Muqdisho (Caasimada Online) – Hay’adda xuquuqda aadanaha u dooda ee Amnesty International ayaa sheegtay in duqeymo is-dabajoog ah oo ay fuliyeen militariga Soomaaliya oo adeegsanaya diyaaradaha aan duuliyaha lahayn ee Turkiga, lagu dilay 23 qof oo rayid ah.

Dadka lagu dilay duqeymahaas waxay Amnesty sheegtay inay ku jiraan 14 carruur ah, waxayna duqeyntaasi dhacday bishii Maarso, iyadoo ku baaqday in baaritaan lagu sameeyo “dambiyo dagaal.”

Sida ay sheegtay Amnesty, duqeymahan oo dhacay 18-kii bishii Maarso ayaa lagu weeraray beer ku taal agagaarka tuulada Baqdaad ee koonfurta gobolka Shabeellaha Hoose, waxaana ku dhintay ku dhawaad 23 qof, ayada oo ku dhaawacmeen 17 kale oo caruur u badan.

Hay’adda Amensty International ayaa sheegtay in dadka deegaanka ay u sheegeen in “weerarada ay fuliyeen diyaaradaha aan duuliyaha lahayn ay daba socdeen dagaal culus oo dhanka dhulka ah” oo u dhexeeyay al-Shabaab iyo ciidamada ammaanka Soomaaliya.

Amnesty ayaa wareystay 12 qof oo ay ku jiraan dhibanayaal, qaraabadooda iyo goobjoogayaal, waxayna hay’addu eegtay oo falanqeysay sawirada dayax gacmeedka iyo sawirada jajabyada hubka si loo ogaado isticmaalka bambooyinka ay soo saarto Turkey iyo diyaaradaha aan duuliyaha lahayn ee Bayraktar TB2.

Dowladda Soomaaliya ayaa sheegtay in howlgal lagu beegsaday Al-Shabaab ay ka fuliyeen isla deegaanka tuullada Baqdaad ee gobolka Shabeellaha Hoose, balse ma aysan sheegin dad rayid ah oo ku dhintay.

“In ka badan 30 (maleeshiyaad ah) ayaa lagu dilay howlgal ay si wadajir ah u fuliyeen ciidamada qalabka sida ee Soomaaliya iyo saaxiibada caalamiga ah,” ayaa lagu yiri bayaan kasoo baxay wasaaradda warfaafinta 19-kii Maarso.

Dowaldda Soomaaliya ayaa sheegtay in 24 ka mid ah al-Shabaab lagu dilay howlgalka ka dhacay deegaanka Baldooska, halka 15 kale lagu dilay duqeyn cirka ah oo ka dhacday Baqdaad.

Amnesty ayaa sheegtay in ay ka codsatay dowladda Soomaaliya iyo Turkiga in faah faahin dheeri ah laga bixiyo balse aysan wax jawaab ah ka helin.

Soomaaliya iyo Turkey ayaa bishii February ee sanadkan kala saxiixday heshiiska difaaca badda, wuxuuna Turkigu cadeeyey in Soomaaliya uu diyaar u yahay inuu ka difaaco khatar kasta oo soo wajahda.

Muqdisho (Caasimada Online) – Dowladda federaalka Soomaaliya oo raadineyo xilka guddoomiyaha guddiga Midowga Afrika ee 2025-2028 ayaa haatan taageero wayn ka heshay ku dhowaad 30 dal oo Afrikaan ah, sida uu shaaciyay, wasiirka arrimaha dibadda Soomaaliya Axmed Macallin Fiqi oo ka hadlay dadaalka dowladda ee kursigaasi.

Kursigan ayaa waxaa Soomaaliya ugu sharraxan Fowsiya Yuusuf Xaaji Aadan oo xilal kala duwan kasoo qabtay dalka, taas oo haatan wadda ololaheeda ku aadan kursigaasi.

