Muqdisho (Caasimada Online) – Wasiirka cusub ee arrimaha diinta iyo awqaafta Mukhtaar Roobow Abuu Mansuur, oo hadal ka jeediyey kulan ay beesha Mudulood kusoo dhaweeneysay xukuumadda cusub, ayaa sheegay in xukuumadda ra’iisul wasaare Xamza Cabdi Barre ay guuleysan doonto.

Sababta ayuu Mukhtaar ku sheegay inay Beesha Mudulood taageersan tahay xukuumadda cusub, islamarkaana ay quraan iyo faataxo la daba taagan tahay, sida uu hadalka u dhigay.

“Waa salaamayaa dhammaan ummadda Soomaaliyeed, gaar ahaan beelweynta Mudulood ee gogoshaan sharafta leh dhigtay, aniga maanta waxaan dhihi karaa labada dhinacba waan ka tirsanahay, aniga Xamar xaafada 15 May ayaan ku qaan gaaray oo beesha ayaan ka mid ah, tan labaadna xukuumadda lasoo dhaweenayo ayaan ka mid ahay,” ayuu yiri Mukhtaar Roobow.

Wuxuu hadalkiisa kusii daray “Runtii ilaahey baan u mahadcelineynaa, waxaan hubaa xukuumadda codadkii ugu badnaa ayaa lagu ansixiyey, mid kalana shaki iigama jiro xukuumad ay sidaan usoo dhaweeneyso beesha Mudulood ee gogoshaan u dhigtay ee quraankii lagu yaqaanay iyo faataxadiina ay la daba taagan tahay shaki ma jiro xukuumadda waa guuleysaneysaa.”

Mukhtaar ayaa sidoo kale sheegay in isbadalka ka dhacay dalka ay tiir dhexaad u aheyd beesha Mudulood, wuxuuna sheegay in ururkii ay sameysay ee Badbaado Qaran ay ku badbaaday Soomaaliya oo dhan.

“Badbaado Qarankii ay beesha Mudulood sameysay waxaa ku badbaaday Soomaaliya oo dhan, waxaa ku badbaaday wadajirka maamul goboleedyada, maskiinkaan maxbuuska ahaa xataa waa ku badbaaday,” ayuu yiri Roobow.

Roobow ayaa sheegay in markii uu bilowday dagaalkii Badbaado Qaran uu aad ugu soo dhawaaday gurigii uu ku xirnaa, wuxuuna sheegay in ciidankii ilaalinayey ay u sheegeen in haddii uu dagaalka sii xoogeysto uu kala doorto in loo geeyo Sheekh Shariif iyo Xasan Sheekh, wuxuuna wax lagu faanay ku sheegay in labadaba ay kasoo jeedaan Beesha Mudulood.

Muqdisho (Caasimada Online) – Xukuumadda cusub ee ra’iisal wasaare Xamza Cabdi Barre waxaa ku cusub arrimo badan oo aan hore uga dhicin xukuumadihii hore, iyadoo inteeda badan uu soo magacaabay madaxweynaha la doortay 15-kii May 2012 Xasan Sheekh Maxamuud.

Arrimaha aan hore loo arag waxaa ka mida inuu ka mid yahay wasiir dib ugu soo laabtay xilkiisa oo aan u baahan inuu xilka la wareego, kaasoo lagu soo celiyay wasaaradii uu u magacaabay ra’iisal wasaarihii hore Maxamed Xuseen Rooble.

Wasiirka Gaashaandhigga Cabdulqaadir Maxamed Nuur (Jaamac) ayaa shalay xilka halkiisii ka sii watay, wuxuuna xarunta wasaaradda gaashaaandhigga xilalkii ugu kala wareejiyay wasiir ku-xigeenka cusub iyo wasiiru dowlaha.

Wasiir Jaamac, oo Rooble u magacaabay wasaaradda gaashaaandhigga xilligii uu taagnaa dagaalkii siyaasadeed ee kala dhaxeeyay Farmaajo, ayuu madaxweyne Xasan Sheekh mar kale xilkaasi u magacaabay, taasoo ay ugu wacan tahay rabitaanka Madaxweynaha.

Wasiir Jaamac wuxuu khilaaf ba’an kala dhaxeeyaa Madaxweynaha Koonfur Galbeed, waxaana loo diiday inuu u tartamo kursiga beshiisa. 

