25.2 C
Mogadishu
Saturday, June 28, 2025

Muxuu DF kaga dhignaan doonaa qofka kusoo baxa doorashada Puntland?

Asad Cabdullahi Mataan
-
0
Muxuu DF kaga dhignaan doonaa qofka kusoo baxa doorashada Puntland?

Garowe (Caasimada Online) – Waxaa maalmo kooban ay ka harsan tahay doorashada maamulka Puntland oo inka badan 23 Musharax ay u taagan yihiin xilka madaxweynaha Puntland.

C/Welli Maxamed Cali Gaas ayaa kamid ah musharixiinta Tartameysa, waxaana uu ka baxay balan uu seddex jeer horey u qaaday oo ahaa inuusan markale xilka madaxweynaha isku soo sharaxi doonin.

10 Maalin kadib doorashada madaxweynaha ayaa ka dhaceysa magaalada Garowe, waxaase ka horeeya 7 Maalin kadib doorashada guddoonka baarlamaanka ee ka dhaceysa magaalada Garowe.

Waxaa wali si muuqata aan loo ogeyn galaangalka dowladda Soomaaliya ay ku leedahay doorashada Puntland, si lamid ah sidii loo ogaa doorashada maamulka Koofur Galbeed ee uu kusoo baxay Lafta Gareen.

Dhowr Arimood oo isbiirsaday ayaana keenaya in xiligaan aan la ogaan shaqsiga dowladda taageersan tahay, arinta Koowaad ayaa ah doorashada tirada badan ee ka dhaceyso Garowe, oo dowladda Soomaaliya aysan awoodin in dhinac walbaa dhaqaalo gooni ah aysan ku bixin.

Tusaale ahaan: Doorashada Guddoomiyaha baarlamaanka, Ku xigeenadiisa, madaxweynaha iyo madaxweyne ku xigeenka ayaa ka dhaceyso magaalada Garowe, waxaana adag in dhaqaalo badan halkaasi lagu bixiyo, iyada oo laga yaabo in doorashada madaxweynaha ama ku xigeenkiisa Dowladda xooga saarto.

Waxaa horey usoo baxay in dowladda ay wadato Musharax Jibiye, kadib markii gaari xabadda aysan karin uu kala dagay magaalada Garowe, balse isaga ayaa beeniyay hadal heyntaasi.

Dowladda Soomaaliya ayaa hadda heysata taageerada maamulada Hirshabelle iyo Koofur galbeed, waxaana muuqata in si hoose loo xalinayo xiriirka Galmudug iyo dowladda Soomaaliya, waxaana kaliya u haray inay hesho taageerada Puntland iyo Jubbaland.

C/Welli Gaas oo baqdin ka qaba dowladda Soomaaliya ayaa dhigay garoomada diyaaradaha Puntland ciidamo gaar ah oo ka hortaga dhaqaalo si toos ah garoomadaasi looga soo dajiyo.

Shaqsiga kusoo baxa doorashada Puntland ayaa laga ogaan doonaa inay dowladda ku guuleysatay ka adkaashaha C/Welli Gaas iyo inkale.

Caasimada Online
Xafiiska Puntland
[email protected]

Wararkii ugu dambeeyay dagaallada ka dhacay GAL-GADUUD + Sawirro

Asad Cabdullahi Mataan
-
0

Dhuusomareeb (Caasimada Online) – Xaaladda gobihii shalay lagu dagaalamay ayaa wali xiisad ay ka taagan tahay, waxaana dhinacyada dagaalamay lagu waramayaa inay isku horfadhiyaan Kaxandhaale.

Dagaalkii ugu xooganaa ayaa gelinkii dambe ee shalay ka dhacay deegaan u dhow Kaxandhaale oo ku yaala xuduuda ay wadaagaan dalalka Ethiopia iyo Soomaaliya.

Qaar ka mid ah odayaasha dhaqanka deegaanka ayaa bilaabay inay dhexdhexaadiyaan maleeshiyaadka dagaalamay oo isku qabsaday dhul daaqsimeed, waxaana la filayaa inay kulamo la qaataan labada dhinac.

Maleeshiyaadka ayaa helay gurmaad miyiga fog kaga imaanaya, waxaana mar walbaa laga baqayaa in dagaalo ay dib kaga qarxaan deegaanka Kaxandhaale iyo deeganadii shalay lagu dagaalamay.

Inka badan 25 ruux ayaa la sheegayaa inay iska dileen labada Maleeshiyaadka oo dagaalamaya ku dhawaad seddex maalin.

Dhaawacyada qaar oo halis ah ayaa la geeyay Dhuusomareeb iyo xarumo kale, waxaana jira dhimasho badan oo ka dhalatay dagaaladii ugu dambeeyay ee labada maleeshiyaad dhexmaray.

Madaxda Galmudug iyo xildhibaanada baarlamaanka ee deegaanadaasi kasoo jeeda ayaa dalbaday in dagaalada la joojiyo, islamarkaana dowladda Soomaaliya ay ka qeyb qaadato dadaalada nabadeed.

Caasimada Online
Xafiiska Galgaduud
[email protected]

Xildhibaannada BF oo bil kadib maanta kulmaya

Asad Cabdullahi Mataan
-
0
Xildhibaannada BF oo bil kadib maanta kulmaya

Muqdisho (Caasimada Online) – Xidhibaanada golaha shacabka ayaa maanta yeelanaya kulan muhiim ah kadib markii golaha uusan shirin ku dhawaad hal bil oo qalalaaso siyaasadeed la galay.

Kulanka maanta ayaa dhacaya iyadoo la dhameeyay dhamaan khilaafaadkii ka dhashay warbixin guddigii hore ee maaliyadda baarlamaanka ay soo diyaariyeen oo la horgeeyay golaha shacabka.

Warbixintaasi ayaa sababtay in guddiga maaliyadda ay kala qeybsamaan, kadibna mooshin laga keenay madaxweynaha lagu kala qeybsamay, iyadoo markii dambe la xaliyay dhamaan khilaafaadkii yimid.

Kulanka golaha shacabka ee maanta ayaa ku saleysan warbixin guddiga maaliyadda baarlamaanka ay horgeynayaan xildhibaanada golaha shacabka, taasi oo ah miisaaniyadda sanadka cusub ee 2019.

Khabiirada dhanka dhaqaalaha ayaa ka digayaa in dib loo dhigo ansixinta miisaaniyadda sanadka 2019, maadaama ay ku jiraan mushaaraadka shaqaalo badan oo dowladda Soomaaliya ay ansixisay.

Miisaaniyadda sanadka 2019 ayaa gaareysa 340 Milyan, waxaana la doonayaa xildhibaanada inay dood adag ka yeeshaan kadibna ay anixiyaan.

Caasimada Online
Xafiiska Muqdisho
[email protected]

Dhageyso: Wasiir Omaar “Garoonka Aadan Cadde masii shaqeyn doono”

Asad Cabdullahi Mataan
-
0
Dhageyso: Wasiir Omaar “Garoonka Aadan Cadde masii shaqeyn doono”

Muqdisho (Caasimada Online) – Wasirka gaadiidka iyo duulista hawada Soomaaliya Maxamed Cabdulllaahi Salaad Omaar ayaa ka digay in shaqada garoonka diyaaradaha muqdisho ay joogsan doonto haddii is-beddel deg deg ah la sameyn

Oomaar ka hadlayay shaqada garoonka Aadan Cade ee Muqdisho ayaa sheegay in ciriiri badan uu ka jiro garoonka.

Wasiir Omaar oo la hadlayay idaacada ku hadashay afka dowlada ayaa rajo xumo ka muujiyay in garoonka Aadan Cade uusan  sii shaqayn doonin sanado badan, maadama uu san haysan garonoka meelo badan oo ay diyaradaha isku dhaafi kaaraan.

Waxa uu sheegay in taasi ay sababtay in saacadaha shaqada loo kala bedelo diyaaradaha Ethopian airlines, iyo Kenya Airways.

