Muqdisho (Caasimada Online) – Xildhibaan Mahad Maxamed Salaad ayaa markii ugu horeysay baaq nabadeed kasoo saaray dagaalada maalmihii ugu dambeeyay ka dhacayay gobolka Hiiraan gaar ahaan degmada Maxaas.

Xildhibaan Mahad Salaad ayaa ugu baaqay dhinacyada ku dagaalamaya degmada Maxaas inay joojiyaan dagaalada  islamarkaana laga fakaraa qorshe kale oo horumar lagu gaari karo.

Xildhibaan Mahad oo arrintaasi ka hadlaya ayaa yiri “Waxaan ku baqaynaa in si deg deg ah loo joojiyo colaada ka aloosan  tuulooyinka hoos yimaada degmada Maxaas ee Gobolka Hiiraan”.

Xildhibaanka ayaa ugu baaqay maamulka Hirshabeelle inay dadaalka ugu badan ku bixiyaan sidii dagaalada loo dhameyn lahaa.

“Sidoo kale waxaan ka codsanaynaa madaxda maamulka Hirshabeelle, Gudoomiyaha Gobolka Hiiraan, Ugaasyada labada belood iyo Cuqaasha Dhaqanka in si deg deg ah uga howl galaan sidii colaadaas loo joojin lahaa”.

Ugu dambeyntii, waxaa uu xildhibaan Mahad Salaad ka hadlay xummaanka colaadda isaga oo yiri “Colaadna wiil kuma dhashee wiil baa ku dhinta ee fadlan fursad hala siiyo nabadda iyo joojinta dhiiga dadka walaalaha ah ee daadanaya”.

Dagaalada ka dhacay degmada Maxaas ee gobolka Hiiraan ayaa sababay dhimashada 15 ruux oo dhinacyada dagaalamay ah, waxaana socda dadaalo la doonayo in lagu joojiyo xiisadda dagaalka.

Caasimada Online
Xafiiska Muqdisho
[email protected]

Beledweyne (Caasimada Online) – Waxaa wali tagan xiisadda ka dhalatay dagaal beeleedka maalmahaan ka dhacayay Degmada Maxaas ee gobolka Hiiraan, kuwaasi oo u dhaxeeyay Maleeshiyaad wada daga degmada Maxaas.

Guddoomiyaha gobolka Hiiraan Yuusuf Axmed Hagar, ayaa sheegay in dadka dhaqaalaha heysta ee kasoo jeeda deegaanka ay horinayaan dagaalka labada beleed ku dhexmaraya degmada Maxaas.

Inka badan 15 ruux ayaa ku geeriyooday dagaalka labada maleeshiyaad ku dhexmarayay deegaanada hoostaga degmada Maxaas, waxaana hadda muuqata cabsi dadka deegaanka heysata.

Dagaalkii ugu dambeeyay ayaa ka dhacay duleedka degmada Maxaas shalay galintii dambe, xilli halkaasi ay ku sugan yihin gudoomiyaha gobolka Hiiraan iyo tiro xildhibaano ah ay ka baxay Magaalada Beledweyne.

Guddoomiyaha gobolka Hiiraan ayaa ka dalbaday shacabka iyo waxgaradka labada beeleed in seddex meelood meel dhaqaaladooda ay ku bixiyaan xalinta iyo dhameynta dagaalka, halkii ay hurinta colaada ku bixin lahaayeen.

Maleeshiyaadka ku dagaalamaya degmada Maxaas ayaa isku haya aanooyin qabiil oo ka bilowday dhul daaqsimeed, sida dadka deegaanka ay xaqiijiyeen.

Waxaa socdo dadaalo maamulka Hirshabeelle ay ku doonayaan in lagu dhameeyo dagaalka, iyaga oo nasiib daro ku tilmaamay in xiligan labo beeleed oo wada daga degmada Maxaas ay dagaalamaan.

Caasimada Online
Xafiiska Hirshabeelle
[email protected]

Muqdisho (Caasimada Online) – Dowladda China ayaa shaaca ka qaaday arrin aan horey loo shaacin oo qeyb ka ah heshiiska kalluumeysi ee ay la gaartay dowladda federaalka Soomaaliya.

Dowladda Shiinaha ayaa sheegtay in heshiiska uu qeyb ka yahay in maraakiibta China loo oggolaaday in ay Hub soo qaadan karaan si haddii ay la kulmaan weerarrada Burcad Badeedda isaga difaacaan.