Fiqi ayaa tilmaamay in Ururka Iskaashiga Islaamka (OIC) oo ay ku jiraan dhowaad 30 dal oo Afrikaan ah ay taageerayaan musharraxnimada Fowsiya Yuusuf Xaaji oo metaleysa Soomaaliya.

Sidoo kale waxa uu intaasi ku daray in arrintan ay guul weyn ay u tahay Soomaaliya oo dadaal xoogleh gelineyso kursigan oo ay kula tartami doonto Kenya.

Wasiirka ayaa sidoo kale u mahadceliyay waddamada ballan-qaadka codka ah u sameeyay Soomaaliya ee kamid a Ururka OIC oo xubin buuxda ka tahay dowladda federaalka.

“Soomaaliya waxay aad uga mahad-celineysaa taageerada Ururka Iskaashiga Islaamka (OIC), oo ay ku jiraan ku dhawaad 30 xubnood oo ka socda Afrika, sida ay u garteen oo ay u taageereen magacaabista Soomaaliya ee Fowsiya Yusuf Aadan oo ah musharaxa Soomaaliya ee Guddoomiyaha Midowga Afrika ee 2025-2028.” ayaa yiri wasiir Fiqi.

Tartanka adag Fowsiya waxay la geli doontaa hogaamiyaha mucaaradka Kenya Raila Odinga oo u ololeynayay inuu noqdo musharraxa dalalka Bariga iyo Bartamaha ee EAC ay taageerto.

Fowsiya waxay noqon doontaa marka ay guuleysato haweeneydii labaad oo madax ka noqoto Midowga Afrika, kadib Nkosazana Dlamini-Zuma ee Koonfur Afrika.

Sida ku cad xeerarka wareegtada ee la sameeyay sanadkii 2018, gobolka Bariga Afrika waa inuu noqdaa kan ku xiga ee soo saaraya Guddoomiyaha AUC. Laakiin xeerarka doorashada ayaa ogolaanaya in tiro badan oo musharraxiin ah ay ka yimaadaan gobolka, taasoo sii hurinaysa tartan degdeg ah oo loogu jiro doorashada sanadka soo socda ee Febraayo.

Nairobi (Caasimada Online) – Ra’iisul wasaaraha xukuumadda federaalka Soomaaliya, Mudane Xamza Cabdi Barre oo weli ku sugan magaalada Nairobi ayaa kulamo xasaasi ah ka wada magaaladaais, kuwaas oo uu la qaadanayo madaxda sare ee dowladda Kenya.

Xamza ayaa maanta kulan gaar ah la yeeshay Madaxweyne ku-xigeenka Kenya Rigathi Gachagua oo soo dhaweyn ugu sameeyay xarunta madaxtooyada ee dalkaasi.

Labada mas’uul ayaa ka wada-hadlay xoojinta xiriirka iyo iskaashiga ee labada dal, sida lagu sheegay qoraalka kooban oo kasoo baxay xafiiska ra’iisul wasaaraha Soomaaliya.

“Ra’iisul Wasaaraha xukuumadda federaalka Soomaaliya mudane Xamsa Cabdi Barre ayaa kulan muhiim ah la qaatay Madaxweyne ku-xigeenka Kenya Rigathi Gachagua ,kaa oo ay uga wada hadleen xoojinta xiriirka iyo iskaashiga ee labada Dal” ayaa lagu yiri qoraalka.

Kulankan waxaa ka horreeyay mid kale oo laba geesood ah oo ay yeesheen wafdiga uu hoggaaminayo ra’iisul wasaare Xamza iyo dowladda Kenya, kaas oo xoogga lagu saaray xiriirka taariikhiga ah iyo walaaltinimada ka dhexeysa labada dal, iskaashiga gobolka ee ku aaddan xasilloonida iyo horumarka, iyo sida Soomaaliya uga go’an tahay in ay kaalin firfircoon ka qaadato isku xirnaanta Bariga Afrika.

Kulankan ayaa ahaa mid daba-socday heshiisyadii ay shalay wada gaareen labada dal ee ay saxiixeen wasiirada arrimaha dibadda iyo waxbarashada Soomaaliya.

