Muqdisho (Caasimada Online) – Kadib qaylo dhaantii ka dhalatay arrinta dhulka qabuuraha ee Iskuul Buluusiya ayaa waxaa soo kordhaya baaqyada iyo dalabaadka loo dirayo madaxweynaha iyo ra’iisul wasaaraha dalka, si wax looga qabto arrintaas iyo guud ahaan ‘adhul boobka ka socda’ magaalada Muqdisho.

Senataro Maryan Faarax Kaahiye oo kamid ah Golaha Aqalka Sare ee Soomaaliya ayaa sheegtay inay horay uga digeen dhul boobkan oo ay sheegtay inuu kusoo aaday kadib ansixintii wax ka beddelka dastuurka KMG ah.

Maryan oo ka hadashay arrinta qabuuraha Iskuul Buluusiya ayaa sheegtay in xaaladdan oo kale ay horay uga taagnayd qabuuraha Macallin Nuur, sidaas daraadeedna ay madaxweynaha iyo ra’iisul wasaaraha ka dalbaneyso in laga xishood qabuuraha.

“Maanta waxay taagan tahay in Qabuurihii laga xishoon waayo oo xitaa Alle looga baqiwaayey” ayay tiri Senator Maryan Faarah Kaahiye oo qoraal dheer soo saartay.

Hoose ka akhriso qoraalka oo dhammeystiran:-

SHALAY WAXAY AHAYD QABUURIHII REER MACALIN NUUR IYO DAB-DAMISKA

Sidaan horey uga digay, boobka dhulalka Danta Guud ayaa imaan doona kaddib ansixintii Dastuurka oo ahaa mid baalmarsan dhammaan Xeer-hoosaadyada iyo acraafta kale ee labada Gole ee JFS.

Xildhibaanno kale iyo aniguba waxaan ummadda Soomaaliyeed u caddaynay in ballanqaadyo lagu baddashay Ansixinta Dastuurka-taas oo shacabkeena sharafta leh iyo inta yar ee waddaniyaddu ku dambayso ee Labada Aqal ku jirta ay ogyihiin.

Maanta waxay taagan tahay in Qabuurihii laga xishoon waayo oo xitaa Alle looga baqiwaayey.

Waxaa nasiib darro ah in Hoggaanka sare ee dalku uu sidaa maanta raali ka noqdo;inuu raali ka noqdo soo bixinta lafaha Dad badan oo Qaranka u soo shaqeeyey oo ku aasan Iskool Bolisiya.

Waxaan xusuustaa oo sidoo kale la ii xaqiijey in halkaas lagu aasay Xildhibaanno Qaran, Saraakiil Ciidan, Diblomaasiyiin iyo dad kale oo bulshadeena magac iyo maamuus ku lahaa!

Sidaa si lamida, waxaan Xildhibaanada Labada Gole ee damiirka-dowladnimo ku dambeeyo u soo jeedinayaa in ay u istaagan daryeelka iyo difaaca shacabkeena dhibban.

DIFAACA SHARAFTA QABUURAHA & DIFAACA SHACABKEENA QAALIGA AH WAA WAAJIB MUQADAS AH.

Nairobi (Caasimada Online) – Ra’iisul Wasaaraha Soomaaliya Xamza Cabdi Barre iyo wafdi uu hoggaaminaayo ayaa gaaray magaalada Nairobi ee caasimadda dalka Kenya.

Ra’iisul Wasaaraha iyo wafdigiisa ayaa waxaa halkaasi ku soo dhaweeyay wasiirka arrimaha dibedda Kenya Musalia Mudavadi, wasiirka difaac Kenya Aadan Barre Ducaale, wasiirka arrimaha dibedda XFS Axmed Macalin Fiqi, xubno ka tirsan dowladda Kenya iyo Safiirka Soomaaliya ee kenya Jabriil Ibraahim Cabdulle.

Safarka ra’iisul wasaaraha ayaa ku qotoma adkaynta xiriirka labada dal, horumarinta iskaashiga dhinacyada ganacsiga, socdaalka, amniga gaar ahaan la-dagaalanka Khawaarijta, dalxiiska, caafimaadka, iyo waxbarashada, sida algi yiri qoraal uu soo saaray xafiiska ra’iisul wasaaraha.

