madaxtooyada Soomaaliya si loo badbaadiyo dalka.

Wafdigaan ayaa la filayaa in ay deg deg ugu laabtaan Gedo, islamarkaana ay dhaqan geliyaan heshiiyo iyo amaro ka soo baxay Madaxtooyada oo dagaal culus kula jirto Madaxweynaha Jubbaland Axmed Maxamed Islaam.

Lama oga sida ay u dhaqan geli doonaan arrimahaan balse waxaa la filayaa in masuuliyiintaan ay wajahaan caqabado badan oo saameen balaaran degaanka ku yeesha.

Caasimada Online
Xaafiiska Muqdisho
[email protected]

Muqdisho (Caasimada Online) – Qaar ka mid ah xildhibaanada labada gole ee baarlamaanka federaalka Soomaaliya  ayaa kulan ay maanta ku yeesheen magalada Muqdisho waxa ay kaga hadleen xaaladda guud ee dalka, iyo dhacdooyinkii u dambeeyay ee ay ugu waa weynaayeen is hortaagii lagu sameeyay madaxweynihii hore Shariif Sheikh Axmed iyo cuna qabateynta Jubbaland.

Xildhibaanada ayaa waxay kulankooda uga hadleen mas’uuliyaddooda ku aadan arimaha ka socda dalka iyo sida ay uga gaabiyeen la xisaabtanka xukuumadda, iyagoo isku booriyay in ay gutaan waajibaadkooda dastuuriga ah.

Xildhibaanada ayaa war-saxaafadeed ay soo saareen waxa ay ku sheegeen in xukuumaddu si barer ah ay u jabisay dastuurka dalka, ayna ku kacday qiyaano qaran, iyagoo soo ban dhigay qodobada ay ku eedeynayaan in ay jabiasay xukuumaddu.

Xildhibaanada ayaa sheegay in xukuumaddu ay ku guul dareysatay gudashada waajibaadkii loo igmaday, sida amniga, wada shaqweyn dghex marta dowladda dhexe iyo dowlad goboleedyada, dib u habeynta qabyo tirka dastuurka dalka, hanaanka doorashooyinka, dhameystirka hey’adaha dastuuriga ah ee dalka iyo garsoorka.

Xildhibaanada ayaa war-saxaafadeedkooda ki cambaareeyay ku tumashada dastuurka dalka iyo ku tagri falka awoodeed oo sida ay sheegeen xukuumaddu ay ku kaceyso, iyo sidoo kale cuna qabateynta ay saartay madaxdii hore ee dalka iyo shacabka reer Jubbaland.

Xildhibaanadu waxey sheegeen in sigaar ah ay u cambaareynayaan xanibaadii lasaaray duulimaadyadii aadi jiray magaalada Kismaayo, taas oo ay sheegeen in shacabku ay dhib weyn ku qabaan.

Hoos ka aqriso qoraalka xildhibaanada oo dhameystiran

Caasimada Online
Xaafiiska Muqdsiho
[email protected]

Muqdisho (Caasimada Online) – Afhayeenka Gobolka Banaadir Mudane Saalax Xasan Cumar ayaa beeniyey warar uu sheegay inay been abuur yihiin oo lagu faafiyay qaar ka mid ah baraha-bulshada.

Wararkaasi ayaa sida uu sheegay Saalax Dheere lagu sheegay in Duqa Muqdisho Ahna Guddoomiyaha uu ka hadlay Arrimo quseeyo shirarkii jiraa’id ee Madaxweynayaashii hore ee Soomaaliya iyo Arrimaha Kismaayo.

Afhayeenka Gobolka ayaa tilmaamay in aysan jirin wax faallo ah oo arrinkaas ku aaddan oo uu Guddoomiyaha Gobolka Banaadir Mudane Cumar Maxamuud Maxamed uu ku soo bandhigay baraha-bulshada iyo saxaafadda.

“Warka been abuurka ah ee sacaadihii u danbeeyey lagu sheegay in Guddoomiyaha Gobolka Banaadir uu dhaliilay Xisbiga Himilo Qaran, isla markaana uu baaq u diray Madaxweynayaashii hore ee dalka soo maray sida Madaxweyne Sheekh Shariif iyo Madaxweyne Xasan Sheekh waa kuwo muujinaya in tiro yar ay ku hawllan yihiin kala dilka iyo kala fogeynta masuuliyiinta dalka, taas oo looga golleeyahay dano shaqsiyadeed iyo caqabadeynta horumarka.”

Afhayeenka Gobolka Banaadir ayaa digniin adag u diray cid kasta oo been abuur ka sameysay Maamulka iyo Howlaha Gobolka, iyadoona sharciga iyo xeerarka dalku ay ciqaab adag ka jideeyeen cid kasta oo falalkaas lagu helo.