Ra’iisul wasaaraha oo madasha ka hadlay wuxuu adkeeyay sida wadahadallada labada geesoodka ah ee (JCC) ay u yihiin saldhig wanaagsan oo lagu sii xoojin karo xiriirka labada dal, isagoo rajo wanaagsan ka muujiyay horumarka wadahadallada iyo heshiisyada la gaarayo.

Sidoo kale wuu ka hadlay saameynta taban ee isbeddelka cimilada oo labada dalba saameeyay, isagoo xusay muhiimadda iskaashiga cimilada iyo ilaalinta deegaanka.

Soomaaliya iyo Kenya ayaa horay u qaaday tallaabooyin dheeraad ah oo lagu xoojinayo xiriirkooda, waxaana ugu muhiimsan iskaashiga ganacsiga oo uu ugu horreeyo Qaadka.

Muqdisho (Caasimada Online) – Dowladda federaalka Soomaaliya ayaa maanta baahisay muuqaalka diyaarad si toos u duqeneyso maleeshiyaad ka tirsan Al-Shabaab oo ku sugan tuulada Furuqley oo hoostegta degmada Qoryooley ee gobolka Shabeelaha Hoose.

Duqeyntan oo ay iska kaashadeen Ciidanka Nabad-sugidda Soomaaliya iyo Saaxibada Caalamiga ah ayaa lagu beegsaday Geed wayn oo ku yaalla tuulada, isla markaana ay isbaaro u taalay xubnaha kooxda Al-Shabaab, halkaas oo ku qaadayeen lacago.

Muuqaal ay duubtay diyaaradda oo haatan la baahiyay ayaa waxaa la arki karaa xubnaha oo geedka isku qarinaya, kadibna ay gantaallo ku dhufaneyso diyaaradda.

Sidoo kale waxaa kasoo muuqday shacab soo baxay oo ku sugan tuulada uu weerarka ka dhacay, kuwaas oo ay diyaaraddu aysan beegsan, maadaama bartilmaameedka kaliya uu ahaa kooxda Al-Shabaab oo halkaas ku noqday dhimasho iyo dhaawac.

Inta uu howlgalkan socday waxaa sidoo kale kaamirada ay soo qabatay baabuur gurmad ku yimid meesha iyo xubno kale oo Shabaab ah oo duqeyn labaad lala beegsaday.

Ujeedka kooxdan dambe ayaa ahaa inay goobta ka daabulaan maydadka iyo dhaawac, balse waxaa haleeshay duqeyntii labaad, sida laga dheehan karo muuqaalka.

Inta badan diyaaradaha dagaalka ee hawada ka taageero ciidamada Xoogga dalka Soomaaliyeed ayaa weeraro duqeymo ah la eegtay xubnaha Al-Shabaab ee ku sugan jiidaha hore ee dagaalka, waxaana badanaa ka dhashay khasaare dhimasho iyo dhaawac.

Baydhaba (Caasimada Online) – Dowladda federaalka Soomaaliya ayaa maanta qaaday tallaabo culus oo la xiriirta Al-Shabaab-ka ku sugan Koonfur Galbeed, si looga xoreeyo deegaanada maamulkaasi oo ay haatan ku xoogan yihiin.

Wafdi saraakiil ah oo uu hoggaaminayo Taliyaha ciidanka dhulka xoogga dalka Soomaaliyeed Gen Dayax Cabdi Cabdulle ayaa maanta dowladdu waxa ay u dirtay magaalada Baydhaba, halkaas oo si wayn loogu soo dhaweeyay.