Xamza ayaa inta uu joogo Kenya waxa uu la kulmi doonaa Madaxda Kenya iyo Jaaliyadda Soomaaliyeed ee ku nool Kenya, isaga oo la wadaagaya fursadaha maal-gashi ee ka jira dalka, qorshaha dowlad dhiska, la-dagaallanka Khawaarijta iyo horumarinta kaabeyaasha dhaqaalaha.

Xamza oo casuumaad rasmi ah ka helay madaxweynaha dalka Kenya William Ruto ayaa sidoo kale wada-hadallo kula yeelan doono Nairobi.

Booqashadan ayaa kusoo aadeysa, xilli Kenya ay haatan qorsheyneyso inay heshiis cusub oo la xiriira qaadka la gasho dowladda federaalka Soomaaliya, si kor loogu qaado ganacsiga.

Horay madaxweyne Xasan Sheekh Maxamuud oo booqashooyin kala duwan ugu bixiyay Nairobi ayaa heshiisyo kala duwan lasoo saxiixday dhiggiisa dalka Kenya William Ruto.

Nairobi (Caasimada Online) – Xaaladda ka taagan dalka Kenya ayaa kasii dareysa kadib roobabkii lixaadka lahaa ee ka da’ay halkaasi.

Saraakiisha ayaa ku qiyaasay in ka badan 200 oo qof in ay ku dhinteen Kenya tan iyo bishii March, iyada oo 90 kalena la la’yahay.

Kenya oo la daala dhacaysa fatahaado ay dad badan ku dhinteen ayaa geesta kale waxaa laga cabsi qabaa inay wajahdo duufaantii ugu horreysay abid, sida uu sheegay madaxweynaha dalkaasi William Ruto.

“Kenya waxaa laga yaabaa inay wajahdo duufaantii ugu horreysay abid,” ayuu madaxweyne Ruto u sheegay muwaadiniinta isagoo khudbad heer qaran ah u jeediyay dalkaasi, iyada oo xaaladda taagan ay saameysay boqollaal kun oo qof.

Ruto oo Jimcihii hadlay ayaa sheegay in aysan jirin meel kamid ah dalka oo ka badbaadiyay “bur-burka”, wuxuuna ka digay in xaaladda la filayo inay kasii darto maalmaha soo socda, iyadoo la filay cimillo aad u daran.

“Duufaantan oo lagu magacaabo Hidaaya, waxay dhici kartaa wakhti kasta, waxaana la saadaalinayaa inay sababi karto roobab mahiigaan ah, dabaylo iyo mowjado xooggan oo khatar ah kuwaasi oo laga yaabo inay carqaladeeyaan dhaq-dhaqaaqyada badda ee Badweynta Hindiya iyo deegaannada ku teedsan xeebaha Kenya,” ayuu yiri.

Waxa uu intaas kusii daray “Dalkeennu waa in uu si adag oo deg-deg ah uga jawaaaabaa saameeynta dhibaatada ka dhalan karta, lana ilaaliyaa nafta iyo hantida.”

Madaxweyne William Ruto ayaa sidoo kale amar ku bixiyay in dhammaan dugsiyada la xiro muddo aan la cayimin kadib roobabkii lixaadka lahaa ee dalkaasi ka da’ay.

Muqdisho (Caasimada Online) – Magaalada Muqdisho ee caasimada Soomaaliya waxaa maalmihii u dambeeyay ka dhacayay falal ammaan darri ah oo isugu jiro dilal, qaraxyo iyo weeraro loo adeegsanayay hoobiyeyaal kusoo dhacay xaafado ka tirsan gudaha caasimada.

Hoobiyihii u dambeeyay ayaa habeen hore kusoo dhacay guri u dhow madaxtooyada Soomaaliya, sidoo kale dilkii u dambeeyay waxaa loo gaystay Aadan Biit oo ka tirsanaa saraakiisha ciidanka Booliska Soomaaliyeed, kaas oo lagu toogtay isaga oo fadhiyay maqaayad ku taalla agagaarka Iskuul Buluusiya ee magaalada Muqdisho.