Dhinaca kale, waxaa magacaabistiisa Golaha Wasiirada cusub si weyn u diidanaa Guddoomiyaha Golaha Shacabka Sheekh Adan Madoobe oo watay xildhibaan iyo wasiir hore Fowsiya Maxamed Sheekh, laakiin waxaa ku adkeystay oo awoodiisa isugu geeyay Madaxweyne Xasan Sheekh.

Jaamac ayaa waxaa sidoo saaciday inuu xiriir wanaagsan la leeyahay dowladda Turkiga, oo muhiim u ah tababarka ciidamada Soomaaliya, maadaama uu horey u ahaa safiirka Soomaaliya ee Turkey. 

Qaabka madaxweyne Xasan Sheekh kusoo xulay inta badan Golaha Wasiirada ayaa lagu sheegay labad qodob oo kala ah: Inuu si weyn ugu kalsoon yahay shaqsi ahaan iyo Inuu Aqoon u leeyahay, waxaa kaloo muhiim ahayd inuu toos uga amar qaato Madaxweynaha.

Xigasho: Goobjooge  

Nairobi (Caasimada Online) – Waxaa Kenya weli ka socoto tirinta codadka doorashada madaxweynaha, ku dhawaad kala bar codadkii la dhiibtay ee doorashada Madaxweynaha ayaa la tiriyay, labada musharrax ee ugu cad cad doorashada ayaa si aad isug dhaw.

Baydhaba (Caasimada Online) – Wasiirka Awqaafta iyo Arrimaha Diinta Soomaaliya Mukhtaar Roobow Cali Abu Mansuur ayaa shaaca ka qaaday in dad badan ay kasoo horjeedeen oo ay isku dayeen inay ka hortagaan in wasiir loo magacaabo. 

Abu Mansuur ma uusan shaacin magacyada dadkaas, hase yeeshee waxaa jirta in dadka diidanaa magacaabistiisa ay u badnaayeen kooxdii Nabad iyo Nolol ee xabsiga ku haysay muddo ka badan saddex sano iyo bar.

Abu Mansuur oo ka hadlayey munaasabad ka dhacday Muqdisho ayaa aad ugu mahad celiyey madaxda sare ee dowladda federaalka inay kusoo dareen golaha wasiirada, wuxuuna sheegay inuu abaal uga hayo.

Wasiirka ayaa sidoo kale codsaday in la iska hilmaamo oo la iska cafiyo wixii ka dhacay magaalada Baydhaba bishii December 2018, intii lagu guda jiray xarigiisa.

Waxaa xilligaas magaalada Baydhaba lagu dilay 17 qof oo shacab ah kadib markii ay weerar ku qaadeen ciidamo uu soo amray madaxweyne Farmaajo, si ay usoo xiraan Roobow loogana hor-istaago inuu u tartamo xilka madaxweynaha Koonfur Galbeed, oo Farmaajo uu la rabay Laftagareen kana dhigay. 

“Wixii ka dhacay Baydhaba waa in la iska cafiyaa oo aan nabadda dib ugu laabanaa ayuu yiri Abu Mansuur.  

Dhinaka kale Roobow ayaa ugu baaqay dowladda federaalka inay daryeel wanaagsan siiso maxaabiista, isaga oo sheegay in muddadii uu xabsiga ku jiray aad loo caburiyey.

Roobow ayaa toddobaadkii tegay loo magacaabay xilka wasiirka awqaafta iyo arrimaha diinta, ayada oo dowladda ay rumeysan tahay inuu gacan ka gaysan karo dagaalka xagga fikirka ah eel ala galayo kooxda Al-Shabaab.

Muqdisho (Caasimada Online) – Warqad ka soo baxday xafiiska wasiirka cusub ee Gaadiidka iyo Duulista Hawadda Xukuumadda Soomaaliya Fardowsa Cusmaan Cigaal ayaa lagu mamnuucay in Guri laga dhiso agagaarka garoonka diyaaradaha ee Aadan Cadde, si ku meel gaar ah.

Sida lagu cadeeyey warqadaan amarkaan wuxuu salka ku hayaa nidaaminta deegaameynta dhulka ku teedsan garoonka diyaaradaha Aadan Cadde ee magaalada Muqdisho.