Garoonka Aadan Cade ayaa waxaa ka hawlgala diyaarado caalami ah oo ka mid yihin Ethiopian  Airlines, Kenya Airways, Turkish airlines, iyo Qadar Airways oo bartamaha sanadka soo socda shaqa bilaabi doonto.

Halkaan ka dhageyso codka Wasiir  Oomaar.

Sawirro: Qarax culus oo ka dhacay guriga taliye ku-xigeenkii hore ee booliska Somalia

Asad Cabdullahi Mataan
-
0
Sawirro: Qarax culus oo ka dhacay guriga taliye ku-xigeenkii hore ee booliska Somalia

Beledweyne (Caasimada Online) – Qarax Miino ayaa maanta ka dhacay Guriga uu Magaalada Beledweyne uu ka degan yahay taliye ku xigeenkii hore ee Ciidanka Booliska Soomaaliyeed Generaal Mukhtaar Xuseen Afrax.

Qaraxa ayaa ka dhacay Guriga dhexdiisa, waxaana la sheegay in uu ahaa Miino dhulka lagu Aasay, waxaana sidoo kale guriga qaraxu ka dhacay wax ka degan Gudoomiyihii ee gobolka Hiiraan Cumar Baadiyow.

Sida ay xaqiijiyeen Mas’uuliyiin ka tirsan maamulka gobolka Hiiraan qaraxa ayaa dhacay xilli labadda Mas’uul ay guriga ka maqnaayeen, islamarkaana ay jireen xerada Ciidanka ee lamagalaay.

Inta la xaqiijiyay Qaraxa waxaa ku dhintay qof dumar ah, waxaana sidoo kale ku dhaawacmay labo ruux oo kale.

 

Mahad Salaad oo ka digay “sharci diinta Islaamka ka dhan ah” oo DF dooneyso inay horkeento barlamanka

Asad Cabdullahi Mataan
-
0
Mahad Salaad oo ka digay “sharci diinta Islaamka ka dhan ah” oo DF dooneyso inay horkeento barlamanka

Muqdisho (Caasimada Online) – Xildhibaan Mahad Salaad ayaa digniin ka bixiyey in baarlamanka Soomaaliya la horkeeno sharci ka dhan ah diinta Islaamka oo ay soo diyaarisay wasaaradda haweenka iyo iyo horumarinta xuquuqda aadanaha Soomaaliya.

Hoos ka aqri qoraal uu Mahad Salaad soo dhigay faceebok

Waxaan ka digeynaa in Goleyaasha Barlamaanka la horkeeno sharci kasoo horjeeda shareecada Islaamka iyo dhaqanka suubban ee Umadda Soomaaliyeed!

Sharaf iyo Karaamo ayaan u haynaa Wasiiradeena iyo Xildhibaanada Goleyaasha Barlamaanka ee shirkaan fadhiya. Lkn hindise sharciyeedka ay soo bandhigtay, soona diyaarisay Wasaaradda Haweenka iyo Horumarinta Xuquuqda Aadanaha ee la rabo inla horkeeno Goleyaasha Barlamaanka, wuxuu si toos ah uga horimaanayaa Shareecada Islaamka ee ummadda Soomaaliyeed dhammaantood ay aaminsan yihiin.

Sida ku cad qodobka 2aad, faqradiisa 1aad, 2aad iyo 3aad ee Dastuurka Jamhuuriyada Federaalka Soomaaliya:

  1. Islaamku waa Diinta Dawladda.
  2. Diin aan ahayn Islaamka laguma faafin karo dalka.
  3. Lama soo saari karo sharci aan waafaqsaneyn Mabaadi’da Guud ee Shareecada Islaamka iyo Maqaasiiddeeda.

Haddaba, hadii aan si kooban u iftiimiyo qodobada Hindise Sharciyeedkaan uga horimaanayo Shareecada Islaamka iyo dhaqanka suubban ee Umadda Soomaaliyeed waxay kala yihiin:

  1. Sharcigaan wuxuu weerarayaa guurkii Nabigeena Muxammad NNKH kuna tilmaamayaa xadgudub iyo fal dambiyeed. Sida ku cad qodobka 27aad ee sharcigaana: Qof kasta waxa uu galayaa fal dambiyeed guursi carruur ah haddii uu si ula kac ah u guursado carruur aan qaangaar ahayn”. Da’da qaangaarka ee sharcigaani xeerinayo waa 18 sano sida ku cad qaybta eray bixinta ee hindise sharciyeedkaan iyo qodobka 29aad, faqradiisa 8aad ee dastuurka. Qof kasta oo gala fal dambiyeedka ku xusan qodobkaana waxaa lagu xukumayaa xabsi aan ka yareyn 10 sano kana badneyn 15 sano”.

Haddaba, maxay diinteenu ka qabtaan arintaan?

Sida ku sugan shan kitaab oo ka mid ah kuwa asalka u ah xadiiska Nabigeena NNKH ( Bukhaari (3894), Muslim (1422), Abu daawuud (2121), Nasaa`i (3378) iyo Ibnu maajah (1876) ) in uu Nabi Muxammad NNKH Caa`isha ku guursaday iyadoo sagaal jir ah.

Haddaba in fal dambiyeed loo arko wax Nabi Muxammad NNKH sameeyay waxay meel ka dhac ku tahay sharafkiisa iyo maqaamkiisa mana aha wax uu qaadan karo qof u rumeysan rasuulnimo.

  1. Sharcigaan kala saari maayo nikaaxa sharciga ah iyo sinada (dhileysi). Sida ku cad qodobka 6aad ee sharcigaan wuxuu si cad u leeyahay: Qof kasta wuxuu galayaa fal dambiyeed ku xadgudub jinsiyeed ah haddii uu fal jinsiyeed la sameeyay oggolaansho la`aanta qof kasta oo kale.

Lagama reebin haddii uu nikaax ka dhexeeyo labada qof sida uu tilmaamayo ereyga QOF KASTA. Sidoo kale labada aan isqabin hadii fal jinsiyadeed uu dhex maro iyagoo raali iskaga ah iyadana denbi maahan sida meesha ka muuqata. SUBXAANALLAAH!

  1. Sida ku cad Qodobka 65aad, faqradiisa 2aad ee sharcigaan wuxuu si cad u leeyahay: Xeer kasta ama qodob sharciyeed KASTA oo ka hor imaanaya sharcigaan ama aan waafaqsanayn sharcigaan waa la baabi`iyay, waxaana lagu baddalay qodobbada sharcigaan.

Taasoo micnaheedu yahay in sharcigaan uu si toos ah u laalayo una burrinayo sharci kasta oo aan waafaqsanayn, taas oo aan laga soo reebin Shareecada Islaamka.

Haddaba, dooda ka taagan sharcigaan waxaa horay iskaga arkay Gudoomiyaha Golaha Shacabka, Guddiga Garsoorka, Awqaafta iyo Arimaha Diinta ee Golaha Shacabka, Culimada iyo Wasaarada. Talo ayaana loo soo jeediyay Wasiirada iyo Wasaaradeeda. Sidaas daraadeed waxaan kula talin lahaa Wasiiradeena sharafta badan taladii loo soo jeediyay ee ku saabsaneed dulduleelada sharcigaani leeyahay inta dib ula noqoto in ay soo saxdo. Dadka iyo Dalka Soomaaliyeed na aan dhibaato loo horseedin iyada oo la fulinayo ajandeyaal ay leeyihiin quwado shisheeye.

Mahadsanidiin.

Hon. Mahad Salad

 

Gaas oo qorshe muhiim ah ka leh ciidamada uu geeyey magaalooyinka garoomada leh (Cabsi uu ka qabo DF)

Asad Cabdullahi Mataan
-
0
Gaas oo qorshe muhiim ah ka leh ciidamada uu geeyey magaalooyinka garoomada leh (Cabsi uu ka qabo DF)

Garowe (Caasimada Online) – Madaxweynaha Maamulka Puntland ayaa sameeyay qorshe cajiib ah oo uu kaga hortagi karo in dhaqaalo la geeyo magaalooyinka Puntland, isaga oo cabsida ugu badan ka qabo dowladda Soomaaliya.