Dhammaan weeraradan ayaa dhacay, ayada oo weli dadaallo amni sugid ah ay wadaan ciidamada ammaanka oo bilo kahor ku guuleystay inay xasiliyaan amniga Muqdisho.

Haddaba maxaa ka khaldamay amniga magaalada Muqdisho?

Korneel Cabdullaahi Cali Macow oo ka tirsan Saraakiishii hore ee NISA ayaa wareysi uu siiyay Idaacadda Kulmiye uga hadlay xaaladaha soo kordhay iyo khaladaadka ka jira hay’adaha amniga ee dowladda Soomaaliya.

Sarkaalkan ayaa qiray in ay jiraan dhibaatooyin badan oo lagu hayo shacabka iyo ganacsatada, kuwaas oo qaarkood ay gaysanayaan xubno ka tirsan ciidamada, wuxuuna sheegay in arrintaas ay hoos u dhigtay taageeradii dowladda ee shacabka.

“Dadka dhibaato badan ayay ku jiraan, gaar ahaan ganacsatada waxaa dhibaato ku hayo booliska qaarkiis oo waddada u taagan, marka amni ayaan sugayaa dadweynihiina kama haysto taageero, hay’adaha amniga waxa ay luminayaan taageerada dowladda” ayuu yiri Macow.

Korneelka ayaa tusaale usoo qaatay weerarkii lagu dilay Sayid-Cali Cabdi Cadde oo ahaa sarkaal milatari ah oo dhowaan lagu dilay dagaal ciidamada ku dhexmaray degmada Boondheere ee gobolka Banaadir.

“Haddii aan tusaale usoo qaatay wiilkii sarkaalka ahaa ee lagu dilay Boondheere ciidan meesha maraayo oo baabuuro Tiknika ah wato ayaa askartii dagaalka kala timid oo bannaanka fadhiyo waa kala shakinay xabad ayaaba la’isku bilaabay, yaa u ogolaaday inay intaas oo rasaas ah ku ridaan xaafadaha?” ayuu sii raaciyay Korneelku.

Ugu dambeyn wuxuu ugu baaqay hay’adaha amniga inay dib isugu laabtaan oo ay saxaan khaladaadka ka dhex jira, si loo soo celiyo wada shaqeyntii shacabka iyo dowladda oo uu tilmaamay inay haatan meesha ka baxday.

Waxaan leeyahay hay’adaha amniga dib ha’isugu noqdaano oo marka dhibaatada lagu hayo dadka baaris halagu sameeyo” ayuu mar kale wareysiga ku yiri Korneel Macow.

Hadalkan ayaa kusoo aadayo, ayada oo haatan caasimada laga dareemayo culays amni, maadaama ay Al-Shabaab dib u billaabeem weeraradoodii, waxaana sidoo kale soo kordhay beegsi lagu hayo shirkadaha waa wayn, sida Hormuud iyo Korontada BECO.

Muqdisho (Caasimada Online) – Ra’iisul wasaaraha Soomaaliya Mudane Xamsa Cabdi Barre oo hoggaaminayo ayaa saakiisii ugu horreeyay ugu ambabaxay magaalada Nairobi ee caasimada dalka Kenya, tan iyo markii loo magacaabay xilka ra’iisul wasaaraha Soomaaliya bishii June ee sanadkii 2022-kii.

Xamza ayaa casuumaad rasmi ah ka helay madaxweynaha dalka Kenya William Ruto oo uu wadahadallo kula yeelan doono Nairobi.

Ujeedka booqashadan ayaa ah mid lagu xoojinayo xiriirka iyo iskaashiga ka dhexeeya labada dal, sida lagu sheegay qoraal kooban oo kasoo baxay xafiiska ra’iisul wasaaraha.