Dowladda Shiinaha ayaa sheegtay in ay Bisha soo socota billaabi doonto ka kalluumeysiga Xeebaha Soomaaliya kaddib markii ay Dowladda Soomaaliya ruqsad u siisay.

Dowladda Soomaaliya ayaa Bishii la soo dhaafay waxaa ay Ruqsad kalluumeysi siisay Sharikado ka badan 30 Markab oo ka kalluumeysan kara biyaha Somaaliya.

Heshiiska labada dal ay wada galeen ayaa waxaa ka mid ah in Maraakiibtaas ay muddo sanad ah ka kalluumeystaan xeebaha Soomaaliya dibna loogu cusbooneysiin karo sanad kale.

Hay’adaha ka faallooda Amaanka Badaha ayaa sheegaya in sanadkii la soo dhaafay ee 2017 ay Burcad Badeedda Soomaalida geysteen weerarro ka badan sanadkii ka horreeyay ee 2016kii.

Heshiiskan ayey dowladda Federaalka ah u aragtaa soo jiidashada Maalgashatada iyo Kalluumeysatada Caalamiga ah, taas oo iyana qeyb ka ah kobaca dhaqaalaha dalka.

Caasimada Online
Xafiiska Muqdisho
[email protected] 

Garoowe (Caasimada Online) – Dowladda Faderaalka ee Soomaaliya ayaa la wareegtay ciidamada booliska iyo daraawiishta Puntland, kaddib markii todobaadkan ay soo gaareen Puntland wafdi kasocda dowladda faderaalka Soomaaliya oo tirakoobaya ciidamada booliska ee Puntland.

Wararka ayaa sheegaya in la xareeyey dhammaan ciidamada bilayska Puntland ee ku sugan gobolada, kuwaasi oo magacyadooda iyo taleefanadooda la diiwaangeliyay, loona sameyey kaarar ay ku qaataan mushaaraadka ciidamada.

Qorshaha ayaa ah ciidamada inay mushaaraadka ka qaataan akoono bankiyada dalka ka howlgala, kuwaasi oo ay ku qaadanayaan kaarar aqoonsi oo la siiyay.

Saraakiil kasocda dowladda faderaalka oo wada tirokoobka ayaa horay usoo maray magaalooyinka Gaalkacyo, Garoowe, Carmo, ciidamada ku sugan jiidda hore Tukaraq, waxaana hadda la diiwaangelinayaa ciidamada bilayska ee Bosaso.

Madaxwaynayaashii hore Puntland ayaa marar badan ka horyimid qorsheyaal hay’adda UNDP iyo dowladihii KMG ee dalka soo maray ku doonayeen inay kula wareegaan ciidamada Puntland mushaaraadna ay u siiyaan, xukuumadahaasi ayaa badankooda dalbanayay mushaaraadka in iyaga lasoo marsiiyo, haddii aan sidaasi la yeelina aan qorshahan ka hanaqaadi karin Puntland, waxaana ay ku sababaynayeen in askariga uu mar walba hoostago qofka markaasi mushaarka bixinaya.

Madaxda dowladda dhexe ee Soomaaliya iyo dowlad goboleedyada ayaa khilaafka ka dhaxeeyey bilihii lasoo dhaafay waxaa uu salka ku hayay in qoondadada magaca Soomaaliya lagu soo qaado in lagu koobo gobolka Banaadir iyo deegaano tirsan, loona baahanyahay in dalka oo dhan si siman loo gaarsiiyo.

Xukuumadda Madaxwayne Cabdiwali Cali Gaas ayaan illaa iyo hadda wax war ah ka soo saarin qorshaha hadda socda ee DFS, lamana oga in ay wax kala socoto qorshahaas iyo in kale.

Caasimada Online
Xafiiska Garoowe
[email protected]

Garoowe (Caaismada Online) – Kadib kulan looga hadlaayay amniga oo ahaa mid deg deg ah laguna qabtay Magaalada Garoowe ayaa waxaa laga soo saaray amaro ku socda Ciidamada Puntland iyo musharixiinta Madaxweynaha Maamulkaas.

Wasiirada Amniga, Warfaafinta iyo taliyaha Ciidamada Amniga doorashada Puntland ayaa si wadajir ah u soo saaray amaradaas oo inta badan ku saabsanaa suggida Amniga.