Warar aan heleyno ayaa sheegaya in madaxweyne Gaas uu sameeyay qorshe uu ciidamo cusub ku dhigayo dhamaan magaalooyinka leh garoomada diyaaradaha, isaga oo og in dhaqaalaha badan aan dhulka la marsiin karin.

Ciidamada ugu badan ayaa la geeyay magaalada Boosaaso oo uu ku yaalo garoon diyaaradeed caalami ah oo laga hergeliyay magaalada, waxaana la doonayaa inay ka hortagaan in lacag cadaan ah laga soo dajiyo garoonka, kadibna dhulka la marsiiyo.

Ciidamada ayaa hadda la geeyay garoomada diyaaradaha ee Boosaaso iyo Garowe, waxaana ciidamada ugu badan ay joogaan magaalada Boosaaso, iyadoo dadka lagu qanciyay inay amaanka xaqiijin doonaan.

Siddeeda bisha soo socoto ee Janaayo ayaa la qorsheynayaa inay dhacdo doorashada madaxweynaha Puntland, waxaana hadda muuqan saameyn dowladda Soomaaliya ay ku leedahay arimaha doorashooyinka, walow mar walbaa wax isbadali karaan.

Bilowga bisha soo socota waxaa dhici doona doorashada guddoomiyaha baarlamaanka iyo ku xigeenadiisa, waxaana xigi doona doorashada madaxweynaha Puntland oo inka badan 20 musharax ay u taagan yihiin.

Caasimada Online
Xafiiska Puntland
[email protected]

C/llaahi Maxamed Nuur oo kashifay sida xukuumadda ay gacanta ugu dhigtay guddiga maaliyadda (Aqri)

Asad Cabdullahi Mataan
-
0
C/llaahi Maxamed Nuur oo kashifay sida xukuumadda ay gacanta ugu dhigtay guddiga maaliyadda (Aqri)

Muqdisho (Caasimada Online) – Xildhibaan Cabdullaahi Maxamed Nuur oo ahaa xoghiyihii hore ee guddiga maaliyadda baarlamanka Soomaaliya, oo dhowaan laga saaray, ayaa qoraal uu soo dhigay facebook faah-faahin uga bixiyey sida xukuumadda Kheyre ay ugu guuleysatay inay gacanta ku dhigto guddiga.

Akhriso qoraalka Xildhibaan C/llaahi Maxamed Nuur

BISMILAAH, Waxaan rabaa in aan halkaan kula wadaago Shacabka Soomaaliyeed si kooban arimaha la xariira Guddiga Maaliyadda ee Golaha shacabka sida:-

1. Shaqada Guddiga
2. Khilaafka la sheegay ee ka dhex jiray guddiga
3. Sharciyadda guddonka guddiga iyo habraaca gudoonka guddiga lagu bedeli karo
4. Sida dhabta ah ee ay wax dheceen iyo waxa ka dhalan kara
5. Aragtiydada gaarka ah

Shaqada Guddiga: Guddiga maaliayada shaqadiisu si kooban waa diyaarinta iyo horkeenida golaha shacabka shuruucda la xariirta arimaha maaliyada, Korjoogtaynta iyo la xisaabtanka maaliyadeed ee hay’adaha dowlada.

Khilaafka la sheegay: Khilaafku waxaa uu ahaa mid ay xukuumadu abuurtay ee marna majirin wax khliaaf ah oo si dabiici ah ugu dhex jiray, sababaha ay xukuumadu guddiga khilaafka uga dhax abuurtana waxaa ay ahayd in ay baabi’iso jiritaanka guddiga maadaama aysan diyaar u ahayn isla xisaabtan.

Sharciyadda guddonka guddiga iyo haraaca gudoonka guddiga lagu bedeli karo waa sida tan:

Sida ku cad qodobka 58aad, farqadiisa 4aad, 5aad iyo 6aad ee xeerhoosaadka Golaha Shacabka, gudoonka gudiyada waxa uu xilka ku wayn karaa:

1. Istiqaalo qoraal ah.
2. Haddii uu dhinto.
3. Haddii ay ku timaado xil gudasho la’aan joogto ah ama uu si joogto ah uga maqnaado kulammada gudiga.
4. Guddiguna waxaa uu arrinkaas ku wargalinayaa guddoomiyaha Golaha si ay u doortaan gudoon cusub. Hadaba waxaa xaqiiqa ah sababaha sare ku xusan in aan midna dhicin.

Sida ay wax u dhaceen iyo waxa ka dhalan kara:

Muda sanad ka hor ah ayey xukuumada bilowday in ay dhibsato guddiga maaliyadda sababa la xariira arimaha isla xisaabtanka iyo qabashada doodadaha dhagaysiga dadweynaha ee miisaaniyadda iyo shuruucda la xariirta maaliyada, waxaa ay marar kala duwan shirar gaar gaar ah naga dalbadeen balse marna ma aqbalin in nalaga weeciyo shaqadi aan u dhaaranay wakiilkana uga ahayn golaha shacabka, waxaa ay xukuumadu juhdi badan ku bixisay in guddiga shaqadiisa la car qaladeeyo ugu danbayna waxaa ay xukuumadu iska hor keentay khilaafna ka dhax abuurtay guddiga 24 Nov. 2018, sidoo kale xukuumadu waxaa ay ku qancisay labada gud. k/xigeen in ay sifo sharci dara ah kula diraan guddiga balse guddoomiyaha golaha shacabka ayaa ka hor yimid kuna timaamay sharci daro kala diristaas

Hadaba maxaa kusoo xigay, Madaxweynaha JFS iyo Ra’iisulwasaaraha dalka waxaaay sheegeen in laba motion laga keenay oo kala ah xil kaqaadis iyo isla xisaabtan waxyna sheegeen in midki xil ka qaadista ay noqdeen xildhibaanadi keenay balse kan labaad oo ah isla xisaabtanka xalkiisu waa in guddiga maaliyadda lakala diro ( SHARCI AMA SHARCI DARO, GAR AMA GAR DARO), halku dhegyadaas waxaa iigu horaysay xilligu Gud. Jawaari lagu soo duulay maalmahaan danbane waxaan ku maqlayay in loo adeegsado Dowlad gobaleedyada balse hada waxayba soo gaartay guddi hoosaadyadi golaha shacabka, waxaana igu maqaala ah in dood dheer kadib ayada oo lawada qirayo in ay sharci dara tahay la’isku raacay in qaab qoraaleed aan qaanuunka waafaqsanayn wax looga bedelay guddiga, guddomiyuhna sidaas xal mooday si loo furo golaha.

Maxaa ka dhallan kara: waxaa adkaan doonta in golaha shacabku usii shaqeeyo si madax banana, waxaana xigi doonta in uu dhaco xad gudub dastuuri ah iyo dhammaan shuruucda kale dalka, waxaan jiri doonin isla xisaabtan haba yaraatee, hadii aan la dhowrin kala madax banaanida hay’ahada dowlada iyo shuruucda dalka waxaa dhumi doonta kalsoonida shacabka waxaana mugdi galaya rajada dowladnimo ee sida adag lagu soo yagleelay.

Aragtidayda gaarka ah: Go’aanka marka aad qaadanayso waxaa lagu saleeyaa laba uun mid XAL ama XUL, Xulku waa kan kuugu fiican ee aad dooran lahayd ama saxda ah, xalkuna waa sida aad u aragto danta guud balse ay dhici karto in aadan jeclayn ama aadan ku qanacsanayn, hadaba waxaan u sheegayaa umada Soomaaliyeed aniga oo u arka xal in aan ka tanaasulay xilki iyo xubinimadi guddiga maaliyadda ee golaha Shacabka si waafaqsan xeer hoosaadka golaha shacabka qodobkiisa 58aad, inkasta oo aan aaminsahay in aan xal waara lagu gaari Karin marna dastuurka iyo shuruucda dalka oo aan loo hogaansamin balse marna anigu sabab uma noqonayo in maalin qura hay’adaha dowlada howlahoodu hakad galaan.