“Ra’iisul Wasaaraha Xukuumadda Jamhuuriyadda Federaalka Soomaaliya, Mudane Xamsa Cabdi Barre oo hoggaaminaaya wafdi ballaaran, ayaa saaka u ambabaxay Magaalada Nairobi ee Dalka Kenya, halkaas oo uu ku tagaayo booqasho rasmi ah oo la xiriirta xoojinta xiriirka iyo iskaashiga ka dhexeeya labada Dal” ayaa lagu yiri warsaxaafadeedka.

Wararka ayaa intaasi ku daraya in safarka ra’iisul wasaare Xamza uu ku saabsan yahay dib u eegis lagu sameynayo iskaashiga labada waddan oo ay ka mid yihiin amniga iyo difaaca wadajirka ah.

Booqashadan ayaa lagu sio aadiyay, xilli Kenya ay haatan qorsheyneyso inay heshiis cusub oo la xiriira qaadka la gasho dowladda federaalka Soomaaliya, si kor loogu qaado ganacsiga.

Horay madaxweyne Xasan Sheekh Maxamuud oo booqashooyin kala duwan ugu bixiyay Nairobi ayaa heshiis kala duwan lasoo saxiixday dhiggiisa dalka Kenya, William Ruto.

Muqdisho (Caasimada Online) – Safiirkii hore ee Soomaaliya u joogay dalka Senegal Maxamed Xuseen Awliyo oo baaq nabadeed ka soo saaray colaad ka taagan Galgaduud ayaa afka furtay.

Danjire Awliyo ayaa wax lala yaabo ku tilmaamay in xilligaan ay Galgaduud ku dagaalamayaan beesha uu ka dhashay ee Dir iyo beesha Mareexaan oo kala dega Caabudwaaq iyo Xeraale.

Wuxuu sheegay in reer Caabudwaaq ay ku tilmaamanyihiin wadaniyiinta ay Soomaali ku dayato, halka beesha Dir ay ku tilmaaman tahay diinta, maadaama ay ka dhasheen mashaa’ikh waaweyn oo laga ciseeyo Soomaaliya, gaar ahaan gobollada dhexe.

“Caabudwaaq waxaa ka soo jeeda dad qiimo badan oo hoggaan u soo noqday Soomaaliya oo la yaqaano wadaniyadooda, in maanta wiil yar oo reer Miyi ah uu dagaal geliyo oo dad kale u soo dilo suurtagal maaha, sidoo kale in wiilkaas uu waayo cid ceshata maba dhici karto,” ayuu yiri Amb. Awliyo.

Awliyo, ayaa sheegay in wax la isku dilo aysan maanta oolin inta u dhaxeysa Caabudwaaq iyo Xeraale, isagoo waxgaradka labada beelood ka codsaday in colaadaan ay deg deg u joojiyaan oo maleeshiyaadka kala qabtaan.

“Dhinaca kale gobollada dhexe markii la joogo Dir waxaa ka dhalatay oo lagu ciseyn jiray raacashada diinta islaamka, culimo waaweyn ayaa ka dhalatay, Fiqi Xasan, Sheekh Ibraahim, Sheekh Yuusuf Direed, diinta ayey dadka ugu tali jireen, aaway caalimiintii reer Sheekh Salaad, dadkii uu ka dhashay Yuusuf Dhegabadan, labada dhinacba waxaan ka codsanayaa nabadda inay u istaagaan,” ayuu hadalkiisa ku sii daray Awliyo.

Waxgaradka labada beelood ayuu Awliyo ugu baaqay in dhiiga daadanaya aysan sii dhowran, “walaalayaal wax la isku dilo meeshaas ma yaalaan, dhulkaan waa dayacan yahay waana idinka badan yahay ee iimaanku ha idin soo galo, diinta islaamkana ku dhaqma,” ayuu yiri.

Maxamed Xuseen Awliyo ayaa aad ugu mahadceliyey culimo ka tirsan Ahlusunna oo isku howlay joojinta colaadaas, kuwaas oo ka kala yimid, Dhuusamareeb, Caabudwaaq, Guriceel iyo Xeraale, culimadaasi oo magacyadooda uu mid mid u sheegay ayuu sheegay inay qaateen doorkoodii joojinta colaadaas.