Wasiirka Wasaaradda Amniga Puntland Axmed Cabdullaahi Yuusuf (Dowlad) ayaa sheegay in musharixiinta Madaxweynaha looga baahan yahay inay xakameeyaan Ciidamada ay wataan xilliyada ay ku jiraan ololaha doorashada.

Waxa uu sheegay in Magaalada Garoowe gudaheeda aan lagu arki karin ciidamo aan aheyn ciidamada loogu talo galay Amniga doorashada Puntland, hayeeshee ciidamada kale iyo kuwa musharixiinta looga baahan yahay inay Xarumahooda ku ekaadaan.

Wasiirka Wasaaradda Amniga Puntland Axmed Cabdullaahi Yuusuf (Dowlad) ayaa sidoo kale faray Ciidamada ku jira furumaha dagaalka sida Tukaraq in xilliyada ay soo aadayaan Magaalada ay ku soo galaan, iyaga oo Shacaba ah oo hubkoodii iska-soo dhigay.

Dhinaca kale, taliyaha ciidanka badda ahna taliyaga sugidda amniga Admiraal Cabdirisaaq Diiriye Faarax ayaa sheegay  in la bilaabayo howlihii ugu danbeeyay ee lagu xaqiijinayo amniga magaalada Garoowe iyo guud ahaan deegaanada maamulka Putnland si aan loogu soo dhexdhuumanin, asagoo soo rogay amarro lagu joojinayo ciidamada shaqada ka fadhiya iyo hubka sharcidarada ah ee lagu dhexwato magaalada Garoowe gudaheeda ayada oo laga digtoonyahay in wax qalada ay dhacaan inta lagu guda jiro doorashada dhowaan la filayo.

“Waxa aan annagu aan hadda ka shaqeynayno waxaa weeyaan inaan sugno ammaanka magaalada Garoowe iyo guud ahaan deegaanada maamulka uu ka taiyo, waxaana u sugnay si dhab ah oo siduu cadawgu marnaba uuna nooga faa’iidaysan, Soomaali diidka iyo inaan xakamayno dhaqdhaqaaqa,  ciidamada aan shaqyen iyo hubka sharci darada ah iyo waliba gaadiidka”.

Admiraal Cabdirisaaq Diiriye Faarax  oo sii hadlaya “waxaa leeyahay hubka waxii maanta ka danbeeyo magaalada Garoowe ee caasimada Putnland waxaa la dhexmari karaa oo kaliya hub sharci ah, markaan leeyahay waxaa waaye in ciidamada ammaanka sugaya oo loo xilsaaray iyo kuwa booliska ayaa waxa ay  la dhexmari karaan oo kaliya hubka magaalada Garoowe”  isaga oo intaasi raaciyey “Ciidamada  kale ee ka imaanaya meelaha kale ama haya shaqooyinka kale iyagu waxa ay tagayaan meeshii ay u socdeen lamana ogolaanayo inay magaalada hubkooda la dhex maraan”

Taliyaha ayaa sheegay xakameynta hubka iyo ciidamada  aan cid gaara loola jeedin ee kaliya ay la xariirto sugitaanka ammaanka, amnigooda oo kaliya ay tahay ujeedada, oo aaney aheyn wax cid gooni ah loogu talo-galay in lagu carqaladeeyo.

“Waxaa jira musharaxiinta, waa musharaxiintii madaxweynaha maamlka Putnland, sharaf iyo qadarin ayey ciidamada ka mudan yihiin, waa mawaadiniin in lagu xadgudbana xaq ma ahan, ayaguna waa inay ogaadaan inaan ku mashquulsanahy siday u tartami lahaayeen’.

Caasimada Online
Xafiiska Garoowe
[email protected] 

Garoowe (Caasimada Online) – Doorashada madaxtinnimada ee January ka hor, Isimadda Puntland ayaa qoraal ka soo saaray sidii doorashada ugu dhici laheyd qaab xasiloon kadib wadatashi ay la sameeyey bulshada.

Qodobbada ay soo saareen ayaa ahaa:

In la wada qaato mas’uuliyad wadareed, cid kastana ay xil iska saarto sidii loo helilahaa doorasha ku dhacda nabad iyo xasilooni.

In guddiga doorashada lagu aamino in ay soo  ansixiyaan, soona saaraan Xildhibanadai beeluhu soo xusheen isimaddana soo saxiixeen.