Shcabkana waxaan xasuusinayaa in aanan ka tagin kana tanaasulin shaqadi aan u dhaartay oo ay ka mid tahay ilaalinta hantida shacabka waxaana mar walba la wadaagi doonaa warbixino kusalaynsan xaqiiqda watana cadayma waafi ah, waxaan u heli doonaa fursad fiican waxaana si furan shacabka ula kulmi doonaa maalin walba oo TALAADA ah hadii alle idmo.

ROOBOW oo hal arrin ka codsaday xildhibaanno ku booqday xabsiga uu ku jiro

Asad Cabdullahi Mataan
-
0
ROOBOW oo hal arrin ka codsaday xildhibaanno ku booqday xabsiga uu ku jiro

Muqdisho (Caasimada Online) – Qaar kamid ah xildhibaanada baarlamaanka Koonfur Galbeed ayaa kulan gaar ah la qaatay Mukhtaar Roobow Cali oo u xiran dowladda Soomaaliya.

Xildhibaanada ayaa inta badan kasoo jeeda deegaanada Koonfur Galbeed, waxaana ay sheegeen in xaaladda Mukhtaar Roobow ay wanaagsan tahay, islamarkaana aysan jirin wax caafimaad daro ah oo heysata.

Xildhibaan Xaniifa Xaabsade oo kamid ah xildhibaanada la kulmay Mukhtaar Roobow ayaa sheegtay in xaaladda caafimaadka ee Roobow ay tahay mid wanaagsan islamarkaana lagu hayo goob amaankeeda wanaagsan yahay.

Waxay sidoo kale sheegtay in markii ay la kulmeen Muktar Roobow ay ka muuqatay wanaagsanaan iyo farxad, waxaana ay sheegtay inuu fariin ugu soo faray taageerayaashisa.

“Dhamaan shacabka Soomaliyeed gaar ahaan shacabka koonfurgalbeed intii kawel welsanayd Mukhtar Robow waxaan idinla wadaagayaa inay ii suurowday in aan lasoo kulmo”

“Caafimaadkiisa wuu fiicnaa wax dhib ahna ma qabin meel jawigeeeda deganayahay ayuu joogay oo amni ah wuxuu shacabkiisa gaar ahaan taageeeriyaashiisa nooga soo dhiibey fariin ah in uu fiicanyahay wax dhib ahna qabin oo xaalkana ladejiyo” ayay tiri Xildhibaan Xaniifa Xaabsade.

Sida ay sheegtay Xaniifa, Roobow ayaa ka dalbaday Xildhibaanada “inay xaliyaan kiiskiisa”, kana shaqeeyaan sidii xabsiga uu ku jiro looga sii deyn lahaa.

Mukhtaar Roobow ayaa kamid ahaa musharixiinta Koonfur Galbeed, balse seddex maalin kahor doorashadiii Koonfur Galbeed ayaa laga soo xiray magaalada Baydhabo ee gobolka Baay.

Mukhtaar Roobow ayaa ku xiran xarunta hay’adda nabad-sugida iyo sirdoonka Soomaaliya ee loo yaqaano Habar Khadiijo oo ku dhaw Villa Somalia, halkaasi oo uu si lamid ah ku xiran yahay Xasan Daahir Aweys.

Caasimada Online
Xafiiska Muqdisho
[email protected]

C/raxmaan Odowaa oo 3 ujeedo u tagay Cadaado

Asad Cabdullahi Mataan
-
0
C/raxmaan Odowaa oo 3 ujeedo u tagay Cadaado

Cadaado (Caasimada Online) – Wasiirkii hore ee arrimaha gudaha Soomaaliya C/raxmaan Maxamed Xuseen Odowaa ayaa tagay magaalada Cadaado, halkaasi oo masuuliyiin Galmudug ka tirsan ay kusoo dhaweeyeen.

Isaga oo warbaahinta kula hadlayay magaalada Cadaado ayuu sheegay in seddex ujeedo oo uu tagay magaalada Cadaado, isaga oo sheegay in ujeedooyinkaasi uu gaari doono maalmaha uu ku sugan yahay magaalada Cadaado.

Tan Koowaad wuxuu ku sheegay in maadaama uu kasoo jeedo deegaanka baarlamaankana ku matalo inuu dib ula kulmo waxgaradka iyo dadka deegaanka sii ay kaga wada hadlaan waxyaabaha ay wadajir u qaban karaan.

Tan Labaad wuxuu ku sheegay inay tahay inuu furo Mashaariic laga hergeliyay magaalada Cadaado, kuwaasi oo qaarkood uu sheegay inuu isaga geeyay magaalada Cadaado.

Arinta Seddexaad oo muhiim ah ayuu ku sheegay inay tahay xalinta arrimaha khilaafaadka madaxda Galmudug ee keenay in labo magaalo lagu kala shiro, waxaana uu sheegay in maalmaha u joogo magaalada inuu arimahaasi ka shaqeyn doono.

Safarkiisa Cadaado ayaa yimid saacado uun kadib markii uu la kulmay madaxweynihii hore ee Soomaaliya Xasan Sheikh Maxamuud.

Caasimada Online
Xafiiska Galmudug
[email protected]

3-da xeelad iyo qorshe ee Imaaraadka u adeegsnayo doorashada PUNTLAND

Asad Cabdullahi Mataan
-
0
3-da xeelad iyo qorshe ee Imaaraadka u adeegsnayo doorashada PUNTLAND

Ma aha mid uu muran ka taagan yahay in 20 sano kaddib Puntland goobjoog u ahaan doonto doorashadii ugu xiisaha, xaamasadda iyo xasaradda badneyd.

Loolanka Puntland ka socda eela soo afmeeri doono 8-da Janaayo 2019, waxa uu u dhexeeyaa dhinacyo badan; Nabad iyo Nolol, kooxaha mucaaradka ah, Imaaraadka, Qadar, Maxamuud Saleebaan, Cali Saleebaan iyo MAJEERTEENKA KALE!

Ha yaabin, waa xaqiiqo aan indhaha laga qarsan karin!

Dhawrkii doorasho uu ugu dambeeyey ee Puntland ka dhaca waxa uu dagaalka siyaasadeed u dhexeyn jiray hoggaamiye xilka markaa ka dagaya iyo mid adag oo isna doonaya! Sidii Cabdullahi Yuusuf iyo Jaamac Cali Jaamac, Cadde Muuse iyo Maxamed Cabdi Xaashi, Faroole iyo Cabdiweli Gaas! Dhammaan waxa ay ahaayeen loollanno la saadaalin karo.

Maxaa diiday in tartanka iyo dabacayada hadda jiro la sii odoroso natiijooyinka ka dhalan kara?

Jawaabtu waa sahlan tahay – Qodobka, Nabad iyo Nolo! Imaaraad oo si walba u difaacanaya Dekadda Boosaaso, Qadar oo dooneysa in ay Imaaraadka xididada u siibto iyo Cali Saleebaan oo dagaal waqti dheer ku qaatay doonaya in ay soo gunaanadaan!

Faaladaydan kooban waxaan diiradda ku saari doonaa taatikooyinka uu ciyaarayo Imaaradka iyo qorsheyaashiisa kala duwan si uu u difaacdo awoodda uu Garowe ku leeyahay.

Yaa Imaaraadka doorashada ku metelaya?

1 – Cabdiweli Gaas

2 – Siciid Deni

Qorsheyaasha Imaaraadka

Imaaraadka ma caqli yara oo dhammaan ukumahooda hal dambiil ma isugu geyn doonaan oo waxa ay ugu yaraan la soo shirtagayaan saddex musharax iyo kuwo kale oo qarsoon.

Saddexda musharax waxaa kan ugu muhiimsan u ah Cabdiweli Cali Gaas oo isagu hadda xilka haya horena ugu saxiixay qandaraaska Dekedda Boosaaso.