“Iyadoo laga amba qaadayo dardar gelinta howlaha baaxada leh ee hor yaalla iyo markaan aragnay dacwado badan oo dhinaca dhulka ah, waxaana lagama maarmaan noqotay in dhamaan dhulka ku yaalla gudaha iyo hareeraha garoonka dhismihiisa loo joojiyo, si ku meel gaar ah,” ayaa lagu yiri warqadda wasaaradda gaadiidka iyo duulista hawada XFS.

Sidoo kale waqradaan ay ku saxiixan tahay wasiir Fardowso waxaa lagu cadeeyey in garoonka Aadan Cadde uu yahay muraayadda wadanka, taas oo muhiim ka dhigeysa in nidaam loo helo dhismayaasha xiga garoonka.

“Waxaa lagama maarmaan ah in dhismayaasha u dhow Aadan Cadde la waafajiyo nimaadka u degsan garoomada caalamiga ah, si aan ula jaan qaadno shuruucda duulimaadyada caalamka,” ayaa lagu yiri qoraalka.

Sidoo kale waxaa lagu sheegay qoraalkaan in dhismaha dhulka garoonka uu keenayo amni darro dhinaca duulimaadyada ah, isla markaana go’aankaan looga soo saaray feejignaan.

Ugu dambeyntii wasaaradu waxay cadeysay in la sameynayo qiimeyn farsamo oo dhismayaasha garoonka u dhow lagu waafajinayo shuruucda u degsan garoomada.

Afgooye (Caasimada Online) – Warar kala duwan ayaa ka soo baxaya khasaaraha ka dhashay qarax maanta ka dhacay qaybo ka mid ah gobolka Shabeelaha Hoose, kaas oo ah miinada nooca dhulka lagu aaso, waxaana ka dhashay khasaare dhimasho iyo dhaawac.

Qaraxa ayaa ka dhacay deegaanka Sabiid oo ka tirsan gobolka Shabeelaha Hoose, waxaana lala eegtay mooto Fekon oo ay la socdeen askar ka tirsan ciidamada dowladda.

Wararka ayaa sheegaya in qaraxa ay ku dhintay ugu yaraan hal qof oo shacab ahaa, halka uu dhaawac soo gaaray mid ka mid ah askarta saarneyd mootada la qarxiyey.

Sidoo kale waxaa goobta gaaray ciidamo ka tirsan kuwa ammaanka dowladda Soomaaliya oo sameeyey howlgallo baaritaano ah oo ku aadan qaraxaas miinada ah, balse kama aysan hadlin, haddii ay jiraan inay dad u soo qab-qabteen qaraxaas oo geystay khasaare xoogleh.

Xaaladda ayaa haatan deggan, waxaana si caadi ah ku soo laabtay dhaq-dhaqaaqa wadada uu qaraxa ka dhacay muddo kooban hakad ku yimid, sida ay innoo sheegeen ilo degaanka.

Al-Shabaab ayaa inta badan weeraro dhabagal ku qaada ciidamada Xoogga dalka iyo kuwa ATMIS, xilliyada ay isaga kala gooshayaan koonfurta iyo bartamaha dalka Soomaaliya.

Shabeelaha Hoose ayaa ka mid ah meelaha ay ku xoogan tahay kooxda Al-Shabaab, waxaana inta badan ka dhaca weeraro iyo sidoo kale qaraxyo khasaare geysta.

Gaalkacyo (Caasimada Online) – Wararka laga helayo gobolka Mudug ee bartamaha Soomaaliya ayaa sheegaya in xalay waqooyiga magaalada Gaalkacyo ee xarunta gobolkaasi lagu dilay sarkaal ka tirsanaa wasaaradda maaliyadda ee dowlad goboleedka Puntland.

Sarkaalka la dilay ayaa waxaa lagu magacaabi jiray, Cabdiraxmaan Maxamed Cabdi, wuxuuna ka tirsanaa waaxda canshuuraha ee wasaaradda maaliyadda Puntland.

Dilka marxuumka ayaa ka dhacay xaafadda Garsoor ee waqooyiga magaalada Gaalkacyo, gaar ahaan masjidka Salaaxudiin, xilli uu ka soo baxay saaladdii cishaha.

Gooobjoogayaal ayaa innoo sheegay in dilka ay fuliyeen rag ku hubeysnaa bistoolado, kuwaas oo goobta isaga dhaq-dhaqaaqay, markii ay toogteen marxuum Cabdiraxmaan.