Soo dhaweynta waxaa ka qayb qaatay taliyaha qaybta 60-aad Janaraal Xasan Isaaq Cumar (Xasan Baydhaba) iyo saraakiisha hoggaamineysa howlgallada ka socda halkaasi, waxaana ugu horreyntii uu salaan shafaf ka qaatay ciidamada Xoogga dalka, qaybtooda ku sugan magaalada Baydhaba

Ujeedka Taliyaha ciidanka dhulka Gen Dayax Cabdi Cabdulle uu u gaaray taliska qayb 60aad ayaa ah sidii loo sii xoojin lahaa howlgalada ka dhanka ah khaawaarijta ee ka socda deegaanada koofurgalbeed, isagoo saraakiisha taliska faray in loo dhimriyo shacabka ku nool deegaanada laga xoreeyey Khawarijta.

Taliye Dayax ayaa la filayaa inuu kormeero xeryaha ciidamada, sidoo kalena uu tego jiidaha hore ee dagaalka, si uu u dhiirogeliyo ciidamada Xoogga iyo kuwa deegaanka ee la dagaalamaya Al-Shabaab.

Qorshaha ugu wayn ee dowladda dhexe ayaa ahaa sidii loo bilaabi lahaa gulufka dagaalka ku wajahan Al-Shabaab ee gobollada Shabeelaha Hoose, Baay iyo Bakool oo wajagii koowaad laga gaabiyay.

Al-Shabaab ayaa saddexdan gobol ku xoogan, waxayna ka haystaan degmooyin waa wayn oo ay ku leeyihiin saldhigyo iyo xarumo muhiim ah.

Si kastaba, wajigii koowaad ee dagaalka oo lagu bilaabay HirShabelle iyo Galmudug ayaa laga soo hooyay guullo waa wayn, waxaana lagu xoreeyay dhul aad u ballaaran.

Muqdisho (Caasimada Online) – Xogo hoose oo soo baxaya ayaa sheegaya in laga guurayo dhulka Dabdamiska ee ciidanka booliska Soomaaliyeed ee ku dhow daarta Seybiyaan, kadib markii uu go’aankaas ku adkeystay madaxweyne Xasan Sheekh.

Sida ay Caasimada Online u xaqiijiyeen ilo xog ogaal ah, guddi ay soo wakiisheen dadka degan dhulka dabdemiska iyo Madaxweynaha Galmudug Axmed Qoor Qoor ayaa u tegay madaxweyne xasan Sheekh.

Wadahadal dheer kadib, waxaa la sheegay in Madaxweyne Xasan Sheekh uu guddigii iyo madaxweynaha Galmudug ku qanciyey in dhulkaas laga guuro, si looga hir-geliyo shaqadii dabdemiska ee ciidanka booliska Soomaaliyeed.

Madaxweyne Xasan ayaa sheegay in guddiga uu ka balan qaaday in dhul ku filan qoysaska laga kicinayo dabdemiska ay dowladdu sii doonto, iyadoo waliba loogu darayo boosas dheeraad ah oo laga hirgelinayo goobo danguud ah.

Masaajid, isbitaalo, goobo waxbarasho iyo wadooyin ayuu sheegay Madaxweynuhu in dhulka la siinayo loogu dari doono qoysaska laga rarayo dhulka dabdemiska ee daarta Seybiyaano.

Guddiga iyo madaxweyne Qoor Qoor ayaa la sheegay inay ku qanceen qorshaha uu Madaxweyne Xasan Sheekh u soo bandhigay ee looga rarayo dhulka dabdemiska, isla markaana lagu dejinayo dhul cusub.

Qoysaska degan dhulkaan ayaa u badan beesha Habargidir, waxayna horay u sheegeen inay dagaalamayaan, hadii la isku dayo in xoog looga kiciyo dhulkooda, balse dowladda, gaar ahaan taliska booliska oo iska dhega-tiraya hanjabaada dadkaas ayaa 3 jeer digniin u diray, kuna amray inay ka guuraan dhulka Dabdemiska.