Haddii uu ka fashilmo qorshaha kowaad ee Gaas, waxa ay ku dagaal galayaan Siciid Deni oo ay ku garab siinayaan Xisbiga Midowga Nabadda iyo Dimqraadiyadda ee uu Xassan Shikeh Maxamuud hoggaamiyo.

Siciid Deni waxa uu ka tirsan yahay ururka Damjadiid ee hadda la midoobay Daljir oo reer Aala Shiikh ah.

Haddii qorshaha labaad ee Siciid Deni ku guuldareystaan waxa isna mid saddexaad u ah Asad Diyaano oo ah nin dhallinyaro ah oo ka soo jeeda qoyska boqortooyada Cismaan Maxamuud oo caadiyan taraha ama taakadan leh sida Siciid Deni.

KA WARRAN HADDII MAXAMUUD SALEEBAAN LALA GEDIYO SANADKAN?

Haa, Imaaraadka ilama ah in aysan ka war qabin xiisadda iyo loolanka siyaasadeed ee qabaliga ah maadama uu Cumar Cabdirashiid ugu magacaaban yahay LA TALIYE arrimaha Soomaaliya ah.

Dabcan, Cumar waa reer Puntland, taas oo jirta, meesha ka ma maqna in musharax aan ka soo jeedin sida saddexda hore beesha Maxamuud Saleebaan in uu qorshaha afraad ugu jiro.

Lama oga musharraxaas balse xogo hoose ayaa sheegaya in uu jiro musharax beelaha kale ee MAJEERTEEN ka soo jeeda oo ay Imaaraadka ku tashanayaan haddii ay KA DHACDO, NO MORE MAXAMUUD SALEEBAAN!

W/Q: Xuseen Muuse Guuleed
Nairobi, Soomaaliya

Afeef: Aragtida qoraalkan waxa ay ku gaar tahay qofka ku saxiixan, kamana tarjumeyso tan Caasimada Online. Caasimada Online, waa mareeg u furan qof kasta inuu ku gudbiyo ra’yigiisa saliimka ah. Kusoo dir qoraaladaada [email protected] Mahadsanid

Gaas oo laga hor-istaagay inuu khudbad ka jeediyo magaalada Garoowe

Asad Cabdullahi Mataan
-
0
Gaas oo laga hor-istaagay inuu khudbad ka jeediyo magaalada Garoowe

Garoowe (Caasimada Online) – Madaxwaynaha waqtigu ka dhamaaday ee Puntland, Cabdiweli Maxamed Cali Gaas ayaa shalay dib ugu soo laabtay magaalada Garowe, kadib socdaal maalmood qaatey oo uu ku tegay dalka Kenya.

Gaas, oo caasimad goboleedka Nugaal ka dhoofay wax yar kadib markii uu ku dhawaaqay inuu yahay musharax Madaxwayne 18-kii bishaan December, ayaan kala kulmin shacabka Garowe soo dhawayntii uu ka filiyay.

Sida laga soo xigtay kooxda qaban-qaabada soo dhawayntiisa, Gaas waxuu qorsheeyay inuu shacabka kula hadlo Barxada Garowe, taasi oo looga bartay marka uu ka yimaado safarada dibada ah.

Balse, taasi ma aysan u suurtagelin shalay, waxayna timid markii shacabka ay kala hor-tageen dibad-bax iyo buuq hareeyay guud ahaan halkii uu Madaxwaynuhu rajeynayay inuu hadal-jeedin ka sameeyo.

Dadka ku mudaharaadey Gaas ayaa ku dhawaaqayay erayo ka dhan ah Madaxweynaha, kaasi oo ku guuldareystay inuu fuliyo balan-qaadyadii uu sameeyay markii la doortay Shan sano kahor oo ay kamid tahay doorasho qof iyo cod ah.

Madaxwayne Gaas ayaa markii uu arkay in shacabku aanu u haylaneen hadal-jeedintiisa ayuu u gudbay dhinaca Madaxtooyada halkaasi oo warbaahinta kula hadlay, isagoo muujiyay damac kaga jira in dib loo doorto.

Dhanka kale, Gaas ayaanan usoo bandhigin shacabka Puntland markii uu ka hadlayay Shirkii jaraa’id ee uu maanta qabtey ujeedka safarkiisa Nairobi, ee mudada illaa shanta maalmood ku maqnaa.

Warar ayaa sheegay inuu Madaxweynaha dhaqaale u raadsadey doorashadiisa, maadaama uu mar labaada u tartamayo kursiga uu shantii maalmood ee lasoo dhaafey ku fadhiyay, iyadoo uu ku fashilmay amniga, xorreynta deegaanada ka maqan Puntland iyo inuu dhameystiro hanaanka dimuqraadiyeynta oo uu soo billaabey maamulkii isaga ka horeeyay.

Tiradii ugu badneyd oo Mushariixiin ah ayaa u tartamaya xilka Madaxweynaha Puntland 8-da January ee 2019, iyadoo Cabdiweli Gaas oo horey u lumiyay taageeradda iyo kalsoonida shacabka la sheegay in rajadiisa ay aad u hooseyso.

Isha: Garowe Online

‘Wasir Adel Al-Jubeir waa la bah-dilay waxaana isku furtay Max’ed Bin Salman’

Asad Cabdullahi Mataan
-
0
‘Wasir Adel Al-Jubeir waa la bah-dilay waxaana isku furtay Max’ed Bin Salman’

Riyadh (Caasimada Online) – Boqorka dalka Sacuudiga Salmaan Bin Cabdulcaziiz ayaa wsiirkii hore ee maaliyadda dalkaas Ibrahim al-Assad u magacaabay inuu noqdo wasiirka cusub ee arrimaha dibedda dalkaas.

Assaf ayaa beddelaya Adel al-Jubeir, oo loo magacaabay inuu noqdo wasiiru dowlaha cusub ee arrimaha dibedda. Adel al-Jubeir ayaa ahaa wasiirka kaliya ee aan ka dhalan boqortooyada ee ku jira xukuumadda Sacuudiga.

Taxliiliyayaasha siyaasadda carabta ayaa rumeysan in xil ka qaadista Adel Al-Jubeir ay tahay mid uu isku furnayo Maxamed Bin Salmaan kadib khaairjintii weriye Jamal Khaashuqji.

Marwan Kabalan, oo ah madaxa fallanqeynta siyaasadda ee Xarunta Cilmi-baarista ee Arab ayaa sheegay inuusan la yaabin xil ka qaadista Al-Jubeir, sabbatoo ah waxaa loo arkay nin ka haray xukunkii boqorkii geeriyooday ee  Cabdalla.

“Waan filaynay in mar ay ahaataba xilka laga qaado Al-Jubeir, xitaa ka hor inta aan la dilin Jamal Khaashuqji” ayuu yiri Kablan.

“Hase yeeshee waxaa hadda loo adeegsaday mid la isku furtay, ayada oo la muujinayo in wixii ku dhacay Jamal uu mas’uuliyadeeda isaga leeyahay”.

“Sida aan horey u sheegay Amiir Maxamed Bin Salmaan waxa uu doonayey qof uu dusha u saaro mas’uuliyadda dilka weriye Jamal Khaashuqji, mana jiro qof ka sarreeya Adel oo sidaas lagu sameeyo” ayuu yiri.

“Sababtoo ah qunsuliyadda Sacuudiga ee Istanbul ee lagu dilay weriye Jamaal Khaashuqji waxay hoos imaneysay Adel Al-Jubeir” ayuu sii raaciyey.

Ka sokow xil ka qaadista lagu sameeyey, haddana in Adel Al-Jubeir laga dhigo wasiiru dowle isaga oo mar ahaa wasiirka ugu sarreeya wasiirada, ayaa waxaa dadka qaar u arkaan bah-dil lagu sameeyey.