Sidoo kale waxaa goobta gaaray ciidamo ka tirsan kuwa ammaanka oo sameeyey howlgallo kooban, balse ma jirto wax hadal ah oo ka soo baxay oo ku aadan falkaasi dilka ah.

Gaalkacyo ayaa waxaa inta badan ka dhaca weeraro iyo dilal qorsheysan oo ay ka geystaan kooxaha Al-Shabaab iyo Daacish oo weli ku xoogan deegaannada maamulka Puntland.

Sikastaba, dilkaan ayaa ku soo aadayo, xilli Puntland ay laba jibaartay howlgallada amniga, waxayna gacanta ku soo dhigtay shabakado isku xiran oo toogasho lagu xukumay.

Muqdisho (Caasimada Onlie) – Xafiiska ra’iisul wasaaraha xukuumadda Soomaaliya Xamza Cabdi Barre ayaa si rasmi ah ula wareegay deeq raashin oo ka timid dalka Imaaraadka Carabta oo muddo 7 berri ah ku xayirneyd dekadda Muqdisho kadib markii la isku qabsaday ciddii maamuli laheyd.

War qoraal ah oo kasoo baxay xafiiska Xamza ayaa lagu sheegay inay deeqdaas la wareegaan wasiiru dowlaha xafiiska Ra’iisul Wasaaraha, Mudane Xirsi Jaamac Gaani, Wasiirka Wasaaradda Dekedaha, Gen. Cabdullaahi Axmed Jaamac (Ilkajiir), Xoghayaha Joogtada ee Xafiiska Ra’iisul Wasaaraha, Maxamed Abuukar Zubeyr iyo masuuliyiin kale.

Deeqda oo ka kooban 40 konteenar ayaa isugu jira cuntooyin kala duwan oo loogu talagalay in la gaarsiiyo shacabka Soomaaliyeed ee abaartu saameysay.

Qoraalka kasoo baxay xafiiska Xamza ayaa lagu yiri “Dowladda Soomaaliya waxay ka shaqeyneysaa inay u gaarsiiso dadka ugu baahida badan ee gobollada dalka sida ugu dhaqsiyaha badan.”

Wasaaradda Arrimaha Gudaha iyo Wasaaradda Deegaanka iyo Isbeddelka Cimilada iyo Maareynta Musiibooyinka ayaa isku qasbaday la wareegista iyo maamulka gargaarka, waxayna taas ugu dambeyn keentay inuu soo farageliyo xafiiska ra’isuwasaare Xamza Cabdi Barre.

Arrintan ayaa waxaa horey ugu shaqo laheyd wasaaradda Maareykanka musiibooyinka oo hadda la baabi’iyey, waxaana caddeyn cidda la wareegtay shaqadeeda.

Wasaaradda Degaanka iyo Isbadedlka Cimilada ayaa ah Wasaarad cusub oo ka looban laamo laga soo gooyey Wasaaraddii Maareynta Musiibooyinka iyo Xafiiska Ra’iisal Wasaaraaha.

Soomaaliya waxaa ka jirta abaar laba sano jirsatay oo aan horey loo arag in ka badan 40 sano. Dad gaaraya hal milyan oo qof ayaa ku barakacay, iyadoo abaaruhu ay halakeeyeen dalagyadii iyo xoolihii ay ku tiirsanaayeen xoola dhaqatada iyo beeralayda.

Madaxweynaha Somaliland Muuse Biixi Cabdi ayaa lagu eedeeyay inuu doonayo muddo kororsi uu xafiiska kusii joogo kadib Novembar 2022 o ay ku egtahay middo xileedkiisii 5-ta sano ahaa.

Waxaa Muuse Biixi si weyn loogu amaanay Doorashadii Golayaasha Wakiilada iyo Degaanka ee Somailand oo dhacday Jun 2021, laakiin guuldarradii xisbigiisa Kulmiye kasoo gaartay ayaa u muuqata inuu qaatay dariiq la mida kii Madaxweynihii hore ee Soomaaliya Maxamed C/llaahi Farmaajo oo isku dayey inu muddo kororsi laba sano sameysto, kadibna qalalaase ka dhaliyey Muqdisho ilaa markii danbe looga adkaaday doorashadii 15 May 2022.

Waxaa marar badan natiijo la’aan ku dhammaaday wadahadallo u dhaxeeyay xukuumadda iyo xisbiyada mucaaradka ah ee Somaliland, iyadoo khilaaf weyni ka taagan yahay Doorashada madaxtinimada iyo furista Xibsiyada ee is dhex galay.