Hadda, waxaa la sheegay in xiisadu qabowday oo dowladdu keentay xal ka duwan kii ay dadkaani ka caroodeen, maadaama ay ku doodayeen “30 sano ayaan deganeyn halkaan ee hadii aan ka guurno halkaan deegaansanaa?” su’aashaas ayaa noqotay mid la dhaafi waayey dowladana ka hor istaagtay inay awood adeegsato, balse hadda waxaa la sheegay in deegaan cusub loo balan qaaday dadka degan dhulka dabdemiska.

Muqdisho (Caasimada Online)  – Magaalada Muqdisho ee caasimada Soomaaliya waxaa maanta ka furmay shirweyne xasaasi ah oo ku saabsan maareynta hubka rasaasta iyo walxaha qarxo,kaas oo socon doono muddo labo maalin ah.

Shirkan ayaa waxaa daah-furay wasiir ku xigeenka wasaaradda gaashaandhigga Mudane Cabdifitaax Qaasim, kaas oo sheegay in shirkan uu kusoo aaday xilli muhiim ah, maadaama Soomaaliya laga qaaday cunaqabateyntii hubka, ayna ku jirto dagaal culus.

Shirkaan waxaa ka qayb galaya mas’uulyiin ka socda dowladda federaalka, dowlad goboledyada iyo xubno ka socda beesha caalamka, kuwaas oo wax ku biirin doono maareynta hubka ee Soomaaliya, maadaama la filayo in dowladdu soo iibsato hubka culus.

Cabdifitaax Qaasim oo furitaanka shirka khudbad ka jeediyay ayaa sheegay in farxad ay u tahay furitaanka shirkan oo looga hadlayo arrimo ku saabsan hubka Soomaaliya.

“Farxad wayn ayay innoo tahay inaan daaha ka rogno oo aan furno shirweynaha qaran ee lagu maareynayo hubka, rasaasta iyo walxaha qarxa” ayuu yuru wasiir ku xigeenku.

Sidoo kale wuxuu rajo wanaagsan ka muujiyay inay qodobo wanaagsan kasoo bixi doonaan, kuwaas oo waxtar u noqon doono dowladda Soomaaliyeed.

Dhinaca kale wuxuu u mahadceliyay dowladaha ka qayb qaatay qaadisyta cunaqabateynta hubka oo ay kamid yihiin Mareykanka, Uk, Jarmalka, Turkiga iyo Ururka Midowga Yurub.

“Anigga oo ku hadlayo magaca dowladda Soomaaliyeed waxaan u mahadcelinayaa intii ka qayb qaadatay in la qaado cunaqabateyntii hubka ee muddada saarnayd Soomaaliya, waxaan rajeynayaaa in shirkan uu kasoo baxo miro-dhal fiican” ayuu sii raaciyay Qaasim.

Waa shirkii uga weynaa ee la qabto tan iyo intii Soomaaliya laga qaaday Cuna-qabateynta hubka horaantii bishii December ee sanadkii hore 2023-kii.

Garoowe (Caasimada Online) – Taliyaha Guud ciidamada difaaca Puntland General Aadan Cabdi Xaashi ayaa safar shaqo ku tegay magaaladda Qardho ee xarunta gobolka Karkaar, waxa uuna booqday Dugsigga Tababarada Ciidamadda ee Xorgoble.

Taliyaha ayaa waxaa ugu horeyn halkaas kusoo dhaweeyay taliyaha dugsiga Xorgoble G/dhexe Burhaan Axmed (Caanood) iyo maamulka iyo macalimiinta dugsigga, waxay uga warameen xaalada dugsigga, marxaladihii uu soo maray iyo hawlaha shaqo ee hadda ka socda.

General Aadan ayaa sidoo kale wuxuu soo kormeeray dhamaan qaybaha uu ka kooban-yahay dugsigga, waxa uuna intaas kadib si gaar ah ula kulmay taliyaha dugsigga G/dhex Burhaan Caanood iyo hawl-wadeenada kale.