Jabuuti (Caasimada Online) – Madaxweynaha dowladda Jabuuti Ismaaciil Cumar Geelle ayaa ka hadlay isbadalka dhaqaalaha ee gobolka Geeska Africa iyo maalgashi lagu sameeyo dekadaha Soomaliya iyo Jabuuti.

Mar uu ka hadlayay horumarinta dekadaha Soomaaliya iyo Eritrea ayuu sheegay in dowladda Jabuuti waligeed ay taageersaneyd inay hesho dekado ay tartan la gasho si suuq wanaagsan loogu helo bariga Africa.

Madaxweynaha Jabuuti Ismaaciil Cumar Geelle sheegay in Tartanka dhinaca Dekadaha ah uusan saameyn badan ku lahayn Dekadaha dalka Jabuuti islamarkaana u waanagsanyahay Gobolka.

Dowladda uu madaxweynaha ka yahay ayuu sheegay inay soo dhaweyneyso tartan maalgashi oo lagu sameeyo dalalka deriska la ah, taasina ay dhalineyso in loo kala hormaro kuwa wanaagsan.

Tartanka dalalka deriska ah ay ugu jiraan suuqa weyn ee Ethiopia ayuu sheegay in Jabuuti ay halkeedii hore ka taagantahay tartankana soo dhaweyneyso.

Ugu dambeyn wuxuu ka hadlay Madaxweyne Geelle dib u heshiisiinta Eritrea iyo Jabuuti isaga oo sheegay in dhawaan ay kulmi doonaan Wasiirrada arrimaha dibadda labada dal,kana hadli doonaan khilaafka u dhaxeeya.

Caasimada Online
Xafiiska Jabuuti
[email protected]

Muqdisho (Caasimada Online) – Dowladda Soomaaliya ayaa todobaadkii hore shaacisay inay heshiis la gashay shirkado Kaluumeysi oo laga leeyahay dalka Shiinaha kuwaasi oo la siiyay Ruqsad ay kaga kaluumeysan karaan xeebaha Soomaaliya.

Wargeyska Quartz oo xarumo ku leh Washington iyo London ayaa warbixin dheer oo looga hadlayo heshiiskaasi daabacay, waxaana inta badan warbixinta ay la xiriirta saameynta ka dhalan karta heshiiskaasi.

Warbixinta Wargeyska ayaa lagu sheegay in rajada dowladda Soomaaliya ay tahay in koror uu ku yimaado dhaqaalaha Soomaaliya, balse ay jiraan halis kale oo heshiiskaasi ku hoos duugan.

Maraakiibtaasi oo bishan bilaabay inay ka jilaabtaan Badda Somalia ayaa  waxaa loo fasaxay inay ka hawl-galaan ilaa 24 nautical miles  oo u dhiganta 44-KM, si loo ilaaliyo hawlgalladda kalluumeysiga.

Haliska Koowaad ee ku duugan arrintaan ayaa lagu sheegay inay tahay inay dib usoo labo kacleyn karaan kooxaha burcad badeeda Soomaaliya, kuwaasi oo weerari kara maraakiibtaan maadaama ay og yihiin halka ay ka howlgalayaan.

Warbixinta ayaa lagu sheegay inaysan cadeyn xadiga Kaluumeysi ee ay sameyn karaan maraakibtaan bishii ama sanadkii, balse waxaa loo ogol yahay in muddo sanad ah ka kaluumeystaan xeebaha Soomaaliya.

Halista Labaad ayaa lagu sheegay in Marakiibtaan ay la imaan karaan maraakiib ka qaad weyn kuwa lagula heshiiyay inay muddo sanad ah kaga kaluumeystaan xeebaha Soomaaliya.

Caasimada Online
Xafiiska Muqdisho
[email protected]

Muqdisho (Caasimada Online)-Guddoomiye ku xigeenka Maamulka iyo maaliyadda gobolka Banaadir ayaa markale Shaqo joojin ku sameeyay guddoomiye Degmo xili uu dalka ka maqan yahay guddoomiyaha gobolka Banaadir Eng Yariisow.

Axmed Maxamed Xasan ayaa laga joojiyay shaqada guddoomiyaha degmada Yaaqshiid ee gobolka Banaadir, waxaana ka joojiyay guddoomiye ku xigeenka maamulka iyo maaiiyadda gobolka Banaadir.