Madaxda Golayaasha Guurtida iyo Wakiilada oo arrinta dhex galay ayaa gacanta ka tahay markii Muuse Biixi uu diiday inuu qaato go’aanka ay gaaraan, waxayna arrintii isu bedeshay loolan iyo qalalaase siyaasadeed oo halis ku haya maamulka iyo nabaddii Somaliland.

Sida Farmaajo uu qabashada ‘Doorasho Qof iyo Cod’ ah ugu adeegsaday inuu xilka kusii joogo wuxuu Muuse Biixi la yimid Qorshaha ‘Furista Xisbiyadda’ taasoo uu kusoo beegay dhammaanshaha xilligsiisa.

Arrinta furista xisbiyada oo si weyn Somaliland looga raadinaye iyo xuquuq ka maqneyd siyaasiyiinta degaankaasi 10 sano, ayaa hadda noqotay mid Muuse Biixi u adeegsado inuu xilka kusii jeedo, wxaaana bilowday diiwaangein ururro cusub xilli doorashadii Madaxweynaha ay harsan tahay wax ka yar 3 bilood, tan xisbiyada sharciga ahna 4 bilood.

Muuse Biixi oo mucaaradka kasoo horjeeda ay fahamsan yihiin inuu arrinta ‘Furista Xisbiyada’ uga dan leeyahay xukun dheereysi ee aysan ka ahayn daacad ayaa ka quustay heshiis ay la galaan Muuse Biixi, waxyna bilaabeen bannaanbaxyo rabashado dhalyey oo diid ku daatay, waxana xaalada Somaliland tahay mid kacsan oo kacdoon beeleed siyaasadeysan hareeyay.

Madaxda Mucaaradka Somaliland oo ay hoggaaminayaan xisiyada Waddani iyo UCID ayaa bilaabay inay u hanjabaan Muuse Biixi, sidii Midowgii Musharixiinta ee Muqdisho, iyagoo weliba u goodinaya inay hubka qaadan doonaan.

Sida Odayaasha Beelaha Muqdisho iyo saraakiishii badbaado Qaran ayey Caaqilada Beelaha Somaliland iyo Mujaahidiintii SNM qaarkood warbaahinta hanjabaad u marinayaan Muuse Biixi, waxayna xiisada siyaasadda gaartay meel halis ah.

Siyaasiyiinta Muxaafidka ee Muuse Biixi raacsan iyo kuwa Mucaaradka ee xisbiyada ee Waddani iyo UCID ayaa xaaladda uga sii daraya iyagoo qaab beeleysan isu weerarraya, waxaana Beesha ugu weyn ee Mucaaradka u aragtaa in xilka Madaxweynaha ay markan xaq u leedahay oo wax badan samirtay.

Muuse Biixi wuxuu iminka marayaa inuu dhageysan waayo Isbaheysiga WADDANI iyo UCID, iskana diido wax tanaasul ah, sidii Farmajo yeelay 2022 iyo 2021, isagoo xoogga saaraya qorshaha furista xisbiyada cusub xilli kala guur ah.

Waxaa gebi ahaan meesha ka baxay Guddigii Doorashada oo is wada casilay, taasina waxay xaqiijisay inaysan doorasho xiligan ka dhici karin Somaliland. Muuse Biixi wuxuu qeyb weyn ku lahaa burburka Guddigii Doorashada.

Muuse Biixi wuxuu Maxamed Farmajo kala mid noqday inuusan ogoleyn isu soo bax siyaasadeed, bannanabax kastana uu keeno in dad lagu dilo, qaarna lagu dhaawacyo, arrintan waxay dadka dib u xusuusinaysaa halgankii Farmaajo iyo Midowgii Musharixiinta dhex maray markii uu gaaray heerkii ugu sareeyay, kadibna gacan-ka-hadalka isu bedlay.

Madaxweynaha Somaliland uma muuqdo xaaladda cakiran ee maamulkiisu marayo, wuxuuna jeediyay khudbad weerar ah oo uu si gaara u beegsaday Guddoomiyaha xisbiga Waddani Xeri Xaaji Cali, taasoo dad badan ka yaabisay.