“Walaalaha Xeraale iyo Caabudwaaq waxaan leeyahay war dalka waxa ka socda miyaadnaan ogeyn, wiilka maanta micna darada idinkaga dhimanaya, waxay aheyd in Soomaali Galbeed uu cadowga ka xoreeyo oo dhulka la qaadanayo uu difaaco,” ayuu hadalkiisa ku soo gabagabeeyo Safiir hore Awliyo.

Muqdisho (Caasimada Online) –Maxkamadda Gobolka Banaadir ayaa mudeysay dhageysiga dacwad Musuq-maasuq ah oo loo haysto masuuliyiin ka tirsanaa hay’adaha dowladda, kuwaas oo lagu soo oogay eedeymo culus oo la xiriira xatooyo xoolo dadweyne.

Warqad saddex bog ah oo ka soo baxday maxkamadda ayaa lagu sheegay in maalinta Talaadada ah ee 14-ka bishaan loo fariisanayo dhageysoga dacwadda.

12 masuul oo agaasimayaal hore u badan ayaa magacyadooda lagu cadeeyey warqadda, kuwaas oo kiis culus oo eedeymo musuq ah uu ka yaallo maxkamadda.

Agaasimayaashii hore ee hey’adda Socdaalka iyo Jinsiyadda Koofi iyo Cabdul ayaa ku jira masuuliyiinta magacyadooda lagu soo xusay warqadda maxkamadda.

Sidoo kale, Agaasimihii waaxda canshuuraha beriga Muxudiin Xasan Saabey Jurus ayaa ka mid ah masuuliyiinta magacyadooda lagu soo tixay warqadaan ee mar kale loo fariisanayo dhageysiga dacwada loo heysto.

Dacwadda loo heysto ragaan ayaa dheeraatay, waxaana xafiisyada hantidhowrma iyo xeer ilaalinta ku adkaatay inay keenaan cadeymo lagu qanco.

Dhageysigii ugu dambeeyey ee kiiskaan waxay dacwad oogayaashu muujiyeen in aysan heysan cadeymo ku filan, taas oo sii xoojisay tuhunkii laga qabay in sumcad dil un lagu sameynayo masuuliyiinta lagu soo eedeeyey musuq maasuqa.

Hoos ka akhriso warqadda.

Nairobi (Caasimada Online) – Waxaa magaalada Nairobi maalintii sedexaad ka socoda shir u dhaxeeya dowladda federaalka Soomaaliya iyo Kenya.

Shirkan oo ah midkii 3-aad ee guddiga wadajirka ah ee iskaashiga Kenya iyo Soomaaliya (Joint Commission for Cooperation) ayaa waxaa wafdiga Soomaaliya ku hogaaminaya agaasimaha Afrika wasaaradda arrimaha Dibadda iyo iskaashiga caalamiga.

Sidoo kale waxaa goobjoog ka ah Ambassador Jabriil Ibraahim Cabdulle, Safiirka Jamhuuriyadda Federaalka Soomaaliya u fadhiya dalka Kenya.

Shirkaan heerka farsamo ayaa noqon doona labo kalfadhi Kulamada qeybta gudiga wadajirka ah ee farsamo ee 3-da ilaa 5-ta May iyo kan wasiirada Isniinta 6-da May.

Shirka berri ayaa lagu wadaa inuu shir-guddoomin doono wasiirka arrimaha dibada Amb. Axmed Macallin Fiqi iyo dhigiisa Dr. Musalia Mudavadi.

Inta lagu guda jiro qaybaha dooduhu waxay diiradda saari doonaan dhinacyada horumarinta iskaashiga ganacsiga, kaabayaasha, amniga, beeraha, dalxiiska, caafimaadka, waxbarashada iyo dhaqaalaha buluugga ah.

JCC ayaa waxaa xigi doona booqashada ra’iisul wasaaraha xukuumadda federaalka Soomaaliya Xamza Cabdi Bare, sida ay shaacisay dowladda federaalka Soomaaliya.

Muqdisho (Caasimada Online) – Safaaradda Ingiriiska ee Soomaaliya ayaa shaacisay qodobo xasasi ah oo looga hadlay kulan shalay magaalada Garoowe ay ku yeesheen Safiirka Ingiriiska Danjire Michael Nithavrianakis iyo Saciid Deni.