Caasimada Online
Xafiiska Qaahira
[email protected]

Dagaal dhinac badda ah oo laga cabsi qabo inuu dhex maro DF iyo Somaliland

Asad Cabdullahi Mataan
-
0
Dagaal dhinac badda ah oo laga cabsi qabo inuu dhex maro DF iyo Somaliland

Hargeysa (Caasimada Online) –  Somaliland ayaa muujisay digniin ku aaddan dagaal cusub oo dhinaca badda ah oo dhex-mara ayada iyo dowladda Soomaaliya horaanta sannadka cusub ee 2019, ka dib markii ay dawladda Soomaaliya shirkado laga leeyahay dalka Shiinaha siisay ruqsado kalluumaysi.

Dawladda Soomaaliya ayaa dhawaan waxay shirkado laga leeyahay dalka shiinaha oo ku bahoobay magaca COFA siisay ruqsado kalluumaysi oo ay ugu fasaxday inay badda ka kalluumaystaan. Shirkadaha dalladan ku bahoobay oo wata maraakiib kalluumaysi oo hubaysan ayaa tiradooda lagu sheegay 33 shirkadood.

Sida ka muuqata heshiiskan, waxa ay dawladda Soomaaliya shirkadahan Shiinaha laga leeyahay u sheegatay inay maamusho oo ay masuul ka tahay guud ahaan xuduudka badda Soomaaliya oo Somaliland ay ku jirto.

Wasiirka xanaanada xoolaha iyo kalluumaysiga ee Somaliland Xasan Gaafaadhi ayaa ka jawaabay ruqsadahaas ay Soomaaliya bixisay, waxaanu sheegay inaanay ahayn kuwo khuseeya biyaha Somaliland maadaama oo ay Somaliland ka madaxbanaantahay Soomaaliya, sida uu hadalka u dhigay, waxaanu shirkadaha Shiinaha uga digay inay ku soo xad gudbaan biyaha Somaliland.

Shirkadaha Shiinaha ee ruqsadda la siiyey ayaa loo ogolaaday inay hub iyo ciidan ilaaliya wadan karaan.

Somaliland ayaa sheegtay inay leedahay ciidan badda ah oo ilaaliyaha xeebaha Somaliland, kuwaas oo Somaliland ka badbaadiyay budhcad badeeda looga caagay xeebaha Soomaaliya.

Caasimada Online
Xafiiska Hargeysa
[email protected] 

Dhaqan siyaasadeed cusub oo ugub ku ah Soomaaliya

Asad Cabdullahi Mataan
-
0
Dhaqan siyaasadeed cusub oo ugub ku ah Soomaaliya

Waxaa hadda dhaqanka Soomaalida, gaar ahaanna kan siyaasiyiinta, ku soo kordhay mid cusub oo laga soo minguuriyay dhaqamo shisheeye sidii isqarxintaba loo soo minguuriyay. Waxaa noo soo dusay nooc ka mid ah beenta balse aafadeeda lagu halaagmayo. Beentan cusub ee dhaqangashay waa iyada oo uu siyaasigu meel fagaare ah ka yiraahdo hadal been ah oo iska cad. Siyaasiga beentan faafinayo ujeedkiisu ma ahan in la aamino. Qorshihiisu waa mid salka ku hayo abuuridda jahwareer iyo tuhun si uu u kala dhantaallo midnimada iyo wadajirka dowladda iyo shacabka.

Imaam Bukhaari oo doon ku safrayo baa 1000 dirham uu watay waxaa sheegtay tuug. Tuuggii af buuxuu ku qeyliyay in lacag 1000 dirham ah laga xaday. Imaam Bukhari (rc) waa nin garasho fogaaye wuxuu lacagtii ku tuuray badda. Wuxuu Imaamku yiri, “Dadka doonta ila saarnaa waan ku oran karay lacagtaan anigaa leh, oo wuxuu tuuggu ogaa inaan 1000 dirham watay. Waxaanse ka baqay in qaar kale uu tuhun galo.” Calaashaan hadduu tuhun yimaadana Xaddiisyadii uu soo werinayay ayaa sidoo kale la tuhmi lahaa saxiixnimadooda.

Tuhun. Waa aafooyinka waaweyn ee ka dhasho been-abuurka. Waa midduu ka cabsaday Imaam Bukhaari in loo daciifiyo Xaddiisyadii uu u soo uruuriyay sida daacadnimada iyo hawl-karnimada aheyd. Wuuna ku baraarugsanaa in shacabka ay qaar dagmi karaan, oo ay tuuggaas hadalkiisa rumeysan kareen – ama ugu yaraan uu shacabkaas geli karay tuhun iyo tashwiish.

Markii la qorayo sheeko-faneedda, wuxuu qoraagu isticmaalaa aalado sida timo-jaruhuba uu u isticmaalo makiinad, makhas iyo shanlooyin kala duwan. Aaladaha qoraaga uu ku dhiso sheekada waxaa ka mid ah wax la yiraahdo “believability” – ama suurtagalnimada qisada/ficilka sheekada. Waa macquul/suurtagal haddii uu qoraagu qoro: “Hooyadii iyo caruurteeda oo gaajeysan ayaa qof u keenay jab rooti ah – jabkiina waxay u kala jebisay labadeeda caruur.” Suurtagalse ma ahan oo akhristuhu ma aqbalayo haddii uu qoraagu qoro: “Hooyadii iyo caruurteeda oo gaajeysan ayaa qof u keenay jab rooti ah – isla markiina ilmaheeda oo arkaya ayay hooyadu rootigii afka ku boobtay oo liqday.” Akhristuhu wuxuu garowsan in dabeecadaha hooyadu aysan aheyn inay nafteeda ka hormariso ilmaheeda.

Arrinkan suurtagalnimada ah aan ku dabbaqno waaqaceenna – iyo qaasatan eedeynta ay siyaasiyiintu ku hayaan dowladda. Waxaa fagaaraha lala yimid eedeyn ay ka mid tahay dowladdu ma aysan qaban hawlihii loo igmaday sidaa darteedna way fashilantay. Siyaasigu wuu og yahay inuu been sheegayo – wuuna og yahay in aan la aaminayn hadalkaas beenta ah. Xasuusnow qasadkiisu ma ahan been macquul ah sheeg; qasadku waa abuurista tuhun iyo fawdo.

Su’aashu waxay tahay, arrinkan suurtagalnimada inay eedahaas macquul yihiin (believability) yaa u xilsaaran inuu kala shaandheeyo?

Waa adiga. Haa, waa adiga Soomaaliga ah. Halkii ay shacabku rumeysan lahaayeen eedeynta lagu saleeyay mooshinka, waxaa caafimaad ah in loo kuurgalo hawlaha ay dowladdu qabato ka dibna la barbar dhigo hadallada siyaasiga.

U fiirso, haddii qof Muslim ah iimaankiisa lagu garto ficillada ay ka midka yihiin shanta salaad, soonka, Xajka, iyo sadaqada, dowladda waxqabadkeedana maxaa lagu garan karaa? Haddii dhallinyaro maxaabiis ahaa oo laga soo daayay xabsiyada adduunka aysan waxqabad aheyn; haddii miisaaniyadda Soomaaliya oo kor u kacday aysan waxqabad aheyn; haddii ciidankii qaranka oo mushaar loo qoray aysan waxqabad aheyn; haddii la sameeyay guddi qaran oo dalka u diyaarsho doorasho sannadka 2020 aysan waxqabad aheyn; haddii hawadii Soomaaliya oo Xamar laga maamulo aysan waxqabad aheyn; haddii in IMF iyo bangiyada caalamka ah ay dowladda u qireen daah-furnaan maaliyadeed aysan waxqabad aheyn; haddii soo celinta safaarradihii dunida iyo sare u qaadidda haykalka dowladnimo aysan waxqabad aheyn, maxaa waxqabad ah Soomaaliyow?