Haddii aanu Muuse Biixi xaqiiqada u soo laaban, iska dhaafin hamigiisa muddo kororsiga ah ma heshiis la gaarin mucaaradka talada la leh, waxaa muuqata inuu mari doono dariiqii Farmaajo, inkastoo qalalaase iyo dagaalo ka dhaca Somaliland ay mar kasta ka hortagaan odayaasha dhaqanka degaanadaasi oo awood buuxda leh, taasoo ah rajada kaliya ee la qabo.

Xigasho: Goobjooge.net

Garoowe (Caasimada Online) – Madaxweynaha Puntland Siciid Cabdullaahi Deni, ayaa amray in la joojiyo in la iibiyo buugaagta manhajka waxbarashada dusgiyada sare ee Puntland, inta dib loo eegayo si loo saxo khaladaadka jira hadda, sida uu sheegay.

Madaxweyne Deni ayaa faray mas’uuliyiinta wasaaradda waxbarashada iyo tacliinta sare ee Puntland in la fuliyo amarkan laga billaabo maanta 13 August 2022 illaa amar danbe.

Amarka madaxweyne Deni ayaa kusoo aaday, iyadoo aad looga cabanayay lacag $55 oo ay wasaaradda waxbarashadu kusoo rogtay qaadashada buugaagta manhajka waxbarashada.

Cabashada waalidiinta ayaa gaartay madaxweynaha Puntland, kadib markii baraha bulshada ay kasoo muuqdeen waalidiin danyar ah oo aad uga cabanayay inaysan bixin karin lacagaha buugaagta lagu iibsanayo.

Qaylo-dhaanta ayaa kusoo aadey xilli Puntland wajahayso abaaro ba’an taas oo sababtey in ardey gaareysa 6000 wadi waayaan ama ay ka haraan waxbarashada.

Wasiirka waxbarashada, Cabdullaahi Axmed Xasan ayaa dhowaan sheegay inay waalidiinta ka qafiifiyeen lacagta buugaagta, isagoo sheegay in si tartiib ah uu isaga bixin karo waalidkii aan awoodin inuu buugaagta halmar iibsado.

WAREEGTADDA MADAXTOOYADDA

MADAXWEYNAHA OO AMRAY IN LA JOOJIYO IIBINTA BUUGAAGTA MANHAJKA WAXBARASHADA DUGSIYADA SARE EE PUNTLAND, INTA DIB LOO EEGAYO SI LOO SAXO KHALADAADKA JIRA HADDA.

Garoowe: 13 August 2022: Madaxweynaha Dowladda Puntland Mudane Siciid Cabdullaahi Deni, ayaa Amar Madaxweyne ku joojiyay in la iibiyo buugaagta Manhajka Waxbarashada dusgiyada sare ee Puntland, inta dib loo eegayo si loo saxo khaladaadka jira hadda.

Madaxweynaha ayaa faray Masuuliyiinta Wasaaradda Waxbarashada iyo Tacliinta Sare ee Dowladda Puntland, in la fuliyo amarkan laga billaabo maanta 13 August 2022 illaa amar danbe.

Muqdisho (Caasimada Online) – Markab gargaar oo laga keenay dalka Imaaraadka Carabta ayaa kusoo xirtay dekedda magaalada Muqdisho, si uu u gaarsiiyo 1,000 tan oo sahay cunto ah oo loogu talagalay ku dhawaad 2.5 milyan oo qof oo ay saameeyeen abaaraha ka jira dalka.

Madaxweynaha Imaaraadka Carabta Sheikh Mohamed bin Zayed Al-Nahyan ayaa horay u amray bixinta 35 milyan oo dirham oo gargaar bini’aadanimo oo degdeg ah in loo diro qoysaska ku barakacay abaaraha ka jira Soomaaliya.

Imaaraadka ayaa sheegay inay ka go’an tahay in ay caawiyaan dalalka saaxiibka ah iyo dadaallada ay ku horumarinayaan xiriirka laba geesoodka ah ee ay la leeyihiin dowladda Soomaaliya, sida ay horay u sheegtay wakaaladda wararka ee dalkaas.

Khilaaf ka taagan cidda maamuleysa

Waxaa khilaaf uu ka taagan yahay cidda maamuleysa gargaarkan bani’aadminimo ee Imaaraadka kasoo dajisay dekadda Muqdisho, wuxuuna una dhexeeya Wasaaradda Arrimaha Gudaha iyo Wasaaradda Deegaanka iyo Isbeddeljka Cimilada.