Kulankan oo ka dhacay Qasriga Madaxtooyada Puntland ee Garoowe ayaa waxa uu sheegtay safaaraddu in looga hadlay khilaafka siyaasadeed ee u dhaxeeya mdaxweyne Xasan Sheekh iyo Saciid Deni, kaasi oo hadda maraya meel xasaasi ah.

Safiirka ayaa Deni ku booriyay muhiimada ay leedahay in la wada-hadlo, xilli ay wakiilada caalamiga ah ay ku cadaadinayaan labada dhinac inay iskugu yimaadan miiska wada-hadalka, si xal looga gaaro xiisadda taagan.

Hoos ka aqriso saddex qodob oo uu Ingiriiska sheegay in kulankaan looga hadlay;

1. Iskaashiga ama wada shaqeynta Puntland iyo UK, sidii kor loogu qaadi lahaa, iyada oo ay PL horey u dalabtay in si gaar ah ay ula macaamisho beesha caalamka.

2. Muhiimada ay leedahay in laga wada hadlo arrimaha muhiimka ah ee khilaafku kataagan yahay, gaar ahaana dibu eegista dastuurka DFS, oo ay Puntland diidan tahay nidaamka ay u martay madaxtooyada Soomaaliya, xili wakiilada caalamiga ah ee loo yaqaano C6+ oo ay UK ka mid tahay, ay ku cadaadinayaan labada dhinac in ay wada hadal siyaasadeed yeeshaan.

3. Sida ay UK gacan uga geysan karto kobaca dhaqaalaha ee mandiqada Puntland, tan waxay qeyb ka ahayd dalabka PL ee ah in mashaariicaha horumarinta gaar dhankooda loo siiyo, xili uusan xariir kala dhaxeynin DFS.

Geedi-socodka dowladnimada iyo nidaamka federaalka Soomaaliya oo kaalin weyn ku laheyd Puntland sida la ogyahay ayaa u muuqda in uu ku laabtay halkii uu marayay 2007-dii, xiligaas oo ahayd markii u horeysay oo Puntland xiriirka u jartay dowladda dhexe.

Muqdisho (Caasimada Online) – Sayid-Cali Macallin Daa’uud oo loo haysto inuu gubay xaaskiisii Luul Cabdicasiis Maxamed ayaa mar kale maanta kasoo muuqday maxkamadda racfaanka gobolka Banaadir oo fadhigii labaad maanta ka yeelatay kiiskan xasaasiga ah.

Sayid-Cali oo su’aallo lagu waydiiyay maxkamadda ayaa ka jawaabay arrimo xasaasi ah oo wax laga waydiiyay, kuna saabsan kiiskan oo ay isha ku wada hayaan dadka Soomaaliyeed.

Ninkan ayaa qirtay inuu shidaal soo iibsaday, isla markaana dabka uu qabad-siiyay guriga, isaga oo sheegay in ujeedkiisa uu ahaa inuu gubo alaabta taalay guriga.

Sidoo kale wuxuu intaasi ku daray inuu isku dayay in xaaskiisa oo gubaneysay uu bad-baadiyo, isagana ay waxyeelo kasoo gaartay dhegaha iyo gacan, sida uu ka hor sheegay maxkamadda.

Waxaa kale oo uu ku dooday in falka kadib dad badan ay kusoo xoomeen, kadibna ay ugu hanjabeen inay dilayaan, isaguna uu sidaas ugu cararay gaarigiisa, uuna aaday suuqa Xoolaha, kadibna uu usii cararay gobollada dhexe ee dalka oo ah goobta laga soo qabtay

“Aniga dad badan ayaa igu soo cararay oo iigu hanjabay inay i dilayaan, anne sidaas ayaa uga baxsaday guriga, maadaama ay xaafadda dagan yihiin qoyska xaaskeyga” ayuu yiri.

Dhinaca kale waxaa maxkamadda kasoo muuqday marqaatiyeyaal cusub, sida gabar kamid ah dariska iyo Dr Ciise oo ah dhaqtarkii u horreeyay ee loo geeyay marxuumadda.