Sababta ugu weyn ee guddoomiyaha degmada Yaaqshiid Shaqada looga joojiyay ayaa lagu sheegay inay tahay musuq maasuq iyo isdaba marin dhaqaale oo lagu arkay, sida xogaha aan ku heleyno.

Waa markii labaad ee uu Guddoomiye kuxigeenka Maaliyadda Gobolka Banaadir Xuseen Maxamed Nuur uu shaqo joojin ku sameeyo guddoomiye degmo isagoo ah kusimaha guddoomiyaha gobolka Banaadir.

Guddoomiye ku xigeenka dhanka maamulka iyo maaliyadda gobolka Banaadir ayaa horey sidan oo kale shaqo joojin ugu sameeyay Cumar Shariif Jeeg oo ahaa guddoomiyihii degmada Xamarweyne.

Marka laga yimaado eedeymaha Musuq maasuq ee xubnaha gobolka Banaadir lagu eedeeyo ma jirto ilaa iyo hadda shaqsi ka tirsan gobolka oo Maxkamad loosoo taagay.

Caasimada Online
Xafiiska Muqdisho
[email protected]

Kismaayo (Caasimada Online) – Guddoomiyaha baarlamaanka maamulka Jubbaland ayaa u jawaabay xildhibaano dhawaan sheegay in laga soo masaafuriyay magaalada Kismaayo ee gobolka Jubbada Hoose.

Guddoomiye Cabdi Maxamed C/raxmaan  ayaa sheegay inay been abuur tahay wararka sheegaya in xildhibaanada Jubbaland laga masaafuriyay magaalada Kismaayo oo xarun KMG ah u ah maamulka Jubbaland.

Xildhibaan Khadiijo Kuwait ayaa maalmo ka hor ka sheegtay magaalada Muqdisho  in nafteeda ay kala soo baxday magaalada Kismaayo kadib markii dil loogu hanjabay, waxaana ay sheegtay inay ka horyimaadeen qodobo la doonayay in dastuurka laga badalo.

Waxaa kale oo xildhibaan Khadiijo ay sheegtay in beelaha qaar lagu takooro deegaanada Jubbaland, iyadoo caga jugleyn ay kala kulmaan xubnaha ku matala maamulka sare ee Jubbaland.

Guddoomiyaha Baarlamaanka Jubaland ayaa waxaa uu sheegay in dhamaan eedahaas ay yihiin waxba kama jiraan Xildhibaannada iyo xubnaha kale ee Maamulka Jubaland ay si wanaagsan u wada shaqeeyaan.

Waxaa uu meesha ka saaray in ay jiraan Beelo si gaar ah loo takooro isaga oo sidoo kale sheegay in Maamulka iyo dadka degaannada Jubaland ay si wadajir ah u shaqeeyaan.

Muqdisho (Caasimada Online) – Dowladda Soomaaliya ayaa ku dhowaaqday qorshe ay ku bilaabeyso diiwaan gelinta dhamaan ajaaniibta ku sugan dalka Soomaaliya gaar ahaan magaalada Muqdisho.

Agaasimaha Hay’adda Socdaalka iyo jinsiyadaha oo ay wehliyaan masuuliyiin ka tirsan dowladda ayaa booqday waaxaha xariirka dibadda, Qorsheynta, Howlaha iyo latalinta sharciga ee dowladda.

Agaasimaha Socdaalka iyo Jinsiyadaha ayaa la kulmay madax ka tirsan Hay’adda Qaxootiga Qaranka, waxaana ay ka wada hadleen arrimaha la xiriira qaxootiga kusoo laabanaya dalka Soomaaliya.

Dalka Soomaaliya oo ay hadda ay kusoo laabanayaan Soomaali horey dalka kaga cararay ayaa waxaa haddana ku sugan qaxooti ka yimid dalalka Yemen, Tanzania, Ethiopia iyo Syria, kuwaasi oo qaarkood si sharci ah kaga shaqeysta dalka.

Hay’adda Socdaalka iyo Jinsiyadda iyo hay’adda Qaxootiga Qaranka ayaa ku heshiiyey hab-raaca diiwangelinta ajaanibta qaxootiga ku ah dalka, iyo sidoo kale hababka soo celinta muwaadiniinta Soomaaliyeed.

Caasimada Online
Xafiiska Muqdisho
[email protected]