Arrintan ayaa waxaa horey ugu shaqo laheyd wasaaradda Maareykanka musiibooyinka oo hadda la baabi’iyey, waxaana caddeyn cidda la wareegtay shaqadeeda.

Khilaafkan ayaa sababay in dekedda Muqdisho laga saari waayo Kunteenarro gargaar ah oo loogu talagalay dadka abaarta ka taagan dalku saameysay.

Soo saaridda iyo la wareegidda gargaarka oo ahayd in ay dhacdo Todobaadkii hore ayaa suurageli weyday kaddib muranka uu soo shaac baxay.

Ra’iisal Wasaare Xamza Cadbi Barre oo uu gaaray muranka ku saabsan maamulka gargaarka ee u dhexeeye labada Wasaaradood ayaa kuwargeliyey Wasaaradaha in midkoodna uusan tegein dekedda islamarkaana inta xal laga gaarayo gargaarku ku sii jiro Dekedda.

Wasaaradda Degaanka iyo Isbadedlka Cimilada ayaa ah Wasaarad cusub oo ka looban laamo laga soo gooyey Wasaaraddii Maareynta Musiibooyinka iyo Xafiiska Ra’iisal Wasaaraaha.

Soomaaliya waxaa ka jirta abaar laba sano jirsatay oo aan horey loo arag in ka badan 40 sano. Dad gaaraya hal milyan oo qof ayaa ku barakacay, iyadoo abaaruhu ay halakeeyeen dalagyadii iyo xoolihii ay ku tiirsanaayeen xoola dhaqatada iyo beeralayda.

New York (Caasimada Online) – Qoraaga British-ka ah ee Salman Rushdie ayaa Jimcihii lagu mindiyeeyey isaga oo ka hadlaya masraxa machadka Chautauqua Institution ee galbeedka gobolka New York ee dalka Mareykanka.

Salman Rushdie oo 75 jir ah ayaa 1988-kii qoray buug uu ugu magac daray “Aayadaha Shaydaanka” oo uu ugu gefay qur’aanka kariimka iyo Nebi Muhameed NNKH.

Booliska New York ayaa hadda shaaca ka qaaday in ninka weerarka fuliyey uu yahay Hadi Matar oo ah 24 jir degan magaalada Fairview ee gobolka New Jersey ee ku dheggan gobolka New York.

Booliska waxay kale oo ay sheegeen in weli aysan garaneyn sababta uu Hadi u weeraray Salman Rushdie, islamarkaana ay FBI-da kala shaqeynayaan inay go’aan ka gaaraan arrintaas. 

Waxay xaqiijiyeen in Hadi Matar uu haystay ticket u ogolaanaya inuu ka qeybgalo munaasabadda uu hadalka ka jeedinayey Salman Rushdie, islamarkaana uu ahaa kaligiis oo aanu qof kale ku wehlin weerarka.

Magaca Hadi ayaa u muuqda mid Muslim, waxaana suurta-gal ah inuu weerarka u fuliyey sababo la xiriira gefkii uu Salman Rushdie u gaystay kitaabka, balse booliska weli ma go’aamin arrintaas.

Hadi ayaa kusoo booday masraxa uu taagnaa Salman Rushdie, wuxuu mindida ugu dhuftay qoorta ugu yaraan hal mar, iyo sidoo kale caloosha mar kale.

Waxaa lagu xiray isla goobta, waxayna booliska go’aaminayaan dacwadihii ay kusoo oogi lahaayeen. 

Salman Rushdie ayaa weli maraya qaliino lagu sameynayo si loo badbaadiyo noloshiisa.

Andrew Wylie, oo ah wakiilka Salman Rushdie, ayaa sheegay inay waxyeello xoogan ka gaareen neerfayaasha, beerka, gacan, islamarkaana uu lumiyey hal il.

Buug uu Salman Rushdie qoray 1988-kii oo uu ugu magac daray “Aayadaha Shaydaanka” ayaa horseeday fatwo dil ah oo uu soo saaray hoggaamiyihii hore ee kacaanka Iran Ayatollah Ruhollah Khomeini.

Rushdie oo ku dhashay India, waalidkiisna ay ahaayeen Muslimiin aan diinta ku dhaqmin, islamarkaana isaga sheegay inuusan diin laheyn, ayaa dhuumasho ku noolaa kadib markii buugga uu soo baxay 1988-kii.