Faadumo Abuukar oo kamid ah dariska marxuumadda ayaa ka hor hadashay maxkamadda, waxayna sheegtay inay aragtay Luul oo gubaneyso, isla markaana Ashahaadaneyso.

“Albaabka waxaa taagnayd marxuumad Luul oo Ashahaadeynao, isla markaana gubaneyso, waxayna dalbaneysay caawinaad” ayay tiri Marqaati Faadumo.

Sidoo kale waxa ay sii raacisay “Aniga waxay igu tiri eedo i caawi, kadibna sidaas ayaan ku qaadnay aniga iyo dad kale, waxayna igu tiri intii aan sii wadnay lmaheyga waa Agoon, haddana ma rajoobi doonaan?”

Waxaa gabagabadii soo xiray fadhigan guddoomiyaha maxkamadda racfaanka oo sheegay in doodda ay sii socon doono fadhiga kalena lagu go’aamin doono dhageysiga dacwaddan.

Horay waxaa Sayid-Cali xukun dil toogasho ugu soo xukuntay maxkamadda darajada 1-aad ee gobolka Banaadir, kadib markii ay sheegtay in lagu helay dambiga lagu soo eedeeyay.

Si kastaba, haddii mar kale Sayidcali ay maxkamadaani ku xukunto dil toogasho ah, waxaa u furan inuu mar kale qaato racfaan oo kiiskaan uu u gudbo maxkamadda sare ee dalka.

Muqdisho (Caasimada Online) – Dowladaha Soomaaliya iyo Turkiga ayaa mar kale yeeshay wada-hadallo xasaasi ah oo ku saabsan xiriirka iyo iskaashiga labada dal.

Wada-hadalladan ayaa waxaa si gaar ah u yeeshay ra’iisul wasaare ku xigeenka dalka, Saalax Axmed Jaamac iyo Wasiirka Arrimaha Dibadda Turkiga, Hakan Fidan oo isku arkay caasimada dalka Gambia ee Banjul, halkaa soo uu ka socdo shirka waddamada Islaamka.

Labada ma’suul ayaa ka wada-hadlay arrimo ku aadan xaaladda iyo xiriirka labada dhinac oo ah sii xoogeysanayay sanadihii lasoo dhaafay.

Warsaxaafadeed kasoo baxay dowladda Soomaaliya oo looga hadlay kulankan ayaa waxaa lagu sheegay in labada dhinac ay isku fahmeen xoojinta qodobadii ay kawada hadleen.

Saalax iyo Fidan ayaa sidoo kale ku ballamay in la xoojiyo in la xoojiyo Iskaashiga Amniga, Dhaqaalaha, Ganacsiga iyo  Waxbarashada oo ay iska kaashanayeen labada dowladood.

Tallaabadan ayaa qayb ka ah horumarinta iskaashiga ka dhexeeya labada waddan oo soo billowday  sanadkii 2011kii oo xiligaas Turkigu uu dalka kusoo galay caawinta dadkii abaartu saamaynta taban ku reebtay.

Kulankan wuxuu kusoo aaday, xilli todobaadyadii lasoo dhaafay ay labada dowladda galeen heshiisyo muhiim ah oo ugu horreeyo kan difaaca biyaha Soomaaliya.

Turkiga ayaa ah saaxibka koowaad ee Soomaaliya, wuxuuna sidoo kale ka qayb qaataa dhismaha ciidamada Xoogga dalka Soomaaliyeed ee la dagaalama Al-Shabaab.

Muqdisho (Caasimada Online) – Ra’iisul Wasaaraha Xukuumadda Jamhuuriyadda Federaalka Soomaaliya Xamza Cabdi Barre ayaa maanta furay kulan looga hadlayey horumarinta iyo kobcinta dhaqaalaha dalka.

Ra’iisul Wasaaraha ayaa furitaanka kulanka ka sheegay dadaallada dowladda federaalka ee ku aaddan horumarinta dhaqaalaha loo dhan yahay oo xasilloon, xilli daba-yaqaada sanadkii tegay laga cafiyay Soomaaliya dhamaan deymihii lagu lahaa.