Dhanka kale u rog. Siyaasiga eedeynta iyo mooshinka wado, maxaa waxqabad ah ayuu ku faani karaa? Horta waxqabad ha noo dambeeyee weligiis kulan ma la qaatay gobolkii ama degmadii uu matalayay? Weligiis ma dhageystay tabashadooda? Himiladooda? Miyayse ku filan tahay inuu yiraahdo waxqabad waxaan idinkaga dhigay inaan dowladda mooshin ka keeno? Haddiise waxqabad uu yahay ficil (waxqabad = ficil), suurtagal (believable) ma tahay in dowlad waxqabadkeedu muuqdo uu siyaasi aan waxqabadkiisu muuqan ku eedeeyo waxqabad la’aan?

Jawaabta adiga Soomaaliga ah ayaan kuu daayay. Ogowna Kitaabka Furqaanka ah ayaa ina farayo in la iska hubiyo hadallada qofkii kuu keeno war cusub – sida beenta cad ee sidii hubka loogu adeegsanayo curyaaminta dalka iyo dowladda. Murti Soomaaliyeed baa aheyd “Beeni raad ma leh.” Tu kale oo Hindi ahna waxay tiraah: “Si loo qariyo hal been ah, waa in la sheego kun been.” Kun been buu siyaasigu masraxan la yimid.

Sideedaba adiga shacabka ah waa maxay kaalintaadu? Maxaad ugu qanacday in sidii kalluunkii lagu jillaabaysto? Soo xil kuma saarna? Soo ma aheyn madaxweyne John F. Kennedy qofkii yiri: “Su’aashaadu yaysan noqon muxuu waddankayga ii qaban karaa ee isweyddii waxaad waddankaaga u qaban kartid”? Haddii ay shacab ahaan kaaga dhegtay dowladdu wax ma qaban, kaalintaadu ma intaas ayaad uga qoondeysay dalkii Soomaaliya?

Haddii aysan shacabka waddanka wax u qabaneyn, dowladda ma keligeed ayaa ku wada filan hawlaha baaxadda weyn ee horyaallo dal ka soo kabanayo burbur iyo baaba’? Dhabse (believable) ma ahaa eedeynta lagu saleeyay mooshinkii uu soo dhoodhoobay siyaasi aan qudhiisu waxba qaban – beentana ku beerlaxawsado shacabka?

Wabillaahi towfiiq,

Qalinkii Cabdullaahi Janno
Email: [email protected]
Wardheernews.com

Wararkii ugu dambeeyay dagaal xooggan oo dib uga billowday Kaxandhaale

Asad Cabdullahi Mataan
-
0

Dhuusomareeb (Caasimada Online) – Warar dheeraad ah ayaa laga helayaa dagaal markale dib kaga bilowday deegaanka Kaxandhaale ee gobolka Galgaduud, halkaasi oo la geeyay ciidamo laga kaxeeyay Dhuusomareeb iyo Cadaado.

Dadka deegaanka ayaa sheegaya in dagaalka oo aad u xoogan uu dib kaga bilowday deegaan ku dhow Kaxandhaale, halkaasi oo ay ku dagaalamayaan beelihii labadii maalin ee ugu dambeysay ku dagaalamay xuduuda Somalia iyo Ethiopia.

Khasaaraha ayaanan la ogaan karin, iyadoo ciidamada laga kaxeeyay Dhuusomareeb iyo Cadaado qaarkood la sheegay inaysan wali gaarin deegaanka Kaxandhaale ee gobolka Galgaduud.

Odayaasha iyo waxgaradka labada dhinac ayaa sheegaya inay doonayaan in dagaalka la joojiyo, balse ay jiraan dad sii hurinaya xiisadda colaadeed ee labada beelood u dhaxeysa.

Labadii maalin ee ugu dambeysay ayaa xaalad dagnaasho laga dareemayay halka uu dagaalka uu ka socdo kadib markii dagaalka uu iskiisa u istaagay iyadoona dagaalka u dambeyay uu geystay khasaaro isku jiro dhimasho iyo dhaawac .

La soco Wararka dagaalka la xiriira.
Caasimada Online
Xafiiska Galgaduud
[email protected]

Trump: Arrin aanan waligey horey u arkin ayaan kala kulmay diyaaraddii aan ku tagay wadanka Ciraaq

Asad Cabdullahi Mataan
-
0
Trump: Arrin aanan waligey horey u arkin ayaan kala kulmay diyaaraddii aan ku tagay wadanka Ciraaq

Madaxweynaha Mareykanka Donald Trump iyo marwada koowaad ee dalkaas Melania Trump ayaa booqasho aanan la shaacin waxa ay ugu tageen ciidammada Mareykanka ee ku sugan waddanka Ciraaq.

Waxa ay halkaas u safreen “xilli dambe oo ka mid ahaa habeenkii loo dabaaldegaayay munaasabadda Kirismas-ka” si ay ciidammada uga mahad celiyaan “adeegooda, guushooda iyo sida ay naftooda u hurayaan”, sida uu shaaciyay Aqalka Cad.

Mar ay suxufiyiinta nooca uu safarkiisa ahaa iyo inuu walaacay ayuu Mr Trump ka sheekeeyay waxa uu kala kulmay duulimaadkii uu ku tagay Ciraaq, wuxuuna ku tilmaamay kii ugu yaabka badnaa abid.

“Haa waan walaacay waxaana u walaacay xaaladda kooxda madaxweynaha, waliba ugu horreyn aniga nafteyda uma baqin waxaan u walaacsanaa marwada koowaad”.

Wuxuu sidoo kale sheegay iney xaalad adag kala kulmeen diyaaradda.

“Arrin aan waligey horay u arkin ayaan kala kulmay diyaaraddii aan ku tagay Ciraaq. Waxay ahayd diyaarad mugdi ah, dhammaan daaqadeheeda la daboolay, bannaankana aan wax nal ah ka daareynin”.

“Waxaan raacay diyaarado fara badan oo nooc walba iy cabir walba leh, waligeyna ma arkin waxaan oo kale”.

Mr Trump ayaa sheegay in Mareykanku uusan qorshaynayn inuu isaga baxo waddanka Ciraaq.

Safarkan ayaa yimid maalma uun ka dib markii uu iscasilay wasiirka Gaashaandhigga ee Mareykanka Jim Mattis, kaas oo xilkiisa ka tagay markii ay madaxweyne Trump isku maandhaafeen istiraatiijiyaddiisa gobolka.

Mareykanka weli waxaa dalka Ciraaq ka jooga ilaa iyo 5,000 oo askari oo dowladda dalkaasi ka taageera dagaalka ay kula jirto haraadiga ururka la baxay Dowladda Islaamiga ah.

Sikastaba xaalku ha ahaadee, waxaa la baajiyay kulan la qorsheeyay inuu dhexmaro Mr Trump iyo Ra’iisul Wasaaraha Ciraaq Caadil Cabdul Mahdi. Xafiiska Mr Mahdi ayaa sheegay in arrintaasi ay timid kaddib markii la isku afgaran waayay sida shirka loo qabanayo. Kulanka badelkiisana waxa ay labada hogaamiye kuwada hadleen khadka taleefanka, saraakiisha ayaa intaasi raaciyay.

Booqashada Mr Trump ayaa waxa ay qaadatay ilaa iyo saddex saacadood. Markii uu Mareykanka dib ugu laabanayayna waxa uu ku yara hakaday saldhigga ciidammada cirka ee Ramstein ee dalka Jarmalka, halkaas oo uu kula kulmay ciidammo badan oo Mareykan ah.

Maxaa dhacay intii ay socotay booqashada Trump?

Mr Trump, xaaskiisa iyo Lataliyihiisa Arrimaha Ammaanka John Bolton ayaa tegay saldhigga cirka ee Al-Asad ee galbeedka magaalada caasimadda u ah dalka Ciraaq ee Baqdaad, si ay halkaas ugula kulmaan ciidammada Mareykanka ee jooga.

Waxa ay aheyd booqashadii ugu horraysay ee uu Trump gobolka ku tego.