Taliyaha ayaa ugu dambeyntiina waxa uu taliye Burhaan, maamulka iyo macalimiinta uga mahad-naqay shaqa-wanaaga ee ay soo qabteen 5-tii sanno ee lasoo dhaafay, isaggoona kula dardaarmay inay u diyaar-gaaroobaan shaqooyinka kale ee qorshaysan ee ay ugu horeeyaan horumarinta xirfada iyo aqoonta ciidamadda Puntland iyo tababarkooda.

Kormeerka taliyaha ayaa qayb ka ah kormeero iyo dib-uu-habeen lagu sameenayo ciidanka Daraawiishta , ayada oo laga duulayo siyaasadda ah helidda ciiddamo tirakooban oo tayeeysan, si lo dar-dar galiyo howlgaladda amni iyo shaqadda socota .

General Aadan ayaa maalmihii dambe kormeer ku tageyay xeryaha ciidamada difaaca Puntland ee gobolada maamulkaasi, ayada oo heegan buuxa la galiyay ciidanka, ayada oo taliyaha uu askarta u sheegay inay u diyaar garooban wax uu ku sheegay “shaqooyin qorsheysan”.

Nairobi (Caasimada Online) – Dowladaha Kenya iyo Soomaaliya ayaa shalay magaalada Nairobi ku kala saxiixday heshiisyo ay ka mid yihiin iskaahsiga difaaca, amniga, iyo ganacsiga.

Heshiisyadaan ayaa daba socda booqashadii uu shalay Nairobi ku tegay Ra’iisul Wasaaraha Soomaaliya Xamza Cabdi Barre, waxaana faahfaahin ka bixiyey wasiirka arrimaha dibadda Soomaaliya Axmed Macalin Fiqi.

Wasiir Fiqi oo la hadlay Idaacadda VOA wuxuu ka mid ahaa wasiirradii wax ka saxiixay heshiisyada lagu gaaray Nairobi, wuxuuna bulshada Soomaaliyeed faahfaahin ka siiyey qodobada ay saxiixeen.

Heshiiskaan ayaa dhacay saddex shir kadib, waxaana heshiisyada la galay ay kala quseeyaan, qeybna ka ahaa dhinacyadii saxiixay wasaaradaha, Gaashaandhigga, Ganacsiga, Waxbarashada, Amniga, Gaadiidka iyo Duulista Hawada, Kalluumeysiga iyo Arrimaha Dibadda.

“Arrimaha dibadda waxaa lagu heshiiyey in dalba dalka kale uu garab ka siiyo caqabadihii soo wajaha, dhanka gaashaandhigga iyo amniga waxaa diiradda la saaray fududeynta isku socodka bulshada iyo la dagaalanka argagixisada, waxaana la magacaabay labo guddi oo loo xil-saaray inay ka soo shaqeeyaan arrimahaas,” ayuu yiri Wasiir Fiqi.

Sidoo kale Fiqi ayaa sheegay in bisha 6-aad uu soo dhamaanayo shaqada guddiga loo xil-saaray iskaashiga gaashaandhigga, halka guddiyada loo xil-saaray isku socodka dadka, sida amniga iyo fududeynta safarrada dhulka ah iyo Fiisaha ay soca doonaan ilaa bisha October.

Wasiirka Arrimaha Dibedda ee Soomaaliya Mudane Axmed Macallin Fiqi ayaa Sooaamliya u saxiixay heshiiskan, halka uu Kenya u saxiixay Wasiirka Arrimaha Dibedda Mudane Musalia Mudavadi, heshiisyadan Is-afgarad ee ay gaareen labada dal, ayaa kor loogu qaadayaa xiriirka iskaashi iyo wax wada qabsiga ka dhaxeeya Soomaaliya iyo Kenya.

Sidoo kale, Wasiirka Waxbarashada, Hiddaha iyo Tacliinta Sare, Mudane Faarax Sheekh Cabdulqaadir iyo Wasiirka Waxbarashada Kenya Mudane Ezekiel Machogu, ayaa kala saxiixday Heshiiska Is-afgaradka oo ku saabsan Iskaashiga Waxbarashada, Tababarka iyo Cilmi-baarista, kaas oo kor loogu qaadayo xoojinta iskaashiga dhinaca waxbarashada ee labada dal.