Kulanka aqoon isweydaarsiga ah oo ay goobjoog ka yihiin wasaaradaha wax-soosaarka dalka ayaa inta uu socdo waxa ay khubaro caalami ah oo ku xeel-dheer dhaqaalaha oo uu kamid yahay Proff Stefan Dercon, oo ah khabiir dhaqaale iyo bare wax ka dhiga Jaamacadda OXFORD ee dalka Ingiriiska kusoo bandhigayaa jihada lagu gaari karo dhaqaale oo horumarsan, kana tarjumaya yoolalka mustaqbalka lagu gaarayo isku filnansho dhaqaale.

Ra’iisul Wasaare Xamza ayaa waxa kale oo uu tilmaamay sida ay Soomaaliya uga faa’iideysan karto goobteeda istiraatiijiga ah, dadkeeda hal-abuurka leh iyo xiriirada dhaqaale ee gobolka.

Sidoo kale waxa uu hoosta ka xariiqay sida ay muhiim u tahay in si wadajir ah loo shaqeeyo, si loo horumariyo qorshaha kobcinta dhaqaalaha iyo in laga faa’iideysto fursadaha jira.

Mudane Xamza ayaa kulanka ka sheegay muhiimadda ay leedahay in qorshaha horumarinta qaranka dib-u-casriyeyn lagu sameeyo, loona gudbo qorshe qaran oo cusub oo loogu magac daray NTP, kaasi oo diiradda saarayaa abuurista siyaasado iyo istiraatiijiyado dhaqaale oo taageeraya kobcinta dhaqaalaha, shaqo abuurka iyo xoojinta xasilloonida dhaqaale.

Muqdisho (Caasimada Online) – Ra’iisul wasaaraha Soomaaliya, Mudane Xamza Cabdi Barre ayaa maanta xafiiskiisa ku qaabilay danjiraha dalka Isu Tegga Imaaraadka Carabta, Axmed Juma Al Rumaithi oo fadhigiisu yahay magaalada caasimada ah ee Muqdisho.

Kulankan oo ah mid xasaasi ah ayaa waxaa looga hadlay xoojinta xiriirka iyo iskaashiga ka dhaxeeya labada dal, sida lagu sheegay qoraal kasoo baxay xafiiska ra’iisul wasaaraha.

“Ra’iisul Wasaaraha Xukuumadda Jamhuuriyadda Federaalka Soomaaliya, Mudane  Xamsa Cabdi Barre, ayaa maanta xafiiskiisa ku qaabiley Danjiraha Dowladda Isu-tagga Imaaraadka Carabta u fadhiya Soomaaliya, Mudane Axmed Juma Al Rumaithi, iyaga oo ka wada hadlay xoojinta xiriirka iyo iskaashiga soo jireenka ah ee ka dhaxeeya labada dal” ayaa lagu yiri qoraal kooban oo kasoo baxay xafiiska ra’iisul wasaaraha Soomaaliya.

Sidoo kale waxaa kulankan lagu soo qaaday xaaladda gobolka, oo ay ka jiraan dhaq-dhaqaaqyo culus oo ay ugu horreyso xiisadda heshiiska badda ee Somaliland iyo Itoobiya.

Imaaraadka ayaa kamid ah waddamada Carbeed ee xiriirka wanaagsan laleh Soomaaliya, kaas oo ka taageero dhinacyada dhaqaalaha, milatariga iyo arrimaha bani’aadanimada.

Waxaa kale oo uu Imaaraadka gacanta ku hayaa qayb kamid ah ciidanka Soomaaliya, kuwaas oo uu siiyo tababaro gaar ah iyo qalab milatariga.

Wada-hadalladan cusub ee dhex-maray Soomaaliya iyo Imaaraadka ayaa kusoo aadayo, ayada oo dhowaan dowladda federaalka ay heshiis difaac lasoo gashay Turkiga, kaas oo la rumeysan yahay inuu ka soo horjeedo Imaaraadka oo isna dhaq-dhaqaaq ka wada dalka.