Caasimada Online
Xafiiska Muqdisho
[email protected]

Muqdisho (Caasimada Online) – Wasiirka wasaaradda Arimaha Gudaha, dib u heshiisiinta iyo Federaalka ee dowladda Soomaaliya Cabdi Maxamed Sabriye, ayaa u yeeray Guddoomiyaha Gobalka Gedo Maxamed Maxamuud Muxumed iyo Saraakiil ka tirsan Milateriga Soomaaliya oo ka howlgala Gobalka Gedo.

Wafdigaan oo qaarkood ay soo gaareen magaalada Muqdisho, ayaa lagala hadlay fulinta go’aano ka soo baxay Wasaaradda Arrimaha Gudaha Soomaaliya iyo Xafiiska Madaxtooyada, kuwaas oo la rabo in ay ka dhaqaan galaan Gedo.

Caasimada Online ayaa ogaatay in go’aanadaas ay ku jiraan qodobadaan.

1) – In guddoomiyaha gobalka uu ku dhawaaqo xil ka qaadis lagu sameeyo guddoomiyaasha afar degmo oo kala ah, Luuq, Doolow, Ceelwaaq iyo Baardheere, kuwaas oo ah degmooyinka aadka looga taageero Axmed Madoobe kana tirsan Gedo.
2) – In taliyaal cusub iyo guddoomiyaha gobalka, ay hogaamiyaan howlgal ka bilaaban doono Gedo oo lagu imaan doono Jubbooyinka, waxaana lagu wareejin doonaa Ciidamo cusub oo tababar ka soo baxay iyo saanad ciidan.
3) – Iyo in aysan fulin, kana amar qaadan Axmed Madoobe, balse ay fuliyaan amarada ka soo baxa Madaxtooyada Soomaaliya si loo badbaadiyo dalka.

Wafdigaan ayaa la filayaa in ay deg deg ugu laabtaan Gedo, islamarkaana ay dhaqan geliyaan heshiiyo iyo amaro ka soo baxay Madaxtooyada oo dagaal culus kula jirto Madaxweynaha Jubbaland Axmed Maxamed Islaam.

Lama oga sida ay u dhaqan geli doonaan arrimahaan balse waxaa la filayaa in masuuliyiintaan ay wajahaan caqabado badan oo saameen balaaran degaanka ku yeesha.

Caasimada Online
Xafiiska Muqdisho
[email protected]

Kismaayo (Caasimadda Online) – Cabdi Naasir Seeraar Max iyo Cabdirashiid Xidig oo horey u sheegtay in ay yihiin madaxweynayaasha maamulka Jubbaland ayaa waxaa ay ka hadleen xaaladaha maamulkaasi iyo dhacdadii Shiikh Shariif Shiikh Axmed oo maalin ka horna laga hor istaagay magaalada Kismaayo ee Gobalka Jubbada Hoose.

Shir jaraa’id oo ay ku qabteen magaalada Kismaayo C/rashiid Xiddig iyo C/naasir Seeraar ayay si weyn ugu weerarreen labada madaxweyne ee hore, isagoo sheegay inuu warkooda kasoo horeeyay oo ay hore u taageereen doorashadii sharci darrada ahayd ee Axmed Madoobe, oo aysan jirin wax ay sheegaan oo aan ahayn inay tii hore ku celiyaan oo ay been xalaaleeyaan.

Waxaa ay sheegeen  xubnahan in xaalada cakiran ee maamulka Jubbaland aysan baasin lagu shubin, iyagoona ka dalbaday madaxdii hore ee dalka soo martay in aysan la safan qaar ka mid ah dadka kismaayo isku heysta.

Cabdinaasir seerar iyo Xidig ayaa si wadajir ah u sheegay in kismaayo aysan noqon mid laga mucaarado dowladda dhexe ee Soomaaliya.

“Sheekh Shariif iyo Xasan Sheekhow Farmaajo doorasho ayuu idinkaga adkaaday, mana idinka baryaayo inuu xukumo 4 sano oo xilka hayo.. awooda aad sheeganeysaan waxay huwan tahay qabiil.., taasina Soomaliya kama shaqeyneyso, shacabkana ma marin habaabin kartaan..” ayuu yiri C/rashiid Xiddig oo si cad u sheegay inay dhibaatada Jubbaland taalla ay tahay faragelinta bannaanka uga imaaneysa.

C/rashiid Xiddig ayaa ku eedeeyay Sheekh Shariif inuu rabo inuu xalaaleeyo xadgudub iyo afduub, xitaa haddii caleemo saarka Axmed Madoobe ka qeyb galana aanu waxba soo kordhin doonin.., ‘Waxaa kuu sharaf rooneyd in lagaa celiyo…” ayuu yiri.

“Madaxweynayaal ayay rabaan inay u tartamaan, waxayna taageerayaan doorasho sharci darro ah…, sharaftiinii dhulka ayey ku dhacday… Haddii doorashada uu afduubtay Axmed Madoobe aad taageertaan, Farmaajana doorasho taas la mida ayuu qabsan doonaa..” ayuu yiri C/rashiid Xiddig.

Caasimada Online
Xafiiska Kismaayo
[email protected]