Heshiisyadan ayaa qeyb ka ah Socdaalka Ra’iisul Wasaaraha Xukuumadda Jamhuuriyadda Federaalka Soomaaliya Mudane Xamsa Cabdi Barre, uu ku joogo dalka Kenya ee la xiriira adkaynta xiriirka labada dal, horumarinta iskaashiga dhinacyada badan leh.

Hoos ka dhageyso wareysiga wasiirka

Muqdisho (Caasimada Online) – Dowladda federaalka Soomaaliya ayaa soo saartay digniino la xiriira fatahaado horleh oo laga cabsi qabo, kuwaasi oo la filayo in ay dhacaan asbuucan.

Hay’adda Maareynta Musiibooyinka Qaranka Soomaaliyed ee SODMA ayaa ugu baaqday shacabka Soomaaliyeed in ay taxadaraan oo ay feejignadaan, si gaar ah shacabka ku nool gobollada Bay, Bakool, Galgaduud, Gedo iyo Jubbada Hoose.

SODMA ayaa sheegtay inay aad u sareyso suurta-galnimada in tobanka cisho ee soo socoto ay dhacaan fatahaado isugu jira kuwo ka yimaadda wabiyada iyo togaga soo rogmada.

Waxay si weyn u saameyn doonaan degmooyin ay kamid yihiin; Doolow, Luuq, Bu’aale, Jilib, Beledweyne, Bula-burde, Jalalaqsi, Mahaday, Jowhar, Balcad iyo qaar kale oo webiga uusan marin, sida ay shaacisay hay’adda SODMA.

“Degmooyin ka mid ah gobolada: Bay, Bakool, Gedo, Galgaduud, Mudug, Togdheer, Sool, Nugaal iyo Bari ayaa waxaa aad u sareeysa suurtagalnimada ah in ay fatahaado ka dhacaa ay saameeyn doonaan nolosha iyo hab-nololeedka bulshooyinka ku nool degmooyinkaas,” ayaa lagu yiri digniintan.

Hoos ka aqriso digniinta kasoo baxday SODMA

Digniin iyo tala-bixin ku aadan fatahaaddo la filayo in ay dhacaan tobanka casho ee soo socda (07 – 16 May 2024).

➤ Tobanka casho ee soo socota ee 07-da illaa 16-ka bisha May 2024-ka waxaa aad u sareeya suurta-galnimada in ay ka dhacaan fatahaado isugu jira kuwo ka yimaadda wabiyada iyo togaga soo rogmada, kuwaas oo aadka u saameeyndoona qaar ka mid ah degmooyinka dalka Sida; Doolow, Luuq, Bu’aale, Jilib, Beledweyne, Bula-burde, Jalalaqsi, Mahaday, Jowhar, Balcad iyo qaar kale oo webiga uusan marin.

➤ Degmooyin ka mid ah gobolada: Bay, Bakool, Gedo, Galgaduud, Mudug, Togdheer, Sool, Nugaal iyo Bari ayaa waxaa aad u sareeysa suurtagalnimada ah in ay fatahaado ka dhacaa ay saameeyn doonaan nolosha iyo hab-nololeedka bulshooyinka ku nool degmooyinkaas.

➤ Degmooyinka iyo gobollada kor ku xusan waxay wajihi doonaan khataro ka imankarta Fatahaada webiyada iyo daadadka ay togagu soo rogaan.

➤ Waxaa sare u soo kacaya heerka biyaha wabiyada Shabeele iyo Juba taasina waxaa sabab u ah roobabka xoogan ee ka da’aya qeybo ka mid ah dalka iyo buuralayda Ethiopia.

Xarunta ka digsta halis wadareedka ee SODMA, ayaa mar kale Bulshada Soomaaliyeed u direeysay digniino iyo talooyin si loogu feejignaado saameynta roobabka guga uu ku yeelan karo nafta iyo Hantida shacabka Soomaaliyeed.