Inta ay booqashada socotay waxaa Trump si wanaagsan u soo dhaweeyay ciidammada oo u istaagay markii uu soo galay hoolka lagu cunteeyo, Trump-na waxa uu gacan qaaday askarta, oo qaarkood ayuuba sawirro la galay.

Trump muxuu sheegay?

Madaxweyne Trump waxa uu sheegay in sababta uu saldhiggiisa u booqday ay aheyd inuu askarta Mareykanka uga mahadceliyo sida ay gacanta uga gaysteen in laga adkaado ururka la baxay Dowladda Islaamiga ah, waxa uuna intaasi ku daray: “Laba sanadood ka hor markii aan noqday Madaxweynaha kooxdu waxa ay aheyd koox xoog badan, maantase awood ma ay laha. Shaqo wanaagsan ayaad qabateen.

“Qaran ahaan markale ayaa nala ixtiraamaa.”

Mr Trump waxa uu sheegay in Mareykanka uu Ciraaq u adeegsan karo saldhig wax laga weerari karo haddii “aannu doonayno inaannu wax ka sameyno gudaha Suuriya”, waxaa sidaasi ku warramayso wakaallada wararka ee Reuters.

Inta ay socotay booqashada waxa uu difaacay go’aankiisa uu ciidammada Mareykanka uga saarayo waddanka Suuriya isagoo yiri: “Bilowgiiba waan qeexay in howlgalkayaga gudaha Suuriya uu ahaa inaannu burburino goobaha ay ku xooggan yihiin Daacish.

“Sideed sanadood ka hor, waxaannu halkaa u tegnay inaannu joogno saddex bilood mana aynaan ka soo bixin. Haatan, sida saxda ah ayaannu sameynay wanaan soo gebagabaynaynaa arrintaasi.”

Xigasho: BBC Somali 

Ciidamadii Kaxandhaale la geeyey halkee ayaa laga kaxeeyey (Warbixin)

Asad Cabdullahi Mataan
-
0

Dhuusomareeb (Caasimada Online) – Wararka naga soo gaaraya gobolka Galgaduud ayaa sheegaya in ciidamo badan ay kala dhex galeen maleeshiyaadkii ku dagaalamayay deegaanka Kaxandhaale ee gobolka Galgaduud.

Saraakiil ciidan oo ku sugan Galgaduud ayaa sheegay inay ku guuleysteen inay ciidamo kala dhex dhigaan maleeshiyaadka labadii maalin ee ugu dambeeyay ku dagaalamayay deegaanka.

Wararka aan heleyno ayaa sheegaya in ciidamada gaaray Kaxandhaale laga kaxeeyay magaalooyinka Dhuusomareeb iyo Cadaado, waxaana geeyay halkaasi saraakiil labada dhinac kasoo jeeda.

Dagaalkii ugu dambeeyay ee maleeshiyaadka ku dhexmaray Kaxandhaale waxay isaga  dileen ku dhawaad 20 ruux iyadoo dhaawaca uu intaasi ka badan yahay, sida dadka deegaanka ay xaqiijiyeen.

Deegaanka lagu dagaalamay oo ku yaalla xadka Soomaaliya iyo Itoobiya waxaa maalmihii u dambeeyay kusoo noq noqday dagaal beeleedyada, waxaana la sheegay in lagu muransan yahay dhul dhaaqsimeed.

Dadka kasoo jeeda dhinacyada dagaalamaya ayaa u muuqda kuwo u tashaday inaan dhiig dambe ku daadan Kaxandhaale oo marar badan maleeshiyaadka ay ku dagaalamaayeen.

Caasimada Online
Xafiiska Galgaduud
[email protected]

ERITREA oo ka hadashay warar sheegaya in ciidamo ay usoo direyso Muqdisho

Asad Cabdullahi Mataan
-
0
ERITREA oo ka hadashay warar sheegaya in ciidamo ay usoo direyso Muqdisho

Asmara (Caasimada Online) – Dowladda Eritrea ayaa beenisay warbixin ay qortay jariidadda Indian Ocean Newsletter oo lagu sheegay in Eritrea ay ciidamo u direyso dalka Soomaaliya, kuwaas oo tagi doona magaalada caasimadda ah ee Muqdisho.

Qoraal kasoo baxay wasaaradda warfaafinta Eritrea ayaa lagu yir “Daabacaadeedii 21-ka December (No 1488), Indian Ocean Newsletter waxa uu qoray ‘In madaxda Ethiopia iyo Eritrea ay dhiggooda Soomaaliya u muujiyeen sida ay diyaar ugu yihiin inay beddelaan ciidamada Amisom marka ay dalka ka baxaan 2021…Eritrea waxa ay qorsheeyneysaa inay 5,000 askari oo tegaya Soomaaliya ay dirto bisha Fabraayo’”

Wasaaradda ayaa kadib ku jawaabtay “Tani waa been qayaxan”

Wasaaradda warfaafinta Eritrea ayaa sidoo kale tiri “Tani ahan markii ugu horreysay ee Indian Ocean Newsletter ay baahiso been iyo taxliil wareed aan sal lahayn oo ku saabsan dhacdooyinka gobolka. Xaqiiqdii tani waaba astaanta ay ku caan baxday”

“Damaca Indian Ocean Newsletter ee ah inay akhbaar been ah faafiso kuma guuleysan doono ujeedkeeda, waxaana uu burburin doonaa oo kaliya sumcaddeeda. Waxaan ug baaqaynaa Indian Ocean Newsletter inay xushmeyso akhristayaasheeda iskana joojiso baahinta wararka beenta ah”

Warbixinta Indian Ocean Newsletter ay ka qortay in ciidamo Itoobiyaan iyo Eritrean ah ay beddelayaan Amisom, oo saaka ay soo dabaacday Caasimada Online iyo jawaabtii dowladda Soomaaliya, halkan ka aqriso.

Caasimada Online
Xafiiska Muqdisho
[email protected]

  

Sawirro: Safiirka Somalia ee Ethiopia oo warqadaha aqoonsiga laga gudoomay

Asad Cabdullahi Mataan
-
0
Sawirro: Safiirka Somalia ee Ethiopia oo warqadaha aqoonsiga laga gudoomay

Addis Ababa (Caasimada Online) – Safiirka Soomaaliya ee dalka Ethiopia Cali Shariif Axmed ayaa maanta warqadaha Safiirnimo  u gudbiyay madaxweynaha dalka Ethiopia haweeneyda lagu magacaabo Sahle-Work Zewde.

Safiirka Cusub ee Soomaaliya u fadhin doono dalka Ethiopia ayaa madaxweynaha Ethiopia u gudbiyay salaan uu kaga siday madaxweynaha Soomaaliya Maxamed Cabdullaahi Farmaajo.

Sidoo kale Safiirka ayaa uga tacsiyeeyey Madaxweynaha Ethiopia geeridii ku timid madaxweynihii hore oo Ethiopia Girma Wolde-Giorgis oo dhawaan ku geeriyooday Dalka Ethiopia.

Safiirka Cusub ee Soomaaliya u fadhin doono dalka Ethiopia Cali Shariif Axmed ayaa sheegay inuu ahmiyadda koowaad siin doono sidii loo wanaajin xiriirka labada Soomaaliya iyo Ethiopia.

Safiirka ayaa uga mahadceliyey Madaxweynaha Dawladda Ethiopia ku biirinta ciidamo ka socda Ethiopia ciidamada AMISOM ee ka howl-gala Soomaaliya.

1...1,9191,9201,921...3,528Page 1,920 of 3,528

Caasimada Online is a reputable and reliable source of news and information on Somalia. As the largest Somali news site, we are dedicated to providing our readers with accurate and up-to-date coverage of the country's politics, society, and culture. Founded in 2009 by a Somali-American journalist, Caasimada Online is owned by Caasimada Media Group and headquartered in Mogadishu. In addition to keeping our readers informed, we strive to promote democracy in Somalia. If you have any questions or comments, please don't hesitate to contact us at [email protected]

Important Links

Trending

Social Media

© Caasimada Online 2012 | All Rights Reserved