SODMA waxeey bulshada kula talineynaa inay tixgeliyaan Digniinaha ka soo baxaya hay’adda SODMA iyo dhamaan xaaladaha ku soo cusboonaanaya arrimaha roobabka

Nairobi (Caasimada Online) – Dowladaha Soomaaliya iyo Kenya ayaa galabta ku kala saxiixday magaalada Nairobi ee caasimadda dalka Kenya heshiisyo is-afgarad oo ku saabsan dhinacyada, Arrimaha dibedda, Nabadgalyada, Dhaqaalaha, Ganacsiga, Waxbarashada iyo arrimaha adeegga Bulshada.

Wasiirka Arrimaha Dibedda ee Soomaaliya Mudane Axmed Macallin Fiqi ayaa Sooaamliya u saxiixay heshiiskan.

Dhanka Kenya, waxaa heshiiskaan u saxiixay Wasiirka Arrimaha Dibedda Mudane Musalia Mudavadi, heshiisyadan Is-afgarad ee ay gaareen labada dal, ayaa kor loogu qaadayaa xiriirka iskaashi iyo wax wada qabsiga ka dhaxeeya Soomaaliya iyo Kenya.

Sidoo kale, Wasiirka Waxbarashada, Hiddaha iyo Tacliinta Sare, Mudane Faarax Sheekh Cabdulqaadir iyo Wasiirka Waxbarashada Kenya Mudane Ezekiel Machogu, ayaa kala saxiixday Heshiiska Is-afgaradka oo ku saabsan Iskaashiga Waxbarashada, Tababarka iyo Cilmi-baarista.

Heshiiskaan waxaa kor loogu qaadayaa xoojinta iskaashiga dhinaca waxbarashada ee labada dal.

Heshiisyadan ayaa qeyb ka ah Socdaalka Ra’iisul Wasaaraha Xukuumadda Jamhuuriyadda Federaalka Soomaaliya Mudane Xamsa Cabdi Barre, uu ku joogo dalka Kenya ee la xiriira adkaynta xiriirka labada dal iyo horumarinta iskaashiga dhinacyada badan leh.

Muqdisho (Caasimada Online) – Ciidamada hay’adda Sirdoonka iyo Nabad-sugidda Qaranka ee NISA ayaa fashiliyey isku day dil oo xubno Shabaab ah ay rabeen inay ka fuliyaan magaalada Muqdisho.

NISA oo soo bandhigtay labada nin oo mid kamid ah uu meyd yahay, ayaa waxay dilka ka fulin rabeen degmada Dharkenley ee gobolka Banaadir.

Ciidamada ayaa helay xogta labada dhagarqabe, kadibna waxaa lagu sameeyey daba-gal inta aysan gaarin bartilmaameedkoodii, sida ay goordhowey shaacisay NISA.

“Kadib waxaa halkaas lagu dilay mid kamid ah dhagarqabayaashii, iyada oo kii kale nolosha lagu qabtay, isagoo dhaawac ah,” ayaa lagu yiri qoraalka NISA.

Ciidamada NISA ayaa soo bandhigay meydka dhagarqabaha la dilay, dhaawaca kan nolosha lagu hayo iyo labo bistooladood oo ay ku hubeysnaayeen, islamarkaana ay qorsheynayeen inay dil ku geystaan.

Arrintan ayaa imaneysa xilli maalmihii u dambeeyay ay magaalada caasimada ah ee Muqdisho ay ka dhacayeen falal ammaan darri ah oo isugu jiro dilal, qaraxyo iyo weeraro loo adeegsanayay hoobiyeyaal kusoo dhacay xaafado ka tirsan gudaha caasimadda.

Dhammaan weeraradan ayaa dhacay, ayada oo weli dadaallo amni sugid ah ay wadaan ciidamada ammaanka oo bilo kahor ku guuleystay inay xasiliyaan amniga Muqdisho.